ಬಂಟ್ವಾಳ ಪಾಣೆಮಂಗಳೂರಾ ಲಾಗ್ಗಿ ಆಸುಚೆ ಏಕಿ ಸಾನಿ ಹಳ್ಳಿ ಮೊಗರ್ನಾಡ್. ತಂಯಿ ಕೊಡಿಯಾಲ ತೇರಾಚೆ ಒಕ್ಕುಳೆ ಹೆರ್ದಿಸು ತೇರು. ಸುಮಾರು ವರ್ಸ ಪುಡೆ ಆಮ್ಮಿ ಸಾನ ಆಸ್ತನಾ ತೆ ತೇರಾಕ ಬಂಟ್ವಾಳ ದಾಕುನು ಚಮಕುನು ಸಾಕಾಣಿಚಿ ಯೆವ್ಚೆ. ಆಯಿಲೆ ಕೂಡ್ಲೆ ಪೆಜ್ಜೆ ಜವಣ ಆಸ್ಸಿಲೆ. ತೆ ಜವಣ ಜಾತ್ತರಿ ಸಂಜ್ವಳಾ ತಾಂಯಿ ಪೊಟ್ಟಾಕ ಕಾಂಯಿ ನಾ.
ರಥಾರಣ ಜಾತ್ತನಾ ೫-೬ ಗಂಟೆ ಜಾತ್ತಲೆ, ನಂತರ ಜವಣ. ತೆ ಜವಣಾಂಕ ಬಾರಿ ರುಚಿ ಆಸ್ಸಿಲಿ. ಸಾಕಾಣಿ ದಾಕುನು ಪೊಟ್ಟಾಕ ಕಾಂಯಿ ನಾ ಜಾಲ್ಲೆಲೆ ನಿಮಿತಿ ತಿತ್ಲಿ ರುಚಿ ದಿಸ್ತಲಿ ಮ್ಹೊಣು ಆತ್ತ ದಿಸ್ತಾ. ಜಾಲ್ಯಾರಿ ಆತ್ತಂಯಿ ತಂಚೆ ಜವಣಾಂಕ ರುಚಿ ಆಸ್ಸ.
ಆಮ್ಗೆಲೆ ಆಮ್ಮಾಲೆ ಆನಿ ಆನ್ನಾಲೆ ಕಾಲಾರಿ ತೆ ತೇರಾಕ ವಚ್ಚುಕಾ ಜಾಲ್ಲಾರಿ ಮಸ್ತ ಕಷ್ಟ ಆಸ್ಸಿಲೆ ಕಂಯಿ. ತೆದನಾ ಪಾಣೆಮಂಗಳೂರು ಸಾಂಕವು ಜಾಯ್ನಿ ಕಂಯಿ. ನ್ಹಂಯಿ ದಾಂಟ್ವವ್ನು ಉಚ್ಚುವುಕಾ. ತೆ ತೇರಾಕ ಕಂಚ್ಕಂಚೆ ಗಾಂವಾಂತು ದಾಕುನು ಸಾಂತ ಯೆತ್ತಲಿ ಕಂಯಿ.
ಮೊಗರ್ನಾಡ್ಚೆ ತೇರಾ ಖಾತಿರಿ ಮಸ್ತ ಬಣ್ಣ್ಬಣ್ಣಾಚಿ ಟೋಪ್ಪ್ಯೊ ಕೊರ್ನು ಹಾಣು ವಿಕ್ತಲೊ ಶಾಮಣ್ಣಾ ಮ್ಹಳ್ಳಲೊ ಏಕ್ಲೊ ಆಮ್ಮೆಂಬಳಾ ದಾಕುನು ದೊನಿ ದಿವಸ ಪುಡೆಚಿ ಬಾಯ್ಸೊರ್ನು ಯೆತ್ತಲೊ ಕಂಯಿ. ಅಮ್ಮೆಂಬಳ ಮ್ಹಳ್ಯಾರಿ ಪಾಣೆಮಂಗಳೂರು-ಸಜಿಪ-ಕುರ್ನಾಡ-ಮುಡಿಪು ವಾಟ್ಟೆರಿ ಮ್ಹೆಳ್ತಾ. ವಾಂವಂಟ ಆಯಲ್ಯಾರಿ ಕಂಚೆ ರುಕ್ಕಾಚೆ ಮುಳಾಕ ಏಕಿ ಸಾನಿ ನೀದ ಕಾಣು ವಾಪಾಸ್ ಮೊಗರ್ನಾಡಾ ದಿಕ್ಕಾಕ ವುಚ್ಚೆ ಕಂಯಿ.
ತಸ್ಸಿಂಚಿ ಏಕ ವರ್ಸ ತೇರಾಕ ಮ್ಹೊಣು ಬಾಯಸರಲಲೊ ಶಾಮಣ್ಣಾ ರುಕ್ಕಾಚೆ ಮೂಳಾಕ ನೀದ ಕಾಡ್ಚೆ ಖಾತಿರಿ, ಟೋಪ್ಪೆಚೊ ಪೊಟ್ಲೊ ಲಾಗ್ಗಿಚಿ ದವರ್ನು ನೀದ ಕಾಡುಕ ಆಡ ಸರ್ಲೊ. ಸುಮಾರ್ ವೇಳಾನಿ ಶಾಮಣ್ಣಾಕ ಜಾಗೊರು ಜಾತ್ತನಾ ತಾಗೆಲಾಗ್ಗಿ ಆಸ್ಸಿಲಿ ಟೋಪ್ಪಿಚೊ ಪೊಟ್ಲೊ ನಾ. ಖಾಲಿ ಆಂಗ್ವಲೆ ಮಾತ್ರ ಆಸ್ಸ. ಟೋಪ್ಪ್ಯೊ ಕಂಯಿ ಗೆಲ್ಲ್ಯೊ ಮ್ಹಣು ಹೆಕಡೆ-ತೆಕಡೆ ವಯರಿ ಪಳಯ್ತನಾ, ರುಕ್ಕಾ ವಯರಿ ಮಸ್ತ ಮಂಕಡ ಬಣ್ಣ್ಬಣ್ಣಾಚಿ ಟೋಪ್ಪಿ ದವರ್ನು ಕಿಚಿ-ಕಿಚಿ ಕೊರ್ನು ನಾಂತಾಚಿ ಕಂಯಿ.
ಶಾಮಣ್ಣಾ ಆತ್ತ ಕಸ್ಸಲೆ ಕೊರ್ಚೆ ಮ್ಹೊಣು ಆಲೋಚನಾ ಕರ್ತಾ. ತೆದನಾ ಪಕ್ಕನಿ ತಾಕ್ಕಾ ತಾಗೆಲೆ ಆಜ್ಜಾನ ಸಾಂಗಿಲೆ ಉಡಗಾಸಾಕ ಯೆತ್ತಾ. ಕಸ್ಸಲೆ ಮ್ಹಳ್ಯಾರಿ `ಮಂಕ್ಡ ಕೆದನಾಯಿ ದೊಸ್ರೆ ಕಸ್ಸಲೆ ಕರ್ತಾಚಿಕಿ ತಸ್ಸಿ ಕರ್ತಾಚಿ ಕಂಯಿ.'
ಶಾಮಣ್ಣಾ ತಾಗೆಲೆ ಮಾತ್ಯಾರಿ ಆಸ್ಸುಚಿ ಟೋಪ್ಪಿ ಕಾಣು ನೆಲಾರಿ ಗಾಲ್ತಾ. ರುಕ್ಕಾರಿ ಆಸ್ಸುಚೆ ಸಕ್ಕಡ ಮಂಕ್ಡ ತಾಂಗೆಲೆ ಮಾತ್ಯಾರಿ ಆಸ್ಸಿಲಿ ಟೋಪ್ಪಿ ಕಾಣು ಸಕಲ ಉಡ್ಡಯಿತಾಚಿ. ಶಾಮಣ್ಣಾ ಸಕ್ಕಡ ಟೋಪ್ಪ್ಯೋ ಒಟ್ಟು ಕೊರ್ನು ಮೊಗರ್ನಾಡಾ ತೇರಾಕ ವಚುವನು ವ್ಯಾರು ಕೊರ್ನು ವಾಪಾಸ ತಾಗೆಲೆ ಘರ ಅಮ್ಮೆಂಬಳಾಕ ವತ್ತಾಕಂಯಿ. ಅಮ್ಮೆಂಬಳಾಕ ವತ್ತರಿ ತೊ ತಾಗೆಲೆ ಚೆರ್ಡುಂವಾಂಕ ಹೊ ವಿಷಯು ಸಾಂಗ್ತಾ ಅನಿ `ತುಮ್ಕಾಯಿ ಅಸ್ಸಲೊ ಅನ್ಬವು ಆಯಿಲ್ಯಾರಿ ಅಸ್ಸಿಚಿ ಕರಾ. ಹೊ ವಿಷಯು ಆಮ್ಕಾ ಆಮ್ಗೆಲೆ ಮಲ್ಗಡ್ಯಾನ ಸಾಂಗಿಲೆ.' ಮ್ಹಣು ಸಾಂಗ್ತಾ.
ತಸ್ಸಿಂಚಿ ತೊಡೆ ವರ್ಸಾಚೆ ಪುಡೆ ತಸ್ಸಲೊಚಿ ಟೋಪ್ಪೆ ವ್ಯಾರಾಚೊ ಏಕ್ಲೊ ಮೊಗರ್ನಾಡ ತೇರಾಕ ಮ್ಹಣು ಬಾಯ್ಸೊರ್ನು ಮಾರ್ಗಾ ಬಗ್ಲಾನ್ ಬಸ್ಸಾಕ ರಾಕ್ಕುನು ರಾಬ್ತಾ. ತೆದುಸು ಬಸ್ಸಾಂಚಾನಿ ಪೆಟ್ರೋಲಾಕ ಮ್ಹೊಲ ಚಳ್ಳೆಲೆ ನಿಮಿತಿ, ಬಸ್ಸಾಚೆ ಟಿಕೇಟಾಕಯಿ ಚಡವ್ಕಾ ಮ್ಹಣು ಸಂಪು ಕೆಲ್ಲೊಲೊ. ತಸ್ಸಿ ಜಾವ್ನು ಹಾಕ್ಕಾ ಬಸ್ಸ ಮ್ಹೆಳ್ನಾಸಿ ಚಮಕುನು ವಚುಕಾ ಪಳ್ಳೆ. ತಸ್ಸಿ ವತ್ತನಾ ಹಾಕ್ಕಾ ವಾಂವಂಟ ಜಾಲ್ಲೆ. ಟೋಪ್ಪೆಚೊ ಪೊಟ್ಲೊ ಲಾಗ್ಗಿ ದವರ್ನು ತೊಡೆ ಆಡ ಸರ್ತಾ. ವತ್ತಾಚೆ ದಾವಾಕ ತಾಕ್ಕಾ ತಂಯಿಚಿ ದೊಳೆ ಜಾಡ ಜಾವ್ನು ನೀದ ಯೆತ್ತಾ. ಜಾಗೊರು ಜಾತ್ತನಾ ಲಾಗ್ಗಿ ಆಸ್ಸಿಲೊ ಪೊಟ್ಲೊ ಖಾಲಿ. ವಯರಿ ಪಳಯಲ್ಯಾರಿ ಮಂಕಡ ಟೋಪ್ಪ್ಯೊ ದವರ್ನು ಕಿಚಿ-ಕಿಚಿ ಕೊರ್ನು ನಾಂತಾಚಿ.
ತೊ ತೆದನಾ ತಾಗೆಲೆ ಮಾತ್ಯಾವಯ್ಲಿ ಟೋಪ್ಪಿ ಕಾಣು ನೆಲಾರಿ ಉಡ್ಡಯಿತಾ. ಜಾಲ್ಯಾರಿ ರುಕ್ಕಾರಿ ಆಸ್ಸಿಲೆ ಮಂಕ್ಡ ಮಾತ್ರ ಟೋಪ್ಪಿ ಕಾಣು ಉಡಯಿನಾಂಚಿ. ಮಾತ್ರ ನಂಯಿ "ತುಗೆಲೆ ಮಾಲ್ಗಡ್ಯಾನಿ ಆಮ್ಗೆಲೆ ಮಾಲ್ಗಡ್ಯಾಂಕ ಮಂಕಡ ಕೆಲ್ಯಾವರಿ ಆಮ್ಕಾ ಮಂಕಡ ಕೊರುಕ ತುಜ್ಜಾನ ಜಾಯ್ಸನಾ. ಯಿತ್ಯಾ ಮ್ಹಳ್ಯಾರಿ ಆಮ್ಮಿ ಕಾಣ್ಯೊ ವಾಜ್ಜುನು ಸಕ್ಕಡ ವಿಷಯು ಸಮಜುನು ಗೆತ್ಲಾ." ಮ್ಹಣಾಲೆ ಕಂಯಿ ಮಂಕ್ಡ.
ತೆದನಾ ಹೊ ಟೋಪ್ಪ್ಯೆಚೊ "ತುಮ್ಮಿ ಮಾಂಕಡ, ವಾಪಾಸ ತುಮ್ಕಾ ಕಸ್ಸಲೆ ಮಂಕಡ ಕೊರ್ಚೆ. ಹೆ ತುಮ್ಮಿ ಕಾಣ್ಯೆಂತು ವಾಜ್ಜಿನಿವೆ? ಬಾರಿ ಬುದ್ವಂತಸೆ ಉಲ್ಲಯಿತಾಚಿ ನಂವೆ? ತುಮ್ಮಿಚಿ ತೆ ಟೋಪ್ಪ್ಯೋ ದವರ್ನು ಗೆಯ್ಯಾ." ಮ್ಹಣು ಹೊ ವಾಪಾಸ ಘರಕಡೆ ವಚ್ಚಾಕ ಗುವ್ಲೊ.
ತೆದನಾ ಸಕ್ಕಡ ಮಂಕ್ಡ ಕಿಚಿ-ಕಿಚಿ ಕೊರ್ನು ನಾಂಚುನು "ತು ಟೋಪ್ಯೊ ಸೊಣು ವತ್ತವಯಿ. ಹೆ ಆಮ್ಮಿ ಕಸ್ಸಲೆ ಕೊರ್ಚೆ. ಕೊರ್ಯಾಚೆ ಸಾಂತ. ಘೆ ತುಗೆಲಿ ಟೋಪ್ಪ್ಯೊ. ಆಮ್ಕಾ ನಾಕ್ಕಾ." ಮ್ಹಣು ಕಾಣು ಉಡಯಿತಾಚಿ.
ತೆ ಸಕ್ಕಡ ಒಟ್ಟು ಕೊರ್ನು ಹೊ ಟೋಪ್ಪ್ಯೆಚೊ ಮೊಗರ್ನಾಡಾಕ ವಚುವ್ನು ವ್ಯಾರು ಕರ್ತಾ ಆನಿ ತಾಗೆಲೆ ಘರಕಡೆ ವತ್ತಾ.
ಹೆ ಕಾಣ್ಯೆಂತು ಆಮ್ಮಿ `ಬುದ್ಧಿ ಆಸ್ಲ್ಯಾರಿ ಕೊನಾಲಾಗ್ಗಿ ಕಸಿ ಜಿಗ್ಸುವೆತ' ಮ್ಹಣು ಸಿಕ್ಕುವೆತ.
---೦೦----
0 ಕಾಮೆಂಟ್(ಗಳು):
Post a Comment