ರಾಮುನ ಕೆಲ್ಲಲೊ ಪೊಳ್ಯಾಚೊ ವ್ಯಾರು.

ರಾಮುಲಿ ಬುದ್ದಿ ಚಾಂಗ ಜಾವೊ ಮ್ಹಣು ರೋಹಿಣಿ ರಾತಿ ಪಾಲ್ಲೆ ತೀಣೆ ನಂಬ್ಗುನು ಆಯಿಲೊ ಧರ್ಮಸ್ಥಳಾಚೆ ಮಂಜುನಾಥಾಲಾಗ್ಗಿ ಮಾಗ್ಚೆ. ಜಾಲ್ಯಾರಿ ತಾಕ್ಕಾ ಆನಿಕಯಿ ಚಾಂಗ ಬುದ್ದಿ ದಿನಿಮೂ ಮ್ಹಣು ರೋಹಿಣಿಕ ಖಂಥಿ. ಜಾಲ್ಯಾರೀ ತಿಗೆಲೆ ಹಟ ತಾಕ್ಕಾ ಸಮ ಕರ್‍ಕಾ ಮ್ಹಣು. ತಾಜ್ಜೆ ಖಾತೀರ ತೀಣೆ ಜೀವನೆಕ ತಾಂದ್ಲಾಚೆ ಪೊಳೆ ಕರ್‍ನು ವಿಕ್ಕುನು ತಾಂತುಲೆ ತೋಡೆ ಪೊಳೆ ತಾನ್ನಿ ಖಾವ್ನು ಜೀವನ ಕರ್‍ತಲಿಂಚಿ. ರಾಮುಕಂಯಿ ವ್ಯಾರು ಸಿಕೊವ್ಚಾಕ ತಾಗೆಲಾಗ್ಗಿ ಥೋಡೆ ಪೊಳೆ ದಿವ್ನು "ಉಚ್ಚುನು ವ್ಯಾರು ಕರ್‍ನು ಯೊ." ಮ್ಹಣು ಪೆಟೆತಸ್ಸಿಲಿ. ಜಾಲ್ಯಾರಿ ರಾಮು ಪೊಳೆ ಸಕ್ಕಡ ಕಾಲಿ ಕರ್‍ನು ದುಡ್ಡ ಮಾತ್ರ ಹಾಣಾಸಿಲೊ. ರೋಹಿಣಿನ ಏಕ ದಿವಸು ರಾಮುಲಾಗ್ಗಿ ಚಾರಿ ಪೊಳೆ ದಿವ್ನು ವಚ್ಚುನು ವ್ಯಾರು ಕರ್‍ನು ದುಡ್ಡ ಹಾಡಿ ಮ್ಹಣು ಸಾಂಗುನು ಪೆಟೆತಾ. ಹೊ ಬೊಳೆ ರಾಮು ಪೊಳ್ಯಾಚಿ ಗಾಂಟಿ ಘೆವ್ನು ವತ್ತನಾ ವಾಟ್ಟೆರಿ ಏಕ ರುಕ್ಕಾಚೆ ಮುಳಾಕ ನಿದ್ದತಾ. ತಾಣೆ ನಿದ್ದಲೆಲೆ ವೇಳಾರಿ ಏಕ ಸೂಣೆ ಯೆವ್ನು ತೆ ಪೊಳೆ ಸಕ್ಕಡ ಖಾವ್ನು ವತ್ತಾ. ರಾಮುಕ ಜಾಗರ ಜಾತ್ತನಾ ಪೊಳ್ಯಾಚಿ ಗಾಂಟಿ ನಾ. ತೊ ಖಾಲಿ ಹಾತ್ತಾನಿ ಘರಕಡೆ ವತ್ತಾ. ತಾಗೆಲಿ ಆಮ್ಮಾ ರೋಹಿಣಿನ ದುಡ್ಡ ನಿಮ್ಗಿತನಾ ಫಾಲ್ಯಾಕ ಹಾಡ್ತಾ ಮ್ಹಣಾಲೊ. ತಸ್ಸಿಂಚಿ ಸುಮಾರ ದಿವಸ ವೆಲ್ಲೆಲೆ ಪೊಳ್ಯಾಚೆ ದುಡ್ಡ ಹಾಣಾತ್ತಿಲೆ ಪಳವ್ನು ರೋಹಿಣಿಕ ರಾಗ ಯೆವ್ನು ರಾಮುಕ ಪೊಳೆ ದೀನಾಸ್ಸಿ ಖಾಲಿ ಹಾತ್ತಾರಿ ಘರಾಂತುಲ್ಯಾನ ಬಾಯರ ಘಾಲ್ತಾಆನಿ ಎದ್ದೋಳುತಾಂಯ ವೆಲ್ಲೆಲೆ ಪೊಳ್ಯಾಚೆ ದುಡ್ಡ ಹಾಣಸ್ಸಿ ಯೆವ್ನಕ್ಕಾ ಮ್ಹಣತಾ. ರಾಮು ಕೆದನಾವರೀಚಿ ತೆ ರುಕ್ಕಾಚೆ ಮುಳಾಕ ವಚ್ಚುನು ಬಸ್ತಾ. ಪೊಟ್ಟಾಕ ಭುಕಯಿ ಜಾತ್ತಾ ರಾಗುಯಿ ಯೆತ್ತಾ. ತೇಚಿ ವೇಳಾರಿ ಕೆದನಾಯಿ ಯೆವ್ನು ಹಾಗೆಲಾಗ್ಗಿ ಆಸ್ಸುಚೆ ಪೊಳೆ ಖಾತ್ತಲೆ ಸೂಣೆ ಥಂಯಿ ಯೆತ್ತಾ. ಖಂಯಿ ನಾತ್ತಿಲೆ ಕೋಪಾನ ರಾಮು ಥಂಯಿ ಆಸ್ಸಿಲೆ ಏಕ್ಕ ಬೊಡ್ಡ್ಯಾನಿ ತೆ ಸೂಣ್ಯಾಕ ಮಾರುಕ ಸುರು ಕರ್‍ತಾ. ಹಾಗೆಲೆ ಬೊಡ್ಡ್ಯಾಚೆ ಪೆಟ್ಟ ಖಾವ್ಚಾಕ ಜಾಯ್ನಾಸ್ಸಿ ತೆ ಸೂಣೆ ಧಾಂವ್ತಾ. ಜಾಲ್ಯಾರಿ ರಾಮು ಧಾಂವ್ಡಾನು ವತ್ತಾ ಆನಿ ಜಾಲ್ಲೆ ತಿತ್ಲೆ ಪೆಟ್ಟ ಮಾರುಕ ಪಳಯಿತಾ. ತಸ್ಸಿಂಚಿ ತೆ ಸೂಣೆ ಧಾಂವ್ನು ಏಕ ರಾನ್ನಾಂತು ವಚ್ಚುನು ಥಂಯಿ ಆಸ್ಸುಚೆ ಏಕ್ಕ ಗುಹ್ಯಾಂತು ರಿಗ್ತಾ. ರಾಮುಂಯಿ ತಾಜ್ಜೆ ಮಾಗ್ಸೀಚಿ ವತ್ತಾ. ಥಂಯ ವಚ್ಚುನು ಪಳಯಿಲ್ಯಾರಿ ತೆ ಗುಹ್ಯಾಂತು ಮಸ್ತ ಭಾಂಗ್ರಾಚೆ, ರುಪ್ಯಾಚೆ ನಗ, ದುಡ್ಡ ಆಸ್ಸಿಲೆ ದಿಸ್ತಾ. ಹೆ ಸಕ್ಕಡ ಚೊರಾನಿ ಚೊರ್‍ನು ಹಾಣು ನಿಪ್ಪವ್ನು ಧವರ್‍ಲೆಲೆ. ರಾಮು ಕೂಡ್ಲೆ ತಾಣೆ ನೆಸಿಲೆ ಮುಂಡಾ ಕಾಣು ಥಂಯ ಪಾತ್ಲ್ಯಾಯಿತಾ ಆನಿ ತಾಜ್ಜಾನ ವಾಂವ್ಚಾಕ ಜಾವ್ಚೆ ತಿತ್ಲೆ ಭಾಂಗ್ರಾಚೆ ನಗ, ರುಪ್ಯಾಚೆ ನಗ, ದುಡ್ಡ ಕಾಣು ಮುಂಡಾಂತು ಘಾಲ್ನು ಪೊಟ್ಲಿ ಬಾಂದುನು ಘರಕಡೆ ಘೆವ್ನು ವತ್ತಾ. ತಿತ್ಲೆ ದುಡ್ಡ ಮ್ಹೆಳ್ತರಿ ರೋಹಿಣಿ ಆನಿ ರಾಮು ಸುಖಾರಿ ಖಾವ್ನು ಜೇವ್ನು ಜೀವನ ಕರ್‍ತಾಚಿ. ಜಾಲ್ಯಾರಿ ತಾಜ್ಜೆ ನಂತರ ರೋಹಿಣಿ ಘೊಳ್ಚೆ ಬಂದ ಕರ್‍ನು ಬಯ್ಸುನು ಖಾವ್ನು ದುಡ್ಡ ಸರಯಿತಾಚಿ. ತಾಜ್ಜೆ ನಂತರ ವಾಪಾಸ್ ರೋಹಿಣಿ ಘೋಳ್ತಾ, ರಾಮು ಬಯ್ಸುನ ಆಳ್ಸೊ ಜಾವ್ನು ಗಾಂವಾಂಚೆ ಜನಾಲಾಗ್ಗಿ ತಾನ್ನಿ ಸಾಂಗಿಲೆ ಆಯ್ಕುನು ಘೆತ್ತಾ. ಜಾಲಯಾರಿ ಏಕ ಪಟಿ ಗಾಂವಚೆ ಸಾಹುಕಾರಾಲೆ ಪೊಟ್ಟಿ ಧುವೆಕ ಹಾಗೆಲೆ ನಿಮತಿ ಉಲವಚಾಕ ಜಾಲೆಲೆ ಖಾತಿರ ಸಾಹುಕಾರಾನ ಸಹಾಯ ಕೆಲೆಲಿ ಕಾಣಿ ಏಕಿ ಆಸ್ಸ. ತಾಜ್ಜೆ ನಂತರ ರಾಮು ಘೊಳಚಾಕ ಸುರುವಾತ ಕರತಾ.
---೦೦೦--- ಹೀ ಕಾಂಣಿ ಆಮ್ಕಾ ಆಮ್ಮಾನ ಸಾಂಗಿಲೊ ಉಗಡಾಸು. ಆನಿ ಕುಂಡ್ಯಾ ಕುರ್ಕುಳ ಪುಸ್ತಕಾರಿ ಆಸ್ಸ.