ಭಾಂಗ್ರಾಚಿ ಗೆರಶಿ ಮ್ಹಳ್ಳಲೆ ಕಾಂಣಿಂತು ಸಾಂಗಿಲ್ಯಾವರಿ ಬಂಟ್ವಾಳ-ಧರ್ಮಸ್ಥಳ ವಾಟೆರಿ ಪುಡೆ ಕಾಳಾಂತು ಸಾನ್ನ್ಸಾನ್ನ ಗಾಂವ್ ರಾಯಾನ ಆಳ್ವಿಕೆ ಕರ್ಚೆ ಆಸ್ಸಿಲೆಂಚಿ. ತೆದನಾ ತೆ ಗಾಂವ್ ಸಕ್ಕಡ ದೇಶ ಮ್ಹಣೊನು ಘೆತ್ತಲೆ. ಯಿತ್ಯಾಕ ಮ್ಹಳ್ಯಾರಿ ತೆ ಗಾಂವ್ ದುಸ್ರೆದುಸ್ರೆ ರಾಯಾಲೆ ವಶಾಂತು ಆಸ್ಸುನು ತಾನ್ನಿ ತೆ ವಿಸ್ತಾರ ಕರ್ಚೆ ಕಾತೀರ ಲಾಗ್ಗಿ ದೇಶಾಚೆ ವಯರಿ ಯುದ್ಧಾಕ ವತ್ತಲೆ ಆನಿ ತಾಂಕಾ ಸೊಲ್ವಾನು ತಾಂಗೆಲೆ ದೇಶ ಹಾಗೆಲೆ ದೇಶಾಂತು ಕುಡ್ಸಾನು ಹೊಡ ಕರ್ನು ಘೆತ್ತಲಿಂಚಿ. ತಸಲೊ ಏಕ ಗಾಂವು ಬೆಳ್ತಂಗಡಿ. ಥಂಯಿ ಏಕ ರಾಯು ಆಸ್ಸಿಲೊ. ತಾಗೆಲೆ ನಾಂವ್ ಮಾಧವರಾಯು. ತಾಗೆಲಿ ಬಾಯಲ (ರಾಣಿ) ಸುಲೋಚನಾ ಮ್ಹಣು. ತಾಕ್ಕಾ ತೇಗ್ ಚೆರ್ಡುಂವ. ಸುರುವೆಚೊ ಚೆಲ್ಲೊ ದಯಾನಂದ ಮ್ಹಣು. ದೊನ್ನಿಚಿ ಚೆಲ್ಲಿ ಜಾನಕಿ. ತಿಗೆಲಿಂಚಿ ಕಾಂಣಿ ಹಿ. ತಿನ್ನಿಚೊ ಪುತು ವಾಮನು. ಆಮ್ಗೆಲೆ ಕಾಂಣಿಚಿ ಜಾನಕಿ ಖೂಬ ಚಂದಿ ಸೊಬಿತ ಆಸ್ಸಿಲಿ. ತಿಕ್ಕಾ ರುಪ್ಯಾಚೊ ಕೇಸು, ಬಾಂಗ್ರಾಚೆ ನಾಂಕೂಟ ಆಸ್ಸಿಲೆ. ತಿ ಕಿತಲಿ ಚಂದಿ ಮ್ಹಳ್ಯಾರಿ ತಿಕ್ಕಾ ಪಳಯಿತನಾ ರಾಮಾಯಣಾಂತುಲಿ ರಾಮಾಲಿ ಬಾಯಲ ಸೀತಾದೇವಿಲೊಚಿ ಉಗಡಾಸು ರಾಯಾಕ ಆನಿ ರಾಣಿಕ ಯೆತ್ತಲೆ ನಿಮಿತಿ ತಾನ್ನಿ ತಿಕ್ಕಾ ಜಾನಕಿ ಮ್ಹಣೂಂಚಿ ನಾಂವಾಂಯಿ ದವರಲೆಲೆ. ಪುಡೆ ಕಾಲಾಂತು ಆತ್ತ ಆಸ್ಸುಚೆ ತಸ್ಸಿ ಸ್ಕೂಲ ಕಾಲೇಜ್ ನಾತ್ತಿಲೆ. ತೆದನಾ ಋಷಿಮುನಿನ ತಾಂಗೆಲೆ ಘರಕಡೆ ಮ್ಹಳ್ಯಾರಿ ತಾಂಗೆಲೆ ಆಶ್ರಮಾಂತು ಸಿಕ್ತಲೆ ಚೆರ್ಡುಂವಾಂಕ ಥಂಯಿಂಚಿ ರಾಬ್ಬೊವುನು ಸಿಕೊಚೆ. ತಸ್ಸಿಚಿ ಹೆ ಬೆಳ್ತಂಗಡಿಚೆ ರಾಯಾನಂಯಿ ತಾಗೆಲೆ ದೊಗ್ಗ ಚೆಲ್ಲ್ಯಾ ಚೆರ್ಡುಂವ ದಯಾನಂದ ಆನಿ ವಾಮನಾಂಕ ತಾಗೆಲೆಂಚಿ ಗಾಂವಾಂಚೆ ಮುಂಡಾಚೆ ಮ್ಹಳ್ಳಲೆ ಏಕ ಸಾನಿ ಹಳ್ಳಿಂತು ಆಸ್ಸುಚೆ ಋಷಿಲೆ ಆಶ್ರಮಾಂತು ಸಿಕೊವ್ಚಾಕ ರಾಬ್ಬಯಿತಾ. ತೆ ಕಾಲಾರಿ ತಾಂಕಾ ಸಕ್ಕಡ ವಿದ್ಯಾ ಏಕ್ಕಽ ಕಡೆನ ಮ್ಹೆಳ್ತಲಿ. ತೊ ಋಷಿಚಿ ಚೆರ್ಡುಂವಾಕ ಬಿಲ್ಲುವಿದ್ಯೆ, ವೇದ, ಪುರಾಣ ಆನಿ ಇನ್ನಿತರ ವಿಷಯಾಂತು ಪಾರಂಗತ ಕರ್ತಲೆಂಚಿ. ತಾಂಗೆಲಿ ವಿದ್ಯಾ ಪೂರ್ಣ ಜಾತ್ತರಿಂಚಿ ತಾನ್ನಿ ಥಂಯಿ ದಾಕುನು ತಾಂಗೆಲೆ ಘರಕಡೆ ವಚ್ಚೆ. ತಸ್ಸಿಂಚಿ ಮಾಧವರಾಯಾಲೆ ಪೂತ ದಯಾನಂದ ಆನಿ ವಾಮನ ಹಾಂಗೆಲೆ ಸಿಕ್ವಣ ಸಾಂಪತರಿ ತಾನ್ನಿ ತಾಂಗೆಲೆ ಘರಕಡೆ ಬೆಳ್ತಂಗಡಿಕ ಯೆತ್ತಾಚಿ. ತೆದನಾ ತಾನ್ನಿ ಪ್ರಾಯೆಕ ಆಯಿಲಾಂಚಿ. ತಾನ್ನಿ ಗಾಂವಾಂಕ ಯೆತ್ತಾಚಿ ಮ್ಹಣು ಕಳ್ನು ರಾಯಾನ ರಾವ್ಳಾರಾಂತು ಗಮ್ಮತ ಸಮಾರಂಭುದವರ್ಲಾ. ಸಗ್ಳೆ ಗಾಂವಾಂತು ಶೃಂಗಾರು ಕರುಕ ಸಾಂಗ್ಲಾ. ತಸ್ಸಿಂಚಿ ಚೆರ್ಡುಂವ ಆಯಿಲಿಂಚಿ. ಗಾಂವಾಂಚೆ ಜನ ಆನಿ ರಾವ್ಳಾರಾಂತುಲೆ ಜನ ತಾಂಕಾ ಸ್ವಾಗತ ಕರ್ತಾಂಚಿ. ತೆದುಸು ಸಗ್ಳೆ ಗಾಂವಾಂಚೆ ಜನಾಂಕ ರಾಯಾನ ಗಮ್ಮತ ಜವಣ ದಿಲ್ಲೆ. ತಸ್ಸಿಂಚಿ ಏಕ ದಿವಸು ವಾಮನು ನ್ಹಾವ್ಚಾಕ ಮ್ಹಣು ವತ್ತನಾ ಥಂಯಿ ತಾಕ್ಕಾ ರುಪ್ಯಾಚೊ ಕೇಸು ಆನಿ ಬಾಂಗ್ರಾಚೆ ನಾಂಕುಟ ಮ್ಹೆಳ್ತಾ. ತೆ ಪಳವ್ನು ವಾಮನಾಂಕ ಹೇಂಚಿ ಇತ್ಲೆ ಚಂದ ಆಸ್ಸ. ಹೆ ಆಸ್ಸಿಲಿ ಚೆಲ್ಲಿ ಕಿತ್ಲಿ ಚಂದಿ ಆಸ್ಸತ. ತಿಕ್ಕಾಚಿ ಹಾಂವೆ ವ್ಹಾರ್ಡಿಕ ಕರ್ನು ಘೆವ್ಚೆ ಮ್ಹಣು ಮನಾಂತು ಲೆಕ್ಕುನು ತೊ ತಾಗೆಲೆ ಆಮ್ಮಾಲಾಗ್ಗಿ ವಚ್ಚುನು ಕೇಸು ಆನಿ ನಾಂಕುಟ ತಿಕ್ಕಾ ದಾಕವ್ನು "ಹೆ ಆಸ್ಸಿಲೆಕಚಿ ಹಾಂವೆ ವ್ಹಾರ್ಡಿಕ ಕರ್ನು ಘೆವ್ಚೆ" ಮ್ಹಣ್ತಾ. ತೆದನಾ ತಾಗೆಲಿ ಆಮ್ಮಾ "ಪುತಾ ಹೆ ಆಸ್ಸುಚೆ ತುಗೆಲಿ ಬಾಯಣಿ ಜಾನಕಿಕ. ತಸ್ಸಿ ಜಾವ್ನು ತುವೆ ತಿಕ್ಕಾ ವ್ಹಾರ್ಡಿಕ ಕರ್ನು ಘೆವ್ಚಾಕ ಜಾಯ್ನಾ. ತುಕ್ಕಾ ಚಂದಿ ದುಸ್ರಿ ಚೆಲ್ಲಿ ಪಳವ್ಯಾ." ಮ್ಹಣಾಲಿ. ಕಸ್ಸಲೆ ಸಾಂಗ್ಲಾರಿ ವಾಮನು ಆಯ್ಕನಾ. ತಾಕ್ಕಾ ತಾಣೆ ಸಾಂಗಿಲೆಚಿ ಜಾವ್ಕಾ."ತುಮ್ಮಿ ತಿಗೆಲೆ ಸಂಗಾತಚಿ ಮೆಗೆಲಿ ವ್ಹಾರ್ಡಿಕ ಕರುಕಾ. ನ್ಹಂಹಿ ಜಾಲ್ಯಾರಿ ಹಾಂವ ಪೊಟ್ಟಾಕ ಕಸ್ಸಲೆ ಘೆನಾಸ್ಸಿ ಜೀವು ಸೊಡ್ತಾ." ಮ್ಹಣು ಅನ್ನ ಉದ್ದಕ ಘೆನ್ನಾಸ್ಸಿ ಹಟ ಕರ್ತಾ. ಕೊಣಾಕರಯಿನ ಸಾಂಗ್ಲ್ಯಾರಿ ವಾಮನು ಆಯ್ಕನಾ. ಹೊ ವಿಷಯು ತಾಗೆಲಿ ಬಾಯಣಿ ಜಾನಕಿಕ ಕಳ್ತಾ. ತಿ ಆಮ್ಮಾಲಾಗ್ಗಿ "ಮಾಕ್ಕಾ ಹಿ ವ್ಹಾರ್ಡಿಕ ಖುಸಿ ನಾ." ಮ್ಹಣು ರಡ್ತಾಚಿ ಸಾಂಗ್ತಾ. ಆವ್ಸು ತಿಕ್ಕಾ ಸಮಾಧಾನ ಕರತಾ. "ತುಕ್ಕಾ ದುಸ್ರೆ ಕಡೆನ ವ್ಹಾರ್ಡಿಕ ಕರ್ನು ದಿಲ್ಲ್ಯಾರಿ ಹೆ ಘರಕಡೆ ದಾಕುನು ಪೆಟೊವ್ಕಾ ಜಾತ್ತ ನ್ಹಂವೆ. ಥಂಯ ತುಕ್ಕಾ ಕಸ್ಸಲೆ ಕಷ್ಟ ಆಯಿಲೆ ಜಾಲ್ಯಾರಿ ಪಳವ್ಚಾಕ ಆಮ್ಕಾ ಕಷ್ಟ ನ್ಹಂವೆ? ತುವೆ ಹಾಂಗಾಚಿ ಆಸ್ಲ್ಯಾರಿ ಆಮ್ಕಾಯಿ ಸುಲಭ, ತುಕಾಯಿ ತುಗೆಲೆ ಘರ ಸೊಣು ವಚ್ಚುಕ ಮ್ಹಣು ನಾ." ಮ್ಹಣತಾ.ಹೆ ಆಯ್ಕುನು ಜಾನಕಿಕ ಮಾತ್ಯಾರಿ ಫಾತ್ತೊರು ಘಾಲ್ಯಾವರೀಚಿ ಜಾತ್ತಾ. ಕಸ್ಸಲ್ಯಾಕ ಮ್ಹಳ್ಯಾರಿ ಆವ್ಸೂಚಿ ಭಾವಾಕ ವ್ಹಾರ್ಡಿಕ ಕರ್ನು ಘೆ ಮ್ಹಣು ಸಾಂಗ್ಲಾರಿ ತಿಣೆ ತಿಗೆಲೆ ಕಷ್ಟ ಕೊಣಾಲಾಗ್ಗಿ ಸಾಂಗ್ಚೆ. ತಸ್ಸಿ ಜಾನಕಿ ರೊಣು ಬಸ್ತಾ. ತೆ ವೇಳಾರಿ ತಿಗೆಲಿ ಏಕಿ ಸಖಿ ಸಾಂಗ್ತಾ "ಹಾಂಗಾಚಿ ಏಕ್ಲಿ ಮ್ಹಾಂತಾರಿ ಆಸ್ಸ. ತಿ ತುಕ್ಕಾ ಕಸ್ಸಲೆ ಜಾವೊ ಏಕ ಉಪಾಯ ಸಾಂಗುನು ದಿತ್ತಲಿ. ತಿಗೆಲಾಗ್ಗಿ ವಚ್ಚಾ." ಮ್ಹಣು ತಿಕ್ಕಾ ಏಕ ಮ್ಹಾಂತಾರಿಲಾಗ್ಗಿ ಆಪವ್ನು ವರ್ತಾ. ತೆ ಮ್ಹಾಂತಾರಿಲಾಗ್ಗಿ ಜಾನಕಿ ತಿಗೆಲೆ ಕಷ್ಟ ವಿವರಕರ್ನು ಸಾಂಗ್ತಾ ಆನಿ ರಡ್ತಾ. "ತು ಕಾಂಯಿ ಭಿವನಕ್ಕಾ. ಹಾಂವ ತುಕ್ಕಾ ತೀನಿ ಫಾತ್ತೊರು ದಿತ್ತಾ. ತುವೆ ಘರಕಡೆ ವತ್ತರಿ ಏಕ ಫಾತ್ತೊರು ತುಮ್ಗೆಲೆ ಬಾಂಯಿಂತು ಘಾಲಿ. ತೆ ಬಾಂಯಿಂತು ಆಸ್ಸಿಲೆ ರುಕ್ಕಾಕ ಮೆಟ್ಟ ಜಾತ್ತಾಚಿ. ತೆ ಚೋಣು ತೆ ರುಕ್ಕಾರಿ ಚಡ ಆನಿ ಏಕ ಘೆಲ್ಲ್ಯಾರಿ ಬಯ್ಸುನು ಆನ್ನೆಕು ಫಾತ್ತೊರು ತೆ ಮೆಟ್ಟಾಚೆ ವಯರಿ ಘಾಲಿ. ತೆ ಮೆಟ್ಟ ವತ್ತಾಚಿ. ದುಸ್ರೆ ಕೊಣಾಕಂಯಿ ತೆ ರುಕ್ಕಾರಿ ಚೋಡುಕ ಜಾಯ್ನಾ. ತಿನ್ನಿಚೊ ಫಾತ್ತೊರು ತುವೆ ಬಸ್ಸಿಲೆ ಘೆಲ್ಲ್ಯಾವಯರಿ ಘಾಲಿ. ಥಂಯ ತುಕ್ಕಾ ಆರಾಮಜಾವ್ನು ಬಸ್ಚಾಕ, ನಿದ್ದೊಚಾಕ ಆನಿ ಖಾವ್ಚಾಕ-ಜವ್ಚಾಕ ಸಕ್ಕಡ ತಯಾರಜಾವ್ನು ಆಸ್ತಾ. ತು ಥಂಯ ಆರಾಮೆಽರಿ ಆಸ್ಸುವೆತ. ಮಾತ್ರ ನ್ಹಂಯಿ ತೊ ರೂಕು ವಾಡ್ತಚಿ ವ್ಹಯರಿ ವ್ಹಯರಿ ವತ್ತಾ." ಮ್ಹಣು ಸಾಂಗುವ್ನು ತಿ ಮ್ಹಾಂತಾರಿ ಜಾನಕಿಕ ತೀನಿ ಫಾತ್ತೊರು ದಿತ್ತಾ. ಹೆ ಆಯ್ಕುನು ಜಾನಕಿಕ ಖೂಸಿ ಜಾತ್ತಾ. ಮ್ಹಾಂತಾರಿಲೊ ಪಾಯು ಧರ್ತಾ ಆನಿ ಸಖಿ ಸಂಗಾತ ಘರಕಡೆ ವತ್ತಾ. ಘರಕಡೆ ವತ್ತರಿ ಜಾನಕಿ ಬಾಂಯ್ಚೆ ಲಾಗ್ಗಿ ವಚ್ಚುನು ಏಕ ಫಾತ್ತೊರು ಕಾಣು ತಾಂತು ಉಡ್ಡೈತಾ. ವ್ಹಯರಿತಾಂಯ ಮೆಟ್ಟ ಜಾತ್ತಾಂಚಿ. ಜಾನಕಿ ತೆ ಮೆಟ್ಟ ಚೋಣು ಸಟಸಟೀಚಿ ರುಕ್ಕಾರಿ ವಚ್ಚುನು ಏಕ ಘೆಲ್ಲ್ಯಾರಿ ಬಸ್ತಾ ಆನಿ ದೊನ್ನಿಚೊ ಫಾತ್ತೊರು ಕಾಣು ತೆ ಮೆಟ್ಟಾರಿ ಉಡ್ಡೈತಾ. ತೆ ಮೆಟ್ಟ ವತ್ತಾಂಚಿ. ತಿನ್ನಿಚೊ ಫಾತ್ತೊರು ತೀಣೆ ಬಸ್ಸಿಲೆ ಘೆಲ್ಲ್ಯಾವಯರಿ ಘಾಲ್ತಾ. ತೆ ಘೆಲ್ಲ್ಯಾರಿ ತಿಕ್ಕಾ ಬಸ್ಚಾಕ ಕುರ್ಚಿ, ಮೇಜ ಆನಿ ಮೇಜೆರಿ ತಿಕ್ಕಾ ಖಾವ್ಚಾಕ ಮಸ್ತಾ ಖಾಣ ಜವಣ ಜಾತ್ತಾ. ತೆ ಪಳವ್ನು ಜಾನಕಿಕ ಮಸ್ತ ಖೂಸಿಚಿ ಜಾತ್ತಾ. " ಆನಿ ಮಾಕ್ಕಾ ಕೊಣಾಚಾನಂಯಿ ಧರುಕ ಜಾಯ್ನಾ." ಮ್ಹಣು ಮನಾಂತೂಚಿ ಚಿಂತುನು ಆರಾಮೆಽರಿ ಥಂಯ ಬಸ್ತಾ. ಪೊಟಭಽರಿ ಖಾತ್ತಾ. ತಿಕ್ಕಾ ಸುಮಾರ ದೀಸ ದಾಕುನು ಸಮಚಿಽ ನಿದನಾತ್ತಿಲೆ ನಿಮಿತಿ ಕುರ್ಚೆರಿ ಬಸ್ಸಿಲೆ ಕಡೆನಽಚಿ ನೀದ ಪಡ್ತಾ. ಹಾಂಗಾ ಘರಕಡೆ ವ್ಹಾರ್ಡಿಕೆಕ ತಯ್ಯಾರಿ ಜಾತ್ತಽ ಆಸ್ಸ. ಎದುರಕಾಣ್ಸಣಿ ಜಾವ್ನು, ಫೂಲ ಮ್ಹಾಳುಕ ಚೆಲ್ಲೇಕ ಆಪ್ಪವ್ನು ಹಾಡಾ ಮ್ಹಣ್ತನಾ ಚೆಲ್ಲಿ ಖಂಯಿ ಆಸ್ಸ! ಘರಾಂತು ಚೆಲ್ಲಿಕ ಸೊದ್ದುಚಾಕ ಪಳ್ಳಿಂಚಿ. ತೊಚಿ ಏಕ ಗೊಂದೊಳು ಜಾಲ್ಲೊ "ಚೆಲ್ಲಿ ನಾ, ಚೆಲ್ಲಿ ನಾ. " ಮ್ಹಣು.ವ್ಹಾರ್ಡಿಕೆಕ ಆಯಿಲೆ ಜನ ಸಕ್ಕಡ ವಾಪಾಸ ವತ್ತಾಂಚಿ. ಮಾಧವರಾಯಾಕ ಆನಿ ರಾಣಿ ಸುಲೋಚನಾಕ ಅಳ್ಶೀಕ ಜಾತ್ತಾ. ವ್ಹರೆತು ಖಾಣ ಜವಣ ಸೊಣು ಬಾಗಿಲ ಘಾಲ್ನು ನಿದ್ದತಾ. ಹೆರದಿವಸು ಸುಲೋಚನಾ ತುಳ್ಸಿಕ ಉದ್ದಾಕ ಘಾಲುಕ ತಾಂಬಿಯೊ ಘೆವ್ನು ಬಾಂಯ್ಚೆಲಾಗ್ಗಿ ವಚ್ಚುನು ಉದ್ದಾಕ ಕಾಡ್ತನಾ ಬಾಂಯ್ಚೆ ಉದ್ಕಾಂತು ವ್ಹಯಲಿ ಸಾವ್ಳಿ ದಿಸ್ತಾ. ವ್ಹಯರಿ ಪಳಯ್ಲಾರಿ, ಜಾನಕಿ ಬಸ್ಲ್ಯಾ. ತೆ ಪಳವ್ನು ರಾಣಿ ಸುಲೋಚನಾ ಗೌಜಿ ಮಾರ್ತಾ. "ಜಾನಕಿ ಮ್ಹೆಳ್ಳಿ, ಜಾನಕಿ ಮ್ಹೆಳ್ಳಿ." ಮ್ಹಣು. ಜನ ಸಕ್ಕಡ ಬಾಂಯ್ಚೆಲಾಗ್ಗಿ ಯೆತ್ತಾಂಚಿ. ಮಾಧವರಾಯುಯಿ ಆಯಿಲೊ. ಜಾನಕಿಕ ಭಿಸ್ಟಾಯಿತಾಂಚಿ. ತಿ ತೆ ರುಕ್ಕಾರಿ ದಾಕುನು ಬಾಂಯಿಂತು ಪಡತ ಮ್ಹಣು ರಾಯು ಧುವೆಕ ಮೊಗಾಽನ ಆಪ್ಪಯಿತಾ."ಜಾನಕಿ, ಜಾನಕಿ ದೇಂವ ಬಾಳಾ, ಕೆಲ್ಲೆಲೆ ಖಾಣ ಖಾಂವೈತಾ" ಮ್ಹಣ್ತಾ. "ಹಾಂವ ಯೆನಾ. ತೂಂ ಎದ್ದೋಳಥಾಂಯಿ ಆನು ಜಾವ್ನು ಆಸ್ಸಿಲೊ ಆನಿ ಮಾಂವು ಜಾತ್ತಾ, ತಸ್ಸಿ ಜಾವ್ನು ಹಾಂವ ತೊಗ್ಗು ಯೆನಾ." ಮ್ಹಣ್ತಾ ಜಾನಕಿ. ಆವ್ಸು ಯೆವ್ನು ಮೊಗಾಽನ, "ಜಲ್ಜನ್ಜನಜಾನಕಿ, ಜಾನಕಿ, ವ "ಜಾನಕಿ, ಜಾನಕಿ ದೇಂವ ಬಾಳಾ.ಕುಂಕುಮಾ ಕರ್ಡೊ ಗುಡ್ ಗುಡೆತಾ." ಮ್ಹಣತಾ"ಹಾಂವ ಯೆನಾ ಆಮ್ಮಾ. ಎದ್ದೋಳಥಾಂಯಿ ತೂಂ ಮೆಗೆಲಿ ಆಮ್ಮಾ ಜಾವ್ನು ಆಸ್ಸಿಲಿ, ಆನಿ ಮಾಂಯಿ ಜಾತ್ತಾ. ತಸ್ಸಿ ಜಾವ್ನು ಹಾಂವ ತೊಗ್ಗು ಯೆನಾ." ಮ್ಹಣ್ತಾ. ಮಾಲ್ಗಡೊ ಭಾವು ಯೆತ್ತಾ ಆನಿ ಆಪ್ಪಯಿತಾ- "ಜಾನಕಿ, ಜಾನಕಿ ದೇಂವ ಬಾಳಾ.ಮೊಗಾರ್ಯಾಚೊ ಉಂಡೊ ಫುಲಯಿತಾ." ಮ್ಹಣ್ತಾ. "ನಾ, ಅಣ್ಣಾ, ಹಾಂವ ಯೆನಾ. ತೂಂ ಎದ್ದೋಳಥಾಂಯಿ ಮಾಕ್ಕಾ ಅಣ್ಣಾ ಆಸ್ಸಿಲೊ. ಆನಿ ತೂಂ ಭಾಯ್ಯೊ ಜಾತ್ತಾ. ಹಾಂವ ಯೆನಾ." ಮ್ಹಣ್ತಾ. ತೆದನಾ ತಿಗೆಲೊ ಧಾಕ್ಲೊ ಭಾವು ಯೆತ್ತಾ ಆನಿ "ಜಾನಕಿ, ಜಾನಕಿ ದೇಂವ ಬಾಳಾ, ಮೆಗೆಲೆ ಜೀವು ತಡಪಡ್ತಾ." ಮ್ಹಣಾಲೊ. "ಹಾಂವ ಯೆನಾ, ಎದ್ದೋಳಥಾಂಯ ತೂಂ ಮೆಗೆಲೊ ಭಾವು ಆಸ್ಸಿಲೊ, ಆನಿ ಬಾಮ್ಮುಣು ಜಾತ್ತಾ. ಹಾಂವ ಯೆನಾ." ಮ್ಹಣಾಲಿ. ಹೆ ಸಕ್ಕಡ ಆಯ್ಕುನು ಮಾಧವರಾಯಾಕ ಖಂಯಿ ನಾತ್ತಿಲೊ (ಕೋಪು)ರಾಗು ಯೆತ್ತಾ. "ಫಾಯಿ ತೊ ರೂಕೂಚಿಽ ಕಾತ್ರೆತಾ. ಮಾಗ್ಗಿರಿ ತೂ ಖಂಯಿ ವತ್ತಾ ಮ್ಹಣು ಪಳಯಿತಾ" ಮ್ಹಣು ಸಾಂಗುನು ತೊ ರೂಕು ಕಾತ್ತರ್ತಲ್ಯಾಂಕ ಸಾಂಗುನು ಪೆಟೆಯಿತಾ. ತೆ ಆಯಿಕುನು ಜಾನಕಿಕ ಕಸ್ಸಲೆ ಕರ್ಚೆ ಮ್ಹಣು ಕಳ್ನಾ. ಥಂಯಿಚಿ ರೋಣು ಬಸ್ತಾ. ರಾತಿ ಜಾತ್ತಾ. ತೆದುಸು ಪುನ್ನವ. ಆಕಾಶಾರಿ ಚಂದ್ರು ಉದಯ ಜಾಲ್ಲಾ. ತೆ ಪಳವ್ನು ಜಾನಕಿಕ ಥೋಡೆಽಚಿ ಧೈರ್ಯ ಯೆತ್ತಾ. ಆತ್ತ ಮಾಕ್ಕಾ ರಾಕ್ಚೆ ಜಾಲ್ಲ್ಯಾರಿ ಚಂದ್ರಾನ ಮಾತ್ರ. ರುಕ್ಕಾರಿ ದುಸ್ರೆ ಕೊಣ ಆಸ್ಸ. ಮ್ಹಣು ಚಿಂತುನು ತಿ ಚಂದ್ರಾಲಾಗ್ಗಿ ಮಾಗ್ಗುನು ಘೆತ್ತಾ. "ಚಂದ್ರಾ, ಚಂದ್ರಾ ಹಾಂವ ತುಗೆಲಿ ಆಮ್ಮಾ ಜಾತ್ತಾ. ಮಾಕ್ಕಾ ತುಗೆಲಾಗ್ಗಿ ವ್ಹರ." ತೆದನಾ ಚಂದ್ರು "ನಾಕಾಬಾ, ಮಾಕ್ಕಾ ಆಮ್ಮಾ ಆಸ್ಸ. ತೂ ನಾಕ್ಕಾ." ಮ್ಹಣಾಲೊ."ತಾವಳಿ ಹಾಂವ ತುಗೆಲಿ ಪಾಚ್ಚಿ ಜಾತ್ತಾ. ವ್ಹರ." ಮ್ಹಣ್ತಾ. "ಮಾಕ್ಕಾ ಪಾಚ್ಚಿ ಮಸ್ತ ಜನ ಆಸ್ಸಂಚಿ, ತೂ ನಾಕ್ಕಾ." ಮ್ಹಣಾಲೊ. "ತುಗೆಲಿ ಭಯಣಿ ಜಾತ್ತಾ, ಏಕ ಪಂತಾ ಮಾಕ್ಕಾ ವ್ಹರ." ಮ್ಹಣು ಜಾನಕಿ ರಡ್ತಾ. "ನಾಕ್ಕಾಬಾ, ಮಾಕಾ ಭಯಣ್ಯೊ ಮಸ್ತ ಆಸ್ಸಂಚಿ." ಮ್ಹಣಾಲೊ ಚಂದ್ರು. ಆನಿ ಕಸ್ಸಲೆ ಸಾಂಗ್ಚೆ ಮ್ಹಣು ಕಳ್ನಾಸ್ಸಿ ಜಾನಕಿ " ಹಾಂವ ತುಗೆಲಿ ಬಾಯಲ ಜಾತ್ತಾ. ವ್ಹರ್ತವೆ?" ಮ್ಹಣಾಲಿ. ತೆ ಆಯ್ಕುನು ಚಂದ್ರಾಕ ಮಸ್ತ ಖೂಸಿಽ ಜಾತ್ತಾ. "ಹಾಂ ಬಾಯಲ ಮಾಕ್ಕಾ ಏಕ್ಲಿಥಾಂಯ ನಾ. ಯೊ ವ್ಹರ್ತಾ." ಮ್ಹಣು ತಿಕ್ಕಾ ವ್ಹಯರಿ ಘೆವ್ನು ವತ್ತಾ ಆನಿ ತಿಗೆಲೆ ಸಂಗಾತ ವ್ಹಾರ್ಡಿಕ ಕರ್ನು ಘೆತ್ತಾ. ಹಾಂಗಾ ತೊಗ್ಗು ರೂಕ ಕಾತ್ತೊರುಕ ಮಾಧವರಾಯಾನ ಸಾಂಗುನು ಪೆಟಯಿಲೆ ಜನ ಯೆತ್ತಾಚಿ ಆನಿ "ಕಂಚೊ ರೂಕು ಕಾತ್ತೊರುಕ ಸಾಂಗಿಲೆ. ದಾಕಯಾಚಿ." ಮ್ಹಣ್ತಾಂಚಿ. ರೂಕು ದಾಕಯಿತಾಚಿ ಆನಿ ವ್ಹಯರಿ ಪಳಯಿಲ್ಯಾರಿ ಕೋಣ ಆಸ್ಸ! ಜಾನಕಿ ತೆ ರುಕ್ಕಾರಿ ನಾ. ಖಂಯ ಚಮ್ಕಲಿ ಮ್ಹಣು ಕಳ್ತಾಸ್ಸಿ ಮಾಧವರಾಯು, ತಾಗೆಲಿ ಬಾಯಲ ಸುಲೋಚನಾ, ಪೂತ ದಯಾನಂದ ಆನಿ ವಾಮನ (ಜಾನಕಿಕ ವ್ಹಾರ್ಡಿಕ ಕರ್ನು ಘೆತ್ತಾ ಮ್ಹಣು ಹಟ ಕೆಲ್ಲಲೊ) ಆನಿ ಬಾಕಿಚೆ ಜನ ಸಕ್ಕಡ ಮಾತ್ಯಾರಿ ಹಾತು ದವರ್ನು ಘರಕಡೆ ವತ್ತಾಚಿ.
---------೦೦೦೦೦೦೦-------
ಹೀ ಕಾಂಣಿ ಆಮ್ಕಾ ಆಮ್ಮಾನ ಸಾಂಗ್ಲಾ. ಜಾಲ್ಲ್ಯಾರಿ ಕುಂಡ್ಯಾ ಕುರ್ಕುಳ ಪುಸ್ತಕ ವಾಜ್ಜಿತರಿ ಉಗಡಾಸಾಕ ಆಯಿಲಿ.
Subscribe to:
Post Comments (Atom)
0 ಕಾಮೆಂಟ್(ಗಳು):
Post a Comment