ಹಾಂವೆ ಆತ್ತ ಸಾಂಗ್ಚೊ ವಿಷಯು ಸುಮಾರ ವರ್ಸಾಚೆ ಪುಳ್ಳೊ. ಕಾರಂಜೆ ಗುಡ್ಡ್ಯಾಚೆ ಸುತ್ತುಮುತ್ತು ಮಸ್ತ ರಾನ ಆಸಿಲೆ. ತಂಜೆ ಜನಾನಿ ರಾಕ್ಡಾ ಖಾತಿರಿ ರಾನ್ನಾಕ ವಚುವುನು ರುಕು ಕಾತ್ತೊರ್ನು ರಾಕ್ಕುಡ ಕೊರ್ನು ಪೆಂಟಾಕ ಹೊರ್ನು ವಿಗ್ಚೆ ಆನಿ ತಾಜ್ಜೆನಿ ಘರಕಡೆ ಜಾವ್ಕಾಸಿಲೆ ಸಾಮಾನ ಗೆವ್ಚೆ. ತಾಂತು ಕೆಲವು ಜನಾಂಕ ತೊಚಿ ಏಕು ದಂಧೊ. ಹೊ ದಂಧೊ ಕರ್ತಲೊ ಮಾದ್ದು ಏಕ್ಲೊ ಧುರ್ಬಳೊ ಮನಿಷು. ಜಾಲ್ಯಾರಿ ಚಾಂಗ್ ಜನ. ಜೀವು ಗೆಲ್ಲ್ಯಾರೀ ಪಟ್ಟಿ ಸಾಂಗನಾ. ರಾನ್ನಕ ವಚುವುನು ರುಕ ಕಾತ್ತೊರ್ನು ರಾಕ್ಕುಡ ಕೊರ್ನು ಬಂಟ್ವಾಳ ಪೆಂಟಾಕ ವರ್ಚೆ ಆನಿ ತಂಯಿ ವಿಕ್ಕುವುನು ಘರಾಕ ಜಾವ್ಕಾ ಜಾಲ್ಲೆಲೆ ಸಾಮಾನ ಸಕ್ಕಡ ಆಂಗಡಿ ದಾಕುನು ಗೆವ್ನು ವಾಪಾಸ ವಗ್ಗ-ಕಾರಂಜೆಕ ವತ್ತಲೊ. ಸುಮಾರ ಧಾ ಮೈಲ್ ಜಾತ್ತಲೆ.
ಪುಳ್ಳೆ ಕಾಲಾರಿ ಬಸ ನಾತ್ತಿಲೆ ನಿಮಿತಿ ಜನಾನಿ ಚಮ್ಕುನೂಚಿ ಏಕ್ ಕಡೆ ದಾಕುನು ಅನೇಕ ಕಡೆಕ ವಚ್ಚುಕಾ ಪಡ್ತಲೆ. ಬಾರಿ ಕಷ್ಟಾರಿ ಜೀವನ ಕಡ್ತಲೊ ಮಾದ್ದು. ಏಕು ದಿವಸು ರಾಕ್ಕುಡ ಹಾಡುಕ ಮ್ಹೊಣು ಮಾದ್ದು ರಾನ್ನಾಕ ಗೆಲ್ಲೊ. ರಾನ್ನಾಂತು ತಾಣೆ ರುಕ್ಕಾಚೆ ಸುಕ್ಕಲೆ ಗೆಲ್ಲೆ ಮಾತ್ರ ಕಾತ್ತೊರ್ಚೆ ಆಸಿಲೆ. ತೆ ದಿವಸು ತಾಕ್ಕಾ ಸುಕ್ಕಲೆ ಗೆಲ್ಲೆ ದಿಸನಾಸಿ ಸೊದ್ದಿತಚಿ ರಾನ್ನಾಚೆ ಭಿತ್ತರಿ ಗೆಲ್ಲೊ.
ತಂಯಿ ಏಕ್ಕ ಕಡೆನ ಬಾಂಯಿ ಆಸಿಲಿ. ತಾಜ್ಜೆ ಲಾಗ್ಗಿಚಿ ಏಕು ಹೊಡು ರೂಕು ಸುಕ್ಕಿಲೊ ಮಾದ್ದುಕ ದಿಸ್ತಾ. ತೆ ಪಳವನು ತಾಕ್ಕಾ ಬಾರಿ ಖುಶಿ ಜಾತ್ತಾ. ಆನಿ ತೊಡೆ ದಿವಸ ಹಾಂಗಾಚಿ ಯೆವ್ನು ರಾಕ್ಕುಡ ಕಾತ್ತೊರ್ನು ವಿಕ್ಲ್ಯಾರಿ ತೊಡೆ ದುಡ್ಡ ಒಟ್ಟು ಕೊರ್ನು ನವ್ಹಿಚಿ ಏಕಿ ಕೊಡಲಿ ಗೆವೆತ. ಘರಕಡೆ ಬಾಯಲ ಚೆರ್ಡುಂವಾಂಕಯಿ ನವ್ಹೆಚಿ ಆಂವ್ಗಲೆ ಗೆವ್ನು ದಿವೆತ ಮ್ಹೊಣು ಚಿಂತುನು ತೊ ರೂಕು ಕಾತ್ತೊರ್ಚಾಕ ಸುರು ಕರ್ತಾ. ತಾಗೆಲೆ ಹಾತ್ತಾ ದಾಕುನು ತಿ ಕೊಡಲಿ ನಿಶೊರ್ನು ಲಾಗ್ಗಿಚಿ ಆಸಿಲೆ ಬಾಂಯಿಂತು ಪಡ್ತಾ.
ಮಾದ್ದು `ಹಾಂವೆ ಲೆಕ್ಕಿಲೆ ಏಕ, ಆತ್ತ ಜಾಲ್ಲೆ ಅನೇಕ. ಆಸಿಲಿ ಕೊಡಲಿ ಬಾಂಯ್ತು ಪೊಣು ಗೆಲ್ಲಿ. ಆನಿ ಹಾಂವೆ ಕಸಲ್ಯಾನಿ ರೂಕ ಕಾತ್ತೊರ್ನು ರಾಕ್ಕುಡ ಕೊರ್ಚೆ.' ಮ್ಹೊಣು ರೊಡುಕ ಸುರು ಕರ್ತಾ.
ಏಕು ಮ್ಹಾಂತಾರೊ ತಂಚಾನ ವತ್ತ ಆಸಿಲೊ ಲಾಗ್ಗಿ ಯೆವ್ನು`ತು ಕಸಲ್ಯಾಕ ರಡ್ತಾ' ಮ್ಹೊಣಾಲೊ.
ಮಾದ್ದು ವಿಷಯು ತಿಳ್ಸಿತಾ.
ಮ್ಹಾಂತಾರೊ "ತಿತ್ಲೆಚಿವೆ? ತಿ ಕೊಡಲಿ ಹಾಂವ ಕಾಣು ದಿತ್ತ ನಂವೆ?" ಮ್ಹೊಣು ಬಾಂಯ್ತು ಉಡ್ಡುವುನು ಏಕಿ ಬಾಂಗ್ರಾಚಿ ಕೊಡಲಿ ಹಾಣು "ಮಾದ್ದು, ಘೆ ತುಗೆಲಿ ಕೊಡಲಿ" ಮ್ಹಣ್ತಾ.
"ಹಿ ಕೊಡಲಿ ಮೆಗೆಲಿ ನಂಯಿ. ಮೆಗೆಲಿ ಕೊಡಲಿ ಲೊಕಂಡಾಚಿ. ಮಾಕ್ಕಾ ತೀಚಿ ಜಾವ್ಕಾ."
ಮ್ಹಾಂತಾರೊ ವಾಪಾಸ ಬಾಂಯ್ತು ಉಡ್ಡುವುನು ಅನೇಕಿ ಕೊಡಲಿ ಹಾಣು " ಘೆ ಮಾದ್ದು, ತುಗೆಲಿ ಕೊಡಲಿ" ಮ್ಹಣಾಲೊ.
ಮಾದ್ದು ಕೂಡ್ಲೆ "ಆಯ್ಯೊ ದೇವಾ, ಹಿ ಕೊಡಲಿ ರುಪ್ಪ್ಯಾಚಿ, ಹಿವಯಿ ಮೆಗೆಲಿ ನಂಹಿ. ಮೆಗೆಲಿ ಕೊಡಲಿ ಕಾಳಿ ಬಣ್ಣಾಚಿ. ಲೊಕಂಡಾಚಿ" ಮ್ಹಣಾಲೊ ಮಾದ್ದು.
ಮ್ಹಾಂತಾರೊ ವಾಪಾಸ ಬಾಂಯ್ತು ಉಡ್ಡುವುನು ಆನೇಕಿ ಕೊಡಲಿ ಹಾಡ್ತಾ. "ಮಾದ್ದು ಹಿ ವೆ ತುಗೆಲಿ ಕೊಡಲಿ?" ಮ್ಹಣ್ತಾ.
ಮಾದ್ದು ಸಂತೋಸು ಜಾವ್ನು "ವಯಿ ಹೀಚಿ ಮೆಗೆಲಿ ಕೊಡಲಿ" ಮ್ಹೊಣು ತಿ ಕೊಡಲಿ ಘೆತ್ತಾ.
ಮ್ಹಾಂತಾರೆಲೆ ರೂಪಾರಿ ಆಸಿಲೊ ದೇವು ಪ್ರತ್ಯಕ್ಷ ಜಾವ್ನು "ಮಾದ್ದು, ತುವೆ ಸತ್ಯ ಸಾಂಗಿಲೆ ಮಕ್ಕಾ ಖುಸಿ ಜಾಲ್ಲಾ. ತಸಿ ಜಾವ್ನು ಹಿ ತಿನ್ನಿ ಕೊಡಲಿ ತುಕ್ಕಾಚಿ ಹಾಂವ ದಿತ್ತಾ. ಆನಿ ಮುಖಾರಿ ತುಗೆಲೆ ಕಷ್ಟ ದೂರ ಜಾತ್ತಲೆ. ತುಂವೆ ಅಸಿಚಿ ಸತ್ಯಾರಿ ಆಸ್ಲ್ಯಾರಿ ಮಾಕ್ಕಾಯಿ ಖುಸೀ ಜಾತ್ತಾ." ಮ್ಹೊಣು ಸಾಂಗುವ್ನು ಅದೃಶ್ಯ(ಮಾಯಕ್) ಜಾತ್ತಾ.
ಮಾದ್ದು ತಿನ್ನಿ ಕೊಡಲಿ ಘೆವ್ನು ಘರಕಡೆ ಯೆತ್ತಾ ಆನಿ ತಾಗೆಲೆ ಬಾಯಲೆಲಾಗ್ಗಿ ಜಾಲ್ಲಲೊ ವಿಷಯು ಸಕ್ಕಡ ಸಾಂಗ್ತಾ.
ತಾಜ್ಜೆ ನಂತರ ಮಾದ್ದು ಸುಖಾರಿ ಜೀವನ ಕೊರ್ನು ಆಸ್ತಾ.
ದೇವಾನ ಸಾಂಗೆಲ್ಯಾವರಿಚಿ ತಾಗೆಲೆ ಕಷ್ಟ ಸಕ್ಕಡ ದೂರ ಜಾತ್ತಾ ಜಾಲ್ಯಾರಿ ಮಸ್ತ ಆಶಿ ನಾತ್ತಿಲೆ ನಿಮಿತಿ ಧನಿಕು ಜಾಯ್ನಾ.
ಹೇ ಪಳವುನು ತಾಗೆಲೆ ಘರಾಚೆ ಲಾಗ್ಗಿ ಆಸಿಲೊ ದಮ್ಮು ಆನಿ ತಾಗೆಲಿ ಬಾಯಲೆಕ ಆಶ್ಚರ್ಯ ಜಾತ್ತಾ. `ಕಾಲಿ ತಾಂಯಿ ಕಷ್ಟಾರಿ ಆಸಿಲೊ ಮಾದ್ದು ಆಜಿ ಪಳಯ್ಲ್ಯಾರಿ ಸುಖಾರಿ ಆಸ. ಹೆ ಸಕ್ಕಡ ಕಸಿ ಜಾಲ್ಲೆ ಮ್ಹೊಣು ಸಮಜುನು ಘೆವ್ಕಾ' ಮ್ಹೊಣು ಚಿಂತುನು ದಮ್ಮುಲಿ ಬಾಯಲ ಮಾದ್ದು ತಂಯಿ ಯೆವ್ನು ಮಾದ್ದುಲೆ ಬಾಯಲೆಲಾಗ್ಗಿ ವಿಷಯು ಸಮಜುನು ಘೆತ್ತಾ.
ಘರಕಡೆ ವಚ್ಚುನು ತಿಗೆಲೆ ಭ್ಹಾಂಮ್ಣಾಕ ರೂಕು ಕಾತ್ತೊರ್ನು ರಾಕ್ಕುಡ ಕೊರುಕ ರಾನ್ನಾಕ ಪೆಟೆಯಿತ್ತಾ ಆನಿ "ಕೊಡಲಿ ಬಾಂಯ್ತು ಗಾಲ್ನು ರೊಣು ಬಯ್ಸ ತೆದನಾ ದೇವು ಯೆವ್ನು ಮಾದ್ದು ಹಾಣು ದಿಲ್ಲ್ಯಾವರಿಚಿ ಬಾಂಗ್ರಾಚಿ, ರುಪ್ಯಾಚಿ ಕೊಡಲಿ ಹಾಣು ದಿಲ್ಲೆಲಿ ಘೆವ್ನು ಘರಕಡೆ ಯೆಯಾಚಿ" ಮ್ಹಣ್ತಾ.
ದಮ್ಮು 'ಕಸಲ್ಯಾಕಗೊ ಆಮ್ಕಾ ರಾಕುಡ, ಮಾದ್ದುಕ ಸಾಂಗ್ಲ್ಯಾರಿ ಹಾಣು ಗಾಲ್ನಾಂವೆ? ನುತಚಿ ರಾನ್ನಾಂತು ವಚ್ಚುನು ಕಷ್ಟ ಕಸಲ್ಯಾಕ ಪಾವ್ಕಾ. ಆಮ್ಕಾ ಕಸಲ್ಯಾಕ ಉಣೆ ಆಸ" ಮ್ಹಣ್ತಾ.
ತಾಗೆಲಿ ಬಾಯಲ "ತುಮ್ಮಿ ಚಡ ಉಲ್ಲೊಚಾಕ ನಜ್ಜ. ಹಾಂವೆ ಸಾಂಗ್ಲ್ಯಾವರಿ ಕರಾ. ವಚ್ಚಾ." ಮ್ಹಣ್ತಾ.
ದಾಮ್ಮು ತೊಂಡ ದಾಂಪುವ್ನು ರಾನ್ನಾಕ ಮ್ಹೊಣು ಬಾಯ್ಸರ್ತಾ.
ಹೆ ಕಾಣ್ಯೆಂತು ಆಮ್ಮಿ `ಬುದ್ಧಿ ಆಸ್ಲ್ಯಾರಿ ಕೊನಾಲಾಗ್ಗಿ ಕಸಿ ಜಿಗ್ಸುವೆತ' ಮ್ಹಣು ಸಿಕ್ಕುವೆತ.
ಸುಮಾರ ವರ್ಸ ಪುಡೆ ನಂದಾವರ ಗಾಂವಾಂತು ಏಕು ರಾಯು ಆಸ್ಸಿಲೊ. ತಾಗೆಲೆ ನಾಂವ ನಂದರಾಯು. ತಾಗೆಲೆ ನಾಂವಂಚಿ ತೆ ಗಾಂವಾಂಕ ಆಯಿಲೆ ಮ್ಹಣು ಸಾಂಗ್ತಾಚಿ. ತೆ ರಾಯಾಲೆ ಆಸ್ತಾನಾಂತು ಏಕು ಹಾಸ್ಯಗಾರು ಆಸ್ಸಿಲೊ. ನಿಜ್ಜಾವ್ನು ತೊ ಹಾಸ್ಯಗಾರು ನಂಯಿ. ತೊ ಬಾರಿ ಬುದ್ವಂತು ಆನಿ ತಾಗೆಲೆ ನಾಂವಂಯಿ ಬುದ್ವಂತು ಮ್ಹಣು. ತೊ ಬುದ್ವಂತು ಜಾಲ್ಲೆಲೆ ನಿಮಿತಿ ತಾಕ್ಕಾ ತೆ ನಾಂವ ಆಯಿಲೆ ಕಿ ಗೊತ್ನಾ. ಸಕ್ಕಡಾನಯಿ ತಾಕ್ಕಾ ತೇಚಿ ನಾಂವಾರಿ ಆಪ್ಪೊಚೆ.
ರಾಯಾಕ ಕಂಚೆ ನಮೂನೆಚೆ ತಿರ್ಮಾನ ದಿವ್ಚಾಕ ಜಾಯ್ನಾತ್ತಿಲೆ ಸಮಸ್ಯಾ ಆಯಿಲೆ ವೆಳಾರಿ ಹಾಣೆಚಿ ತೆ ಸಕ್ಕಡ ಸುದಾರ್ಸುಚೆ ಆಸ್ಸಿಲೆ. ತಸ್ಸಿ ಜಾವ್ನು ರಾಯಾಕ ಹೊ ಮ್ಹಳ್ಯಾರಿ ಮಸ್ತ ಮೊಗು. ತೆ ನಿಮಿತಿ ಆಸ್ತಾನಾಂತು ಆಸ್ಸಿಲೆ ಬಾಕಿ ಜನಾಕ ಹಾಗೆಲೆ ವಯರಿ ಜಾಳ.
ತೆ ವಿಷಯು ತಾಕ್ಕಾ ಗೊತ್ತಸ್ಲ್ಯಾರೀ ತಾಣೆ ಹಾಸುನುಚಿ ತಾಂಕಾಚಿ ಕುಂಕಡ-ಮಾಂಕಡ ಕೊರ್ಚೆ. ಕುಂಕಡ-ಮಾಂಕಡ ಮ್ಹಳ್ಯಾರಿ ಮೂರ್ಖು ಕೊರ್ಚೆ ಮ್ಹಣು.
ಅಸಿಚಿ ಆಸ್ತನಾ ಏಕ ದಿವಸು ಆಸ್ತಾನಾಚೆ ಬಾಕಿ ಜನ ಒಟ್ಟು ಜಾವ್ನು ಬುದ್ವಂತಾಕ ಕಸ್ಸಿ ಜಾವ್ವೊ ಏಕ ಪಟಿ ರಾಯಾಲೆ ಎದ್ರಾಕ ಮೂರ್ಖು ಕೊರ್ಕಾ ಮ್ಹಣು ಮಸ್ತ ಪ್ರಯತ್ನ ಕರ್ತಾಚಿ.
ಏಕ ದಿವಸು ತಾನ್ನಿ ರಾಯಾಲಾಗ್ಗಿ "ಪಯರಿ ಆಮ್ಮಿ ಬಂಗಾಡಿಕ ರಾಯಾಕ ಬೆಟ್ಟುಕ ಗೆಲ್ಲೆಲಿ ನಂವೆ? ತಂಯಿ ಆಮ್ಮಿ ಏಕ ಸುಣೆ ಬೂಕ್ಕಾವಯಲಿ ಕಾಣಿ ವಾಜ್ಜುನು ತಾಜ್ಜೆ ಪಿಲ್ಲಾಂಕ ಸಾಂಗ್ತಾಸ್ಸುಚೆ ಪಳಯಿಲಾ. ಆಮ್ಗೆಲೆ ಅರಮನೆಂತು ಆಸ್ಸುಚೆ ತೆ ಚಾಂಗ ಸುಣೆ ಆಸ್ಸ ನಂವೆ ತಾಕಾಯಿ ವಾಜ್ಜುಚಾಕ ಸಿಕೊಕಾ. ಹೆ ಕಾಮ ತುಮ್ಮಿ ಬುದ್ವಂತಾಕ ದಿಲ್ಲ್ಯಾರಿ ಮಾತ್ರ ಜಾತ್ತಲೆ. ದುಸ್ರೆ ಕೊಣಾಕಯಿ ಸುಣ್ಯಾಕ ವಾಜ್ಜುಕ ಸಿಕೊಚಾಕ ಜಾಯ್ಸ್ನಾ. ಬಂಗಾಡಿ ರಾಯಾಲಾಗ್ಗಿ ತಸ್ಸಲೆ ಸುಣೆ ಆಸ್ಸುಚೆ ಆನಿ ತುಮ್ಗೆಲಾಗ್ಗಿ ನಾಸುಚೆ ಹೆ ಆಮ್ಗೆಲೆ ಗಾಂವಂಚೆ ಮರ್ಯಾದೆಚೊ ಪ್ರಶ್ನೊ." ಆಸ್ಸಿ ಮ್ಹಣು ರಾಯಾಕ ಬುದ್ವಂತಾನ ನಾತ್ತಿಲೆ ತೆದನಾ ಕಾನ್ನಾಂತು ಪಿಳ್ಳೆ.
ರಾಯಾಕ ಕೂಡ್ಲೆ ಹೊ ವಿಷಯು ಪಟ್ಯೊಚಿ, ಹಾನ್ನಿ ಬುದ್ವಂತಾಕ ಮೂರ್ಖು ಕೊರ್ಚೆ ಖಾತಿರಿ ಸಾಂಗ್ತಾಚಿ. ಪಳೊಯಾ ಮೂರ್ಖ ಹಾನ್ನಿ ಜಾತ್ತಾಕಿ ಬುದ್ವಂತು ಜಾತ್ತಾ ಮ್ಹಣು ಲೆಕ್ಕುನು ಬುದ್ವಂತಾಕ ಆಪ್ಪಯಿಲೆ.
"ಪಳೆ ಬುದ್ವಂತಾ, ಹಾನ್ನಿ ಸಕ್ಕಡ ಸಾಂಗ್ತಾಚಿ ಬಂಗಾಡಿ ರಾಯಾಲಾಗ್ಗಿ ಏಕ ಸುಣೆ ಬೂಕ ವಾಜ್ಜುನು ತಾಜ್ಜೆ ಪಿಲ್ಲಾಂಕ ಕಾಣಿ ಸಾಂಗ್ಚೆ ಪಳಯಲಾ ಕಂಯಿ. ಆತ್ತ ತುವಯಿ ಆಮ್ಗೆಲೆ ಸುಣೆ ಆಸ್ಸ ನಂವೆ ತಾಕ್ಕಾ ವಾಜ್ಜುಚಾಕ ಸಿಕೆಲ್ಯಾರಿ ಪುರೊ. ಪಿಲ್ಲಾಂಕ ಕಾಣಿ ಸಾಂಗ್ಚೆ ನಾಕ್ಕಾ. ವಾಜ್ಜುಚಾಕ ಸಿಕೆತರಿ ವಾಜ್ಜುನು ಕಾಣಿ ಸಾಂಗ್ಚೆ ಕಾಮ ಹಾಂಕಾ ದಿವ್ಯಾ. ವಾಜ್ಜುಚಾಕ ಸಿಕೊಚೆ ಕಾಮ ಕಷ್ಟಾಚೆ ನಂವೆ? ತೆ ತು ಕರಿ ಜಾಯ್ನಾಂವೆ?" ಮ್ಹಣ್ತಾ.
ತೆದನಾ ಬುದ್ವಂತು "ಜಾಯ್ತ ರಾಯಾನೋ, ಜಾಲ್ಯಾರಿ ಮಾಕ್ಕಾ ತೊಡೊ ಸಮಯ ಜಾವ್ಕಾ. ಪಂದ್ರಾ ದಿವಸ ಜಾವ್ಕಾ ಜಾತ್ತಲೆ. ಹಾಂವ ಪ್ರಯತ್ನ ಕರ್ತಾ." ಮ್ಹಣಾಲೊ.
ರಾಯಾನ ಪಂದ್ರ ದೀಸಾಚೊ ಸಮಯು ದಿವ್ನು, ಸುಣ್ಯಾಕಯಿ ವ್ಹೊರುಕ ಸಾಂಗ್ಲೆ.
ಬುದ್ವಂತು ಸುಣ್ಯಾಕ ಘೆವ್ನು ನಂದಾರಾಚೆ ಘರಕಡೆ ದಾಕುನು ಬಾಯಲೆಕ ಆಪ್ಪೊವ್ನು ಮೊಗರ್ನಾಡಾಂತು ಆಸ್ಸುಚೆ ತಾಗೆಲೆ ಮ್ಹಾಲ್ಗಡ್ಯಾಲೆ ಘರಕಡೆ ಗೆಲ್ಲೊ.ನಂದಾರಾಂತೂಚಿ ಆಸ್ಸುನು ಸುಣ್ಯಾಕ ಸಿಕೊಚೆ ಆಸ್ತಾನಾಚೆ ಬಾಕಿ ಜನಾನಿ ಪಳವಚೆ ನಾಕ್ಕಾ ಮ್ಹಳ್ಳೆಲೆ ಉದ್ದೇಶಾನ.
ಘರಕಡೆ ವತ್ತರಿ ಹಾಣೆ ಆಲೋಚನ ಕರ್ತನಾ ತಾಗೆಲಿ ಬಾಯಲ "ತುಮ್ಮಿ ಕಸ್ಸಲೆ ಖಂತಿ ಕಾಡ್ತಾಚಿ. ಮಾಕಾಯಿ ವಿಷಯು ಕಳ್ಯಾರಿ ಮಾಕ್ಕಾ ಗೊತ್ತಸ್ಸಿಲೆ ಉಪಾಯು ಸಾಂಗ್ತಾ, ಜಾಯ್ನಾಂವೆ?" ಮ್ಹಣಾಲಿ.
ಹಾಜ್ಜೆ ಪುಡೆ ಕಿತ್ಲ್ಕಿ ಪಟಿ ತಿಣೆಯಿ ತಾಕ್ಕಾ ಸಹಾಯು ಕೆಲ್ಲಾ, ಹೊ ವಿಷಯು ತಿಕಾಯಿ ಕಳ್ಯಾರಿ ತಿವಯಿ ಉಪಾಯು ಸೊದ್ದುನು ದಿತ್ತನಂವೆ? ಮ್ಹಣು ವಿಷಯು ಸಕ್ಕಡ ತಿಗೆಲಾಗ್ಗಿ ಸಾಂಗ್ತಾ.
ತೆದನಾ ತಿ "ಹೊ ವಿಷಯುವೆ? ಪುಡೆ ಅಕ್ಬರಾಲೆ ಆಸ್ತಾನಾಂತು ಆಸ್ಸಿಲೆ ಬೀರಬಲಾಕಯಿ ರಾಯಾನ ಗಾಡ್ವಾಕ ವಾಜ್ಜುಕ ಸಿಕೊಚಾಕ ಸಾಂಗಿಲೆ ಮ್ಹಣು ಏಕಿ ಕಾಣಿ ಹಾಂವೆ ವಾಜ್ಜಿಲೆಲೊ ಉಡಗಾಸು. ತೆ ಕಾಣೆಂತು ಬೀರಬಲಾನ ಕೆಲ್ಲೊಲೊಚಿ ಉಪಾಯು ಮಾತ್ರ ತುಮ್ಮಿ ಆನಿ ಹಾಂವೆ ಕೊರುಕ ನಜ್ಜ, ದುಸ್ರೊಚಿ ಉಪಾಯು ಸೊದ್ದುಕಾ. ತಾಂತು ಬುಕ್ಕಾಚೆ ಪ್ರತಿ ಪಾನ್ನಾಚೆ ಮಾಗ್ಸಿ ತಣ ದವರ್ಲೆಲೆ. ಆಮ್ಮಿ ಕಸ್ಸಲೆ ಕೊರ್ಚೆ." ಮ್ಹಣು ಆಲೋಚನೆರಿ ಪಳ್ಳಿ.
ತಾಜ್ಜೆ ನಂತರ ಬುದ್ವಂತು ತಾಗೆಲಿ ಬಾಯಲೆನ ಸಾಂಗ್ಲ್ಯಾವರಿಚಿ ಏಕ ಕಾಣ್ಯೆಚೆ ಬುಕ ತಯಾರ ಕೊರ್ನು ದವರ್ತಾ.
ಪಂದ್ರಾ ದಿವಸು ಜಾತ್ತರಿ ಬುದ್ವಂತು ದೊನಿ ಕಾಣಿ ಬುಕ್ಕ ಆನಿ ಅರಮನೆಚೆ ಸುಣ್ಯಾ ಪೆಟ್ಯಾಕ ಘೆವ್ನು ಅರಮನೆಕ ಯೆತ್ತಾ.
ಅರಮನೆಚೆ ಆಸ್ತಾನಾಂತು ಗಾಂವಂಚೆ ಸಕ್ಕಡ ಜನ ಯೆವ್ನು ಸೆರ್ವಲಾಂಚಿ. ತಾಂಕಾ ಆಸ್ಥಾನಾಚೆ ಬಾಕಿಚೆ ಜನ ಅಸ್ಸ ನಂವೆ- ಬುದ್ವಂತಾಲೆ ವಿಷಯಾಂತು ಜಾಳ ಬೊಕ್ತಲೆ- ತಾನ್ನಿ ಆಪ್ಪೊವ್ನು ಹಾಳ್ಳಾ.
ಬುದ್ವಂತು ಆಸ್ಥಾನಾಕ ಆಯಿಲೆ ಕೂಡ್ಲೆ ಸಕ್ಕಡ ಜನ ಗುಸುಗುಸು ಕೊರುಕ ಸುರು ಕೆಲ್ಲೆ.
ತೆದನಾ ರಾಯು "ಕೊಣಂಯಿ ಆತ್ತ ಗಲಾಟೊ ಕೊರುಕ ನಜ್ಜ. ಬುದ್ವಂತು ಆತ್ತ ಸುಣ್ಯಾ ಕರೆನ ಬುಕ ವಾಜ್ಜೆಯ್ತಾ. ತಾಜ್ಜೆ ನಂತರ ತೇಜಿ ಸುಣ್ಯಾ ಕರೆನ ಆಸ್ತಾನಾಂತು ಆಸ್ಸುಚೆ ಬಾಕಿ ಜನಾ ಪೈಕಿ ಕೊಣಯಿ- ಆಸ್ತಾನಾಚೆ ಆಸನಾರಿ ವಿರಾಜಮಾನ ಜಾವ್ನು ಆಸ್ಸಿಲ್ಯಾಂಗೆಲೆ ಪೈಕಿ- ತೆ ಸುಣ್ಯಾ ಕರೆನ ತಾಜ್ಜೆ ಪಿಲ್ಲಾಂಕ ಬುಕ ವಾಜ್ಜುನು ಕಾಂಣಿ ಸಾಂಗ್ಚೆ ಕಾಮ ಕರ್ತಾಚಿ. ಬುದ್ವಂತಾ ದಾಕಯಿ ತುಗೆಲೆ ಪಂದ್ರಾ ದೀಸಾಚೆ ಮೆಹನತ." ಮ್ಹಣಾಲೊ.
ಬುದ್ವಂತಾನ ಏಕ ಕಾಣೆ ಬುಕ ಕಾಳ್ಳೆ ಆನಿ ಸುಣ್ಯಾಕ ಘೇವ್ನು ರಾಯಾಲೆ ಎದ್ರಾಕ ಆಸ್ಸುಚೆ ಖಾಲಿ ಜಾಗ್ಯಾರಿ ಉಚ್ಚುವ್ನು ಬುಕ ನೆಲಾರಿ ದವರ್ಲೆ. ಸುಣ್ಯಾಲೆ ಖಾನ್ನಾಂತು ಕಸ್ಸಲ್ಕಿ ಸಾಂಗುವ್ನು ಬುಕ್ಕಾಲಾಗ್ಗಿ ಸುಣ್ಯಾಕ ಬಸಯಿಲೆ. ಸುಣೆ ತುರಂತ ತೆ ಬುಕ್ಕಾಕ ಪಳವ್ನು ಕುಂಯಿ.......ಕುಂಯಿ..... ಕೊರ್ನು ಬುಕ್ಕಾಚೆ ಏಕಕಚಿ ಪಾನ್ನ ಲೆವಂತಚಿ ಗೆಲ್ಲೆ. ತಸ್ಸಿಚಿ ಕಡೇಚೆ ಪಾನ್ನ ತಾಂಯಿ ತಸ್ಸಿ ಕೆಲ್ಲೆ ಮಾಗಿರಿ ಜೋರು ಬೊಂಕೂಕ ಸುರು ಕೆಲ್ಲೆ.
ಆಸ್ತಾನಾಂತು ಆಸ್ಸಿಲೆ ಸಕ್ಕಡ ಜನ-ರಾಯು ಸಮೇತ- ಅಜಪ ಜಾಲ್ಲೆ. ತುರಂತ ಬುದ್ವಂತಾನ ಕಾಣ್ಯೆಚೆ ಬುಕ ಕಾಳ್ಳೆ ಆನಿ ತಾಗೆಲೆ ಜಾಗ್ಯಾರಿ ಯೆವ್ನು ಬಸ್ಲೊ.
ರಾಯು ಆನಿ ಬಾಕಿ ಜನ ಸಕ್ಕಡ ಖೂಸೇರಿ ಚಪ್ಪಾಳೆ ಮಾರುಕ ಸುರು ಕೆಲ್ಲೆ.
ನಂತರ ರಾಯಾನ ಬಾಕಿ ಜನಾಲಾಗ್ಗಿ ಸಾಂಗ್ಲೆ "ತುಮ್ಮಿ ತೆದುಸು ಬಂಗಾಡಿ ರಾಯಾಲಾಗ್ಗಿ ಬುಕ ವಾಜ್ಜುನು ಪಿಲ್ಲಾಂಕ ಕಾಣ್ಯೊ ಸಾಂಗ್ಚೆ ಸುಣೆ ಆಸ್ಸ ಮ್ಹಳ್ಳೆಲೆ ನಂವೆ? ಆತ್ತ ಮೆಗೆಲೆ ಆಸ್ತಾನಾಂತುಯಿ ಬುಕ ವಾಜ್ಜುಚೆ ಸುಣೆ ಬುದ್ವಂತಾನ ತಯಾರ ಕೆಲ್ಲಾ. ಆತ್ತ ತುಮ್ಮಿ ತಾಜ್ಜೆ ಕರೆನ ಪಿಲ್ಲಾಂಕ ಕಾಣ್ಯೊ ಸಾಂಗ್ಚೆ ತಸ್ಸಿ ಕೊರ್ಕಾ. ಕೊಣ ತೆ ಕಾಮ ಕರ್ತಾಚಿಕಿ ತಾನ್ನಿ ಎದುರು ಯೆಯ್ಯಾ." ಮ್ಹಣಾಲೊ.
ಕೊಣಯಿ ಎದುರು ಯೆನಿಚಿ.
ಜಾಲ್ಯಾರಿ ತೆದುಸು ರಾಯಾಲೆ ಕಾನ್ನಾಂತು ಪಿಳ್ಳೆಲೆ ಜನ ಸಕ್ಕಡ ರಾಯಾಕ ಆಡ ಪಳ್ಳೆಚಿ ಆನಿ "ಆಮ್ಮಿ ಬುದ್ವಂತಾಕ ಮೂರ್ಖು ಕೊರ್ಕಾ ಮ್ಹಣು ಲೆಕ್ಕುನು ತಸ್ಸಿ ಪಟ್ಟೀಚಿ ಸಾಂಗಿಲೆ. ಆತ್ತ ಪಳಯಲ್ಯಾರಿ ಬುದ್ವಂತಾನ ಕೊಣಾಕಯಿ ಕೊರುಕ ಜಾಯ್ನಾತ್ತಿಲೆ ಕಾಮ ಕೊರ್ನು ದಾಕ್ಕೆಲಾ. ಆಮ್ಮಿ ಸಕ್ಕಡ ತಾಗೆಲಾಗ್ಗಿ ಮಾಫಿ ಮಾಗ್ತಾಚಿ." ಮ್ಹಣಾಲೆ.
ಬುದ್ವಂತಾನಯಿ ತಾಂಕಾ ಮಾಫಿ ಕೆಲ್ಲೆ.
ನಂತರ ರಾಯಾನ ಬುದ್ವಂತಾಲಾಗ್ಗಿ "ತುವೆ ಹೆ ಕಸ್ಸಿ ಕೆಲ್ಲೆ ಮ್ಹಣು ಸಕ್ಕಡ ಜನಾಕಯಿ ಕೊಳ್ಚೆ ತಸ್ಸಿ ಸಾಂಗ" ಮ್ಹಣಾಲೊ.
ಬುದ್ವಂತಾನ ತಾಗೆಲಾಗ್ಗಿ ಆಸ್ಸುಚೆ ದೊನಿ ಕಾಣೆಚೆ ಬುಕ್ಕ ಕಾಣು ರಾಯಾಕ ದಾಕ್ವೊನು "ರಾಯಾನೋ, ಆನಿ ಹಾಂಗಾ ಆಸ್ಸಿಲೆ ಜನಾನೋ, ಹೆ ದೊನಿ ಬುಕ್ಕಾಂತು ಏಕ್ಕ ಬುಕ್ಕಾಕ ಜಳ್ಯಾಚಿ ಘಾಣಿ ಯೆತ್ತಾ, ಆನೇಕಾಕ ಯೆನಾ. ಮಾಕ್ಕಾ ರಾಯಾನ ಹೆ ಕಾಮ ಸೊಂಪ್ತನಾ ಮಾಕ್ಕಾಚಿ ಕಸ್ಸಲೆ ಕೊರ್ಚೆ ಮ್ಹಣು ಕಳ್ನಿ. ಹಾಂವೆ ಪಂದ್ರಾ ದಿವಸಾಚೊ ವಾಯಿದೊ ಗೆತ್ಲೊ ಆನಿ ಘರಕಡೆ ಗೆಲ್ಲೊ. ಹೇಚಿ ವಿಷಯಾಂತು ಖಂತೇರಿ ಬಸ್ಸಿಲೆ ತೆದನಾ ಮೆಗೆಲಿ ಬಾಯಲ ಯೆವ್ನು ಮ್ಹೆಗೆಲೆ ಖಂತೆಚೊ ಕಾರಣ ಕೊಳ್ನು ಘೆವ್ನು ಮಾಕ್ಕಾ ಹೊ ಉಪಾಯು ಸಾಂಗುವ್ನು ದಿಲ್ಲೊ. ಕಾಣ್ಯೆಚೆ ಬುಕ ಜಳ್ಕಾಚೆ ಓಟ್ಟು ದವರ್ನು ಮಸ್ತ ವೇಳಾನಿ ತೆ ಕಾಣು ವತ್ತಾಕ ಸುಕ್ಕ್ವೊನು ಹಾಳ್ಳೆಲೆ. ತೇಚಿ ಆಜಿ ಸುಣ್ಯಾಚೆ ಎದ್ರಾಕ ದವರ್ಲೆ. ಸುಣೆ ಜಳ್ಕ್ಯಾಚೆ ವಾಸನೆಕ ಬುಕ್ಕಾಚೆ ಪಾನ್ನಾ ಮಾಗ್ಸಿ ಜಳ್ಕೆ ಆಸ್ಸಕಿ ಮ್ಹಣು ಪಳವಚಾಕ ಬುಕ ಲೆವ್ನು ಏಕಕಚಿ ಪಾನ್ನ ಮಗ್ಚುಚಾಕ ಸುರು ಕೆಲ್ಲೆ ಆನಿ ತಾಜೆ ಸ್ವಭಾವಾಚೆ ಪ್ರಕಾರ ಕುಂಯಿ .......ಕುಂಯಿ ಕರ್ತ ಗೆಲ್ಲೆ. ಸಗ್ಳೇ ಬುಕ ಮಗ್ಚುನು ಜಾತ್ತರಿ ಕಾಯಿ ಮ್ಹೆಳ್ನಾತ್ತಿಲೆ ಖಾತಿರಿ ಬೊಂಕ್ಚಾಕ ಸುರು ಕೆಲ್ಲೆ. ತುಮ್ಮಿ ಸಕ್ಕಡ ತೆ ಪಳವನು ಸುಣೆ ಬುಕ ವಾಜ್ಜಿತಾ ಆನಿ ವಾಜ್ಜುನು ಜಾಲ್ಲೆ ಮ್ಹಣು ತಿಳ್ಸಿತಾ ಮ್ಹಣು ಲೆಕ್ಲೆ. ಹೊ ಉಪಾಯು ಪುಡೆ ಅಕ್ಬರಾಲೆ ಆಸ್ತಾನಾಂತು ಆಸ್ಸಿಲೆ ಬೀರಬಲಾನಂಯಿ ಕೆಲ್ಲೆಲೆ ಮೆಗೆಲೆ ಬಾಯಿಲೆಕ ಗೊತ್ತಸ್ಸಿಲೆ. ತಾಂತು ಸುಣೆ ನಂಯಿ, ಗಾಡ್ಡವ. ಇತ್ಲೆಚಿ ಹಾಜ್ಜೊ ಗುಟ್ಟು." ಮ್ಹಣಾಲೊ.
ತೆದನಾ ರಾಯಾನ "ತಸ್ಸಿ ಜಾಲ್ಯಾರಿ ಜಳ್ಕೆಚಿ ಘಾಣಿ ಯೆನಾತ್ತಿಲೆ ಅನೇಕ ಬುಕ ಕಸ್ಸಲ್ಯಾಕ ಹಾಳ್ಳಾ" ನಿಮ್ಗಿಲೆ.
"ತೆವೆ ರಾಯಾನೋ, ತುಮ್ಮಿ ತೆದುಸು ಮಾಕ್ಕ, ಸುಣ್ಯಾನ ಬುಕ ವಾಜ್ಜಿಲ್ಯಾರಿ ಮಾತ್ರ ಪುರೊ. ಪಿಲ್ಲಾಂಕ ಕಾಣಿ ಸಾಂಗ್ಚೆ ಕಾಮ ತಾಂಕಾ ದಿತ್ತಾ ಮ್ಹಳ್ಳೆಲೆ ನಂವೆ? ಮೆಗೆಲೆ ಕಾಮ ಜಾತ್ತರಿ ತಾನ್ನಿ ಸುಣ್ಯಾಕರೆನ ಪಿಲ್ಲಾಂಕ ಕಾಣಿ ಸಾಂಗ್ಚಾಕ ಮುಖಾರಿ ಆಯ್ಲ್ಯಾರಿ ತಾಂಕಾ ದಿವ್ಚೆ ಖಾತಿರಿ ಹೆ ಅನೇಕ ಬುಕ. ತೆ ಬುಕ ಸುಣ್ಯಾಚೆ ಎದ್ರಾಕ ದವರ್ಲ್ಯಾರಿ ತೆ ಹೂಂಗುಕ ಸಮೇತ ವಚ್ಚನಾ. ತಾನ್ನಿ ಮಾಕ್ಕಾ ಸಗಳೆ ಆಸ್ತಾನಾಚೆ ಜನಾಲೆ ಎದ್ರಾಕ ಮೂರ್ಖು ಕೊರ್ಚೆ ಖಾತಿರಿಚೀ ಗಾಂವಂಚೆ ಇತ್ಲೆ ಜನಾಂಕ ಆಪ್ಪೆಯಲಾ ಮ್ಹಣು ಕಳ್ಳಾ. ಆತ್ತ ತಾನ್ನಿಚೀ ಮೂರ್ಖ ಜಾಲ್ಲಿಚಿ. ತಾಂಕಾ ಆನಿ ಮುಕಾರಿ ಚಾಂಗ ಬುದ್ಧಿ ದಿವೊ ಅಮ್ಗೆಲೆ ನಂದಾರಚೊ ವಿನಾಯಕು." ಮ್ಹಣು ರಾಯಕ ಆನಿ ಜನಾಂಕ ಸಕ್ಕಡಾಂಕ ವಂದನಾ ಕರ್ತಾ ಆನಿ ತಾಗೆಲೆ ಆಸನಾರಿ ಬಸ್ತಾ.
ರಾಯಾಕ ಬುದ್ವಂತಾಲೆ ಹೆ ಚಮತ್ಕಾರು ಪಳವ್ನು ಖೂಶಿ ಜಾವ್ನು ತಾಕ್ಕಾ ಇನಾಮು ದಿತ್ತಾ.
ಹೆ ಕಾಣಿ-ಆನ್ನೆಕ್ಲ್ಯಾಲೆ ವಿಷಯಾಂತು ಜಾಳ ಮತ್ಸರ ಪಾವ್ಚಾಕ ನಜ್ಜ. ತಾಂಗೆಲ್ಯಾಂತು ಆಸ್ಸುಚೆ ಚಾಂಗ ಗುಣಾಕ ಕೆದನಾಯಿ ಮೊಲ ದಿವ್ಕಾ- ಮ್ಹಳ್ಳಲೊ ವಿಷಯು ಆಮ್ಕಾ ತಿಳ್ಸಿತಾ.
ಬಂಟ್ವಾಳ ಆನಿ ಮೂಡ್ಬಿದ್ರೆ ವಾಟ್ಟೆರಿ ರಾಯಿ ಮ್ಹಳ್ಳಲೊ ಏಕು ಸಾನು ಗಾಂವು ಮ್ಹೆಳ್ತಾ. ತೆ ಗಾಂವಾಂತು ಗೋವಿಂದ ರಾವ್ ಮ್ಹಳ್ಳಲೊ ಏಕ್ಲೊ ದುರ್ಬಳೊ ಸಾಗುವಳಿ ಕೊರ್ನು ಕಷ್ಟಾರಿ ಜೀವನ ಕಾಡ್ತ ಆಸ್ಸಿಲೊ. ತಾಕ್ಕಾ ಚಾರಿ ಚೆಲ್ಯಾಚೇಚಿ ಚೆರ್ಡುಂವ. ಜಾಲ್ಯಾರಿ ತೆ ಚಾರಿ ಜನಾಕಯಿ ವಿದ್ಯೆ ನಾ. ಮಾತ್ರವೆ? ಬುದ್ಧಿಯಿ ನಾ. ತಾನ್ನಿ ಸಾನಾದಾಕೂನು ಉಂಡಾಡಿಸೆ ಬೊವ್ನುಚಿ ದೀಸ ಕಾಳ್ಳೆಲೆ. ಬುದ್ಧಿ ಸಾಂಗುಕ ತಾಂಕಾ ಆವ್ಸು ನಾಸ್ಸಿಲಿ. ಸಾನ್ನ ಚೆಲ್ಯಾಲೆ ಬಾಣಾಂತಿರೆ ವೆಳಾರಿ ತಿ ಗೆಲ್ಲಿ. ತೆದನಾ ಮಾಲ್ಗಡೆ ಚೆಲ್ಯಾಕ ಸ ವರ್ಸ. ಬಾಪ್ಸುಕ ಸಾಗುವಳಿ ಕಾಮ ಆಸ್ಸಿಲೆ ನಿಮಿತಿ ತಾಕ್ಕಾ ಚೆರ್ಡುಂವಾ ದಿಕ್ಕಡೆ ಮನಗಾಲುಕ ಜಾಯ್ನಿ.
ಸಾನ್ನ ಚೆರ್ಡುಂವಾಂಕ ಪಳವ್ಚಾಕ ಕಷ್ಟ ಜಾಲ್ಯಾರೀ ತಾಣೆ ಆನೇಕಿ ವಾರ್ಡಿಕ ಕೊರ್ನು ಘೇನಿ. ತಾಗೆಲಿ ಏಕಿ ವಿಧವೆ ಮೌಶಿ ಚೆರ್ಡುಂವ ನಾತ್ತಿಲಿ ಆಸ್ಸಿಲಿ. ತಿಕ್ಕಾ ಕೊಣಯಿ ನಾತ್ತಿಲೆ ನಿಮಿತಿ ಗೋವಿಂದರಾಯಾನ ತಾಂಗೆತಯಿ ರಾಬ್ಬೊವ್ನು ಹೆ ಚೆರ್ಡುಂವಾಕ ಹೊಡ ಕರಯಿಲೆ.
ಜಾಲ್ಯಾರಿ ತಾಂಕಾ ವಿದ್ಯಾಬುದ್ಧಿ ದಿವೊಚಾಕ ಮಾತ್ರ ತಾಜ್ಜಾನ ಜಾಯ್ನಿ. ತಾಗೆಲಿ ಮೌಶಿಕಯಿ ಪ್ರಾಯ ಜಾಲ್ಲೆಲೆ ನಿಮಿತಿ ಚೆರ್ಡುಂವಾಕ ಹೊಡ್ಡ ಕರ್ಚೆ ವಿಷಯಾಂತು ಮಾತ್ರ ತಿಣೆ ಮೆಹನತ ಗೆತ್ತಿಲೆ.
ಚೆರ್ಡುಂವ ಪ್ರಾಯೇಕ ಯೆತ್ತನಾ ತಿಗೆಲೆ ಉತ್ರಯಿ ತಾನ್ನಿ ಆಯ್ಕನಿ. ಮಾಗಿರಿ ತಿಣೆ ತಾಂಕಾ ಕಸ್ಸಿ ಬುದ್ಧಿ ಸಾಂಗ್ಚಿ?
ತಸ್ಸಿಂಚಿ ಚೆರ್ಡುಂವ ಪ್ರಾಯೇಕ ಯೆತ್ತನಾ ತಿ ಗೆಲ್ಲಿ. ನಂತರ ಹೆ ಚೆರ್ಕ್ಯಾಂಕ ಉಂಡಾಡಿ ಜಾವ್ನು ಭೊವ್ಚಾಂಕ ಕೊಣಾಲಿಯಿ ಅಡ್ಡಿ ನಾತ್ತಿಲೆ ನಿಮಿತಿ ತಾಂಕಾಯಿ ಉತ್ತಮ್ (ಲಾಯಕ) ಜಾಲ್ಲೆ.
ಅಸ್ಸಿಚಿ ವರ್ಸ ವತ್ತಾಚಿ ಗೋವಿಂದರಾಯು ಮ್ಹಾಂತಾರೊ ಜಾಲ್ಲೊ. ತಾಕ್ಕಾ ಏಕ್ಕಿಚಿ ಖಂತಿ. ಮೆಗೆಲೆ ನಂತರ ಹೆ ಚೆರ್ಡುಂವಾಂಕ ಗತಿ ಕೊಣ ಮ್ಹಣು.
ಏಕು ದಿವಸು ತೊ ಚಾರಿ ಜನಾಕಂಯಿ ಆಪ್ಪೊವ್ನು ತಾಂಕಾ ಬುದ್ಧಿವಾದ ಸಾಂಗುಕ ಪಳಯಿತಾ.
"ಮಾಕ್ಕಾ ಪ್ರಾಯ ಜಾಲ್ಲಿ. ಆನಿ ಗಾದ್ಯಾಚೆ ಕಾಮ ಕೊರುಕ ಮೆಜ್ಜಾನ ಜಾಯ್ನಾ. ಆತ್ತಚಿ ತುಮ್ಮಿ ಮೆಗೆಲೆ ಸಂಗಾತಿ ಕಾಮ ಕೆಲ್ಲ್ಯಾರಿ ಮೆಗೆಲೆ ನಂತರ ಸಾಗುವಳಿ ಕೊರ್ಚೆ ಕಸ್ಸಿ ಮ್ಹಣು ಸಿಕ್ಕುವೆತ. ಏಕಿ ಗ್ಯಾದಿ ಆಸ್ಸ. ಹಾತ್ತಾಕ ಮಾತ್ತಿ ಜಾಲ್ಲ್ಯಾರಿ ತೊಂಡಾಕ ಧಂಯ. ಹಿ ಗ್ಯಾದಿ ಮಾತ್ರ ಕನ್ನಡಾಚಿ `ಕೈ ಕೆಸರಾದರೆ ಬಾಯಿ ಮೊಸರು' ಹೇಚಿ ಆಮ್ಗೆಲೆ ಭಾಸೆನ ಆಮ್ಮಿ ಕಷ್ಟ ಪಾವ್ಲ್ಯಾರಿ ಮಾತ್ರ ಆಮ್ಗೆಲೆ ಪೊಟ ಭರ್ತಾ. ನುತಚಿ ಬಸ್ಲ್ಯಾರಿ ಸದಂಯಿ ಕೊಣಯಿ ಪೊಟ್ಟಾಕ ದಿನಾಂಚಿ. ತಸ್ಸಿ ಜಾವ್ನು ತುಮ್ಮಿ ಪಾಯಿ ಸಕಾಣಿ ದಾಕೂನುಚೀ ಮೆಗೆಲೆ ಒಟ್ಟು ಗಾದ್ಯಾ ಕಾಮಾಕ ಯೆಯ್ಯಾಚಿ" ಮ್ಹಣಾಲೊ.
ತೆದನಾ ತೆ ಚಾರಿ ಜನಯಿ ಒಟ್ಟೂಚಿ " ಗಾದ್ಯಾ ಕಾಮ ಕೊರುಕ ಕಸ್ಸಲೆ ಸಿಕ್ಚೆ. ತೆ ಕಸ್ಸಲೆ ಕಷ್ಟ ಆಸ್ಸ. ಆನಾ, ತು ಕಾಂಯಿ ಆಮ್ಗೆಲೊ ಹುಸ್ಕೊ ಕಾಣಕಾ. ಆಮ್ಮಿ ಆತ್ತಚಿ ಕಾಮಕ ಯೆನಾಚಿ. ಆತ್ತ ತು ಆಸ್ಸ ನಂವೆ? ತುಗೆಲೆ ನಂತರ ಆಮ್ಮಿ ಗಾದ್ಯಾಚೆ ಕಾಮ ಕರ್ತಾಚಿ." ಮ್ಹಣ್ತಾಚಿ ಆನಿ ಬಾಯರ ವತ್ತ ರಾಬ್ಲಿಚಿ.
ಮ್ಹಾಂತಾರೊ ಗೋವಿಂದರಾಯಾಕ ಕಸ್ಸಲೆ ಕೊರ್ಚೆ ಮ್ಹಣು ಕಳ್ನಾಸ್ಸಿ ತಾಗೆಲೆ ಏಕ ದೊಸ್ತಾಲಾಗ್ಗಿ ಹೊ ವಿಷಯು ಸಾಂಗ್ತಾ. ತೆದನಾ ತೊ ತಾಕ್ಕಾ ಏಕು ಉಪಾಯು ಸಾಂಗುವ್ನು ದಿತ್ತಾ.
ಕೆಲವು ಮಹಿನೆ ಜಾಲ್ಲೆ. ಮ್ಹಾಂತಾರೊ ಸಿಕಾರಿ ಪಳ್ಳೊ. ತೆದನಾ ತಾಣೆ ಚಾರಿ ಜನ ಚೆರ್ಡುಂವಾಂಕಯಿ ಆಪ್ಪಯತಾ. ಆನಿ ಏಕೆಕ್ಲಾಂಕ ಏಕೊಕು ಗುಟ್ಟು ಸಾಂಗ್ತಾ.
ತಾಜ್ಜೆ ನಂತರ ತೊ ಚಾರಿ ಜನಾಲಾಗ್ಗಿ "ಹೊ ಗುಟ್ಟು ಮಾತ್ರ ಕೊಣಾಕಯಿ ಸಾಂಗುನಾಕಾಚಿ. ತಾಜ್ಜೊ ಪಯದೊ ತಾನ್ನಿ ಘೇವ್ನು ತುಮ್ಕಾ ಕಾಯಿ ವರಸನಾ. ಹಾಂವೆ ತುಮ್ಕಾ ಸಾಂಗ್ಚೆ ಆಸ್ಸಿಲೆ ಸಕ್ಕಡ ಸಾಂಗುವ್ನು ಜಾಲ್ಲಾ. ತುಮ್ಕಾ ನಸಿಬ ಆಸ್ಲಾರಿ ಚಾಂಗ ಜಾತ್ತಲೆ" ಮ್ಹಣು ಸಾಂಗುವ್ನು ಗೋವಿಂದರಾಯಾನ ದೊಳೆ ದಾಂಪ್ಲೆ.
ಗೋವಿಂದರಾಯಾಲೆ ಕ್ರಿಯಾಕರ್ಮ ಸಕ್ಕಡ ಜಾತ್ತರಿ ಚಾರಿ ಜನ ಕೊರೆ ಪಿಕ್ಕಾಸ ಘೆವ್ನು ಗಾದ್ಯಾಕ ಗೆಲ್ಲಿಂಚಿ ಆನಿ ಏಕಕ್ಲೊ ಏಕೆಕ ಮುಲ್ಲ್ಯಾ ದಾಕುನು ಕೊಂಡುಕ ಸುರು ಕೆಲ್ಲೆ.
ಯೆದ್ದೊಳು ತಾಂಯಿ ಬೊವ್ನು ಆಸ್ಸಿಲೆ ಗೋವಿಂದರಾಯಾಲೆ ಚೆರ್ಡುಂವ ಆಜಿ ಕಸ್ಸಲ್ಖಾತಿರಿ ಗಾದ್ಯಾಂತು ಕಾಮ ಕರ್ತಾಚಿ ಮ್ಹಣು ಪಳವ್ಚಾಕ ಗಾಂವ್ಚೆ ಸಕ್ಕಡ ಜನ ಯೆವ್ನು ಸುತ್ತೂಚಿ ರಾಬ್ತಾಚಿ.
ಹಾಂಗೆಲಾಗ್ಗಿ ಕಸ್ಸಲೆ ಕರ್ತಾಚಿ ಮ್ಹಣು ನಿಮ್ಗಿಲಾರಿ ಉಲ್ಲೆನಾಚಿ. `ಹಾನ್ನಿ ಉಲ್ಲಯಿನಾತ್ಲಾರಿ ಆಮ್ಕಾ ಕಸ್ಸಲ್ಯಾಕ ಹಾಂಗೆಲಿ ಉಸಾಬರಿ.' ಮ್ಹಣು ಚಿಂತುನು ತಾಂಗ್ತಾಂಗೆಲಿ ವಾಟ ತಾನ್ನಿ ದರ್ಲಿ.
ಗಾದ್ದೊ ಸಗ್ಳೊ ಕೊಂಡುವ್ನು ಜಾಲ್ಲ್ಯಾರಿ ಹಾಂಕಾ ಆನ್ನಾನ ಸಾಂಗಿಲೆ ಮ್ಹಳ್ತಾತ್ತಿಲೆ ಪಳವ್ನು ತಾನ್ನಿ ತಾಂಚಿತ್ಲ್ಯಾಕ ’ಪಟ್ಟಿ ಮಾರ್ಲೆಲಿ ಮ್ಹಣು ದಿಸ್ತಾ. ನಂಯಿ ಜಾಲ್ಯಾರಿ ಆಮ್ಗೆಲೆ ಚಾರಿ ಜನಾಂತು ಏಕ್ಲಾಕ ಪುಣಿ ಮ್ಹೆಳ್ಕಾ ಆಸ್ಸಿಲಿ ನಂವೆ?’ ಮ್ಹಣು ಉಲ್ಲಯ್ತನಾ ಚಾರಿ ಜನಯಿ ಒಟ್ಟು ’ಜಾವ್ನು ಆನ್ನಾನ ತುಕ್ಕಾ ಕಸ್ಸಲೆ ಸಾಂಗಿಲ’ ಮ್ಹಣು ಏಕ್ಲಾ ಏಕ್ಲೊ ನಿಮ್ಗಿತಾ.
ಪಳಯತನಾ ಪ್ರತಿ ಏಕ್ಲಾಕಯಿ ಗಾದ್ಯಾಚೊ ದುಸ್ರ್ದುಸ್ರೊ ಮೂಲ್ಲೊ ಕೊಂಡ್ಲ್ಯಾರಿ ಕೊಪ್ಪರಿಗಾ ಮ್ಹೆಳ್ತಾ ಮ್ಹಳ್ಳಲೆ.
ಆತ್ತ ಕಸ್ಸಲೆಯಿ ಮ್ಹೆಳ್ನಿ.
’ಕಸೀ ಗಾದ್ದೊ ಕೊಂಡುವ್ನು ಜಾಲ್ಲಾ ನಂವೆ? ಪೆಂಟಾಕ ವಚ್ಚುನು ಬಿಯ್ಯೊ ಹಾಣು ಗಾಲ್ಲ್ಯಾರಿ ಫಲ ಮ್ಹೆಳ್ತಲೆ’ ಮ್ಹಣು ಚಿಂತುನು ಪೆಂಟಾಕ ವತ್ತಾಚಿ ಆನಿ ಬಿಯ್ಯೊ ಹಾಣು ಗಾದ್ಯಾಂತು ಗಾಲ್ನು ಸಾಗುವಳಿ ಕೊರುಕ ಸುರು ಕರ್ತಾಚಿ.
ಏಕ ಪಟಿ ಹುಮ ದೆವೊನು ಕಾಮ ಕೆಲ್ಲೆಲೆ ನಿಮಿತಿ ತಾಂಕಾ ಆತ್ತ ಕಾಮ ಕೊರ್ಚೆ ನಾಕ್ಕಾ ಮ್ಹಣು ದಿಸ್ಸನಾತ್ತಿಲೆ ನಿಮಿತಿ ಫಲ ಯೆವ್ವೊ ತೆದೊಳು ಕಸ್ಕಸಲೆ ಕಾಮ ಕೊರ್ಕಾಕಿ ತೆ ಸಕ್ಕಡ ಕಾಮ ಕರ್ತಾಚಿ.
ಫಲ ಯೆತ್ತರಿ ಪೆಂಟಾಂತು ಹೊರ್ನು ವಿಕ್ಕುನು ಮಸ್ತ ದುಡ್ಡು ಮ್ಹೆಳ್ಳಲೊ ಪಳವನು ಆನ್ನಾನ ಸಾಂಗಿಲಿ ಕೊಪ್ಪರಿಗಾ ಹೀಚಿ ದಿಸ್ತಾ. ಇತ್ಯಾ ಮ್ಹಳ್ಯಾರಿ ಆನ್ನಾನ ಆಮ್ಕಾ `ಕಷ್ಟ ಪಾವ್ಲ್ಯಾರಿ ಇಷ್ಟ ಮ್ಹೆಳ್ತಾ' ಮ್ಹಳ್ಳೆಲೆ ಆನಿ `ನುತಚಿ ಬಸ್ಲ್ಯಾರಿ ಕೊಣಯಿ ಪೊಟ್ಟಾಕ ಘಾಲ್ನಾಚಿ' ಮ್ಹಣು ಸಾಂಗಿಲೆ ಉಡಗಾಸಾಕ ಯೆತ್ತಾ.
ತಸ್ಸಿಂಚಿ ತೊಡೆ ವರ್ಸಾನಿ ತಾನ್ನಿ ಭಾರಿ ಧನಿಕ ಜಾತ್ತಾಂಚಿ. ಆನ್ನಾನ ಸಾಂಗಿಲಿ ಕನ್ನಡ ಗಾದಿ `ಕೈ ಕೆಸರಾದರೆ ಬಾಯಿ ಮೊಸರು' ಮ್ಹಳ್ಳಲೆ ವ್ಹಯಿ ಮ್ಹಣು ಮ್ಹನಾಂಕ ದಿಸ್ತಾ.
ತಾಜೆ ನಂತರ ತಾನ್ನಿ ನುತಚಿ ಬೊವ್ನು ದೀಸು ಕಡ್ಚೆ ಸೊಣು ದಿವಸ ಗೊಳ್ನು ಸಾಗುವಳಿ ಕೊರ್ನು ಸುಖಾರಿ ಜೀವನ ಕಾಡ್ತಾಚಿ.
ಅಸ್ಸಿಚಿ ಸೊಂಬೇರಿ ಜಾವ್ನು ಗಾಂವಂಚೆ ಕೊಣಾಕಯಿ ನಾಕ್ಕಾ ಆಸ್ಸಿಲೆ ಗೋವಿಂದರಾಯಾಲೆ ಚೆರ್ಡುಂವ ಆತ್ತ ಧನಿಕ ಜಾವ್ನು ಗಾಂವಾಂಚೆ ಸಕ್ಕಡಾಂಕ ಜಾವ್ಕಾ ಜಾಲ್ಲೆಲೆ ಜಾಲ್ಲೆಂಚಿ.
ಬಂಟ್ವಾಳಾಂತ ಬಸ್ತಿಪಡ್ಪು ಜಾತರಿ ಏಕ ರಸ್ತೊ ಬಿ.ಸಿ.ರೋಡಾಕ ವತ್ತಾ. ಆನ್ನೆಕ ಸಪೂರ ರಸ್ತೊ ಪೊರಣೆ ಸಾಂಕವ ಜಾವ್ನ ಪಾಣೆಮಂಗಳೂರಾಕ ವತಾ. ತೆ ಸಪೂರ ರಸ್ತ್ಯಾಕ ಕಂಚುಗಾರ ಕುಟ್ಲು ಮ್ಹಣತಾಚಿ. ಪ್ರಾಕಾಂತ (ಪುಳ್ಳೆ ಕಾಲಾಂತ) ಆತಚೆಂ ಸ್ಟೀಲಾ ಆಯದನ ಯೆವ್ಚೆ ಪುಡೆ ಕಾಶಾಚೆ ಆಯದನ ವಾಪರಸುಚೆ ಆಶಿಲೆ. ತೆ ಆಯದನ ಕರತಲೆ ಜನ ಸಕಡ ಏಕ ಕಡೆನ ರಾಬಿಲಿಂಚಿ. ತೇಚಿ ಜಾಗೆಕ ಕಂಚುಗಾರಕುಟ್ಲು ಮ್ಹಣ ನಾಂವ ಪಳ್ಳೆ. ಆಮ್ಹಿ ಲ್ಹಾನ ಆಸತನಾ ಆಮ್ಮಾನ ಸಾಂಗುವ್ನ ಕಾಶಾಚೆ ಆಯದನ ಕರೊಚಿ ಏಕಲಿ ಬಾಯಲ್ಮನಿಷಿ ಆಶಿಲಿ. ತಿಗೆಲೆ ನಾಂವ ಲಕ್ಷ್ಮಿ ಮ್ಹಣು ಮಾಕ್ಕಾ ಉಗಡಾಸು. ತಿಗೆಲಾಗಿ ಆಮ್ಮಾನ ಮಸ್ತ ಆಯದನ ಕರೆಲೆಲೆ ಮಾಕಾ ಕಳಿತಾಕ ಆಸಾ. ತೆ ವೇಳಾರಿ ಕರಯಿಲೆ ಕಾಶಾಚೆ ಲೋಟೆ, ಗ್ಲಾಸ, ದುದ್ದಾಚಿ ಉರುವಳಿ, ವಾಟೆಂ ಥೋಡೆ ಆಮಗೆಲೆ ಘರಕಡೆ ಆತಾಂಯಿ ಆಸಚಿ. ಯೆ ಕಂಚುಗಾರ ಸಕಡ ಏಕ ಕಡೆ ಆಸತನಾ ಕೊಂಣಕಿ ಏಕಲ್ಯಾನ ಥಂಯಿ ಏಕ ಕಾಳಮ್ಮಾಲೆ ಲ್ಹಾನ ದೇವಸ್ಥನ ಬಾಂದಿಲೆ, ತೆಂ ಆತಂಯಿ ಆಸಾ. ತೆ ದೇವಸ್ಥನಾಂತ ದೇವಾಕ ಪೂಜಾ ಕರಚೊ ವೈದಿಕ ಶಂಕರ ಭಟ್ಟು. ತಾಕಾ ತುಳು ಜನಾನಿ `ಸಂಕ್ರ ಭಟ್ರೆ' ಮ್ಹಣ ಆಪೊವಚೆ. ತಾಗೆಲೆ ಮಾತ್ಯಾಂತ ಆಪಣ ಏಕ ಹೋಡು ಪಂಡಿತ ಮ್ಹಣ ಲೆಕತಾಲೊ. ಕೊಣೆಂಯ ಕಸಲೆ ನಿಮಗುವೋಚಿ ತಾಣೆ ಶಾಸ್ತ್ರಾಂತ ಅಶಿ ಸಾಂಗಲಾ ಶಾಸ್ತ್ರಾಂತ ತಶಿ ಸಾಂಗಲಾ ಮ್ಹಣ ಕಾಂಯ ಕಳನಾತ್ತಿಲೆ ಜನಾಲಾಗಿ ರೈಲ ಸೊಡಚೆ ಆಶಿಲೆಂ. ತಶಿ ಜಾವ್ನ ಜನ ತಾಕಾ `ರೈಲ್ ಭಟ್ರ' ಮ್ಹಣಂಯಿ ಆಪಯಿತಾಲಿಂಚಿ. ಹೆ ಶಂಕರ ಭಟ್ಟಾನ ಆಸುಚೆ ದೇವಸ್ಥನಾಚೆ ಲಾಗೀಚಿ ಆಸುಚಿ ನೇತ್ರಾವತಿ ನಂಯಿ ದಾಂಟ್ವಲಯಾರಿ ಪಾದ್ರಿಪಾಲ ಮ್ಹಳಲೆ ಏಕ ಲ್ಹಾನ ಗಾಂವ ಮ್ಹೆಳತಾ. ಥಂಯಿ ವಚುಕಾ ಜಾಲಯಾರಿ ನಂಯಿಂತ ಉದಾಕ ನಾತಿಲೆ ತೆದನಾ ಚಮ್ಕುನ ನಂಯಿ ದಾಂಟ್ವಲಯಾರಿ ಜಾಲೆ. ನಂಯಿಂತ್ ಉದಾಕ ಭರಲೆಲೆ ವೆಳಾರಿ ಮಾತ್ರ ಪಾಣೆಮಂಗಳೂರ ಸಾಂಕವ ದಾಂಟ್ವುನು ಜೈನರಪೇಟೆಂತುಲ್ಯಾನ ಪಾದ್ರಿಪಾಲಾಕ ಚಮಕುನ ವಚುಕಾ. ಮಸ್ತ ಸುತು ಜಾತಾ. ಏಕ ದಿವಸ ಪಾದ್ರಿಪಾಲಾಂತ ಕೊಣಾಲೆಕಿ ಶ್ರಾದ್ಧಾಚೆ ಕಾಮಾಕ ಶಂಕರ ಭಟ್ಟಾಕ ಸಾಂಗಿಲೆ. ತೆದನಾ ಪಾವಸಾಡಿ ನ್ಹಂಹಿ. ನಂಯಿಚೆ ತೆ ದಿಕಡೆ ಲಾಗೀ ನಂವೆ ಮ್ಹಣ ಹಾಣೆ ಕಬೂಲಿ ದಿಲೆಲೆ. ಶ್ರಾದ್ಧಾಕಾಮಾಚೆ ಪುಳ್ದಿವಸು ರಾತ್ರಿ ಧರಾಂಧರಿ ಪಾವಸು ಯೆವ್ನ ಉದಾಕ ನಂಯಿಂತ ಬರಲೆಲೆ. ಚಮಕುನು ನಂಯಿ ದಾಂಟವುಚಾಕ ಜಾಯನಾಶಿಲೆ. ಪ್ರವಾಹ ನಾತಿಲೆ ನಿಮಿತಾನ ಏಕಿ ವ್ಹಡ ಜನಾಂಕ ಹೆಕಡೆತೆಕಡೆ ವ್ಹರತಲಿ. ಶಂಕರಭಟ್ಟಾಕ ವಗೀಚಿ ತೆ ದಿಕಡೆ ಶ್ರಾದ್ಧಕಾಮ ಕರಚೆ ಘರಕಡೆ ವಚುನು ಪಾವಕಾ. ವ್ಹಡೆಕಾರಾಲಾಗಿ ವಚುನ ಸಾಂಗಲಯಾರಿ ತೊ ದುಡ್ಡು ಮಸ್ತ ನಿಮಗಿಲೆ. ತೆದನಾ ಶಂಕರ ಭಟ್ಟ ಮ್ಹಣಾಲೊ "ಮೆಗೆಲಾಗಿ ದುಡ್ಡು ದಿವಚಾಕ ನಾ. ಜಾಲಯಾರಿ ಹಾಂವೆ ಸಿಕಿಲೆ ವಿಷಯಾಂತ ತುಕಾ ಉಪದೇಶ ಜಾವಕಾ ಜಾಲಯಾರಿ ಫುಂಖ್ಯಾಕ ದಿತ್ತಾ. ತುಕಾ ತುಗೆಲೆ ಮುಕಾವಯಲೆ ಜೀವನಾಂತ ಜಾವಕಾ ಜಾತಲೆ." ತೆ ವ್ಹಡೆಕಾರ ಪಾಪಾಚೊ ದುರ್ಬಳೊ. ತಾಕಾ ಹೊ ಉಪದೇಶು ಸಕಡ ಆಯಕುಚಾಕ ತೆ ಚೊಲಚೆ ಕಡೆನ ವಚಾಕ ತಾಕಾ ಪುರಸತ ನಾ. ಯಿತ್ಯಾ ಮ್ಹಳಯಾರಿ ಸದಂಚಿ ಘೊಳಯಾರಿ ಮಾತ್ರ ತಾಗೆಲೆ ಜೀವನ ವಚ್ಚೆ. ಸಾಂಜವೇಳಾ ನಂತರ ತೊ ಮುಗಾಲ್. ಮುಗಾಲ್ ಮ್ಹಳಯಾರಿ ಪಿವನ ಬಸಚೆ ಮ್ಹಣ. ತಶಿ ಜಾವ್ನ ಶಂಕರ ಭಟ್ಟಾನ ಉಪದೇಶ ಫುಂಖ್ಯಾಕ ದಿತ್ತಾ ಮ್ಹಳಾ ನಂವೆ? ತಾಕಾ ಹಾಂವೆ ಹೆ-ದಿಕಡೆದಾಕುನು ತೆ-ದಿಕಡೆ ಹೊರ್ನ ಸೊಡಚೆ ಮಾತ್ರ. ತಿತಲೆ ಭಿತ್ತರಿ ಮಾಕಾ ಥೋಡೆ ದೇವಾಲೆ ವಿಷಯ ಕಳತಲೊ ಮ್ಹಣ ಚಿಂತುನ ವ್ಹಡೆಕಾರ ಶಂಕರಭಟ್ಟಾಕ ವ್ಹಡರಿ ಚೊಡುಂಕ ಸಾಂಗತಾ ಆನಿ ವ್ಹಡಾಕ ಹುಟ್ಟು (ಹುಟ್ಟು ಘಾಲಚಾಂತ ದೋನಿ ನಮೂನ ಆಸಾ. ೧. ವ್ಹಡೆಕಾರಾನ ರಾಬುನು ದೀಗೂಚಿ ವಾಸೊ ಉದಕಾಂತ ಬುಡೊವ್ನ ನೆಲಾಕ ದಾಮಾಟುವ್ನ ಮುಖಾರಿ ವಚ್ಚೆ. ೨. ವ್ಹಡೆಕಾರಾನ ಖಂಚೆ ದಿಕಡೆ ವಚುಕಾ ತೆ ದಿಕಡೆ ಪಾಟಿ ಘಾಲ್ನ ಬಯಸುನು ಹಾತ್ತಾಂತು ಹಿಡಿ ಆಸುಚೆ ರುಕಾಚೆ ಹುಟ್ಟು ಗಾಲಚೆ ಸಾಧನಾನಿ ಉದಾಕ ಮುಕಾರಿ ಲಕಯಿಲ್ಯಾರಿ ವ್ಹಡ ಮಾಗಶಿ ವತ್ತಾ.) ಘಾಲುಕ ಸುರುವಾತ ಕರತಾ. ಥೋಡೆ ಮುಕಾರಿ ವತ್ತನಾ ವ್ಹಡೆಕಾರ "ಸಂಕ್ರಭಟ್ರೆ ತುಮಗೆಲೊ ಉಪದೇಶ ಸುರ ಕರಾ." ಮ್ಹಣಾಲೊ. ತೆದನಾ ಶಂಕರಭಟ್ಟು "ತುಕಾ ಚಾರಿ ದೇವಾಲೆ ಸ್ತೋತ್ರ ಯೆತಾ ಜಾಲಯಾರಿ ಸಾಂಗ. ತಾಜೊ ಅರ್ಥು ತುಕಾ ಸಾಂಗತಾ" ಮ್ಹಣಾಲೊ. "ಕಸಲೆ ಸಂಕ್ರಭಟ್ರೆ, ಮಾಕಾ ಸ್ತೋತ್ರಗೀತ್ರ ಕಸಲೆಂಯ ಕಳನಾ" ಮ್ಹಣಾಲೊ ವ್ಹಡೆಕಾರ. "ತಶಿ ಜಾಲಯಾರಿ ತುಗೆಲೆ ಆಯುಷ್ಯಾಚೆ ತಿನಿಂತುಲೊ ಏಕ್ ವಾಂಟೊ ವ್ಯರ್ಥ ಜಾಲೊ. ತೆ ನಾಕಾ, ತುಕಾ ಲೆಕಗೀಕ ಕರಚಾಕ ಯೆತವೆ?" ಮ್ಹಣಾಲೊ ಶಂಕರಭಟ್ಟು. ಪಾಪ! ವ್ಹಡೆಕಾರ `ಕಸಲೆ ಜಾವೊ ಚಾಂಗ ಉಪದೇಶ ಮ್ಹಳತಲೆ ಮ್ಹಣ ಲೆಕಿಲೆ. ಜಾಲಯಾರಿ ಹೊ ಸಂಕ್ರಭಟು ಮಾಕಾ ಮಾಂಕಡ ಕರಚಾಕ ಪಳಯತಾ. ಹಾಕಾ ಸಿಕಯತಾ. ಹಾಗೆಲಾಗಿ ಆಸುಚೆ ಹಾಣೆ ಪುಸ್ತಕಾರಿ ವಾಜಿಲೆ ವಿಷಯ ನಂವೆ? ತಾಜಾ ಪಶಿ ಚಡ ವಿಷಯ ಪುಸ್ತಕಾದಾಕುನು ಭಾಯರಯ ಆಸಾ ಮ್ಹಣ ಹಾಕಾ ಕೊಳಚ ತಶಿ ಕರತಾ.' ಮ್ಹಣ ಮನಾಂತೂಚಿ ಚಿಂತುನ "ಹಾಂವೆ ಶಾಳೆಕ ಗೆಲಯಾರಿ ನಂವೆ ಲೆಕ ಗೀಕ ಕಳಚೆ? ತು ಕಸಲೆ ಮಾಕಾ ತಮಾಷಾ ಕರ್ತವೆ?" ಮ್ಹಣಾಲೊ ವ್ಹಡೆಕಾರ.ಶಂಕರ ಭಟು "ಪಳೆ ತುಕಾ ಲೆಕ-ಗಿಕ ಯಾನಾಮೂ? ತಾವಳಿ ತುಗೆಲೆ ಆಯುಷ್ಯಾಂತುಲೆ ತೀನಿ ವಾಂಟೆಂತ ಆನಿ ಏಕ ವಾಂಟೊ ಗೆಲೊ. ಆನಿ ವರಲಲೊ ಏಕು ವಾಂಟೊ ಮಾತ್ರ." ಮ್ಹಣಾಲೊ. ವ್ಹಡೆಕಾರಾಕ ರಾಗ ಆಯಲೊ. ತೊಂಡಾರಿ ರಾಗ ದಾಕೊನ ಘೆನಿ. `ಹಾಕಾ ಸಿಕೋಕಾ. ಮೆಗೆಲೆ ಆಯುಷ್ಯಾಂತುಲೆ ಏಕೊಕೂಚಿ ವಾಂಟೊ ಉಪಯೋಗ ನಾ ಮ್ಹಣ ಕರಚೆ ಅಧಿಕಾರ ಹಾಕಾ ದಿಲಲೊ ಕೋಣೆ?' ಮ್ಹಣ ಥೋಡೆ ದೂರ ವತನಾ ವ್ಹಡೆಕಾರಾನ ವ್ಹಡ ಆಡ ಘಾಲ್ಲಿ. ವ್ಹಡೆಕಾರ ಆನಿ ಶಂಕರಭಟ್ಟು ದೊಗಂಯ ಉದಕಾಂತ ಪಳ್ಳಿಂಚಿ. ಶಂಕರಭಟ್ಟಾನ "ವಾಂಚಯಿ....... ........ವಾಂಚಯಿ" ಮ್ಹಣ ಕಿನಾಟಿ ಘಾಲ್ಲಿ. ತೊ ವ್ಹಡೆಕಾರ ವಗೀ ಲಾಗಿ ಆಯಿಲೊ ಆನಿ ತಾಣೆ ಶಂಕರಭಟ್ಟಾಲೆ ಶೆಂಡಿಕ ಧರ್ನ ವಯರಿ ಉಬಾರಲೆ. ಶಂಕರಭಟ್ಟು ತೆ ವ್ಹಡಚಾಲೆ ಲಾಗಿ "ದಯಕೊರ್ನು ಮಾಕಾ ತೆ ದಿಕಡೆ ಪಾವಯಿ. ಮೆಗೆಲೆ ಶೆಂಡಿಕ ಧರ್ಲಲೆ ಸೋಣಕಾ. ಸೊಳ್ಯಾರಿ ಹಾಂವ ಉದಕಾಂತ ಪಡತಾ" ಅಶಿ ಪ್ರಾರ್ಥನಾ ಕೆಲಿ. ತೊ ವ್ಹಡೆಕಾರ "ತುಕಾ ಪೊಂವಚಾಕ ಕಳ್ನಾಂವೆ?" ಮ್ಹಣ ಹಾಸ್ಲೊ. ಶಂಕರಭಟು `ನಾ' ಮ್ಹಣ ಬೊಡ ಹಾಲಯಲೆಂ. ವ್ಹಡೆಕಾರ ಮ್ಹಣಾಲೊ "ಕಸಲೆ ಸ್ವಾಮಿ ಅತಾಂ ತುಗೆಲೆ ಸಗಳೆಽಚಿ ಆಯುಷ್ಯ ಉಪಯೋಗ ನಾ ಜಾಲೆಂಮೂ?" ಅಶಿ ಸಾಂಗುನ ತಾಂಡುನ ಪೆಲತಡಿ ಹೊರ್ನ ತಾಕಾ ಘಾಲೆ ಆನಿ ಮ್ಹಣಾಲೊ:"ಸಂಕ್ರಭಟ್ಟಾನೊ, ತುಮಗೆಲೆ ಪ್ರಾಣ ವಾಂಚೋಚಾಕ ಜಾಯನಾ ನಾತ್ತಿಲೆ ತುಮಗೆಲೆ ಪಾಂಡಿತ್ಯ ಆಸುನ ಕಸಲೆ ಉಪಯೋಗ. ತುಮ್ಹಿ ಮೆಗೆಲೆ ಆಯುಷ್ಯಾಂತುಲೆ ಏಕೊಕೂಚಿ ವಾಂಟೊ ಉಪೇಗ ನಾ ಮ್ಹಳೆ. ಮಂತ್ರ ಮ್ಹಣುಕ ಜಿಬ ಹಾಲಯಲಯಾರಿ ಪಾವನಾ. ಹಾತ್ಪಾಯುಂಯಿ ಹಾಲೊಚಾಕ ಸಿಕುಕಾ ಕಳವೆ ಭಟ್ಟೊ?" ವ್ಹಡೆಕಾರ ಮ್ಹಣಾಲೊ ಆನಿ ತಿ ವ್ಹಡ ಧೊರಚೆ ಖಾತಿರ ವಾಪಾಸ ಉದಕಾಂತ ಉಡಲೊ. ಶಂಕರಭಟ್ಟಾಕ ವ್ಹಡೆಕಾರಾನ ಸಾಂಗಿಲೆ ವ್ಹಯ ಮ್ಹಣ ದಿಸಲೆ. ಹೆರ್ದಿವಸು ಶಂಕರಭಟ್ಟ ಪಾಲ್ಪಾಲಯಾರಿ ನಂಯಿಂತು ಹಾತ್ಪಾಯ್ ಮಾರುಕ ಸುರುಕೆಲ್ಲೆ. ಆನಿ ಥೋಡೆ ದಿಸಾನಿಽಂಚಿ ತೊ ಪೊಂವಚಾಕ ಸಿಕ್ಲೊ.
(ಕೆದನಾಯ ಆನೆಕ್ಲ್ಯಾಕ ಹೀನ ಕರ್ನ ಉಲವಚಾಕ ನಜ್ಜ)
----೦೦---
ಬಂಟ್ವಾಳಾಂತು ಪಂಚಾಯತ ಆಪೀಸ, ಯಾತ್ರಿಘರ ಅಸ್ಸುಚೆ ಜಾಗ್ಯಾಕ ಕಚೇರಿ ತೊಗ್ಗು ಮ್ಹಣು ಸಾಂಗ್ತಾಚಿ. ಥಂಯ ಆತ್ತ ಪೋಸ್ಟಾಪೀಸ ಲಾಗ್ಗಿ ದೇವಸ್ಥನಾಚೆ ಫ್ಲೇಟ್ಸ ಬಾಂದಿತಾಂಚಿ. ತೆ ಜಾಗ್ಯಾರಿ ಆಮ್ಮಿ ಸುಮಾರ ವರ್ಷ ಆಸ್ಸಿಲಿಂಚಿ. ೧೯೫೭ ಇಸವಿಂತು ಆಮ್ಗೆಲೆ ಖಾತೀರಚಿ ದೇವಸ್ಥನಾಚಾನಿ ಏಕ ಘರ ಬಾಂದುನು ದಿಲ್ಲೆಲೆ. ತೊ ಜಾಗೊ ದೇವಸ್ಥನಾಂಕ ಸೋಣು ದಿಲ್ಲಾ. ತೆ ಜಾಗ್ಯಾರಿ ಆಮ್ಮಿ ಆಸ್ಸಿಲೆ ವೇಳಾರಿ ಎದ್ರಾಕ ಖಾಲಿ ಜಾಗೆ, ನಂತರ ಭಂಡಾರಿ ಬೆಟ್ಟು ತೋಡು, ತಾಜ್ಜೆ ತೆಕಡೆ ಗಾದ್ದ್ಯೆ ಆನಿ ತಾಂಗೆಲೆ ಘರ ಆಸ್ಸಿಲೆಂಚಿ. ಆತ್ತ ತಾಂತು ಮಸ್ತ ಘರ ಆನಿ ಗಾದ್ದ್ಯೆ ನಾಂಚಿ. ಮಸ್ತ ವರ್ಷಾಚೆ ಪುಡೆ ತಸ್ಸಲೆ ಏಕ ಜಾಗ್ಯಾರಿ ಕೇಶವ ಭಟ್ಟು ಮ್ಹಳ್ಳಲೊ ಗಾದ್ದ್ಯಾಂತು ಘೋಳ್ನು ಆಸ್ಸಿಲೊ. ತಾಕ್ಕಾ ಮಸ್ತ ಗಾದ್ದ್ಯೆ ನಾತ್ತಿಲೆ ನಿಮಿತಿ ತಾಣೆ ಏಕ ಬೇಳೆ ಜಾತ್ತರಿ, ತರಕಾರಿ, ಇನ್ನಿತರ ವಗ್ಗಿ ಜಾವ್ಚೆ ಬೇಳೆ ಕರ್ಚೆ ಆಸ್ಸಿಲೆ. ತಸ್ಸಿಂಚಿ ಏಕ ವರಸ ಭಾತ್ತಾಚೆ ಬೇಳೆ ಜಾತ್ತರಿ ತಾಣೆ ತೀಳು ಕರ್ಚೆ ಖಾತೀರ ತಾಜ್ಜೆ ಬಿಯ್ಯೊ ಘಾಲ್ಲೆ. ಕೇಶವ ಭಟ್ಟಾನ ಕರ್ಚೆ ತೀಳು ನಾವಾದಿಕು. ತಿತ್ಲೊ ಚಾಂಗು ತೀಳು ಖಂಯಿ ಮ್ಹಳ್ನಾ. ತಸ್ಸಿ ಜಾವ್ನು ಜನಾನಿ ಕೇಶವ ಭಟ್ಟಾಲೊ ತೀಳು ಆಸ್ಸವೆ ಮ್ಹಣು ನಿಮ್ಗುಚೆ. ತೀಳಾಚೆ ಬೇಳೆ ಜೂನ ಜಾತ್ತನಾ ಪಕ್ಷಾನಿ ಖಾವ್ಚಾಕ ಯೆವ್ನು ತೋಡೊಚಿ ಖಾವ್ನು, ಖಾಲ್ಲ್ಯಾಪಸಿ ಚಡ ವಾಯಟ ಕರ್ನು ವಚ್ಚೆ ಆಸ್ಸಿಲೆ. ತಾಂತೂಯಿ ಏಕ ಸಂವ್ಣೆ ತೀಳು ಖಾವ್ಚಾಂತು ಬಲ. ಸಕ್ಕಡ ಪಕ್ಷಾಂಪಸಿ ಚಡ ಖಾವ್ಚೆ ಆನಿ ಕೇಶವ ಭಟ್ಟಾಕ ನಷ್ಟ ಕರಕಾ ಮ್ಹಣು ವಾಯಟ ಕರ್ಚೆ. ಕೇಶವ ಭಟ್ಟಾನ ಕಿತ್ಲೆ ಉಪಾಯ ಕೆಲ್ತಕಿನಿ ತೆ ಸಂವ್ಣೆಕ ಕಸ್ಸಲೆ ಕರುಕ ಜಾಯ್ನಿ. ಏಕ ದಿವಸು ಕಸ್ಸೀ ಕರ್ನು ಕೇಶವ ಭಟ್ಟಾನ ತೆ ಸಂವ್ಣ್ಯಾಕ ಧರ್ಲೆ. ತಾಕ್ಕಾ ದಿವ್ಶಿ ಮಾರಕಾ ಮ್ಹಣು ಚಿಂತುನು ಘರಕಡೆ ಘೆವ್ನು ಆಯಿಲೊ. ವಾಟ್ಟೆರಿ ಯೆತ್ತನಾ ತಾಕ್ಕಾ ದಿವ್ಶಿ ಕಸ್ಸಿ ಮಾರ್ಚೆ ಮ್ಹಣು ಚಿಂತುನು ಯೆತ್ತನಾ-ನ್ಹಾಂಣೆಂತು ಹೊಳ್ಳೊ ಉಜ್ಜೊ ಜಳ್ತಽರಿ ಜಳ್ತರಿ ಆಸ್ಸಿಲೊ. ತೆ ಉಜ್ಜಾಂತು ತೆ ಸಂವ್ಣ್ಯಾಕ ಉಡ್ಡೋವ್ನು ಪಡ್ತಾ. ತಾಜ್ಜೆ ನಂತರ ಕೇಶವ ಭಟ್ಟ ತೆ ಸಂವ್ಣ್ಯಾಲಾಗ್ಗಿ "ಸಂವ್ಣ್ಯಾ, ಸಂವ್ಣ್ಯಾ ತು ಮೆಲ್ಲಾಕಿ ಜೀವಂತ ಆಸ್ಸ?" ನಿಮ್ಗಿತಾ. ತಾಕ್ಕಾ ಸಂವ್ಣ್ಯೆ ಹಾಸ್ತಽಚಿ ಸಾಂಗ್ತಾ "ಹಾಂವ ಇತ್ಯಾ ಮರನ? ಕೇಶವ ಭಟ್ಟಾಲೊ ತೀಳು ಖೆಲ್ಲೊಲೊ ಮರನಾ. ಆತ್ತ ಶೀಂ ಖಾತ್ತಾ ಮ್ಹಣು ಧಗ್ಗು ತಾಪ್ಪೊಂಚಾಕ ಬಸ್ಲಾ." ತೆ ಆಯ್ಕುನು ಕೇಶವ ಭಟ್ಟಾಕ ರಾಗು ಆಯಿಲೊ. ರಾನ್ನಿಂತುಲೆ ಉಜ್ಜಾ ದಾಕುನು ತೆ ಸಂವ್ಣ್ಯಾಕ ಕಾಡ್ತಾ ಆನಿ ರಾನ್ನಿರಿ ಆಸ್ಸಿಲೆ ಭಾಣಾಂತು ಘಾಲ್ತಾ. ಭಾಣಾಂತು ಉದ್ದಾಕ ಖತಖತೀಚಿ ಆಸ್ಸಿಲೆ. ತಾಂತು ಘಾಲ್ನು ಜಾತ್ತರಿ ಕೇಶವ ಭಟ್ಟು "ಸಂವ್ಣ್ಯಾ, ಸಂವ್ಣ್ಯಾ ತು ಆತ್ತ ಮೆಲ್ಲಾಕಿ ಜೀವಂತ ಆಸ್ಸ?" ಮ್ಹಣಾಲೊ. "ಹಾಂವ ಇತ್ಯಾ ಮರನ? ಕೇಶವ ಭಟ್ಟಾಲೊ ತೀಳು ಖೆಲ್ಲೊಲೊ ಮರನಾ. ಶೀಂ ಖಾತ್ತಾ ಮ್ಹಣು ಧಗ್ಗು ತಾಪ್ಪಯಿಲೊ, ಆತ್ತ ನ್ಹಾತ್ತಾಂ."ಮ್ಹಣಾಲೆ ಸಂವ್ಣ್ಯೆ. ಹೆ ಆಯ್ಕುನು ಕೇಶವ ಭಟ್ಟಾಕ ಹೆರ್ವಲೊ ಕೋಪು. ತೆ ಉದ್ಕಾದಾಕುನು ಸಂವ್ಣ್ಯಾಂಕ ಕಾಡ್ತಾ ಆನಿ ಗೀಳ್ನು ಪಡ್ತಾ. ತಾಜ್ಜೆ ನಂತರ ಕೇಶವ ಭಟ್ಟು "ಸಂವ್ಣ್ಯಾ, ಸಂವ್ಣ್ಯಾ ತು ಆತ್ತ ಮೆಲ್ಲಾಕಿ ಜೀವಂತ ಆಸ್ಸ?" ಮ್ಹಣ್ತಾ. ತೆದನಾ ಸಂವ್ಣ್ಯೆ "ಹಾಂವ ಇತ್ಯಾ ಮರನ? ಕೇಶವ ಭಟ್ಟಾಲೊ ತೀಳು ಖೆಲ್ಲೊಲೊ ಮರನಾ. ಶೀಂ ಖಾತ್ತಾ ಮ್ಹಣು ಧಗ್ಗು ತಾಪ್ಪಯಿಲೊ, ಚಿಕ್ಕೊಲು ಜಾಲ್ಲಾ ಮ್ಹಣು ನ್ಹಾಲ್ಲೊ-ಆತ್ತ ಕೇಶವ ಭಟ್ಟಾಲೆ ಪೋಟ ಕೋರಂತಿತಾ." ಮ್ಹಣಾಲೆ. ತೆ ಆಯಿಕುನು ಕೇಶವ ಭಟ್ಟು ಭಿಲ್ಲೊ. ತಾಕ್ಕಾ ಕಸ್ಸಲೆ ಕರ್ಚೆ ಮ್ಹಣು ಕಳ್ನಿ. ಹೆಕಡೆ ತೆಕಡೆ ಧಾವ್ಲೊ. ತೆದನಾ ತಾಕ್ಕಾ ಹಾಗ್ಗುಕ ಜಾಲ್ಲೆ. ಹಾಗ್ಗು ಬಸ್ಲೊ. ತಾಗೆಲೆ ಹಾಗ್ಡ್ಯಾ ಒಟ್ಟು ಸಂವ್ಣ್ಯೆ ತೊಗ್ಗು ಪಡ್ತಾ ಆನಿ ಬುರ್ರಽಽಽಽಽಽಽನಿ ಉಬ್ಬುನು ವತ್ತಾ. ಕೇಶವ ಭಟ್ಟು ಸಂತೋಷಾನಿ ಘರಕಡೆ ವತ್ತಾ.
---------೦೦೦೦೦೦-------
ಹಿ ಕಾಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.
ಥಂಯಿ ತಾಣೆ ಮ್ಹೊರಾಕ ಉಪಕಾರು ಕೆಲ್ಲಲೊ ಮ್ಹಣು ಏಕಿ ಕಾಂಣಿ ತುಮ್ಕಾ ಗೊತ್ತಸುಕಾ. ತೇಚಿ ಕಾಕ್ಕಮಾಮ್ಮಲೊ ಭಾವ್ನು ಭಾರಿ ಜೋರು ಆಸ್ಸಿಲೊ. ಆಮ್ಗೆಲೊ ಕಾಕ್ಕಮಾಮ್ಮಾಕ ಬುದ್ಧಿ ಆಯಿಲ್ಯಾ ನಂವೆ? ಜಾಲ್ಯಾರಿ ತಾಗೆಲೆ ಭಾವಾಕ ಆನ್ನೆಕ್ಲ್ಯಾಂಕ ಬಾಧಾ ದಿವ್ಚೆ ಮ್ಹಳ್ಯಾರಿ ಜಾಲ್ಲೆ. ಏಕು ದಿವಸು ತೊ ಸಕಾಂಣೀಂಚಿ ಉಟಾನು ತೊಂಡ ದುವ್ಚಾಕ ಬಾಂಯ್ಚೆ ಕಾಟ್ಟ್ಯಾರಿ ಬೈಸುನು ಆಸ್ತನಾ ಥಂಯಿ ಏಕಿ ಕೀಡಿ ಕೀಂ ಕೀಂ ಕರ್ನು ರಡ್ತ ಆಸ್ಸಿಲಿ. ತೆದನಾ ಹೊ ಕಾಕ್ಕಮಾಮು ಕೀಡಿಲಾಗ್ಗಿ ಸಾಂಗ್ತಾ:
"ಕಿಡಿಕಿಡೀ ಖಾವುಂ ಕುಟ್ಟಾ."
ತೆ ಆಯ್ಕುನು ತಿ ಕೀಡಿ: "ತೊಂಡ ಧೂಯಿ ಆನಿ ಖಾ." ಮ್ಹಣ್ತಾ.
ಕಾಕ್ಕಮಾಮು ಬಾಂಯ್ಚೆಲಾಗ್ಗಿ ನಿಮ್ಗಿತಾ "ಬಾಂಯ್ಯೆ ಬಾಂಯ್ಯೆ-ದೀ ಉದ್ದಾಕ-ಧುಂವ್ಚಾಕ ಮೆಗೆಲೆ ತೋಂಡ, ಖಾವು ಕೀಡಿ ಕುಟ್ಟಾ."
ಬಾಂಯಿಂ ಮ್ಹಣ್ತಾ: "ಕಳ್ಸೊ ಹಾಡಿ, ಆನಿ ಉದ್ದಾಕ ಕಾಡಿ."
ಕಾಕ್ಕಮಾಮು ಸೀದಾ ಕುಂಬಾರಾಚಾಲೆ ಘರಾಕ ವತ್ತಾ ಆನಿ ತಾಗೆಲಾಗ್ಗಿ ಸಾಂಗ್ತಾ: "ಕುಂಬ್ ಕುಂಬಾರಾ- ದೀ ಕಳ್ಸೊತೊ, ಕಾಡು ಉದ್ದಾಕ, ಧುಂವ್ಚಾಕ ತೊಂಡ, ಖಾಂವು ಕೀಡಿ-ಕುಟ್ಟಾ."
ತೆ ಆಯ್ಕುನು ಕುಂಬಾರಾಚೊ ಸಾಂಗ್ತಾ- "ಮಾತ್ತಿ ಹಾಡಿ -ಕಳ್ಸೊ ಕರ್ನು ದಿತ್ತಾಂ."
ಕಾಕ್ಕಮಾಮು ಸೀದಾ ಗುಡ್ಡ್ಯಾಲಾಗ್ಗಿ ವತ್ತಾ ಆನಿ ನಿಮ್ಗಿತಾ: "ಗುಡ್ಡ್ಯಾ ಗುಡ್ಡ್ಯಾ ದೀ ಮಾತ್ತಿ- ಕರುಂ ಕಳ್ಸೊತೊ ಕಾಡು ಉದ್ದಾಕ ಧುಂವ್ಚಾ ತೋಂಡ ಖಾಂವು ಕೀಡಿ ಕುಟ್ಟಾ."
ತೆ ಆಯ್ಕುನು ಗುಡ್ಡೊ ಮ್ಹಣಾಲೊ: "ಕೊಯಿತಿ ಹಾಡಿ- ಆನೀ ಖೊಂಡೀ"
ತೋ ಕಾಮಾರಾಂಚಾಥಂಯಿ ವತ್ತಾ ಆನಿ ತಾಗೆಲಾಗ್ಗಿ ನಿಮ್ಗಿತಾ: "ಕಾಮ್ ಕಾಮಾರಾ- ದೀ ಕೊಯಿತಿ, ಖೊಂಡು ಮಾತ್ತಿ, ಕರುಂ ಕಳ್ಸೊತೊ, ಕಾಡೂ ಉದ್ದಾಕ, ಧುಂವ್ಚಾಕ ತೋಂಡ, ಖಾಂವು ಕೀಡಿ -ಕುಟ್ಟಾ."
ತೆ ಆಯ್ಕುನು ಕಾಮಾರಾಂಚೊ ಲೆಕ್ತಾ: `ಆತ್ತ ಹಾಂವೆ ಕೊಯಿತಿ ದಿಲ್ಲ್ಯಾರಿ ಹೊ ಕಾಕ್ಕಮಾಮು ವಚ್ಚುನು ಮಾತ್ತಿ ಖೊಂಡುನು ಕುಂಬಾರಾಕ ದಿತ್ತಾ-ತೋ ಕಳ್ಸೊ ಕರ್ನು ದಿತ್ತಾ, ಕಳ್ಸೊ ಹೊರ್ನು ಕಾಕ್ಕಮಾಮು ಉದ್ದಾಕ ಕಾಡ್ತಾ. ಆನೀ ತೋಂಡ ಧೂವ್ನು ಕೀಡಿಕ ಖಾಂವ್ನು ಪಡ್ತಾ.
ಹೆ ಕಾಕ್ಕಮಾಮ್ಮಾಕ ಕರ್ತಾ ಬಗಾ.' ಮ್ಹಣು ತಾಜ್ಜೆ ಲಾಗ್ಗಿ: "ಕಾಕ್ಕಮಾಮ್ಮಾ ಹಾಂವ ಆತ್ತ ಹಾಂಗಾ ಏಕ್ಲೋಚಿ ಆಸ್ಸ. ತೆ ನಿಮಿತ ತೂಂ ಉಜ್ಜೊ ಫುಂಕ್ತಾ ಬೈಸ. ಹಾಂವ ಕೊಯಿತಿ ಕರ್ನು ದಿತ್ತಾಂ" ಮ್ಹಣು ಸಾಂಗ್ತಾ.
ಕಾಕ್ಕಮಾಮ್ಮಾಕ ಖೂಸೀ ಜಾತ್ತಾ ಆನಿ ಜೋರು ಉಜ್ಜೊ ಫುಂಕ್ತಾ. ಕಾಮಾರಾಂಚೊ ಮಾಕ್ಷಿ ಥಾಂವ್ನು ಕಾಕ್ಕಮಾಮ್ಮಾಕ ಉಜ್ಜಾಂತು ಲೊಕೋನು ಪಡ್ತಾ. ಕಾಕ್ಕಮಾಮು ಮರ್ತಾ.
ಮಸ್ತ ವರ್ಸಾಚೆ ಪುಡೆ ಬಂಟ್ವಾಳ ಬೈಪಾಸ ರಸ್ತೊ ನಾಶಿಲೊ. ಥಂಯಿ ಆಸ್ಸುಚೆ ಮುದ್ಗಲಗುಡ್ಡ್ಯಾ ನಂತರ ಅರಬ್ಬಿ ಗುಡ್ಡೋ ಆಸ್ಸ. ಥಂಯಿ ದೋಗ್ಗ ಜನ ಬೊಭೈಣ್ಯೊ ಆಶ್ಶಿಲ್ಯೊ. ಏಕ್ಲಿ ಆಪ್ಪುಲಿ ದುಸ್ರಿ ತಿಪ್ಪುಲಿ. ತೆ ವೇಳಾರಿ ಮೊಗರ್ನಾಡ ದೇವಸ್ಥನಾಂತು ಚಲ್ಚೊ ತೇರು ಪಳವ್ಚಾಕ ಬಂಟ್ವಾಳಾದಾಕುನು ಜನ ಚಮ್ಕುನು ವತ್ತಲಿಂಚಿ. ಬಡ್ಡಕಟ್ಟ್ಯಾಲಾಗ್ಗಿ ಆಸ್ಸುಂಚೆ ನ್ಹಂಯಿತುಲ್ಯಾನ ದೋಣಿರಿ ತೆ ದಿಕ್ಕಡೆ ಗೆಲ್ಲ್ಯಾರಿ ಥಂಯಿ ದಾಕುನು ಮೊಗರ್ನಾಡಾಕ ಮಸ್ತ ದೂರ ನಾಸ್ಸಿಲೆ. ತಶ್ಶಿ ಜಾವ್ನು ಕೆಲವು ಜನ ದೋಣಿರಿ ವತ್ತಲಿಂಚಿ. ಜಾಲ್ಲ್ಯಾರಿ ಬಂಟ್ವಾಳ ಪೆಂಟಾಚೆ ಜನ ಮಾತ್ರ ಚಮ್ಕುನು ಬಸ್ತಿಪಡ್ಪು, ಕಂಚಗಾರ ಕುಟ್ಲು, ಪಾಣೆಮಂಗಳೂರಾಕ ವಚ್ಚೆ ಬ್ರಿಟಿಷಾನಿ ಬಾಂದಿಲೆ ಸಾಂಕ್ವಾವಯಿಲ್ಯಾನ ಪಾಣೆಮಂಗಳೂರ ಪೆಂಟಾಕ ವಚ್ಚುನು ಥಂಯಿ ದಾಕುನು ಮೊಗರ್ನಾಡಾಕ ವತ್ತಲಿಂಚಿ. ಮೊಗರ್ನಾಡಾಚೆ ತೇರಾವಳಾರಿ ನ್ಹಂಯಿಂತು ಉದ್ದಾಕ ತೆ ಕಾಳಾರಿ ಮಸ್ತ ಆಸ್ತಲೆ. ತಶ್ಶಿ ಜಾವ್ನು ಜನ ದೋಣಿರಿ ವಚ್ಚಾಕ ಭಿವ್ನು ಚಮ್ಕುಚಾಕ ದೂರ ಆಸ್ಲ್ಯಾರೀ ಚಮ್ಕುನೂಂಚಿ ವತ್ತಲಿಂಚಿ. ಕೆದನಾಂಯಿ ಆಪ್ಪುಲಿ ಆನಿ ತಿಪ್ಪುಲಿ ತಾಂಗೆಲೆ ಆನು ಆನಿ ಆಮ್ಮಾಲೆ ಒಟ್ಟು ಮೊಗರ್ನಾಡ ತೇರಾಕ ವತ್ತಲಿಂಚಿ. ಪುಡೆ ವರುಷ ತಾಂಗೆಲಿ ಆವ್ಸು ದೈವಾಧೀನ ಜಾಲ್ಲಿ. ಹೆ ವರುಷ ತೇರಾಕ ವಚ್ಚುಕಾ ಮ್ಹಣು ತಾಂಕಾ ಆಶಾ ಜಾಲ್ಲಿ. ಆನ್ನಾಲೆ ಒಟ್ಟು ವಚ್ಚಾ ಮ್ಹಳ್ಯಾರಿ ತಾಂಗೆಲೊ ಆನು ಘರಕಡೆ ನಾಸಿಲೊ. ಆನ್ನಾನ ಯೆವ್ವೊಥಾಂಯಿ ರಾಕ್ಕುಯಾ ಮ್ಹಳ್ಯಾರಿ ಮಾಗ್ಗಿರಿ ಘೆಲ್ಲ್ಯಾರಿ ಮೊಗರ್ನಾಡಕ ವಚ್ಚುನು ಪಾವ್ತನಾ ತೇರು ಜಾತ್ತಾ. ತಸ್ಸಿ ಜಾವ್ನು ತಾನ್ನಿ ವಗ್ಗಿ ವಗ್ಗಿ ಭಾಯರ ಸರ್ಲಿಂಚಿ. ಗುಡ್ಡ್ಯಾಚೆ ವಾಟ್ಟೇನಂಚಿ ಬಡ್ಡಕಟ್ಟ್ಯಾರಿ ನೇತ್ರಾವತಿ ನ್ಹಂಯ್ಚೆ ಲಾಗ್ಗಿ ಯೆವ್ನು ಪಾವ್ಲಿಂಚಿ. ಥಂಯಿ ಏಕ ವ್ಹಡಕಾರು (ದೋಣಿಚೊ) ಜನಾಂಕ ನ್ಹಂಯಿ ದಾಂಟ್ವಾಚಾಕ ವ್ಹಡ ಘೆವ್ನು ಆಶ್ಶಿಲೊ. ದೊಗ್ಗಯಿ ವ್ಹಡಾರಿ ಬಸ್ಲಿಂಚಿ. ವ್ಹಡಕಾರಾಕ ಬೊವ್ಯೊ ಮ್ಹಣುಂಯಿ ಮ್ಹಣ್ತಾಂಚಿ. ತಾಣೆ ವ್ಹಡ ಸೊಳ್ಳೆ. ವ್ಹಡ ವತ್ತ ಆಸ್ತನಾ ದೊಗ್ಗಾಂಕಯಿ ಮಸ್ತ ಗಮ್ಮತ ಜಾಲ್ಲೆ. ನ್ಹಂಯ್ಚೆ ಮಧ್ಯೇಂತು ಪಾವ್ತನಾ ಆಪ್ಪುಲಿ "ಆಮ್ಮಿ ವಾಪಸ ವಗ್ಗಿ ಯೆವ್ಕಾಗೊ. ಆನ್ನಾನ ಘರಕಡೆ ಯೆವ್ಚೆ ಭಿತ್ತರಿ ಪಾವ್ಕಾ. ನ್ಹಂಹಿ ಜಾಲ್ಲ್ಯಾರಿ ಪೆಟ್ಟ ಖಾಂವ್ಕಾ ಜಾಯ್ತ." ಮ್ಹಣು ಸಾಂಗ್ಚಾಕ ಲಾಗ್ಲಿ. ತೆದನಾ ತಿಪ್ಪುಲಿ "ಹಾಂವೆ ಯೆನಾ ಮ್ಹಣು ಸಾಂಗನಿವೆ? ತೂವೆಂಚಿ ಮಾಕ್ಕಾ ವತ್ತಾಯ ಕರ್ನು ತಾಂಡುನ ಹಾಳ್ಳಲಿನಂವೆ? ಆನ್ನಾನ ಪೆಟ್ಟ ಮಾರ್ಲ್ಯಾರಿ ತೂಂವೆಂಚಿ ತಾಂಡೂನು ವ್ಹೆಲ್ಲೆಲಿ ಮ್ಹಣು ಸಾಂಗ್ತಾ ಪಳೆ" ಮ್ಹಣು ಜವಾಬ ದಿಲ್ಲಿ. ತೆ ಆಯಕುನು ಆಪ್ಪುಲಿಕ ಜೋರು ಕೋಪು ಆಯಿಲೊ. ತೀಣೆ ತಿಪ್ಪುಲೆಕ ವ್ಹಡಕಾರಾನ ತೆಕಡೆ ಪಳವ್ನು ವ್ಹಡ ಸೊಡ್ತ ಆಸ್ತನಾ ತಾಕ್ಕಾ ಕಳ್ನಾಸ್ಸಿ ನ್ಹಂಯ್ತು ಲಕವ್ನು ಘಾಲ್ಲೆ. ತಿಪ್ಪುಲಿ ನ್ಹಂಯಿಂತು ಬುಡ್ಡುನು ಮೆಲ್ಲಿ. ಆತ್ತ ಆಪ್ಪುಲಿ ಏಕ್ಲೀಚಿ ಮೊಗರ್ನಾಡ ತೇರಾಕ ವತ್ತಾ, ಭೊಂವ್ತಾ, ಥಂಯಿ ಸಾಂತೆಂತು ನೆಲಕಡ್ಲೊ ಘೆವ್ನು ಖಾತ್ತಾ, ಸೋಡಾ ಪಿತ್ತಾ, ಲಾಟಿ ಪಾಳ್ಯಾರಿ ಬಸ್ತಾ, ಬತ್ತಾಸ, ಸಾಕ್ರೆಚಣೊ, ಅಕ್ರೂಟ ಸಕ್ಕಡ ಘೆವ್ನು ಏಕ್ಲೀಚಿ ಮಿಠಿಯೊ ಮಾರ್ತಽಚಿ ಖಾತ್ತಾ. ಮಸ್ತ ಗಮ್ಮತ ಕರ್ತಾ. ಥಂಯಿ ತೇರಾಕ ದೇವಸ್ಥನಾಂತು ಜವಣ ಆಸ್ತಾ. ತೆ ಜವಣ ಕರ್ತಾ. ಮಾಗ್ಗಿರಿ ಮಸ್ತ ವೇಳು ಭಾಯರ ಭೋಂವ್ತಾ. ಜವಣ ಜಾತ್ತರಿ ಥೋಡೊಚಿ ಕಾಳೋಕು ಜಾವ್ಚಾಕ ಸುರು ಜಾಲ್ಲೆ. ತಾಜ್ಜೆ ನಂತರ ಹೀ ಸಾಂತ ಭೊಂವ್ಲಾ. ಘರಕಡೆ ವಚ್ಚುಕಾ ಜಾಲ್ಲ್ಯಾರಿ ಮಸ್ತ ಚಮ್ಕುನು ವಚ್ಚುಕಾ. ರಾತ್ರಿ ವ್ಹಡ ಆಸ್ಸನಾ. ತಸ್ಸಿಜಾವ್ನು ಆಜಿ ತೇರು ತಾಂಡ್ಚೊ, ರಾತ್ರಿಚೊ ಉಚ್ಚೋವು ಸಕ್ಕಡ ಪಳವ್ನು ಹಾಂಗಾಚಿ ದೇವಸ್ಥನಾಂಚೆ ಜಗ್ಲೇರಿ ನಿದ್ದೋನು ಫಾಯಿ ಸಕಾಂಣಿ ವ್ಹಡಾರಿ ಘರಕಡೆ ವಚ್ಚಾ ಮ್ಹಣು ಚಿಂತುನು ಹುಸ್ಕೊ ಸೋಣು ಸಾಂತ, ತೇರು ತಾಂಡ್ಚೆ, ಉಚ್ಚೋವು ಪಳವ್ನು ವಾವಂಟ ಜಾತ್ತಾನಾ ಥಂಯಿಚಿ ದೇವಸ್ಥನಾಚೆ ಜಗಲೇರಿ ನಿದ್ದತಾ. ತಿಕ್ಕಾ ಜಾಗರು ಜಾತ್ತನಾ ಉಜ್ವಾಡು ಜಾಲ್ಲಾ. ವತಯಿ ಆಯಿಲಾ. ದೇವಾಲೊ ಉಚ್ಚೋವು ಭಾಯರ ಸರ್ತಾ ಆಸ್ಸ. ತೆ ಕಸ್ಸಲೆ ಮ್ಹಣು ಪಳವ್ಚೆ ಖಾತೀರ ಲಾಗ್ಗಿ ವತ್ತನಾ ಚೆರ್ಡುಂವ ಸಕ್ಕಡ ಒಕ್ಕುಳ ಖೇಳ್ಚಾಕ ತಯಾರ ಜಾಲ್ಲಾಂಚಿ. ಆನಿ ಹಾಂಗಾ ರಾಬ್ಲ್ಯಾರಿ ತಿಗೆಲೆ ಆಂಗ್ವಲ್ಯಾರಿ ಬಣ್ಣಾಚೆ ಉದ್ದಾಕ ಪಡತ ಮ್ಹಣು ಹಿ ನ್ಹಂಯ್ಚೆ ಬಗಲ್ಯಾಕ ವತ್ತಾ. ಥಂಯಿ ದೋಣಿ(ವ್ಹಡ) ಆಸ್ಸಿಲಿ. ವ್ಹಡಕಾರೂಯಿ ಆಸ್ಸಿಲೊ. ಹಿ ವಚ್ಚುನು ವ್ಹಡಾರಿ ಬಸ್ತಾ. ಬಾಕಿಚೆ ಜನಯಿ ಯೆವ್ನು ವ್ಹಡಾರಿ ಬಸ್ತರಿ ವ್ಹಡಕಾರು (ಬೋವಿ) ಸೊಡ್ತಾ. ವ್ಹಡ ನ್ಹಂಯ್ಚೆ ಮಧ್ಯೇಂತು ಯೆತ್ತನಾ ಆಪ್ಪುಲಿಕ ತಿಪ್ಪುಲೆಲೊ ಉಗಡಾಸು ಯೆತ್ತಾ. ಆಪ್ಪುಲಿ ಸಾಂಗ್ತಾ: "ನ್ಹಂಯ್ಯೆಂ ನ್ಹಂಯ್ಯೆಂ ದೀ ಮಜಿ ತಿಪ್ಪುಲೆ, ನ್ಹಂಯ್ಯೆಂ ನ್ಹಂಯ್ಯೆಂ ದೀ ಮಜಿ ತಿಪ್ಪುಲೆ." ತೆದನಾ ನ್ಹಂಯಿ ಮ್ಹಣ್ತಾ :"ಕಸ್ಸಲ್ಯಾಗೋ ತು ಕಿರ್ಕಿರ ಕರ್ತಾ, ಘೆ ಏಕಿ ಮಛಲಿ (ಝಳ್ಕೆ) ." ನ್ಹಂಯಿಂ ಮಛಲಿ ದಿತ್ತಾ. ತೀ ಮಛಲಿ ಘೆತ್ತರಿ ಆಪ್ಪುಲಿನ ಬಸ್ಸಿಲಿ ದೋಣಿ ಮುಖಾರಿ ವತ್ತಾ. ದೋಣಿ ಮುಖಾರಿ ವತ್ತಾ ವತ್ತಾ ಬಡ್ಡಕಟ್ಟ್ಯಾರಿ ಆಪ್ಪುಲಿ ದೆಂವ್ತಾ. ತಾಜ್ಜೆ ನಂತರ ತಿಕ್ಕಾ ಘರಕಡೆ ವಚ್ಚುಕಾ ಜಾಲ್ಲ್ಯಾರಿ ಮಸ್ತ ಚಮ್ಕುನು ವಚ್ಚಾಕ ಆಸ್ಸಿಲೆ. ಥೋಡೆಚಿ ದೂರ ವತ್ತನಾ ತಿಕ್ಕಾ ಏಕ ಪೊರ್ನೆ ಘರ ಮ್ಹೆಳ್ತಾ. ಥಂಯಿ ತೆ ಘರಾಚೆ ಆಡ್ಡ್ಯಾರಿ ತಿ ಮಛಲಿ ದವರ್ತಾ ಆನಿ ಭೊಂವ್ಚಾಕ ಮ್ಹಣು ವತ್ತಾ. ತೆ ಮಛಲಿಚೆ ಪಂರ್ಬಳು ಆಕಾಶಾರಿ ಉಬ್ಚೆ ಏಕಿ ಘೋಣಿಕ ಯೆತ್ತಾ. ಘೋಣಿ ಮ್ಹಳ್ಯಾರಿ ಕನ್ನಡಾನಿ ಹದ್ದು, ಗಿಡುಗ ಮ್ಹಣ್ತಾಂಚಿ. ತಿ ಘೋಣಿ ಯೆತ್ತಾ ಆನಿ ತೆ ಝಳ್ಕೆ ಘೆವ್ನು ಉಬ್ಬುನು ವತ್ತಾ. ಆಪ್ಪುಲಿನ ಯೆವ್ನು ಪಳಯ್ಲ್ಯಾರಿ ಮಛಲಿ ಮಾಯಕ ಜಾಲ್ಲ್ಯಾ. ಆಪ್ಪುಲಿ: "ಆಡ್ಡ್ಯಾ ಆಡ್ಡ್ಯಾ ದೀ ಮಜಿ ಮಛಲಿ, ಆಡ್ಡ್ಯಾ ಆಡ್ಡ್ಯಾ ದೀ ಮಜಿ ಮಛಲಿ." ಮ್ಹಣ್ತಾ. ಆಡ್ಡೆ ಮ್ಹಣಾಲೆ: "ಯಿತ್ಯಾಕಗೋ ಕರಕರ ಕರ್ತಾ? ಘೆ ಏಕು ರಾಕ್ಡಾಚೊ ಭೊರೊ." ಆಡ್ಡ್ಯಾನ ದಿಲ್ಲೆಲೆ ತೊ ರಾಕ್ಡಾ ಭೋರು ಘೆವ್ನು ಮುಖಾರಿ ವತ್ತನಾ ಏಕ ಮ್ಹಾಂತಾರಿಲೆ ಘರ ಮ್ಹೆಳ್ತಾ. ಥಂಯಿ ತೊ ಘಾಲ್ತಾ ಆನಿ ಭೊಂವ್ಚಾಕ ವತ್ತಾ. ತೆ ಮ್ಹಾಂತಾರಿನ ಪೋಳ್ಯಾಕ ಮ್ಹಣು ಪೀಟ ವಾಟ್ಟುನು ದವರ್ಲೆಲೆ. ಪೋಳೆ ಕಾಣು ಖಾವ್ಯಾ ಮ್ಹಳ್ಯಾರಿ ಹಾಳ್ಳೆಲೆ ರಾಕುಡ ನಾ. ಆನಿ ರಾನ್ನಾಕ ಜಾವೊ ಗುಡ್ಡ್ಯಾರಿ ವಚ್ಚುನು ಹಾಡ್ಕಾ ಮ್ಹಣು ಚಿಂತುನು ಬಾಯರ ಯೆತ್ತನಾ ಥಂಯಿ ಏಕು ರಾಕ್ಡಾಚೊ ಭೋರು ಪಳವ್ನು ಖೂಸಿ ಜಾತ್ತಾ ಆನಿ ತೊ ಭಿತ್ತರಿ ವರ್ನು ಪೋಳೆ ಕಾಣು ಖಾವ್ಚಾಕ ಬಸ್ತಾ. ಆಪ್ಪುಲಿ ಭೋವ್ನು ಯೆತ್ತನಾ ಹಾಂಗಾ ರಾಕ್ಕುಡ ನಾ. ಆಜ್ಜ್ಯೆಲಾಗ್ಗಿ ನಿಮ್ಗಿತಾ:ಆಜ್ಜೆ ಆಜ್ಜೆ ದೀ ಮಜೊ ರಾಕ್ಡಾ ಭೋರೊ,ಆಜ್ಜೆ ಆಜ್ಜೆ ದೀ ಮಜೊ ರಾಕ್ಡಾ ಭೋರೊ.ತೆ ಆಯ್ಕುನು ಆಜ್ಜಿ: "ಇತ್ತ್ಯಾಕ ಗೋ ತು ಕರಕರ ಕರ್ತಾ. ಘೆ ಏಕ ಪೋಳ್ಯಾಚೊ ದಾಳು." ಮ್ಹಣು ಏಕು ಪೋಳ್ಯಾಚೊ ದಾಳು (ಅಟ್ಟಿ) ದಿತ್ತಾ. ಆಪ್ಪುಲಿ ತೊ ಪೋಳ್ಯಾಚೊ ದಾಳು ಘೆವ್ನು ಏಕ (ಗಾಣಾರಿ ತೇಲ ಕಾಡ್ತಲೊ)ಗಾಣ್ಗಾಚಾಥಂಯಿ ವತ್ತಾ. ಆನಿ ತೊ ಪೋಳ್ಯಾಚೊ ದಾಳು ದವರ್ನು ಭೊಂವ್ಚಾಕ ವತ್ತಾ. ತೆಲ್ಲಾಚೆ ಗಾಣಾರಿ ಕಾಮ ಕರ್ನು ಗಾಣಾಂಚ್ಯಾಕ ಚಾಂಗ ಭೂಕ ಲಾಗ್ಗಿಲಿ. ತಾಣೆ ಥಂಯಿ ಯೆತ್ತನಾ ಪೋಳ್ಯಾಚೊ ದಾಳು ಪಳವ್ನು ಖೂಸೀ ಜಾತ್ತಾ ಆನಿ ತೊ ದಾಳು ಸಕ್ಕಡ ಖಾವ್ನು ಖಾಲಿ ಕರ್ತಾ. ಆಪ್ಪಿಲಿನ ಯೆತ್ತನಾ ಪೋಳ್ಯಾಚೊ ದಾಳು ನಾ. ಗಾಣಾಂಚಾಲಾಗ್ಗಿ: "ಗಾಣಿಗಾರಾ ಗಾಣಿಗಾರಾ ದೀ ಮೆಗೆಲೊ ಪೋಳ್ಯಾಚೊ ದಾಳು, ಗಾಣಿಗಾರಾ ಗಾಣಿಗಾರಾ ದೀ ಮೆಗೆಲೊ ಪೋಳ್ಯಾಚೊ ದಾಳು."ಮ್ಹಣ್ತಾ. ತೆದನಾ ತೊ: "ಯಿತ್ಯಾಗೊ ತೆ ಕರಕರ ಕರ್ತಾ. ಘೆ ಏಕು ಮರ್ಕಟ (ಗಾಣಾಚೆ ಕಾಮ ಕರುಕ ತ್ರಾಣ ನಾತ್ತಿಲೊ) ಬೈಲು." ಮ್ಹಣು ಏಕು ಬೈಲು ದಿತ್ತಾ. ಆಪ್ಪುಲಿ ತೊ ಬೈಲು ಘೆವ್ನು ಏಕ ಮ್ಹಾರಾಲೆ ಘರಾಚೆ ಲಾಗ್ಗಿ ಏಕ ರುಕ್ಕಾಕ ತೊ ಬಾಂದಿತ್ತಾ ಆನಿ ಭೊಂವ್ಚಾಕ ವತ್ತಾ. ತ್ಯಾ ಮ್ಹಾರಾಕ ಪೊಟ್ಟಾಕ ನಾತ್ತಿಲೆ ಚಾರಿ ದಿವಸ ಜಾಲ್ಲೆಲೆ. ರುಕ್ಕಾಕ ಬಾಂದಿಲೆ ಬೈಲಾಕ ಪಳವ್ನು ತಾಕ್ಕಾ ಖೂಸೀ ಜಾತ್ತಾ. ತೆ ಬೈಲಾಕ ದಿವ್ಶಿ ಮಾರ್ನು ರಾಂದಯಿ ಕರ್ನು ಮಿಠಿಯೊ ಮಾರ್ತಚಿ ಖಾತ್ತಾ. ಆಪ್ಪುಲಿನ ಯೆತ್ತನಾ ತೊ ಮರ್ಕಟ ಬೈಲು ನಾತ್ತಿಲೆ ಪಳವ್ನು ತಿ ರಡ್ತಾ. ಆನಿ ತೆ ಮಾರಾಲಾಗ್ಗಿ ಮ್ಹಣ್ತಾ: "ಮ್ಹಾರಾ ಮ್ಹಾರಾ ದೀ ಮಜೊ ಮರ್ಕಟ ಬೈಲು, ಮ್ಹಾರಾ ಮ್ಹಾರಾ ದೀ ಮಜೊ ಮರ್ಕಟ ಬೈಲು." ಮ್ಹಾರಾಕ ಕೋಪು ಯೆತ್ತಾ ಆನಿ ಆಪ್ಪುಲೆಕ ಬಿಸ್ಟಾಯಿತಾ. "ಯಿತ್ಯಾಗೊ ಕರಕರ ಕರ್ತಾ. ಘೇ ಏಕು ಢೋಲು." ಮ್ಹಣು ಏಕು ಢೋಲು ದಿತ್ತಾ. ತೊ ಢೋಲು ಘೆವ್ನು ಆಪ್ಪುಲೆ ಏಕ ರುಕ್ಕಾಕ ಬಾಂದಿತಾ. ಆನಿ ತಾಕ್ಕಾ ಏಕ ಬಡ್ಯೆನಿ ಮಾರ್ತಾ ಆನಿ ನಾಂತಾ. ಢಂ ಢಂ ಢಂ ಢಂ ಢಂ ಢಂ ತಿಪ್ಪುಲೆ ಗೆಲ್ಲಿ ಮಛಲಿ ಹಾಳ್ಳಿ ಢಂ ಢಂ ಢಂ ಮಛಲಿ ಗೆಲ್ಲಿ ರಾಕುಡ ಹಾಳ್ಳೆ ಢಂ ಢಂ ಢಂ ರಾಕುಡ ಗೆಲ್ಲೆ ಪೋಳೆ ಮೆಳ್ಳೆ ಢಂ ಢಂ ಢಂಪೋಳೆ ಗೆಲ್ಲೆ ಬೈಲು ಮೆಳ್ಳೊ ಢಂ ಢಂ ಢಂಬೈಲು ಗೆಲ್ಲೊ ಢೋಲು ಮೆಳ್ಳೊ ಢಂ ಢಂ ಢಂತಿಪ್ಪುಲಿ ನಾ ತಿಪ್ಪುಲಿ ನಾ ತಿಪ್ಪುಲಿ ನಾ ತಿಪ್ಪುಲಿ ನಾಢಂ ಢಂ ಢಂ..... ಢಂ ಢಂ ಢಂ....... ಮ್ಹಣು ಪದ ಮ್ಹಣ್ತಚಿ, ಢೋಲು ಮಾರ್ತಚಿ ನಾಂತಾ. ತಶ್ಶಿ ಢೋಲು ಮಾರ್ನು ಮಾರ್ನು ಆನಿ ಪದ ಮ್ಹಣು ಮ್ಹಣು ಪಡ್ತಾ ಆನಿ ಮರ್ತಾ. -------೦೦೦೦------
ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.
ಬಂಟ್ವಾಳಾಚೆ ಬೈಪಾಸ್ ರಸ್ತ್ಯಾರಿ ಬ್ರಹ್ಮಶ್ರೀ ನಾರಾಯಣ ಗುರು ಸಭಾ ಮಂಟಪ ಆಸ್ಸುಚೆ ಗಾಣದಪಡ್ಪಾಂತು ಏಕ ಬ್ರಾಹ್ಮಣು ಆನಿ ತಾಗೆಲಿ ಬಾಯಲ ಆಸ್ಸಿಲಿಂಚಿ. ತಾನ್ನಿ ಹೆರದಿವಸಾಚೆ ರಾಂದಯಿಕ ಮ್ಹಣು ಅವ್ರೊ ಸೊಡ್ವಾಚಾಕ ಬಸ್ಸಿಲಿಂಚಿ. ತೆದನಾ ತಾಂಗೆಲೆ ಹಾತ್ತಾಂತುಲ್ಯಾನ ಏಕ ಅವ್ರೊ ಉಸೊಳ್ನು ದೂರ ಪಡ್ತಾ. ತೆ ವೇಳಾರಿ ತೊ ಅವ್ರೊ ಲೆಕ್ತಾ-`ಹಾಂವ ಆತ್ತ ವಾಂಚೂನು ವರ್ಲಂಲೆಂ ಹೋಡ. ನ್ಹಂಯಿ ಜಾಲ್ಯಾರಿ ಪಾಲ್ಲ್ಯಾಕ ಶಿಜ್ಜೋನು ರಾಂದಯಿ ಕರ್ನು ತಾನ್ನಿ ಖಾತ್ತಸ್ಸಿಲಿಂಚಿ. ತಶ್ಶಿ ಜಾವ್ನು, ಏಕಿ ಕಾಶಿ ಯಾತ್ರಾ ಪುಣೀ ಕರ್ನು ಎತ್ತಾ.' ಮ್ಹಣು ಕಾಶಿ ಯಾತ್ರೇಕ ವತ್ತಾ. ವಾಟ್ಟೇರಿ ಏಕಿ ಸಾರ್ಣಿವೀರಾ ಕಾಡ್ಡಿ ಮೆಳ್ತಾ. ತಿ ಸಾರ್ಣಿವೀರಾ ಕಾಡ್ಡಿ "ಅವ್ರ್ಯಾ, ಅವ್ರ್ಯಾ, ತೂ ಖೈಂ ವತ್ತಾ?" ಮ್ಹಣ್ತಾ. "ಹಾಂವ ಕಾಶಿ ಯಾತ್ರೇಕ ಮ್ಹಣು ಭಾಯರಸರ್ಲಾ." ಮ್ಹಣಾಲೊ ತೊ ಅವ್ರೊ. "ಹಾಂವೈ ತುಗೆಲೆ ಒಟ್ಟು ಯೆವೂ? ಜಾಯ್ತವೆ?" ಮ್ಹಣು ತಿ ಸಾರ್ಣಿವೀರಾ ಕಾಡ್ಡಿ, ಅವ್ರ್ಯಾಚೆ ಒಟ್ಟು ಸೇರ್ವತಾ ಆನಿ ದೊಗ್ಗಂಯಿ ಕಾಶಿ ಯಾತ್ರೇಕ ವತ್ತಾಂಚಿ. ತಶ್ಶಿಂಚಿ ಮುಖಾರಿ ವತ್ತನಾ ಏಕ್ಲಿ ಬಾಯಲಮನಿಷಿ ಉಜ್ಜೊ ಫುಂಕಿತಽಚಿ ಆಶ್ಶಿಲಿ. ತೆದನಾ ಏಕಿ ಉಜ್ಜಾಕೀಟಿ ಹಾಂಗೆಲಾಗ್ಗಿ ಉಡ್ತಾ ಆನಿ ನಿಮ್ಗಿತಾ, "ತುಂಮಿ ಖೈಂ ಭಾಯರಸರ್ಲಾಂಚಿ? ತುಮಗೆಲೆ ಒಟ್ಟು ಹಾಂವಂಯಿ ಯೆಂವೋ?" ಅವ್ರೊ ಆನಿ ಸಾರ್ಣಿವೀರಾ ಕಾಡ್ಡಿ "ಆಮ್ಮಿ ಕಾಶಿ ಯಾತ್ರೇಕ ಮ್ಹಣು ಭಾಯರಸ್ರ್ಲಾಂಚಿ. ತುವೈ ಆಮ್ಗೆಲೆ ಒಟ್ಟು ಯೆತ್ತಜಾಲ್ಯಾರಿ ವಚ್ಚಾ." ಮ್ಹಣಾಲಿಂಚಿ. ತೀ ಉಜ್ಜಾಚಿ ಕೀಟಿ ತಾಂಗೆಲೆ ಒಟ್ಟೂಚಿ ಕಾಶಿ ಯಾತ್ರೆಕ ವತ್ತಾ. ಉಲ್ಲಯಿತ-ಉಲ್ಲಯಿತ ವತ್ತಾಂಚಿ. ವಾಟ ಸರ್ಲೆಲೀಚಿ ಕಳ್ನಾ. ಕಾಶಿಕ ವಚ್ಚುನು ಪಾವ್ತಾಂಚಿ. ಥಂಯಿ ಕಾಶಿ ವಿಶ್ವನಾಥಾಕ ಪಳವ್ಕಾ ಜಾಲ್ಲ್ಯಾರಿ ಗಂಗಾಸ್ನಾನ (ಮ್ಹಳ್ಯಾರಿ ಥಂಯಿ ಆಸ್ಸುಚೆ ಗಂಗಾನ್ಹಂಯಿಂತು ನಾಂವ್ಚೆ) ಕರ್ಚೆ ಕಾತೀರ ಗಂಗಾತೀರಾರಿ ವತ್ತಾಂಚಿ. ತೇ ಗಂಗೇಕ ಪಳವ್ನು ತೊ ಅವ್ರೊ ಭಿತ್ತಾ. "ಹಾಂವ ಖಂಡಿತ ಗಂಗೇಂತು ಬುಡ್ಡನಾ. ಹಾಂವ ಮರ್ನಾ." ಮ್ಹಣು ಏಕ ಮೆಟ್ಟಾರಿ ಬಸ್ತಾ. ಸಾರ್ಣಿವೀರು ಆನಿ ಉಜ್ಜಾಕೀಟಿ ಅವ್ರ್ಯಾಕ "ಕಾಶೀಕ ಯೆವ್ನು ಗಂಗೆಸ್ನಾನ ಕರ್ನಾಶ್ಶಿ ವತ್ತಲೊ ಬರೀ ಮೂರ್ಖು. ಆಮ್ಮಿ ನ್ಹಾತ್ತಾಂತಿ." ಮ್ಹಣು ಸಾಂಗ್ತಾಂಚಿ. ಆನಿ ಸಾರ್ಣಿವೀರು ಉಜ್ಜಾಕೀಟ್ಯೆಲಾಗ್ಗಿ "ತೂ ಮೆಗೆಲೆ ಭುಜಾರಿ ಬೈಸ, ಹಾಂವ ನ್ಹಾತ್ತಾ. ತುಕ್ಕಾ ತೇಂಚಿ ಪಾವ್ತಾ." ಮ್ಹಣು ಸಾಂಗ್ತಾ. ತಶ್ಶಿ ಮ್ಹಳ್ಳೆ ಕೂಡ್ಲೆ ಉಜ್ಜಾಕೀಟಿ ಸಾರ್ಣಿವೀರಾಚೆ ಭುಜಾರಿ ಬಸ್ತಾ. ಗಂಗೆಂತು ದೆಂವ್ತನಾ ಸಾರ್ಣಿವೀರು ಹೊಳ್ನು ವತಽ ರಾಬ್ತಾ ಆನಿ ತಾಜ್ಜೆ ಒಟ್ಟೂಚಿ ಭುಜಾರಿ ಬಸ್ಸಿಲಿ ಉಜ್ಜಾಚಿಕೀಟಿಯಿ ವತ್ತಾ. ಥೋಡೆ ದೂರ ವತ್ತನಾ ಸಾರ್ಣಿವೀರು ಆನಿ ಉಜ್ಜಾಕೀಟಿ ಉದ್ಕಾಂತು ಬುಡ್ತಾಂಚಿ. ಮೆಟ್ಟಾರಿ ಬಶ್ಶಿಲೊ ಅವ್ರೊ ತೆ ಪಳವ್ನು ಹಾಸ್ತಾ. ಹಾಸ್ತಾ-ಹಾಸ್ತಾ ಕಿಟ್ಕಿಟಿಚಿ ಹಾಸ್ತಾ. ತಾಕ್ಕಾ ಹಾಸು ರಾಬ್ಬೊಚಾಕಂಚಿ ಜಾಯ್ನಾ. "ಕಾಶಿಕ ಯೆವ್ನು ಗಂಗಾಸ್ನಾನ ಕರ್ನಾಶ್ಶಿಂಚಿ ವತ್ತಲೊ ಬರೀ ಮೂರ್ಖು ಖಂಯಿ. ಮಾಕ್ಕಾ ಮೂರ್ಖು ಕರುಕ ವಚ್ಚುನು ತಾನ್ನಿ ದೊಗ್ಗಂಯಿ ಗಂಗೆಂತು ಬುಡ್ಡುನು ಘೆಲ್ಲಿಂಚಿ." ಮ್ಹಣ್ತಚಿ ವಾಪಾಸ ಹಾಸ್ತಾ. ಹಾಸ್ತಾ ಹಾಸ್ತಾ ಅವ್ರ್ಯಾಚೆ ತೊಂಡ ಬೆತ್ತುನು ದೋನಿ ಭಾಗ ಜಾತ್ತಾ. ತೊಂಡ ಬೆತ್ತುನು ಘೆಲ್ಲೆ ಮ್ಹಣು ಆತ್ತ ರಡ್ತಾ. ತೇಂಚಿ ವೇಳಾರಿ ತಂಚಾಣ ಏಕ್ಲೊ ದರ್ಜಿ (ಆಂಗ್ವಲೆ ಶಿಂವೆಂತಲೊ) ವತ್ತಾ ಆಶ್ಶಿಲೊ. ತಾಜ್ಜೆ ಲಾಗ್ಗಿ ಅವ್ರೊ "ಹಾಸ್ತಽ ಹಾಸ್ತಾ ಹಾಂವ ಬೆತ್ತುನು ಘೆಲ್ಲೊ. ಮಾಕ್ಕಾ ಪುಳ್ಯಾ ಮ್ಹಣ್ಕೇಂಚಿ ಜಾವ್ಚೆ ತಶ್ಶಿ ಕರ್ನು ಶಿಂವೈಂತವೆ? ಮೆಗೆಲೆ ತೊಂಡ ಪಿಂದುನು ಘೆಲ್ಲೆಲೆ ಮ್ಹಣು ಕೊಳುಕ ನಜ್ಜ. ತುಜ್ಜಾನ ಜಾತ್ತವೆ?" ಮ್ಹಣು ನಿಮ್ಗಿತಾ. ತೆ ಆಯ್ಕುನು ತೊ ದರ್ಜಿ "ಪುಡೆ ಆಲಿಬಾಬಾ ಆನಿ ಚಾಳೀಸ ಚೋರ್ ಹ್ಯಾ ಕಾಣ್ಯಾಂತುಲೆ ದರ್ಜಿನ ಮಡೆ ದೋನಿ ಕುಡ್ಕೆ ಜಾಲ್ಲೆಲೆ ಕಳ್ನಾಸ್ಸಿ ಶಿಂವೈಲೆ ಮ್ಹಣು ಕಾಂಣಿಂತು ಸಾಂಗ್ಲ್ಯಾವರಿ ಮಾಕ್ಕಾ ಶಿಂವೊಂಚಾಕ ಜಾಯ್ನಾ. ಶಿಂವೊನು ಜಾತ್ತರಿ ಏಕು ಗೇರು ವರ್ತಾ ಜಾಯ್ತವೇ?"ಮ್ಹಣ್ತಾ. ದೋನಿ ಭಾಗ ಆಸ್ಸುಚೆ ಬದ್ಲಾಕ ಏಕು ಗೇರು ಆಸ್ಲ್ಯಾರಿ ಚಿಂತನಾ ಮ್ಹಣು ಜಾಯ್ತ ಮ್ಹಣಾಲೊ ತೊ ಅವ್ರೊ. ತಶ್ಶಿಂಚಿ ದರ್ಜಿ ತೆ ಅವ್ರ್ಯಾಚೆ ದೋನಿ ಭಾಗ ಒಟ್ಟು ಕರ್ನು ಶಿಂವೈಂತಾ. ತೆ ಅವ್ರ್ಯಾರಿ ದರ್ಜಿನ ಸಾಂಗ್ಲಾವರೀಚಿ ಏಕು ಗೇರು ವರ್ತಾ. ತೇಂಚಿ ಅವ್ರ್ಯಾಕ ಆತ್ತ ಜೈನವರೊ ಮ್ಹಣ್ತಾಂಚಿ.-----೦೦೦೦೦-----
ಬಂಟ್ವಾಳಾಂತು ಸ್ಕೂಲಾ ಓಣಿಂತು ಭಂಡಾರಿಬೆಟ್ಟು ತೋಡಾಲಾಗ್ಗಿ ಏಕ ಬ್ರಾಹ್ಮಣ ಆನಿ ತಾಗೆಲಿ ಬಾಯಲ ಆಶ್ಶಿಲಿಂಚಿ. ತಾಂಗೆಲೆ ನ್ಹಾಂವ ನಾಗಪ್ಪ ಭಟ್ಟ ಆನಿ ಶಾಂಭವಿ ಮ್ಹಣು. ಶಾಂಭವಿ ಚಿಕೆಚಿ ಪೆದ್ದಿ. ಏಕು ದಿವಸು ತೊ ನಾಗಪ್ಪ ಭಟ್ಟು ಖೈಂಕಿ ಜವಣಾಂಕ ವಚ್ಚುನು ಆಯಿಲೋಚಿ "ವ್ಹೈಗೋ ಶಾಂಭಿ, ಮಾಕ್ಕಾ ಅಶ್ಶಿ ಕೆಲ್ಲೆ ತಶ್ಶಿ ಕರ್ನು ದೀ. ಆಜಿ ಹಾಂವೆ ಏಕು ಖೆಲ್ಲೊ. ಕಿತ್ಲೊ ಚಾಂಗು ಜಾಲ್ಲೊ?" ಮ್ಹಣಾಲೊ. ಶಾಂಭವಿಕ ಹೊ ಕಸ್ಸಲೆ ಸಾಂಗ್ತಾ ಮ್ಹಣು ಕಳ್ಳೆ ನಾ. "ತಶ್ಶಿ ಮ್ಹಳ್ಯಾರಿ ಕಸ್ಸಲೆ." ಮ್ಹಣಾಲಿ. "ಪಳೆ ತೆ ಘರಕಡೆ ಕರ್ತಾಂತಿ." ಮ್ಹಣಾಲೊ. ಶಾಂಭವಿ ತೆ ಘರಕಡೆ ವಚ್ಚುನು ಪಳಯಿಲ್ಯಾರಿ ಕಸ್ಸಲ್ತೆ? ಓಡೊ. "ಇಶ್ಶಾಬ್ಬಾ. ಏಕ ಓಡೊ ಮ್ಹಣು ಸಾಂಗುಕ ಇತ್ಲೆವೆ ಸಾಂಗ್ಚೆ? ಅಶ್ಶಿ ಕೆಲ್ಲೆಂ ತಶ್ಶಿ ಮ್ಹಣು?" ಮ್ಹಣಾಲಿ ಶಾಂಭವಿ. ಬಾಮ್ಣಾಲಾಗ್ಗಿ ಸಾಂಗುನು ತಾಕ್ಕಾ ಜಾವ್ಕಾ ಜಾಲ್ಲೆಲೆ ಪೀಟ, ತೇಲ ಹಾಡಯಿಲೆ. ಶಾಂಭವಿನ ಪೀಟ ಲಾಯಕ ಕರ್ನು ಕಾಲ್ಲೊವ್ನು ಓಡೊ ಥಾಪ್ಪುಕ ಬಸ್ಲಿ. ಓಡೊ ಥಾಪ್ಪುನು ಜಾತ್ತರಿ ರಾನ್ನಿಂತು ಉಜ್ಜೊ ಕರ್ನು ತೇಲ ದವರ್ಲೆ ಆನಿ ತಾಂತು ಥಾಪ್ಪಿಲೊ ಓಡೊ ಸೊಳ್ಳೊ. ತಾಜ್ಜೆ ನಂತರ ಕಾಯಿಲೆದಾಕುನು ಕಾಣು ಬಾಮ್ಣಾಂಕ ಖಾವ್ಚಾಕ ದಿಲ್ಲೊ. ನಾಗಪ್ಪ ಭಟ್ಟಾನ ತೊ ಖಾವ್ನು "ಅಯ್ಯೊ- ಹೆ ಕಸ್ಸಲೆ ಅಶ್ಶಿ ನ್ಹಂಯಿ ತಶ್ಶಿ?" ಮ್ಹಣಾಲೊ. ತೆ ಆಯ್ಕುನು ಶಾಂಭವಿಕ ಬೇಜಾರು ಜಾತ್ತಾ. ತಿಕ್ಕಾ ಹೊ ಕಸ್ಸಲೆ ಸಾಂಗ್ತಾ ಮ್ಹಣು ಕಳ್ನಾ. ತಿ ಪರ್ತೂನು ತೆ ಘರಕಡೆ ವತ್ತಾ ಆನಿ ತೀಣೆ ಕರ್ಚೆ ಪಳಯಿತಾ. ತೀಣೆ ಕೆಲ್ಲಲೊ ಓಡೊ ಎತ್ತರ ಪುಗ್ಲಾ. ಶಾಂಭವಿಕ ಕಳ್ಳೆ. ಥಾಪ್ಪುಕ ಬಸ್ಸಿಲಿ ಮಾತ್ಯಾರಿ ವರ್ಲ ಘಾಲ್ನು ಥಾಪ್ತ ಆಶ್ಶಿಲಿ. ತಿಗೆಲೆ ಮಾತ್ಯಾಚೊ ಕೇಸು ಸಪಾಯಕರ್ನು ಕಾಳ್ಳಾ. ತೆ ಪಳವ್ನು "ಓ.... ಕಳ್ಳೆಂ." ಮ್ಹಣ್ತಾ ಆನಿ ಸೀದಾ ಪೆಂಟಾಂತು ಆಂಗ್ಡಿಕ ವಚ್ಚುನು ಮಾತ್ಯಾಚೊ ಕೇಸು ಕಾಡಯಿತಾ. ಘರಕಡೆ ಯೆವ್ನು ಮಾತ್ಯಾರಿ ವರ್ಲ ಘಾಲ್ನು ಬಸ್ತಾ ಆನಿ ಓಡೊ ತಳ್ತಾ. ತೆದನಾ ತೆ ಘರಕಡೆ ಪುಗ್ಲ್ಯಾವರೀಚಿ ಓಡೊ ಪುಗ್ಗುನು ಚಾಂಗು ಜಾತ್ತಾ. ತೊ ತೆಲ್ಲಾ ದಾಕುನು ಕಾಣು ಬಾಮ್ಣಾಕ ಖಾವ್ಚಾಕ ದಿವ್ಚಾಕ ವತ್ತಾ. ಬಾಮ್ಮುಣು ನಾಗಪ್ಪಾ ತಾಗೆಲೆ ಬಾಯಲ ಶಾಂಭವಿಲೊ ಅವತಾರು ಪಳವ್ನು ಧಸ್ಕೆತಾ. "ಹೆಂ ಕಸ್ಸಲೆ?" ಮ್ಹಣ್ತಾ. ಶಾಂಭವಿ "ತುಮ್ಮಿ ಸುರುವೆಕ ಓಡೊ ಖಾತ್ತನಾ ಅಶ್ಶಿ ನ್ಹಂಯಿ ತಶ್ಶಿ ಮ್ಹಳ್ಳೆ ನಂವೆ? ಹಾಂವೆ ತೆ ಘರಕಡೆ ವಚ್ಚುನು ಪಳವ್ನು ಆಯಿಲಿ. ತೀ ಮಾತ್ಯಾಚೆ ಕೇಸು ಕಾಣು ವರ್ಲ ಮಾತ್ಯಾರಿ ಘಾಲ್ನು ತೊಳುಕ ಬಸ್ಸಿಲಿ. ತೆದನಾ ತೀಣೆ ತೊಳ್ಚೊ ಓಡೊ ಪುಗ್ಗುನು ಆಶ್ಶಿಂಚಿ ಜಾಲ್ಲಲೊ. ಹಾಂವೆ ಮಾತ್ಯಾಚೊ ಕೇಸು ಕಾಡ್ಚೆ ಪುಡೆ ತಳ್ಳಲೊ ಓಡೊ ಪುಗ್ಗನಿ ನಂವೆ? ತಿಗೆಲ್ಯಾ ಮ್ಹಣ್ಕೆಚಿ ಜಾವ್ನು ಬಸ್ಲ್ಯಾರಿ ಓಡೊ ಪುಗ್ತಾ ಮ್ಹಣು ಪೆಂಟಾಕ ವಚ್ಚುನು ಮಾತ್ಯಾಚೊ ಕೇಸು ಕಾಣು ಆಯಿಲಿ ಆನಿ ಮಾತ್ಯಾರಿ ವರ್ಲ ಘಾಲ್ನು ತಳ್ಳೊ. ತಶ್ಶಿ ಜಾವ್ನು ಓಡೊ ಅಶ್ಶಿ ಜಾಲ್ಲೊ. ಖಾಯ್ಯಾಚಿ ಆನಿ ಲಾಯಕು ಜಾಲ್ಲಾಕಿನಾ ಮ್ಹಣು ಸಾಂಗಾಚಿ." ಮ್ಹಣಾಲಿ ಶಾಂಭವಿ. ನಾಗಪು ಮಾತ್ಯಾರಿ ಹಾತು ದವರ್ನು "ಕಸ್ಸಲೆ ಶಾಂಭಿ ಹೆ. ತುವೆ ಸುರುವೆಕ ಓಡೊ ತಳ್ತನಾ ತೇಲ ತಾಪ್ಪನಾತ್ತಿಲೆ. ತಾಜ್ಜೆ ನಂತರ ತೂ ತೆ ಘರಕಡೆ ವಚ್ಚುನು, ಪೆಂಟಾಚೆ ಆಂಗ್ಡಿ ವಚ್ಚುನು ಮಾತ್ಯಾಚೊ ಕೇಸು ಕಾಣು ಘರಕಡೆ ಯೆತ್ತನಾ ರಾನ್ನಿರಿ ದವರ್ಲೆಲೆ ತೇಲ ತಾಪ್ಪುನು ಹದ ಜಾಲ್ಲೆಲೆ. ತಶ್ಶಿ ಜಾವ್ನು ಮಾಗ್ಗಿರಿ ತಳ್ಳಲೊ ಓಡೊ ಪುಗ್ಗುನು ಇತ್ಲೆ ಎತ್ತರ ಜಾಲ್ಲೊ." ಮ್ಹಣಾಲೊ.ನಂತರ "ತುವೆ ಕೆಲ್ಲೆಲೆ ಕಾಮಾಕ ಹಾಂವೆ ಆತ್ತ ಹಾಸುಕಾಕಿ ರಡ್ಕಾ ಮ್ಹಣು ಕಳ್ನಾಗೊ ಮಾಕ್ಕಾ ಶಾಂಭಿ. ತೀ ಬಾಯಲ ಮನಿಷಿಲೊ ಬಾಮ್ಹುಣು ದೈವಾಧೀನ ಜಾಲ್ಲೆಲೆ ನಿಮಿತಿ ತಿಗೆಲೊ ಮಾತ್ತ್ಯಾಲೊ ಕೇಸು ಕಾಳ್ಳಾ. ಆತ್ತ ಹಾಂವ ತುಗೆಲೊ ಬಾಮ್ಹುಣು ಜೀವಂತ ತುಗೆಲೆ ಎದ್ರಾಕ ಆಸ್ಸ ನಂವೆ? ಆತ್ತ ತುವೆ ಬಾಯಿರ ಘೆಲ್ಲ್ಯಾರಿ ಸಕ್ಕಡ `ಜನ ತುಗೆಲೊ ಬಾಮ್ಹಣಾಕ ಆತ್ತ ಪಳಯಿಲಾ. ತಿತ್ಲೆ ಭಿತ್ತರಿ ಕಸ್ಸಲೆ ಜಾಲ್ಲೆ?'ಮ್ಹಣು ನಿಮ್ಗುಚಾಕ ಸುರುಕರ್ತಾಂಚಿ. ತಸ್ಸಿ ಜಾವ್ನು ತೊಡೆ ದಿವಸ ತು ಘರಾಂತೂಚಿ ಬಯಸುಕಾ ಜಾಲ್ಲೆಮೂ ಮ್ಹಣು ಮಾಕ್ಕಾ ಬೇಜಾರು. ನಾಕ್ಕಾಸ್ಸಿಲೆ ಮಾಕ್ಕಾ ಅಶ್ಶಿ ಕೆಲ್ಲೆಂ ತಶ್ಶಿ." ಮ್ಹಣಾಲೊ.
------೦೦೦೦-----ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.
ಬಂಟ್ವಾಳ ಗಾಂವಾದಾಕುನು ಬೈಪಾಸ ರಸ್ತಾರಿ ವಚ್ಚುನು ಥಂಯತೂಲ್ಯಾನ ಬಿ.ಸಿ.ರೋಡಾಕ ವತ್ತನಾ ಗಾಣದ ಪಡ್ಪು ಮ್ಹಳ್ಳಲೆ ಜಾಗ್ಯಾರಿ ನಾರಾಯಣ ಗುರು ಸಭಾ ಭವನ ಮ್ಹೆಳ್ತಾ. ತ್ಯಾ ಜಾಗ್ಯಾಚೆ ತೊಗ್ಗು ಗಾದ್ಯೆ ಆನಿ ತೋಟ ಆಸ್ಸುಚೆ ಜಾಗ್ಯಾಕ ಪೆಲ್ತಿಮಾರ ಮ್ಹಣು ಆಪ್ಪಯಿತಾಚಿ. ತ್ಯಾ ಸಾನ್ನ ಹಳ್ಳಿಂತು ಮಸ್ತಕಾಳಾಚೆ ಪುಡೆ ಆತ್ತ ಆಶ್ಶಿಲ್ಯಾಮ್ಹಣ್ಕೆ ರಸ್ತೊ ನಾಸಿಲೊ. ತೆ ವೇಳಾರಿ ಥಂಯ ಏಕ್ಲೊ ಸಾಗ್ವಳಿದಾರು ಆಸ್ಸಿಲೊ. ತಾಗೆಲೆ ನಾಂವ ಸಾಂತಪ್ಪಾ (ಸಾಂತೊಪು) ಮ್ಹಣು. ಜನಾನಿ ತಾಕ್ಕಾ ಅಪ್ಪವ್ಚೆ ಸಾನು ತೊಪು ಮ್ಹಣು. ಸಾನು ತೊಪು ಅಶ್ಶಿಲೆ ಆಪ್ಪಯಿತ ಆಪ್ಪಯಿತ ತೋಪು ಜಾಲ್ಲೆ, ನಂತರ ತೂಪ ಜಾಲ್ಲೆ. ತಸ್ಸಿಂಚಿ ತಾಗೆಲಿ ಬಾಯಲ ಗೋದಾವರಿ. ತಿಕ್ಕಾ ಸಾಂತಪಾನ ಮ್ಹಳ್ಯಾರಿ ತುಪ್ಪಾನ ಪ್ರೀತೀನ ಗೋದ್ಯ, ಗೋದ್ಯ ಮ್ಹಳ್ಳಲೆ ಮಾಗಿರಿ ಗೋಡ್ಶೆ ಮ್ಹಣು ಜಾತ್ತಾ. ತೆ ಬಾಮ್ಹುಣು ಆನಿ ಬಾಯಲ ಮಸ್ತ ಪ್ರೀತೀನ ಆಶ್ಶಿಲಿಂಚಿ. ಜಾಲ್ಯಾರಿ ತಾಂಕಾ ಚೆರ್ಡುಂವ ಜಾಯ್ನಾಚಿ. ತಸ್ಸಿ ಜಾವ್ನು ತಾನ್ನಿ ಏಕ ಮಾಜ್ರಾಪೀಲಕ ಪೊಸ್ತಾಂಚಿ ಆನಿ ತಾಕ್ಕಾ ಪ್ರಮೀಳಾ ಮ್ಹಣು ಆಪ್ಪಯಿತಾಂಚಿ. ತೆ ಪ್ರಮೀಳಾ ಆಸ್ಸಿಲೆ ಆಪ್ಪವ್ನು ಆಪ್ಪುವ್ನು ಪಳೆ ಜಾಲ್ಲೆ. ತಶ್ಶಿಂಚಿ ತಾಂಗೆಲೆ ತೋಟಾಂತು ಏಕಪಟಿ ಚೊರ್ನು ಘೆಲ್ಲೆ. ತೆದನಾ ತೋಟ ರಾಕ್ಛೆ ಖಾತೀರ ತಾನ್ನಿ ಸುಣೆ ಪೊಸ್ಲೆ. ತಾಕ್ಕಾ ರಾಜು ಮ್ಹಣು ನ್ಹಾಂವ ದವರ್ಲೆ. ರಾತ್ರಿಚೆ ತೋಟಾಂತು ಕಸ್ಸಲೆಯಿ ಶಬ್ಧು ಜಾಲ್ಲ್ಯಾರಿ ತೆ ಸುಣ್ಯಾನ ಕಸ್ಸಲೆ ಕರ್ಕಾ ಮ್ಹಣು ಶಿಕೋಚೆ ಖಾತೀರ ರಾಜು-ಆಡಬಾಂದಿ ಮ್ಹಣ್ಚೆ ಆನಿ ತೋಟಾಕ ಧಾಂವ್ಡಾಚೆ ಆಶ್ಶಿಲೆ. ಕ್ರಮೇಣ ತೆ ಸುಣ್ಯಾಂಕ ಆಡಬಾಂದಿ ಮ್ಹಣು ಆಪ್ಪಯಿನಾ ಜಾಲ್ಯಾರಿ ಕಳ್ನಾಸಿಲೆ. ತಶ್ಶಿಂಚಿ ತಾನ್ನಿ ಗಾದ್ದೊ ಕೊಸ್ಸುಚಾಕ ಸುಬ್ರಮಣ್ಯದಾಕುನು ಹಾಳ್ಳೆಲೆ ದೋನಿ ರಡ್ಡ್ಯಾಂಕ ರಡ್ಡೊ ಆನಿ ಬಡ್ಡೊ ಮ್ಹೊಣು ಆಪ್ಪವ್ಚಾಕ ಸುರುಕೆಲ್ಲೆ. ಜಾಲ್ಲ್ಯಾರಿ ರಡ್ಡೊ ಖಂಚೆ ಕಾಮ ಕರ್ತನಾ ಸೊಯಿರೊ ಸೊ ಕರ್ತಲೊ. ತಶ್ಶಿ ಸೊಯರೊ ಸೊ ಕಸ್ಸಲ್ಯಾಕ ಕರ್ತಾ ಮ್ಹಣು ತಾತ್ತಾವಳಿ ಮ್ಹಳ್ಳಲೆ ನಿಮಿತಿ ರಡ್ಡ್ಯಾಲೆ ನ್ಹಾಂವ ಸೊಯೆರೊ ಮ್ಹಣೂಚಿ ಜಾಲ್ಲೆ. ತಸ್ಸಿ ತಾಂಗೆಲೆ ಘರಕಡೆ ನ್ಹಾಂವ್ವ ಸಕ್ಕಡ ಸಾಂತೊಪು ಆಸ್ಸಿಲೆ ತೂಪ, ಗೋದಾವರಿ ಆಸ್ಸಿಲೆ ಗೋಡ್ಶೆ, ಪ್ರಮೀಳಾ ಆಸ್ಸಿಲೆ ಪಳೆ, ರಾಜು ಆಸ್ಸಿಲೆ ಆಡಬಾಂದಿ, ರಡ್ಡೊ ಆಸ್ಸಿಲೆ ಸೊಯರೊ ಆನಿ ಆನ್ನೆಕು ರಡ್ಡೊ ಬಡ್ಡೊಚಿ ಜಾಲ್ಲೊ. ಪುಡೆ ಕಾಳಾರಿ ಹಳ್ಳಿಂತುಲೆ ಜನ ತಾಂಗೆಲೆ ಘರಕಡೆ ಕೊಣಂಯಿ ಸೊಯರೆ ಆಯಿಲ್ಯಾರಿ ತಾಂಕಾ ಸತ್ಕಾರ ಕರ್ಚಾಂತು ನ್ಹಾಂವ ಪಾವ್ಲಾಂಚಿ. ತಸ್ಸಿಂಚಿ ಹೆ ಬಾಮ್ಹುಣ ಬಾಯಲಾನಿ ಸಕಾಳಿ ದಾಕುನು ಸಾಂಜ್ವಳಥಾಂಯಿ ಕಷ್ಟಾರಿ ಗೊಳ್ಚೆ, ಪೊಟಭರಿ ಖಾವ್ಚೆ ಆನಿ ಕೋಣಂಯಿ ತಾಂಗೆಥಂಯಿ ಆಯಿಲ್ಯಾರಿ ತಾಂಕಾಯಿ ಸತ್ಕಾರು ಕರ್ಚೆ ಆಸ್ಸಿಲೆ. ಏಕ ಪಟಿ ತಾಂಗೆಥಂಯಿ ಆಯಿಲೆ ಸೊಯರಾಕ ತಾಂಗೆಲೆ ನಾಂವಾಚೆ ನಿಮಿತಿ ಕಸ್ಸಲೆ ಮ್ಹಣು ಕಳ್ನಾಸ್ಸಿ ಮಸ್ತ ಘಾಬ್ರೆನು ಜವಣ ಕರ್ನಾಸ್ಸಿ ಧಾವಿಲಿ ಕಾಂಣಿ ಆಯ್ಕಯಾ. ಏಕು ದಿವಸು ತೂಪ ಗಾದ್ದ್ಯಾಂತು ಕಾಮಕರ್ತ ಆಸ್ತನಾ ದೂರ ದಾಕುನು ಎಕ್ಲೊ ಯೆತ್ತ ಆಸ್ಸಿಲೊ. ಲಾಗ್ಗಿಚಿ ಯೆತ್ತರಿ ತೊ ತಾಂಗೆಥಂಯಿಚಿ ಆಯಿಲೊ ಸೊಯರೊ ಮ್ಹಣು ಕಳ್ಳೆ. ಪ್ರೀತೀನ ತೂಪ ತಾಗೆಲಾಗ್ಗಿ "ಮಾಕ್ಕಾ ಆನಿಕಯಿ ಥೋಡೆ ಕಾಮ ಆಸ್ಸ. ತೂ ಘರಕಡೆ ವಸ. ಥಂಯಿ ತುಕ್ಕಾ ಗೋಡ್ಶೆ ವಾಡ್ತಲಿ. ಜವಣ ಕರಿ ಆನಿ ವಿಶ್ರಾಂತಿ ಘೆ. ಹಾಂವ ಮಾಗ್ಗಿರಿ ಯೆತ್ತಾ." ಮ್ಹಣಾಲೊ. ಸೊಯರೊ ಮನ್ಶಾಕ ಮಸ್ತ ಖೂಸೀ ಜಾಲ್ಲಿ. ತಾಕ್ಕಾ ಗೋಡ್ಶೆ ಮ್ಹಳ್ಯಾರಿ ಪ್ರೀತಿ. ಆಜಿ ಗಮ್ಮತ ಗೋಡ್ಶೆ ಭುರ್ಕುಕಾ ಮ್ಹಣು ಮನಾಂತೂಚಿ ಲೆಕ್ಕುನು ಘರಾಲಾಗ್ಗಿ ವತ್ತಾ. ಗೋಡ್ಶೆ ತಾಕ್ಕಾ ಪಳಯಿತಾ. ತಿಕ್ಕಾ ತಾಗೆಲೊ ವಳಕ ಕಳ್ನಾ. ಪಾಯ ಧುವ್ಚಾಕ ಉದ್ದಾಕ ದಿತ್ತಾ. ಪುಡೆ ಕಾಲಾರಿ ಹಳ್ಳಿಂತು ಕೊಣಂಯಿ ಘೆಲ್ಲ್ಯಾರಿ ಸುರುವೆಕ ತಾಂಕಾ ಹಾತಪಾಯ ಧುವ್ಚಾಕ ಉದ್ದಾಕ ದಿವ್ಚೆ, ನಂತರ ತಾನ್ನಿಕ ಕಸ್ಸಲೆ ಜಾಯಿ- ತಾಕ ಜಾವೊ ಉದ್ದಾಕ ಆನಿ ಗೋಡ - ಮ್ಹಣು ನಿಮ್ಗುನು ದಿವ್ಚೆ ಆಸ್ಸಿಲೆ. ತಸ್ಸಿಂಚಿ ಪಿಂವ್ಚಾಕ ಗೋಡ ಆನಿ ಉದ್ದಾಕ ದಿತ್ತಾ. ನಂತರ "ತೂಪ ಯೆವೊ, ನಂತರ ವಾಡ್ತಾ" ಮ್ಹಣು ಸಾಂಗ್ತಾ. ಸೊಯರ್ಯಾಕ ಆನಿಕಯಿ ಖೂಸೀ ಜಾತ್ತಾ. ಹಾಂಗಾ ಹಳ್ಳಿಂತು ಪರಂಬಳೀ ತೂಪ ಆಸ್ಸುಪೂರೊ. ಆಜಿ ಹಾಂವ ಉಟಾಯಿತನಾ ಕೊಣಾಲೆ ತೋಂಡ ಪಳಯಿಲಾ. ಗಮ್ಮತ ಆಸ್ಸ ಮ್ಹಣು ಲೆಕ್ತಾ. ಕೆದನಾ ತೂಪ ಯೆತ್ತಾ ಮ್ಹಣು ರಾಕ್ಕುನು ಬಸ್ತಾ. ಸುಮಾರ ವೇಳು ಜಾತ್ತನಾ ತೂಪ ಯೆತ್ತಾ. ಆಂಗ್ಣಾಂತು ಚಡತನಾಂಚಿ ಕೊಡ್ಕ್ಯಾಂತು ಪಳಯಿಲೆ. ಏಕು ರಡ್ಡೊ ಮಾತ್ರ ಆಸ್ಸ. ತೆ ಪಳವ್ನು ತಾಕ್ಕಾ ಧಸಕ್ ಜಾತ್ತಾ. ದೋನಿ ರಡ್ಡ್ಯಾಂಕ ತಾವಳೀಂಚಿ ಘರಾ ದಿಕ್ಕಡೆ ಆಂಬುಳ್ಯಾ. ಏಕ ಮಾತ್ರ ಆಯ್ಲಾ. ಆನ್ನೆಕು ಖಂಯಿ ಘೆಲ್ಲೊ? ಗ್ರಾಚಾರ ಜಾಲ್ಲೆಮೂ? ಮ್ಹಣು ಬಾಯಿಲೆಕ ಘಟ್ಟಿ ಸ್ವರಾನಿ ಆಪ್ಪಯಿತಾ ಆನಿ "ವೈಗೊ, ಸೊಯರೊ ಆಯಿಲಾ. ತಾಕ್ಕಾ ಬಾಂದುನು ಘಾಲಿ. ಬಡ್ಡೊ ಘೇವ್ನು ಯೆತ್ತಾ." ಮ್ಹೋಣು ಸಾಂಗುನು ವತ್ತಾ. ತೀ ಭಿತ್ತರಿದಾಕುನು "ಹಾಂ, ಜಾಯತ, ಬಾಂದಿತಾ." ಮ್ಹಣಾಲಿ. ಜಗಲೇರಿ ಬಸ್ಸಿಲ್ಯಾ ಸೊಯರ್ಯಾಕ ಭಂಯ್ಯ ಸುರುಜಾಲ್ಲೆ. ತಾಗೆಲೊ ರಾವ್ ಸುಟ್ಲೊ. ಹಾಂಗೆಲಿ ಹಿಕ್ಮತಿ ಹಿವೆ? ತೂಪ ಆನಿ ಗೋಡ್ಶೆ ಮ್ಹಣು ಫಟ್ಟಿ ಸಾಂಗುನು ಮಾಕ್ಕಾ ದಿವ್ಶಿ ಮಾರ್ಚೆ ಉಪಾಯ ಹಾಂಗೆಲೆ. ಅಶ್ಶಿ ಲೆಕ್ಕುನು ತಾಂಕಾ ಕಳ್ನಾಸಿ ಧಾಂವ್ತಾ. ಗೋಡ್ಶೆ ಸೊಯರ್ಯಾಕ (ರಡ್ಡ್ಯಾಕ) ಬಾಂದುನು ಯೆತ್ತನಾ, ಬಡ್ಡ್ಯಾಕ ಘೆವ್ನು ಬಾಮ್ಣಾನ ಯೆವ್ಚೆಭಿತ್ತರಿ ಮಾಜ್ರಾಕ ಆನಿ ಸೂಣ್ಯಾಂಕ ಶೀತ ಘಾಲ್ತಾ ಮ್ಹಣು ತಾಂಕಾ ಆಪ್ಪಯಿತಾ. "ಪಳೆ...ಪಳೆ....ಪಳೆ" ಮ್ಹಣು ಮಾಜ್ರಾಕ ಆಪ್ಪಯಿತಾ ಆನಿ "ಆಡಬಾಂದಿ...ಆಡಬಾಂದಿ.....ಆಡಬಾಂದಿ." ಮ್ಹಣು ಸೂಣ್ಯಾಕ ಆಪ್ಪಯಿತಾ. ಸೂಣೆ ಆನಿ ಮಾಜ್ಜರ ಧಾವ್ನು ಯೆವ್ನು ಘಾಲ್ಲೆಲೆ ಶೀತ ಖಾತ್ತಾಚಿ. ಜಾಲ್ಲ್ಯಾರಿ ಕೋಣಾಂಕಯಿ ಕಳ್ನಾಸ್ಸಿ ಧಾವ್ನು ವತ್ತಲೆ ಸೊಯರ್ಯಾಕ ದೂರ ದಾಕುನು ತೂಪ ಯೆವ್ಚೆ ಪಳವ್ನು ಏಕ ರುಕ್ಕಾ ಆಡ ನಿಪ್ಪೋವ್ನು ಬಸ್ಲೊ. ತೆದನಾ ಗೋಡ್ಶಾನ ಪಳೆ...ಪಳೆ ಆನಿ ಆಡಬಾಂದಿ ಮ್ಹಣು ಸಾಂಗಿಲೆ ಆಯ್ಕುನು ಥಂಯಿ ದಾಕುನು ಏಕ ಉಸ್ರಾಕ ಧಾಂವ್ತಾ. ಹೆ ದಿಕಾನ ತೂಪ ಬಡ್ಡ್ಯಾಕ ಹಾಡ್ತಾ. ಆನಿ ಬಾಂದುನು ಘಾಲ್ತಾ. ಹಾತಪಾಯ ಧೂವ್ನು ತೂಪ ಆನಿ ಗೋಡ್ಶೆ ಜಗಲೇರಿ ಯೆತ್ತನಾ ಥಂಯಿ ಸೊಯರೊ ನ್ಶ್! ದೊಗ್ಗಾಂಕಯಿ ಆಶ್ಚರ್ಯ ಜಾತ್ತಾ. ಭಾಯರ ಪಳಯಿಲ್ಯಾರಿ ಸೊಯರೊ ದೂರ ಧಾಂವ್ಚೆ ದಿಸ್ತಾ. ಜಾಲ್ಲ್ಯಾರಿ ಸೊಯರ್ಯಾನ ಧಾಂವ್ಚಾಕ ತಾಂಗೆಲೆ ನಾಂವಾಂಚೆ ಅವಾಂತರ ಮ್ಹಣು ಮಾತ್ರ ತಾಂಕಾ ಕಳ್ನಾ.
----೦೦೦೦---
ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ. ಪುಡೆ ಆಯಿಕಲಾ ಮ್ಹಣು ಮನಾಂಕ ಯೆತ್ತಾ.
ಬಂಟ್ವಾಳ ಗಾಂವಾಂಚೆ ಕಾಲೇಜಾಚೆ ರಸ್ತ್ಯಾರಿ ಚಾರಿ ರಸ್ತ್ಯೊ ಒಟ್ಟು ಜಾವ್ಚೆ ಮಾರ್ಗಾಂತುಲ್ಯಾ ಧರ್ಮಸ್ಥಳಾಕ ವಚ್ಚೆ ರಸ್ತ್ಯಾರಿ ಮುಖಾರಿ ವತ್ತನಾ (ಮಣಿಹಳ್ಳ, ಮಣಿತ್ಯಾರ)ಮಣಿವಾಳ, ವಗ್ಗಾ, ಕಾವಳಕಟ್ಟೆ, ಪುಂಜಾಲಕಟ್ಟೆ, ಮಡಂತ್ಯಾರ, ಪಣಕಜೆ, ಗುರುವಾಯನಕೆರೆ, ಬೆಳ್ತಂಗಡಿ ಆದಿಲೆ ಗಾಂವ ಮ್ಹೆಳ್ತಾಂಚಿ. ತಶ್ಶಿಂಚಿ ಬೆಳ್ತಂಗಡಿಚೆ ಆಸಪಾಸ ಬೈಲಂಗಡಿ ಮ್ಹಳ್ಳಲೊ ಸಾನು ಗಾಂವ್. ಥಂಯಿ ಪುಡೆ ಏಕ ರಾಯು ಆಸ್ಸಿಲೊ. ತಾಂಗೆಲೆ ನಾಂವ ಕಸ್ಸಲೆ ಮ್ಹೋಣು ಕೊಣಾಂಕಯಿ ಗೊತ್ನಾಸ್ಸಿಲೆ. ತಾಕ್ಕಾ ಸಕ್ಕಡಾಂನಿ ಬಲ್ಲಾಳರಾಯು ಮ್ಹೊಣು ಆಪ್ಪವ್ಚೆ. ತೆಂಚಿ ನಾಂವ ತಾಕ್ಕಾ ಜಾಲ್ಲೆ. ತಾಗೆಲಿ ಬಾಯಲ ವಿಶಾಲಾಕ್ಷಿ ಮ್ಹಣು. ತಾಣೆ ತಿಕ್ಕಾ ವಿಶಾಲು ಮ್ಹಣೂಂಚಿ ಆಪ್ಪವ್ಚೆ. ತೀ ಮ್ಹಳ್ಯಾರಿ ತಾಕ್ಕಾ ಮಸ್ತ ಮೊಗು. ಚಂದೀ ಆಸ್ಸಿಲಿ. ಗುಣಂಯಿ ಚಾಂಗ ಆಶ್ಶಿಲೆ. ಜಾಲ್ಯಾರಿ ತಿಕ್ಕಾ ಚೆರ್ಡುಂವ ಜಾಯ್ನಿಂಚಿ. ಮಸ್ತ ವ್ರತ, ಉಪಾಸ, ಪೂಜಾ ಕರ್ತಾತಿ. ಜಾಲ್ಯಾರಿ ತಿಕ್ಕಾ ಚೆರ್ಡುಂವ ಜಾಲ್ಲೆಲೆ ನಾ. ಬಲ್ಲಾಳರಾಯಾಕ ಚಿಂತಾ ಸುರು ಜಾಲ್ಲಿ. ರಾಣೀಕಯಿ ಚಿಂತಾ, ಗಾಂವಾಂಚೆ ಜನಾಂಕಯಿ ಚಿಂತಾ, ಸಕ್ಕಡಾಂಕಯಿ ಗಾಂವಾಂಕ ಉತ್ತರಾಧಿಕಾರಿ ನಾ ಜಾಲ್ಲ್ಯಾರಿ ಮುಖಾರಿ ಗತಿ ಕೊಣ ಮ್ಹಣು ಚಿಂತಾ. ಏಕ ದಿವಸ ರಾಣಿ ವಿಶಾಲು ರಾಯಾಲಾಗ್ಗಿ "ಮಾಕ್ಕಾ ಕಶೀ ಚೆರ್ಡುಂವ ಜಾಯ್ನಾ ಮ್ಹೋಣು ಜಾಲ್ಲಾನಂವೆ. ತುಮ್ಮಿ ಆನಿ ರಾಕ್ಚೆ ಸಮ್ಮ ನ್ಹಂಯಿ. ಗಾಂವಾಂಕ ಉತ್ತರಾಧಿಕಾರಿ ಖಾತೀರ ಚೆರ್ಡುಂವ ಜಾವ್ಕಾಚಿ. ತಶ್ಶಿ ಜಾವ್ನು ತುಮ್ಮಿ ದುಸ್ರಿ ವ್ಹಾರ್ಡಿಕ ಕರ್ನು ಘೆಯ್ಯಾ." ಮ್ಹಣಾಲಿ. ರಾಯಾಕ ವಿಶಾಲು ವ್ಹಯರಿ ಕಿತ್ಲೊ ಮೋಗು ಮ್ಹಳ್ಯಾರಿ ತೊ ದುಸ್ರಿ ವ್ಹಾರ್ಡಿಕ ಕರ್ನು ಘೆವ್ಚಾಕ ಕಬೂಲಿ ದೀನಾ. "ಹಾಂವ ಆನ್ನೇಕ್ಲೆಕ ವ್ಹಾರ್ಡಿಕ ಕರ್ನು ಹಾಂಗಾ ಹಾಣು ತೀಣೆ ತುಕ್ಕಾ ಕಷ್ಟ ದಿವ್ಚೆ ಮೆಜ್ಜಾನ ಪಳವ್ಚಾಕ ಜಾಯಿನಾ. ತಸ್ಸಿ ಜಾವ್ನು ಹಾಂವ ಆನ್ನೆಕಿ ವ್ಹಾರ್ಡಿಕ ಕರ್ನು ಘೆನಾ." ಮ್ಹಣಾಲೊ. ರಾಣಿ ಚಿಶಾಲು ಆಯಕನಾ. ವತ್ತಾಯ ಕರ್ತಾ, ರಡ್ತಾ, ಉಪಾಸ ಬಸ್ತಾ, ರಾಯಾಲೆ ವ್ಹಯರಿ ಕೊಪ್ತಾ, ಹಟ ಕರ್ತಾ ಸಕ್ಕಡ ನಮೂನೆಚೆ ತಿಗೆಲೆ ಹತ್ಯಾರ ಕಾಣು ತಾಜ್ಜೆನಿ ರಾಯಾಲೆ ಮನ ಬದಲ ಕರ್ತಾ. ಆಖೇರಿಕ ರಾಯು ವಿಶಾಲುಲೆ ಉತ್ರಾಕ ಸೊಲ್ವತಾ. ತಶ್ಶಿಂಚಿ ರಾಯು ಆನ್ನೆಕ್ಲಿಕ ವ್ಹಾರ್ಡಿಕ ಕರ್ನು ಘೆತ್ತಾ. ತಿಕಾಯಿ ಚೆರ್ಡುಂವ ಜಾಯ್ನಾತಿ. ಅಸ್ಸಿ ತಸ್ಸಿ ಮ್ಹಣು ತಾಕ್ಕಾ ಸಾತ ಜನ ಬಾಯಲೊ ಜಾತ್ತಾಂಚಿ. ಪುಡೆ ಕಾಳಾಂತು ಆತ್ತಚೆ ನಮೂನೆ ಏಕ ಬಾಯಲೆಕಯಿ ಚಡ ಬಾಯಿಲೊ ಆಸ್ಸುನಜ್ಜ ಮ್ಹಳ್ಳಲೆ ಕಾನೂನ ನಾತ್ತಿಲೆ ನಿಮಿತಿ ಆನಿ ತೊಚಿ ರಾಯು ಜಾಲ್ಲೆಲೆ ನಿಮಿತಿ ಏಕ್ಕಾ ಮಾಗ್ಸಿ ಏಕಿ ಮ್ಹಣು ಸಾತ ಜನ ಬಾಯಿಲೊ ಜಾಲ್ಲೆಂಚಿ. ಜಾಲ್ಯಾರಿ ಯಿತ್ತೆ ಕರ್ಚೆ. ತಾಂಕಾಂಯಿ ಚೆರ್ಡುಂವ ಜಾಯ್ನಾಚಿ. ಥೋಡೇ ಕಾಳ ವತ್ತಾ. ರಾಯಾಲಿ ಮ್ಹಾಲ್ಗಡಿ ಬಾಯಲ ಮೋಗಾಚಿಽ ವಿಶಾಲಾಕ್ಷಿ ಗುರ್ಭಿಣಿ ಜಾತ್ತಾ. ರಾಯಾಲೆ ಸಂತೋಷಾಕ ಮೀತಿ ಆಸ್ಸನಾ. ಪಾಟ್ಟಾ ರಾಣಿ ತೀ. ಅನಿಕಯಿ ಪ್ರೀತಿನ ಪಳಯಿತಾ. ವ್ಹಯರಿ ದವರ್ಲ್ಯಾರಿ ಕಾಯಳೊ ವರತ, ತೊಗ್ಗು ದವರ್ಲ್ಯಾರಿ ಮೂಂಯಿ ವರತ ಮ್ಹಣು ಮಸ್ತ ಜಾಗ್ರತಾ ಕರ್ತಾ. ಮೋಗು ಕರ್ತಾ. ಹೆ ಪಳವ್ನು ವರ್ಲಲೆ ಸ ಜನ ಬಾಯಲೆಂಗೆಲೆ ಪೊಟ ಜಾಳಾನಿ ಜಳಕು ಸುರು ಜಾಲ್ಲೆ. ಜಾಳ ಸುರುಜಾಲ್ಲ್ಯಾರಿ ತಾಕ್ಕಾ ವಕ್ಕದ ಆಸ್ಸವೆ? ತಶ್ಶಿಂಚಿ ರಾಣಿ ವಿಶಾಲಾಕ್ಷಿ ಗುರ್ಭಿಣಿಕ ಮಾಸ ಭರಽತ ಯೆತ್ತಾ. ಬಾಕಿಚೆ ಸ ಜನ ರಾಣ್ಯೋಂಕ ಆತ್ತ ಮಾಲ್ಗಡಿ ರಾಣಿಕ ಜಾವ್ಚೆ ಚೆರ್ಡಾಕ ಕಶ್ಶಿ ದಿವ್ಶಿ ಮಾರ್ಚೆ ಮ್ಹಣು ಉಪಾಯ ಸೊದ್ದುಚೇಚಿ ಕಾಮ ಜಾಲ್ಲೆ. ಎದ್ರಾಕ ಚಂದ ಕರ್ನು ಪ್ರೀತೀನ ಮಾಲ್ಗಡಿ ರಾಣಿಕ "ಆಕ್ಕಾ-ಆಕ್ಕಾ" ಮ್ಹಣ್ಚೆ, ಮಾಕ್ಷಿ ದಾಕುನು ಸೊವ್ಚೆ. ಗುರ್ಭಿಣಿಕ ಸಾತ ಮ್ಹಹಿನೆ ಜಾತ್ತನಾ ಗೌಚೇರಿ ಗುರ್ಭಿಣಿ ಕಾಪ್ಪಡ (ಬಯಕೆಕೊಳು) ಕೆಲ್ಲೊ. ಬಾಳಾಂತಿ ಜಾವ್ಚೊ ವೇಳು ಜಾಲ್ಲೊ. ಪೊಟ್ಟಾಕ ದೂಕಿ ಸುರುಜಾಲ್ಲಿ. ಚಾಂಗ ವೇಳಾರಿ ರಾಣಿ ವಿಶಾಲಾಕ್ಷಿ ಬಾಳಾಂತಿ ಜಾವ್ನು ಚೆಲ್ಯಾ ಚೆರ್ಡು ಜಾಲ್ಲೆ. ಜಾಲ್ಲ್ಯಾರಿ ಹೊ ವಿಷಯು ಮಾತ್ರ ರಾಣಿಕ ಆನಿ ರಾಯಾಕ ಕಳ್ನಿ. ರಾಣಿನ ಬಾಳಾಂತಿ ಜಾಲ್ಲೆ ಸತಾನ ಏಕ್ಲಿ ಚೆರ್ಡಾಲೆ ತೊಂಡಾಂತು ಸಾಕ್ಕರ ಘಾಲ್ನು ತೆ ರಡ್ನಾಸ್ಸಿ ಪಳಯಿಲೆ. ಆನ್ನೆಕ್ಲೆನ ಚೆರ್ಡಾಕ ಆಂಗ್ವಲ್ಯಾಂತು ಗುಟ್ಲಾಯಲೆ. ತಿನ್ನಿಚೆನ ತ್ಯಾ ಚೆರ್ಡಾಲಿ ಪೊಟ್ಲಿ ಹೊರ್ನು ವಾಶೆಚೆ ಹಿಂಡ್ಲಾಂತು ಉಡ್ಡೋವ್ನು ಯೆತ್ತಾ. ಸ ಜನ ರಾಯಾಲೆ ಬಾಯಿಲ್ಯಾಂನಿ ಸುರುವೆಕಚಿ ಹಿಕ್ಮತಿ ಕೆಲ್ಲ್ಯಾ. ತೆ ಕಸ್ಸಲೆ ಮ್ಹಳ್ಯಾರಿ ರಾಣಿ ವಿಶಾಲಾಕ್ಷಿ ಬಾಳಾಂತಿ ಜಾಲ್ಲೆ ಕೂಡ್ಲೆ ಏಕ ಸೂಣ್ಯಾಚೆ ಪೆಟ್ಟ್ಯಾಕ ತಿಗೆಲೆ ಬಗಲಾನ ದವರ್ಚೆ ಆನಿ ತೀ ಬಾಳಾಂತಿ ಜಾಲ್ಲೆಲಿ ಹೆ ಸೂಣ್ಯಾ ಪೆಟ್ಟ್ಯಾಕ ಮ್ಹಣು ಸಾಂಗ್ಚೆ. ತಶ್ಶಿಂಚಿ ತಾನ್ನಿ ತಿಕ್ಕಾ ಸೂಣ್ಯಾ ಪೆಟ್ಟೊ ವರ್ನು ದಾಕಯಿಲೆ ಆನಿ ಸಾಂಗ್ಲೆ "ತೂ ಬಾಳಾಂತಿ ಜಾವ್ನು ಹೆ ಸೂಣ್ಯಾ ಪೆಟ್ಟೊ ಜಾಲ್ಲಾ." ತೆ ಪಳವ್ನು ವಿಶಾಲಾಕ್ಷಿಕ ಮಸ್ತ ದುಃಖ ಜಾವ್ನು ದೋಳ್ಯಾ ಉದ್ದಾಕ ಕಾಡ್ತಾ. ರಾಯಾಕ ಕೋಪು ಯೆವ್ನು ರಾಣಿಲೆ ತೊಂಡಚಿ ಪಳಯಿನಾ. ಹೆ ಸ ಜನ ಬಾಯಲಾಂಕ ತೇಂಚಿ ಜಾಯಿ ಆಶ್ಶಿಲೆ. ತಾಂಕಾ ಖೂಸೀ ಜಾತ್ತಾ. ತ್ಯಾ ಗಾಂವಾಂತು ಏಕಿ ಗೌರಮ್ಮ ಮ್ಹಳ್ಳಲಿ ಮ್ಹಾಂತಾರಿ ಆಶ್ಶಿಲಿ. ತಿಕ್ಕಾ ಸಕ್ಕಡಾನಿ ಗೌರಜ್ಜಿ ಮ್ಹಣೂಂಚಿ ಆಪ್ಪವ್ಚೆ. ತೀಣೆ ಕೆದನಾಯಿ ರಾನ್ನಾಂತು ವಚ್ಚುನು ಅಡರಂ ಹಾಣು ರಾಂದಪ ಕರ್ಚೆ ಆಶ್ಶಿಲೆ. ತಶ್ಶಿಂಚಿ ಏಕು ದಿವಸು ಗೌರಜ್ಜಿ ಅಡರಂ ವೆಂಚಿತನಾ ತಿಕ್ಕಾ ಚೆರ್ಡಾನ ರಳ್ಳಲೆ ಆಯಕತಾ. ಗೌರಜ್ಜಿ ಖಂಯಿತೆ ಚೆರ್ಡು ರಡ್ತಾ ಮ್ಹಣು ಕಾನ್ದೀವ್ನು ಆಯಕತಾ ಆನಿ ಥಂಯ ವಚ್ಚುನು ಪಳಯಿತಾ. ಏಕ ವಾಶ್ಯಾಚೆ ಹಿಂಡ್ಲಾಂತು ರತ್ನಸೆ ಏಕ ಚೆರ್ಡು ರಡಽಚಿ ಆಸ್ಸುಚೆ ಗೌರಜ್ಜಿ ಪಳವ್ನು ತಾಕ್ಕಾ ಉಬಾರುನು ಘರಕಡೆ ವ್ಹರ್ತಾ. ಚಂದ ಕರ್ನು ನ್ಹಾಣೈತಾ. ಲಾಗ್ಗಿಚೆ ಘರಾದಾಕುನು ದೂದ ಘೆವ್ನು ಚೆರ್ಡಾಕ ಪೀವೈತಾ. ಚಂದ ಕರ್ನು ಆಂಗ್ವಾಲ್ಯಾನಿ ಜೊಳ್ಳಿ ಕರ್ತಾ. (ಜೊಳ್ಳಿ ಮ್ಹಳ್ಯಾರಿ ಪಾಳ್ಳೆಸೆ.)ಚೆರ್ಡಾಕ ತಾಂತು ನಿದಾನು ಜೋಂಯಿ ಕಾಡ್ತಾ ಆನಿ ಪದ ಮ್ಹಣ್ತಾ.
ಕುರ್ ಕುರೆ ಕಾನ್ನಾ ಗಾಯ್ ಗೆಲ್ಯೊ ರಾನ್ನಾ ಆಂಬುಡಿಗೆ ಮಾಮ್ಮಾ ಗಾಯ್ ಮ್ಹಶೊ.... ಗಾಯಽಚೊ ಗೋವಳ್ಯಾಗೆಲ್ಲೊ ರಾನ್ನಾ ಮಧ್ಯೊ ಬಲಿಭದ್ರಾಕಯಿ ಧಾಕ್ಲೊನಾರಾಯಣು ಎಕ್ಳೊ....ನಾರಾಯಣ ದೇವಾ ಕರೀನ ತುಜಿ ಸೇವಾ ಆಠಯಿಲ್ಯಾ ವೇಳಾರಿ ರಾಕ್ ಮಗಳ್ಯಾ ಬಾಳಾ ಆಟಟ್ಯಾ ಪಾಳ್ಯಾಕ ವಿಚಿತ್ರಾಚೊ ದೊರ್ಯೊ ಜುಂಯಿ ಕಾಡ್ತಾ ನಾರ್ಯೊ ಬಾಳಾ ಮಾಜ್ಯಾ....
ಘೋಡಾರಿ ಬಸ್ತಲೊ ಲಗಾಽಮು ಧರ್ತಲೊ ಕೇರಿನ ಕೇರಿ ಭೊಂವ್ತಲೊ ಹೈ ಹೈ ಹೈ ಅಶ್ಶಿ ತೀ ಗೌರಜ್ಜಿ ಭಾರೀ ಪ್ರೀತೀನ, ಜಾಗ್ರತೇನ ಚೆರ್ಡಾಕ ಪೊಸ್ತಾ. ಚೆರ್ಡು ಹೋಡ ಜಾತ್ತಾ. ಉಲ್ಲವ್ಚಾಕ ಸೂರು ಕರ್ತಾ. ತೆದನಾ ಗೌರಜ್ಜಿ ತಾಕ್ಕಾ ಏಕ ಪದ ಶಿಕೈತಾ.ಆಕ ರಾಯಾ ತುಕ್ಕಾಸಾತ್ ಜನ ಬಾಯಲೊಸಾತ್ ವೈರಿ ವಿಶಾಲಾಕ್ಕಾತಿಗೆಲೆ ಪೊಟ್ಟಾಂತು ಉಬ್ಜಲೊವಾಶೆ ಹಿಂಡ್ಲಾಂತು ಉಡ್ಡೈಲೊಮ್ಹಾಂತಾರೆ ಗೌರಜ್ಜಿನ ಪೊಶ್ಶಿಲೊದಿಯ್ಯಾಗೊ ಮಾವ್ಶಾನೊ ಭಿಕ್ಷಾ....ಚೆರ್ಡಾಕ ತೀನಿ ವರ್ಸಾ ನಿಸರ್ತನಾ ಗೌರಜ್ಜಿ ತಾಕ್ಕಾ ಘೆವ್ನು ರಾಯಾಲೆ ಘರಾಲಾಗ್ಗಿ ವಚ್ಚುನು "ತ್ಯಾ ಬಾಗ್ಲಾಲಾಗ್ಗಿ ವಚ್ಚುನು ಹೇಂಚಿ ಪದ ಸಾಂಗ ಬಾಳಾ ಆನಿ ಮೆಗೆಲೆಲಾಗ್ಗಿ ಯೊ. ನಂತರ ಆಮ್ಮಿ ಘರಕಡೆ ವಚ್ಚಾ." ಮ್ಹಣು ರಾಣ್ಯಾನಿ ವಾಸ ಕರ್ಚೆ ಕಡೆನ ತೆ ಚೆರ್ಡಾಕ ಪೆಟಯಿತಾ. ಚೆರ್ಡು ಗೌರಜ್ಜಿನ ಸಾಂಗ್ಲ್ಯಾವರೀಚಿ ತೆ ಬಾಗ್ಲಾಲಾಗ್ಗಿ ವಚ್ಚುನು ಪದ ಮ್ಹಣ್ತಾ. ತೆ ಪದ ಆಯಕುನು ಸ ಜನ ರಾಣ್ಯಾಂಕ ಹರ್ದ್ಯಾಂತು ಧಸಕ್ ಜಾತ್ತಾ. ಭಾಯರ ಯೆವ್ನು "ತೊಂಡಾಕ ಆಯಿಲೆ ರಡ್ತಾ ಯಿತ್ಯಾಕ ಉಸ್ಸಳ" ಮ್ಹಣು ಧಾಂವ್ಡಾಯಿತಾಚಿ. ಚೆರ್ಡು ರಡ್ತಽಚಿ ಗೌರಜ್ಜಿಲಾಗ್ಗಿ ಯೆತ್ತಾ. ತೀ ಸಮಾಧಾನ ಕರ್ನು ಘರಕಡೆ ಹಾಡ್ತಾ. ಹೆರದಿವಸುಯೀ ಗೌರಜ್ಜಿ ತಶ್ಶಿಂಚಿ ಚೆರ್ಡಾಕ ಪೆಟೆಯಿತಾ ಆನಿ ತೇಂಚಿ ಪದ್ಯ ಸಾಂಗುಕ ಸಾಂಗ್ತಾ. ಚೆರ್ಡು ಆಜ್ಜಿನ ಸಾಂಗ್ಲ್ಯಾವರೀಚಿ ಕರ್ತಾ. ತೆದನಾಂಯಿ ಸ ಜನ ರಾಣ್ಯೋ ಚೆರ್ಡಾಕ ಜೋರು ಕರ್ನು ಧಾಂವ್ಡಾಯಿತಾಚಿ. ಹೆ ಸಕ್ಕಡ ಭಿತ್ತರಿ ದಾಕುನು ರಾಣಿ ವಿಶಾಲಾಕ್ಷಿ ಆಯಕತಾ. ತಿ ಕಾಮಾಚಾಲಾಗ್ಗಿ ರಾಯಾಕ ಸಾಂಗುನು ಪೆಟೆಯಿತಾ. ರಾಯು ಕೊಪ್ಪುನೂಂಚಿ ಯೆತ್ತಾ. "ಏಕು ಸಾನು ಚೆಲ್ಲೊ ಕೆದನಾಯಿ ಯೆತ್ತಾ. ಏಕ ಪದ ಮ್ಹಣ್ತಾ. ಮೆಗೆಲ್ಯೊ ಸ ಜನ ಜಾವ್ವೊ ತಾಕ್ಕಾ ಗೌಜಿ ಘಾಲ್ನು ಧಾಂವ್ಡಾಯ್ತಾಚಿ. ತೊ ಚೆಲ್ಲೊ ರಡ್ತಽಚಿ ವತ್ತಾ. ತುಮ್ಮಿ ಹೆ ಕಸ್ಸಲೆ ಮ್ಹಣು ಪಳವ್ಕಾ." ಮ್ಹಣು ವಿಶಾಲಾಕ್ಷಿ ರಾಯಾಕ ವಿನಂತಿ ಕರ್ತಾ. ಮನ ನಾತ್ತಿಲೆಂ ರಾಯು ಕಾಂಯಿ ಉಲ್ಲಯಿನಾ. ರಾಣಿ ರಡ್ತಽಚಿ ರಾಯಾಕ ವತ್ತಾಯ ಕರ್ತಾ. ಆಖೈರಿಕ "ಪಳವ್ಯಾ." ಮ್ಹಣು ಸಾಂಗೂನು ವತ್ತಾ. ಹೊ ವಿಷಯು ವರ್ಲೆಲೆ ಸ ಜನ ರಾಣ್ಯಾಂಕ ಗೊತ್ತು ಜಾಯ್ನಾ. ಹೆರದಿವಸೂಯಿ ತೊ ಚೆಲ್ಲೊ ಯೆತ್ತಾ ಆನಿ ತೆ ಪದ ಮ್ಹಣುಕ ಸುರುಕರ್ತಾ. ರಾಯು ತೆ ಆಯಕೂನು ಕೂಡ್ಲೆ ಭಾಯರ ಯೆತ್ತಾ. ತೆ ಸ ಜನ ರಾಣ್ಯೋ ಚೆಲ್ಲ್ಯಾಕ ಧಾಂವ್ಡಾಚಾಕ ಪಳಯಿತಾಚಿ. ಭಾಯರ ಆಯಿಲೆ ರಾಯಾಕ ಪಳವ್ನು ಭಿತ್ತರಿ ವತ್ತಾಚಿ. ರಾಯಾನ ತೆ ಚೆಲ್ಲ್ಯಾಕ ಲಾಗ್ಗಿ ಆಪ್ಪಯಿತಾ ಆನಿ ತೆ ಪದ ಪರತ ಸಾಂಗುಕ ಸಾಂಗ್ತಾ. ತೆದನಾ ತೆ ಚೆರ್ಡು: ಆಕ ರಾಯಾ ತುಕ್ಕಾಸಾತ್ ಜನ ಬಾಯಲೊಸಾತ್ ವೈರಿ ವಿಶಾಲಾಕ್ಕಾತಿಗೆಲೆ ಪೊಟ್ಟಾಂತು ಉಬ್ಜಲೊ ವಾಶೆ ಹಿಂಡ್ಲಾಂತು ಉಡ್ಡೈಲೊಮ್ಹಾಂತಾರೆ ಗೌರಜ್ಜಿನ ಪೊಶ್ಶಿಲೊದಿಯ್ಯಾಗೊ ಮಾವ್ಶಾನೊ ಭಿಕ್ಷಾ....
ಮ್ಹಣು ತೆ ಪದ ಮ್ಹಣ್ತಾ. ತೆದನಾ ರಾಯು ತೆ ಚೆಲ್ಲ್ಯಾಲೆ ಹಾತ್ತಾಕ ಧರ್ನು ಮೊಗಾಽನ "ತೂ ಕೋಣ ಚೆರ್ಡಾ? ಖಂಯಿದಾಕುನು ಆಯಿಲೊ? ಹೆ ಪದ ಕೋಣೆ ಶಿಕಂಯಿಲೆ?" ಮ್ಹಣು ವಿಚಾರ್ಸಿತನಾ ಥಂಯಿಚಿ ದೂರ ರಾಬ್ಬಿಲಿ ಗೌರಜ್ಜಿ ಲಾಗ್ಗಿ ಯೆವ್ನು "ರಾಯಾ, ಹೊ ಚೆಲ್ಲೊ ತುಗೆಲೋಚಿ. ತುಗೆಲೆ ಪಟ್ಟಾಚಿ ರಾಣಿ ವಿಶಾಲಾಕ್ಷಿಕ ಜಾಲ್ಲಲೊ. ತೀಣೆ ಬಾಳಾಂತಿ ಜಾಲ್ಲೆ ಕೂಡ್ಲೆ ತಿಗಲೆ ಸ ಜನ ಜಾವ್ಯಾನಿ ಮ್ಹಳ್ಯಾರಿ ತುಗೆಲೆ ಬಾಕಿಚೆ ಸ ಜನ ಬಾಯಲ್ಯಾಂನಿ ಒಟ್ಟು ಜಾವ್ನು ಹೆ ಚೆರ್ಡಾಲೆ ತೊಂಡಾಂತು ಬೊಂತೊ ಚೆಪ್ಪುನು ವಾಶೆ ಹಿಂಡ್ಲಾಂತು ಉಡ್ಡಯಿಲೆ. ತ್ಯಾ ಚೆರ್ಡಾಕ ಹಾಂವೆ ಹೊರ್ನು ಪೊಸ್ಲೆಂ. ಘೆ.... ತುಗೆಲೆ ಚೆರ್ಡು ತುಕ್ಕಾ." ಮ್ಹಣು ಸಾಂಗುನು ತೆ ಚೆರ್ಡಾಕ ತಾಕ್ಕಾ ದಿತ್ತಾ. ತೆದನಾ ರಾಯಾಕ ತಾಗೆಲ್ಯೊ ಸ ಜನ ರಾಣ್ಯಾಂಗೆಲೊ ಹಿಕ್ಮತ್ಯೊ ಕಳ್ತಾತಿ. ತಾಂಕಾ ಸಕ್ಡಾಂಕಯಿ ಜೈಲಾಂತು ಕಾಳಕಾ ಕೂಡಾಂತು ಘಾಲ್ತಾ. ಗೌರಜ್ಜಿಕ ಮೊರುಥಾಂಯಿ ತಾಗೆಲೆ ಅರಮನೆಂತೂಚಿ ರಾಬ್ಬೊನು ಘೆತ್ತಾ. ತಾಜ್ಜೆ ನಂತರ ತೊ-ತಾಗೆಲೆಪೂತು-ಪಟ್ಟಾಚಿ ರಾಣಿ ವಿಶಾಲಾಕ್ಷಿ ಸುಖಾರಿ ಸಂತೋಷಾರಿ ಆಸ್ತಾಂಚಿ.-----೦೦೦----- ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ. ಜಾಲ್ಯಾರಿ ಅಮ್ಮಾನ ಹಿ ಕಾಂಣಿ ಸಾಂಗಿಲಿ ಉಡಗಾಸು ಆಸ್ಸ. ತೆ ಚೆರ್ಡಾಕ ಸಿಕೆಲೆಲೆ ಪದ ಅಮ್ಮಾನ ರಾಗಾನಿ ಮ್ಹಣು ಧಾಕ್ಕವ್ಚೆ ಆಸ್ಸಿಲೆ. ತಸ್ಸಲೆ ರಾಗಾಚೆ ರಾಮಾಯಣ ಪದ್ಯಾರಿ ಸಾಂಗ್ಚೆ ಆಸ್ಸ.
ಬಂಟ್ವಾಳ ಗಾಂವು ನೇತ್ರಾವತಿ ನಂಯಿಚೆ ತೀರಾರಿ ಆಸ್ಸ. ೧೯೨೩ರಾಂತು ಆನಿ ೧೯೭೪ಕಾಂತು ಪಾವ್ಸಾಡಿಂತು ನೇತ್ರಾವತಿ ನಂಯಿ ಉದಕಾನಿ ಬರ್ನು ಉವಾರು ಆಯಿಲೆ ವೇಳಾರಿ ಬಂಟ್ವಾಳ ಪೆಂಟಾದಾಕುನು ಬಾಯರ ಖಂಯಿ ವಚ್ಚಾಕ ರಸ್ತೊ ನಾತ್ತಿಲೆ ನಿಮಿತಿ ಮಸ್ತ ಕಷ್ಟ ನಷ್ಟ ಜಾಲ್ಲೆಲೆ. ತಾಜ್ಜೆ ಕಾತೀರ ೧೯೭೪ಚೆ ಉವಾರಾಚೆ ನಂತರ ಸರಕಾರಾನ ಉವಾರು ಆಯಿಲೆ ವೇಳಾರಿ ಬಂಟ್ವಾಳ ಪೆಂಟಾದಾಕುನು ಬಾಯರ ಆಸ್ಸುಚೆ ರಸ್ತ್ಯಾಕ ವಚ್ಚೆ ಕಾತೀರ ಆಸ್ಪತ್ರೆಚೆ ಎದ್ರಾಕ ಏಕು ನ್ಹಂವೊಚಿ ರಸ್ತೊ ಕೆಲ್ಲಾ. ತೊ ರಸ್ತೊ ಬಂಟ್ವಾಳಾಚೆ ಹೈಸ್ಕೂಲಾಚೆ ಮೈದಾನಲಾಗ್ಗಿ ದಾಕುನು ಮುಕಾರಿ ವಚ್ಚುನು ಬಾಯಚಾನ ಧರ್ಮಸ್ಥಳಾಕ ವಚ್ಚೆ ರಸ್ತ್ಯಾಕ ಮ್ಹೆಳ್ತಾ. ತೆ ರಸ್ತ್ಯಾರಿ ಧರ್ಮಸ್ಥಳಾಚೆ ದಿಕ್ಕಡೆ ಚಮಕಲ್ಯಾರಿ ಭಂಡಾರಿ ಬೆಟ್ಟು, ತುಂಬೆ, ಮುದ್ಗಲ ಗುಡ್ಡೊ, ಜಕ್ರಿಬೆಟ್ಟು, ಮಣಿಹಳ್ಳ ಮ್ಹಳ್ಳಲೆ ಜಾಗೆ ಮ್ಹೆಳ್ತಾಚಿ. ತಸ್ಸಿಂಚಿ ಬಿ.ಸಿ.ರೋಡಾಚೆ ದಿಕ್ಕಡೆ ಗೆಲ್ಲ್ಯಾರಿ ಮಯ್ಯರ ಬೈಲು, ಮಯರಣಪಾದೆಕ ವಚ್ಚೆ ವಾಟ, ಗಾಣದ ಪಡ್ಪು, ಪೆಲ್ತಿಮಾರ, ಪೊಸಳ್ಳಿ ಮ್ಹೆಳ್ತಾಚಿ. ತೆ ಸಕ್ಕಡ ಜಾಗ್ಯಾಚೆ ಪೈಕಿ ಮಯ್ಯರ ಬೈಲ್ ಮ್ಹಳ್ಳೆಲೆ ಜಾಗ್ಯಾರಿ ಏಕ ಬ್ರಾಹ್ಮಣು ಆನಿ ತಾಗೆಲಿ ಬಾಯಲ ಆಸ್ಸಿಲಿಂಚಿ. ತಾಂಕಾ ದೊಗ್ಗ ಚೆಲ್ಲೆಚೆ ಚೆರ್ಡುಂವ. ತಾಂಗೆಲೆ ನಾಂವ್ವ ಅನಸೂಯಾ ಆನಿ ಪೂರ್ಣಿಮಾ ಮ್ಹಣು. ಜಾಲ್ಲ್ಯಾರಿ ತಾಂತು ಅನಸೂಯಾ ಚಿಕೆಚಿ ಕಾಳಿ ಜಾಲ್ಲೆಲೆ ನಿಮಿತಿ ತಿಕ್ಕಾ ಅಮಾಸ ಆನಿ ಪೂರ್ಣಿಮಾಕ ಪುನ್ನವ ಮ್ಹಣು ಜನಾನಿ ಆಪ್ಪವ್ಚೆ. ತೆ ಬ್ರಾಹ್ಮಣಾಲೆ ನಾಂವ ನಾರಾಯಣ ಭಟ ಮ್ಹಣು ತಾಗೆಲಿ ಬಾಯಲ ಲಚಮಿ. ಲಚಮಿ ಮ್ಹಳ್ಯಾರಿ ಲಕ್ಷ್ಮಿ ಮ್ಹಣು. ಜನಾಲೆ ತೊಂಡಾಂತು ಲಕ್ಷ್ಮಿ ಆಸ್ಸಿಲೆ ಲಚಮಿ ಜಾವ್ನು ತೇಂಚಿ ತಿಗೆಲೆ ನಾಂವ ಜಾಲ್ಲಾ. ತಸ್ಸಿಂಚಿ ನಾರಾಯಣ ಭಟ ಆಸ್ಸಿಲೆ ನಾಂಣ್ಣ ಭಟ ಜಾಲ್ಲಾ. ಆಮಗೆಲೆ ಬಂಟ್ವಾಳ ಗಾಂವಾಂಚೆ ಜನಾಂಕ ಸಾಂಗುಕಾವೆ ಕೊಣಾಕಂಯಿ ನಾಂವ್ವ ದವರುಕ?ನಾಂಣ್ಣ ಭಟ ತಾಗೆಲೆ ದೊಗ್ಗ ಚೆಲ್ಲಿಂಕಯಿ ವ್ಹಾರ್ಡಿಕ ಕರ್ನು ಸೊಡ್ತಾ. ತಾಂಗ್ತಾಂಗೆಲೆ ಅದೃಷ್ಟಾಚೆ ಪ್ರಕಾರ ತಾಂಕಾ ಬಾಮ್ಮುಣ ಮ್ಹೆಳ್ತಾಂಚಿ. ಅಮಾಸೆಕ ಹೊಡ್ಡಾತಂಚೆ ಚೆಲ್ಲ್ಯಾಲೆ ಒಟ್ಟು ಆನಿ ಪುನ್ನವೆಕ ದುರ್ಬಳ್ಯಾತಂಚೆ ಚೆಲ್ಲ್ಯಾಲೆ ಒಟ್ಟು ವ್ಹಾರ್ಡಿಕ ಜಾತ್ತಾ. ಸುಖಕೀ ಕಷ್ಟಕೀ ತಾಂಗ್ತಾಂಗೆಲೆ ಸಂಸಾರು ಚಂದಾಯೇರಿ ಚಲ್ತಾ. ತಾಂಕಾ ಚೆರ್ಡುಂವಯಿ ಜಾತ್ತಾ. ತಾನ್ನಿ ಹೊಡ್ಡಂಯಿ ಜಾತ್ತಾಂಚಿ. ತಸ್ಸಿ ಆಸ್ತನಾ ಅಮಾಸೆಲೆ ಚೆಲ್ಲಿ ವ್ಹಾರ್ಡಿಕೆಕ ವಾಡ್ತಾ. ಅಮಾಸ ಹೊಡ್ಡಾತಂಚಿ ಜಾಲ್ಲೆಲೆ ನಿಮಿತಿ ತಿಗೆಲೆ ಚೆಲ್ಲಿಕ ಹೊಡ್ಡಾತಂಚಿ ಸೊಯರಿಕ ಮ್ಹೆಳುಕ ಕಷ್ಟ ಜಾಯಿನಿ. ವ್ಹಾರ್ಡಿಕೆಚೆ ತಯಾರಿ ಜಾತ್ತಾ. ಹೊ ವಿಷಯು ಪುನ್ನವೆಕ ಕಳ್ನು ತಿ ಆಕ್ಕಾಲೆ ಧುವೆಲೆ ವ್ಹಾರ್ಡಿಕೆಕ ವಚ್ಚಾಕ ತಯಾರಿ ಕರ್ತಾ. ತಿ ದುರ್ಬಳಿ ಜಾಲ್ಲೆಲೆ ನಿಮಿತಿ ತಿಗೆಲೆ ಚೆರ್ಡುವಾಲೆ ಆಂಗವಲೆ ಸಕ್ಕಡ ಸ್ವಚ್ಛ ಕರ್ನು ಉಂಬೊಳ್ನು ದವರ್ತಾ. ವ್ಹಾರ್ಡಿಕೆಚೊ ದಿವಸು ಲಾಗ್ಗಿ ಆಯಿಲ್ಯಾರಿ ಅಮಾಸ ವ್ಹಾರ್ಡಿಕೆ ಸಾಂಗುಕ ಪುನ್ನವೆಲೆ ಘರಕಡೆ ಯೆನಿ. ಪುನ್ನವೆಕ ಬೇಜಾರು ಜಾತ್ತಾ. ಮಾಕ್ಕಾ ಸಾಂಗುಕ ಗಡಬಿಡಿಂತು ವಿಸರ್ಲಿ ದಿಸ್ತಾ ಹೊಡನಂಯಿ. ಆಕ್ಕಾಲೆ ಧುವೆಕ ವ್ಹಾರ್ಡಿಕ ನಂವೆ? ಏಕಿ ಘಡಿ ಹಾಂವ ಏಕ್ಲೀಚಿ ವಚ್ಚುನು ಯೆತ್ತಾ ಮ್ಹಣು ಚಿಂತುನು ಆಸ್ಸಿಲ್ಯಾಂತು ಚಾಂಗ ಮ್ಹಣು ತಿಕ್ಕಾ ದಿಸ್ಸಿಲೆ ಕಾಪಡ ನೆಸುನು ವತ್ತಾ. ಥಂಯ ವಚ್ಚುನು ಪಾವ್ತನಾ ವ್ಹಾರ್ಡಿಕೆಕ ಆಯಿಲೆ ಜನಾಂಗೆಲೆ ಚಾಂಗಚಾಂಗ ಕಾಪಡ ಆನಿ ಭಾಂಗರ ಪಳವ್ನು ತಿಕ್ಕಾ ಅಳ್ಸಿಕ ಜಾತ್ತಾ. ತೀ ಸೀದಾ ವಾಸರಿಂತು ವತ್ತಾ. ಅಮಾಸೆಕ ಬಯಣಿ ಪುನ್ನವೆಕ ಪಳಯಿಲೆ ಕೂಡ್ಲೆ ರಾಗು ಯೆತ್ತಾ. ಜಾಲ್ಲ್ಯಾರಿ ತೀ ತೆ ದಾಕ್ಕೊವ್ನು ಘೇನಾಸ್ಸಿ ತಿಕ್ಕಾ ವ್ಹಾಸರಿ ದಾಕುನು ಭಾಯರ ಯೆವ್ಚಾಕ ಪುರಸತ್ತಿ ಜಾಯ್ನಾತ್ತಿಲೆ ತಿತ್ಲೆ ಕಾಮ ಸಾಂಗ್ತಾ. "ಪಳಗೊ, ರಾನ್ನಿರಿ ಸೀತ ಆಸ್ಸ, ವಾಯಲಾರಿ ರಾಂದಯಿ ದವರ್ಲಾ ತೇ ಜಾಲ್ಲೆ ಕೂಡ್ಲೆ ದುಸ್ರೆ ಆಯಿದನ ದವರ್ನು ತಾಂತು ದೂದ ಗಾಲ್ನು ಹೂನ ಕರಿ, ತಾಜ್ಜೆ ನಂತರ ಉಪ್ಕರಿ ಪಣ್ಣಘಾಲಿ, ತಾಜ್ಜೆ ನಂತರ ತೆ ಕರಿ ಹೆ ಕರಿ." ಮ್ಹಣು ಪಂಚವೀಸ ಕಾಮ ಸಾಂಗ್ತಾ. ತೀಣೆ ಭಾಯರ ಆಯಿಲ್ಲ್ಯಾರಿ ತೀ ಭಯಣಿ ಮ್ಹಣು ಸಾಂಗುಕಾ ನಂವೆ? ತಾಜ್ಜೆ ಕಾತೀರ ಹೊ ಉಪಾಯು. ಅಶಿ ಭಯಣಿಕ ಕಾಮ ಸಾಂಗುನು ಅಮಾಸ ಭಾಯರ ವತ್ತಾ. ಪುನ್ನವೆಕ ಕಾಮ ಕರ್ನು ಕರ್ನು ದಣು ಜಾತ್ತಾ. ವ್ಹಾರ್ಡಿಕ ಜಾವ್ನು, ವರಣ ಭಾಯರ ಸರ್ನು ವತ್ತಾ. ಜಾಲ್ಲ್ಯಾರಿ ಅಮಾಸ ಭಿತ್ತರಿ ಯೆನಾ. ಕಾಳೊಕು ಜಾಲ್ಲೊ. ರಾತಿ ಜಾಲ್ಲಿ. ತಿಕ್ಕಾ ಭೂಕಯಿ ಜಾಲ್ಲಿ. ಜಾಲ್ಲ್ಯಾರಿ ಆಕ್ಕಾನ ಸಾಂಗನಾಸ್ಸಿ ಕಸ್ಸಿ ಜೆವ್ಚೆ? ತಿಕ್ಕಾ ಭೂಕ ಜಾತ್ತನಾ ತಿಗೆಲೆ ಚೆರ್ಡುಂವಾಲೆ ಉಗಡಾಸು ಆಯಿಲೊ. "ಹೇ ದೇವಾ, ಹಾಂವ ಕಸ್ಸಲ್ಲ್ಯಾಕ ಆಯ್ಲಿಂ. ಚೆರ್ಡುವಂ, ವ್ಹಾರ್ಡಿಕೆಚೆ ಖಾಣ ಹಾಡ್ತಲಿ ಮ್ಹಣು ರಾಕ್ತಲಿಂ. ಜಾಲ್ಲ್ಯಾರಿ ಹಾಂಗಾಚಿ ಅವಸ್ತಾ ಮಾಕ್ಕಾಚಿ ಗೊತ್ತು. ಕಸ್ಸಲೆ ಕರ್ಚೆ?" ಮ್ಹಣು ಯೋಚನೇರಿ ಪಳ್ಳಿ. ತೆದನಾ ತಿಕ್ಕಾ ಸೀತ ವಾಣು ಗಾಲ್ಲೆಲೆ ನಿಶ್ಶಾಚೊ ಉಗಡಾಸು ಆಯಿಲೊ ಆನಿ ತಿ ಭಾಯರ ಯೆತ್ತಾ ಆನಿ ಆಯಿದನಾಂತು ನಿಶ್ಶೆ ಆಸ್ಸಕಿ ನಾ ಮ್ಹಣು ನಿಲ್ಕತಾ. ತೆ ದಿವಸು ಪುನ್ನವ ಜಾಲ್ಲೆಲೆ ನಿಮಿತಿ ತೆ ಆಯಿದನಾಂತು ಆಸ್ಸಿಲೆ ನಿಶ್ಶಾಂತು ಆಕಾಶಾರಿ ಆಸ್ಸುಚೊ ಚಂದ್ರು ದಿಸ್ತಾ. ತೆ ನಿಶ್ಶಾಂತುಲೆ ಚಂದ್ರಾಕ ಪಾಂಯ್ಪೋಣು ಸಾಂಗ್ತಾ "ಚಂದ್ರಾ-ಹಾಂವೆ ಹೆ ನಿಶ್ಶೆ ವ್ಹೆಲ್ಲೆಲೆಕ ತೂಂಚಿ ಸಾಕ್ಷಿ. ಚೆರ್ಡುಂವ ಆತ್ತ ಭುಕೆಲಿಂಚಿ ಮ್ಹಣು ವ್ಹರ್ತಾಂ." ಮ್ಹಣು ಸಾಂಗುನು ಆಕ್ಕಾಲಾಗ್ಗಿ ಥಾಯಿ ಸಾಂಗನಾತ್ತಿಲೆಂಚಿ ತಿ ತೆ ನಿಶ್ಶೆ ಘೇವ್ನು ಘರಕಡೆ ವತ್ತಾ.ಆನಿ ವ್ಹಾರ್ಡಿಕೆಚೆ ಖಾಣ ಹಾಡ್ತಲಿ ಮ್ಹಣು ಆಸೆನ ಪೊಟ್ಟಾ ಭೂಕೇನ ರಾಕ್ತಲೆ ತಿಗೆಲೆ ಚೆರ್ಡುಂವಾಂಕ ತೆ ಪಿವಯಿತಾ. ಚೆರ್ಡುಂವ ತೆ ನಿಶ್ಶೆ ಪೀವ್ನು ನಿದ್ದತಾಂಚಿ. ಥೋಡೆ ದಿವಸ ಜಾತ್ತರಿ ಪುನ್ನವೆಥಂಯ ಏಕ ಬ್ರಾಹ್ಮಣು ಯೆತ್ತಾ. ತಿ ತೆ ಬ್ರಾಹ್ಮಣಾಂಕ ಅತಿಥಿ ಸತ್ಕಾರು ಕರ್ತಾ. ವಚ್ಚ ವೇಳಾರಿ ತೊ ಬ್ರಾಹ್ಮಣು ಪುನ್ನವೆಕ ಏಕು ಸಾನು ಕಾಟು ದಿತ್ತಾ ಆನಿ ಸಾಂಗ್ತಾ "ಹಿ ಮೆಗೆಲಿ ಪೊಟ್ಲಿ ಜಾಗ್ರತೇರಿ ಕಾಣು ದವರಿ. ಹಾಂವ ಥೋಡೆ ದಿಸಾನಿ ಯೆವ್ನು ವರ್ತಾ. ತೆದನಾ ತುವೆ ಹಿ ಮಾಕ್ಕಾ ದಿಲ್ಲ್ಯಾರಿ ಪುರೊ." ಮ್ಹಣ್ತಾ. ತಿ ಪೊಟ್ಲಿ ಪುನ್ನವ ಜಾಗ್ರತೇರಿ ಕಾಣು ದವರ್ತಾ. ತಶೀ ಪಂದ್ರ ದೀಸಾ ಉಪ್ರಾಂತೆ ತೋಚಿ ಬ್ರಾಹ್ಮಣು ಪುನ್ವೆಥಂಯಿ ಯೆತ್ತಾ ಆನಿ "ತೆ ದಿವಸು ಹಾಂವೆ ದಿಲ್ಲೆಲಿ ಪೊಟ್ಲಿ ಮಾಕ್ಕಾ ದೀ." ಮ್ಹಣಾಲೊ. ತೆ ಬ್ರಾಹ್ಮಣಾಂಕ ಪಳಯಿತರೀಚಿ ಪುನ್ನವೆಕ ತೆದುಸು ತಾಣೆ ಏಕಿ ಪೊಟ್ಲಿ ಕಾಣು ದವರುಕ ದಿಲ್ಲೆಲಿ ಮ್ಹಳ್ಳಲೊ ಉಗಡಾಸು ಯೆತ್ತಾ ಆನಿ ಭಿತ್ತರಿದಾಕುನು ತಿ ಪೊಟ್ಲಿ ಹಾಣು ಬ್ರಾಹ್ಮಣಾಂಕ ದಿತ್ತಾ. ಆತ್ತ ತಿ ಪೊಟ್ಲಿ ಹೊಳ್ಳಿ ಜಾಲ್ಲೆಲಿ. ತೆ ಪಳವ್ನು ತೊ ಬ್ರಾಹ್ಮಣು "ಹೀ ಪೊಟ್ಲಿ ಮ್ಹೆಗೆಲಿ ನ್ಹಂಯಿ. ಮೆಗೆಲಿ ಪೊಟ್ಲಿ ಸಾನಿ ಆಸ್ಸಿಲಿ. ಮಾಕ್ಕಾ ತೀಚಿ ಸಾನಿ ಪೊಟ್ಲಿ ಹಾಣು ದಿ." ಮ್ಹಣ್ತಾ. ತೆದನಾ ಪುನ್ನವ "ತೂಂವೆ ಹೀಚಿ ಪೊಟ್ಲಿ ದಿಲ್ಲೆಲಿ. ತೆದುಸು ದಿತ್ತನಾ ಹಾಂವೆ ತಾಂತು ಕಸ್ಸಲೆ ಆಸ್ಸ ಮ್ಹಣು ಕಾಣು ಸಮೇತ ಪಳಯಿನಿ. ಹೀ ಪೊಟ್ಲಿ ತೀಚೀ. ಆಮಗೆಥಂಯಿ ವಿಂಗಡ ಪೊಟ್ಲಿ ಸಮೇತ ನಾ." ಸಾಂಗ್ತಾ. ತೊ ಬ್ರಾಹ್ಮಣು ಪುನ್ನವೆಕ ತಿ ಪೊಟ್ಲಿ ಸೊಡ್ವಾನು ಪಳವ್ಚಾಕ ಸಾಂಗ್ತಾ. ಪುನ್ನವ ಸೊಡ್ವಾಯಿತಾ. ತಾಂತು ಕಸ್ಸಲೆ ಪಳಯಿತಲಿ! ತಾಂತು ಸಗ್ಳೊಚಿ ಪುನ್ವೆಚೊ ಚಂದ್ರು ಆಸ್ಸಿಲೊ. ತೆ ದಿವಸು ಪುನ್ನವ. ತೆದನಾ ತೊ ಬ್ರಾಹ್ಮಣು "ತೂಂವೆ, ತೆದುಸು ಮಾಕ್ಕಾ ಸಾಕ್ಷಿ ದವರ್ನು ಚೆರ್ಡುಂವಾಂಕ ನಿಶ್ಶೆ ತುಗೆಲೆ ಆಕ್ಕಾಥಂಯ ದಾಕುನು ಹಾಣು ದಿಲ್ಲೆ. ತಸ್ಸಿ ಜಾವ್ನು ಆಜಿ ದಾಕುನು ತುಗೆಲೆ ಕಷ್ಟ ಸಕ್ಕಡ ನಿವಾರಣ ಜಾಲ್ಲೆಂ. ಆನಿ ಸುಖಾರಿ ರಾಬ. ಹಾಂವ ಚಂದ್ರು." ಮ್ಹಣು ಸಾಂಗುನು ಅಂತರ್ಧಾನ ಜಾತ್ತಾ. ತೆ ದಿವಸಾಚೆ ನಂತರ ತಿಗೆಲೆ ಕಷ್ಟ ನಿವಾರಣ ಜಾತ್ತಾ ಆನಿ ದೀಸ ವತ್ತಾ ವತ್ತಾ ತೀ ಶ್ರೀಮಂತಿ ಜಾತ್ತಾ. ಹೀ ಖಬ್ಬರ ತಿಗೆಲಿ ಆಕ್ಕಾ ಅಮಾಸೆಕ ಕಳ್ತಾ. ಭಯಿಣಿ ಶ್ರೀಮಂತಿ ಜಾಲ್ಲಾ ಮ್ಹಣು ತಿಕ್ಕಾ ಪೊಟ್ಟಾಕ ಉಜ್ಜೊ ಯೆತ್ತಾ.ತಿ ಕಸ್ಸಿ ಹೋಡಿ ಜಾಲ್ಲಿ ಮ್ಹಣು ಪುಸಲಾಸುನು ನಿಮ್ಗುಚಾಕ ಪುನ್ನವೆಥಂಯಿ ವತ್ತಾ. ಆನಿ "ಪಳೆ ತೆದುಸು ಹಾಂವೆ ತುಕ್ಕಾ ಜಾವ್ಕಾ ಮ್ಹಣು ತಿರಸ್ಕಾರ ಕೆಲ್ಲಲೊ ನ್ಹಂಯಿ. ಮಾಕ್ಕಾ ತೆ ದಿವಸು ವ್ಹಾರ್ಡಿಕೆಚೆ ಗಲಾಟೆರಿ ತುಗೆಲಾಗ್ಗಿ ಉಲ್ಲವ್ಚಾಕ ಪುರಸತ್ತಿಽಚೀ ಜಾಯ್ನಿ. ತಸ್ಸಿ ಜಾವ್ನು ತುಗೆಲೆ ಮನಾಂಕ ಬೇಜಾರು ಜಾಲ್ಲಾರಿ ಮಾಕ್ಕಾ ಕ್ಷಮ ಕರಿ." ಮ್ಹಣು ಪುನ್ನವೆಕ ಪುಸಲಾಯಿಸಿತಾ. ನಂತರ ಸಮಾಧಾನೇರಿ ಹಳೂಚಿ "ತು ಇತ್ಲಿ ಶ್ರೀಮಂತಿ ಕಸ್ಸಿ ಜಾಲ್ಲಿ ಮ್ಹಣು ಮಾಕ್ಕಾ ಸಾಂಗ್ತವೆ?" ಮ್ಹಣಾಲಿ. ಪುನ್ನವ ಪುಳ್ಳೆ ಸಕ್ಕಡ ವಿಸೊರ್ನು ಆಕ್ಕಾ ಅಮಾಸೆಕ ತೆದುಸು ಜಾಲ್ಲೆಲೆ ವಿಷಯು ಸಕ್ಕಡ ಸಾಂಗ್ತಾ. ತೆ ಆಯ್ಕುನು ಅಮಾಸ ಘರಕಡೆ ವತ್ತಾ. ತಸ್ಸಿಂಚಿ ಥೋಡೆ ದಿಸಾನಿ ಪುನ್ನವೆಲೆ ಧುವೆಕ ವ್ಹಾರ್ಡಿಕ ನಿಶ್ಚಯ ಜಾತ್ತಾ. ವ್ಹಾರ್ಡಿಕೆಕ ಸಾಂಗುಕ ಅಮಾಸೆಲೆ ಘರಕಡೆ ವತ್ತಾ ಆನಿ ವ್ಹಾರ್ಡಿಕೆಕ ಯೆವ್ಕಾ ಮ್ಹಣು ಸಾಂಗ್ತಾ. ಆಕ್ಕಾ ಅಮಾಸ ಜಾಯ್ತ ಮ್ಹಣಾಲಿ. ವ್ಹಾರ್ಡಿಕೆಚೆ ದಿವಸು ಅಮಾಸ ಫರ್ಕಟ ಕಾಪ್ಪಡ ನೆಸೂನು ಯೆತ್ತಾ. ಪುನ್ವೆತಂಚೆ ವಾಸರೆಂತು ಸೀದಾ ವತ್ತಾ. ಶೀತ ಕರ್ತಾ, ನಿಶ್ಶೆ ಮಾದರಾಂತು ದವರ್ತಾ. ರಾತಿ ಜಾವೊ ಮ್ಹಣು ರಾಕ್ತಾ. ಆನಿ ಪುನ್ವೆನ ಸಾಂಗ್ಲಾ ಮ್ಹಣ್ಕೇಚಿ ಚಂದ್ರಾಕ ಸಾಕ್ಷಿ ದವರ್ನು ತೇ ನಿಶ್ಶೆ ಘರಕಡೆ ವರ್ನು ಚೆರ್ಡುಂವಾಂಕ ದಿತ್ತಾ. ತೆದುಸು ಪುನ್ನವ. ಹೆರದಿವಸೂಚಿ ಏಕು ಬ್ರಾಹ್ಮಣು ಅಮಾಸೆಥಂಯ ಯೆತ್ತಾ. ಆನಿ ಏಕಿ ಹೊಳ್ಳಿ ಪೊಟ್ಲಿ ದಿತ್ತಾ. "ಸ್ವಲ್ಪ ದಿಸಾನಿ ಹಾಂವ ಯೆತ್ತಾಂ. ತೆದನಾ ಹೀ ಪೊಟ್ಲಿ ದಿಲ್ಲ್ಯಾರಿ ಪುರೊ." ಮ್ಹಣು ಸಾಂಗುನು ವತ್ತಾ. ಅಮಾಸ ತೀ ಪೊಟ್ಲಿ ಕಾಣು ದವರ್ತಾ. ಪಂದ್ರಾ ದೀಸಾನಿ ತೊ ಬ್ರಾಹ್ಮಣು ಅಮಾಸೆ ಥಂಯಿ ಯೆತ್ತಾ. "ಮೆಗೆಲಿ ಪೊಟ್ಲಿ ದೀ." ಮ್ಹಣಾಲೊ. ತೆದನಾ ಅಮಾಸ ಭಿತ್ತರಿ ವಚ್ಚುನು ಏಕಿ ದುಸ್ರೀಽಚಿ ಪೊಟ್ಳಿ ಹಾಣು ದಿತ್ತಾ, ತೀ ಪೊಟ್ಲಿ ಸಾನಿ ಅಶ್ಶಿಲಿ. ಬ್ರಾಹ್ಮಣು "ಹಾಂವೆ ದಿಲ್ಲೆಲಿ ಹೊಳ್ಳಿ ಪೊಟ್ಲಿ. ಹೀ ಮೆಗೆಲಿ ನ್ಹಂಯಿ. ಮೆಗೆಲಿ ಪೊಟ್ಲಿ ಮಾಕ್ಕಾ ದೀ." ಮ್ಹೊಣು ಸಾಂಗ್ತಾ. ತೆ ವೇಳಾರಿ ಅಮಾಸ "ತೂಂವೆ, ದಿಲ್ಲೆಲಿ ಪೊಟ್ಲೀಚಿ ಹೀ. ಮಾಗ್ಗಿರಿ ಹಾಂವೆ ಅಪ್ಪಳಲೆ ನಾ. ವಿಂಗಡ ಪೊಟ್ಲಿ ಆಮಗೆಥಂಯಿ ನಾ." ಮ್ಹಣಾಲಿ. ತೊ ಬ್ರಾಹ್ಮಣು ತಿಕ್ಕಾ ತಿ ಪೊಟ್ಲಿ ಸೊಡ್ವಾನು ಪಳವ್ಚಾಕ ಸಾಂಗ್ತಾ. ಅಮಾಸ ಸೊಡ್ವಾಯಿತಾ. ತೆದುಸು ಅಮಾಸ ಜಾಲ್ಲೆಲೆ ನಿಮಿತಿ ಪೊಟ್ಲಿ ಭಽರಿ ಕಾಳಿಕಾಳಿ ಆಶ್ಶಿಲಿ. ಬ್ರಾಹ್ಮಣು ಅಂತರ್ಧಾನ ಜಾತ್ತಾ- ಅಮಾಸೆಲೆ ಶ್ರೀಮಂತಿಕಾ ದೀಸ ವತ್ತಾಂ ವತ್ತಾಂ ಊಣೆ ಜಾವ್ನು ತೀ ದುರ್ಬಳಿ ಜಾತ್ತಾ.
ತಶ್ಶಿಂಚಿ ಶ್ರೀಮಂತಿಕ ಆಸ್ಸ ಮ್ಹೋಣು ಅಹಂಕಾರು ಆಸ್ಸ ಜಾಲ್ಯಾರಿ, ಆನಿ ದುಸ್ರ್ಯಾನಿ ಶ್ರೀಮಂತ ಜಾಲ್ಲೆಲೆ ಪಳವ್ಚಾಕ ಜಾಯ್ನಾಸ್ಸಿ ಪೊಟ್ಟಾಕ ಉಜ್ಜೊ ಯೆತ್ತಾ ಮ್ಹೋಣು ಜಾಲ್ಲ್ಯಾರಿ ಆಖೇರಿಕ ಅಮಾಸೆಕ ಜಾಲ್ಯಾವರೀಚಿ ಜಾವ್ಚೆ. -----೦೦---- ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.
ಮ್ಹಾಂತಾರಿಲಿ ನಾತಿ ಮ್ಹಳ್ಳಲಿ ಕಾಂಣಿ ತುಮಕಾ ಸಾಂಗ್ಲಾ ನಂವೆ? ತೇಚಿ ಮ್ಹಾಂತಾರಿಲೆ ಆನಿ ತಿಗೆಲಿ ನಾತಿ ಉಷಾಲಿ ಆನ್ನೆಕ ಭಯ್ಣಿ ರಶ್ಮಿಲಿ ಕಾಂಣಿ ಹಿ. ತೆ ಮ್ಹಾಂತಾರಿನ ಘರಕಡೆ ಬಯಸುನು ಹಾಪ್ಪೊಳು, ಪಾಪ್ಪೊಡು, ಬೊಳಾಗುಳಿ ಕರ್ನು ವಿಕ್ಕುನು ಜೀವನ ಕರ್ತಲಿಂಚಿ ಮ್ಹಣು ಸಾಂಗಿಲೆ ನಂವೆ? ತಾನ್ನಿ ತಿತ್ಲೆ ಕಷ್ಟ ಪಾವ್ಲ್ಯಾರಿ ತಾಂಕಾ ಜೀವನೆಕ ಪಾವ್ನಾಸಿಲೆ. ತಾಜ್ಜೆ ಕಾತೀರ ತಿ ಮ್ಹಾಂತಾರಿ ರಾನ್ನಾಕ ವಚ್ಚುನು ಅಡರ-ಫೂಲ-ಫಲ ಕಸ್ಸಲೆ ಮ್ಹೆಳ್ತಕಿ ತೆ ಹಾಡ್ಚೆ ಆನಿ ತಾಂತು ವಾಯಟ ಆಸ್ಸಿಲೆ ತಾನ್ನಿ ದವರ್ನು ಚಾಂಗ ಆಸ್ಸಿಲೆ ನಾತಿ ರಶ್ಮಿಲಾಗ್ಗಿ ದಿವ್ನು ತಿಕ್ಕಾ ಪೆಂಟಾಂತು ಪೆಟೊವ್ನು ವಿಕ್ಕೊಚೆ. ಮೆಳ್ಳೆಲೆ ದುಡ್ವಾನಿ ಆಂಗ್ಡಿ ದಾಕುನು ತಾಂಕಾ ಜಾವಕಾ ಜಾಲ್ಲೆಲೆ ಇತರ ಸಾಮಾನ ಹಾಡ್ಚೆ. ಅಶ್ಶಿ ಕಷ್ಟಾರಿ ಜೀವನ ಕರ್ತಲಿಂಚಿ. ಪುಳ್ಳೆ ಕಾಣಿಂತು ಉಷಾಕ ತೆ ಕುಪುಳ ಪಕ್ಷಾನಿ ಭಾಂಗ್ರಾಚಿ ಗಾಂಟಿ ದಿವ್ಚೆ ಪುಳ್ಳಿ ಕಾಣಿ ಹಿ. ದೀಸ ವತ್ತಾ ವತ್ತಾ ಮ್ಹಾಂತಾರಿಕ ಪ್ರಾಯಾ ಜಾತ್ತಾ. ಏಕು ದಿವಸು ತೆ ಮ್ಹಾಂತಾರಿಲೆ ನಾತ್ತ್ಯೊ ಉಷಾ ಆನಿ ರಶ್ಮಿ ಆಜ್ಜಿಲಾಗ್ಗಿ ಸಾಂಗ್ತಾಚಿ "ಆಜ್ಜಿ ತುವೆ ಹಾಪ್ಪೊಳು ಪಾಪ್ಪೊಡು ಕರ್ನು ಸುಕ್ಕತ ಗಾಲ್ನು ರಾಕ್ಕುಕ ಆಮಕಾ ದೊಗ್ಗಾಕಂಯಿ ಭಸವ್ನು ತು ರಾನ್ನಾಕ ಅಡರ-ಫೂಲ-ಫಲ ಹಾಡುಕ ವತ್ತನಂವೆ? ಆತ್ತ ತುಕಾಯಿ ಪ್ರಾಯ ಜಾಲ್ಲಾ. ತು ರಾನ್ನಾಕ ವತ್ತನಾ ಏಕ್ಲೆಕ ವರ. ಏಕ್ಲಿ ಹಾಂಗಾ ರಾಕ್ಕುಕ ಪುರೊ. ರಾನ್ನಾದಾಕುನು ಸ್ವಲ್ಪ ಚಡ ಹಾಳ್ಳ್ಯಾರಿ ಚಡ ದುಡ್ಡ ಮ್ಹಳ್ತನಂವೆ?" ಮ್ಹಣಾಲಿಂಚಿ. ತಾಕಾ ಆಜ್ಜಿ ಮ್ಹಣಾಲಿ "ತುಮ್ಮಿ ಕೊಣಂಯಿ ಮೆಗೆಲೆ ಒಟ್ಟು ಯೆವ್ಚೆ ನಾಕ್ಕಾ. ಆನಿಕಂಯಿ ತುಮ್ಮಿ ಸಾನ್ನ. ಥಂಯ ತುಮಕಾ ತಾನ ಯೆತ್ತಾ ಮ್ಹಳ್ಯಾರಿ ಉದ್ದಾಕ ಮ್ಹೆಳ್ನಾ. ಮಾಗಿರಿ ಉದ್ದಾಕ ಸೊದ್ದುನು ರಾನ್ನಾಚೆ ಭಿತ್ತರಿ ವಚ್ಚುಕಾ ಜಾತ್ತಲೆ. ತಸ್ಸಿ ಜಾವ್ನು ಹಾಂವ ಏಕ್ಲಿಚಿ ವತ್ತಾ." ತೆದನಾ ನಾತಿ ರಶ್ಮಿ ಆಯಕನಾ. "ಹಾಂವೆ ತುಕ್ಕಾ ಕಾಂಯಿಬಾಧಾದೀನಾ. ಹಾಂವೆ ತುಗೆಲೆ ಒಟ್ಟು ಯೆವ್ಚೆಚಿ. ಉಷಾ ಹಾಂಗಾ ರಾಕ್ಕುನು ಬಯ್ಸೊ."ಮ್ಹಣಾಲಿ ಆನಿ ಆಜ್ಜಿ ಒಟ್ಟು ರಾನ್ನಾಕ ವತ್ತಾ.ರಾನ್ನಾಂತು ಆಜ್ಜಿ ಆನಿ ನಾತಿ ರಶ್ಮಿ ಅಡರ-ಫೂಲ-ಫಲ ಸಕ್ಕಡ ಒಟ್ಟು ಕರ್ತಾಂಚಿ. ಕೆದನಾಂಯಿ ಒಟ್ಟು ಜಾವ್ಚಾಕಂಯಿ ಚಡ ತೆದುಸು ದೊಗ್ಗಾನಿ ಒಟ್ಟು ಕಲ್ಲೆ. ತೆ ಸಕ್ಕಡ ಒಟ್ಟು ಕರ್ತರಿ ರಶ್ಮಿಕ ತಾನಿ ಯೆತ್ತಾ. ತಿ ಆಜ್ಜಿಲಾಗ್ಗಿ"ಆಜ್ಜಿ, ಆಜ್ಜಿ ಮಾಕ್ಕಾ ತಾನಿ ಯೆತ್ತನಂವೆ? ತುಕ್ಕಾ ಹಾಂವ ಬಾಧಾದೀನಾ ಮ್ಹಣು ಸಾಂಗಿಲೆ ವಯಿ. ಜಾಲ್ಲ್ಯಾರಿ ಆತ್ತ ಕಸ್ಸಲೆ ಕರ್ಚೆ. ಉದ್ದಾಕ ಸೊದ್ದುನು ಹಾಂವಂಚಿ ವತ್ತಾ. ಆನಿ ಉದ್ದಾಕ ಮ್ಹೆಳ್ಯಾರಿ ತಂಯಿಚಿ ಪೀವ್ನು ತುಕಾಯಿ ಪಾನ್ನಾಚೊ ದೊಣ್ಣೊ ಕರ್ನು ತಾಂತು ಹಾಡ್ತಾ." ಮ್ಹಣಾಲಿ. ತಾಕ್ಕಾ ಆಜ್ಜಿ ಮ್ಹಣಾಲಿ "ಭಾರಿ ಬುದ್ವಂತಿಗೊ ತು. ಕಂಯ್ಹಿ ಹಾಂವ ತುಕ್ಕಾ ಜೋರು ಕರೀನ ಕಿ ಮ್ಹಣು ಉದ್ದಾಕ ತೂಚಿ ಸೊದ್ದುಕ ವತ್ತಾ ಮ್ಹಣು ಸಾಂಗ್ತಾ ನಂವೆ? ಭಾರಿ ಚಾಲಾಕ್ ಆಸ್ಸಗೊ ತು? ಹಾಕ್ಕಾ ಸಾಂಗ್ಚೆ ಮ್ಹಾಲ್ಗಂಡ್ಯಾಲೆ ಉತ್ರ ಆಯ್ಕುಕಾ ಮ್ಹಣು. ನ್ಹಂಯಿ ಜಾಲ್ಲ್ಯಾರಿ ಅಸ್ಸಿಂಚಿ ಜಾವ್ಚೆ. ಆತ್ತ ಹಾಂವೆ ಉದ್ದಾಕ ಕಂಯ್ಹಿ ಸೊದ್ದುಚೆ? ಕಸ್ಸಲೆ ಕರ್ಚೆ? ಉದ್ದಾಕ ಜಾವ್ವುಕಾ ನಂವೆ? ವಚ್ಚಾ, ಸೊದ್ದುವ್ಯಾ." ಮ್ಹಣಾಲಿ ಮ್ಹಾಂತಾರಿ ಆನಿ ದೊಗ್ಗಂಯಿ ಉದ್ದಾಕ ಸೊದ್ದುಕ ಚಮ್ಕಲಿಂಚಿ. ಸುಮಾರ ದೂರ ವತ್ತನಾ ಥಂಯ ತಾಂಕಾ ಏಕ ಶಿಲೆಫಾತ್ರಾಚೆ ಘರ ಮ್ಹೆಳ್ತಾ. ದೊಗ್ಗಾಂಕಯಿ ಖೂಸೀ ಜಾತ್ತಾ. ಜಗ್ಲೇರಿ ವತ್ತಾಚಿ ಬಾಗಿಲ ಲಕೈತಾತಿ. ಶಿಲೆಫಾತ್ರಾಚೆ ಬಾಗಿಲ ನಂವೆ? ಕಾಡುಕ ಜಾಯ್ನಾ. ತೆ ವೇಳಾರಿ ಚೆಲ್ಲಿ ಸಾಂಗ್ತಾ "ಆಮ್ಕಾ ತಾನ್ನಿನ ಜೀವು ವತ್ತಾ. ಏಕ ಪೇಲೊ ಉದ್ದಾಕ ಮ್ಹೆಳತವೆ?" ತಿತ್ಲೆ ಮ್ಹಣ್ತನಾ ತೆ ಬಾಗಿಲ ಆಪಾಪೀ ಉದಾರೆ ಜಾತ್ತಾ ಆನಿ ಏಕ ಭಾಂಗ್ರಾಚಿ ಗಿಂಡಿ ಭಾಯರ ಯೆತ್ತಾ. ತಾಂತು ಭರ್ನು ಉದ್ದಾಕ ಆಶ್ಶಿಲೆ. ಚೆಲ್ಲಿ ಸಂತೋಷಾರಿ ಉದ್ದಾಕ ಪಿತ್ತಾ ಆನಿ ವಾಪಾಸ ಆಪ್ಪಯಿತಾ "ಉದ್ದಾಕ ಪೀವ್ನು ಜಾಲ್ಲೆ. ಗಿಂಡಿ ವ್ಹರ." ಕೊಣಂಯಿ ದಿಸ್ಸನಾಂಚಿ. ಭಾಯರ ದವರುಕ ತಾಂಕಾ ಧೈರ್ಯ ನಾ. ಕೊಣಯಿ ವ್ಹೆಲ್ಯಾರಿ? ಅಶ್ಶಿ ಲೆಕ್ಕುನು ಆಜ್ಜಿ ಸಾಂಗ್ತಾ "ಭಿತ್ತರಿ ದವರ್ನು ಯೋ ಪುತ್ತಾ." ಮ್ಹಣ್ತಾ. ರಶ್ಮಿ ಭಿತ್ತರಿ ರೀಗ್ಲಲೀಚಿ ಬಾಗಿಲ ಆಪಾಪೀಚಿ ಪಡ್ತಾ. ಭಿತ್ತವಯಲಾನ ನಾತಿ ರಶ್ಮಿ ಭಾಯಚಾನ ಆಜ್ಜಿ ರಡ್ತಽಂಚಿ ಬಯಸ್ತಾಂಚಿ. ನಾತ್ತಿಕ ರಡ್ತ ರಡ್ತ ನೀದ ಯೆತ್ತಾ. ಭಿತ್ತರಿ ದಾಕುನು ರಶ್ಮಿಲೊ ಆವಾಜು ನಾತ್ತಿಲೆ ಆಜ್ಜಿ ನಾತಿ ಮೆಲ್ಲಿ ಮ್ಹಣು ಲೆಕ್ಕುನು ತಿಗೆಲೆ ಘರಕಡೆ ರಡ್ತಽಚಿ ವತ್ತಾ. ಸ್ವಲ್ಪ ಕಾಳಥಾಂಯಿ ತಿಕ್ಕಾ ರಶ್ಮಿಲೊ ಉಗಡಾಸು ಯೆತ್ತಾ. ನಂತರ ತಿವಯಿ ವಿಸರ್ತಾ. ಹಾಂಗಾ ನಾತ್ತಿಕ ನಿದ್ದಾಂತು ಏಕ ಸಪನ ಪಡ್ತಾ. "ಚೆರ್ಡಾ, ತೆ ಗಿಂಡ್ಯೆಂತು ಆನಿಕಯಿ ಉದ್ದಾಕ ಆಸ್ಸ ನಂವೆ? ಪಳೆ. ತೆ ಉದ್ದಾಕ ಘೆವ್ನು ಮಾಳ್ಯೇರಿ ವಸ. ಥಂಯ ಏಕ್ಲೊ ನಿದ್ದಲಾ. ತಾಗೆಲೆ ಸುತ್ತೂಂಚಿ ತೆ ಉದ್ದಾಕ ಶೀಂಪಿ. ತೆದನಾ ತಾಕಾ ಜಾಗರು ಜಾತ್ತಾ. ನಂತರ ತು ಆನಿ ತೊ ಕರ್ನು ಹೆ ಘರಕಡೆ ಗಮ್ಮತೇರಿ ರಾಬ್ಬಾಚಿ. ವಸ." ಮ್ಹಣು ಸಪನಾಂತು ರಶ್ಮಿಕ ಕೊಣಕಿ ಸಾಂಗ್ಲಾವರಿ ಜಾತ್ತಾ. ತಸ್ಸಿಂಚಿ ತಿ ಸಪನಾ ದಾಕುನು ಜಾಗಿ ಜಾತ್ತಾ ಆನಿ ಗಿಂಡಿ ಘೆವ್ನು ಮಾಳ್ಯೆರಿ ವತ್ತಾ, ಸಪನಾಂತು ಸಾಂಗ್ಲ್ಯಾವರಿಚಿ ಥಂಯ ಏಕ್ಲೊ ನಿದ್ದಲಾ. ರಶ್ಮಿನ ಗಿಂಡ್ಯೆತುಲೆ ಉದ್ದಾಕ ತಾಗೆಲೆ ಸುತ್ತೂಚಿ ಶಿಂಪ್ತಾ. ಕೂಡ್ಲೆ ತೊ ಉಠಾವ್ನು ಬಸ್ತಾ. ತಾಕ್ಕಾ ಪಳವ್ನು ರಶ್ಮಿಕ, ರಶ್ಮಿಕ ಪಳವ್ನು ತಾಕ್ಕಾ ಖೂಸೀ ಜಾತ್ತಾ. ಥಂಯ ಜಾವ್ಕಾ ಜಾಲ್ಲಲೆ ಖಾಣ ಜವಣ ಆಸ್ಸಿಲೆಂ. ತೆ ಖಾವ್ನು ಜವಣ ಕರ್ನು ಗಮ್ಮತೇರಿ ತಾನ್ನಿ ದೊಗ್ಗಂಯಿ ಥಂಯ ರಾಬ್ತಾಚಿ. ತಸ್ಸಿಂಚಿ ರಶ್ಮಿ ಹೊಡಿ ಜಾಲ್ಲಿ. ಥೋಡೆ ಕಾಳಾನಿ ಗುರ್ಭಿಣಿ ಜಾಲ್ಲಿ. ತೆ ವೇಳಾರಿ ತಿಕ್ಕಾ ಮೋತ್ಯಾಂಚೊ ಸೊರು ಘಾಲ್ಕಾ ಮ್ಹೊಣು ಆಶಾಜಾತ್ತಾ. ಗುರ್ಭಿಣಿಲಿ ಆಶಾ ಪೂರ್ಣ ಕರ್ನಿ ಜಾಲ್ಲ್ಯಾರಿ ಚೆರ್ಡುಂವ ಪಾಂಗ್ಳೆ ಜಾತ್ತಾಚಿ ಮ್ಹಣು ಮ್ಹಾಲ್ಗಡ್ಯಾನಿ ಸಾಂಗಿಲೆ ಉಗಡಾಸಾಕ ಯೆವ್ನು ತೊ ಭಾಯರ ಸರ್ತಾ. ತೆದನಾ ರಶ್ಮಿ "ಭಂಯ್ಯ ಜಾತ್ತಾ. ಮೊತ್ಯಾಸೊರು ನಾ ಜಾಲ್ಲ್ಯಾರಿ ಹೊಡ್ ನಾ. ತುಮ್ಹಿ ವಚ್ಚಾಕ ನಜ್ಜ." ಮ್ಹಣು ತಾಗೆಲಾಗ್ಗಿ ಸಾಂಗ್ತಾ. "ತೂ ಕಸ್ಸಲ್ಯಾಕ ಭಿತ್ತಾ. ತುಕ್ಕಾ ಹಾಂಗಾ ಪಳವ್ನು ಘೆವ್ಚಾಕ ಕೊಣಾಕಂಯಿ ಜಾವೊ ರಾಬ್ಬೊವ್ನು ವತ್ತಾ. ಕಸ್ಸಿ ಆಮಕಾ ಬಾಳಾಂತಿರೆಕ ಜನ ಜಾಯಿ ನಂವೆ?" ಮ್ಹಣು ಸಾಂಗುನು ಭಾಯರ ವಚ್ಚಾಕ ಬಾಗ್ಲಾಲಾಗ್ಗಿ ಯೆತ್ತನಾ ಥಂಯ ಏಕ್ಲಿ ಬಾಯಲಮನಿಷಿ ಚೆಲ್ಲೆಕ ಘೆವ್ನು ರಾಬ್ಲಾ. ತೊ ತಾಂಗೆಲಾಗ್ಗಿ "ತುಮ್ಹಿ ಕೊಣ? ಖಂಯ ದಾಕುನು ಆಯಿಲಿಂಚಿ." ಮ್ಹಣ್ತಾ. "ಆಮಕಾ ಪೆಂಟಾಂತು ಕೊಣಂಯಿ ಕಾಮ ದೀನಾತಿ. ಆಮ್ಮಿ ಕಾಮ ಕರ್ನು ಪೋಟ ಬರ್ಚೆಂ. ವಿಂಗಡ ಗತಿ ನಾಂ. ಮಾಕಾ ಹಿ ಏಕ್ಲೀಚಿ ಚೆಲ್ಲಿ ಆಸ್ಸುಚಿ." ಮ್ಹಣಾಲಿ ತೀ ಬಾಯಲಮನಿಷಿ. ತೆದನಾ ರಶ್ಮಿಲೊ ಬಾಮ್ಮುಣು (ತಾಕ್ಕಾ ಏಕ ನಾಂವ ರಾಜಾರಾಮ್ ದವರ್ಯಾ.) ರಾಜಾರಾಮ್ ತಾಂಗೆಲೆಲಾಗ್ಗಿ ಮಾಕ್ಕಾ ಏಕಕಡೆನ ವಚ್ಚಾಕ ಆಸ್ಸ. ಹಾಂವೆ ಯೆವ್ಚೆಥಾಂಯಿ ತುಮ್ಮಿ ಹಾಂಗಾಚಿ ರಾಬ್ಬುನು ಮೆಗೆಲೆ ಬಾಯಲೆಕ ಚಂದ ಕರ್ನ ಪಳವ್ಕಾ. ಹಾಂವೆ ಯೆತ್ತರಿ ತುಮಗೆಲೆ ಕಾಮ ಪಳವ್ನು ಮಾಗ್ಗಿರಿ ಹಾಂಗಾಚಿ ರಾಬ್ಬೊವ್ನು ಘೆತ್ತಾ." ಮ್ಹಣಾಲೊ ಆನಿ ತಾಂಕಾ ಥಂಯ ರಾಬ್ಬೊವ್ನು ತೊ ಮೊತ್ಯಾಸೊರು ಹಾಡುಕ ವತ್ತಾ. ಹೀ ಬಾಯಲ ಮನಿಷಿ ಆನಿ ಚೆಲ್ಲಿ ಘರಾ ಕಾಮ ಲಾಯಕ ಕರ್ನು ಕರ್ತಾತಿ. ಗುರ್ಭಿಣಿಕ ಉಬ್ಗಣಿ ಯೆನಾನಾಸ್ಸಿ ಕಾಣಿಂಯೊ ಸಾಂಗ್ಚೆ, ಹಾಸೊಚೆಂ ಸಕ್ಕಡ ಕರ್ತಾಂತಿ. ಗುರ್ಭಿಣಿಕ ಮಾಸ ಭರ್ತಾ. ತಿಗೆಲೊ ಬಾಮ್ಮುಣು ರಾಜಾರಾಮ್ ಮೊತ್ಯಾಸೊರು ಘೆವ್ನು ಅನಿಕಯಿ ಯೆನಿ. ಬಾಳಾಂತಿ ಜಾತ್ತಾ. ಚಂದ ಚೆಲ್ಲೆ ಚೆರ್ಡು. ಬಾಮ್ಮುಣು ಯೆನಿ ಮ್ಹಣು ಮಾತ್ರ ತಿಕ್ಕಾ ಬೇಜಾರು ಜಾತ್ತಾ. ಆತ್ತ ಹೆ ಬಾಯಲಮನಿಷಿಕ ಆನಿ ತಿಗೆಲೆ ಚೆಲ್ಲೆಕ ಭಾರೀ ಸಂತೋಷು. ಪುಳ್ಯಾಪಸಿ ಸಂತೋಷಾರಿ ಕಾಮ ಕರ್ತಾತಿ. (ತೆ ಬಾಯಲಮನಿಷಿಲೆ ನಾಂವ ಅಂಬಾ ಆನಿ ತಿಗೆಲೆ ಚೆಲ್ಲೆಲೆ ನಾಂವ ಉಮಾ ಮ್ಹಣು ದವರ್ಯಾ) ಅಂಬಾಮಾಂಯೆನ ಸದಂಚಿ ಚೆರ್ಡಾಕ ಚಂದ ಕರ್ನು ನಾಣೊಚೆ, ತೀಳೊ ಕರ್ನು ಪೌಡರ ಘಾಲ್ನು ಪಾಳ್ಯಾಂತು ನಿದಾಚೆ. ಉಮಾನ ಪಾಳ್ಯಾ ಜೊಂಯಿ ಕಾಡ್ತಽಚಿ "ತುಕ್ಕಾ ಹಾಂವೆ ಖಾಂವ್ಚೆ, ತುಗೆಲೆ ಆಮ್ಮಾಕ ಮೆಗೆಲೆ ಆಮ್ಮಾನ ಖಾಂವ್ಚೆ." ಮ್ಹಣು ಪದ ಸಾಂಗ್ಚೆ. ತೆ ವೇಳಾರಿ ಅಂಬಾಮಾಂಯಿನ ಬಾಳಾಂತಿ ರಶ್ಮಿಕ ತೇಲ ರೊಗೊಣು ನ್ಹಾಂಣೊಚೆ.ತಸ್ಸಿಂಚಿ ಬಾಳಾಂತಿ ನ್ಹಾಣ್ಯೆಥಾಂವ್ನು ಏಕುದೀಸು ಹೆ ಆಯಕತಾ-ದೋನಿ ದೀಸು ಆಯಕತಾ. ಹಾಂತು ಕಸಲ್ಕಿ ಮೋಸು ಆಸ್ಸುಕಾ ಮ್ಹಣು ತಿಗೆಲೆ ಮನಾಂಕ ಯೆತ್ತಾ. ತಸ್ಸಿ ಜಾವ್ನು ಭಾರೀ ಜಾಗ್ರತಾ ಕರ್ತಾ. ಏಕ ದಿವಸು ಅಂಬಾ ದಾಂತು ಘಾಸಿತ ಆಸ್ಸಿಲಿ. ರಶ್ಮಿ ತಿಗೆಲಾಗ್ಗಿ "ಮಾಯೆಂ, ತೂ ಕಸ್ಸಲೆ ಕರ್ತಾ?" ಮ್ಹಣು ನಿಮ್ಗಿತಾ. ತೆದನಾ ಅಂಬಾಮಾಂಯಿ ಜೋರಾನ ಹಾಸ್ತಾ. "ದಾಂತ ಘಾಶೀತ ಆಸ್ಸ. ದಾಂತ ಚೂಪ ಜಾವ್ಕಾನಂವೆ?" ಮ್ಹಣು ಸಾಂಗ್ತಾ. ತೆದನಾ ಭಿತ್ತರಿ ಉಮಾ ಚೆರ್ಡಾಕ ಸಾಂಗ್ತಾ: "ತುಕ್ಕಾ ಹಾಂವೆ ಖಾಂವ್ಚೆ, ತುಗೆಲೆ ಆಮ್ಮಾಕ ಮೆಗೆಲೆ ಆಮ್ಮಾನ ಖಾಂವ್ಚೆ." ರಶ್ಮಿಕ ತೆ ಆಯಕುನು ಪೂರಾಯಿ ಮನಾಂಕ ವತ್ತಾ. ತಿತ್ಲೆಂ ಮ್ಹಣ್ತನಾ ಅಂಬಾಮಾಂಯಿ ನ್ಹಾಂಣೆಂತು ಯೆವ್ನು ಹುನಽಚಿ ಉದ್ದಾಕ ರಶ್ಮಿಲೆ ಆಂಗಾರಿ ಘಾಲ್ತಾ. ಬಾಳಾಂತಿಲೆ ಆಂಗಾರಿ ಹುನ ಉದ್ದಾಕ ಪಳ್ಳೆ ಕೂಡ್ಲೆ ರಶ್ಮಿ ನಾಂತಾ ಆನಿ ಮ್ಹಣ್ತಾ "ಅಯ್ಯೊ- ಶೇಳ ಉದ್ದಾಕ ಹಾಡಿ. ಆಂಗ ಲಾಸ್ತಾ." ಅಂಬಾ ಕಳ್ಸೊ ಘೆವ್ನು ಉದ್ದಾಕ ಹಾಡುಕ ವತ್ತಾ. ರಶ್ಮಿ ಬಾಗಿಲ ಘಾಲ್ನು ಭಿತ್ತರಿ ಯೆತ್ತಾ ಆನಿ ಉಮಾಲಾಗ್ಗಿ "ಪಳೆ ತುಗೆಲಿ ಆಮ್ಮಾ ಬಾಂಯ್ತು ಪಳ್ಳಿ, ಧಾಂವ." ಮ್ಹಣ್ತಾ. ಉಮಾ ಏಕ ಉಸ್ರಾಕ ಧಾಂವ್ತಾ. ತಿಣೆ ಬಾಯರ ಘೆಲ್ಲೆ ಕೂಡ್ಲೆ ಹೆದಿಕಾಂತುಲೆ ಬಾಗಿಲ ಘಾಲ್ನು ಬಚಾವ್-ಮ್ಹಣು ಲೆಕ್ತಾ. ಆನಿ ಬಾಮ್ಣಾನ ಯೆವ್ಚೆ ವರೆಕ ಬಾಗಿಲ ಕಾಣಾ ಮ್ಹಣು ಮನಾಂತೂಚಿ ಲೆಕ್ಕುನು ಬಾಮ್ಮಣಾಲಿ ವಾಟ ರಾಕ್ತಾ. ನಿಮ್ಗಿತಾ- "ಹಾಂವ ಚಂದಿಕಿ? ತುಗೆಲಿ ಬಾಯಲ ಚಂದಿ?" "ಮೆಗೆಲಿ ಬಾಯಲಚಿ ಚಂದಿ."ಮ್ಹಣಾಲೊ ರಾಜಾರಾಮು. ತೆ ಆಯ್ಕುನು ಚೆಡಿಕ ಜಾಳ ಸುರುಜಾಲ್ಲೆ. "ಹಾಂವಯಿ ತುಗೆಲೆ ಒಟ್ಟೂಚಿ ಯೆತ್ತಾ. ತಿ ಚಂದಿ ಕಿ ಹಾಂವ ಚಂದಿ ಮ್ಹಣು ಪಳವ್ಯಾ. ತುಗೆಲಿ ಬಾಯಲ ಚಂದಿ ಜಾಲ್ಲ್ಯಾರಿ ಹಾಂವ ತುಮಗೆಲೆ ಘರಕಡ್ಚೆ ಬಾಯಲೆ ಕಾಮ ಕರ್ನು ಆಸ್ತಾ. ಹಾಂವ ಚಂದಿ ಜಾಲ್ಲ್ಯಾರಿ ತೀಣೆ ಘರಾಚೆ ಭಿತ್ತವಯಿಲೆ ಆನಿ ಬಾಯಲೆ ಕಾi ಕರ್ನು ರಾಬ್ಬುಕಾ." ಮ್ಹಣಾಲಿ. ತಾಕ್ಕಾ ರಾಜಾರಾಮು ಜಾಯತ ಮ್ಹಣ್ತಾ. ಹೆ ಸಕ್ಕಡ ಆಯ್ಕುನು ಬಸ್ಸಿಲೆ ಪಕ್ಷಿ ಕೂಡ್ಲೆ ಥಂಯ ದಾಕುನು ಉಬ್ಬುನು ರಶ್ಮಿನ ಆಸ್ಸಿಲೆ ಘರಕಡೆ ಯೆತ್ತಾ ಆನಿ ಬಾಗಿಲ ಕಾಡುಕ ಸಾಂಗ್ತಾ. ರಶ್ಮಿ ಕಂಡೆತುಲ್ಯಾನ ಕೊಣ ಮ್ಹಣು ನಿಲ್ಕುನು ಬಾಗಿಲ ಕಾಡ್ತಾ. ಪಕ್ಷಿ ಭಿತ್ತರಿ ಯೆತ್ತರಿ "ರಶ್ಮಿ, ತುವೆ ಆತ್ತ ಚಂದ ಶೃಂಗಾರು ಕರ್ನು ಮಾಳ್ಯೇರಿ ಬಯಸುಕಾ. ತುಗೆಲೊ ಬಾಮ್ಮುಣು ಆತ್ತ ಯೆತ್ತಾ. ಹಾಂವೆ ಆಪ್ಪಯಿತಾ. ತೆದನಾ ಯೆವ್ಕಾ." ಮ್ಹಣ್ತಾ. ರಶ್ಮಿ ಜಾಯತ ಮ್ಹಣು ಸಾಂಗುನು ಚಂದ ಕರ್ನು ಶೃಂಗಾರು ಕರ್ತಾ ಆನಿ ಮಾಳ್ಯೇರಿ ವಚ್ಚುನು ಬಸ್ತಾ. ತೀ ಪಕ್ಷಿ ರುಚಿರುಚಿ ರಾಂದಪ ಕರ್ತಾ ಆನಿ ರಾಜಾರಾಮಾಲಿ ಆನಿ ತೆ ಚೆಡ್ಯಾಲಿ ವಾಟ ರಾಕ್ತಾ. ಥೋಡೆ ವೇಳಾನೀಂಚಿ ರಾಜಾರಾಮು ಚೆಡ್ಯೆಕ ಘೆವ್ನು ಯೆತ್ತಾ. ಪಕ್ಷಿ ಬಾಗಿಲ ಕಾಡ್ತಾ. ತೆ ಪಕ್ಷಿಕ ಪಳವ್ನು ಚೆಡ್ಯೇಕ ಖೂಸೀ ಜಾತ್ತಾ. ಹಾಂವ ಹಾಂಗಾ ರಾಣಿ ಜಾವ್ನು ಬೊಶ್ಶೇತ ಮ್ಹಣು ಲೆಕ್ತಾ. ತೀ ಪಕ್ಷಿ ತಾಂಕಾ ದೊಗ್ಗಾಂಕಯಿ ಪಾಯು ಧುಂವ್ಚಾ ಸಾಂಗ್ತಾ. ದೊಗ್ಗಂಯಿ ಪಾಯು ಧುತ್ತಾತಿ ಆನಿ ವಾಸರೆಂತು ಯೆವ್ನು ಜವಣಾಂಕ ಮ್ಹಣು ಥಂಯಿ ಘಾಲ್ಲೆಲೆ ಪಾನ್ನಾಚೆ ಎದ್ರಾಕ ಬಸ್ತಾತಿ. ಥಂಯ ಚಾರಿ ಪಾನ್ನ ಆಸ್ಸಿಲೆ. ತೆ ಪಳವ್ನು ತಿ ಚೆಡಿ "ಆಮ್ಮಿ ಆಸ್ಸುಚೆ ತೆಗ್ಗ ಜನ. ಚಾರಿ ಪಾನ ಕೊಣಾಂಕ ."ಮ್ಹಣಾಲಿ. ತೆದನಾ ರಾಜಾರಾಮು ಘಟ್ಟಿ ಸ್ವರಾನಿ ಆಪ್ಪಯಿತಾ. "ವೈಗೊ ರಶ್ಮಿ, ಆಮ್ಮಿ ಜವಣಾಂಕ ಬಸ್ಲ್ಯಾಂತಿ. ತೂಪವಾಡಿ." ಮ್ಹಣ್ತಾ. ತೆ ಆಯ್ಕುನು ರಶ್ಮಿ ಮಾಳ್ಯೇರಿ ದಾಕುನು ರಶ್ಮಿ ಚಂದ ಕರ್ನು ಧೇವ್ನು ಯೆತ್ತಾ. ತಿಕ ಪಳವ್ನು ಚೆಡಿಲೆ ಮಾತ್ತೆ ಸಕಲ ಜಾತ್ತಾ. ರಶ್ಮಿ ತೂಪ ವಾಡ್ತಾ ಆನಿ ತಾಂಗೆಲೆ ಒಟ್ಟೂಚಿ ಜವಣಾಂಕ ಬಸ್ತಾ. ಚೆಡಿನ ಸಾಂಗಿಲ್ಯಾವರಿ ಬಾಯಲೆ ಕಾಮ, ಆನಿ ಘರಾಚಿ ಕಾಮಕರ್ನು ಥಂಯಿಚಿ ರಾಬ್ಬುಕಾ ಪಳ್ಳೆ. ರಾಜಾರಾಮಾಕ ಬಾಯಲ ರಶ್ಮಿಕ ಆನಿ ಚೆರ್ಡಾಕ ಪಳವ್ನು ಖೂಸೀ ಜಾಲ್ಲಿ. ತೆ ಪಳವ್ನು ತಿ ಪಕ್ಷಿ ಆನಿ ಮಾಕ್ಕಾ ಹಾಂಗಾ ಕಾಂಯಿ ಕಾಮ ನಾ ಮ್ಹಣು ಚಿಂತುನು ಬುರ್ರನಿ ಉಬ್ಬುನು ಧಾವ್ನ್ ವತ್ತಾ. ತಾಜ್ಜೆ ನಂತರ ರಶ್ಮಿಕ ತಿಗೆಲೆ ಆಜ್ಜಿಲೊ ಉಗಡಾಸು ಸಮೇತ ಯೆನಾ. ತಾಂಗ್ತಾಂಗೆಲೆ ಸಂಸಾರು ಜಾತ್ತರಿ ಬಾಮ್ಮುಣು ಆನಿ ಚೆರ್ಡು ಲಾಗ್ಗಿ ಆಸ್ತನಾ ದುಸ್ರ್ಯಾಲೊ ಉಗಡಾಸು ಕಸ್ಸಿ ಯೆವ್ಚೊ. ನಂತರ ತಾನ್ನಿ ಸುಖ ಸಂತೋಷಾರಿ ಆಸ್ತಾತಿ.
---ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.---
ಬಂಟ್ವಾಳ ಗಾಂವ್ಚೆ ಪೆಂಟಾಂತು ಕೊಟ್ರಮನ ಗಂಡಿ ಮ್ಹೊಣು ಏಕು ರಸ್ತೊ ಆಸ್ಸ. ಆತ್ತ ತಾಕ್ಕಾ ಕೊಲೇಜ್ ರೋಡ್ ಮ್ಹಣ್ತಾಚಿ. ತೆ ರಸ್ತ್ಯಾಚೊ ಸಾನು ಕುಡ್ಕೊ ನೀಟಚಿ ಘೆಲ್ಲೆಲೆ ಕಡೆನಂಚಿ ೧೯೪೯ ಪುಡೆ ಆಮ್ಮಿ ಆಸ್ಸಿಲಿಂಚಿ. ಆತ್ತ ತೆ ಘರಾಚೆ ಕೆಲವು ಭಾಗ ಮಾತ್ರ ಆಸ್ಸ. ಬಾಕಿಚೊ ಜಾಗೊ ಸಕ್ಕಡ ಲೆವಲ್ ಕರ್ನು ದೋನಿ ಘರ ಜಾಲ್ಲಾಂಚಿ. ತಾಜ್ಜೆ ಎದ್ರಾಕ ಏಕ ಸಾನಸೆ ಪಡ್ಪು ಆಸ್ಸ. ಆನಿ ಏಕಿ ಓಣಿ ಆಸ್ಸ. ತಿ ಓಣಿ ಸೀದಾ ಕಾಂಮ್ತಿ ಓಣಿಕ ಸೆರ್ವತಾ. ಸಾನು ಪಡ್ಪು ಜಾತ್ತರಿ ಭಂಡಾರಿಬೆಟ್ಟು ತೋಡು. ತೆ ತೋಡಾ ನಂತರ ಸಾನಸೆ ರಾನ ಆಸ್ಸಿಲೆಕಂಯಿ. ಆತ್ತ ಗಾದ್ದೆ, ಘರ ಜಾಲ್ಲಾಂಚಿ. ಮಸ್ತ ಕಾಳಾ ಪುಡೆ ತೆ ಪಡ್ಪಾಚೆ ಬರೀನ ಏಕಿ ಮ್ಹಾಂತಾರಿ ತಿಗೆಲಿ ನಾತಿ ಉಷಾ ಆನಿ ರಶ್ಮಿ ಒಟ್ಟು ಆಸ್ಸಿಲಿ. ಉಷಾ ಆನಿ ರಶ್ಮಿಲೊ ಆನು ಆನಿ ಆಮ್ಮಾ ತಾನ್ನಿ ಸಾನ ಆಸ್ತನಾ ಬಂಟ್ವಾಳ ಗಾಂವಾಂತು ವಿಂದುರು ಪೊಡ್ಚೆ ಏಕ ಸೀಕ ಆಯಿಲೆ ಕಂಯಿ, ತಾಂತು ತಾನ್ನಿ ಮೆಲ್ಲಿಂಚಿ. ತಾಜ್ಜೆ ನಂತರ ತೆ ಮ್ಹಾಂತಾರಿನಽಚಿ ತಾಂಕಾ ಹೊಡ ಕೆಲ್ಲೆ. ಆತ್ತ ತಾಂಕಾ ಸಾತ ಆನಿ ಆಟ ವರ್ಸ ಜಾಲ್ಲಾಂಚಿ. ತಿ ಮ್ಹಾಂತಾರಿ ಕಷ್ಟ ಪಾವ್ನು ಗೋಂವು ಆನಿ ನಾಂಚಣ್ಯಾಚೊ ಹಾಪ್ಪೊಳು, ಗೋಂವಾಂಚೊ ಹಾಪ್ಪೊಳು, ಗೋಂವು ನಾಂಚಣ್ಯಾಚಿ ಬೊಳಾಚಿ ಗುಳಿ ಸಕ್ಕಡ ಕೊರ್ನು ವಿಕ್ತಲಿ. ಬಂಟ್ವಾಳ ಗಾಂವ್ಚೆ ಜನ ತಿಗೆಲಾಗ್ಗಿಚಿ ತೆ ಸಕ್ಕಡ ಗೆತ್ತಲಿಂಚಿ. ಗೋಂವು ನಾಂಚಣ್ಯಾಚಿ ಬೊಳಾಗುಳಿ ದೊನಿ ನಮೂನೆರಿ ಕರ್ತಾಚಿ. ಗೋಂವು ಆನಿ ನಾಂಚಣೊ ತಿಂಬತ ಗಾಲ್ನು, ನಂತರ ಏಕ್ಕ ಆಂಗ್ವಲ್ಯಾಂತು ಬಾಂದುನು ತಾಕ್ಕಾ ಮ್ಹೊಳ್ಕೊ ಹಾಡೊನು, ವತ್ತಾಕ ಸುಕ್ಕೊನು, ಮಾಗ್ಗಿರಿ ವಾಟ್ಟುನು, ತೆ ಪೀಟ ಗಾಳ್ಸುನು, ಹೆರ್ದಿವಸು ನಿವ್ಳಾನು, ದಾಟಚಿ ಪೀಟ ಗೊದ್ದಡೆರಿ ಗಾಲ್ನು, ಮುದ್ದೊ ಕೊರ್ನು, ಗುಳ್ಯೊ ಕೊರ್ಕಾ ಆನಿ ನಂತರ ವಾಪಾಸ ವತ್ತಾಕ ಗಾಲ್ನು ಸುಕ್ಕೊವ್ಕಾ. ಆನೇಕ ನಮೂನೊ ಮ್ಹೊಳ್ಕೊ ಹಾಡೊಚಾಕ ನಾ. ಬಾಕಿಚೆ ಸಕ್ಕಡ ತಸ್ಸಿಂಚಿ ಕೊರ್ಚೆ. ಯಿತ್ಲೆ ಕಷ್ಟ ಪಾವ್ಲ್ಯಾರಿ ತೆ ಮ್ಹಾಂತಾರಿಕ ಮ್ಹೆಳ್ಚೆ ದುಡ್ಡು ತಿಗೆಲೆ ಆನಿ ನಾತ್ಯೊ ಉಷಾ ಆನಿ ರಶ್ಮಿಲೆ ಪೊಟ್ಟಾಕ ಪುರೊ. ತಾಂತೂಚಿ ತಿ ತೃಪ್ತಿ ಪಾವ್ತಲಿ.ಸದಽಂಚಿ ಗೋಂವು ಆನಿ ನಾಂಚಣೊ ವತ್ತಾಕ ಸುಕ್ಕತ ಗಾಲ್ತರಿ ತೆ ಪಕ್ಷೇನಿ ಕಾಯಿನಾಸ್ಸಿ ರಾಕ್ಕುನು ಬೈಸುಕಾ. ತೋಡಾಚೆ ತೆ ಬರಿಂತು ಆಸ್ಸುಚೆ ರಾನ್ನಾಂತು ಮಸ್ತ ಕಾಯ್ಳೆ ಆನಿ ಪಕ್ಷೊ ಆಸ್ಸಿಲಿಂಚಿ. ತಾಂತು ದೊನಿ ಕುಪುಳು ಪಕ್ಷೊ ತೆ ಮ್ಹಾಂತಾರಿಕ ಬಾಧಾ ದಿವ್ಕಾ ಮ್ಹೊಣು ತಿಣೆ ಸುಕ್ಕತ ಗಾಲ್ಲೆಲೆ ಗೋಂವು, ನಾಂಚಣೊ ಖಾವ್ಚಾಕ ಯೆತ್ತಲಿಂಚಿ. ತಾನ್ನಿ ಖಾವ್ಚಾಕಯಿ ಚಡ ವಿರ್ಕಾನು ವತ್ತಲಿಂಚಿ. ತಾಜ್ಜೆನಿ ತೆ ಮ್ಹಾಂತಾರಿಕ ಮಸ್ತ ನಷ್ಟ ಜಾತ್ತಲೆ. ತಸ್ಸಿ ಜಾವ್ನು ಸುಕ್ಕತ ಗಾಲ್ತರಿ ರಾಕ್ಕುನು ಬೈಸುಕಾ ಜಾತ್ತಲೆ. ತೆ ಮ್ಹಾಂತಾರಿನ ಹೆರ್ದಿವಸಾಕ ಜಾವ್ಕಾ ಜಾಲ್ಲಲೆ ಸಾಮಾನ ಹಾಡುಕ ಆಂಗಡಿಕ ವತ್ತನಾ ತಿ ನಾತಿ ಉಷಾಕ ಸಾಂಗ್ತಾ "ಚೆರ್ಡಾ, ಹಾಂವ ಪೆಂಟಾಕ ವಚ್ಚುನು ಸಾಮಾನ ಗೆವ್ನು ಯೆತ್ತಾ. ತುವೆ ತೊಡೊ ವೆಳು ಹೆ ರಾಕ್ಕುನು ಬೈಸ. ತೆ ದಿಕ್ಕಡೆ ದಾಕುನು ದೊನಿ ಕುಪುಳು ಪಕ್ಷೊ ಹೆ ಖಾವ್ಚಾಕ ಆನಿ ಸಿಂಪ್ಡಾಚಾಕ ರಾಕ್ಕುನು ಆಸ್ಸಚಿ. ಹಾಂವೆ ತಸ್ಸಿ ಗೆಲ್ಲೆ ಕೂಡ್ಲೆ ತಾನ್ನಿ ಖಂಡಿತ ಯೆತ್ತಾಚಿ. ಜಾಗ್ರತೆನ ರಾಕ"ಮ್ಹಣಾಲಿ ಆನಿ ಪೆಂಟಾಕ ಚಮ್ಕಲಿ. ತೆ ಮ್ಹಾಂತಾರಿನ ತೆಕಡೆ ಗೆಲ್ಲೆ ಕೂಡ್ಲೆ ಕುಪುಳ ಆಯ್ಲೆಂಚಿ. ನಾತಿ ಉಷಾನ ಕುಪುಳು ಪಕ್ಷಾಂಕ ಖಾವ್ಚಾಕ ಸೊಣಿ. ಜಾಲ್ಲ್ಯಾರಿ ತೆ ಪಕ್ಷೊ ಲಾಗ್ಗಿ ಯೆವ್ನು ತೆ ನಾತ್ತಿಲಾಗ್ಗಿ ಉಲ್ಲವಚಾಕ ಸುರು ಕೆಲ್ಲೆ. ತೆ ಚೆರ್ಡಾಕ ಪಕ್ಷಾಂನಿ ಉಲ್ಲವಚೆ ಪಳವ್ನು ಖುಸಿ ಜಾಲ್ಲಿ. ತಾನ್ನಿ "ಚೆರ್ಡಾ, ಆಮ್ಕಾಯಿ ತುಗೆಲ್ಯಾವರಿಚಿ ಚೆರ್ಡುಂವ ಆಸ್ಸಚಿ. ತಾಂಗೆಲೆ ಪೋಟ ಬೊರ್ಕಾ ಜಾಲ್ಲ್ಯಾರಿ ಅಸ್ಸಿ ಕೊಣಯಿ ಸುಕ್ಕತ ಗಾಲ್ಲೆಲೆ ಆಮ್ಕಾ ಖಾವ್ಚೆ ತಸ್ಸಲೆ ವಸ್ತು ಆಮ್ಮಿ ಆಮ್ಗೆಲೆ ಚೊಂಚಿಂತು ದವರ್ನು ತಾಂಕಾ ವರ್ನು ದಿವ್ಕಾ. ಆಜಿ ಕಂಯಿಽ ಆಮ್ಕಾ ಖಾಣ ಮ್ಹೆಳ್ನಿ. ತುವಂಯಿ ಕಾಡುಕ ಸೊಣಾ. ಆಜಿ ಆಮ್ಗೆಲೆ ಚೆರ್ಡುಂವ ಉಪಾಸಿಚಿ ಆಸ್ಸುಕಾ ಜಾತ್ತಲೆ ದಿಸ್ತಾ" ಮ್ಹಣಾಲಿಂಚಿ. ತೆದನಾ ತಿ ನಾತಿ ಉಷಾ ಮ್ಹಣಾಲಿ "ಕುಪುಳುಮಾಮ್ಮಾ ಆನಿ ಕುಪುಳುಮಾಂಯಿ, ಆಜಿ ಹಾಂವ ತುಮ್ಕಾ ಖಾಣ ಕಾಡುಕ ಸೊಡ್ತಾ. ಜಾಲ್ಲ್ಯಾರಿ ತುಮ್ಕಾ ಜಾವ್ಕಾ ಜಾಲ್ಲಲೆ ತಿತ್ಲೆ ಮಾತ್ರ ಕಾಡ್ಕಾ. ಸಿಂಪ್ಡಾನು ಗಾಲುಕ ನಜ್ಜ. ಸಿಂಪ್ಡಾನು ಗಾಲ್ಲ್ಯಾರಿ ಮೆಗೆಲೆ ಆಜ್ಜಿಕ ಕಳ್ತಾ." ಪಕ್ಷಾಂಕ ಖುಸಿ ಜಾಲ್ಲಿ. ತಾನ್ನಿ ಖಾಣ ಕಾಡ್ಚೆ ಪುಡೆ ತೆ ನಾತಿ ಉಷಾಕ ಸಾಂಗ್ಲೆ "ಚೆರ್ಡಾ, ತು ಪಾಲ್ಯಾಕ ತಂಯಿ ಆಸ್ಸ ಪಳೆ ತೊ ರುಕು, ತಾಜ್ಜೆ ಲಾಗ್ಗಿ ಯೊ. ತುಕ್ಕಾ ಆಮ್ಮಿ ಮಸ್ತ ದುಡ್ಡು ದಿತ್ತಾಚಿ. ತಾಜ್ಜೆನಿ ತುಮ್ಮಿ ತುಮ್ಗೆಲೆ ಕಷ್ಟ ದೂರ ಕೊರೆತ. ತೊ ದುಡ್ಡು ಆಮ್ಕಾ ಕಸ್ಸಲ್ಯಾಕಂಯಿ ಪ್ರಯ್ಜನ ಪಣಾ. ತಸ್ಸಿ ಜಾಲ್ಲೆಲೆ ನಿಮಿತಿ ಆಮ್ಮಿ ತುಕ್ಕಾ ದಿತ್ತಾಚಿ. ತುವೆ ಆಜಿ ಆಮ್ಗೆಲೆ ಚೆರ್ಡುಂವಾಕ ಉಪಾಸಿ ಆಸ್ಸುಚೆ ಚುಕ್ಕೆಲೆಲೆ ಖಾತಿರ ಹೆ ಆಮ್ಮಿ ತುಕ್ಕಾ ಕೊರ್ಚೆ ಸಹಾಯು." ಮ್ಹೊಣು ತಾಂಕಾ ಜಾವ್ಕಾ ಜಾಲ್ಲಲೆ ತಿತ್ಲೆ ಮಾತ್ರ ಚೊಂಚೆಂತು ಗೆವ್ನು ಗೆಲ್ಲೆಂಚಿ. ಮ್ಹಾಂತಾರಿನ ಯೆತ್ತರಿ ತಿಕ್ಕಾ ಗೋಂವು ಆನಿ ನಾಂಚಣೊ ಉಣೆ ಜಾಲ್ಲಲೊ ಕಳ್ನಿ. ಪಕ್ಷೊ ಮಸ್ತ ವರ್ತಾಚಿವೆ? ನಾತಿ ಉಷಾನ ತಾಂಕಾ ಸಿಂಪ್ಡಾಚಾಕ ನಜ್ಜ ಮ್ಹೊಣು ಸಾಂಗಿಲೆ ನಂವೆ? ತಸ್ಸಿ ಜಾವ್ನು ತಿಕ್ಕಾ ಕಸ್ಸಿ ಕೊಳ್ಚೆ?ಹೆರ್ದಿವಸು ಮ್ಹಾಂತಾರಿಲಿ ನಾತಿ ಉಷಾ ಪಕ್ಷಾಂನಿ ಸಾಂಗಿಲ್ಯಾವರಿಚಿ ತೆ ರುಕ್ಕಾ ಲಾಗ್ಗಿ ಗೆಲ್ಲಿ. ತಂಯಿ ತೆ ದೊನಿ ಪಕ್ಷೊ ಆನಿ ತಾಜ್ಜೆ ಪಿಲ್ಲ ಆಸ್ಸಿಲಿಂಚಿ. ಹೆ ಮ್ಹಾಂತಾರಿಲೆ ನಾತಿ ಉಷಾಕ ಪಳವ್ನು ಪಕ್ಷೊ ತಿಗೆಲಾಗ್ಗಿ ಆಯಿಲೆಂಚಿ. ಚಂದ ಕೊರ್ನು ಉಲ್ಲೆಯಿಲೆಂಚಿ. ತಾಂಗೆಲೆ ಚೆರ್ಡುಂವಾಂಕ ತಿಕ್ಕಾ ದಾಕ್ಕೆಲೆ. ನಂತರ ಮ್ಹಾಂತಾರಿಲಿ ನಾತಿ ಉಷಾ "ಕುಪುಳುಮಾಮ್ಮಾ ಹಾಂವ ಆನಿ ಘರಕಡೆ ವತ್ತಾ. ಮೆಗೆಲೆ ಆಜ್ಜಿಕ ಹಾಂವೆ ಹಾಂಗಾ ಯೆವ್ಚೆ ಸಾಂಗನಿ. ತಿಕ್ಕಾ ಆಜಿಯಿ ಪೆಂಟಾಕ ವಚ್ಚಾಕ ಆಸ್ತಾ. ತೆದನಾ ಸುಕ್ಕತ ಗಾಲ್ಲೆಲೆ ಹಪ್ಪೊಳು, ಬೊಳಾಗುಳಿ ರಾಕ್ಕುನು ಹಾಂವೆ ಬಸ್ಚೆ. ತಸ್ಸಿ ಜಾವ್ನು ಹಾಂವ ವತ್ತಾ. ಜಾಯ್ನಾಂವೆ? ಕಾಲಿ ತುಮ್ಮಿ ಯೆವ್ಚಾಕ ಸಾಂಗಿಲೆ ನಿಮಿತಿ ಹಾಂವ ಆಯಿಲಿ. ತುಮ್ಮಿ ಕಾಲಿ ಕಸಲ್ಕಿ ದಿತ್ತಾ ಮ್ಹಳ್ಳಲೆ ನಂವೆ? ತೆ ದಿಲ್ಲ್ಯಾರಿ ಹಾಂವ ತೆ ಗೆವ್ನು ವತ್ತಾ." ಮ್ಹಣಾಲಿ. ತಿಣೆ ತಸ್ಸಿ ಸಾಂಗ್ತರಿ ತೆ ಪಕ್ಷೊ ಭಿತ್ತರಿ ವಚ್ಚುನು ತೀನಿ ಪೊಟ್ಲಿಂಯೊ ಹಾಣು ತಿಗೆಲೆ ಎದ್ರಾಕ ದವರ್ನು "ಹೆ ತೀನಿ ಪೊಟ್ಲಿಂತು ಸುರುವೆಚಿ ಪೊಟ್ಲಿ ಬಾಂಗ್ರಾಚೆ ಆಂಗ್ವಲಾನಿ ಬಾಂದ್ಲಾ. ದೊನ್ನಿಚಿ ರುಪ್ಯಾಚೆ ಆಂಗ್ವಲಾನಿ ಬಾಂದ್ಲಾ. ಆನಿ ಹಿ ಪೊಟ್ಲಿ ಖಾಲಿ ಆಂಗ್ವಲ್ಯಾನಿ ಬಾಂದ್ಲಾ. ತುಕ್ಕಾ ಕಂಚಿ ಪೊಟ್ಲಿ ಜಾಯಿ ಕಿ ತಿ ಕಾಡೆತ." ಮ್ಹಣಾಲೆ ತೆ ಪಕ್ಷೊ. ಮ್ಹಾಂತಾರಿಲೆ ನಾತಿ ಉಷಾನ ಆಂಗ್ವಲಾಂತು ಬಾಂದಿಲಿ ಪೊಟ್ಲಿ ಕಾಳ್ಳಿ. ತೆದನಾ ಪಕ್ಷೊ ಮ್ಹಣಾಲೆಂಚಿ "ತುವೆ ತಿ ಕಸ್ಸಲ್ಯಾಕ ಕಾಳ್ಳಾ. ಬಾಕಿಚಿ ದೊನಿ ಪೊಟ್ಲಿ ಚಾಂಗ ನಾಂವೆ?" ಮ್ಹಾಂತಾರೆಲಿ ನಾತಿ ಉಷಾ ಮ್ಹಣಾಲಿ "ಮ್ಹಾಕ್ಕಾ ಮೆಗೆಲೆ ಆಜ್ಜಿನ ಕೆದನಾಯಿ ಸಾಂಗುಕ ಆಸ್ಸ. ಬಾಯ್ಚೆ ರೂಪ ಪೊಳೊನು ಭುಲ್ನಾಕ್ಕಾ. ಭಿತ್ತರಿ ಕಸ್ಸಲೆ ಆಸ್ಸ ಮ್ಹೊಣು ಕಳ್ನಾ ಜಾಲ್ಲ್ಯಾರೀ ಮಾತ್ತೆ ಕರ್ಚಿಲ್ಯಾರಿ ತಾಜ್ಜೊ ಗುಟ್ಟು ಕಳ್ತಾ. ಹಾಂವೆ ಸಾಂಗಿಲೆ ಕೆದನಾಕಯಿ ಉಡಗಾಸಾಕ ದವರಿ. ಕಸ್ಸಲೆ ಮ್ಹಳ್ಳ್ಯಾರಿ ಏಕಿ ಗ್ಯಾದಿ ಆಸ್ಸ - ಬಾಯರ ಶ್ರಂಗಾರ, ಭಿತ್ತರಿ ಮಾತ್ತಿ- ಕನ್ನಡಾನಿ-ಹೊರಗೆ ಶೃಂಗಾರ ಒಳಗೆ ಗೋಳಿಸೊಪ್ಪು-ಮ್ಹೊಣು. ಚಂದ ಆಸ್ಸಿಲೆ ಸಕ್ಕಡ ಚಾಂಗ ನಂಯಿ ಮ್ಹೊಣು ಹಾಜ್ಜೊ ಅರ್ಥು. ತಸ್ಸಿಚಿ ಚಂದಿ ಆಸ್ಸಿಲಿ ಚೆಲ್ಲಿಲೆ ಗುಣ ವಾಯಟ ಆಸ್ಚಾಕ ಪುರೊ. ಕುರೂಪಿಲೆ ಗುಣ ಚಾಂಗ ಆಸ್ಸುಕಂಯಿ ಪುರೊ. ಆಮ್ಗೆಲೆ ಹಣ್ಯಾಬರ್ಪಾಂತು ಕಸ್ಸಲೆ ಬರಯಿಲಾಕಿ ತೇಚಿ ಮ್ಹೆಳ್ತಾ. ಮ್ಹೊಣು ಮಾಕ್ಕಾ ಉಪದೇಶು ದಿಲ್ಲಾ. ತಸ್ಸಿ ಜಾವ್ನು ಮಾಕ್ಕಾ ತಿನ್ನಿಚಿ ಪೊಟ್ಲಿ ಪುರೊ." ಮ್ಹಣಾಲಿ. ತೆದನಾ ತೆ ಪಕ್ಷಾಂನಿ ತಿಕ್ಕಾ ತಿನ್ನಿಚಿ ಪೊಟ್ಲಿ ದಿವ್ಚೆ ಪುಡೆ ಸ್ಟಾರ್ ಪ್ಲಸ್ರಿ ಏಕ ಸಿರಿಯಲ್ ಯೆತ್ತ ನಂವೆ-ಖುಲ್ ಜಾ ಸಿಮ್ಸಿಮ್-ಮ್ಹೊಣು ತಾಂತು ಕೆಲ್ಲ್ಯಾವರಿಚಿ ತಿಣೆ ನಾಕ್ಕಾ ಮ್ಹೊಣು ಸೊಳ್ಳೆಲೆ ಬಾಕಿಚೆ ದೊನಿ ಪೊಟ್ಲಿಂತು ಕಸ್ಸಲೆ ಆಸ್ಸ ಮ್ಹೊಣು ದಾಕ್ಕಯ್ಲೆ. ಏಕ್ಕಾ ಪೊಟ್ಲಿಂತು ಇಂಗಳೊ ಆಸ್ಸಿಲೊ ಆನಿ ದೊನ್ನಿ ಪೊಟ್ಲಿಂತು ಸೇಣಾಚೆ ಕುಡ್ಕೆ ಆಸ್ಸಿಲೆ. ತೆ ಪಕ್ಷಾಂಕ ತಿಗೆಲೆ ಗುಣ ಚಾಂಗ ದಿಸ್ಲೆ. ಆನಿ ತಿನ್ನಿಚಿ ಪೊಟ್ಲಿ ಸೊಡ್ವಾನು ಪಳವ್ಚಾಕ ತಿಕ್ಕಾಚಿ ಸಾಂಗ್ಲೆ. ತೀಣೆ ತೆ ಸೊಡ್ವಾಯ್ತನಾ ತಾಂತು ಬಾಂಗ್ರಾಚೆ, ರುಪ್ಪ್ಯಾಚೆ ನಗ, ಮಸ್ತು ದುಡ್ಡು ಆಸ್ಸಿಲೊ. ತಿಕ್ಕಾ ಮಸ್ತ ಖುಸಿ ಜಾಲ್ಲಿ. ಪಕ್ಷಾಂಕಯಿ ಖುಸಿ ಜಾವ್ನು ತಿಕ್ಕಾ ತಿಗೆಲೆ ಘರಾಲಾಗ್ಗಿ ತಾಂಯಿ ಹಾಣು ಸೊಳ್ಳೆ. ಮ್ಹಾಂತಾರಿನ ತೆ ಪಕ್ಷಾಂಕ ಪಳವ್ಚೆ ಪುಡೇಚಿ ತಾನ್ನಿ ವಾಪಾಸ ತಾಂಗೆಲೆ ರುಕ್ಕಾರಿ ವಚ್ಚುನು ಬಸ್ಲೆಂಚಿ. ಹಿ ಘರಕಡೆ ಯೆತ್ತನಾ ಮ್ಹಾಂತಾರಿ ನಾತಿ ಉಷಾ ನಾ ಮ್ಹೊಣು ಪಡ್ಪಡೆತಲಿ. ಹೀಣೆ ಆಯಿಲೆ ಪಳವ್ನು ಕೋಪಾನ ಬಾಯರ ಯೆತ್ತನಾ ತಿಗೆಲೆ ಹಾತ್ತಾಂತು ತಿಕ್ಕಾ ಉಬಾರುಕ ಜಾಯ್ನಾತಿಲ್ತಿತ್ಲಿ ಹೊಡಿ ಪೊಟ್ಲಿ ಪಳವ್ನು "ಕಸ್ಸಲ್ಗೊ ಹೆ? ಚೊರ್ನು ಹಾಳ್ಳಾವೆ? ತುಕ್ಕಾ ಹಾಂವೆ ದಿಲ್ಲೆಲೆ ಉಪದೇಶು ಕಾಂಯಿ ಪ್ರಯ್ಜನ ನಾ ಜಾಲ್ಲೆ ನಂವೆ? ದುಸ್ರಾಲೆ ವಸ್ತಾಂಕ ಆಶಾ ಕೊರುಕ ನಜ್ಜ ಮ್ಹೊಣು ಹಾಂವೆ ಕಿತ್ಲೆ ಪಟಿ ಸಾಂಗನಿ ತುಕ್ಕಾ?" ಮ್ಹೊಣು ಹಿಕ್ಕಾ ಉಲ್ಲವ್ಚಾಕ ಸೊಣಾನಾತ್ತಿಲೆ ಜೋರು ಕೊರುಕ ಸುರು ಕೆಲ್ಲೆ. ತೆದನಾ ತಿ ನಾತಿ ಉಷಾ ಮ್ಹಣಾಲಿ "ಆಜ್ಜಿ, ಹಾಂವೆ ಸಾಂಗ್ಚೆ ತೊಡೆ ಆಯ್ಕ. ಕಾಲಿ ತುವೆ ಪೆಂಟಾಕ ವತ್ತನಾ ಮಾಕ್ಕಾ ತೆ ದೊನಿ ಪಕ್ಷೊ ಆಯ್ಲಾರಿ ತಾಂಕಾ ಗೋಂವು ಖಾವ್ಚಾಕ ಸೊಣಾಕ್ಕಾ ಮ್ಹಳ್ಳಲೆ ನಂವೆ? ತುವೆ ತೆಕಡೆ ಗೆಲ್ಲೆ ಕೂಡ್ಲೆ ತಾನ್ನಿ ಆಯಿಲಿಂಚಿ. ಹಾಂವೆ ಖಾವ್ಚಾಕ ಸೊಣಿ. ಜಾಲ್ಲ್ಯಾರಿ ತೆ ಮೆಗೆಲಾಗ್ಗಿ ಆಯ್ಲೆಚಿ ಆನಿ ತಾಂಗೆಲೆ ಚೆರ್ಡುಂವ ಉಪಾಸಿ ಆಸ್ಸಚಿ. ತುವೆ ಗೋಂವು ಕಾಡುಕ ಸೊಳ್ಳ್ಯಾರಿ ಪಾಲ್ಲ್ಯಾಕ ತುಕ್ಕಾ ಆಮ್ಮಿ ಮಸ್ತ ದುಡ್ಡ ದಿತ್ತಾಚಿ ಮ್ಹಳ್ಳೆ ತಾನ್ನಿ. ಹಾಂವೆ ಪಾಪ ಚೆರ್ಡುಂವಾ ಕಾತಿರ ನಂವೆ ತಾನ್ನಿ ಗೋಂವು ಹೊರ್ಚೊ. ವ್ಹರಾ, ಜಾಲ್ಲ್ಯಾರಿ ಸಿಂಪ್ಡಾಚಾಕ ನಜ್ಜ. ತಾಜ್ಜೆನಿ ಆಮ್ಕಾ ಮಸ್ತ ನಷ್ಟ ಜಾತ್ತಾ. ತುಮ್ಮಿ ಚೊಂಚೆಂತು ಹೊರ್ಚೆ ತೊಡೆಚಿ. ಜಾಲ್ಲ್ಯಾರಿ ಸಿಂಪ್ಡಾಚೆ ಮಸ್ತ. ತಸ್ಸಿ ಜಾಲ್ಲೆಲೆ ನಿಮಿತಿ ಮೆಗೆಲಿ ಆಜ್ಜಿ ತುಮ್ಕಾ ಗೋಂವು ಕಾಡುಕ ಸೊಣಾ. ತುಮ್ಮಿ ಸಿಂಪ್ಡಾನು ಗಾಲ್ನಾಸ್ಸಿ ಕಾಳ್ಳ್ಯಾರಿ ತಿವಯಿ ತುಮ್ಕಾ ಕಾಡುಕ ಸೊಡ್ತಾ. ಮೆಗೆಲಿ ಆಜ್ಜಿ ಚಾಂಗಿ ಮ್ಹೊಣು ತಾಂಕಾ ಸಾಂಗ್ಲೆ. ತಾನ್ನಿ ಗೋಂವು ವೆಲ್ಲೊ ಆನಿ ಮಾಕ್ಕ ಆಜಿ ತೆ ರುಕ್ಕಾಲಾಗ್ಗಿ ಯೆವ್ಚಾಕ ಸಾಂಗ್ಲೆ. ತಸ್ಸಿ ಹಾಂವ ತಂಯಿ ವಚ್ಚುನು ತಾನ್ನಿ ದಿಲ್ಲೆಲೆ ಹೆ ಗೆವ್ನು ಹಾಳ್ಳೆ. ತಾನ್ನಿ ಮ್ಹಾಕ್ಕಾ ಹಾಂಗತಾಂಯಿ ಹಾಣು ಸೊಳ್ಳಾ. ಕುಪುಳ ಪಕ್ಷ್ಯೊ ಚಾಂಗ ಆಸ್ಸಚಿ. ತಾನ್ನಿ ಮಾಕ್ಕಾ ತೀನಿ ಪೊಟ್ಲೆಂತು ಏಕಿ ಕಾಡುಕ ಸಾಂಗಿಲೆ. ತಾಂತು ಏಕಿ ಬಾಂಗ್ರಾಚೆ ಆಂಗ್ವಲಾಂತು ಬಾಂದಿಲಿ, ಆನ್ನೆಕಿ ರುಪ್ಪ್ಯಾಚೆ ಆಂಗ್ವಲಾಂತು ಬಾಂದಿಲಿ, ಆನ್ನೆಕಿ ಹಿ. ತುವೆ ಸಾಂಗಿಲ್ಯಾವರಿ ಭಾಯ್ಚೆ ರೂಪಾಕ ಹಾಂವ ಭೂಲ್ನಿ. ತಸ್ಸಿ ಜಾವ್ನು ಹಾಂವೆ ಹಿ ಪೊಟ್ಲಿ ಕಾಳ್ಳಿ. ಪಳಯ್ಲಾರಿ ತೆ ದೊನ್ನಿ ತುಂಯಿ ಆಸ್ಸಿಲೆ ಇಂಗಳೊ ಆನಿ ಸೇಣಾಚೆ ಕುಡ್ಕೆ. ಹಾಂತು ಪಳೆ ಬಾಂಗ್ರಾಚೆ ನಗ, ರುಪ್ಪ್ಯಾಚೆ ನಗ, ಆನಿ ಮಸ್ತ ದುಡ್ಡುಂಯಿ ಆಸ್ಸ. ಆಜ್ಜಿ ತುವೆ ಸಾಂಗ್ಲ್ಯಾವರಿ ಹಾಂವೆ ಹಿ ಪೊಟ್ಲಿ ಕಾಳ್ಳೆಲಿ ಚಾಂಗ ಜಾಲ್ಲೆ ನಂವೆ?" ಮ್ಹಣಾಲಿ ಉಷಾ. ತೆದನಾ ತೆ ಮ್ಹಾಂತಾರಿಕ ಹಾಂವೆ ಯೆದ್ದೊಳು ತಾಂಯಿ ಉಷಾಕ ದಿಲ್ಲಲೊ ಉಪದೇಶು ಸಾರ್ಥಕ ಜಾಲ್ಲೊ. ಉಷಾ ಬಾಯ್ಚೆ ರೂಪಾಕ ಭುಲ್ನಾಸ್ಸಿ ಆಮ್ಕಾ ಚಾಂಗ ಜಾಲ್ಲೆ ನಂವೆ? ಮ್ಹೊಣು ಮ್ಹಾಂತಾರೆನ ಚಿಂತುನು ಉಷಾನ ಹಾಳ್ಳೆಲೆ ವಸ್ತು ಸಕ್ಕಡ ಜಾಗ್ರತೇರಿ ಭಿತ್ತರಿ ದವರ್ಲೆ. ನಂತರ ತಾನ್ನಿ ಕಷ್ಟ ನಾಸ್ಸಿ ಸುಖಾರಿ ಜೀವನ ಕೆಲ್ಲೆ. ಪ್ರಾಯೆಕ ಯೆತ್ತರಿ ಉಷಾಕ ಚಾಂಗ ಕಡೆನ ದಿವ್ನು ವ್ಹಾರ್ಡಿಕ ಕೆಲ್ಲಿ. ಉಷಾಕ ವ್ಹಾರ್ಡಿಕ ಜಾವ್ಚೆ ಪುಡೆ ರಶ್ಮಿಕ ದುಸ್ರೆಽಚಿ ನಮೂನೆರಿ ಚಂದು ಚೆಲ್ಲೊ ಮ್ಹೆಳ್ಳೊ ಮ್ಹಳ್ಳಲಿ ಕಾಂಣಿ ಆಸ್ಸ. ಭಾಂಗ್ರಾ ಗಿಂಡಿ ಮ್ಹಣು ತಾಜ್ಜೆ ನಾಂವ. ಹೆ ಸಕ್ಕಡ ಜಾತ್ತರಿ ತಿ ಮ್ಹಾಂತಾರಿ ದೇವಲಾಗ್ಗಿ ಗೆಲ್ಲಿ. ಉಷಾ ಆನಿ ರಶ್ಮಿ ಸುಖಾರಿ ಸಂಸಾರು ಕೊರ್ನು ತಾಂಗೆಲೆ ಚೆರ್ಡುಂವಾಕಂಯಿ ಆಜ್ಜಿನ ಸಾಂಗಿಲೆ ಉಪದೇಶು ಸಾಂಗುನು ತಾಂಕಾಂಯಿ ಚಾಂಗ ಗುಣ ಯೆವ್ಚೆ ತಸ್ಸಿ ಬುದ್ಧಿ ಸಾಂಗ್ತಲಿಂಚಿ.
ತಸ್ಸಿ ಜಾವ್ನು ಆಮ್ಮಿ ಬಾಯ್ಚೆ ರೂಪಾಕ ಭುಲ್ಚಾಕ ನಜ್ಜ ಮ್ಹಳ್ಳೆಲೆ ವಿಷಯು ಉಡಗಾಸಾಕ ದವರ್ಕಾ.
---೦೦೦---
ಬಂಟ್ವಾಳ ಗಾಂವಾಂಚೆ ಕಾಲೇಜ್ ಆನಿ ಇಂಗ್ಲೀಷ ಮಾಧ್ಯಮ ಶಾಳೆ ಆಸ್ಸುಚೆ ಜಾಗ್ಯಾಕ ವಿದ್ಯಾಗಿರಿ ಮ್ಹಣ್ತಾಂಚಿ ಮ್ಹಣು ತುಮಕಾ ಏಕ ಕಾಂಣಿಂತು ಸಾಂಗ್ಲಾ. ತಸ್ಸಿಚಿ ವಿದ್ಯಾಗಿರಿಲಾಗ್ಗಿ ಮಂಡಾಡಿ, ಕಲ್ಲಗುಡ್ಡೊ, ಲೊರೇಟ್ಟೊ ಪದವು ಆದಿಲೆ ನಾಂವಾಂಚೆ ಮಸ್ತ ಸಾನ್ನ್ಸಾನ್ನ್ ಜಾಗ್ಯೆ ಆಸ್ಸಚಿ. ತೆ ಕಾಳಾರಿ ಕಲ್ಲಗುಡ್ಡೊ ಏಕಿ ಸಾನಿ ಹಳ್ಳಿ. ಬಂಟ್ವಾಳ ಪೆಂಟಾದಾಕುನು ಮಸ್ತ ದೂರ ನಾ ಜಾಲ್ಲ್ಯಾರಿ ತೆ ವೇಳಾರಿ ಥಂಯ ಬಂಟ್ವಾಳಾದಾಕುನು ಚಮ್ಕುನೂಂಚಿ ವಚ್ಚುಕಾ ಜಾಲ್ಲೆಲೆ ನಿಮಿತಿ ತೆ ದೂರ ಮ್ಹಣು ದಿಸ್ತಲೆ. ಆತ್ತ ಮೂಡಬಿದ್ರೆಕ ವಚ್ಚೆ ಬಸ್ಸ್ ಗಂಟೆಗಂಟ್ಯಾಕ ಆಸ್ಸಿಲೆ ನಿಮಿತಿ ತೊ ಜಾಗೊ ಮಸ್ತ ದೂರ ಮ್ಹಣು ದಿಸ್ಸನಾ. ತೆ ಕಲ್ಲಗುಡ್ಡ್ಯಾರಿ ಮಸ್ತ ಕಾಳಾಚೆ ಪುಡೆ ಏಕು ಸಾವುಕಾರು ಆಸ್ಸಿಲೊ. ತಾಗೆಲೆ ನಾಂವ ರಾಮಚಂದ್ರು ಮ್ಹಣು. ತಾಕ್ಕಾ ಹಳ್ಳಿಂತು ರಾಮು ಮ್ಹಣು ಆಪ್ಪೊವ್ಚೆ. ತಾಗೆಲಿ ಬಾಯಲ ಸೀತಮ್ಮಾ ಮ್ಹಣು. ಚಡಜಾವ್ನು ಪುಡೆ ಕಾಲಾಂತು ಬಾಮ್ಣಾಲೆ ನಾಂವ ಖಂಜೆ ದೇವಾಲೆಕಿ ತಾಗೆಲೆ ಬಾಯಲಕ ತೆ ದೇವಾಲೆ ಬಾಯಿಲೆಲೆ ನಾಂವಂಚಿ ವ್ಹಾರ್ಡಿಕ ಜಾತ್ತರಿ ದವರ್ಚೆ ರೂಢಿ. ತಾಂಕಾ ಸಾತ ಜನ ಚೆಲ್ಲೆ. ತಾಂಗೆಲೆ ನಂತರ ಏಕಿ ಚೆಲ್ಲಿ ಜಾಲ್ಲಿ. ತೆ ಸಾವುಕಾರಾಕ ಗಾದ್ದೊ-ತೋಟ-ಕಾಜ್ಜುಚಿ ಪಾಡಿ (ರಾನ) ಸಕ್ಕಡ ಆಶಿಲೆ. ತಿತ್ಲೆ ಆಸ್ತಿಂತು ಜಾವ್ಚೆ ತಾಂದುಲು, ನಾರ್ಲು, ಕಾಜ್ಜುಬಿ ಹೆ ಸಕ್ಕಡ ತಾಣೆ ಬಂಟ್ವಾಳಾಚೆ ಆಂಗ್ಡಿಕಾರಾಂಕ ದಿವ್ಚೆ ಆನಿ ತಾಂಗೆಲಾಗ್ಗಿ ತಾಕ್ಕಾ ಜಾವ್ಕಾಜಾಲ್ಲೆಲೆ ಇತರ ಜೀನಸ ಸಾಮಾನ ವರ್ಚೆ. ತಸ್ಸಿಂಚಿ ತೆ ಸಾವುಕಾರಾನ ತಾಗೆಲೆ ಸಾತ ಜನ ಚೆಲ್ಲ್ಯಾಂಕ ವ್ಹಾರ್ಡಿಕ ಬಂಟ್ವಾಳಾಚೆ ಸುತ್ತಮುತ್ತ್ ಆಸ್ಸುಚೆ ಗಾಂವಾಂಚೆ ತಾಗೆಲೆ ತಸ್ಸಲೆಂಚಿ ಸಾವುಕಾರಾಲೆ ಚೆಲ್ಲಿಲೆ ಸಾಂಗಾತ್- ವ್ಹಾರ್ಡಿಕೆಚೊ ಖರ್ಚು ಚೆಲ್ಲಿಕಾರಾಂಕ ಜಾಲ್ಲೆಲೆ ನಿಮಿತಿ- ಭಾರಿ ಗಮ್ಮತೇರಿ ಕರೆಲಿ. ಸಾವುಕಾರ ರಾಮಚಂದ್ರಾಲಿ ಬಾಯಲ ಸೀತಮ್ಮಾ ದೇವು ರಾಮಾಲಿ ಬಾಯಲ ಸೀತಾದೇವಿಸಿ ಮಾತ್ರ ನಾಸಿಲಿ. ತಿ ಹೊಳ್ಳಿ ಪಿಟ್ಟಾಶಿ. ಚೆಲ್ಲ್ಯಾಂಕ ವ್ಹಾರ್ಡಿಕ ಜಾತ್ತರಿ ಕಾಮಾಚೆ ಜನಾಂಕ ಸೊಳ್ಳೆ. ಆನಿ ತಾಂಗೆಲೆ ಬಾಯಲೆಲೆ ಕರೆನ ಘರಾಚೆ ಮಾತ್ರ ನ್ಹಂಯಿ ಗಾದ್ದ್ಯಾಚೆ, ತೋಟಾಚೆ ಆನಿ ಗುಡ್ಡ್ಯಾರಿ ದಾಕುನು ಕಾಜ್ಜುಬಿ ವೆಂಚುಚೆ ಕಾಮಯಿ ಕರೊಚೆ. ತಾಜ್ಜೆ ನಂತರ ತಾಂಕಾ ಪೊಟ್ಟಾಕಯಿ ಸಮಚಿ ಘಾಲುಕ ನಾ. ತಿಗೆಲೊ ತಾಳೊಯಿ ಹೊಡು. ತಸ್ಸಿ ಜಾವ್ನು ತಿಗೆಲೊ ಬಾಮ್ಹುಣು ಆನಿ ಸಾತ ಜನ ಚೆಲ್ಲೆಯಿ ತಿಕ್ಕಾ ಭಿವ್ನು ತೀಣೆ ಸಾಂಗ್ಲ್ಯಾವರಿ ಆಯ್ಕುಚೆ ಆನಿ ನಾಂಚೆ. ಸಮ ಪೊಟ್ಟಾಕ ಖಾವ್ಚಾಕ ನಾಶಿ ಸಾತ ಜನ ಸುನ್ನಾಂಕಯಿ ಮಾಂಯಿಚೆ ವ್ಹಯರಿ ರಾಗು (ಕೋಪು) ಯೆತ್ತಲೊ. ಜಾಲ್ಲ್ಯಾರಿ ಕಸ್ಸಲೆ ಕರ್ಚೆ ಆನಿ ಕೊಣಾಲಾಗ್ಗಿ ಸಾಂಗ್ಚೆ. ಬಾಮ್ಹುಣ ಆವ್ಸುನು ಸಾಂಗ್ಲಾವರಿ ನಾಂತಾಚಿ ನಂವೆ? ಆವ್ಸುಲೆ ದೂರ ತಾಂಗೆಲಾಗ್ಗಿ ಸಾಂಗ್ಲ್ಯಾರಿ ತಾನ್ನಿ ಬಾಯಲಾಂಕಚಿ ಜೋರು ಕರ್ಚೆ. ತಸ್ಸಿ ಜಾವ್ನು ಹೆ ಸಾತ ಜನ ಹೊಡ್ಡಾಂತಯಿ ದಾಕುನು ಆಯಿಲೊ ಜಾಲ್ಯಾರೀ ಕಾಮಾಚಾನಿ ಕರ್ಚೆ ಕಾಮ ಉಲ್ಲಯಿನಾಸಿ ಕರ್ತಲೆ. ತಾಂಕಾ ಥಂಯಿಚಿ ಮೊರತಾಯಿ ವಾಂಚುಕಾ ನಂವೆ? ಅಸ್ಸಿ ಆಸ್ತನಾ ಏಕ ದಿವಸು ತಾಂಗೆಲೆ ತೋಟಾದಾಕುನು ಪೊಪ್ಪಳ ಚೋರ್ನ ಗೆಲ್ಲೆ. ದಿಸಾಚೆ ಸುನ್ನಾಂಕ ಸಾಂಗುನು ತೋಟಾಂತು ಚೋರಿ ಜಾಯ್ನಾಸ್ಸಿ ಪಳೊಚಾಕ ಸಾಂಗುವೆತ. ರಾತ್ರಿ ತಾಂಕಾ ತೋಟಾಕ ಪೆಟೊಚಾಕ ಜಾತ್ತವೆ? ತಸ್ಸಿ ಜಾವ್ನು ತೋಟ ರಾಕ್ಕುಕ ಏಕ ಚೆಡೊ ರಾಬ್ಬಯಿಲೊ. ತಾಗೆಲೆ ನಾಂವ ಪಿಜಿನಾ ಮ್ಹಣು. ಹಿ ಪಿಟ್ಟಾಸಿ ಮಾಂಯಿ ಸೀತಮ್ಮಾ ಭಾರಿ ಚಾಲಾಕಿ. ತೀಣೆ ಕಾಜ್ಜುಚೆ, ಪಣಸಾಚೆ ವೇಳಾರಿ ಘರಕಡೆ ರಾಂದಪಚೀ ಕರುಕ ನಾ. ತಿಗೆಲೆ ಸುನ್ನಾಂಕ "ಆಜಿ ರಾಂದಪ ಕರುಕ ನಾ. ತುಮ್ಮಿ ಕಾಜು ಖಾಯ್ಯಾ, ಪಣಸ ಖಾಯ್ಯಾ." ಮ್ಹಣ್ಚೆ.ತಾಜ್ಜೆ ನಂತರ "ಕಾಮಾಚೆ ಜನಾಂಕ ಸೊಳ್ಳಾ. ತಾನ್ನಿ ಕರ್ಚೆ ಕಾಮ ತುಮ್ಮಿಚಿ ಕರ್ಕಾ." ಮ್ಹಣ್ಚೆ. ಪಾಪ ಹೆ ಸುನ್ನಾಂಕ ಕಸ್ಸಲೆ ಕರುಕ ಜಾತ್ತಾ. ಮಾಂಯ್ಯೆನ ಸಾಂಗ್ಲ್ಯಾವರಿಚಿ ಕಾಜು, ಪಣಸೊ ಖಾವಚೊ, ಘರಾಚೆ ಭಾಯಿರ್ಚೆ ಕಾಮ ಕರ್ಚೆ. ಏಕ ದಿವಸು ಪಣಸು ಖಾವ್ನು ಜಾತ್ತರಿ ಹಾತ್ತಾಕ ಲಾಗ್ಗಿಲೆ ಮ್ಹೇಣ ಕಾಡ್ಚೆ ಕಾತೀರ ನಾರ್ಲೇಲ ತೇಲ ಲಾಯಿತನಾ ಏಕ ಸುನ್ನೆಕ ಪಾತ್ತೊಳಿಚೊ ಪರ್ಬಂಳು ಆಯಿಲೊ. ತೆದನಾ ತಿ ಬಾಕಿಚೆ ಜಾವ್ವೆಲಾಗ್ಗಿ ಸಾಂಗ್ತಾ. "ಆಮ್ಮಿ ಪಾತ್ತೊಳಿ ಖಾಯಿನಾಸಿ ಕಿತ್ಲೆ ಕಾಳ ಜಾಲ್ಲೆ. ತುಮ್ಕಾ ಖಾವ್ಕಾ ಮ್ಹಣು ಆಶಾ ಜಾಯ್ನಾಂವೆ?" ಮ್ಹಣಾಲಿ. ತೆ ಆಯ್ಕುನು ಬಾಕಿ ಜಾವ್ವೊ ಸಕ್ಕಡ ಏಕ್ಕಪಟಿ "ಜಾಯ್ನಾಶಿ! ಆಮ್ಮಿ ತುಗೆಲೆ ಮ್ಹಣ್ಕೇಚಿ ನಂವೆ? ಜಾಲ್ಲ್ಯಾರಿ ಹೆ ಮಾಂಯ್ಯೆನ ಆಸ್ಸುಚೆ ತಾಂಯಿ ಆಮ್ಕಾ ಪಾತ್ತೊಳಿ ಖಾವ್ಚೆ ನಸೀಬ ನಾ. ಪಾತ್ತೊಳಿ ಸೋಡಿ ಸಮಽಚಿ ಪೊಟ್ಟಾಕ ಖಾವ್ಚಾಕ ಆಸ್ಸವೆ?" ಮ್ಹಣಾಲಿಂಚಿ. ತಾಂತು ಸಾನ್ನಾಲಿ ಬಾಯಲ ಏಕ್ಲಿ ಸ್ವಲ್ಪ ಧೈರ್ಯ್ಯಾಚಿ. ತೀ ಮನಾಂತೂಚಿ ಹೆ ಮಾಂಯ್ಯೆಕ ಕರ್ತಾ ಬಗ ಮ್ಹಣು ಲೆಕ್ಕುನು ಏಕ ಕಾಗದ ಬರವ್ನು ಪೋಸ್ಟಾಕ ಘಾಲ್ತಾ. ಹೆರ್ದಿವಸು ಮೂಡಬಿದ್ರೆಚೆ ತಾಂಗೆಲ್ಯಾಪಸಿ ಹೊಡ ಸಾವುಕಾರಾಲೆ ಪೂತ್ತಾಕ ಮಸ್ತ ದೇಣೆ, ಭಾಂಗರ ಸಕ್ಕಡ ದೀವ್ನು ಸುಖಾರಿ ಆಸ್ಸುಕಾ ಮ್ಹಣು ವ್ಹಾರ್ಡಿಕ ಕರ್ನು ದಿಲ್ಲೆಲಿ ತಾಂಗೆಲಿ ಏಕ್ಲಿಚಿ ಮೋಗಾಚಿ ಧುವೆಲೆ ಪತ್ರ ಹಾಣು ಪೋಸ್ಟಾಚೊ ಮನಿಷು ದಿತ್ತಾ. ತೆ ಪತ್ರಾರಿ ತೀಣೆ ತಿಗೆಲೆ ಕಷ್ಟ ಸಕ್ಕಡ ವಿವರ್ಸುನು ಬರಯಿಲಾ. ತೆ ವಾಜ್ಜುನು ರಾಮು ಆನಿ ತಾಗೆಲಿ ಬಾಯಲ ಸೀತಮ್ಮಾ ಆನಿ ಸಾತ ಜನ ಚೆಲ್ಲ್ಯಾಂಕಯಿ ಮ್ಹಾತ್ಯಾರಿ ಫಾತ್ತೊರು ಘಾಲ್ಯಾವರಿ ಜಾಲ್ಲೆ. ಯಿತ್ಯಾಕ ಮ್ಹಳ್ಯಾರಿ ತೀ ಸಕ್ಕಡಾಲಿ ಮೋಗಾಚಿ. ತೆ ಪತ್ರಾರಿ "ಆಮ್ಮಾ, ಆನಾ ಆನಿ ಮೆಗೆಲೆ ಮೊಗಾಚೆ ಸಾತ ಜನ ಅಣ್ಣಾನೊ, ತುಮ್ಮಿ ಸೌಖ್ಯಾರಿ ಆಸ್ಸಂಚಿ ಮ್ಹಣು ಲೆಕ್ತಾ. ತಸ್ಸಿಂಚಿ ತುಮ್ಮಿ ಲೆಕ್ಕಿಲ್ಯಾವರಿ ಹಾಂವ ಹಾಂಗಾ ಸೌಖ್ಯಾರಿ ನಾ. ಸುಮಾರ ಕಾಳ ಜಾಲ್ಲೆ. ತುಮಕಾ ಸಾಂಗ್ಲ್ಯಾರಿ ತುಮ್ಮಿ ಬೇಜಾರ ಕರ್ತಾಂಚಿ ಮ್ಹಣು ಎದ್ದೋಳುತಾಂಯಿ ಸಾಂಗನಿ. ಜಾಲ್ಲ್ಯಾರಿ ಆನಿ ಮೆಗೆಲಿ ಆಶಾ ಮಾಕ್ಕಾಚಿ ನಾ. ತುಮಕಾ ಸಕ್ಕಡ ಜನಾಂಕಯಿ ಪಳವಕಾ ಮ್ಹಳ್ಳಲಿ ಏಕ ಆಶಾ ಆಸ್ಸ. ತಸ್ಸಿ ಜಾವ್ನು ತುಮ್ಮಿ ತುರಂತ ಆಯಿಲ್ಯಾರಿ ಜಾಯತ ಆಸ್ಸಿಲ್ಲೆ. ತುಮ್ಮಿ ಪಳವಚೆ ಪುಡೆ ಮಾಕ್ಕಾ ಕಸ್ಸಲೆ ಜಾವ್ಚಾಕ ನಜ್ಜ ಮ್ಹಣು ಹಾಂವ ದೇವಾಲಾಗ್ಗಿ ಮಾಗ್ಗುನು ಘೆತ್ತಾ. ಆನಿ ಕಸ್ಸಲೆಂಯಿ ಆಶಾ ಮಾಕ್ಕಾ ನಾ. ಮ್ಹಣು ಬರವ್ನು ಆಸ್ಸಿಲೆ. ತೆ ವಾಜ್ಜುನು ಸಾವುಕಾರು ರಾಮು, ಸೀತಮ್ಮಾ ಆನಿ ಸಾತ ಜನ ಚೆಲ್ಲೆಂಯಿ ತಿಕ್ಕಾ ಪಳವಚೆ ಖಾತೀರ ತಿಗೆಲೆ ಗಾಂವು ಮೂಡಬಿದ್ರೆಕ ವತ್ತಾತಿ. ವತ್ತನಾ ಸುನ್ನಾಂಕ "ಘರ, ತೋಟ, ಗಾದ್ದೊ ಜಾಗ್ರತೆನ ಪಳಯಾ." ಮ್ಹಣು ಸಾಂಗ್ತಾಂಚಿ. ತಾನ್ನಿ ತಸ್ಶಿ ಚಮ್ಕಲೆ ಕೂಡ್ಲೆ ಹೆ ಸಾತ ಜನ ಸುನ್ನ ಪಿಜಿನಾಕ ಸಾಂಗುನು ರುಕ್ಕಾರಿ ದಾಕುನು ಪಣಸು ಕಾಡವ್ನು, ಶಿಂದೊವ್ನು, ಏಕ್ಲಿ ತೆ ಉದ್ರಾನು ಘರೆ ಕಾಣು ದವರ್ತಾ. ದೊನ್ನಿಚಿ ತಾಂದುಳು ತಿಂಬತ ಘಾಲ್ನು ವಾಟ್ಟಿತಾ, ತಿನ್ನಿಚಿ ಕುಡ್ಚಾಂಪ್ಯಾಚೆ ಪಾನ ಹಾಣು ಪುಸುನು ದವರ್ತಾ, ತಸ್ಸಿ ಆಸ್ಸಿ ಮ್ಹಣು ಪಳವ್ಚೆ ಭಿತ್ತರಿ ಸಾತ ಜನ ಸುನ್ನಂಯಿ ಪಣಸಾಚಿ ಪಾತ್ತೊಳಿ ಕರ್ತಾಂಚಿ ಆನಿ ಶಿಜ್ಜಯಿತಾಚಿ. ತಾಜ್ಜೆ ಪರ್ಬಂಳು ಯೆತ್ತನಾ ಸಾತ ಜನ ಸುನ್ನಾಕಂಯಿ ಆನಿ ತೆ ಕಾಮಾಚೊ ಚೆಡೊ ಪಿಜಿನಾಕಂಯಿ ತೊಂಡಾತುಲ್ಯಾನ ಉದ್ದಾಕ ದೇಂವ್ಚಾಕ ಸುರು ಜಾತ್ತಾ. ಸಕ್ಕಡಾಂಕಯಿ ಸಂತೋಷು. ಆಜಿ ಪೊಟಭರಿ ಪಾತ್ತೊಳಿ ಖಾವೆತ ನಂವೆ? ಕೆದನಾ ಶಿಜ್ಜುನು ಜಾತ್ತಾ ಕೆದನಾ ಖಾವ್ಚಿ ಮ್ಹಣು ರಾಕ್ತಾಂಚಿ. ಪಾತ್ತೊಳಿ ಜಾಲ್ಲಿ. ರಾತ್ರಿ ಸಕಡಾನಿ ಜಾಂವ್ಕಾ ಜಾಲ್ಲೆಲೆ ತಿತ್ಲಿ ಆಶಾ ಭರಿತ ಖಾಲ್ಲಿ. ಪೊಟಭರಿ ಖಾಲ್ಲೆಲೆ ನಂತರ ತಾಂಕಾ ದುಸ್ರೆ ಕಾಮಕರುಕ ಜಾಯ್ನಿ. ವರಲೆಲಿ ಪಾತ್ತೊಳಿ ದಾಂಪುನು ದವರ್ಲಿ ಆನಿ ನಿದ್ದಲಿಂಚಿ. ಕಾಮಾಚೊ ಪಿಜಿನಾ ತೋಟಾ ವಾಚ್ಚುನು ತೋಟ ರಾಕ್ಕುನು ಬಸ್ತಾ. ಸುಮಾರ ವೇಳು ಜಾತ್ತನಾ ಪಿಜಿನಾಕ ವಾಪಾಸ ಪಾತ್ತೊಳಿ ಖಾವ್ಯಾ ಮ್ಹಣು ಆಶಾ ಜಾತ್ತಾ. ಥಂಯ ದಾಕುನು ತೊ ಘರಕಡೆ ಯೆತ್ತಾ. ಸಾತ ಜನ ಸುನ್ನಾಂಕ ಖಾಲ್ಲೆಲೆ ಚಡ ಜಾವ್ನು ಮಾರ್ನು ಘಾಲ್ಲ್ಯಾವರಿ ನೀದ ಪಳ್ಳ. ತಾಂಕಾ ತೆದುಸು ಮಾಯ್ದರ ದಾರ ಘಾಲುಂಕಯಿ ವಿಸೊರ್ನು ಘೆಲ್ಲಾ. ತಸ್ಸಿ ಜಾವ್ನು ಪಿಜಿನಾಕ ವ್ಹಾಸರಿಕ ವಚ್ಚಾಕ ಕಸ್ಸಲೆಂಯಿ ಕಷ್ಟ ಜಾಯ್ನಿ. ಸೀದಾ ವ್ಹಾಸರಿಕ ಚಮ್ಕಲೊ ಆನಿ ದಾಂಪುನು ದವರ್ಲೆಲಿ ಪಾತ್ತೊಳಿ ಖಾವ್ಚಾಕ ಬಸ್ಲೊ. ಖಾತ್ತಖಾತ್ತಚಿ ಆಸ್ಸಿಲಿ ಸಕ್ಕಡ ಖಾಲ್ಲಿ. ತೆ ಖಾಲ್ಲೆಲೆ ಪೆಟ್ಟಾಕ ತಾಕ್ಕಾ ಉಸುರು ಸೋಡುಕ ಜಾಯ್ನಾತ್ತಿಲೆ ಥಂಯಂಚಿ ತೊ ಜೀವು ಸೊಡ್ತಾ. ಸಕಾಳೀಂಚಿ ಸುನ್ನಾನಿ ಉಠಾವ್ನು ವ್ಹಾಸರಿಕ ವತ್ತನಾ ಥಂಯ ಪಿಜಿನಾ ಮೊರ್ನು ಪಳ್ಳಾ. ತೆ ಪಳವ್ನು ತಾಂಕಾ ಭಂಯ್ಯ ಸುರುಜಾಲ್ಲೆ. ಹಾಗೆಲೆ ಮಡೆ ಕಸ್ಸಲೆ ಕರಚೆ. ಮಾಂವು, ಮಾಂಯಿ ಆನಿ ಬಾಮ್ಹಣಾಂನಿ ಯೆತ್ತರಿ ತಾಂಕಾ ಹೊ ವಿಷಯು ಕಳ್ಯಾರಿ ಆಮಕಾ ಕಷ್ಟ ಜಾತ್ತಲೆ ಮ್ಹಣು ಚಿಂತುನು ಮನ ಗಟ್ಟಿ ಕರ್ನು ತೆ ಮಡೆ ತಾಂಡುನು ತಾಂಗೆಲೆ ಘರಾಚೆ ನೆಲಮಾಳಿಗೆಚೆ ಏಕ ಕುಡಾಂತು ಘಾಲ್ನು ಯೆತ್ತಾಚಿ. ಆನಿ ಕಸ್ಸಲೆಂಯಿ ಜಾಯ್ನಿ ಮ್ಹಳ್ಯಾಮಣ್ಕೆ ತಾಂಗ್ತಾಂಗೆಲೆ ಕಾಮಾಕ ವತ್ತಾಚಿ. ಮೂಡಬಿದ್ರೆಕ ಘೆಲ್ಲೆಲೆ ರಾಮು, ಸೀತಮ್ಮಾ ಆನಿ ಸಾತ ಜನ ಚೆಲ್ಲ್ಯಾಂಕ ಪಳವ್ನು ತಾಂಗೆಲಿ ಚೆಲ್ಲಿಕ ಖೂಸಿ ಜಾತ್ತಾ. ಹಾಂಕಾ ತಿ ಸೌಖ್ಯಾರಿ ಆಸ್ಸ ಮ್ಹಣು ಪಳವ್ನು ಆಶ್ಚರ್ಯ ಜಾತ್ತಾ."ಆಮ್ಮಿ ತುಗೆಲೆ ಪತ್ರ ಪಳವ್ನು ಆಯಿಲಿಂಚಿಗೊ." ಮ್ಹಣ್ತಾತಿ. "ಕಸ್ಸಲೆ ಪತ್ರ. ಹಾಂವೆ ಕಸ್ಸಲೆಂಯಿ ಪತ್ರ ಬರಯಿನಿ ನಂವೆ? ಜಾವೊ ತೆ ನೆವನಾರಿ ತುಮ್ಮಿ ಹಾಂಗಾ ಆಯಿಲ್ಯಾಂಚಿ ನಂವೆ? ಏಕ ಚಾರಿ ದಿವಸ ರಾಬ್ಬಾಚಿ." ಮ್ಹಣು ತಾಂಕಾ ರಾಬ್ಬೊವ್ನು ಘೆತ್ತಾ. ಕುಳಾರ ದಾಕುನು ಅಪ್ರುಬಾಯೇರಿ ಆಯಿಲೆ ತಿಗೆಲೆ ಘರಕಡ್ಚಾಂಕ ಮಸ್ತ ನಮೂನೆಚೆ ಖಾಣ ಏಕೆಕ ದಿವಸು ಏಕೆಕ ಕರ್ನು ಖಾವೆತಾ ಆನಿ ಗಮ್ಮತೇರಿ ಆಸ್ತಾ. ತಸ್ಸಿಂಚಿ ಥೋಡೆ ದಿವಸ ಜಾತ್ತರಿ ತಾನ್ನಿ ತಾಂಗೆಲೆ ಘರಕಡೆ ಕಲ್ಲಗುಡ್ಡಾಕ ವತ್ತಾಂಚಿ. ಜಾಲ್ಲ್ಯಾರಿ ಧುವೆಲೆ ಪತ್ರ ವಾಜ್ಜಿತನ ತಾಜ್ಜೆರಿ ಆಸ್ಸಿಲೊ ವಿಷಯ ಸತ್ಯಜಾವ್ನು ಆಸ್ಸಲ್ಯಾರಿ ಮ್ಹಳ್ಳಲೆ ಖಂಥೆರಿ ತಿಗೆಲೊ ಆನು ಸಾವುಕಾರು ರಾಮಚಂದ್ರಾಕ ಹರ್ದ್ಯಾಕ ದೂಕಿ ಸುರುಜಾಲ್ಲೆಲಿ. ತೊ ವಿಷಯು ಮಾತ್ರ ತಾಣೆ ಕೊಣಾಲಾಗ್ಗಿ ಸಾಂಗನಾಸಿ ನಿಪ್ಪೊವ್ನು ದವರ್ಲಲೊ. ಧುವೆಂತಯಿ ತಿತ್ಲೆ ದಿವಸ ರಾಬ್ಬುನು, ತಿ ಸೌಖ್ಯಾರಿ ಆಸ್ಸಿಲೆ ಪಳವ್ನುಂಯಿ ತಾಗೆಲಿ ಖಂಥಿ ಆನಿ ಹರ್ದ್ಯಾಚಿ ದೂಕಿ ಉಣೆ ಜಾಯ್ನಿ. ಮೂಡಬಿದ್ರೆಕ ದಾಕುನು ಯೆತ್ತನಾ ವಾಟೆರಿ ತೊ ದೂಕಿ ಚಡ ಜಾವ್ನು ಮರ್ತಾ. ತಾಂಗೆಲೆ ದುಃಖ ಕೊಣಾಂಕ ಸಾಂಗ್ಚೆ. ಸಕ್ಕಡ ಘರಕಡೆ ವತ್ತಾತಿ . ಸಾವುಕಾರಾಲೆ ಕರ್ಮತ್ರ ಸಕ್ಕಡ ಜಾತ್ತಾ. ಬಾಮ್ಹಣಾನ ಮರ್ತರಿ ಬಾಯಲೆನ ಸ್ವಲ್ಪ ದಿವಸ ಕಾಳ್ಕಾಚೆ ಕೂಡಾಂತು ಕೊಣಾಂಕಯಿ ತೊಂಡ ದಾಕ್ಕವ್ಚಾಕ ನಜ್ಜ ಮ್ಹಣು ರಿವಾಜ. ತಸ್ಸಿ ಜಾವ್ನು ಚೆರ್ಡುಂವ ದುಃಖಾಚಿ ಆವ್ಸುಕ ಕೂಡಾಂತು ಬಸೈತಾಂಚಿ ಆನಿ ತಾಂಗೆಲೆ ಬಾಯಲಾಂಕ ತೀಣೆ ಆಸ್ಸುಚೆ ಕಡೆನಂಚಿ ಖಾಣ ಜವಣ ಹೊರ್ನು ದಿವ್ಕಾ ಮ್ಹಣು ಸಾಂಗ್ತಾಚಿ ಆನಿ ತಾಂಗ್ತಾಂಗೆಲೆ ಕಾಮಾಂಕ ವತ್ತಾಚಿ. ಮಾಂಯಿಕ ಬಸ್ಸಿಲೆ ಕಡೆನ ಭಯಂಕರ ಘಾಣಿ ಯೆತ್ತಾ. ಭಾರ ಆಯಲ್ಯಾರಿ ಕೊಣಂಯಿ ಪಳಯಿಲ್ಯಾರಿ? ಮ್ಹಣು ಭಂಯ್ಯ-ಪಳೆ ಬಾಮ್ಮುಣು ಮೆಲ್ಲಾ- ಆತ್ತಂಚಿ ಭಾರ ಆಯ್ಲಾ ಪಳೆ-ಮ್ಹಳ್ಯಾರಿ? ನಾಂಕಾಕ ದರ್ನು ಬಸ್ತಾ. ತಿಗೆಲೆ ದಿಕ್ಕಡೆ ಪೂತ ಜಾವೊ ಸುನ್ನ ಜಾವೊ ಯೆನಾಚಿ. ಪೂತ ಲೆಕ್ತಾಂಚಿ ದುಃಖರ್ಸಲೆಲಿ ಆಮ್ಮಾಕ ಆಮ್ಮಿ ವಚ್ಚುನು ಬಾಧಾ ದಿವ್ಚೆ ಕಸ್ಸಲ್ಯಾಕ. ಆಮ್ಮಿ ಘೆಲ್ಲ್ಯಾರಿ ತಿಕ್ಕಾ ಆನ್ನಾಲೊ ಉಗಡಾಸು ಯೆವ್ನು ರಡ್ತಲಿ. ತೆ ಆಮ್ಕಾ ಪಳವ್ಚಾಕ ಜಾಯ್ನಾ. ತಿಗೆಲೆ ದುಃಖ ಥೋಡೆ ದಿಸಾನಿ ಉಣೆ ಜಾತ್ತಲೆ. ಮಾಗ್ಗಿರಿ ವಚ್ಚುನು ತಿಗೆಲಾಗ್ಗಿ ಉಲ್ಲವ್ಯಾ ಮ್ಹಣು ಲೆಕ್ತಾಂಚಿ. ಪ್ರತೀ ಏಕ ಪುತ್ತಾನೀ ಜೆವ್ತನಾ ತಾಂಗೆಲೆ ಬಾಯಾಂಲಾ ಲಾಗ್ಗಿ ನಿಮ್ಗೂಕ ಆಸ್ಸ. "ವೈಗೊ, ಆಮ್ಮಾಕ ವಾಳ್ಳಾ ನಂವೆಂ?" ಮ್ಹಣು. "ವಯಬಾ-ನಾಕ್ಕ ನಾಕ್ಕ ಮ್ಹಳ್ಯಾರೀ ಆಮ್ಮಿ ದಿತ್ತಾಂಚಿ."ಮ್ಹಣು ತಾಂಗೆಲೆ ಬಾಯಲಾನಿ ಸಾಂಗ್ಚೆ. ಕೆದನಾಯಿ ಪುತ್ತಾನಿ ಜವ್ಣಾಂಕ ಬಸ್ತನಾ - ಧಾಕ್ಲೆ ಸುನ್ನೆನ ಮಾಂಯ್ಚೆ ಲಾಗ್ಗಿ ವಚ್ಚುನು "ತುಮ್ಕಾ ಫೂಲ ಕುಂಕುಮ ಜಾಯ್ವೆ? ಜಾಯ್ವೆ?" ಮ್ಹಣ್ಚೆ. ತಾಕ್ಕಾ ಮಾಂಯಿ "ನಾಕ್ಕಾ ನಾಕ್ಕಾ" ಮ್ಹಣ್ಚೆ. ಬಾಯರ ಜವಣಾಂಕ ಬಸ್ಸಿಲೆ ಪುತ್ತಾಂಕ ಜಾಯ್ವೆ, ಜಾಯ್ವೆ ಮ್ಹಳ್ಳಲೆ ಆನಿ ನಾಕ್ಕಾ ನಾಕ್ಕಾ ಮ್ಹಳ್ಳಲೆ ಮಾತ್ರ ಆಯ್ಕ ಪಡ್ಚೆ. ಸುನ್ನೊ ಮಾಯ್ಯೆಂಕ ನಾಕ್ಕಾ ನಾಕ್ಕಾ ಮ್ಹಣ್ಚೆತಾಯಿ ವಾಡ್ತಾತಿ ಮ್ಹಣು ಲೆಕ್ತಾತಿ. ಅಶೀ ಸ್ವಲ್ಪ ಕಾಳಾ ನಂತರ ಏಕ ಪುತ್ತಾಕ ಆಮ್ಮಾಕ ಪಳವ್ಕಾ ಮ್ಹಣು ದಿಸ್ತಾ. ಆವ್ಸುಲೆ ಕೂಡಾಂತು ವತ್ತಾ. ಥಂಯಿ ಘಾಣಿನ ನಾಂಕ ಸೊಡುಕ ಜಾಯ್ನಾ. ಆಮ್ಮಾ ದಿಸ್ಸನಾ. "ಆಮ್ಮಾ" ಮ್ಹಣು ಘಟ್ಟಿ ಆಪ್ಪಯಿತಾ. ತಿಕ್ಕಾ ನಿತ್ರಾಣೆನ "ಓ" ಮ್ಹಣುಕಂಯಿ ಜಾಯ್ನಾ. ತೀ ಪುತ್ತಾಲಾಗ್ಗಿ ಖಾವ್ಚಾಕ ದೀ ಮ್ಹಣು ಸನ್ನೇರಿ ಸಾಂಗ್ತಾ. ಪೂತು ಧಾವ್ನು ಏವ್ನು ಶೀತ, ರಾಂದಯಿ ಘೆವ್ನು ವತ್ತಾ ಆನಿ ಆಮ್ಮಾಕ ಜೆವೆತಾ. ತಿಕ್ಕಾ ಪೊಟ್ಟಾಕ ಭೂಕ ಆಸ್ಸ ಜಾಲ್ಲ್ಯಾರಿ ಗೀಳೂಥಾಂಯಿ ಶಕ್ತಿ ನಾ. ತೊ ಸಕ್ಕಡಾಂಕ ಆಪ್ಪಯಿತಾ ಆನಿ ಜೋರು ಕರ್ತಾ. ಸ ಜನ ಸುನ್ನೊ ಭಿತ್ತಾಂಚಿ. ಜಾಲ್ಲ್ಯಾರಿ ಧಾಕ್ಲಿ ಸುನ ಆಸ್ಸ ಪಳೆ ತಿ ಮಾತ್ರ ಭಿನಾ. "ತುಮ್ಮಿ ಸಾತ ಜನಂಯಿ ಬಯಸಾಚಿ. ತುಮಕಾ ಸತ್ಯ ಕಸ್ಸಲೆ ಮ್ಹಣು ಹಾಂವ ಸಾಂಗ್ತಾ" ಮ್ಹಣಾಲಿ. ಸಾತ ಜನ ಪೂತ ಆನಿ ಸ ಜನಾಂಲೆ ಬಾಯಂಲ ಬಸ್ಲಿಂಚಿ. ಸಾನ್ನಾಲಿ ಬಾಯಲ ತಾಂಕಾ "ಆಮ್ಮಿ ಸಾತ ಜನ ಸುನ್ನೊಯಿ ಗತಿ ನಾತ್ತಿಲೆ ಹಾಂಗಾ ಆಯಿಲೆ ನ್ಹಂಯಿ. ತುಮಗೆಲೆ ಆಮ್ಮಾನ ಏಕ ದೀಸು ಪುಣಿಂ ಆಮಕಾ ಸಮಚಿ ವಾಳ್ಳೆಲೆ ಆಸ್ಸಂವೆ? ತಾಜ್ವೆಯಿರಿ ಕಾಮ ಕರ್ನು ಮೊರ್ಕಾ. ತೇ ಖಾತೀರಚಿ ಹಾಂವೆಂಚಿ ಧುವ್ವೆಲೆ ನಾಂವಾರಿ ಪತ್ರ ಬರವ್ನು ತುಮ್ಮಿ ಸಕ್ಕಡ ವಚ್ಚೆ ತಶಿ ಕೆಲ್ಲೆ. ಆಮಕಾ ಪೊಟ್ಟಾಕ ಘಾಲ್ನಾಸ್ಸಿ ಘರಾಚೆ, ಗಾದ್ದ್ಯಾಚೆ, ತೋಟಾಚೆ ಮಾತ್ರ ನ್ಹಂಯಿ ಗುಡ್ಡ್ಯಾರಿ ವಚ್ಚುನು ಕಾಜ್ಜುಚಿ ಬೀ ಸಮೇತ ವೆಂಚುನು ಹಾಡ್ಕಾ. ಜಾಲ್ಲ್ಯಾರಿ ಆಮ್ಮಿ ಕಸಲೆಂಯಿ ತುಮಗೆಲೆ ಲಾಗ್ಗಿ ಸಾಂಗ್ಲ್ಯಾರಿ ತುಮ್ಮಿ ಆಮ್ಮಾನ ಕೆಲ್ಲೆಲೆ ಸಮ್ಮ ಮ್ಹಣು ಆಮಕಾಚಿ ಭಿಷ್ಟಾಚೆ ನಂವೆ?" ಮ್ಹಣು ಸಾಂಗುನು ತಾನ್ನಿ ಮೂಡಬಿದ್ರೆಕ ವತ್ತರಿ ತಾನ್ನಿ ಪಣಸಾಚಿ ಪಾತ್ತೊಳಿ ಕರ್ನು ಖೆಲ್ಲೆಲಿ ಆನಿ ಪಿಜಿನಾನ ಮೆಲ್ಲೆಲೆ ವಿಷಯು ಸಾಂಗ್ತಾಚಿ. "ಪಾಪ ಪಿಜಿನಾ ಖಾವ್ಚೆ ಆಶೇನ ಚಡ ಖಾವ್ನು ಮೆಲ್ಲೊ. ಆಮ್ಮಿ ಕಸ್ಸಲೆ ಕರ್ಚೆ? ತಾಕಾ ನೆಲ ಮಾಳ್ಯಾಂತು ಘಾಲ್ಲಾ. ಆಮ್ಮಾನ ಆಸ್ಸುಚೆ ಕೂಡಾಂತು ಯೆವ್ಚಿ ಘಾಣಿ ತೀಂಚಿ. ಆಮಕಾ ಸಮಚಿ ಪೊಟ್ಟಾಕ ಕಸ್ಸಲ್ಯಾಕ ಘಾಲ್ನಿ ತಾಜ್ಜೆ ಕಾತೀರ ಆಮ್ಮಿ ಆತ್ತ ತಿಕ್ಕಾ ದಿಂವ್ಚಾನಾ. ಹಾಂವೆ ಕೆಲ್ಲೆಲಿ ಚೂಕಿ ಜಾಲ್ಲಿ ಮ್ಹಣು ತೀಣೆ ಸಾಂಗ್ಲ್ಯಾರಿ ಮಾತ್ರ ಆಮ್ಮಿ ತಿಕ್ಕಾ ಖಾಣ-ಜವಣ ದಿವ್ಚೆ." ಮ್ಹಣಾಲಿ. ತೆ ಆಯ್ಕುನು ಸೀತಮ್ಮಾಕ ತೀಣೆ ಕೆಲ್ಲೆಲಿ ಚೂಕಿ ಮನಾಂಕ ಘೆಲ್ಲಿ. ಪಾಪ ದುಸ್ರಾಲೆ ಚೆರ್ಡುವಾಂಕ ಆಮಗೆಲೆ ಘರಕಡೆ ಹಾಣು ತಾಂಕಾ ಪೊಟ್ಟಾಕ ಸಮಽಚೀ ಘಾಲ್ನಿ ಜಾಲ್ಲ್ಯಾರಿ ತಾನ್ನಿ ಕೊಣಾಲಾಗ್ಗಿ ಸಾಂಗ್ಚೆ. ಪೊಟ ಭರಿ ಕಂಯಿ ಖಾವ್ಚೆ. ತೆ ಕಾತೀರ ತಾನ್ನಿ ಮಾಕ್ಕಾ ಪೊಟ್ಟಾಕ ಸಮಚಿ ದಿನಾ ನಾಸ್ಸಿ ತೆ ಕಷ್ಟ ಮಾಕಾಯಿ ಕಳ್ಚೆ ತಸ್ಸಿ ಕೆಲ್ಲೆ ಮ್ಹಣು ಪಶ್ಚಾತಾಪ ಪಾವ್ತಾ ಆನಿ ತಾಂಗೆಲಾಗ್ಗಿ ಚೂಕಿ ಜಾಲ್ಲಿ ಮ್ಹಣು ಸಾಂಗುನು ರಡ್ತಾ. ತೆದನಾ ಸಾತ ಜನ ಸುನ್ನಾಕಂಯಿ ತಿಗೆಲೆ ವ್ಹಯರಿ ಪಾಪಪುಣ್ಯ ದಿಸ್ಸುನು ತಿಕ್ಕಾ ಚಂದ ಕರ್ನು ಥಂಯ ದಾಕುನು ವ್ಹಯರಿ ಹಾಣು ನಾಣೊನು, ಪೊಟಭರಿ ಖಾಣ-ಜವಣ ದೀವ್ನು ನಂತರ ತಿಕ್ಕಾ ಚಂದ ವಾರೆ ಉಜ್ವಾಡು ಆಸ್ಸಿಲೆ ಕೂಡಾಂತು ನಿದಾನು ತಿಗೆಲಿ ಚಾಕ್ರಿ ಕರ್ತಾಚಿ. ಮಾಗ್ಗಿರಿ ತಿಕ್ಕಾ ತೆ ಸಾತ ಜನ ಸುನ್ನೊಂಯಿ ಚಂದ ಕರ್ನು ಮೋರಥಾಂಯಿ ಪಳವ್ನು ಸುಖಾರೀ ಆಸ್ಸಿಲಿಂಚಿ.--------೦೦೦೦೦೦೦-------ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.