ಬಂಟ್ವಾಳ ಆನಿ ಜಕ್ರಿಬೆಟ್ಟುಮಧ್ಯೇಂತು ಏಕ ರಾಯಾಲೆ ಘರ ಮೆಳ್ತಾ. ತೆ ಘರಾಂತು ಏಕ ರಾಯು, ತಾಗೆಲೆ ನಾಂವ್ಹ ಕೃಷ್ಣರಾಯು, ಆನಿ ರಾಣಿ (ತಾಗೆಲಿ ಬಾಯಲ್) ಪ್ರಭಾವತಿ ಆಸ್ಸಿಲಿಂಚಿ. ತಾಂಕಾ ಶಾಮು ಮ್ಹಣು ಏಕ ಪೂತು. ಜಾಲ್ಯಾರಿ ತೆ ರಾಜಕುಮಾರ ಶಾಮಾಕ ಬರೀ ವಾಯಟ ಬುದ್ಧಿ. ಚೆಡ್ಯಾಂತಯಿ ವಚ್ಚೆ ಆನಿ ದಿವಸಭರಿ ತಂಯಿಂಚಿ ಲೊಳ್ಚೆ. ರಾಯಾನ ಆನಿ ರಾಣಿನ ಸಾಂಗಿಲೆ ಬುದ್ಧಿವಾದ ಆಯ್ಕನಾತ್ತಿಲೆ ದಿಸ ವತ್ತಾ ವಾಯಟ ಜಾತ್ತಾ ಗೆಲ್ಲೊ. ಹೆ ಪಳವುನು ರಾಯಾನ ಆನಿ ರಾಣಿನ ಪುತ್ತಾಕ ವ್ಹಾರ್ಡಿಕ ಕೆಲ್ಯಾರಿ ಬುದ್ಧಿ ಸಮ ಜಾವ್ಚಾಕ ಪುರೊ ಮ್ಹಣು ಚಿಂತುನು ತಾಕಾ ವ್ಹಾರ್ಡಿಕ ಕರ್ಚೆಮ್ಹಣು ಚಿಂತಾಚಿ. ತಸ್ಸಿಂಚಿ ಲಾಗ್ಚೆ ಗಾಂವು ಪೊಳಲಿ - ಹೊ ಗಾಂವು ಬಿ.ಸಿ.ರೋಡ್-ಕೊಡಿಯಾಲ ವತ್ತನಾ ಕೈಕಂಬ ಮ್ಹಳ್ಳೆಲೆ ಕಡೆನ ಆತ್ತ ಏಕ ದ್ವಾರ ಜಾಲ್ಲಾ. ತೆ ದ್ವಾರ ಪೊಳಲಿ ದೇವಿ ರಾಜರಾಜೇಶ್ವರಿ ತಿಗೆಲೆ ದೇವಸ್ಥನಾಚಾನಿ ಭಾಂದಯಿಲೆಲೆ. ತಸ್ಸಿಂಚಿ ಮೂಡಬಿದ್ರೆ ಕೊಡಿಯಾಲ ವಾಟ್ಟೆರಿ ಅಸ್ಸಲೇಂಚಿ ದುಸ್ರೆ ದ್ವಾರ ಆಸ್ಸ. ತೆ ದೊನಿ ದ್ವಾರಾಚೆ ಮಧ್ಯೆ ಪೊಳಲಿ ಮ್ಹಳ್ಳಲೊ ಗಾಂವು ಮ್ಹೆಳ್ತಾ. ತಂಚೆ ರಾಯಾಲೆ ಧುವ ರೂಪಮತಿಲೆ ಜಾತಕ ಆನಿ ಭಾವಚಿತ್ರ ಹಾಡಯತಾಚಿ. ಹೊ ವಿಷಯು ರಾಜಕುಮಾರಾಕ ಕಳ್ನು ತೊ ವಚುವ್ನು ತೆ ಚೆಡ್ಯಾಲಾಗ್ಗಿ ಸಾಂಗ್ತಾ. ತೆ ಚೆಡಿಯೆಕ ಹಾಗೆಲೊ ಪೂರಾ ವಿಷಯ ಕಳ್ತರಿ ತಿ ರಾಜಕುಮಾರಾಲೆ ಕಾನ್ನಾಂತು ಪಿಳ್ತಾ "ತುವೆ ವ್ಹಾರ್ಡಿಕ ಜಾಲ್ಯಾರಿ ಅಡ್ನಾ, ಜಾಲ್ಯಾರಿ ತೆ ವ್ಹಾರ್ಡಿಕ ಜಾವ್ಚೆ ರಾಜಕುಮಾರಿಲೆ ಭಾವಚಿತ್ರ ತುಽ ಪಳವ್ನಾಕಾ. ತೆ ಭಾವಚಿತ್ರ ಸುರವೆಕ ಮಾಕಾ ಹಾಣು ದಾಕಯಿ." ತೆ ಚೆಡ್ಯೆಲೆ ಉತ್ರ ಆಯಕುನು ರಾಜಕುಮಾರು ಕೊಲೆ ಬಸವುಸೊ ಬೊಡ ಹಾಲ್ಲೊವ್ನು ಘರಕಡೆ ವತ್ತಾ ಆನಿ ರಾಯಾನ ಆನಿ ರಾಣಿನ ಆಯ್ಕೆ ಕೆಲ್ಲೆಲೆ ರಾಜಕುಮಾರಿಲೆಭಾವಚಿತ್ರ ದೊಳ್ಯಾನ ತರಿ ಪಳಯಿನಾಸ್ಸಿ ಘೆವ್ನು ಚೆಡ್ಯಾಂತಯಿವತ್ತಾ. ಚೆಡ್ಯೆಕ ದಿವ್ಚಾಕ ತೊ ವಿಸರ್ನು ತೆ ಭಾವಚಿತ್ರ ತಾಗ್ಗೆಲೆ ಜುಬ್ಬಾಚೆ ಕಿಸ್ಯಾಂತು ವರ್ತಾ. ಜಾಲ್ಯಾರಿ ತಿ ಚೆಡಿ ತಾಗ್ಗೆಲೆ ದೊಳೆ ನಿಪ್ಪವ್ನು ತೆ ಭಾವಚಿತ್ರ ಕಾಣು ಪಳಯಿತಾ.ಚಂದ ಚೆಲ್ಲಿಲೆ ಭಾವಚಿತ್ರ ಪಳವ್ನು ತಿಕ್ಕಾ ಪೊಟ್ಟಾಕ ಉಜ್ಜೊ ಯೆತ್ತಾ ಆನಿ ತಾಜ್ಯೆರಿ ಆಸ್ಸಿಲೆ ಚೆಲ್ಲಿಕ ವಿಕಾರ ಕೊರ್ನು ತಸಿಂಚಿ ತಾಗೆಲೆ ಜುಬ್ಬಾಕಿಸ್ಯಾಂತು ದವರ್ತಾ. ತೊಡೆಽಚಿ ವೇಳಾನ ರಾಜಕುಮಾರಾಕ ತುಂವೆ ವ್ಹಾರ್ಡಿಕ ಕೊರ್ನು ಘೆವ್ಚೆ ಚೆಲ್ಲಿಲೆ ಭಾವಚಿತ್ರ ಹಾಡ್ತಾ ಮ್ಹಳ್ಳೆಲೆ ನಂವೆ? ಹಾಳ್ಳಾವೆ? ಮ್ಹಣು ನಿಮಿಗಿತಾ. ತೆದನಾ ರಾಜಕುಮಾರು ತಾಗೆಲೆ ಜುಬ್ಬಾಚೆ ಕಿಸ್ಯಾಂತುಲ್ಯಾನ ಭಾವಚಿತ್ರ ಕಾಣು ತಿಗೆಲೆ ಹಾತ್ತಾಂತು ದಿತ್ತಾ. ತಿ ತೆ ಪಳಯಲಾವರಿ ಕರತಾ ಆನಿ "ಹ್ಯಾ ಹಾತ್ಪಾಯ್ ಸಮನಾತ್ತಿಲೆ ಕುರೂಪಿಕ ತೂ ವ್ಹಾರ್ಡಿಕ ಕೊರ್ನು ಘೆತ್ತವೆ? ಘೆ! ಜಾಲ್ಯಾರಿ ಮಾಂಟ್ವಾಂತುಯಿ ತಿಗ್ಗೆಲೆ ತೊಂಡ ಪೊಳೊನಾಕಾ. ಮಂಗಳಸೂತ್ರ ಬಾಂದುನು ಸೀದಾ ಹಾಂಗ್ಯೊ." ಮ್ಹಣು ಸಾಂಗ್ತಾ.ತಸ್ಸಿಂಚಿ ಹಾಂಗಾ ರಾಯು ಆನಿ ರಾಣಿ ಭಾರೀ ಗೌಜೇರಿ ಪುತ್ತಾಕರೂಪಮತಿಲೆ ಸಂಗಾತ್ ವ್ಹಾರ್ಡಿಕ ಕರತಾಚಿ. ಜಾಲ್ಯಾರಿ ರಾಜಕುಮಾರ್ ಶಾಮು ಚೆಲ್ಲಿಲೆ ತೊಂಡಾತಾಯಿ ಪಳಯಿನಾತ್ತಿಲೆ ಮಂಗಳಸೂತ್ರ ಬಾಂದಿತಾ ಆನಿ ಸೀದಾ ಚೆಡ್ಯೆತಂಯಿ ವತ್ತಾ. ತೆ ಪಳವುನು ರಾಯು ಆನಿ ರಾಣಿ `ಆಮ್ಮಿ ಆಮಗೆಲೆ ಸ್ವಾರ್ಥಾ ಕಾತಿರಿ ಹೆ ಚೆಲ್ಲಿಲೆ ಜೀವನ ವಾಯಟ ಕೆಲ್ಲೆ ನಂವೆ?' ಮ್ಹಣು ದೊಳ್ಯಾ ಉದ್ದಾಕ ಕಾಡ್ತಾಚಿ. ತೆದನಾ ರಾಜಕುಮಾರಾಲಿ ಬಾಯಲ ರೂಪಮತಿ ಮಾಂವಾಂಕ ಆನಿ ಮಾಂಯ್ಂಕ "ತುಮ್ಮಿ ಕಸ್ಸಲೆಂಚಿ ಯೆಚ್ಚನಾ ಕಾಣಾಕ್ಕಾಚಿ. ತೊಡೆ ಸಮಯು ವಚ್ಚೊ. ತಾಂಕಾ ಹಾಂವಂಚಿ ಸಮ್ಮ ಕೊರ್ನು ತುಮ್ಕಾ ದಾಕ್ಕಯಿತಾ" ಮ್ಹಣ್ತಾ. ತಸ್ಸಿಂಚಿ ರೂಪಮತಿಕ ಪಳವುನು ಗೆವಚಾಕ ಆನಿ ತಿಗ್ಗೆಲೆ ಚಾಕ್ರಿಕ ಮ್ಹಣು ಏಕ ಮ್ಹಾಂತಾರಿಕ ಕಾಮಾಕ ರಾಬ್ಬಯಿತಾಂಚಿ.ಜಾಲ್ಯಾರಿ ತಿ ಚೆಲ್ಲಿ ಸತ್ಯಾರೀ, ಧರ್ಮಾರೀ ವಾಡ್ಡಿಲಿ ದಾಕ್ಕುನು ಮಾಂಯಿ ಆನಿ ಮಾಂವಾ ಒಟ್ಟು ರಾಬ್ತಾ ಆನಿ ಚಂದಾಯೆರಿ ದಿಸ ಕಾಡ್ತಾ. ತೀಣೆ ಸದಂಚಿ ರುಚಿರುಚಿ ರಾಂದಯೊ ಕೊರ್ನು ಬಾಮ್ಹುಣು ಯೆತ್ತಲೊ, ಒಟ್ಟು ಜವಣ ಕೊರ್ಕಾ ಮ್ಹಣು ರಾಕ್ಚೆ. ಜಾಲ್ಯಾರಿ ತೊ ಕಂಯಿ ಯೆತ್ತಾ? ಚೆಡಿಯೆಂತಯಿ ಲೊಳ್ತಲ್ಯಾಕ ಕುರೂಪಿ ಬಾಯಲ ಕಂಯಿ ಉಡ್ಗಾಸಾಕ ಯೆತ್ತಾ? ತಸ್ಸಿ ಹಾಂಗಾ ತಿ ರಾಕ್ಕುನ್ರಾಕ್ಕುನು ನೀದ ಯೆತ್ತನಾ ಜವಣ ಮ್ಹಣು ತಿರ್ಸುನು ನಿದ್ದೊಚೆ. ಹೆಂಚಿ ತಿಕ್ಕಾ ಅಭ್ಯಾಸು ಜಾವ್ನು ಗೆಲ್ಲಾ. ಆನಿ ಕಸ್ಸಲೆ ಕರ್ತಲಿ ಪಾಪ. ತಿಗೆಲೆ ಹಣೆಬರ್ಪಾಂತು ತಸ್ಸಿಂಚಿ ಬರಯಿಲಾ ಜಾವ್ನು ಆಸ್ಸುಕಾ. ಜಾಲ್ಯಾರಿ ತಿ ಏಕ್ ನಂಯಿ ಏಕು ದೀಸು ಚಾಂಗ ಜಾತ್ತಲೆ ಮ್ಹಣು ಆಶಾ ದವರ್ತಾ.ಅಸ್ಸಿಂಚಿ ಏಕು ದಿವಸು ರೂಪಮತಿ ತಾಂಗೆಲೆ ಅರಮನೆಚೆ ಮಾಗ್ಸಿ ಆಸ್ಸುಚೆ ತಳ್ಯಾಂತು ನ್ಹಾವಚಾಕ ಮ್ಹಣು ವತ್ತಾ. ತೇಚಿ ತಳ್ಯಾಂತು ರಾಜಕುಮಾರಾಲಿ ಚೆಡಿ ಯೇವ್ನು ಆಸ್ತಾ. ಜಾಲ್ಯಾರಿ ರೂಪಮತಿಕ ತಿಗೆಲೊ ಗುರ್ತು ನಾ. ಚೆಡ್ಯಕ ಭಾವಚಿತ್ರ ಪಳಯಿಲೆ ನಿಮಿತಿ ತುರಂತ ತಿಗೆಲೊ ಗುರ್ತು ಮ್ಹೆಳ್ತಾ. ಆನಿ ತೀ ಹಳೂಚಿ ತಿಗೆಲ್ಯಾಗ್ಗಿ ವುಚ್ಚುನು ಉಲಯಿತಾ. ಅಸ್ಸಿಂಚಿ ತೊಡೆ ದಿವಸ ವತ್ತಾಚಿ. ಸದಂಚಿ ಹಾನ್ನಿ ದೊಗ್ಗಯಿ ತೆ ತಳ್ಯಾಂತು ನಾವಚಾಕ ವುಚ್ಚೆ ಅನಿ ಸಲ್ಗೇರಿ ಉಲಯಿತಚಿ ನ್ಹಾವಚೆ ಆಸ್ತಾ. ರಾಜಕುಮಾರಾಲೆ ಚೆಡಿಯೆನ ತಾಗೆಲೆ ಬಾಯಲೆಲೆ ಕಾಮಾಕ ರಾಬ್ಬಯಿಲೆ ಮ್ಹಾಂತಾರಿಲೊಯಿ ಗುರ್ತು ಕೊರ್ನು ಗೆವ್ನು ತಿಕ್ಕಾ ಬುಟ್ಯೆಂತು ಘಾಲ್ಲಾ. ತಸ್ಸಿ ಜಾಲ್ಲೆಲೆ ನಿಮಿತಿ ಹೊ ವಿಷಯು ಕೊಣಾಕಯಿ ಕಳ್ನಾ. ಏಕು ದಿವಸು ಅಸ್ಸಿ ನ್ಹಾತ್ತ ಆಸ್ತನಾ ಚೆಡಿ ರೂಪಮತಿಲಾಗ್ಗಿ "ತುಗೆಲೆ ಗಳ್ಯಾಕ ಆಸ್ಸಿಲೊ ತೊ ಹಾರು ಕಸ್ಸಲೊ? ಚಂದ ಆಸ್ಸ." ಮ್ಹಣ್ತಾ. ರೂಪಮತಿ "ಹೊ ಹಾರು ಹಾಂವೆ ಜನ್ಮಾಕ ಯೆತ್ತನಾಂಚಿ ಆಸ್ಸಿಲೊ ಕಂಯಿ. ತಾಕ್ಕಾ ಚಂದ್ರಹಾರು ಮ್ಹಣ್ತಾಚಿ. ತಾಂತುಽಚಿ ಮೆಗೆಲೊ ಜೀವು ಆಸ್ಸ. ತೊ ಹಾರು ದಿಸಾಚೆ ಕಾಳ್ಯಾರಿ ಮೆಗೆಲೊ ಜೀವು ವತ್ತಾ. ತಸ್ಸಿ ಜಾವ್ನು ಹಾಂವೆ ತೊ ಕೆದನಾಯಿ ದಿಸಾಚೆ ಕಾಡಚೆ ಮ್ಹಣು ನಾ. ಜಾಲ್ಯಾರಿ ಘರಕಡೆ ನಾತ್ತನಾ ಮಾತ್ರ ಕಾಡ್ಚೊ, ಬಾಯರ ಕಂಯಿ ಗೆಲ್ಲ್ಯಾರಿ ಕಾಡ್ಚೆ ನಾ." ಮ್ಹಣು ಸಾಂಗ್ತಾ. ತೆ ಆಯಕುನು ಚೆಡಿ ತೊ ಹಾರು ತಿಗೆಲೆ ಗಳ್ಯಾದಾಕುನು ಕಾಡೊಕಾ. ಕಸ್ಸಿ ಕಾಡ್ಚೆ, ಕಸ್ಸಿ ಕೊರ್ಚೆ ಮ್ಹಣು ಉಪಾಯು ಸೊದ್ದುಚಾಕ ಆಲೋಚನಾ ಕರ್ತಾ. ಆಜಿಚಿ ತೆ ಕಾಮ ಕೊರ್ಚೆ ನಾಕ್ಕಾ- ಮ್ಹಣು ಸಹಜ ಜಾವ್ನು ತಿಗೆಲಾಗ್ಗಿ ನಿಮ್ಗಿತಾ "ತುಗೆಲಿ ಪಾಟಿ ಘಾಸುಕಾವೆ." ತಿ ಸತ್ಯಾರಿ "ಘಾಸಿ, ತಾಕ್ಕಾ ಕಸ್ಸಲೆ ನಿಮ್ಗುಚೆ. ಆತ್ತ ಹಾಂವ ಆನಿ ತೂ ದೊಸ್ತಿ ನಂವೆ? ಜಾವ್ಕಾ ಜಾಲ್ಯಾರಿ ಸದಂಚಿ ಘಾಸಿ" ಮ್ಹಣ್ತಾ. ತೆದನಾ ತಿ ಚೆಡಿ ಖುಸೇರಿ ತಿಗೆಲಿ ಪಾಟಿ ಘಾಸಿತಾ. ತೆ ವೇಳಾರಿ ರೂಪಮತಿಲಿ ಚಂದಿ ಪಾಟಿ ಪಳವುನು ತಿಗೆಲೆ ಮನ ವಾಯಿಟ ಚಿಂತಾ ಕೊರುಕ ಪಡತಾ. `ಏಕ ನ್ಹಂಹಿ ಏಕ ದಿವಸು ರಾಜಕುಮಾರಾಲೆ ದೃಷ್ಟಿ ಹಿಗೆಲೆ ವಯಿರಿ ಪಳ್ಳೆ ಜಾಲ್ಯಾರಿ ಮಾಕ್ಕಾ ಖಂಡಿತ ಸಂಚಕಾರೂಚಿ. ತಸ್ಸಿ ಜಾವ್ನು ತೊ ಹಾರು ಗಳ್ಯಾಕ ದಾಕುನು ಕಾಡೊಚೆ ಉಪಾಯ ಕೊರ್ಕಾ. ಕಾಣು ಜಾತ್ತರಿ ಹಿಕ್ಕಾ ದಿವ್ಸಿ ಮಾರ್ಕಾ' ಮ್ಹಣು ನಿಶ್ಚಯ ಕರ್ನು ರೂಪಮತಿಕ "ಪಾಟಿ ಘಾಸಿತನಾ ಹಾರು ಆಡ ಯೆತ್ತಾ" ಮ್ಹಣು ತಿಕ್ಕಾ ಸಾಂಗ್ತಾ. ಜಾಲ್ಯಾರಿ ಕಾಣು ದವರಿ ಮ್ಹಣು ಸಾಂಗನಾ. ಇತ್ಯಾಕ ಮ್ಹಳ್ಯಾರಿ ಆಜೀಚಿ ತಸ್ಸಿ ಸಾಂಗ್ಲ್ಯಾರಿ ತಿಕ್ಕಾ ಸಂಶಯ ಜಾಲ್ಲ್ಯಾರಿ ಮ್ಹಣು ಚಿಂತುನು ನುತಚಿ ಪಾಟಿ ಘಾಸಿತಾ. ತಸ್ಸಿಂಚಿ ಸದಂಚಿ ತಿಗೆಲಿ ಪಾಟಿ ಘಾಸುಚಾಕ ಸುರು ಕರ್ತಾ. ಏಕು ದೀಸು ರೂಪಮತಿಕ "ತುಗೆಲೆ ಗಳ್ಯಾಕ ಆಸ್ಸುಚೆ ನಗ ಸಕ್ಕಡ ಕಾಣು ಹಾಂಗಾಚಿ ತುಗೆಲೆ ಲಾಗ್ಗಿಚಿ ದವರಿ. ಗಳ್ಯಾಕ ಆಸ್ಲ್ಯಾರಿ ಪಾಟಿ ಘಾಸುಕ ತೊಂದ್ರೆ ಜಾತ್ತಾ." ಮ್ಹಣ್ತಾ. ರೂಪಮತಿ `ಕಸ್ಸಿ ಹಾಂಗಾಚಿ ಮೆಗೆಲೆ ಲಾಗ್ಗಿಚಿ ದವರ್ಚೆ ನಂವೆ? ತೆವಯಿ ಪಾಟಿ ಘಾಸುಕ ಮಾತ್ರ. ಪಾಟಿ ಘಾಸುನು ಜಾಲ್ಯೆ ಕೂಡ್ಲೆ ವಾಪಾಸ ಗಳ್ಯಾಕ ಗಾಲ್ಲ್ಯಾರಿ ಜಾಲ್ಲೆ ನಂವೆ?' ಮ್ಹಣು ಚಿಂತುನು ಗಳ್ಯಾಚೆ ನಗ ಸಕ್ಕಡ ಕಾಣು ಲಾಗ್ಗಿಚಿ ದವರ್ನು ಘೆತ್ತಾ. ಚೆಡಿ ಹೋಚಿ ಚಾಂಗು ವೇಳು ಮ್ಹಣು ತಿಕ್ಕಾ ತಳ್ಯಾಂತು ಲಕವುನು ಘಾಲ್ನು, ತಳ್ಯಾಂತು ತಿಗೆಲೆ ಮಾತ್ತೆ ಬುಡ್ಡೊವ್ನು ದರತಾ. ತೊಡೆ ವೇಳಾನಿ ರೂಪಮತಿ ಮರ್ತಾ.ಚೆಡಿ ತಂಯಿ ದಾಕುನು ಕಸ್ಸಲೊಯಿ ವಿಷಯು ಗೊತ್ತು ನಾತ್ತಿಲ್ಯಾವರಿ ನಗ ಸಕ್ಕಡ ಘೆವ್ನು ತಿಗಲೆ ಘರಕಡೆ ವತ್ತಾ. ಅರಮನೆಂತು ರೂಪಮತಿಲೆ ಕೂಡ ದುಸರೇಚಿ ಆಸ್ಸಿಲೆ ನಿಮಿತಿ ಆನಿ ತಿಕ್ಕಾ ಪಳವುನು ಘೆವ್ಚಾಕ ಮ್ಹಾಂತಾರಿ ಆಸ್ಸಿಲೆ ಕಾರಣ ಹೊ ವಿಷಯು ರಾಯಾಕ ಆನಿ ರಾಣಿಕ ಗೊತ್ತು ಜಾಯನಾ. ಹೆರ್ದಿವಸು ರಾಜಕುಮಾರಾನ ಅರಮನೆ ಮಾಗ್ಸಿ ವತ್ತನಾ ತಾಕ್ಕಾ ತೆ ತಳ್ಯಾಂತು ಏಕ ಚಂದ ಸಾಳುಕ ದಿಸ್ತಾ. ತೆ ಕಾಣು ತೊ ಸೀದಾ ಚೆಡ್ಯೆತಂಯಿ ವತ್ತಾ. ಆನಿ ತೆ ತಿಕ್ಕಾ ದಿತ್ತಾ. ತಿ ಚೆಡಿ ತಾಗೆಲಾಗ್ಗಿ `ಹೇ ಕಂಯಿ ಮೆಳ್ಳೆ' ಮ್ಹಣು ನಿಮ್ಗಿತಾ. ರಾಜಕುಮಾರು ಆಸ್ಸಿಲೆ ವಿಷಯು ಸಾಂಗ್ತಾ. ಚೆಡಿಕ ತುರಂತ ವಿಷಯು ಕೊಳ್ನು ತೆ ಫುಲ ಪಿಸುಳ್ನು ಘರಾಚೆ ಮಾಗ್ಸಿ ಆಸ್ಸುಚೆ ಮಾಡ್ಯಾಚೆ ಮುಳಾಕ ಗಾಲ್ತಾ. ರಾಜಕುಮಾರಾಕ ವಿಷಯು ಕಸ್ಸಲೆ ಮ್ಹಣು ಕಳ್ನಾ. ಜಾಲ್ಯಾರಿ ತೊ ನುತಚಿ ಆಸ್ತಾ. ಹೆರ್ದಿವಸು ಮಾಯದರಾಂತು ಕಾಲಿ ಪಿಸುಳ್ನು ಉಡ್ಡಯಿಲೆ ಫುಲ್ಲಾ ಜಾಗ್ಯಾರಿ ಮಸ್ತಿ ತಾಂಬ್ಡಿ ಬಾಜ್ಜಿ ಜಾಲ್ಲೆಲೆ ಪಳವುನು ರಾಜಕುಮಾರು `ತೆ ಕಾಣು, ತಾಜ್ಜಿ ರಾಂದಯಿ ಕೊರ್ನು ಆಜಿ ಮಾಕ್ಕಾ ವಾಡ್ಕಾ' ಮ್ಹಣು ಚೆಡ್ಯೆಲಾಗ್ಗಿ ಸಾಂಗ್ತಾ. ಸುರುವೆಚ್ ಪಟಿ ಫೂಲ ಪಿಸುಳ್ನು ಉಡ್ಡೆಲೆಲೆ ತಾಣೆ ಪಳೆಲೆಲೆ ನಿಮಿತಿ ಹೆ ಪಟಿ ಕಸ್ಸಲೆ ಕರತಾ ಮ್ಹಣು ತಿಕ್ಕಾ ಕಳ್ನಾಸಿ ಪಳಯಿತಾ. ಚೆಡಿ ತಿ ಭಾಜ್ಜಿ ಸಕ್ಕಡ ಕಾತ್ತರ್ನು ಕಾಣು ಸಾನ್ನ್ಸಾನ್ನ ಚೂರ ಕೊರ್ನು ಏಕು ಪೊಂಡು ಕಾಣು ತಾಂತು ಘಾಲ್ತಾ, ಆನಿ ಮಾತ್ತಿ ಘಾಲ್ನು ಪುರ್ತಾ. ಹೆರ್ದಿವಸು ತೆ ಜಾಗ್ಯಾರಿ ಏಕ ಲಿಂಬಿಯಾಚೆ ಜಾಡ ಆನಿ ತಾಜ್ಜೆರಿ ಏಕ್ಕೂ ಏಕು ಲಿಂಬಿಯೊ ಜಾಲ್ಯಾಲೆ ಪಳವುನು ರಾಜಕುಮಾರು ತೊ ಲಿಂಬಿಯೊ ಚೆಡಿಯೆಕ ಕಳ್ನಾಸಿ ಕಾಣು ಭಿತ್ತರಿ ಘೆವ್ನು ಯೆತ್ತಾ ಆನಿ ಕಪಾಟಾ ವಯರಿ ಉದ್ದಾಕ ಆಸ್ಸಿಲೆ ಏಕ ಐದನಾಂತು ಘಾಲ್ತಾ. ತಾಜ್ಜೆ ನಂತರ ತಾಕ್ಕಾ ತೆ ಲಿಂಬಿಯಾಚೆ ವಿಷಯೂಚಿ ವಿಸೊರ್ನು ವತ್ತಾ. ರಾತ್ರಿ ತಿ ಚೆಡಿ ನಿದ್ದತನಾ ತಿಗೆಲೆ ಗಳ್ಯಾಕ ಘಾಲ್ಲಲೊ ಚಂದ್ರಹಾರು ಕಾಣು ತೇಚಿ ಐದನಾಂತು ಗಾಲ್ತಾ ಆನಿ ತಿಗೆಲೆ ಕುಡಾಕ ವೊಚ್ಚನು ನಿದ್ದತಾ. ತಿ ತೆಕಡೆ ಗೆಲ್ಲೆಲೆ ತೊಡೆ ವೆಳಾನ ಐದನಾಂತು ಆಸ್ಸಿಲೊ ಲಿಂಬಿಯೊ ತಂಯಿಚಿ ಆಸ್ಸಿಲೆ ಚಂದ್ರಹಾರಾಕ ಲಾಗ್ತಾ. ತೆದನಾ ರೂಪಮತಿ ಜೀವ ಜಾತ್ತಾ. ತಿ ಕಂಯಿ ಆಸ್ಸ ಮ್ಹಣು ತಿಕ್ಕಾ ಕಳ್ಳೆ ಆನಿ ತೊ ಹಾರು ಗಳ್ಯಾಕ ಗಾಲ್ನು ಆವಾಜ ಕರನಾಸಿ ಕಪಾಟಾ ವಯರಿ ದಾಕುನು ತೊಗ್ಗು ದೆವ್ನು ಬಾಗಿಲ ಕಾಣು ಸೀದಾ ಅರಮನೆಕ ವತ್ತಾ. ಹೆರ್ದಿವಸು ಹಿ ಚೆಡಿ ತೊ ಹಾರಾ ನಾತ್ತಿಲೆ ಪಳವ್ನು ಅಜಪ ಜಾತ್ತಾ. ರಾಜಕುಮಾರಾಲಾಗ್ಗಿ `ತುವೆ ಹಾಂತು ಏಕು ಹಾರು ಆಸ್ಸಿಲೊ ಪಳಯಿಲ್ಯಾವೆ' ಮ್ಹಣು ನಿಮ್ಗಿತಾ. ತೆದನಾ ತೊ `ಹಾಂವೆ ಲಿಂಬಿಯೊ ದವರ್ತನಾ ತಾಂತು ಕಸ್ಸಲೆ ನಾತ್ತಿಲೆ' ಮ್ಹಣ್ತಾ. ತೆದನಾ ಚೆಡಿ `ಕಂಚೊ ಲಿಂಬಿಯೊ' ಮ್ಹಣ್ತಾ. ತೊ ವಿಷಯು ಸಾಂಗ್ತಾ. ಚೆಡಿ ರಾಜಕುಮಾರಾಲಿ ಬಾಯಲ ರೂಪಮತಿ ಜೀವ ಜಾವ್ನು ಅರಮನೆಕ ವಚುವ್ನು ಆಸ್ಸುಕಾ ಮ್ಹಣು ಚಿಂತಾ ಆನಿ ತೆ ಮ್ಹಾಂತಾರಿಕ ಯೆವ್ಕಾ ಮ್ಹಣು ಸಾಂಗುವುನು ಪೆಟೆತಾ. ರೂಪಮತಿ ಜೀವ ಜಾವ್ನು ಅರಮನೆಕ ಗೆಲ್ಲಲೊ ವಿಷಯು ಮ್ಹಾಂತಾರಿಲೆ ಮುಖಾಂತರ ಕೊಳ್ನು ತಿ ಚೆಡಿ ತೊ ಹಾರು ಕಸ್ಸಿ ಕೊರ್ನು ಮಾಕ್ಕಾ ಹಾಣು ದಿಲ್ಲ್ಯಾರಿ ತುಕ್ಕಾ ಹಾಂವ ಮಸ್ತು ದುಡ್ಡು ದಿತ್ತಾ ಮ್ಹಣು ಸಾಂಗ್ತಾ. ಹೆ ಸಕ್ಕಡ ಜಾಲ್ಲೆಲೆ ಘಟನೆ ನಿಮಿತಿ ರೂಪಮತಿ ಆನಿ ಮುಖಾರಿ ಜಾಗ್ರತಾ ಘೆವ್ಕಾ ಮ್ಹಣು ಚಿಂತುನು ತಸ್ಸಿಂಚಿ ತಿ ಮಾಂಯಿ, ಮಾಂವಾಲಾಗ್ಗಿ "ಪಕ್ಕನಿ ಹಾಂವೆ ಮೆಲ್ಲ್ಯಾರಿ ಮಾಕ್ಕಾ ಲಾಸ್ಚೆ ಜಾವೊ ಪೂರ್ಚೆ ಜಾವೊ ಕೊರ್ನಾಕಾಚಿ. ಆನಿ ಏಕ ಶಿಲೆ ಪಾತ್ರಾಚೆ ಅರಮನೆ ಕೊರ್ನು ತಾಂತು ಏಕ ಚೆಲ್ಲಿಲೆ ಜೀವನಾಂಕ ಜಾವ್ಚೆ ಅವಶ್ಯಕತಾ ಅಸ್ಸಿಲೆ ಸಕ್ಕಡ ಸಾಮಾನ ದವೊರ್ನು ತಾಂತು ಮೆಗ್ಗೆಲೆ ಮಡೆಯಿ ದವೊರ್ಕಾ. ತೆ ಅರಮನೆಚೆ ಬಾಗಿಲ ಮೆಗೆಲೆ ಭ್ಹಾಂಮ್ಣಾಂಕ ಮಾತ್ರ ಕಾಡುಜಾವ್ಕಾ, ದುಸ್ರೆ ಕೊಣಾಕಯಿ ಕಾಡುಕ ಜಾವ್ಚಾಕ ನಜ್ಜ, ತಸ್ಸಿ ಕೊರ್ಕಾ" ಮ್ಹಣು ಸಾಂಗ್ತಾ ಆನಿ ಭಾಸ ಘೆತ್ತಾ.ಅಸ್ಸಿಂಚಿ ತೊಡೆ ದಿವಸು ಜಾತ್ತಾ. ಹಾಂಗಾ ತಿ ಚೆಡಿ ಮ್ಹಾಂತಾರೆಕ ಹಾರು ಹಾಣು ದಿ ಮ್ಹಣು ಮಸ್ತ ವತ್ತಾಯ ಕರ್ತಾ. "ತೊ ಹಾರು ತಿಗೆಲೆ ಗಳ್ಯಾ ದಾಕುನು ತಿಣೆ ನ್ಹಾವಚೆ ವೇಳಾರಿ ಮಾತ್ರ ಕಾಡ್ಚೆ. ದುಸರೆ ವೇಳಾರಿ ತಿ ಕಾಣಾ. ತಸ್ಸಿ ಜಾವ್ನು ತುವೆ ಗಡಬಡಿ ಕೊರುಕ ನಜ್ಜ. ಹಾಂವ ಹಾಣು ದಿತ್ತ ನಂವೆ?" ಮ್ಹಣು ಮ್ಹಾಂತಾರಿ ಚೆಡಿಯೇಕ ಸಾಂಗ್ತಾ.ಮ್ಹಾಂತಾರಿ ರಾಕೂನು ರೂಪಮತಿ ಹಾರು ಕಾಣು ದವರ್ನು ನ್ಹಾವಚಾಕ ಗೆಲ್ಲೆಲೆ ವೇಳಾರಿ ತೊ ಘೆವ್ನು ಸೀದಾ ತೆ ಚೆಡಿಯೆತಂಯಿ ವತ್ತಾ ಆನಿ ತಿಕ್ಕಾ ತೊ ದಿವ್ನು ತಿಣೆ ದಿಲ್ಲೆಲೆ ಮಸ್ತ ದುಡ್ಡ ಘೇವ್ನು ವಾಪಾಸ ಅರಮನೆಕ ವತ್ತಾ. ಸದಂಚಿ ತೀಣೆ ನ್ಹಾವ್ನು ಬಾಯರ ಯೆತ್ತರಿ ಹಾರು ಗಳ್ಯಾಕ ಘಾಲ್ಚೊ. ತೆದೊಳುತಾಯಿ ತಿಕ್ಕಾ ಕಸ್ಸಲೆಂಯಿ ಜಾಯ್ನಾ. ತಸ್ಸಿಂಚಿ ರೂಪಮತಿ ನ್ಹಾವನು ಯೆತ್ತರಿ ಹಾರು ಘಾಲುಕ ವತ್ತನಾ ತಂಯಿ ಹಾರು ನಾತ್ತಿಲೆ ನಿಮಿತಿ ತಿ ಮರ್ತಾ. ರಾಯು ಆನಿ ರಾಣಿಕ ಹೊ ವಿಷಯು ಕೊಳ್ನು ಮಸ್ತ ದುಃಖ ಜಾತ್ತಾ. ಜಾಲ್ಯಾರಿ ಸುನ್ನೆನ ಸಾಂಗಿಲ್ಯಾವರಿಚಿ ತಿಗೆಲೆ ಮಡೆ ಲಾಸ್ಸುಚೆ ಜಾವೊ, ಪೂರ್ಚೆ ಜಾವೊ ಕರ್ನಾಸಿ ಅರಮನೆ ಬಾಂದುವುನು ತಾಂತು ದವರ್ತಾಚಿ.ಮ್ಹಾಂತಾರಿನ ಚಂದ್ರಹಾರು ಹಾಣು ದಿಲ್ಲೆಲೆ ನಿಮಿತ ತೆ ಚೆಡ್ಯೆಕ ಬಾರಿ ಖುಶಿ ಜಾವ್ನು ದಿವಸಾಚೆ ತೊ ಹಾರು ಗಳ್ಯಾಕ ಘಾಲ್ನು ಬೊಂವ್ತಾ. ಜಾಲ್ಯಾರಿ ರಾತ್ರಿ ನಿದ್ದತನಾ ಗಾಲ್ಯಾರಿ ವಾಯಟ ಜಾಯತ ಮ್ಹಣು ಕಾಣು ಪುಡೆ ಕೆಲ್ಲೆಲೆ ತಸ್ಸಿಚಿ ಏಕ ಐದನಾಂತು ಉದ್ದಾಕ ಗಾಲ್ನು ತಾಂತು ದವರ್ತಾ. ಹಾರು ರಾತ್ರಿ ಉದ್ಕಾಂತು ಘಾಲ್ಲೆಲೆ ನಿಮಿತಿ ಹಾಂಗಾ ರೂಪಮತಿ ಮಡೆ ಜೀವ ಜಾತ್ತಾ, ದಿವಸಾಕ ಮಡೆ ಜಾತ್ತಾ. ಅಸ್ಸಿ ಆಸ್ತನಾ ಏಕ ರಾತ್ರಿ ರಾಜಕುಮಾರು ತಾಗೆಲೆ ಅರಮನೆ ದಾಕುನು ಬಾಯರ ಯೆತ್ತನಾ ತಾಕಾ ತಾಗೆಲೆ ಬಾಯಲೆಲೆ ಅರಮನೆ ದಿಸ್ತಾ. ಯೆದ್ದೋಳತಾಂಯಿ ಪಳಯಿನಾತ್ತಿಲೆ ಹೇ ಕಂಯಿ ದಾಕುನು ಆಯಲೆ. ಹಾಂತು ಕೊಣ ಆಸ್ಸ ಪಳೊಯಾ ಮ್ಹಣು ಚಿಂತುನು ಅರಮನೆ ಬಾಗ್ಲಾಲಾಗ್ಗಿ ಯೆತ್ತನಾ ಅಪ್ಣಿತ್ಲ್ಯಾಕ ತೆ ಬಾಗಿಲ ಉದಾರೆ ಜಾತ್ತಾ. ರಾಜಕುಮಾರು ಸೀದಾ ಭಿತ್ತರಿ ವತ್ತಾ. ಭಿತ್ತರಿ ವಚ್ಚುನು ಪಳಯ್ತನಾ ತಂಯಿ ಏಕಿ ಚಂದಿ ಚೆಲ್ಲಿ ಆಸ್ಸಿಲಿ. ತಿಕ್ಕಾ ಪಳವ್ನು ರಾಜಕುಮಾರು ಲಾಳ ಗಳಯಿತಾ, ಆನಿ ಹಳೂಚಿ ತಿಗೆಲಿ ದೋಸ್ತಿ ಕರ್ತಾ. ತಿಕ್ಕಾ ಹೊ ಕೊಣ ಮ್ಹಣು ಗೊತ್ತಸ್ಸಿಲೆ ನಿಮಿತ ತಿ ಲಾಯಕ ಕೊರ್ನು ತಾಕಾ ಉಪಚಾರು ಕರ್ತಾ ಆನಿ "ತುವೆ ಕೆದ್ನಾಯಿ ರಾತ್ರಿ ಮಾತ್ರ ಯೆವೆತ. ದಿವಸಾಕ ಯೆವಚಾಕ ನಜ್ಜ. ಹಾಂವೆ ಏಕ ವ್ರತ ಧರಲಾ. ತೆ ವ್ರತ ಜಾತ್ತರಿ ದಿವಸಾಕಯಿ ಯೆವೆತ. ಜಾಯಿತ ಮ್ಹೊಣು ಮಾಕ್ಕಾ ಭಾಸ್ ದಿವ್ಕಾ." ಮ್ಹಣು ತಾಗೆಲಿ ಭಾಸ್ ಗೆತ್ತಾ. ರಾಜಕುಮಾರಾನ ಆತ್ತ ರಾತ್ರಿಚೆ ಬಾಯಲೆಲಾಗ್ಗಿ (ಬಾಯಲ ಮ್ಹಣು ತಾಕ್ಕಾ ಗೊತ್ತುನಾ) ಯೆವ್ಚೆ ಅನಿ ದೀಸಾಚೆ ತೆ ಚೆಡಿಯೆಂತಯಿ ವಚ್ಚೆ. ಆತ್ತ ತಿ ಮ್ಹಾಂತಾರಿ ರಾಯಾಲೆ ಅರಮನೆಂತು ಕಾಮ ಕೊರ್ಚೆ ನಿಮಿತಿ ರೂಪಮತಿಲೆ ಅರಮನೆಂತು ಜಾವ್ಚೊ ವಿಷಯು ಕಳ್ನಾಸ್ಸಿ ಚೆಡಿಕಂಯಿ ಕಳ್ನಾ.ತೊಡೆ ದೀಸಾನಿ ರೂಪಮತಿ ಗುರ್ಭಿಣಿ ಜಾತ್ತಾ. ಹೊ ವಿಷಯು ರಾಜಕುಮಾರಾಕ ತಿಣೆ ಸಾಂಗ್ಲಾ. ಆತ್ತ ಗುರ್ಭಿಣಿಕ ಆಶಾ ಆಸ್ಸಿಲೆ ಸಕ್ಕಡ ಕೊರ್ಕಾ ಮ್ಹಣು ತಾಕ್ಕಾ ಗೊತ್ತಸ್ಸ. ಜಾಲ್ಯಾರಿ ತೆ ಕಸ್ಸಲೆ ಮ್ಹಣು ತಾಕ್ಕಾ ಗೊತ್ನಾ. ತಸ್ಸಿ ಜಾವ್ನು ತೊ ಹಳೂಚಿ ತೆ ಮ್ಹಾಂತಾರಿಲಾಗ್ಗಿ "ಗುರ್ಭಿಣಿ ಜಾತ್ತರಿ ಕಸ್ಸಲೆ ಸಕ್ಕಡ ಜಾವಚಾಕ ಅಸ್ಸ ಮ್ಹಣು ಮಾಕ್ಕಾ ಸಾಂಗ್ತವೆ" ಮ್ಹಣ್ತಾ. ತಿ ಮ್ಹಾಂತಾರಿ ರಾಜಕುಮಾರಾಕ ತಮಾಸೆ ಕೊರ್ನು "ಕೊಣಾಕಯಿ ಗುರ್ಭಿಣಿ ಕೆಲ್ಲಾವೆ? ಚೆಡಿ ಗುರ್ಭಿಣಿ ಜಾಲ್ಲಾವೆ? ತಿಕ್ಕಾ ಸಕ್ಕಡ ಗೊತ್ತಸ್ಸ. ಹೆ ಕಸ್ಸಲ್ಯಾಕ ನಿಮ್ಗಿತಾ" ಮ್ಹಣತಾ. ತೆ ವೆಳಾರಿ ರಾಜಕುಮಾರು ಗುಟ್ಟು ಸೊಣಾಸಿ "ಗಾಂವಾಂತು ಚೆಲ್ಯೊ ಗುರ್ಭಿಣಿ ಜಾವ್ನು ಬೊವ್ತಲೆ ಹಾಂವ ಪಳಯಿಲಾ ನಂವೆ? ತಾಂಕಾ ಮಾಗ್ಗಿರಿ ಕಸ್ಸಲೆ ಜಾತ್ತಾ? ಸ್ವಲ್ಪ ದೀಸಾನಿಚಿ ತಾಂಗೆಲೆ ಪೊಟ ಪಾತ್ತಳ ಜಾತ್ತಾ ಆನಿ ತಾಂಗೆಲೆ ಹಾತ್ತಾಂತು ಏಕ ಸಾನ ಚೆರ್ಡು ಆಸ್ತಾ. ತಸ್ಸಿ ಜಾವ್ನು ಹಾಂವೆ ತುಗೆಲಾಗ್ಗಿ ಹೆ ವಿಷಯು ನಿಮ್ಗಿಲೆಲೆ. ತು ಸಾಂಗತಾ ಜಾಲ್ಯಾರಿ ಸಾಂಗ. ತುಕ್ಕಾ ಹಾಂವ ದುಡ್ಡು ದಿತ್ತಾ. ತೂವೆ ಸಾಂಗನಾ ಜಾಲ್ಯಾರಿ ಹಾಂವ ದುಸರ್ಯಾಲಾಗ್ಗಿ ನಿಮ್ಗಿತಾ. ಮಾಕ್ಕಾ ಹೊ ವಿಷಯು ನಿಮ್ಗುಚಾಕ ಕೊಣಯಿ ಮ್ಹೆಳ್ನಾ ಮ್ಹಣು ಲೆಕ್ಲಾವೆ?" ಮ್ಹಣ್ತಾ. ದುಡ್ವಾ ಆಸೆಚಿ ಮ್ಹಾಂತಾರಿ ಕೂಡ್ಲೆ ತಾಣೆ ನಿಮ್ಗಿಲೆಲೆ ವಿಷಯು ಸಕ್ಕಡ ವಿಸ್ತಾರ ಕೊರ್ನು ಸಾಂಗ್ತಾ. ತೆ ಕಸ್ಸಲೆ ಮ್ಹಳ್ಯಾರಿ-ಗುರ್ಭಿಣಿ ಕಾಪ್ಪಡ ಕೊರ್ಚೆ, ತಿಕ್ಕಾ ಉಡ್ಗಿರೆ ದಿವ್ಚೆ, ಗುರ್ಭಿಣಿಕ ಆರ್ತಿ ಕೊರ್ಚೆ-ಮ್ಹೊಣು ಸಾಂಗ್ತಾ. ರಾಜಕುಮಾರಾಕ ಜಾವ್ಕಾ ಜಾಲ್ಲೊಲೊ ವಿಷಯು ಮ್ಹೆಳ್ತರಿ ತಿಕ್ಕಾ ದುಡ್ಡು ದಿತ್ತಾ ಆನಿ ಸೀದಾ ಚೆಡಿಯೆಂತಯಿ ವತ್ತಾ.ರಾತ್ರಿ ರಾಜಕುಮಾರಿಲೆ ಘರಕಡೆ ವಚುವ್ನು ಕೊರ್ಕಾ ಜಾಲ್ಲೆಲೆ ಸಕ್ಕಡ ತೊಚಿ ಕರ್ತಾ. ದುಸರ್ಯಾಂಕ ಹೊ ವಿಷಯು ಕೊಳುಕ ನಜ್ಜ ನಂವೆ? ಅಸ್ಸಿಂಚಿ ಸ್ವಲ್ಪ ಕಾಳಾನಿ ರೂಪಮತಿ ಬಾಳಾಂತಿ ಜಾವ್ನು ಚೆಲ್ಯಾಚೆ ಚೆರ್ಡು ಜಾತ್ತಾ. ದೊನಿ ತೀನಿ ವರ್ಸ ತಾಂಯಿ ಹೊ ವಿಷಯು ಚೆಡಿಯೆಕಯಿ, ರಾಜಕುಮಾರಾಲೆ ಆವ್ಸು ಬಾಪ್ಸುಕಯಿ, ತೆ ಮ್ಹಾಂತಾರಿಕಯಿ ಕಳ್ನಾ. ರಾಜಕುಮಾರಾನ ರಾತ್ರಿ ಮಾತ್ರ ಬಾಯಲೆಲಾಗ್ಗಿ ವಚ್ಚುನು ಪಲ್ಪಾಲ್ಯಾರಿ ತಾಗೆಲೆ ಚೆರ್ಡಾಕ ಘೆವ್ನು ಚೆಡಿಯೆಂತಯಿ ವುಚ್ಚೆ. ಸುರುಸುರ್ವೇಕ ತಿ ಹೆ ಚೆರ್ಡು ಕೊಣ ಮ್ಹಣು ನಿಮ್ಗಿತಾ ಅನಿ ಸಮಚಿ ತಾಜ್ಜೆಲಾಗ್ಗಿ ವುಲ್ಲಯಿನಾ. ರಾಜಕುಮಾರು ಕಸಲ್ಕಿ ಪಟ್ಟಿ ಸಾಂಗ್ತಾ. ತೆ ಚೆರ್ಡಾಲೆ ಖೇಳ ಪಳವ್ನು ತಿಕಾಯಿ ಚೆರ್ಡಾವಯರಿ ಮೋಗು ಪಡ್ತಾ. ಹೊ ವಿಷಯು ರೂಪಮತಿಕ ಕಳತಾ. ಏಕ ರಾತ್ರಿ (ರಾತ್ರಿ ಇತ್ಯಾ ಮ್ಹಳ್ಯಾರಿ, ದೀಸಾಚೆ ತಿ ಮೊರ್ನು ಆಸ್ತಾ ಆನಿ ಚೆರ್ಡಾಕಯಿ ರಾಜಕುಮಾರು ಘೆವ್ನು ವತ್ತನವೆ?) ತಿ ತೆ ಚೆರ್ಡಾಲಾಗ್ಗಿ ತೂವೆ ದಿವಸಾಕ ಕಂಯಿ ವಚ್ಚೆ, ತಂಯಿ ಕೊಣ ಆಸ್ಸ, ಮ್ಹಣು ಕಾಂಯಿ ಗೊತ್ನಾತ್ಲ್ಯಾವರಿ ನಿಮ್ಗುನು ಘೆವ್ಚಾಕ ಸುರು ಕೆಲ್ಲೆ. ಏಕ್ಕಽ ಪಟಿ ಕಸಲೆಽ ಜಾವೊ ಸಾಂಗ್ಲ್ಯಾರಿ ತೆ ಚೆಡಿಯೆಕ ಗೊತ್ತು ಜಾಲ್ಯಾರಿ ಕಷ್ಟಾರಿ ಪಡತ ಮ್ಹಣು ಏಕೊಕೂಚಿ ವಿಷಯು ನಿಮ್ಗುಚೆ. ಅಸ್ಸಿಚಿ ಏಕ ರಾತ್ರಿ `ತೂವೆ ವಚ್ಚೆ ಘರಕಡೆ ಆಸ್ಸುಚೆಲೆ ಗಳ್ಯಾಕ ಏಕು ಚಂದು ಹಾರು ಆಸ್ಸವೆ?' ಮ್ಹಣ್ತಾ. ಚೆರ್ಡು `ಅಯಿ' ಮ್ಹಣ್ತಾ. `ತಸ್ಸಿ ಜಾಲ್ಯಾರಿ ಆಜಿ ತುವೆ ಹಟ ಕೊರ್ನು ತೊ ಹಾರು ತಿಗೆಲ್ಯಾ ದಾಕುನು ಗೆವ್ಕಾ ಆನಿ ಸೀದಾ ಹಾಣು ಮೆಗ್ಗೆಲೆ ಗಳ್ಯಾಕ ಗಾಲ್ಕಾ. ಹೊ ವಿಷಯು ಮಾತ್ರ ತುಗೆಲೆ ಆನ್ನಾಕ ಜಾವೊ ತಿಕ್ಕಾ ಜಾವೊ ಸುರುವೆಕ ಕೊಳುಕ ನಜ್ಜ. ತೂ ಮೆಗೆಲೆ ಬುದ್ವಂತ ಚೆರ್ಡು ನಂವೆ? ಹಾಂವೆ ಸಾಂಗಿಲ್ಯಾವರಿ ಕರ್ತ ನಂವೆ? ಇತ್ಯಾ ಮಳ್ಯಾರಿ ಹಾಂವ ತೆದನಾ ನಿದ್ದೊನು ಆಸ್ತಾ. ತುವೆ ಹಾರು ಮೆಗ್ಗೆಲೆ ಗಳ್ಯಾಕ ಗಾಲ್ಲೆ ಸತಾನ ಹಾಂವ ಉಟಾಯಿತಾ' ಮ್ಹಣ್ತಾ. ಚೆರ್ಡು `ಜಾಯ್ತ ಆಮ್ಮಾ' ಮ್ಹಣು ಸಾಂಗುನು, ಹೆರ್ದಿವಸು ಪಲ್ಪಾಲ್ಲ್ಯಾರಿ ಆನ್ನಾಲೆ ಒಟ್ಟು ವತ್ತಾ. ತಂಯಿ ವತ್ತರಿ ಖೇಳ್ನು, ಖಾವ್ನು, ನೀದ ಕಾಣು ಜಾತ್ತರಿ ಚೆರ್ಡು ರಡ್ತಚಿ ಉಟಾಯಿತಾ. ಕಸ್ಸಲೆ ಕೆಲ್ಲ್ಯಾರಿ ಸಮಾಧಾನ ಕೊರುಂಕ ದೊಗ್ಗ ಜನಾಕಂಯಿ ಜಾಯ್ನಾ. ಘರಾಂತು ಆಸ್ಸುಚೆ ಖೇಳಾ ಸಾಮಾನ ಸಕ್ಕಡ ಹಾಣು ತಾಗೆಲೆ ಎದ್ರಾಕ ಗಾಲ್ತಾಚಿ. ಜಾಲ್ಯಾರಿ ರಣ್ಯ ರಾಬ್ಬಯಿನಾ. ತುಕ್ಕಾ ಕಸ್ಸಲೆ ಜಾವ್ಕಾ ಮ್ಹಣು ಸಾಂಗರೆ ಚೆರ್ಡಾ ಮ್ಹಣು ತಿ ಚೆಡಿ ನಿಮ್ಗಿತಾ. ತೆದನಾ ತೆ ಚೆರ್ಡು ತಿಗೆಲೆ ಗಳ್ಯಾಕ ಆಸ್ಸುಚೆ ಹಾರು ದಾಕವುನು `ತೆ ಜಾಯಿ' ಮ್ಹಣ್ತಾ. ತೆದನಾ ಚೆಡಿ `ಚೆರ್ಡು ನಂವೆ, ತಾಕ್ಕಾ ಕಸ್ಸಲೆ ಗೊತ್ತು, ಖೇಳ್ನು ದಿತ್ತಲೊ' ಮ್ಹೊಣು ಲೆಕ್ಕುನು ಹಾರು ಕಾಣು ತಾಗೆಲೆ ಹಾಂತಾಂತು ದಿತ್ತಾ. ಹಾರು ಹಾಂತಾಂತು ಮೆಳ್ತರಿ ಚೆರ್ಡಾಲೆ ರಣ್ಯ ರಾಬ್ತಾ. ತಸ್ಸಿಚಿ ಚೆರ್ಡು ನುತಚಿ ಖೇಳ್ನು ಆಸ್ಸಿಲೆ ಪಳವುನು ಚೆಡಿ ಕಾಮ ಕೊರುಕ ಮ್ಹಣು ಭಿತ್ತರಿ ವತ್ತಾ. ತೇಚಿ ವೇಳಾರಿ ಚೆರ್ಡು ಘರಾಚೆ ಬಾಯರ ವತ್ತಾ. ರಾಜಕುಮಾರು ತಾಗೆಲೆ ಮಾಗ್ಸಿಚಿ ಬಾಯರ ಯೆತ್ತಾ. ಘರಾಚೆ ಬಾಯರ ಆಯಿಲೆ ಚೆರ್ಡು ಸೀದಾ ಧಾವನು ತೆ ಅರಮನೆಚೆ ಬಾಗ್ಲಾಲಾಗ್ಗಿ ರಾಬತಾ. ಬಾಗಿಲ ಉಗತೆ ಜಾಯನಾ. ತೆದನಾ ತಾಗೆಲೆ ಮಾಗ್ಸಿಚಿ ಧಾವನು ಆಯಿಲೊ ಆನು ಬಾಗ್ಲಾಲಾಗ್ಗಿ ಯೆತ್ತನಾ ಬಾಗಿಲ ಉಗತೆ ಜಾತ್ತಾ. ಚೆರ್ಡು ಸೀದಾ ಆಮ್ಮಾನ ನಿದ್ದಲೆಲೆ ಕೂಡಾಂತು ವಚ್ಚುನು ತೊ ಹಾರು ತಿಗೆಲೆ ಗಳ್ಯಾಕ ಗಾಲ್ತಾ. ಚೆರ್ಡಾಲಿ ಆಮ್ಮಾ ಜೀವ ಜಾತ್ತಾ.ಹೆ ರಾಜಕುಮಾರು ಪಳಯಿತಾ. ತಾಕ್ಕಾ ಆಶ್ಚರ್ಯ ಜಾತ್ತಾ ಆನಿ ತಿಗೆಲಾಗ್ಗಿ "ಹೆ ಸಕ್ಕಡ ಕಸ್ಸಲೆ" ಮ್ಹಣು ನಿಮ್ಗಿತಾ. ತೆದನಾ ತಿ "ಹಾಂವ ತುಮ್ಗೆಲಿ ಬಾಯಲ" ಮ್ಹಣ್ತಾ. ನಂತರ ಜಾಲ್ಲೆಲೆ ವಿಷಯು ಸಕ್ಕಡ ತಾಗೆಲಾಗ್ಗಿ ಸಾಂಗುವುನು ತಾಗೆಲೆ ಆವ್ಸು, ಬಾಪ್ಪುಸು ಆಸ್ಸಿಲೆ ಅರಮನೆಕ ವತ್ತಾಚಿ ಆನಿ ತಾಂಕಾಯಿ ವಿಷಯು ತಿಳ್ಸಿತಾಚಿ. ರಾಯಾಕ ಆನಿ ರಾಣಿಕ ತಾಂಗೆಲೆ ಪುತ್ತಾಲೆ ಚೆರ್ಡಾಕ ಪಳವುನು ಆನಿ ರಾಜಕುಮಾರಾಲೆ ಬಾಯಲೆನ ಸಾಂಗ್ಲ್ಯಾವರಿಚಿ ಕೊರ್ನು ಧಾಕ್ಕೆಲೆ ನಂವೆ ಮ್ಹಣು ಮಸ್ತ ಖೂಸಿ ಜಾತ್ತಾ. ರಾಜಕುಮಾರಾಕ ರಾಜ್ಯಾಚೆ ಪಟ್ಟ ದಿತ್ತಾ ಆನಿ ತಾನ್ನಿ ತೀರ್ಥಯಾತ್ರೆಕ ವತ್ತಾಚಿ. ರಾಜಕುಮಾರು ತುರಂತ ತಿ ಚೆಡಿ ಆನಿ ಮ್ಹಾಂತಾರಿಕ ಆಸ್ಥಾನಾಕ ಆಪ್ಪಯ್ಸಿತಾ. ಮ್ಹಾಂತಾರಿಕ "ಆನಿ ಮೂಕಾರಿ ಅಸ್ಸಲೆ ಕಾಮ ಕೆದ್ನಾಯಿ ಕೊರ್ನಕ್ಕಾ. ಮೆಗೆಲೆ ಬಾಯಲೆನ ಅಸ್ಸಲೆ ಕಷ್ಟ ಭೋಗ್ಗುಂಕ ತುವೆಂಯಿ ಚೆಡಿಯೆಕ ಸಹಾಯು ಕೆಲ್ಲೆಲೆ ಖಾತಿರ ತುಕ್ಕಾ ಗಾಂವಾಂತು ದಾಕುನು ಬಾಯರ ಗಾಲ್ತಾ. ವಸ್ಸ" ಮ್ಹಣು ಸಾಂಗ್ತಾ. ಆನಿ ತಿ ಚೆಡಿ ಆಸ್ಸನಂವೆ ತಿಕ್ಕಾ ಬೊಡ ಲಾನ ಕೊರ್ನು ತಾಂಗೆಲೆ ತೋಟಾಚೆ ಕಾಮಾಕ ಘಾಲ್ತಾ. ನಂತರ ರಾಯು (ಆತ್ತ ರಾಜಕುಮಾರು ಆಸ್ಸಿಲೊ ರಾಯು ಜಾಲ್ಲಾ ನಂವೆ) ಆನಿ ತಾಗೆಲಿ ಬಾಯಲ ರೂಪಮತಿ ರಾಣಿ ಆನಿ ಚೆರ್ಡು ಸಕ್ಕಡ ಸುಖಾರಿ ಮಸ್ತಾ ಕಾಳ ರಾಜ್ಯ ಆಳ್ಸುನು ಚಂದಾಯೆರಿ ಆಸ್ತಾಂಚಿ. -----೦೦೦೦೦೦----
0 ಕಾಮೆಂಟ್(ಗಳು):
Post a Comment