ಮಾದ್ದು ಆನಿ ತಾಗೆಲಿ ಬಾಯಲ ಒಟ್ಟುಚಿ ಪಿಕ್ನಿಕಾಕ ರಾನ್ನಾಕ ಗೆಲ್ಲೆಲೊ ಆನಿ ತಂಯಿ ಜಾಲ್ಲೆಲೆ ಘಟನಾ ದಾಮ್ಮು ಬಾಯಲ ಘರಕಡೆ ವತ್ತರಿ ತಿಗೆಲೆ ಭ್ಹಾಂಮ್ಣಾಲಾಗ್ಗಿ ಸಾಂಗ್ತಾ. "ಆಮ್ಮಿಯಿ ಪಾಯಿಚೀ ರಾನ್ನಾಕ ಪಿಕ್ನಿಕಾಕ ವಚ್ಚಾ. ಜಾವ್ಕಾಜಾಲ್ಲೆಲೆ ಖಾಣ ಸಕ್ಕಡ ಹಾಂವ ಆಂಗಡಿ ದಾಕುನು ಹಾಡೊನು ದವರ್ಲಾ. ತಂಯಿ ಕೊರ್ಚೆ ವಿಷಯು ಸಕ್ಕಡ ಹಾಂವಂಚಿ ಪಳಯಿತಾ. ತುಮ್ಮಿ ನುತಚಿ ಮೆಗೆಲೆ ಒಟ್ಟು ಆಸ್ಲ್ಯಾರಿ ಮಾತ್ರ ಪುರೊ" ಮ್ಹಣಾಲಿ.
ಹೆರ್ದಿವಸು ಸಕಾಣಿ ೧೦ ಗಂಟ್ಯಾಕ ದಾಮ್ಮು ಆನಿ ತಾಗೆಲಿ ಬಾಯಲ ಕೊರ್ನು ರಾನ್ನಾಕ ವತ್ತಾಚಿ. ತಂಯಿ ವತ್ತರಿ ಬಾಂಯಿ ಪಳಯಿತರಿ ದಾಮ್ಮುಲಿ ಬಾಯಲ ಬಾಂಯ್ಚೆ ಲಾಗ್ಗಿ ರಾಬ್ಬುನು ದಾಮ್ಮುಕಯಿ ಆಪ್ಪಯಿತಾ. ತಂಯಿ ದೊಗ್ಗಂಯಿ ಬೈಸುನು ಹಾಳ್ಳೆಲೆ ಖಾಣ ಖಾವ್ನು ಬಾಂಯ್ತು ದಾಕ್ಕುನು ಉದ್ದಾಕ ಕಾಣು ಪಿತ್ತಾಚಿ.
ನಂತರ ದಾಮ್ಮುಲಿ ಬಾಯಲ ದಾಮ್ಮುಲಾಗ್ಗಿ ಸಾಂಗ್ತಾ "ಆತ್ತ ತುಮ್ಮಿ ಮಾಕ್ಕಾ ಬಾಂಯ್ತು ಲೊಕೊವ್ನು ಗಾಲ್ಕಾ. ನಂತರ ರಡ್ಕಾ. ತೊ ಮ್ಹಂತಾರೊ ಕೀ ದೇವು ಕೀ ಯೆತ್ತರಿ ಉಲ್ಲವಚೆ ಪುರಾ ಹಾಂವಂಚಿ ಬಾಂಯ್ತು ದಾಕುನು ಕರ್ತಾ." ದಾಮ್ಮು ಮ್ಹಣಾಲೊ "ವೈಗೊ, ಆತ್ತ ಹಾಂವೆ ತುಕ್ಕಾ ಬಾಂಯ್ತು ಲೊಕೊವ್ನು ಗಾಲ್ಚೆ ಸುಲಭ. ತು ಬಾಂಯ್ತು ಪಡತರಿ ತಾಂತು ಉದ್ದಾಕ ಮಸ್ತ ಆಸ್ಸುನು ತಾಂತು ತುವೆ ಬುಡ್ಡುನು ಮೆಲ್ಯಾರಿ ಆನಿ ತೊ ಮ್ಹಾಂತಾರೊ ಕೀ ದೇವು ಕೀ ಯೆನಾ ಜಾಲ್ಲ್ಯಾರಿ ಬಾರಿ ಕಷ್ಟಾರಿ ಪಡ್ಸಿ. ಹಾಂವೆ ಸಾಂಗಿಲೆ ಆಯ್ಕ. ಆಮ್ಮಿ ನುತಂಚಿ ಘರಕಡೆ ವಚ್ಚಾ. ಆತ್ತ ತುಕ್ಕಾ ಬಾಂಯ್ತು ಲೊಕೊವ್ನು ಗಾಲ್ತರಿ ದೇವಾನ ಯೆವ್ನು ಕಸ್ಸಲೆ ಜಾವ್ಚಾಕ ಆಸ್ಸ."
"ಮಾದ್ದ ಬಾಯಲೆನ ಬಾಂಯ್ತು ಪಡ್ತರಿ ದೇವಾನ ಯೆವ್ನು ಬಾಂಯ್ತು ದಾಕುನು ಹೇಮಾಮಾಲಿನಿಕ ಹಾಳ್ಳೆಲೆ ಕಂಯಿ. ತಾಣೆ ಪಿಸ್ಸಾನ ತಿಚೀ ತಾಗೆಲಿ ಬಾಯಲ ಮ್ಹೊಣು ಪಟ್ಟಿ ಸಾಂಗ್ಲೆ ಕಂಯಿ. ನ್ಹಂಯಿ ಮ್ಹಳ್ಳೆಲೆ ಜಾಲ್ಲ್ಯಾರಿ ವಪಾಸ ತೊ ರೇಖಾಕ, ಮಾಧುರಿಕ, ಐಶಾಕ ಹಾಣು ಕಡೇರಿ ತಾಗೆಲೀಚಿ ಬಾಯಲೆಕ ಹಾಡ್ತರಿ ತೀಚೀ ತಾಗೆಲಿ ಬಾಯಲ ಮ್ಹಳ್ಯಾರಿ ಕೊಡಲಿ ದಿಲ್ಲ್ಯಾವರಿ ತಾಂಕಾ ಸಕ್ಕಡಾಂಕ ಘರಕಡೆ ವ್ಹರ ಮ್ಹಳ್ಯಾರಿ ಮ್ಹೊಣು ತಾಣೆ ಪಟ್ಟಿ ಸಾಂಗಿಲೆ ಮ್ಹೊಣು ದೇವಾಲಾಗ್ಗಿ ಸಾಂಗ್ತರಿ ದೇವಾನ ತಾಗೆಲಿ ಬಾಯಲೆಕ ಮಾತ್ರ ಹಾಣು ದಿಲ್ಲೆಲೆ ಕಂಯಿ. ತುಮ್ಮಿ ಸಾಂಗ್ಚೆಂಯಿ ಸಮ್ಮ. ತಸ್ಸಿ ಜಾಲ್ಯಾರಿ ಹಾಂವ ಬಾಂಯ್ತು ಪಣಾ. ಹಾಂಗಾಚಿ ಮಾಗ್ಸಿ ನಿಪ್ಪೊವ್ನು ಬಸ್ತಾ. ತುಮ್ಮಿ ರಡಾ. ತಾಣೆ ಯೆತ್ತರಿ ಹಾಂವ ಹಾಂಗಾ ದಾಕುನು ತುಮ್ಮಿ ಉಲ್ಲಯ್ಲ್ಯಾವರಿ ಉಲ್ಲಯಿತಾ" ಮ್ಹಣಾಲಿ.
"ಕಸ್ಸಲೆ ಉಲ್ಲಯಿತಾ ಮ್ಹೊಣು ಸುರುವೆಕ ಮಾಕ್ಕಾ ಸಾಂಗ. ತುವೆ ಸಾಂಗನಾ ಜಾಲ್ಯಾರಿ ಹಾಂವ ತುಕ್ಕಾ ಹಾಂಗಾಚಿ ಸೊಣು ಸೀದಾ ಘರಕಡೆ ವತ್ತಾ." ಮ್ಹಣಾಲೊ.
"ತೊ ಯೆತ್ತರಿ ತುಮ್ಮಿ ಹಾಂವ ಬಾಂಯ್ತು ಪಳ್ಳಾ ಮ್ಹಣ್ತರಿ ತೊ ಬಾಂಯ್ತು ಉಡ್ಡುವುನು ಹೇಮಾಮಾಲಿನಿಕ ಹಾಡ್ತಾ ಆನಿ ಘೆ ತುಗೆಲಿ ಬಾಯಲ ಮ್ಹಣ್ತಾ. ತೆದನಾ ತುಮ್ಮಿ ತಿ ಮೆಗೆಲಿ ಬಾಯಲ ನ್ಹಂಯಿ ಮ್ಹೊಣ್ಕಾ. ನಂತರ ತೊ ಏಕಕ್ಲಾಂಕಚಿ- ರೇಖಾ, ಮಾಧುರಿ, ಐಶಾ-ಹಾಂಕಾ ಹಾಡ್ತಾ. ತಾನ್ನಿಯಿ ನ್ಹಂಯಿ ಮ್ಹೊಣ್ಕಾ, ನಂತರ ಮಾಕ್ಕಾ ಹಾಡ್ತಾ. ತೆದನಾ ತುಮ್ಮಿ ಹೀಚೀ ಮೆಗೆಲಿ ಬಾಯಲ ಮ್ಹೊಣು ಸತ್ಯ ಸಾಂಗ್ಲ್ಯಾರಿ ತೊ ತುಮ್ಮಿ ಸತ್ಯ ಸಾಂಗಿಲ್ಯಾಕ ತುಮ್ಕಾ ಹೇಮಾಮಾಲಿನಿ, ರೇಖಾ, ಮಾಧುರಿ, ಐಶಾ ಆನಿ ಮಾಕ್ಕಾಯಿ ದಿವ್ನು ಘರಕಡೆ ವಸ ಮ್ಹಣ್ತಾ. ತಿತ್ಲೆ ಜನ ಮ್ಹಳ್ತರಿ ಮಾಕ್ಕಾ ಘರಾಚೆ ಕಾಂಯಿ ಕಾಮ ಕೊರುಕಾ ಮ್ಹೊಣು ನಾ ನಂವೆ? ಹಾಂವೆ ನುತಂಚಿ ಬೈಸುನು ಖಾವೆತ ನಂವೆ? ತಾಂಗೆಲೆ ಕರೆನ ಕಾಮ ಕೊರೊನು, ತಾನಿ ಕೆಲ್ಲೆಲೆ ಕಾಮಾಂತು ಚುಕಿ ದೊರ್ನು ರಾಣಿಸಿ ಜೀವನ ಕೊರೆತ ನಂವೆ? ಕಸ್ಸಿ ಮೆಗೆಲಿ ಆಲೋಚನಾ." ಮ್ಹಣಾಲಿ.
ದಾಮ್ಮುಕ ಕಂಯಿ ನಾತ್ತಿಲೊ ಕೊಪು ಆಯಿಲೊ, ಆನಿ ತಂಯಿಚಿ ಆಸ್ಸಿಲೆ ರುಕ್ಕಾಚೆ ಏಕ ಅಡರ ಕಾಣು ರಪ್ರಪಿಚಿ ಬಾಯಲೆಕ ಮಾರ್ತಾ ಆನಿ ಘರಕಡೆ ತಾಂಡುವ್ನು ಗೆವ್ನು ಯೆತ್ತಾ. ಘರಕಡೆ ಯೆತ್ತರಿ ದಾಮ್ಮು ಬಾಯಲೆಕ ಪುಳ್ಳೆ ಪಟಿ ದೇವಾನ ಸಾಂಗಿಲೊ ವಿಷಯು ಸಾಂಗ್ತಾ ಕಸ್ಸಲೆ ಮ್ಹಳ್ಯಾರಿ-"ತೊ ಮ್ಹಂತಾರೊ ಬಾಂಯ್ತು ಉಡ್ಡುನು ಲೊಕಂಡಾಚಿ ಕೊಡಲಿ ಹಾಣು "ಘೆ ದಾಮ್ಮು, ತುಗೆಲಿ ಕೊಡಲಿ" ಮ್ಹಣ್ತಾ.
ತೆದನಾ ಹಾಂವ "ಕಸ್ಸಲೆ ತು. ತಂಯಿ ಹಿ ಏಕ್ಕಿಚೀ ಆಸ್ಸಿಲಿವೆ? ಆನಿ ದುಸ್ರಿ ಕೊಡಲಿ ನಾಂಚಿವೆ?" ಮ್ಹಳ್ಳೆ. ಮ್ಹಂತಾರೊ "ದಾಮ್ಮು, ತಂಯಿ ಆನಿಕಯಿ ದೊನಿ ಕೊಡಲಿ ಆಸ್ಸಚಿ. ಏಕಿ ಬಾಂಗ್ರಾಚಿ ಆನೇಕಿ ರುಪ್ಪ್ಯಾಚಿ. ತೆದುಸು ಮಾದ್ದುಕ ಕೊಡಲಿ ಕಾಣು ದಿಲ್ಲಲೊ ಹಾಂವಂಚಿ. ತೊ ಸತ್ಯ ಸಾಂಗ್ತಲೊ ಮ್ಹೊಣು ಹಾಂವ ಆಯ್ಕಲಲೊ ಮಾತ್ರ. ತೆದುಸು ತಾಗೆಲಿ ಪರೀಕ್ಷಾ ಕೆಲ್ಲೆಲಿ ಹಾಂವೆ. ನಿಜ್ಜಾವುನು ತೊ ಏಕು ಸತ್ಯವಾನು. ತಸ್ಸಿ ಜಾವ್ನು ತಾಕ್ಕಾ ಹಾಂವೆ ತಿನ್ನಿ ಕೊಡಲಿ ದಿಲ್ಲಿ ಆನಿ ತಾಗೆಲೆ ಕಷ್ಟ ದೂರ ಕೆಲ್ಲೆ. ತುಕ್ಕಾ ಸಾಂಗ್ಚೆ ತಿತ್ಲೆ ಕಷ್ಟ ನಾ. ಜಾಲ್ಯಾರಿ ತುಗೆಲೆ ಬಾಯಲೆನ ಸಾಂಗಿಲ್ಯಾಕ ತು ರಾಕ್ಕುಡ ಕಾತ್ತರ್ಚೆ ನೆವಾನ ಕೊರ್ನು ಯೆವ್ನು ಜಾವ್ಕಾ ಮ್ಹೊಣು ಕೊಡಲಿ ಬಾಂಯ್ತು ಗಾಲ್ಲೆಲಿ. ನಂವೆ? ಜಾವ್ಕಾ ಜಾಲ್ಯಾರಿ ಹಿ ಕೊಡಲಿ ಗೆವ್ನು ವಸ. ಆನಿ ತುಗೆಲೆ ಬಾಯಲೆಕ ಹಾಂಗಾ ಜಾಲ್ಲೆಲೆ ವಿಷಯು ತಿಳ್ಸಿ. ಆನಿ ಪುಣಿ ತಿಕ್ಕಾ ಚಾಂಗ ಬುದ್ದಿ ಯೆವೊ" ಮ್ಹೊಣು ದೇವು ಕೊಡಲಿ ತಂಯಿ ದವರ್ತಾ ಆನಿ ಮಾಯಕ್ ಜಾತ್ತಾ.
ನಂತರ ಹಾಂವೆ ತಿ ಏಕ್ಕಿ ಕೊಡಲಿ ಗೆವ್ನು ಆಯ್ಯಿಲೊ ವಿಷಯು ತುಕ್ಕಾ ಗೊತ್ತಸ್ಸ. ದೇವಾನ ಸಾಂಗಿಲೊ ವಿಷಯು ಸಾಂಗುಕ ತುವೆ ಮಾಕ್ಕಾ ಕಂಯಿ ಸೊಳ್ಳಾ. ತಸ್ಸಿ ಜಾವ್ನು ಆತ್ತ ಸಾಂಕಾ ಪಳ್ಳೆ. ಆನಿ ಮುಖಾರಿ ದುಸ್ರಾಲೆ ವಿಷಯಾಂತು ಜಾಳ ಬೊಗ್ಗುನು ಬೈಸುನಾಕ್ಕಾ. ಆಮ್ಕಾ ಕಸ್ಸಲ್ಯಾಕ ಉಣೆ ಆಸ್ಸ. ಜಾವ್ಕಾ ಜಾಲ್ಯಾರಿ ಘರಾಚೆ ಕಾಮಾಕ ಚೆಡ್ವಾಕ ರಾಬ್ಬೊಯಾ ಆನಿ ತು ಸುಖಾರಿ ರಾಣಿಸಿ ಬೈಸುನು ಅಧಿಕಾರು ಚಲಾಯ್ಸಿ." ಮ್ಹೊಣು ದಾಮ್ಮುನ ಬಾಯಲೆಕ ಸಾಂಗ್ಲೆ.
ನಂತರ ತಿ ದುಸ್ರ್ಯಾಲೆ ವಿಷಯಾಂತು ಜಾಳ ಬೊಗ್ಗನಾಸ್ಸಿ ತಾನ್ನಿ ಸುಖಾರಿ ಆಸ್ಸಿಲಿಂಚಿ.
ಹೆ ಕಾಣಿಂತು `ದುಸ್ರ್ಯಾಲೆ ವಿಷಯಾಂತು ಜಾಳ ಪಾವ್ಲ್ಯಾರಿ ಆಸ್ಸಿಲೆ ಸುಖ ಬೊಗ್ಗುಕ ಜಾಯ್ನಾ' ಮ್ಹೊಣು ಸಮ್ಜುವೆತ.
ಮಾದ್ದಾನ ಹೇಮಾಮಾಲಿನಿಕ ಬಾಯಿಲ ಮ್ಹಳ್ಳಲಿ ಕಾಂಣಿ ಹಾಂವೆ ಸಾನ್ನ ಚೆರ್ಡುಂವಾಂಕ ಸಾಂಗ್ತನಾ ಏಕ್ ಚೆಲ್ಲ್ಯಾನ ಮ್ಹಳ್ಳೆ ಲೆ ಉತ್ರ ಘಾಲ್ನು ಹಿ ಕಾಂಣಿ ಕೆಲ್ಲೆಲಿ.
---೦೦----
0 ಕಾಮೆಂಟ್(ಗಳು):
Post a Comment