ಭಾಂಗ್ರಾಚಿ ಗೆರಶಿ

ಸುರುವೆಕ ಸಾಂಗಲ್ಯಾವರಿಚಿ ಆಮ್ಗೆಲೊ ಬಂಟ್ವಾಳ ಗಾಂವಚೆ ಆಸ್‌ಪಾಸ್ ಸಾನ್ಸಾನ್ನ್ ಗಾಂವಾಂತು ಪ್ರಾಕಾಂತು ರಾಯ ಆಸ್ಸಿಲಿಂಚಿ. ಆತ್ತ ರಾಯಾಲೆ ವಂಶಾಚೆ ಜನಾಂಕ ರಾಯಾಲೊ ಪುತು, ರಾಯಲೊ ನಾತ್ತು ಮ್ಹಣು ಆಪ್ಪಯಿತಾಚಿ. ಜಾಲ್ಯಾರಿ ತಾಂಕಾ ಅಧಿಕಾರು ನಾ. ತಾಂಗೆಲೆ ಪುಡೆ ಕಾಲಾಚೆ ಘರ ತೆದನಾ ಅರಮನೆ ಜಾವ್ನ ಆಸ್ಸಿಲೆ. ಕೆಲವು ತಸ್ಸಲೆ ಘರ ಆತ್ತಯಿ ಆಸ್ಸಚಿ. ಜಾಲ್ಯಾರಿ ಸಕ್ಕಡ ಅರಮನೆ ಮ್ಹಣು ದಿಸ್ಸನಾ. ಜಾಲ್ಯಾರಿ ಕೆಲವು ಚಂದ ಜಾವ್ನ ಆಸ್ಸ. ತಾಂತು ವಾಪರ್‍ಸಿಲೆಲೆ ರೂಕ, ತಾಜ್ಜೆರಿ ಕೆತ್ವಿಲೆಲೆ ಕಾಮ ಪಳಯಿಲ್ಯಾರಿ ಮನಾಂಕ ಮಸ್ತ ಆನಂದ ಜಾತ್ತಾ. ಮಣಿಪಾಲಾಂತು ತಸ್ಸಲೆ ಘರ ಮಸ್ತ ಪಳವ್ಚಾಕ ಮ್ಹೆಳ್ತಾ. ತೆ ಸಕ್ಕಡ ತೇಚಿ ಜಾಗ್ಯಾರಿ ಆಸ್ಸಿಲೆ ನಂಹಿ. ಕಂಚೆ ಕಂಚೆ ಜಾಗ್ಯಾರಿ ಆಸ್ಸಿಲೆ ನಾಶ ಜಾವ್ಚಾಕ ಜಾಲ್ಲೆಲೆ ಘರ ತೆ ಜಾಗ್ಯಾರಿ ದಾಕುನು ಕಳ್ಚುನು ಹಾಣು ತಸ್ಸಿಂಚಿ ಮಣಿಪಾಲಾಂತು ಬಾಂದುನು ಪ್ರಾಕಾಚೆ ನಾಂವ ಪಾವಿಲೆ ಘರ ಆಮ್ಗೆಲೆ ಮುಖಾವಯಿಲೆ ಪೀಳಿಗೆಕ ಪಳವ್ಚೆ ಖಾತೀರ ನಿರ್ಮಾಣ ಕೆಲ್ಲಾ. ಬಂಟ್ವಾಳ_ಧರ್ಮಸ್ಥಳಾಚೆ ವಾಟ್ಟೆರಿ ತಸ್ಸಲೆ ಕೆಲವು ರಾಯಾಲೆ ಗಾಂವ ಮ್ಹೆಳ್ತಾಚಿ. ತಸ್ಸಲೊ ಏಕ ರಾಯಾಲೆ ಗಾಂವು ಅಳದಂಗಡಿ.ಥಂಯ ಸುಮಾರ ಕಾಳಾಚೆ ಪುಡೆ ರವಿವರ್ಮಾ ಮ್ಹಳ್ಳಲೊ ಏಕ ರಾಯು ಆಸ್ಸಿಲೊ. ತಾಕ್ಕಾ ಪದ್ಮಾವತಿ ಮ್ಹಳ್ಳಲಿ ಏಕಿ ಧುವ. ತೀಅತೀ ಸುಂದರಿ ಮಾತ್ರ ನ್ಹಂಹಿ ಬುದ್ವಂತಿ. ತಿಜ್ಜೆರಿ ರವಿವರ್ಮಾಕ ಆನಿ ತಾಗೆಲಿ ಬಾಯಲ ರಾಣಿಕ ಮಸ್ತ ಮೋಗು. ರಾಯಾಲಿ ಧುವ ಮ್ಹಣ್ತರಿ ರಾಯಾನ ಆನಿ ರಾಣಿನ ತಿಕ್ಕಾ ಖೇಳುಕ ಸಕ್ಕಡ ಭಾಂಗರಾಚೆಚಿ ವಸ್ತು ಕರವ್ನು ದಿಲ್ಲಾ. ಭಾಂಗ್ರಾಚೊ ಚೆಂಡು, ಬೊಂಬೆ, ಹಸ್ತಿ, ರಾಂದಪಾಚೆ ಆಯಿದನ, ಪಾಳ್ಳೆ, ಬೈಲು ಆದಿಲೆ ಖೇಳ್ಚೆ ಸಾಮಾನ ಸಕ್ಕಡ ಭಾಂಗರಾಚೆಚಿ. ರಾಂದಪಾಚೆ ಸಾಮಾನಾಂತು ಏಕಿ ಗೆರಶಿ ಆಸ್ಸಿಲಿ. ತಿವಯಿ ಭಾಂಗ್ರಾಚೀಚಿ. ಝಗಝಗೀಚಿ ಆಸ್ಸಿಲಿ ತೀ ಗೆರಶಿ ಮ್ಹಳ್ಯಾರಿ ಪದ್ಮಾವತಿಕ ಮಸ್ತ ಮೋಗು. ತೀಣೆ ಖೇಳ್ತನಾ ತಾಜ್ಜೆನಿ ತಾಂದೂಲು ಆಸುಳ್ಯಾ ಮ್ಹಣ್ಕೆ ಕರ್‍ಚೆ.ತಶೀಚಿ ಪದ್ಮಾವತಿ ಹೋಡಿ ಜಾಲ್ಲಿ. ತಿಗೆಲೊ ಖೇಳು ಘರಾಂತುಲ್ಯಾನ ಆಂಗಣಾಂತು ಆಯಿಲೊ. ಆಂಗಣ ಮ್ಹಣ್ತರಿ ಏಕ್ಕ ಕಡೆನ ಖೇಳ್ಕಾ ಮ್ಹಣು ದಿಸ್ಸನಾ ನಂವೆ? ಆಂಗಣ ಹೋಡ ಆಸ್ಸಿಲೆ ನಿಮಿತಿ ಏಕೆಕ ದಿವಸ ಏಕೆಕ ಕಡೆನ ಖೇಳ್ಚಾಕ ಸುರು ಕೆಲ್ಲೆ. ತಸ್ಸಿಂಚಿ ಏಕ ದಿವಸು ಪದ್ಮಾವತಿನ ಬಾಂಚೆ ಲಾಗ್ಗಿ ಖೇಳೂಕ ಸುರು ಕೆಲ್ಲೆ. ತಿಗೆಲೆ ಭಾಂಗ್ರಾಚೆ ಗೆರಶಿಂತು ರೇಂವ ಘಾಲ್ನು ಆಸುಳ್ಯಾ ಮ್ಹಣ್ಕೆ ಕರ್‍ನು ಖೇಳ್ತನಾ ಜೋರು ವಾರೆಂ ಆಯಿಲೆ. ತೆ ವಾರ್‍ಯಾಕ ಗೆರಶಿಂತು ಆಸ್ಸಿಲೆ ರೇಂವ ಪದ್ಮಾವತಿಲೆ ದೊಳ್ಯಾಂತು ಪಡತಾ, ಗೆರಶಿ ತಿಗೆಲೆ ಹಾತ್ತಾಂತುಲ್ಯಾನ ಪಡತಾ. ಥೋಡೆ ವೇಳಾನಿ ದೊಳೆ ಸೊಡತನಾ ಗೆರಶಿ ದಿಸನಾ. ಸುತ್ತುಮುತ್ತು ಸೊದ್ದುಕ ಸುರುಕರ್‍ತಾ. ಸೊದ್ದೂನು ಸೊದ್ದೂನು ಆಖೈರಿಕ ಬಾಂಯ್ತು ನಿಲಕತಾ. ಥಂಯ ತಿಗೆಲಿ ಝಗಝಗಿ ಭಾಂಗ್ರಾಚಿ ಗೆರಶಿ ಉದಕಾಂತು ಪೊವಂತಾ ಆಸ್ಸುಚಿ ದಿಸ್ತಾ. ಆತ್ತ ಗೆರಶಿ ವಯರಿ ಕಾಡಚಿ ಕಸ್ಸಿ."ಆಮ್ಮಾ ಆಮ್ಮಾ ಗೆರಶಿ ಬಾಂಯ್ತ್ರು ಪಳ್ಯಾ ಕಾಣು ದಿತ್ತವೆ?" ಮ್ಹಣು ನಿಮಿಗಿತಾ. ಹೆ ಆಯ್ಕುನು ತಿಗೆಲಿ ಆಮ್ಮಾ "ಅಯ್ಯೊ-ಹಾಂವೆ ಕಸ್ಸಿ ಕಾಡ್ಚಿ? ಮಜ್ಜಾನ ಜಾಯ್ನಾಬಾ...." ಮ್ಹಣಾಲಿ.ಆನ್ನಾಲಾಗ್ಗಿ ವಚ್ಚುನು "ಆನ್ನಾ-ಆನ್ನಾ ಬಾಂಯ್ತು ಮೆಗೆಲಿ ಭಾಂಗ್ರಾಚಿ ಗೆರಶಿ ಪಳ್ಳಾ. ತು ತೀ ಕಾಣು ದಿತ್ತವೆ?" ಮ್ಹಣತಾ."ಅಯ್ಯೋ - ಹಾಂವೆ ಬಾಂಯ್ತು ಕಸ್ಸಿ ದೆಂವ್ಚೆ? ತಾಜ್ಜೆ ಬದಲಾಕ ತಾಜ್ಜಾಕಯಿ ಚಂದಿ ಗೆರಶಿ ಹಾಂವ ಕರವ್ನು ದಿತ್ತಾ. ಜಾಯನಾಂವೆ" ಮ್ಹಣಾಲೊ ತಿಗೆಲೊ ಆನು. ತೆ ಆಯ್ಕುನು ಪದ್ಮಾವತಿಕ ರಣ್ಯ ಯೆತ್ತಾ. ತೀ ರಡ್ತಽಚಿ ತೆ ಬಾಂಯ್ಚೆ ಲಾಗ್ಗಿ ವತ್ತಾ ಆನಿ ಬಾಂಯ್ತು ನಿಲ್ಕುನ್‌ನಿಲ್ಕುನು ತಿ ಗೆರಶಿ ಪಳವ್ನು ರಡತಾ. ತಿಗೆಲಿ ಪ್ರೀತೀಚಿ ಗೆರಶಿ ತಿ. ತಾಜ್ಜೆ ಬದಲಾಕ ದುಸ್ರಿ ಕಿತಲಿ ಚಂದಿ ಆಸ್ಸಿಲಿ ದಿಲ್ಯಾರಿ ನಾಕ್‌ತಿಕ್ಕಾ. ತೇಽಚಿ ವೇಳಾರಿ ಥಂಯ ದಾಕುನು ಗೊರ್‍ವಾಂಕ ಆಂಬುಡ್ಚೊ ಏಕ್ಲೊ ಚೆಲ್ಲೊ ವತ್ತಽಚಿ ಆಸ್ಸಿಲೊ. ತಾಕ್ಕಾ ಪಳವ್ನು ಪದ್ಮಾವತಿಕ ಖುಶಿ ಜಾತ್ತಾ. ಹೊ ಚೆಲ್ಲೊ ಮೆಗೆಲಿ ಗೆರಶಿ ಕಾಣು ದಿತ್ತಲೊ ಮ್ಹಣು ಚಿಂತುನು "ವೈರೆ ಚೆಲ್ಯಾ, ಮೆಗೆಲಿ ಗೆರಶಿ ಬಾಂಯ್ತು ಪಳ್ಳಾ. ಕಾಣು ದಿತ್ತವೆ?"ಮ್ಹಣಾಲಿ. ತೆದನಾ ತೊ ಚೆಲ್ಲೊ ರಾಯಾಲೆ ಧುವ ಪದ್ಮಾವತಿಕ ನಿಯಾಳ್ ನಿಯಾಳ್ನು ಪಳಯಿತಾ. ತಿ ಸುರಸುಂದರಿ ನಂವೆ?ಚೆಲ್ಲೊ ಪದ್ಮಾವತಿಲೆ ಚಂದಾಯಿ ಪಳವ್ನು ಮನಾಂತು ಏಕಿ ಆಶಾ ಜಾಲ್ಲಿ. ಹಿಕ್ಕಾ ಕಸ್ಸಿ ಜಾವೊ ವ್ಹಾರ್ಡಿಕ ಕರ್‍ನ ಘೆವ್ಕಾ ಮ್ಹಣು ಚಿಂತುನು "ತುಗೆಲಿ ಗೆರಶಿ ಬಾಂಯ್ತು ದಾಕುನು ಕಾಣು ದಿತ್ತಾ. ಜಾಲ್ಯಾರಿ ತುವೆ ಮಾಕ್ಕಾ ವ್ಹಾರ್ಡಿಕ ಕರ್‍ನ ಘೆತ್ತಾ ಮ್ಹಣು ಭಾಸ ದಿವ್ಕಾ. ಮ್ಹಳ್ಯಾರಿ ತು ಮೆಗೆಲಿ ಬಾಯಲ ಜಾವ್ಕಾ. ಕಳ್ವೆ?" ಮ್ಹಣಾಲೊ.ತಿಗೆಲಿ ಪ್ರೀತೀಚಿ ಗೆರಶಿ ಕಾಣು ದಿವ್ಕಾ ನಂವೆ? ತಾಜ್ಜೆ ಖಾತೀರ ಪದ್ಮಾವತಿ ಮಾತ್ತೆ ಹಾಲಯಿತಾ ಆನಿ "ಹೋ-ಹಾಂವ ತುಗೆಲಿ ಬಾಯಲ ಜಾತ್ತಾ" ಮ್ಹಣತಾ. ತೊ ಚೆಲ್ಲೊ ಬಾಂಯ್ತು ದೇವ್ನು ತಿಗೆಲಿ ಭಾಂಗ್ರಾಚಿ ಗೆರಶಿ ಕಾಣು ವಯರಿ ಹಾಣು ದಿತ್ತಾ. ಪದ್ಮಾವತಿಕ ತಿಗೆಲಿ ಮೋಗಾಚಿ ಗೆರಶಿ ಮ್ಹಳ್ಳಿ ಮ್ಹಣು ಖುಶಿಽ ಜಾತ್ತಾ. ತೆದನಾ ತೊ ಚೆಲ್ಲೊ ಮ್ಹಣಾಲೊ "ಯೋ ವಚ್ಚಾ ಆತ್ತ ತು ಮೆಗೆಲಿ ಬಾಯಲ ಜಾಲ್ಲಾ." ಹೆ ಆಯ್ಕುನು ಪದ್ಮಾವತಿ "ಹಾಂವ ಆತ್ತ ಸಾನಿ ನ್ಹಂವೆ? ಹೋಡಿ ಜಾತ್ತಚಿ ಯೆತ್ತಾ." ಮ್ಹಣ್ತಾ.ತಸ್ಸಿಂಚಿ ತೊಡೆ ಕಾಲಾ ನಂತರ ಪದ್ಮಾವತಿ ಆನಿ ತೊ ಚೆಲ್ಲೊಯಿ ಹೋಡ ಜಾತ್ತಾಂಚಿ. ರಾಯು ರವಿವರ್ಮಾ ತಾಗೆಲಿ ಚಂದಿ ಧುವೆಕ ವ್ಹಾರ್ಡಿಕ ಕರ್‍ಚೆ ಖಾತೀರ ಚೆಲ್ಲೊ ಪಳವ್ಚಾಕ ಸುರುಕರತಾ. ಬೆಳ್ತಂಗಡಿ ಲಾಗ್ಗಿ ಆಸ್ಸುಚೆ ಶಿಶಿಲ ಮ್ಹಳ್ಳಲೆ ಗಾಂವ್ಚೆ ರಂಗರಾಯಾಲೊ ಏಕೂಚಿ ಪುತು ಶಾಂತಾರಾಮಾಕ ದಿವ್ಚೆ ಮ್ಹಣು ದೊನ್ನಿ ರಾಯ ನಿಶ್ಚಯ ಕರ್‍ತಾಚಿ. ಶಾಂತಾರಾಮುಂಯಿ ಸುಂದರರಾವಣು. ತಾಕ್ಕಾ ಪದ್ಮಾವತಿಕ ಪಳವ್ನು, ಪದ್ಮಾವತಿ ಶಾಂತಾರಾಮಾಕ ಪಳವ್ನು ಖುಸಿಽ ಜಾತ್ತಾ. ಲಗ್ನಾಚೆ ತಯಾರಿ ಸುರು ಜಾತ್ತಾ. ರಾಯಾಲೆ ಧುವೆಕ ಲಗ್ನ ಮ್ಹಣು ತೆ ಗೋರ್‍ವಾಂಕ ಚರಯಿತಲೊ ಚೆಲ್ಲೊ ಆಸ್ಸ ನಂವೆ ತಾಕ್ಕಾ ಕಳ್ತಾ. ತೊ ತುರಂತ್ ಯೇವ್ನು ರಾಯಾಲಿ ಧುವ ಪದ್ಮಾವತಿಕ ಮ್ಹೆಳ್ನು "ತುವೆ ಹೋಡಿ ಜಾತ್ತರಿ ಮೆಗೆಲೆ ಒಟ್ಟು ಯೆತ್ತಾ ಮ್ಹಣು ಸಾಂಗಿಲೆ ನಂವೆ? ಆತ್ತ ತು ಹೋಡಿ ಜಾಲ್ಲಾ. ಯೋ ಮೆಗೆಲೆ ಒಟ್ಟು ವಚ್ಚಾ." ಮ್ಹಣಾಲೊ. ಪಾಪ ಚೆರ್ಡು ಆಸ್ತನಾ ಸಾಂಗಿಲೆ ತಿಕ್ಕಾ ವಿಸೊರ್ನು ಗೆಲ್ಲಾ."ಹಾಂವೆ ಕೆದನಾ ಸಾಂಗಿಲೆ ತುಗೆಲಾಗ್ಗಿ. ತುಗೆಲಾಗ್ಗಿ ಹಾಂವ ಉಲ್ಲಯಿನಿ ಥಾಂಯಿ. ತೂ ವಽಸ ಪಳವ್ಯಾ ತೆಕಡೆ. ತುಗೆಲೆ ಒಟ್ಟು ಖಂಯಿ ಯೆವ್ಚೆ?" ಮ್ಹಣಾಲಿ ಪದ್ಮಾವತಿ. ಹೆ ಆಯ್ಕುನು ತೆ ಚೆಲ್ಲ್ಯಾಕ ರಾಗ ಆಯಿಲೊ. "ಸಿಕೆತಾ ತುಕಾ ಬುದ್ದಿ!" ಮ್ಹಣು ಮನಾಂತೂಚಿ ಚಿಂತುನು ಘರಕಡೆ ವತ್ತಾ. ರಾತ್ರಿ ಪದ್ಮಾವತಿನ ನಿದ್ದೊಂಚೆ ಮಾಳೆಚೆ ತೊಗ್ಗು ಯೆವ್ನು ವಣತಿ ಖೊಂಡಿತಾ. ತಾಜ್ಜೊ ಶಬ್ದು ಪದ್ಮಾವತಿಕ ಆಯ್ಕುನು, ತೀ ತಿಗೆಲೆ ಆಮ್ಮಾಕ ಆಪ್ಪೊವ್ನು "ಆಮ್ಮಾ, ಆಮ್ಮಾ ಪೋರು ಮಾಳೊ ಖೊಂಡಿತಾ." ಮ್ಹಣಾಲಿ."ನೈಗೊ ಪುತಾ, ತೊ ಶಬ್ಧು ಸೋನಾರಾನ ಭಾಂಗರ ಪೆಟ್ಟುಚೊ" ಮ್ಹಣಾಲಿ ತಿಗೆಲಿ ಆಮ್ಮಾ. ತೆದನಾ ಪದ್ಮಾವತಿ ಆನ್ನಾಕ ಆಪ್ಪೊವ್ನು "ಆನ್ನಾ, ಆನ್ನಾ, ಪೋರು ಮಾಳಿ ಖೊಂಡಿತಾ." ಆನು ಮ್ಹಣಾಲೊ "ನೈಗೊ ಪುತಾ, ಕೇಳಿಃ ಹೆಡೊ ಗಡಗಡ್ತಾ."ಪೋರು ಮಾಳ್ಯೆಚಿ ವಣತಿಕ ಹೋಡು ಓಟ್ಟೊ ಕಾಡ್ತಾ, ಆನಿ ಪದ್ಮಾವತಿಕ ಉಬಾರ್‍ನು ಘೇವ್ನು ತೊಗ್ಗು ದೆಂವ್ತಾ. ತೊಗ್ಗು ದೆಂವ್ತರಿ ಚಮ್ಕಾನು ವರ್‍ತ ರಾಬ್ತಾ. ಪದ್ಮಾವತಿಕ ನಿದ್ದಾ ದೊಳ್ಯಾಂತು ಚಮ್ಕುಚಾಕ ಜಾಯ್ನಾ. "ಮಾಕ್ಕಾ ಚಮ್ಕುಚಾಕ ಜಾಯ್ನಾ, ಹಾಂವ ಯೇನಾ."ಮ್ಹಣಾಲಿ. ತೆ ವೇಳಾರಿ ತೊ ಪೋರು ಸಾಂಗ್ತಾ "ಚಮ್ಕುಕಾ ಬಾಳೆ, ತುಜ್ಜೆ ನಿದ್ದಾಂತುಲೆ ದೋಳೆ,ಪಾಯ್ಯಾಘಾಲ್ಲೆಲೆ ವಾಳೆ,ನಿಮಿತಿ ಚಮ್ಕುಂಚಾಕ ಪಳೆ"ಅಶ್ಶಿ ಮ್ಹಣು ತಿಗಲೆ ಪಾಯ್ಯಾ ವಾಳೆ ಕಾಡ್ತಾ. ತೀ ವಾಪಾಸ "ಮಾಕ್ಕಾ ಚಮ್ಕುಂಚಾಕ ಜಾಯ್ನಾ. ಹಾಂವ ಯೇನಾ." ಮ್ಹಣಾಲಿ. ತೋ ವಾಪಸ:- "ಚಮ್ಕುಕಾ ಬಾಳೆ ತುಜೆ ನಿದ್ದಾಂತುಲೆ ದೋಳೆ,ಕುರ್ಟಾ ಘಾಲ್ಲೆಲ್ ಪಾಟ್ಟೆ, ನಿಮಿತಿ ಚಮ್ಕುಚಾ ಜಾಯ್ನಾ ಪಳೆ"ಮ್ಹಣು ರಾಯಾ ಧುವ್ವೆಲೊ ಕುರ್ಟಾ ಪಾಟ್ಟೊ ಕಾಡ್ತಾ.ಅಶ್ಶಿ ತೊ ಪೋರು ತಿಗೆಲೆಂ ಪೂರಾಯಿ ಭಾಂಗರ ಕಾಣು ಘೆತ್ತಾ. ತಿತ್ಲೆ ಮ್ಹಣ್ತನಾ ತಾಗೆಲೆ ಗುಡಸಲ ಆಯಿಲೆ. ಥಂಯ ತಿಕಾ ಏಕ ಕೂಡಾಂತು ಘಾಲ್ತಾ. ರಾಯಾ ಧುವ ಜಾಗಿ ಜಾವ್ನು ಪಳಯಿತಾ ಆನಿ ರೊಡುಕ ಸುರುಕರ್‍ತಾ. "ಮಾಕ್ಕಾ ಶಿಶಿಲಾಚೆ ರಂಗರಾಯಾಲೆ ಪುತು ಶಾಂತಾರಾಮಾಲೆ ಒಟ್ಟು ಆಜಿ ವ್ಹಾರ್ಡಿಕ. ಬಾಗಿಲ ಕಾಡಿ ಆನಿ ಮಾಕ್ಕಾ ವಚ್ಚಾಕ ಸೋಡಿ" ಮ್ಹಣು ಮಸ್ತ ರಡ್ತಾ. ತೆದನಾ ಪೋರು ಲೆಕ್ತಾ `ಹ್ಯಾ ರಾಯಾ ಪುತು ಶಾಂತಾರಾಮಾಕ ದಿವ್ಶಿ ಮಾರ್‍ಲ್ಯಾರಿ ಹಾಂವೆ ಪದ್ಮಾವತಿಕ ವ್ಹಾರ್ಡಿಕ ಕರ್‍ನ ಘೆವೆತ. ತಿ ಮಾಕ್ಕಾಚಿ ಮ್ಹೆಳ್ತಾ.' ಮ್ಹಣು ಚಿಂತುನು ತಾಗೆಲೆ ಸುಣ್ಯಾಕ ತಿಕ್ಕಾ ರಾಕ್ಕುಕ ತೀಣೆ ಆಸ್ಸುಚೆ ಕೂಡಾಚೆ ಬಾಗ್ಲಾಚೆ ಬಾಯರ ರಾಬ್ಬೊವ್ನು ತೊ ರಂಗರಾಯಾಲೊ ಪುತು ಶಾಂತಾರಾಮಾಕ ದಿವ್ಶಿ ಮ್ಹಾರ್‍ಚೆ ಕಾತೀರ ಶಿಶಿಲಾಕ ಬಾಯರ ಸರತಾ. ಹೆ ಪೋರಾನ ಶಿಶಿಲಾಕ ವಚ್ಚುನು ಪಾವ್ತನಾ ಥಂಯ ಶಾಂತಾರಾಮು ವ್ಹರೆತು ಜಾವ್ನು ಲಗ್ನಾಕ ತಯಾರ ಜಾತ್ತ ಆಸ್ಸಿಲೊ. ಹೋ ಪೋರು ಸೀದಾ ತಾಗೆಲಾಗ್ಗಿ ವಚ್ಚುನು ತಾಕ್ಕಾ ಮಾರ್‍ನು ಘಾಲ್ತಾ. ತಾಗೆಲೆ ಮಡೆ ಹಾಣು ರಾಯಾಲಿ ಧುವ ಪದ್ಮಾವತಿಕ ದಾಕ್ಕಯಿತಾ. ಆನಿ ಮಡೆ ಲಾಸ್ಸುನು ಘಾಲ್ತಾ. ಹೆ ಸಕ್ಕಡ ಪಳವ್ನು ಪದ್ಮಾವತಿ ತೆ ಕೂಡಾಚೆ ಬಾಗಿಲ ಮಸ್ತುನು, ಭೆತ್ತುನು ಬಾಯರ ಯೆತ್ತಾ. ಆಪ್ಣ್ಯಾಲೆ ಒಟ್ಟು ಲಗ್ನ ಜಾವ್ಕಾ ಜಾಲ್ಲಲ್ಯಾಲೆ ಮ್ಹಡೆ ಲಾಸ್ಸುನು ವಚ್ಚೆ ಪಳವ್ನು ಮಸ್ತ ದುಃಖ ಪಾವ್ತಾ. ಲಗ್ನ ಜಾವ್ಕಾ ಜಾಲ್ಲಲೊ ಶಾಂತಾರಾಮೂಚಿ ನಾತ್ತಿಲೆ ನಿಮಿತಿ ಹಾಂವೆ ವಾಂಚುನು ಕಸ್ಸಲೆ ಕರ್‍ಚೆ ಮ್ಹಣು ತಿವಯಿ ತೇಚಿ ಉಜ್ಜಾಂತು ಉಡ್ಡುನು ಮರ್‍ತಾ. ತೆ ಪಳವ್ನು ಪೋರಾನ ತಿಕ್ಕಾ ರಾಕ್ಕುಕ ಬಸಯಿಲ್ಯಾಲೆ ಸೂಣೆ ತಿಕ್ಕಾ ಉಜ್ಜಾಂತು ಉಡ್ಡುಕ ಸೊಳ್ಳೆಲೆ ಖಾತೀರ ಪೋರು ಮಾಕ್ಕಾ ಮಾರುಕ ಯೆತ್ತಲೊ ಮ್ಹಣು ಭಿವ್ನು ತೆವಂಯಿ ಉಜ್ಜಾಂತು ಉಡ್ತಾ ಆನಿ ಮರ್‍ತಾ. ಹೆ ಸಕ್ಕಡ ಏಕ ಕ್ಷಣ ಭಿತ್ತರಿ ಜಾಲ್ಲೆ. ಪೋರಾಕ ಹೆ ಪಳವ್ನು ಭಯ್ಯ ಭಯ್ಯ ಜಾತ್ತಾ ಆನಿ ದುಃಖಯಿ ಜಾತ್ತಾ. ಕೋಣಾ ಖಾತೀರ ಹಾಂವೆ ಹೆ ಕೆಲ್ಲೆಲೆ. ತಿ ಮಾಕ್ಕಾ ಮ್ಹೆಳ್ನಿಕಿ ಹಾಂವೆ ಕಸಲ್ಯಾಕ ವಾಂಚುನು ವರಕಾ ಮ್ಹಣು ಚಿಂತುನು ತೊವಯಿ ತೇಚಿ ಉಜ್ಜಾಂತು ಉಡ್ಕಿ ಮಾರ್‍ನು ಮರ್‍ತಾ.
ಥೋಡೆ ಕಾಳಾನಿ ಶಾಂತಾರಾಮು ತೆ ಜಾಗ್ಯಾರಿ ಗಾಂಧಾಚೊ ರೂಕು ಜಾತ್ತಾ. ತಾಜ್ಜೆ ಲಾಗ್ಗಿಚಿ ಪದ್ಮಾವತಿ ವೊವಳಾಚೊ ರೂಕು ಜಾತ್ತಾ. ತೊ ಪೋರು ಆನಿ ಸೂಣೆ ಕಾಟ ರೂಕ ಜಾತ್ತಾಂಚಿ.
--------೦೦೦೦೦೦೦-------
ಹೀ ಕಾಂಣಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.