ಅಸ್ಸಿಚಿ ಸುಮಾರ ದೀಸಾನಿ ಮಾದ್ದುಲೆ ಬಾಯಲೆಕ ಏಕು ದಿವಸು ತಾಂಗೆಲೆ ಕೊಡಲಿ ಪಳ್ಳೆಲೆ ಬಾಂಯಿ ಪೊಳೊಕಾ ಮ್ಹೊಣು ಇಚ್ಚಾ ಜಾತ್ತಾ. ತಸ್ಸಿಚಿ ತಿ ತಿಗೆಲೆ ಭ್ಹಾಂಮ್ಣಾಲಾಗ್ಗಿ "ತುಮ್ಮಿ ಪಾಲ್ಯಾಕ ರಾನ್ನಾಕ ವತ್ತನಾ ಹಾಂವಯಿ ಯೆತ್ತಾ. ಆಮ್ಗೆಲೆ ಕಷ್ಟ ದೂರ ಕೆಲ್ಲೆಲಿ ತಿ ಬಾಂಯಿ ಮಾಕ್ಕಾ ಪಳವುಕಾ" ಮ್ಹಣಾಲಿ. ಮಾದ್ದು "ಜಾಯ್ತಗೋ, ಪಾಲ್ಯಾಕ ಆಮ್ಮಿ ಸಕಾಣಿಚಿ ರಾನ್ನಾಕ ವಚ್ಚಾ. ಆನಿ ಸಗ್ಳೊ ದಿವಸು ತಂಯಿಚಿ ಬೈಸುನು ಸಾಂಜ್ವಳಾ ಯೆವ್ಯಾ, ಜಾಯ್ನಾಂವೆ? ದನಪಾರಾ ಜವಣಾ ಬದಲಾಕ ಕಸ್ಸಲೆ ಜಾವೊ ಖಾವಚಾಕ ಕೊರ್ನು ಧರಿ. ತಂಯಿ ಆಮ್ಮಿ ಗಮ್ಮತೇರಿ ಆಸ್ಸುಯಾ. ಸದಂಚಿ ಘರಕಡೆಚಿ ಬೈಸುನು ಉಬ್ಗಾಣಿ ಯೆತ್ತನಂವೆ?" ಮ್ಹಣಾಲೊ. ತಾಗೆಲೆ ಬಾಯ್ಲೆಕ ಖುಸೀ ಜಾಲ್ಲಿ.
ಹೆರ್ದಿವಸು ತಿ ಪಾಲ್ಲ್ಪಾಲ್ಲ್ಯಾರಿ ಚಾರಿ ಗಂಟ್ಯಾಕ ಉಟಾವ್ನು ತಿಗ್ಸೊ ಮಿಟ್ಸೊ ಪೊವು ಚಡ್ತೊಚಿ ಚಿರ್ಡುನು ದವರ್ತಾ. ಆನಿ ಚಿಕೆಚಿ ಉಜ್ವಾಡು ಜಾತ್ತರಿ ಹಿತ್ಲಾಂತು ಆಸ್ಸುಚೆ ಕೇಳ್ಯಾ ಗಡಾಯಾಚೆ ಪಿಕ್ಕಲೆ ಕೇಳೆ ಕಾಣುಂಯಿ ಧರ್ತಾ. ಮಾದ್ದುನ ಉಟಾಯ್ತನಾ ಹಿಗೆಲೆ ಸಕ್ಕಡ ಕಾಮ ಜಾವ್ನು ಹಿ ತಯಾರ ಜಾಲ್ಲಾ. ಮಾದ್ದುಕಯಿ ಖುಸೀ ಜಾತ್ತಾ. ಸಕಾಣಿಚಿ ಕಾಫಿ ಆನಿ ಖಾಣ ಖಾವ್ನು ಸಾದಾರಣ ೯ ಗಂಟೆಕ ತಾನ್ನಿ ರಾನ್ನಾಕ ವಚ್ಚಾಕ ಬಾಯ್ಸರ್ತಾಚಿ.
ರಾನ್ನಾಕ ಬಾಂಯಿ ಆಸ್ಸಿಲೆ ಕಡೆಕ ವಚ್ಚುನು ಪಾವತನಾ ೧೧ ಗಂಟೆ ಜಾಲ್ಲೆ. ಮಾದ್ದು ಬಾಯಲೆಕ ಬಾಂಯ್ ದಾಕ್ಕೆತಾ ಆನಿ ತಂಯಿಚಿ ತೊಡೊ ವೆಳು ಉಲ್ಲವ್ನು ಬಸ್ತಾಚಿ. "ರಾನ್ನಾಂತು ಕಿತ್ಲೆ ತಂಪೂ ಆಸ್ಸ ನಂವೆ? ಹಾಂಗಾ ಆಸ್ಸಿಚಿ ಬೈಸ್ಲ್ಯಾರಿ ಕಸ್ಸಲೆ ಚಿಂತಾ ನಾ." ಮ್ಹೊಣು ಸುಖ ದುಃಖ ಉಲ್ಲಯಿತಾಂಚಿ.
ತೊಡೊ ವೆಳು ವತ್ತನಾ ಮಾದ್ದು ಸಾಂಗ್ತಾ "ವಯಿಗೋ, ಹಾಂವ ತೊಡೆ ರಾಕ್ಕುಡ ಕಾತ್ತರ್ತಾ. ನಂತರ ಆಮ್ಮಿ ಖಾಣ ಖಾವ್ನು ಹಾಂಗಾಚಿ ತೊಡಿಚಿ ನೀದ ಕಾಣು ಸಾಂಜ್ವಳಾ ಘರಕಡೆ ವಚ್ಚಾ. ಜಾಯ್ನಾವೆ?"
"ಜಾಯ್ತ್ ಮ್ಹಳ್ಯಾರಿ. ತುಮ್ಮಿ ಸಾಂಗಿಲ್ಲ್ಯಾಕ ಹಾಂವ ಕೆದನಾಯಿ ನಾಕ್ಕಾ ಮ್ಹಳಾವೆ?' ಮ್ಹಣಾಲಿ.
ತಸ್ಸಿಚಿ ಮಾದ್ದು ಜಾವ್ಕಾಜಾಲ್ಲೆಲೆ ತಿತ್ಲೆ ಮಾತ್ರ ರಾಕ್ಕುಡ ಕಾತ್ತೊರ್ನು ಬೊರೊ ಬಾಂದುನು ಬಾಯ್ಲೆಲಾಗ್ಗಿ ಯೆತ್ತಾ. ನಂತರ ಬಾಂಯ್ತು ದಾಕುನು ಉದ್ದಾಕ ಕಾಣು ದೊಗ್ಗಾಂಯಿ ತೊಂಡ್ಹಾತ್ಪಾಯು ದುವ್ನು ಪೊವಾಚಿ ಉಪ್ಕರಿ, ಕೇಳೆ ಕಾವ್ನು ತೊಡೊ ವೆಳು ತಂಯಿಚಿ ನಿದ್ದತಾಂಚಿ.
ತಾಂಕಾ ಜಾಗೊರು ಜಾತ್ತನಾ ಸಾಂಜ್ವಳಾ ಜಾಲ್ಲಾ. ವಗ್ವಗ್ಗಿ ಉಟಾಯ್ತಾಚಿ ಘರಕಡೆ ವಚ್ಚಾಕ ಬಾಯ್ಸ್ರ್ತನಾ ಮಾದ್ದುಲಿ ಬಾಯಲ ಬಾಂಯ್ ಸಮಚೀ ಪಳಯಿತಾ ಮ್ಹೊಣು ನಿಲ್ಕತಾ. ತಿಗೆಲೆ ಪಾಯ್ಯಾ ಮುಳಾಕ ಆಸ್ಸಿಲೊ ಏಕು ಪಾತ್ತರು ಹಾಲ್ನು ಹಿ ಮಗ್ಚುನು ಬಾಂಯ್ತು ಪಡ್ತಾ.
ಮಾದ್ದು ಗಾಬ್ರೇನು ತೆದುಸು ಆಯಿಲೊ ದೇವಾಲೊ ಉಡ್ಗಾಸು ಕಾಡ್ತಾ. ದೇವು ಪ್ರತ್ಯಕ್ಷು ಜಾತ್ತಾ ಆನಿ ವಿಷಯು ನಿಮ್ಗುನು ಬಾಂಯ್ತು ಉಡ್ಡುವ್ನು ಏಕಿ ಚಂದಿ ಬಾಯ್ಲ್ಮನಿಷಿಕ ಹಾಣು ಮಾದ್ದುಕ "ಘೆ ತುಗೆಲೆ ಬಾಯ್ಲೆಕ" ಮ್ಹಣ್ತಾ.
ಮಾದ್ದು ತಿಕ್ಕಾ ಪಳಯಿತಾ. ತಾಗೆಲಿ ಬಾಯ್ಲ ನ್ಹಂಯಿ. ತಿ ಹೇಮಾಮಾಲಿನಿ. ಆತ್ತ ಹಾಂವೆ ಹಿ ಮ್ಹಗೆಲಿ ಬಾಯ್ಲ ನ್ಹಂಯಿ ಮ್ಹಳ್ಯಾರಿ ತೊ ರೇಖಾಕ ಜಾವೊ, ಮಾಧುರಿಕ ಜಾವೊ, ಐಶಾ ಜಾವೊ ಹಾಣು ಘೇ ತುಗೆಲಿ ಬಾಯಲ ಮ್ಹಣ್ತನಾ ಹಾಂವೆ ತಾನ್ನಿ ಕೊಣಂಯಿ ನ್ಹಂಯಿ ಮ್ಹಣ್ತರಿ ಕಡೇರಿ ಮ್ಹೆಗೆಲಿಚಿ ಬಾಯ್ಲೆಕ ಹಾಡ್ತಲೊ. ತೀಚಿ ಮ್ಹೆಗೆಲಿ ಬಾಯ್ಲ ಮ್ಹಳ್ಯಾರಿ ಸಕ್ಕಡಾಂಕ ಘರಕಡೆ ವ್ಹರ ಮ್ಹಳ್ಯಾರಿ ಹಾಂವೆ ಕಸ್ಸಲೆ ಕೊರ್ಚೆ.
ಹೀಚಿ ಮ್ಹೆಗೆಲಿ ಬಾಯಲ ಮ್ಹಳ್ಯಾರಿ ಹಾಂವೆ ಪಟ್ಟಿ ಸಾಂಗ್ಲಾವರಿ ಆನಿ ಮ್ಹೆಗೆಲೆ ಬಾಯಲೆಕ ದ್ರೋಹ ಕೆಲ್ಲ್ಯಾವರಿ ಜಾತ್ತಾ. ತಸ್ಸಿ ಜಾವ್ನು ಕಸ್ಸಲೆ ಕೊರುಕಯಿ ಕಳ್ನಾಸ್ಸಿ ನುತಚೀ ತೊಡೊ ವೆಳು ರಾಬ್ತಾ.
ದೇವು ನಿಮ್ಗಿತಾ "ಮಾದ್ದು, ಕಸ್ಸಲೆ ಹಿ ತುಗೆಲಿ ಬಾಯ್ಲ ನ್ಹಂಯಿಂವೆ? ತಸ್ಸಿ ಜಾಲ್ಲ್ಯಾರಿ ಹಾಂವ ವಪಾಸ ದುಸ್ರೆಕ ಹಾಡ್ಕಾವೆ?"
ಮಾದ್ದು "ಹೇ ದೇವಾ, ಮ್ಹೆಗೆಲೆ ತೊಂಡಾತುಲ್ಯಾನ ಪಟ್ಟಿ ಸಾಂಗ್ಚೆ ತಸ್ಸಿ ಕೆಲ್ಲೆ ನಂವೆ ತುವೆ? ತು ವಪಾಸ್ ಆನ್ನೆಕ್ಲೆಕ ಹಾಣು ದಿವ್ಚೆ ನಾಕ್ಕಾ. ಹಿಕ್ಕಾಚಿ ಹಾಂವ ವರ್ತಾ" ಮ್ಹಣಾಲೊ.
ದೇವು "ಮಾದ್ದು, ಕಸ್ಸಲೆ ಜಾಲ್ಲೆ ತುಕ್ಕಾ? ಪಟ್ಟಿ ಕಸ್ಸಲ್ಯಾಕ ಸಾಂಗ್ಲೆ? ಪುಳ್ಳೆ ಪಟಿ ಹಾಂವೆ ಬಾಂಗ್ರಾಚಿ, ರುಪ್ಯಾಚಿ ಕೊಡಲಿ ಹಾಣು ದಿಲ್ಲ್ಯಾರೀ ತುವೆ ಸತ್ಯ ಸಾಂಗುನು ತುಗೆಲಿ ಲೊಕಂಡಾಚೀಚಿ ಕೊಡಲಿ ಜಾವ್ಕಾ ಮ್ಹೊಣು ಸಾಂಗಿಲೆ. ಆತ್ತ ಕಸ್ಸಲೆ ಜಾಲ್ಲೆ"
"ದೇವಾ, ತೆದನಾ ಹಾಂವೆ ಸತ್ಯ ಸಾಂಗಿಲ್ಯಾಕ ಮಾಕ್ಕಾ ತುವೆ ತಿನ್ನಿಯಿ ಕೊಡಲಿ ದಿಲ್ಲಿ. ಆತ್ತಂಯಿ ಹಾಂವೆ ತಸ್ಸಿಂಚಿ ಸಾಂಗ್ಲ್ಯಾರಿ ತುವೆ ಹಾಳೆಲೆ ಸಕ್ಕಡಾಂಕ ಘೆವ್ನು ವಸ ಮ್ಹಳ್ಯಾರಿ ಹಾಂವೆ ಕಸ್ಸಲೆ ಕೊರ್ಚೆ? ತು ಮಾಕ್ಕಾ ಮೆಗೆಲೆ ಬಾಯ್ಲೆಕ ಮಾತ್ರ ದಿತ್ತಾ ಮ್ಹೊಣು ಜಾಲ್ಯಾರಿ ಹಾಂವ ಹಿ ಮೆಗೆಲಿ ಬಾಯ್ಲ ನ್ಹಂಯಿ ಮ್ಹಣ್ತಾ." ಮ್ಹಣಾಲೊ.
ದೇವು "ಮಾದ್ದು, ತುಗೆಲೆ ತರ್ಕಾಕ ಹಾಂವ ಸೊಲ್ವಲೊ." ಮ್ಹೊಣು ಬಾಂಯ್ತು ಉಡ್ಡುವ್ನು ತಾಗೆಲೇಚಿ ಬಾಯಲೆಕ ಹಾಣು ತಾಕ್ಕಾ ದಿತ್ತಾ.
"ಮಾದ್ದು ಆನಿ ಮಾದ್ದು ಬಾಯ್ಲೆ ತುಮ್ಮಿ ಚಂದಾಯೆರಿ ಜೀವನ ಕೊರ್ನು ಆಸ್ಸುಚೆ ಪಳವುನು ಮಾಕ್ಕಾ ಮಸ್ತ ಖುಸೀ ಜಾಲ್ಲಾ. ತುಮ್ಕಾ ಅನಿಕಯಿ ಚಾಂಗ ಜಾವೊ" ಮ್ಹೊಣು ದೇವು ಆಶೀರ್ವಾದು ದಿತ್ತಾ ಆನಿ ಮಾಯಕ್ ಜಾತ್ತಾ.
ಮಾದ್ದು ಆನಿ ಮಾದ್ದುಲಿ ಬಾಯಲ ಘರಕಡೆ ವತ್ತನಾ ವಾಟ್ಟೇರಿ ಮಾದ್ದು ಬಾಯಲ ಮಾದ್ದು ಲಾಗ್ಗಿ "ಹಾಂವೆ ಬಾಂಯ್ತು ಪಡತರಿ ಕಸ್ಸಲೆ ಜಾಲ್ಲೆ?" ಮ್ಹೊಣು ನಿಮ್ಗಿತಾ.
ಮಾದ್ದು ಜಾಲ್ಲೆಲೆ ವಿಷಯು ಸಾಂಗ್ತನಾ ತಿಕ್ಕಾ ಕೋಪು ಯೆತ್ತಾ. "ಹಾಂವ ಬಾಂಯ್ತು ಪೊಣು ಮೆಲ್ಯಾರೀ ಹೊಡ ನ್ಹಂಯಿ ತುಮ್ಕಾ. ಹೇಮಾಮಾಲಿನಿಕ ಘರಕಡೆ ಹೊರ್ಚೆ ಆಲೋಚನಾ ಕೆಲ್ಲಿ ನಂವೆ?" ಮ್ಹಣ್ತಾ.
ಮಾದ್ದು ತಿಕ್ಕಾ ಸಮಾಧಾನ ಸಾಂಗುವುನು "ಹಾಂವೆ ಕಸ್ಸಲ್ಯಾಕ ತಸ್ಸಿ ಸಾಂಗಿಲೆ ಮ್ಹೊಣು ತುಕ್ಕಾ ಗೊತ್ತಸ್ಸ. ಜಾಲ್ಯಾರಿ ಮೆಗೆಲಾಗ್ಗಿ ಲಡಾಯಿ ಕೊರ್ಚೆ ಖಾತಿರಿ ನಂವೆ ತುವೆ ಆತ್ತ ಅಸ್ಸಿ ಮ್ಹೊಣ್ಚೆ. ತು ಮಾಕ್ಕಾ ಜಾವ್ಕಾ ನಿಮಿತಿ ನಂವೆ ಹಾಂವೆ ದೇವಾಲಾಗ್ಗಿ ತುಕ್ಕಾ ಮಾತ್ರ ಹಾಣು ದಿ. ಬಾಕಿಚೆ ಕೊಣಯಿ ಮಾಕ್ಕಾ ನಾಕ್ಕಾ ಮ್ಹಳ್ಳೆಲೆ" ಮ್ಹಣ್ತಾ.
ತಿಕ್ಕಾ ಸಮಾಧಾನ ಜಾವ್ನು ನಂತರ ತಾನ್ನಿ ಘರಕಡೆ ವತ್ತಾಚಿ. ಘರಕಡೆ ವತ್ತನಾ ತಂಯಿ ದಾಮ್ಮು ಬಾಯಲ ರಾಕ್ಕುನು ರಾಬ್ಲಾ. ಹಾಂಕಾ ಪಳಯಿಲೆ ಕೂಡ್ಲೆ ತಿ ಮಾದ್ದುಲೆ ಬಾಯಲೆಕ ದೂರ ಆಪ್ಪೊವ್ನು ಹೊರ್ನು ವಿಷಯು ಸಕ್ಕಡ ನಿಮ್ಗುನು ಗೆತ್ತಾ.
ತಿಕ್ಕಾ ತೆಂಚಿ ಕಾಮ. ದುಸ್ರೆ ಕಂಯಿ ಗೆಲ್ಲಾಚಿ? ತಾಂಕಾ ಕಸ್ಸಲೆ ಮ್ಹೆಳ್ಳೆ? ಕಸ್ಸಿ ಮ್ಹೆಳೆ? ನಿಮ್ಗುನು ಘೆವ್ನು ಜಾಳ ಬೊಕ್ಚೆ. `ಪುಳ್ಳೆ ಪಟಿ ಮ್ಹೆಗೆಲೆ ಭ್ಹಾಂಮ್ಣಾನ ಮಾತ್ರ ವಚ್ಚುವ್ನು ತಸ್ಸಿ ಜಾಲ್ಲೆ. ಹೆ ಪಟಿ ಮಾಕ್ಕಾಯಿ ತಾಂಗೆಲೆ ಒಟ್ಟೂಚಿ ವಚ್ಚುಕಾ. ದೇವಾನ ಹಾಣು ದಿಲ್ಲೆಲೆ ಹೇಮಾಮಾಲಿನಿ, ರೇಖಾ, ಮಾಧುರಿ, ಐಶಾ ಆನಿ ಹಾಂವ ಘರಕಡೆ ಯೆವ್ಚೆ ತಸ್ಸಿ ಜಾಲ್ಯಾರಿ ಘರಾಚೆ ಕಾಮ ಕೊರುಕ ಜನ ಜಾತ್ತನಂವೆ?' ಮ್ಹೊಣು ಚಿಂತುನು ಘರಕಡೆ ಭ್ಹಾಂಮ್ಣಾಲೆ ಕಾನ್ನಾಂತು ಪಿಳುಕ ವತ್ತಾ.
ಹೇ ಕಾಣೆಂತು `ಚಾಂಗ ಜಾವ್ಚೆ ಜಾಲ್ಲ್ಯಾರಿ ಪಟ್ಟಿ ಸಾಂಗ್ಲ್ಯಾರಿ ಚಿಂತಾ ನಾ' ಮ್ಹೊಣು ಸಮಜುನು ಘೆವೆತ.
---೦೦----
0 ಕಾಮೆಂಟ್(ಗಳು):
Post a Comment