ಮೊಸ್ಣ್ಯಾಲೆ ಜವಣ

ಬಂಟ್ವಾಳಾಂತು ಮೈರಾವಣಪಾಜೆಕ ವಚ್ಚೆ ವಾಟೆರಿ ಏಕ ಲ್ಹಾನ(ಸಾನ) ಘರಾಂತ ಮೊಸ್ಣೊ ಆನಿ ತಾಗೆಲಿ ಬಾಯಲ ಶಾರದಾ ಸಂಸಾರ ಕರ್‍ನ ಆಶಿಲಿಂಚಿ. ತಾನ್ನಿ ಮಸ್ತ ದುರಬಳೆ. ಖಾವಚಾಕ ಜವಚಾಕ ತಾಂಕಾ ಮಸ್ತ ಕಷ್ಟ. ಚಡಾವತ ಜಾವ್ನ ತಾನ್ನಿ ದೇವಳಾಂತ, ವ್ಹಾರ್ಡಿಕ-ಮುಂಜಿ ಆಶಿಲೆ ಕಡೆನ ವಚ್ಚೆ ಆನಿ ತಾಂಗೆಲೆ ಪೋಟ ಬೊರ್‍ಚೆ. ಜಾಲಯಾರಿ ತೊಂಡ ಮಾತ್ರ ಫರ್‍ಕಟ. ಹೊಡ್‌ಹೋಡ ಉತ್ರ ಕಾತೊರಚೆ. ಜನಾಂಕ ಹಾಂಗೆಲಿ ಬುದ್ಧಿ ಕಳಿತ ಆಶಿಲಿ. ತಶಿ ಜಾವ್ನ ತಾಂಕಾ ತಮಾಷಾ ಕರ್‍ನ ಖಾತಾಲಿಂಚಿ. ಜಾಲಯಾರಿ ತೆ ಮೊಸ್ಣಾಂಕ ಮನಾಂತ ಕಸಲೆಂ ಬೇಜಾರು ನಾ. ಕೊಣಾತಂಯಿ ಜವಣ ಆಸಾ ಥಂಯಿ ಬಾಯಲ ಆನಿ ಬಾಮ್ಹುಂಣ ಹಾಜರ. ಜನ ತಾಂಕಾ ತಮಾಷಾ ಕರತಾ ಜಾಲಯಾರಿ ತಾಂಗೆಲೆ ಪಾಪ-ಪುಣ್ಯ ಪಳವ್ನ ಕಸಲೆಯ ವಿಶೇಷ ಖಾಣ, ಜವಣ ಆಶಿಲೆ ವೇಳಾರಿ ತಾಂಕಾಂಯಿ ಆಪಯಿತಲಿಂಚಿ. ಸದಽಂಚಿ ಮೊಸ್ಣಾನ ದುಸ್ರ್ಯಾಲೆ ಘರಕಡೆ ಜವಣಾಂಕ ವಚ್ಚೆ, ಪೊಟ ಭರಿ ಜವಚೆ ಆನಿ ಘರಕಡೆ ರಾತ್ರಿಕಂಯಿ ಹಾಡ್ಚೆ. ಜಾಲ್ಯಾರಿ ರಾಂದ್ಪಾಂತು ಚೂಕಿ ಸೊದ್ದುನ ಕಾಡಚೊ ವಾಯಟ ಅಭ್ಯಾಸು. ಜನಾನಿ ತಾಗೆಲಾಗಿ ಕೆದನಾಂಯಿ ನಿಮಗುಚಾಕ ಆಶಿಲೆ "ವ್ಹಯರೆ ಮೊಸ್ಣ್ಯಾ, ಸದಂಚಿ ತು ದುಸ್ರ್ಯಾಲೆ ಘರಕಡೆ ಜವ್ತಾ. ತುಗೆಲೆ ಘರಕಡೆ ಆಮಕಾ ಸಕಡ ಜವಣಾಕ ಕೆದನಾ ಅಪಯಿತಾ?" "ತುಮ್ಮಿ ತೆ ವಿಷಯಾಕ ಕಸಲ್ಯಾಕ ಚಿಂತಾ ಕರತಾಚಿ. ಏಕು ದಿವಸ ಆಸ್ಸ. ತುಮಕಾ ಸಕಡ ಜನಾಂಕಯಿ ಮೆಗೆಲೆ ಘರಕಡೆ ಜವಣ ಘಾಲ್ತಾ. ಜಾಲಯಾರಿ ತಾಕಾಯಿ ಏಕ ಸಂದರ್ಭ ಜಾವಕಾ ನ್ಹಂವೆ? ಆನಿ ಥೋಡೆ ದಿವಸಾನಿ ಮೆಗೆಲೆ ವ್ಹಾರ್ಡಿಕ ಜಾವ್ನ ಪಂಚ್ವೀಸ ವರಸ ಜಾತಾ. ತೆದನಾ ತುಮಕಾ ಸಕಡ ಜನಾಂಕ ಸಾಂಗುನ ಗಾಂವ್-ಜವಣ ಕರತಾ." ಮ್ಹಣಾಲೊ ಮೊಸ್ಣೊ. ತಶಿಚಿ ಸುಮಾರ ದಿವಸ ಜಾಲೆ. ಮ್ಹೊಸ್ಣಾಲಿ ಜವಣಾಚಿ ಸುದ್ಧಿ ನಾ. ಅಶಿಂ ಜಾವ್ನ ಜನಾನಿ ನಿಮಗುಚಾಕ ಸುರುಕೆಲೆ-`ಕೆದನಾ ಜವಣ?' ಮ್ಹಣ. ಮೊಸ್ಣ್ಯಾನ `ಥೊಡೆ ದಿವಸ ಆಸಾ.' ಮ್ಹಣ ಸಾಂಗಚೆ. ತಾಜೆ ನಂತರ ಜವಣ ಮ್ಹಳಲೊ ಶಬ್ಧ ನಾತಿಲೇಂಚಿ ಜನಾನಿ `ಕೆದನಾ' ಮ್ಹಣಚೆ ಜಾಲೆಂ. ಮೊಸ್ಣ್ಯಾನ `ಥೊಡೆ' ಮ್ಹಣಚೆ. ಅಶಿಚಿ ಸಾಂಗುನ ಸಾಂಗುನ ಜನಾಕಂಯ, ಮೊಸ್ಣ್ಯಾಕಂಯ ಬೇಜಾರ ಜಾಲೊ ದಿಸತಾ. ನಂತರ ಜವಣಾಂಚೆ ವಿಷಯೂಚಿ ನಾ ಜಾಲೊ.ಅಚಾನಕ ಜಾವ್ನ ಏಕ ದಿವಸ ಮೊಸ್ಣೊ ಗಾಂವಾಂಚೆ ಸಕಡ ಜನಾಂಕಯಿ "ಫಾಲ್ಯಾಕ ಆಮಗೆಲಿ ವ್ಹಾರ್ಡಿಕ ಜಾಲಲೊ ದಿವಸ. ವ್ಹಾರ್ಡಿಕ ಜಾವ್ನ ಪಂಚ್ವೀಸ ವರಸ ಜಾಲೆಂಚಿ. ತಶಿ ಜಾವ್ನ ತುಮ್ಹಿ ಸಕಡ ಜನಾನಿ ಆಮಗೆಲೆ ಘರಕಡೆ ಜವಣಾಂಕ ಯೆವಕಾ. ತುಮಗೆಲೆ ಘರಕಡೆ ರಾಂದಪ ಕರು ನಜ್ಜ. ತುಮ್ಹಿ ಚುಕನಾಶಿ ಜವಣಾಂಕ ಯೆವಕಾ. ತುಮ್ಹಿ ಯೇನಿ ಜಾಲಯಾರಿ ಹಾಂವೆ ಕರೆಲೆಲೆ ರಾಂದಪ ವರತಾ. ಉಗಡಾಸು, ಚುಕೊಚಾಕ ನಜ್ಜ." ಮ್ಹಣ ಗಾಂವಭರಿ ಸಾಂಗತಾ ಗೆಲೊ. ತೆದುಸ ಸಾಂಜವೇಳಾ ತಾಗೆಲೆ ಘರಾಚೆ ಲಾಗಿ ಆಸುಚೆ ಶಾಳಾ ಮೈದಾನ ಮೊಸ್ಣೊ ಆನಿ ತಾಗೆಲಿ ಬಾಯಲ ಶಾರದಾ ಝಾಡುಂಕ ಸುರುಕೆಲೆಲೆ ಆನಿ ಕೆಲವು ಜನಾಲೆ ಮಾತಯಾರಿ ಗೋಣಿ ಚಿಲ್ಲಂ ವ್ಹಾವೊನ ಮೊಸ್ಣೊ ಘರಕಡೆ ವಚ್ಚೆ ಜನಾನಿ ಪಳಯಲೆ. ಹೆರ್‌ದಿವಸಾಚೆ ತಯಾರಿ ಮ್ಹಣ ಜನಾನಿ ಲೆಕಲೆ. ತಶಿಂಚಿ ಹೆರ್‌ದಿವಸ ಜನ ದನ್ಪಾರಾ ಜವಣಾಂಕ ಮ್ಹಣ ತಾಂಗತಾಂಗೆಲೆ ಘರಕಡೆ ದಾಕುನ ಬಾಯ್ಸರಲಿಂಚಿ. ಮೊಸ್ಣ್ಯಾಲೆ ಘರಾಲಾಗಿ ಯೆತನಾ ಘರಾಚೆ ಮಾಡಾದಾಕುನ ಧುವರ ವತ್ತಾ ಅಸಾ. ಭಿತ್ತರಿ ನಾರ್‍ಲ ಕಾಂತುಚೊ ಶಬ್ಧು ಆಯ್ಕತಾ. ವೇಳ ಜಾತವತಾ. ಜನ ಮೊಸ್ಣ್ಯಾಲೆ ಘರಾಚೆ ಭಾಯರ ಬರಲ್ಯಾಂಚಿ. ಸಕಡಾಂಕ ಪೊಟಾ ಭೂಕ ಜಾತಽಚಿ ಆಸ್ಸ. ಬಶಿಲ್ಯಾಂಕ ಭಿತ್ತರಿ ದಾಕುನ ನಾರ್‍ಲ ಕಾಂತುಚೊ ಶಬ್ಧು, ಪಂಣ್ಣ ಗಾಲೆಲೆ ಶಬ್ಧು ಆಯಕತ ಆಸಾ. ರಾಂದಪ ಜಾಯನಿ ದಿಸ್ತಾ ಜಾತರಿ ಆಪಯಿತಲೊ ಮ್ಹಣ ಜನ ಲೆಕತಾಚಿ. ತಶಿಂಚಿ ಬಶಿಲ್ಯಾಂಕ ದೊಳೆ ಜಡ ಜಾವಚಾಕ ಸುರು ಜಾಲೆಂ. ಏಕಕ್ಲೋಚಿ ಥಂಯಿಚಿ ಆಡ ಸರಲೊ. ಥೋಡೆ ವೇಳಾನಿ ಜನ ಸಕಡ ನಿದಾಂತ ಆಸ್ಸಚಿ. ಭಿತ್ತರಿ ನಾರ್‍ಲ ಕಾಂತುಚೊ ಶಬ್ಧ ರಾಬ್ಲೊ. ಪಂಣ್ಣಚೊ ಶಬ್ಧ ಯೆಽತಚಿ ಆಸಾ. ಫಣಾಚೆ ವಾಸಯೇವ್ನ ನಿದಲೆಲ್ಯಾಂಕ ಜಾಗಿ ಜಾವಚಾಕ ಸುರು ಜಾಲೆ. ಗಂಟೆ ಪಳಯಲಯಾರಿ ಸಾಂಜ್ವಳಾ ಚಾರಿ. ಹೆಂ ಕಸಲೆ ರಾಂದಪ? ಪಳವ್ಯಾ ಮ್ಹಣ ಘರಾಚೆ ದಾರ ಮಾರತಾತಿ. ಭಿತ್ತರಿ ಪಂಣ್ಣ ಗಾಲಲೆ ಶಬ್ಧ ಆಯಕತಾ, ಜಾಲಯಾರಿ ಮನ್ಶ್ಯಾಲೆ ಶಬ್ಧ ನಾ. ಘರಾಚೆ ಮಾಗಶಿ ವಚುನು ಪಳಯಲಯಾರಿ ಕಸಲೆ ಪಳವಚೆ! ಮ್ಹೊಸ್ಣೊಂಯಿ ನಾ, ತಾಗೆಲಿ ಬಾಯಲಯೀ ನಾ. ರಾನ್ನಿರಿ ಏಕಿ ಪೊಳೆ ಕಾಡಚೆ ಕಾಯ್ಲ ದವರಲ್ಯಾ ಆನಿ ತಾಜೆ ಸಮಚಿ ವಯರಿ ಏಕ ಒಟ್ಟೊ ಉದಕಾಚೊ ತಾಂಬಿಯೊ ಲಾಂಬಿಲೊ ದಿಸತಾ.(ಮಹಾಲಿಂಗೆಶ್ವರ ದೇವಸ್ಥನಾಂತ ಲಿಂಗಾಚೆ ವಯರಿ ಧಾರಾಪಾತ್ರಾಭಿಷೇಕ ಜಾತಾ ತಶಿಂ) ತಾಂತ ದಾಕುನ ಏಕೊಕುಚಿ ಥೆಂಬೊ ಉದಾಕ ತೆ ಹೂನ ಕಾಯಲಿರಿ ಪಡತನಾ ಪಂಣ್ಣ ಘಾಲ್ಯಾ ಮ್ಹಣಕೆಂ ಶಬ್ಧು ಆಯಕತಾ.ತತ್ಕಾಲ ಸಕಡ ಜನಂಯಿ ಒಟ್ಟು ಜಾತಾಚಿ ಆನಿ ಮೊಸ್ಣ್ಯಾಂಕ ಸೊದಿತಾಂಚಿ. ಮ್ಹೊಸ್ಣೊ ಆನಿ ತಾಗೆಲಿ ಬಾಯಲ ಖಂಯಿ ಮ್ಹೆಳತಾಚಿ. ತಾನ್ನಿ ಘರಾಚೆ ಮಾಗಶಿಚೆ ದಾರ ಕಾಣ ಮಾಗಶಿತುಲ್ಯಾನಂಚಿ ಭಾಯರ ಗೆಲೆಂಲಿ ಮಸ್ತ ಕಾಳಾತಾಯ ಪತ್ತ ನಾ. ಜನಾಂಕ ಸಕಡ ಲಜ್ಜೆನ ತೊಂಡ ಉಬಾರುಂಕ ಜಾಯನಾಶಿ ನಂತರ ಕೊಣಂಯ ಮೊಸ್ಣ್ಯಾಲೊ ವಿಷಯೂಚಿ ಕಾಣಾತಿಲಿಂಚಿಕಂಯಿ. ಜಾಲಯಾರಿ ದುಸ್ರೆ ಲಾಗಿ ಮಸ್ತ ಗಾಂವ ಆಸ್ಸಚಿ ನ್ಹಂವೆ ತಾನ್ನಿ ಬಂಟ್ವಾಳಾಚೆ ಜನಾಂಕ ತಮಾಷಾ ಕರಚಾಕ ಸುರುಕೆಲಿಕಂಯ. ಬಂಟ್ವಾಳಾಚೆ ಕೊಣಂಯ ಮ್ಹೆಳೆಲೆ ತೆದನಾ "ಕಶಿ ಆಸಿಲೆ ಮೊಸ್ಣ್ಯಾಲೆ ಜವಣ" ಮ್ಹಣ್ಚೆಕಂಯ. ತೆದನಾ ಬಂಟ್ವಾಳಾಚೆ ಜನಾಂಕ ಅವಮರ್ಯಾದ ಜಾಲಯಾ ಮ್ಹಣಕೆ ಜಾವಚೆಕಂಯ.ಏಕ ದಿವಸ ಅಚಾನಕ ಜಾವ್ನ ಮೊಸ್ಣೊ ಆನಿ ತಾಗೆಲಿ ಬಾಯಲ ಬಂಟ್ವಾಳ ಗಾಂವಾಂಕ ಯೆತಾಚಿ. ಘರ ಘರ ವಚುನು ಆಮಂತ್ರಣ ಪತ್ರ ದಿತಾಚಿ. ಕಸಲೆ ಮ್ಹಣ ಪಳಯಿಲಯಾರಿ ತಾಂಗೆಲೆ ಘರಾ ವಕ್ಲಾಚೆ (ಘೃಹ ಪ್ರವೇಶಾಚೆ)ಆಮಂತ್ರಣ. ಮೊಸ್ಣೊ ಆನಿ ತಾಗೆಲಿ ಬಾಯಲ ತಾನ್ನಿ ಬಂಟ್ವಾಳಾಂತ ಆಶಿಲೆ ವೇಳಾರಿ ತಾಂಗೆತಂಯಿ ಜವಣಾಂಕ ಸಾಂಗುನ ಘರಾಚೆ ಮಾಗಶಿ ವಾಟೆನಂಚಿ ವಚುನು ತಾಂಕಾ ಜಾಲೆಲೆ ತೊಂದ್ರೆಕ ತಾನ್ನಿ ಮಾಫಿ ಮಾಗಲಿ. "ಆಮ್ಹಿ ಹಾಂಗದಾಕುನ ಸೀದಾ ಕೊಡಿಯಾಲಾಕ ವಚುನು ಗಾಂವಂಚೆ ಬಾಯರ ಆಸುಚೆ ಏಕ ಜಾಗಯಾರಿ ಲ್ಹಾನ ಖೊತ (ಗುಡ್ಸಲ) ಘಾಲ್ನ ರಾಬ್ಲಿಂಚಿ. ನಂತರ ಆಮ್ಹಿ ದೊಗಂಯಿ ಗೊಳ್ನ ಜೀವನ ಕೆಲೆಂ. ತಾಂತು ಆಸುಚೆ ಸುಖ ಆಮಕಾ ಕಳ್ಳೆ. ತಸೀಂಚಿ ಆಮ್ಹಿ ದುಡು ಒಟ್ಟು ಕರ್‍ನ ತೆ ಜಾಗಯಾರಿ ಏಕ ಚಂದ ಘರ ಬಾಂದಲಾಂ. ತಾಜೆ ವಕ್ಲಾಕ ತುಮ್ಮಿ ಸಕಡ ಜನಾಂನಿ ಯೆವಕಾ. ಹಾಂಗಾ ಆಶಿಲೆ ತೆದನಾ ಆಮ್ಮಿ ಜವಣ ದಿಲಯಾವರಿ ಮ್ಹಣ ಲೆಕನಾಶಿ ಯೆವ್ನ ತುಮಗೆಲೆ ಸಕಡಾಲೊ ಆಶೀರ್ವಾದ ಜಾವಕಾ." ಮ್ಹಣ ಸಾಂಗುನ ಮ್ಹಾಲ್ಗಡ್ಯಾಲೆ ಪಾಯ ಧರಲೆ. ತೆದನಾ ಬಂಟ್ವಾಳ ಗಾಂವಾಂಚೆ ಜನಾಂಕ ನಿಜ್ಜಾವ್ನ ತಾಗೆಲೆ ವಯರಿ ಪಾಪ ದಿಸುನು ಘರಾಕ ಏಕ ಜನಾಲೆಕಾನ ಮೊಸ್ಣ್ಯಾಲೆ ಘರಾವಕ್ಲಾಕ ಗೆಲಿಂಚಿ ಆನಿ ಉಡ್ಗಿರೆಯಿ ಕೆಲೆಂ. ಆತಾ ತೆದನಾಚೆ ಜನ ನಾತಿಲೆ ನಿಮತಿ ಬಂಟ್ವಾಳಾಚೆ ಆತಾಚೆಂ ಜನಂಯ ಮೊಸ್ಣಾಲಿ ಕಾಣಿ ಬಾಂದುನು ಚೆರ್ಡುಂವಾಕ ಸಾಂಗತಾಚಿ ಆನಿ ಚೆರ್ಡುಂವಾಲೆ ಒಟ್ಟೂಚಿ ಹಾಸತಾಚಿ.
---೦೦೦---
ಹೀ ಕಾಂಣಿ ಮೆಗೆಲಿ ಆಮ್ಮಾನ ಸಾಂಗಿಲಿ. ಜಾಲ್ಲ್ಯಾರಿ ಸಕ್ಕಡಾಂಗೆಲೆ ಆಮ್ಮಾನಂಯಿ ತಾಂಗೆಲೆ ಚೆರ್ಡುಂವಾಕ ಸಾಂಗುನು ಆಸ್ಸುಕಾ.