ಬಂಟ್ವಾಳ ಗಾಂವಾಂತು ಬಡ್ಡಕಟ್ಟ್ಯಾರಿ ಪಟ್ಟಣಶೆಟ್ಟಿ ಮ್ಹಳಲೊ ಏಕಲೊ ವೇಪಾರಿ ಆಶಿಲೊ. ತಾಗೆಲೆ ಘರ ಮುಗಡೇಲ ಗುಡ್ಯಾರಿ. ತೆ ವೇಳಾರಿ ಮುಗಡಾಲ ಗುಡ್ಯಾಕ ವಚುಕಾ ಜಾಲಯಾರಿ ಗಾದ್ಯಾಚೆ ವಾಟ ಆನಿ ಗುಡ್ಯಾ ವಾಟೇನಂಚಿ ವಚುಕಾ ಆಶಿಲೆ. ಆತಾ ಥಂಯಿ ಕಾಲೇಜಾಚೆ ರಸ್ತ್ಯಾರಿ ವಚುನ ಚಾರಿ ಮಾರ್ಗ ಮೆಳಚೆ ಕಡೆನ ಧರ್ಮಸ್ಥಳಾಕ ವಚ್ಚೆ ರಸ್ತ್ಯಾರಿ ಥೋಡೆ ದೂರ ಗೆಲಯಾರಿ ಮುಗಡಾಲ ಗುಡ್ಯಾಕ ವಚೊ ರಸ್ತೊ ಆಸಾ. ಪಟ್ಟಣಶೆಟ್ಟಿಲೆ ದುಕಾನಾಚೆ ಮಾಗ್ಸಿಽಚಿ ಗುಡ್ಡ್ಯಾವಾಟೆರಿ ವಚುಯೇತ. ಮಧ್ಯೆಂತು ದೋನಿ ವ್ಹಾಳೆ(ತೋಡ) ಮೆಳತಾಚಿ. ತಾಕಾ ಪ್ರಕಾಶ ಆನಿ ಸುರೇಶ ಮ್ಹಣ ದೊಗ ಚೆಲ್ಯಾ ಚೆರ್ಡುಂವ. ಪ್ರಾಯೆಕ ಆಯಲ್ಯಾರಿ ಕಸಲೆ ಕಾಮ ಯಾ ದಂದೊ ಕರ್ಚೆ ಆಲೋಚನಽಚಿ ತಾಂಕಾ ನಾ. ಕಸಲ್ಯಾ ಮ್ಹಳಯಾರಿ ತಾಂಗೆಲೆ ಬಾಪ್ಸುಕ ವ್ಯಾರ ಚಾಂಗ ಜಾತ್ತಲೊ. ಜಾಲ್ಯಾರಿ ಬಾಪ್ಸುಲೆ ವ್ಯಾಪಾರಾಂತುಯೀ ಮನ ಘಾಲನಾತಿಲಿಂಚಿ. ತಶಿ ಜಾವ್ನ ಪಟ್ಟಣಶೆಟ್ಟಿಕ ಪೂತ ಸಾಂಗಿಲೆ ಆಯಕನಾಂಚಿ ಮ್ಹಣ ತಾಂಗೆಲೆ ವಯರಿ ಮಸ್ತ ರಾಗ ಆಶಿಲೊ. ಸುರುವೇಕಚಿ ಪಟ್ಟಣಶೆಟ್ಟಿ ಕೋಪಿಷ್ಟ. ನಾಂಕಾಚೆ ತುದೇರಿಚಿ ತಾಕಾ ಕೋಪು. ತಾಗೆಲೆ ಬಾಯಿಲೆಲೆ ನ್ಹಾಂವ ಭವಾನಿ. ತಿಕಾ ಚೆರ್ಡುಂವಾ ವಯರಿ ಮಸ್ತ ಮೊಗು. ಏಕ ದಿವಸ ಪಟ್ಟಣಶೆಟ್ಟಿ ವ್ಯಾರಾಕ ಬಂಟ್ವಾಳಾಚೆ ದುಕಾನಾಕ ವತನಾ ಪ್ರಕಾಶಾಕ ಆನಿ ಸುರೇಶಾಕ ಘೆವ್ನು ವತಾ. ಸದಽಂಚಿ ಆಂಗ್ಡಿಕ ಗೆಲಯಾರಿ ತಾಂಕಾ ವ್ಯಾರಾಂತು ಮನ ಯೆತಲೆ ಮ್ಹಣ ತಾಕಾ ಆಶಾ. ತಸ್ಸಿ ಜಾವ್ನ ತಾಣೆ ಸಕಾಣಿಚೆ ದುಕಾನಾಕ ವತನಾ ತಾಂಕಾ ಘೆವ್ನ ವಚ್ಚೆ, ಥೋಡೊ ವೇಳು ತಾಂಕಾ ದುಕಾನಾಂತ (ಆಂಗಡಿ) ಬಸೋವ್ನ ತಾಂಗೆಲಾಗಿ ದಂನ್ಪಾರಾಕ ರಾಂದಯೇಕ ಕಸಲೆಯ ರಾಂದಯಿಕಾಯಿ, ಝಳ್ಕೆ (ಮಾಸ್ಳಿ) ಪೆಟೊವಚೆ ಆಶಿಲೆ. ತಸ್ಸೀಂಚೀ ತೆದುಸುಯಿ ತೊ ತಾಂಕಾ ಘೆವ್ನ ವತಾ. ಕೆದನಾಯಿ ಝಳ್ಕೆ ಹಾಣ ದಿತಲೊ ಹಾಮದ್ ಬ್ಯಾರಿನ ಆಜಿ ಅಬ್ರೋಣಿ ಹಾಡತಾ ಮ್ಹಣ ಸಾಂಗಿಲೆ. ಅಬ್ರೋಣಿ ಕೆದನಾಯಿ ಪಾವಸಾಡಿಂತ ಮಾತ್ರ ಮ್ಹೆಳಚೆ. ತೆವಂಯಿ ಥೋಡೆ ದಿವಸ ಮಾತ್ರ. ತೆ ಝಳ್ಕೆ ಮ್ಹಳಯಾರಿ ಬಂಟ್ವಾಳಾಚೆ ಜನ ಮೋಲ ಕಿತಲ್ಯೆಯಿ ಜಾಲಯಾರೀ ದೀವ್ನ ಘೆತಲಿಂಚಿ. ತಶಿ ಜಾವ್ನ ಸುರುವೇಕಚಿ ಹಾಮದ್ ಬ್ಯಾರಿ ಲಾಗಿ ಪಟ್ಟಣಶೆಟ್ಟಿನ ಸಾಂಗುವ್ನು ದವರಲೆಲೆ. ದುಕಾನಾ (ಆಂಗಡಿ) ವತನಾ ಹಾಮದ್ ಬ್ಯಾರಿ ಅಬ್ರೋಣಿ ಝಳ್ಕೆ ಘೆವ್ನ ರಾಬಿಲೊ. ಸುಮಾರ ಹೋಡ ಆಶಿಲೆ. ಪ್ರಕಾಶಾನ ಆನಿ ಸುರೇಶಾನ ಪಳಯತನಾ ಜೀವು ಆಸುನು ತೆ ಪಟಪಟ ಉಡತಾಲೆ. ಪ್ರಕಾಶ ಆನಿ ಸುರೇಶ ತೆ ಘೆವ್ನ ದುಕಾನಾಚೆ (ಆಂಗಡಿ) ಮಾಗಸಿತುಲ್ಯಾನಂಚಿಗುಡ್ಯಾವಾಟೆರಿ ಘರಕಡೆ ಗೆಲೆಂಚಿ.ಹಾತಾಂತು ಝಳಕೆ ಘೆವ್ನ ವತನಾ ತೆ ಪಟಪಟಚೆ ಪಳವ್ನ ಥಂಯಿಚಿ ಆಶಿಲೆ ಏಕ ವ್ಹಾಳಾಚೆ ಉದಕಾಂತ ಸೋಣೂ ಪ್ರಕಾಶಾನ ಆನಿ ಶುರೇಶಾನ ಖೇಳೊಚಾಕ ಸುರುಕೆಲೆ. ತೆದನಾ ಝಳಕ್ಯಾಕ ಚಡ ಜೀವ ಆಯಲೊ. ತಸಿಂಚಿ ಮುಕಾರಿ ವತನಾ ಆನ್ನೆಕ ವ್ಹಾಳಾಂತ ವಾಪಾಸ ಖೇಳೆಯಲೆ. ತೆದನಾ ತೆ ಝಳಕೆ ಹಾತಾಂತ ದಾಕುನ ನಿಸೊರ್ನ ಗೆಲೆ ಆನಿ ಉಲವಚಾಕ ಸುರುಕೆಲೆ "ತುಮ್ಹಿ ಆತಾಂ ಮಾಕ್ಕಾ ವಚಾಕ ಸೊಳೆಲೆ ಖಾತಿರ ತುಮಗೆಲೊ ಉಪಕಾರ ಕೆದನಾಯಿ ವಿಸರನಾ. ತುಮಕಾ ಖಽಂಚೆಯ ವೇಳಾರಿ ಮೆಗೆಲೆ ನಿಮತಿ ಕಸಲೆಂಯ ಕಾಮ ಜಾವಕಾ ಜಾಲಯಾರಿ ಮೆಗೆಲೊ ಉಗಡಾಸ ಕಾಳಯಾರಿ ಹಾಂವ ಯೆತಾ." ಮ್ಹಣ ಸಾಂಗುನ ತೆಂ ಝಳಕೆ ಉದ್ಕಾಂತ ವತಾ. ತೆ ಉದಕಾಚೊ ವ್ಹಾಳೊ ಸೀದಾ ನೇತ್ರಾವತಿ ನಂಯಿಕ ಮೆಳತಾ. ಝಳಕೆ ಉದಕಾಂತ ವತರಿ ಪ್ರಕಾಶಾಕ ಆನಿ ಸುರೇಶಾಕ ಭಂಯ ಸುರುಜಾಲೆ. "ಆನ್ನಾಕ ಸುರುವೇಕಚಿ ಆಮಗೆಲೆ ವಯರಿ ರಾಗು. ಆತಾಂ ಝಳಕೆ ಅಶಿ ಜಾಲೆ ಮ್ಹಣ ಸಾಂಗಲ್ಯಾರಿ ಕಸಲೆ ಕರತಲೊ ಸಾಂಗುಕ ಜಾಯನಾ. ತಶಿ ಜಾವನ ಆಮ್ಹಿ ಆತಾಂ ವಗೀ ಘರಕಡೆ ವಚುನ ಆವಯಲಾಗಿ ಹೊ ವಿಷಯ ಸಾಂಗುಯಾ." ಮ್ಹಣ ದೊಗಂಯ ಉಲ್ಲಯತಚಿ ಘರಕಡೆ ಗೆಲೀತಿ. ಘರಕಡೆ ವತ್ತರಿ ತಾನ್ನಿ ತಾಂಗೆಲೆ ಆವಯ ಭವಾನಿಲಾಗಿ ಹೊ ವಿಷಯ ಸಾಂಗಲೊ. ತೆದನಾ ತೀಣೆ ವಗಿ ವಗಿ ರಾಂದಪ ಕೆಲೆ. ಪುಳದಿವಸ ಏಕ ಕೇಳಿ ಪಳಲಿ. ತಾಕಾ ಆಶಿಲೊ ಗಡಾಯು ಜುನ ಜಾಯನಾತಿಲೆ ನಿಮತಿ ತಾಜೆ ಬೊಂಡಿಚೆ ಉಪಕರಿ ಕೆಲಿ ಆನಿ ಏಕ ಸಾರು ಕರ್ನ ಚೆರ್ಡುಂವಾಕ ವಾಳ್ಳೆ ಆನಿ ವಾಟ್ಟೆರಿ ಖಾವಚಾಕ ಥೊಡಿಚಿ ಚಪಾತಿ ಕರ್ನ ದಿಲಿ. ಚಡತೀಚಿ ಕರ್ನ ದಿವಚಿ ತಿತಲೊ ವೇಳ ನಾಸಿಲೊ. ತಾಂಗೆಲೆ ಜವಣ ಜಾತರಿ ತಾಂಕಾ ಘರ ಸೊಣ ವಚಾಕ ಸಾಂಗ್ಲೆ. ಕಸಲ್ಯಾಕ ಮ್ಹಳಯಾರಿ ಬಾಪ್ಸುಕ ರಾಗ ಆಯಲ್ಯಾರಿ ಕಸಲೆ ಕರತಾ ಮ್ಹಣ ಸಾಂಗುಕ ಜಾಯನಾ. ತಶಿಂಚಿ ಚೆರ್ಡುಂವ ತೆಕಡೆ ಗೆಲೆ ಸತಾನ ಹಿತಲಾಂತ ಕಾತೊರ್ನ ಘಾಲೆಲಿ ಕೇಳಿಚೆ ದೊನಿ ಕುಡಕೆ ಕೆಲೆ. ಘರಾಚೆ ಭಿತರಿ ಯೆವ್ನ ಚೆರ್ಡುಂವಾನ ನಿದೊಚೆ ಕುಡಾಂತ ಹಾಂತುಳ್ನ ತೆ ಕೇಳಿಚೆ ಕುಡಕೆ ಹಾಂತಳಾರಿ ಲಾಗಿಲಾಗೀಚಿ ದವರ್ನ ತಾಕಾ ಪಾಂಗುರ್ನ ವಾಸರಿ ವಚುನ ತಿಗೆಲೆ ಕಾಮ ಕರತಽಚಿ ರಾಬಲಿ. ದಂನಪಾರಾ ಪಟ್ಟಣಶೆಟ್ಟಿ ದುಕಾನ (ಆಂಗಡಿ) ಬಂದ ಕರ್ನ ಜವಣಾಂಕ ಘರಕಡೆ ಆಯಲೊ. ನ್ಹಾಣೆಂತ ವಚುನ ಹಾತಪಾಯ ಧುವ್ನ ಆಯಲೊ. ಜವಣಾಂಕ ಬಸಲೊ. ಭವಾನಿನ ಭಿತ್ತಽಚಿ ತಾಕಾ ವಾಡುಂಕ ಸುರುಕೆಲೆಂ. ರಾಂದಯಿ ವಾಡತನಾ ತಾಣೆ "ಝಳಕೆ ಪೆಟೆಯಿಲೆ ನ್ಹಂವೆ? ತಾಜಿ ರಾಂದಯಿ ಕರನಿವೆ?" ಮ್ಹಳೆ. ಭವಾನಿನ ಚೆರ್ಡುಂವಾನ ಸಾಂಗಿಲೊ ವಿಷಯ ಸಾಂಗಲೊ. ಪಟ್ಟಣಶೆಟ್ಟಿ ರಾಗಾನ ಕಡಕಡೆಲೊ. "ಖಂಯಿ ಮೆಲಿಂಚಿ ತಾನ್ನಿ." ಮ್ಹಣಾಲೊ. ಭವಾನಿ "ಜವಣ ಕರ್ನ ನಿದಲಾಂಚಿ." ಮ್ಹಣಾಲಿ. ಸುರುವೇಕಚಿ ನಾಂಕಾಚೆ ತುದೇರಿ ರಾಗ ಆಶಿಲೊ ಪಟ್ಟಣಶೆಟ್ಟಿ ಜವಣಾಂಕ ಬಶಿಲೊ ಉಟಾಯಲೊ. ತೆದನಾ ಭವಾನಿ "ತುಮ್ಹಿ ಪಯಲೆಂ ಜವಣ ಕರಾಚಿ. ತಾನ್ನಿ ಆತಾಂ ನಿದಲಾಂಚಿ ನ್ಹಂವೆ? ಉಟಾಯತರಿ ಕಸಲೆ ಮ್ಹೊಣ ಪಳಯಾಚಿ." ಮ್ಹಣಾಲಿ. ಪಟ್ಟಣಶೆಟ್ಟಿನ ಭವಾನಿಕಯ ಭಿಷ್ಟಾಯಿಲೆ ಆನಿ ಸೀದಾ ತಾಗೆಲೆ ಕುಡಾಕ ವಚುನ ಏಕಿ ದೀಗೀಚಿ ಪೆಸಕಾತಿ (ಖಡ್ಗ) ಹಾಣ ಚೆರ್ಡುಂವಾನ ನಿದಲೆಲೆ ಕುಡಾಕ ಗೆಲೊ. ತೆ ಪೆಸಕಾತಿನ ಹಾಂತಳಾರಿ ನಿದಲೆಲೆ ಚೆರ್ಡುಂವಾಕ ಕಚಕಚ ಕರ್ನ ಕೊಚಾನು ಘಾಲೆ ಆನಿ ಸೀದಾ ಜವಣ ಕರನಾಶಿ ಪರತ ದುಕಾನಾಕ ಗೆಲೊ. ಭವಾನಿ ಚೆರ್ಡುಂವಾಲೆ ಉಗಡಾಸ ಯೆವ್ನ ರಡತಚಿ ಬಾಂಮಣಾನ ಕೊಚ್ಚಾನ ಘಾಲೆಲೆ ತೆ ಕೇಳಿಚೆ ಕುಡಕೆ ಕಾಣ ನಂಯಿಂತ ವ್ಹರ್ನ ಹೊಳೊವ್ನ ಆಯಲಿ.ಘರಕಡೆ ದಾಕುನ ಬಾಯರ ಆಯಿಲಿ ಚೆರ್ಡುಂವ ಖಂಚೆ ದಿಕಡೆ ವಚ್ಚೆ ಮ್ಹಣ ಚಿಂತುನ ತೆ ಡೊಂಗರಾರಿ ವತಽ ರಾಬಲಿಂಚಿ. ಸುಮಾರ ದೂರ ವತ್ತನಾ ತಾಂಕಾ ಪೊಟಾಕ ಭೂಕ ಜಾಲಿ. ಥಂಯಿಚಿ ಆಶಿಲೆ ಏಕ ಅಶ್ವತಾಚೆ ರೂಕಾಚೆ ಪೊಂದಾಕ ಬಯಸುನು ಆವಯನ ಬಾಂದುನ ದಿಲೆಲೆಂ ಖಾಣ ಖಾವ್ಚಾಕ ಸುರುಕೆಲೆಂ. ತೆದನಾ ವಯರಿ ದಾಕುನ ಏಕಿ ಪಕ್ಷಿ ತಾನ್ನಿ ಬಶಿಲೆ ಕಡೆನಽಂಚಿ ಪಳ್ಳಿ. ತತ್ಕಾಲ ತಿ ಪಕ್ಷಿ ಕಾಣ ಪ್ರಕಾಶಾನ ತಾಗೆಲೆ ಗಾಂಡಿಚೆ ಮುಳಾಕ ದವರಲಿ. ಆವಯನ ಕೊರ್ನ ದಿಲೆಲಿ ತಿ ಚಪಾತಿ ಆತ್ತಂಕ ಮಾತ್ರ ಪುರೊ. ಮುಕಾರಿ ವತನಾ ವಾಪಾಸ ಭೂಕ ಲಾಗ್ಲಯಾರಿ ಜಾತಲೆ ಮ್ಹಣ ಚಿಂತುನ ತಾನ್ನಿ ತಶಿ ಕೆಲೆಲೆ. ತೇಚಿ ವೇಳಾರಿ ಏಕಲೊ ಹಾತಾಂತ ಬಂದೂಕ ಘೆವ್ನ ತಾನ್ನಿ ಬಶಿಲೆ ಕಡೆನ ಆಯಿಲೊ ಆನಿ "ತುಮ್ಹಿ ಹಾಂಗಾ ಏಕಿ ಪಕ್ಷಿ ಪಳೆಲಿ ಪಳಯಲಾವೆ?" ಮ್ಹಣಾಲೊ. ಪ್ರಕಾಶ ಆನಿ ಶುರೇಶಾನ `ಪಳಯಿನಿ' ಮ್ಹಳೆಂ. ತೆದನಾ ತೊ ಮನಿಷ್ಯು "ಛೆ! ಹಾಂವೆ ಯಿತಲೆ ಕಾಳದಾಕುನು ಸೊದಿಲೆಲಿ ಪಕ್ಷಿ ಆಜಿ ಮೆಳ್ಳಿ ಮ್ಹಣ ಮಾರಲಿ. ಜಾಲಯಾರಿ ತಾಜೆ ಮಡೆ ಖಂಯಿ ಪಳ್ಳಾ ಮ್ಹಣ ದಿಸನಾಮೂ?" ಮ್ಹಣಾಲೊ. "ತು ಕಸಲ್ಯಾಕ ತಿತಲೆ ಬೇಜಾರ ಕರತಾ. ದುಸ್ರಿ ಪಕ್ಷಿ ಮಾರೆತ ನಂವೆ?" ಮ್ಹಣಾಲಿಂಚಿ. "ತಸಲಿ ಪಕ್ಷಿ ಕೆದನಾಯ ಮೆಳನಾ. ತಿ ಪಕ್ಷಿ ಮ್ಹೆಳಯಾರಿ ಮೆಗೆಲೆ ನಸೀಬ ಬರೇಂ ಜಾತಾಶಿಲೆ." ಮ್ಹಣಾಲೊ. ತಾಕಾ ಶುರೇಶಾನ "ತೆ ಪಕ್ಷಿಂತ ತಸಲಿ ಕಸಲಿ ಶಕ್ತಿ ಆಸಾ." ಮ್ಹಣ ನಿಮಗಿಲೆ. "ತಾಜೆ ಮಾತ್ಯಾಚೊ ಕುಡಕೊ ಖಾಲಯಾರಿ ರಾಯ ಜಾತಾ ಆನಿ ಬಾಲಾಚೊ ಕುಡಕೊ ಖಾಲಯಾರಿ ಹಸತನಾ ಮೋತಿ ಆನಿ ರಡತನಾ ಮಾಣಿಕ್ಯ ಪಡತಾ. ಜಾಲಯಾರಿ ಆತಾಂ ಕಸಲೆ ಕರಚೆ." ಮ್ಹಣಾಲೊ ತೊ. ಪ್ರಕಾಶ ಆನಿ ಸುರೇಶಾನ ತಾಗೆಲಾಗಿ "ಹೆ ಗಾಂವಾಂಚೆ ನಾಂವ ಕಸಲೆ?" ಮ್ಹಣ ನಿಮಗಿಲೆ. "ಕುತ್ಕೊಳಿ" ಮ್ಹಣಾಲೊ. "ಆಮ್ಹಿ ಬಯಸೂನೂಂಚಿ ಆಸ್ಸಚಿ ನಂವೆ? ತುವೆಂ ವಾಪಾಸ ಕಸಲ್ಯಾಕ ಕುತ್ಕೊಳಿ ಮ್ಹಣಚೆ." ಮ್ಹಣಾಲಿಂಚಿ. "ತಶಿ ನ್ಹಂಹಿ. ಹೆ ಗಾಂವಾಂಚೆ ನಾಂವ ಕುತ್ಕೊಳಿ ಮ್ಹಣ. ಹೆ ರಸ್ತ್ಯಾರಿ ಗೆಲಯಾರಿ ತುಮಕಾ ವಾಮದಪದವ ಗಾಂವ ಮೆಳತಾ. ತೆ ರಸ್ತ್ಯಾರಿ ಗೆಲಯಾರಿ ಮೂಡಬಿದ್ರೆ ಮೆಳತಾ. ತುಮಕಾ ಕಂಯಿ ವಚುಕಾ?" ಮ್ಹಣಾಲೊ. "ಆಮಕಾ ಕಂಯಿ ಗೆಲಯಾರಿ ಜಾತಾ. ಆಮ್ಹಿ ಅಶಿಂಚಿ ಬೊಂವತಚಿ ವಚ್ಚೆ." ಮ್ಹಣಾಲಿಂಚಿ. ತಾಣೆ ತೆಕಡೆ ಗೆಲೆ ತಕ್ಷಣ ಗಾಂಡಿಚೆ ಮುಳಾಕ ದವರಲೆಲಿ ಪಕ್ಷಿ ಕಾಳ್ಳಿ. ಆನಿ ದೋನಿ ಕುಡಕೆ ಕೆಲೆ ಆನಿ ಪ್ರಕಾಶಾನ ಮಾತೆ ಆನಿ ಸುರೇಶಾನ ಬಾಲಾಚೊ ಕುಡಕೊ ಖಾಲೊ. ಖಾಣ ಆನಿ ಪಕ್ಷಿ ಖಾವ್ನ ಜಾತರಿ ತಾಂಕಾ ತಾನಿ ಆಯಲಿ. ಪ್ರಕಾಶ ಸುರೇಶಾಕ ಮ್ಹಣಾಲೊ "ತು ಹಾಂಗಾಚಿ ಬಯಸ. ಹಾಂವ ರೂಕಾರಿ ಚೋವಣ ಉದಾಕ ಖಂಯಿ ದಿಸತವೆ? ಮ್ಹಣ ಪಳಯತಾ." ಮ್ಹಣಾಲೊ ಆನಿ ರೂಕಾರಿ ಗೆಲೊ. ತೆದನಾ ತಾಕಾ ದೂರ ಮೂಡಬಿದ್ರೆಚೆ ರಸ್ತ್ಯಾರಿ ಉದಾಕ ದಿಸತಾ. ತೊ ರೂಕಾರಿದಾಕುನ ತೊಗು ದೆವ್ನ ಯೆತನಾ ಸುರೇಶಾಕ ನೀದ ಪಳ್ಯಾ. `ಪಾಪ! ಬಂಟ್ವಾಳಾದಾಕುನ ಚಮಕುನ ಯೆವ್ನ ವಾವಂಟ ಆಯಿಲ್ಯಾಕ ನೀದ ಆಯಿಲ್ಯಾ. ಜಾಗೊಚೆ ನಾಕಾ. ಉದಾಕ ಹಾಡತಾ. ನಂತರ ಜಾಗೋನ ಉದಾಕ ಪೀವ್ನ ಮುಕಾರ್ಸುನ ಗೆಲಯಾರಿ ಜಾಲೆಂ' ಮ್ಹಣ ಚಿಂತುನ ಮೂಡಬಿದ್ರೆಚೆ ರಸ್ತ್ಯಾರಿ ಗೆಲೊ. ಸುರೇಶಾಕ ಜಾಗಿ ಜಾತನಾ ಪ್ರಕಾಶು ದಿಸನಾ. ತೊ ಖಂಚೆ ವಾತೆನ ಚಮಕಲಾ ಮ್ಹಳಲೆ ಹಾಕಾ ಕಳನಿ. ಥೋಡೆ ವೇಳು ಪ್ರಕಾಶಾಕ ರಾಕುನು ಬಸಲೊ. ಸುಮಾರ ವೇಳ ಜಾತ್ತರಿ ಆನಿ ರಾಕ್ಲಯಾರಿ ಜಾಯನಾ ಮ್ಹಣ ಚಿಂತುನು ತೊ ಎದ್ರಾಕ ಆಸುಚೆ ವಾಮದಪದವಾಕ ವಚ್ಚೆ ವಾಟೆರಿ ವಚತ ರಾವಲೊ. ಪ್ರಕಾಶು ಉದಾಕ ಸೊದುನ ಗೆಲಲೊ ಕಿತಲೆ ದೂರ ಗೆಲಯಾರಿ ತಾಕಾ ಉದಾಕ ದಿಸನಾ. ಸುಮಾರ ದೂರ ವತ್ತರಿ ಥಂಯಿ ಏಕ ಗಾಂವ ಮೆಳೊ. ಥಂಚೆ ರಸ್ತ್ಯಾರಿ ಮಸ್ತ ಜನ ಭರ್ಲಾಂಚಿ. ಕಸಲೆ ಮ್ಹಣ ಪಳಯತನಾ ಏಕಿ ಹಸ್ತಿ ತಾಜೆ ಸೊಂಡಿಲಾಂತ ಫುಲಾಚಿ ಮಾಳಾ ಘೆವ್ನ ಯೆತಽಚಿ ಆಸಾ.ಪ್ರಕಾಶಾನ "ಹೊ ಗಾಂವು ಖಂಚೊ ಆನಿ ಹಸ್ತಿ ಕಸಲ್ಯಾಕ ಮಾಳಾ ಘೆವ್ನ ಯೆತಽಚಿ ಆಸಾ?" ಅಶಿ ಲಾಗಿ ಆಶಿಲೆಲ್ಯಾಕ ನಿಮಗಿಲೆ. ಲಾಗಿ ರಾಬಿಲೊ ಮ್ಹಣಾಲೊ "ಹೊ ಗಾಂವ ಮೂಡಬಿದ್ರೆ. ಹಾಂಗಾಚೊ ರಾಯ ದೈವಾಧೀನ ಜಾಲೊ. ತಾಕಾ ಚೆರ್ಡುಂವ ನಾತಿಲೆ ನಿಮಿತಾನ ಗಾಂವಾಂಕ ಏಕ ರಾಯ ಜಾವಕಾ ನಂವೆ? ತಾಜೆ ಖಾತಿರ ಹಸ್ತಿ ಲಾಗಿ ಮಾಳಾ ದಿವ್ನ ಪೆಟೆಯಲ್ಯಾ. ತಿ ಹಸ್ತಿ ಕೊಣಾಲೆ ಗಳಯಾಕ ಮಾಳಾ ಘಾಲತಾ ತೊ ಹೆ ಗಾಂವಾಂಚೊ ರಾಯ ಜಾತಾ." ಮ್ಹಣಾಲೊ. ಪ್ರಕಾಶು ಥಂಯಿಚಿ ರಾಬಲೊ. ಹಸ್ತಿ ಮಾಳಾ ಘೆವ್ನ ಸೀದಾ ಲಾಗಿ ಯೆವ್ನ ತಾಗೆಲೆ ಗಳ್ಯಾಕ ಘಾಲತಾ. ಗಾಂವಾಂಚೆ ಜನಾಂಕ ಹೆ ಆಶ್ಚರ್ಯ ಜಾಲೆ. ಕಸಲಯಾಕ ಮಳಯಾರಿ ಪ್ರಕಾಶಾನ ಘಾಲೆಲೆ ಆಂಗ್ವಲೆ ಪಳಯಲಯಾರಿ ತೊ ಭಿಕ್ಷುಕಸೊ ದಿಸತಲೊ. ಹಸ್ತಿನ ಚುಕುನು ತಾಕಾ ಘಾಲಾಯಾ ದಿಸತಾ ಮ್ಹಣ ಲೆಕುನ ತಾಗೆಲೆ ಗಳ್ಯಾದಾಕುನ ತಿ ಮಾಳಾ ಕಾಳ್ಳಿ. ಆನಿ ಪರತ ಹಸ್ತಿಚೆ ಸೊಂಡಿಲಾಂತ ದಿಲಿ. ಆನಿ ಜನಾನಿ ಪ್ರಕಾಶಾಕ ಥಂಯಿ ದಾಕುನ ಧಾಂವಡಾಯಲೆ. ಜನಾನಿ ಪ್ರಕಾಶಾಕ ಧಾಂವಡಿಯಲ್ಯಾರೀ ತಿ ಹಸ್ತಿ ತಾಗೆಲೆ ಮಾಗ್ಸಿಚಿ ಧಾವ್ನ್ ಯೇವ್ನ ವಾಪಾಸ ತಾಗೆಲೇಚಿ ಗಳ್ಯಾಕ ಮಾಳಾ ಘಾಲತಾ. ಜನಾಂಕ ಆತ್ತಾಂ ಪ್ರಕಾಶಾಲೆ ವಯರಿ ರಾಗ ಆಯಲೊ. ತಾಗೆಲೆ ಗಳ್ಯಾಚಿ ಮಾಳಾ ಕಾಳ್ಳಿ ಆನಿ ತಾಕಾ ನಿಪೊವ್ನ ಬಸಯಲೊ. ಆನಿ ಮಾಳಾ ಹಸ್ತಿಚೆ ಸೊಂಡಾಲಿಂತ ದಿಲಿ. ನಂತರಯೀ ಹಸ್ತಿ ಮಾಳಾ ಘೆವ್ನ ಪ್ರಕಾಶಾಕ ನಿಪೊವ್ನ ಬಸಯಲೆ ಕಡೆನಽಂಚಿ ವಚುನ ತಾಕಾ ಸೊಂಡಿಲಾನ ಎದರಾಕ ಹಾಣ ತಾಗೆಲೆ ಗಳ್ಯಾಕಚೀ ಮಾಳಾ ಘಾಲತಾ. ವಾಪಾಸ ತಾಕಾ ಸಕಡ ಜನಾನಿ ಧರಲೊ ಆನಿ ತಾಗೆಲಿ ಮಾಳಾ ಕಾಳ್ಳಿ. ಆನಿ ಹಸ್ತೆಚೆ ದೊಳ್ಯಾ ಎದರಾಕ ದಾಕುನ ದೂರ ವ್ಹೆಲ್ಲೊ ಆನಿ ಏಕ ಹೋಡ ಫೊಂಡ ಕಾಣ ತಾಂತು ತಾಕಾ ಬಸೊವ್ನ ತಾಜೆ ವಯರಿ ಏಕ ಫಳೆ ಘಾಲ್ನ ಮಾತ್ತಿ ಘಾಲ್ಲಿ. ನಂತರ ತಾನ್ನಿ ತಿ ಮಾಳಾ ಘೆವ್ನ ದುಸ್ರೇಽಚಿ ವಾಟೆರಿ ದಾಕುನ ಹಸ್ತಿ ಆಸುಚೆ ಕಡೆನ ಆಯಲಿಂಚಿ. ಆನಿ ಹಸ್ತಿಚೆ ಸೊಂಡಾಲಿಂತ ತಿ ಮಾಳಾ ದಿಲಿ. ಹಸ್ತಿನ ತಿ ಮಾಳಾ ಸೊಂಡಾಲಿಂತ ಧರಲಿ ಆನಿ ಸೊಂಡಾಲಿ ವಯರಿ ಕರ್ನ ಆರ್ಭಟಾ ಘಾಲ್ನ ಜನಾಂಕ ಸಕಡ ಹೆಕಡೆತೆಕಡೆ ಕರ್ನ ಸೀದಾ ಪ್ರಕಾಶಾಕ ಪುರಲೆಲೆ ಫೊಂಡಾಲಾಗಿ ಗೆಲಿ ಆನಿ ಸೊಂಡಾಲಿಂತ ಆಶಿಲಿ ಮಾಳಾ ಥಂಯಿಚಿ ಆಶಿಲೆ ಏಕ ರುಕಾಚೆ ಘೆಲಯಾಕ ಲಾಂಬಯಲಿ ಆನಿ ಸೊಂಡಾಲಿನ ತೆ ಫೊಂಡಾಚೆ ವಯರಿ ಘಾಲೆಲೆ ಫಳೆ ಕಾಳೆ ಆನಿ ದೂರ ಉಡಯಲೆ. ನಂತರ ಫೊಂಡಾದಾಕುನು ಪ್ರಕಾಶಾಕ ಉಕಳೊ ಆನಿ ರುಕಾಚೆ ಘೆಲ್ಲ್ಯಾಕ ಲಾಂಬಯಲಿ ಮಾಳಾ ಕಾಣ ಪರತ ತಾಗೆಲೆ ಗಳ್ಯಾಕ ಘಾಲ್ಲಿ ಆನಿ ತಾಕಾ ಉಕೊಳ್ನ ತಾಜೆ ಪಾಟಿರಿ ಬಸಯತಾ. ಜನಾಂಕ ಆನಿ ಕಸಲೆ ಕೊರುಂಕಯ ಜಾಯನಿ. ತೆ ಗಾಂವಂಚೊ ರಾಯ ಪ್ರಕಾಶ ಜಾಲೊ. ಪಕ್ಷಿಚೊ ಮಾರೆಕಾರಾನ ಸಾಂಗಿಲೆ ಏಕ ಸತ್ಯ ಜಾಲೆಂ.ವಾಮದಪದವಾಚೆ ರಸ್ತ್ಯಾರಿ ಚಮಕಲಲೊ ಸುರೇಶ ಸೀದಾ ವಾಮದಪದವಾಕ ವತಾ. ಥಂಯಿ ಏಕ ದಿವಸ ರಾವತಾ. ಹೆರ್ದಿವಸು ಮುಖಾರಸುನ ವತಾ. ನಯಿನಾಡಾಲಾಗಿ ದೋನಿ ರಸ್ತೆ ಆಶಿಲೆ. ಖಂಚೆ ರಸ್ತ್ಯಾರಿ ವಚ್ಚೆ ಮ್ಹಣ ಚಿಂತುನ ಮೂರ್ಜೆ ರಸ್ತ್ಯಾರಿ ಮುಕಾರಿ ವತಾ. ಸುಮಾರ ಚಮಕುನ ವತ್ತರಿ ತಾಕಾ ಪುಂಜಾಲಕಟ್ಟೆ ಮೆಳತಾ. ಥಂಯಿ ಏಕ ದುಕಾನಾಚೆ ಜಗಲೇರಿ ಬಸತಾ. ತೆ ವೇಳಾರಿ ತೆ ದುಕಾನಾಂತ ವ್ಯಾರಾಕ ಆಯಲೆ ಜನಾಂಕ ರಾವಚಾಕ ಜಾಗೊ ನಾತಿಲೆ ನಿಮತಿ ದುಕಾನಾಚೊ ಸುರೇಶಾಕ ಥಂಯಿ ದಾಕುನು ದಾಂವಡಾಯತಾ. ಸುರೇಶ ಥಂಯಿ ದಾಕುನ ಉಟಾನ ಮುಕಾರಿ ಸೀದಾ ವತಾ. ವತನಾ ಗುರುವಾಯನಕೆರೆ ಮೆಳತಾ. ಥಂಯಿ ಗಾಂವಾಂಕ ವಚ್ಚೆ ಪುಡೆಽಚಿ ಮೆಳೆಲೆ ಏಕಾ ರಸ್ತ್ಯಾರಿ ವತ ರಾವತಾ. ಖಂಚೆಽಯಿ ಆಂಗ್ಡಿ ಜಗಲೇರಿ ಬಸಲಯಾರಿ ದಾಂವಡಾಯತಾಚಿ ನಂವೆ? ತಾಜೆ ಬದಲಾಕ ವತ ರಾಬುಯಾಂ. ವಾವಂಟ ಆಯಲಯಾರೀ ರೂಕಾಚಿ ಪೊಂದಾಕ ಬಸಲಯಾರಿ ಜಾಲೆಂ ಮ್ಹಣ ಚಿಂತುನ ವತಾ. ಸುಮಾರ ದೂರ ವತರಿ ಥಂಯಿ ಏಕ ನಂಯಿ ಮೆಳಿ. ಸುರೇಶಾಕ ತಾನಿ ಯೆತಾಲಿ. ತೆ ನಂಯಿಂತು ಪೊಟ ಭರೀ ಉದಾಕ ಪಿಲ್ಲೋ ಆನಿ ಮುಕಾರ್ಸಲೊ. ತಾಕಾ ಏಕ ಗಾಂವ ಮೆಳ್ಳೊ. ರಸ್ತ್ಯಾರಿ ವತಲೆ ಏಕಲೆಲಾಗಿ "ಹೊ ಗಾಂವು ಖಂಚೊ?" ಅಶಿ ನಿಮಗಿಲೆ. ತಾಣೆ ಉಪ್ಪಿನಂಗಡಿ ಮ್ಹಣ ಸಾಂಗತನಾ ತಾಕಾ ಹೆ ಗಾಂವಾಂತು ಕಸಲೆ ಜಾವೊ ಕಾಮ ಮೆಳತಲೆ ಮ್ಹಣ ಚಿಂತುನ ಥಂಚೆ ಏಕಾ ದುಕಾನಾಕ ಗೆಲೊ. ಥಂಯಿ ದುಕಾನಾಚೆ ಜಗಲೇರಿ ಬಸತನಾ ತೆದೊಳ ತಾಂಯ ವ್ಯಾರು ನಾಸಿ ಮೂಸ ಮಾರತಲೊ ದುಕಾನದಾರ ಹಾಣೆ ಯೆತ್ತರಿ ಮಸ್ತ ಜನ ವ್ಯಾರಾಕ ಯೆತಾಚಿ. ದುಕಾನದಾರಾಲೆ ನಾಂವ ಸುಬ್ರಾಯು ಮ್ಹಣು ಸುರೇಶಾಕ ಜನಾನಿ ತಾಕಾ ಆಪಯತನಾ ಕಳತಾ. ದುಕಾನದಾರಾಕ ಹೆ ಪಳವ್ನ ಆಶ್ಚರ್ಯ ಜಾತಾ. ತಾಕಾ ವ್ಯಾರ ನಾಸಿ ಸುಮಾರ ಕಾಳ ಜಾಲೆಲೆ. ಆಯಚೊ ವ್ಯಾರ ಪಳಯತನಾ ತಾಕ ಜಗಲೇರಿ ಮೂಲ್ಯಾಕ ಬಸಿಲ್ಯಾಲೆ ನಿಮತೀಚಿ ವ್ಯಾರ ಜಾಲಾ ಮ್ಹಣ ಚಿಂತುನ ದುಕಾನಾಕ ಆಯಲೆ ಜನಾಂಕ "ಥೊಡೊ ವೇಳ ರಾಬ್ಬಾಚಿ. ತೆ ಭಿಕ್ನಾಸಿಕ ಪೆಟೊವ್ನ ಯೆತಾಂ" ಮ್ಹಣ ಸಾಂಗುವ್ನ ಸುರೇಶಾಕ ಜಗಲೇರಿ ದಾಕುನ ದಾಂವಡಾಯತಾ. ತೆದನಾ ಜನಂಯಿ ತಾಗೆಲೆ ದುಕಾನಾದಾಕುನು ವತ್ತಾಚಿ. ಸುಬ್ರಾಯು ತತ್ಕಾಲ ಸುರೇಶಾಕ ಆಪೊವ್ನ ದುಕಾನಾಚೆ ಭಿತರಿ ವರ್ನ ತಾಗೆಲೆ ಲಾಗೀಚಿ ಬಯಸುಕ ಸಾಂಗತಾ. ಪರತ ತಾಗೆಲೆ ದುಕಾನಾಂತ ಜನ ವ್ಯಾರ ಕರಚದ ಭರತಾತಿ. ಮೆಗೆಲೆ ಆಯಚೆ ಮಸ್ತ ವ್ಯಾರಾಕ ಹೋಚಿ ಕಾರಣ ಮ್ಹಣ ಲೆಕುನ ತಾಗೆಲಾಗಿ "ಜವಣ ಜಾಲಾವೆ?" ಮ್ಹಣ ನಿಮಗಿತಾ. ಸುರೇಶಾಕ ಪೊಟ್ಟಾಕ ಭೂಕ ಜಾಲೆಲಿ. ತಶಿ ಜಾವ್ನ ತೊ "ಜವಣ ಜಾಯನಿ." ಮ್ಹಣಾಲೊ. ಸುಬ್ರಾಯಾನ ತಾಗೆಲೆ ದುಕಾನಾಚೆ ಮಾಗಸೀಚಿ ಆಸುಚೆ ತಾಗೆಲೆ ಘರಕಡೆ ಹೊರ್ನ ತಾಗೆಲೆ ಬಾಯಲೆಲಾಗಿ ತಾಕಾ ಪೊಟ ಭರೀ ವಾಡುಕ ಸಾಂಗುನ ಸುರೇಶಾಕ "ಜವಣ ಜಾತರಿ ದುಕಾನಾಕ ಯೊ." ಮ್ಹಣಾಲೊ. ತಶಿಂಚಿ ಸುರೇಶ ಜವಣ ಜಾತರಿ ಆಂಗ್ಡಿಕ ಚಮ್ಕಲೊ. ತಾಣೆ ಥಂಯಿ ವತರಿ ವ್ಯಾರಾಕ ಮ್ಹಣ ಜನ ಭರಲಿಂಚಿ. ತಾಜೆ ಪುಡೆ ಕಾಂಯಿ ಜನ ನಾಸಿಲೆ. ಸುಬ್ರಾಯಾಕ ಮಸ್ತ ಖುಸಿ ಜಾಲಿ. `ಆನಿ ಮೆಗೆಲೆ ನಸೀಬ ಬರೆ ಜಾವಚೆ ವೇಳು ಆಯಲಾ ದಿಸತಾ. ತಶಿ ಜಾವ್ನ ಹೊ ಚೆಲೊ ಮೆಗೆಲೆ ದುಕಾನಾಚೆ ಜಗಲೇರಿ ಬಸಲೊ. ಹಾಕಾ ಸೊಡುಕ ನಜ.' ಮ್ಹಣ ಮನಾಂತೂಚಿ ಚಿಂತುನ ತಾಕಾ ತಾಗೆಲಾಗಿಚಿ ಏಕಿ ಕುರ್ಚಿ ದವರ್ನ ಬಸೆತಾ. ಥೋಡೆ ಕಾಲ್ಹಾನ ತೊ ಘರಾಂತುಯಿ ಘರಕಡಚೊಚಿ ಜಾಲೊ. ಆಶಿಂಚಿ ಮಸ್ತ ದೀಸ ಗೆಲೆ. ಸುಬ್ರಾಯ ಹೋಡು ಸಾವಕಾರು ಜಾಲೊ. ಸುರೇಶಾಕ ಮಾತ್ರ ಆವಯಲೊ ಆನಿ ಮ್ಹಾಲಗಡ ಭಾವ ಪ್ರಕಾಶಾಲೊ ಉಗಡಾಸು ಸದಽಂಚಿ ಯೆತಲೊ. ಏಕ ದಿವಸ ತಾಕಾ ಆವಯಲೊ ಆನಿ ಮ್ಹಾಲಗಡ ಭಾವಾಲೊ ಉಗಡಾಸು ಯೆವ್ನ ರೊಡುಂಕ ಆಯಲೆ. ತಾಣೆ ರಡತನಾ ತಾಗೆಲೆ ದೊಳ್ಯಾಂತುಲ್ಯಾನ ದೆವಿಲೆ ಉದಾಕ ಮೋತಿ ಜಾವ್ನ ಪಡತಾಲೆಂ. ಥಂಯಿ ನೆಲಾರಿ ಮಸ್ತ ಮೊತ್ಯೊ ಪಳೆಲೆ ಪೊಳೊವ್ನ ತಾಕಾ ಹಾಸೊ ಆಯಲೊ. ತೆದನಾ ಮಾಣಿಕ್ಯ ಪೊಡುಂಕ ಸುರುಜಾಲೆ. ತಾಣೆ ಹಾಸಚೆ, ರಡಚೆ ರಾಬಯಲೆ ಆನಿ ತೆ ಸಕಡ ಏಕ ಗೋಣಿಚಿಲಾಂತ ಘಾಲ್ನ ನಾಂಣ್ಯೆಚೆ ಮ್ಹಾಳಯಾರಿ ದವರಲೆ. ತಾಕಾ ಆವಯಲೊ ಆನಿ ಮ್ಹಾಲಗಡ ಭಾವಾಲೊ ಉಗಡಾಸು ಕೆದನಾಂಯ ಯೆತನಾ ತಾಣೆ ರಡಚೆ-ಮೊತ್ಯೊ ಪೊಡಚೆ-ತೆ ಪೊಳೊವ್ನ ಹಾಸಚೆ-ಮಾಣಿಕ್ಯ ಪೊಡಚೆ- ತೆ ಸಕಡ ಗೋಣ ಚಿಲಾಂತ ಘಾಲ್ನ ನಾಂಣ್ಯೆಚೆ ಮ್ಹಾಳಯಾರಿ ದವರಚೆ. ಅಶಿಂಚಿ ನಾಂಣ್ಯೆಚೆ ಮ್ಹಾಳಯಾರಿ ಗೋಣಿ ಚಿಲ್ಲಂ ಭರಲಿಂಚಿ. ಏಕ ದಿವಸ ಸುಬ್ರಾಯಾನ ನಾಂಣ್ಯೆಂತ ನಾತನಾ ತಾಕಾ ನಾಂಣ್ಯೆಚೆ ಮೂಲ್ಯಾಕ ಜಗಜಗ ಜಾಲೆಲೆ ದಿಸತಾ. ಕಸಲೆ ಮ್ಹಣ ಪಳಯಲ್ಯಾರಿ ಮೋತಿ. ತಶಿಂಚಿ ನಾಂಣ್ಯೆಂತ ತಾಕಾ ದೊನಿತೀನಿ ಮೋತಿ ಮ್ಹೆಳತಾ. ಹೆ ಖಂಯಿ ದಾಕುನ ಪಳೆಲೆ ಮ್ಹಣ ವಯರಿ ಪಳಯತಾ. ವಯರಿ ಸಾಯಳ್ಯಾಚೆ ಜಾಳೆಕ ಮೋತಿ ಲಾಂಬುನ ಆಸುಚಿಂ ದಿಸತಾ. ತಾಕಾ ಆಶ್ಚರ್ಯ ಜಾತಾ. ಹೆಂ ಕಸಲೆ ವಿಚಿತ್ರ ಮ್ಹಣ ನಾಂಣ್ಯೆಂಚೆ ಮ್ಹಾಳಯಾರಿ ಚೊಣ ಪಳಯಲಯಾರಿ ಥಂಯಿ ಮಸ್ತಿ ಭರಲೆಲೆ ಗೋಣಿ ಚಿಲ ದಿಸತಾ. ತಾಂತ ಏಕ ಚಿಲಾಕ ವಿಂದ್ರಾನ ಛಿದ್ರ ಕರ್ನ ಮೊತ್ಯೊ ಆನಿ ಮಾಣಿಕ್ಯ ತಂಯಿ ಪಳೆಲೆ ದಿಸಲೆ. ಬಾಕಿಚೆ ಚಿಲಾಂತ ಕಸಲೆ ಮ್ಹಣ ಸೊಡವಾನ ಪಳಯಲಯಾರಿ ತಾಂತುಯ ಮೊತ್ಯೊ ಆನಿ ಮಾಣಿಕ್ಯ. ಸುಬ್ರಾಯ ಉಲಯನಾತಿಲೆ ನ್ಹಾಂವ್ನ ಯೆತಾ ಆನಿ ಜವಣ ಕರತಾ. ಕೆದನಾಂಯ ಕೆಲಯಾ ವರೀಚಿ ನೀದಯಿ ಕಡತಾ. ನಂತರ ದುಕಾನಾಕ ವಚುನ ಸುರೇಶಾಕ ಕೊಡಿಯಾಲಾಕ ದಾಕುನ ಸಾಮಾನ ಹಾಡಿ ಮ್ಹಣ ಚೀಟಿ ಕರ್ನ ದಿತಾ. ಸುರೇಶ ಕೊಡಿಯಾಲಾಕ ಚಮಕಲೊ. ತಾಣೆ ವಾಪಾಸ ಯೆವಕಾ ಜಾಲಯಾರಿ ಮಸ್ತ ವೇಳ ವತಾ. ತಾಣೆ ಯೆವಚೆ ಭಿತರಿ ತೆ ಮ್ಹಾಳಯಾರಿ ಆಸುಚೆ ಸಕಡ ತೊಗು ದೆವೋನ ಕಪಟಾಂತ ದವರಕಾ, ಹೊ ವಿಷಯ ತಾಕಾ ಕೊಳುಕ ನಜ್ಜ ಮ್ಹಣ ಚಿಂತುನ ಘರಕಡೆ ವತಾ ಆನಿ ಬಾಯಲೆಕ ವಿಷಯು ಸಾಂಗುನ ಮ್ಹಾಳಯಾರಿ ದಾಕುನ ಮೊತ್ಯೊ ಆನಿ ಮಾಣಿಕ್ಯ ತೊಗು ದೆವೋನ ಕಪಟಾಂತ ದವರತಾಚಿ. ಸುರೇಶ ಕೊಡಿಯಾಲಾಕ ಗೆಲಲೊ ಯೆತಾನಾ ಚಾರಿ ದಿವಸ ಜಾಲೆಂಚಿ. ತೆದನಾ ಬಯಿಲಾ ಗಾಡಿರಿ ಸಾಮಾನ ಹಾಡಚೆ. ಸುಬ್ರಾಯಾಕ ಹೆ ಮಾಣಿಕ್ಯ ಆನಿ ಮೊತ್ಯೊ ಖಂಯಿ ದಾಕುನ ಆಯಲೆ ಮ್ಹಳಲೆಂಚಿ ಏಕ ಹೊಡ ಆಶ್ಚರ್ಯ. ಸುಬ್ರಾಯಾನ ತೆ ಮೊತ್ಯೊ ಆನಿ ಮಾಣಿಕ್ಯ ವಿಕುನ ಮೆಳೆಲೆ ಮಸ್ತ ದುಡ್ವಾನಿ ಏಕಿ ಹೋಡಿ ವ್ಹಡ (ಬೊಟಿ-ದೋಣಿ)ಕರಯಲೆಂ. ಉಪ್ಪಿನಂಗಡಿ ಗಾಂವ ನೇತ್ರಾವತಿ ನಂಯಿಂಚೆ ತೀರಾರಿ ಆಸಾಚೆ. ತೆ ಕಾಲಾರಿ ನಂಯಿಂತ ಮಸ್ತ ಉದಾಕ ಆಶಿಲೆ. ಕೊಡಿಯಾಲಾಕ ದಾಕುನ ದೀನಸ ವ್ಹಡಾರಿ ಆನಿ ಬಯಲಾಚೆ ಗಾಡಿರಿ ಹಾಡಚೆ ಆಶಿಲೆ. ತಶಿ ಸುಬ್ರಾಯಾನ ವ್ಹಡ (ಬೊಟಿ) ಕರಯಲೆಂ. ವ್ಹಡ ಜಾತರಿ ಉದಕಾಂತ ಸೊಡಚೆ ಖಾತಿರ ಚಾಂಗ ದಿವಸ ಪಳಯಲೊ. ತೆದುಸ ವ್ಹಡ ಉದಕಾಂತ ಸೊಡುಕ ವತನಾ ತಿ ಮುಕಾರಿ ವಚ್ಚನಾತಿಲೆ ಕಾರಣ ಜನ ಸಕಡ `ನರಬಲಿ ದಿಲಯಾರಿ ವತ್ತಲಿ' ಮ್ಹಣಾಲಿಂಚಿ. ಸುಬ್ರಾಯಾನ `ಹೆ ಸುರೇಶಾಕ ಸಂಬಂಧಿಕ ನಾತಿಲೆ ನಿಮತಾನ ಬಲಿ ದಿಲಯಾರಿ ಕಶಿ ಕೊಣಂಯ ನಿಮಗಿತಲೆ ನಾಂಚಿ.' ಮ್ಹಣ ಚಿಂತುನು ಸುಬ್ರಾಯಾನ ಬಲಿ ದಿವಚಾಕ ತಯಾರ ಕರತನಾ ಶುರೇಶಾನ "ತುಮಕಾ ಬಲಿ ದಿವಚಿ ಜಾವಕಾ ಕಿ ವ್ಹಡ (ಬೊಟಿ) ಮುಕಾರಿ ವಚುಕಾ" ಮ್ಹಣ ನಿಮಗಿಲೆ. ಸುಬ್ರಾಯ ಆನಿ ಥಂಯಿ ಆಶಿಲೆಂ ಬಾಕಿಚೆ ಜನ "ವ್ಹಡ (ಬೊಟಿ) ಮುಕಾರಿ ಗೆಲಯಾರಿ ಪುರೋ" ಮ್ಹಣಾಲಿಂಚಿ. ಸುರೇಶಾನ ತಾಗೆಲೆ ಕಿಂರ್ಗೂಳೆಚೆ ಬೊಟ್ಟಾಕ ಪೆಸಕಾತಿನ ಗಾಯ ಕೆಲೊ ಆನಿ ರಗತ ತೆ ವ್ಹಡಾರಿ (ಬೊಟಿರಿ) ಸೊಳ್ಳೆಂ. ತೆದನಾ ವ್ಹಡ ಮುಖಾರಿ ಸರಚಾಕ ಗೆಲಿ. ಸುಬ್ರಾಯಾಕ ಸುರೇಶಾನ ಕೆಲೆಲೆಂ ಪಳವ್ನ ವ್ಯಾರಾಕ ವತನಾ ಘೆವ್ನ ವಚ್ಚೆ ಚಾಂಗ ಮ್ಹಣ ಚಿಂತುನ ವ್ಹಡಾರಿ ತಾಕಾಯ ಬಸೆತಾ. ವ್ಹಡ ಮುಕಾರಿ ವಚುನ ವಚುನ ಏಕ ಗಾಂವಾಂತ ಪಾವತಾ. ಪಳಯಲಯಾರಿ ತೊ ಗಾಂವ ಕೊಡಿಯಾಲ. ವ್ಯಾರೆಲೊ ಸುಬ್ರಾಯ ವ್ಯಾರಾಕ ಮ್ಹಣ ಬಂದ್ರಾಕ ವತಾ. ಸುರೇಶ ಗಾಂವ ಬೊಂವಚಾಕ ವತಾ. ತೊ ವತಽ ಆಸತನಾ ಏಕ ಕಡೆನ ಪೊಂರ್ಬೊಳಾಚೆ ಉದಾಕ ಹೊಳತಾ. ಜನ ಸಕಡ ತೆ ಹಾತಾಂತ ಕಾಣ ಆಂಗಾರಿ, ಮಾತಯಾರಿ ಘಾಲ್ನ ಘೆತಲಿಂಚಿ. ತಾಂಗೆಲಾಗಿ "ತೆ ಕಸಲೆ ಉದಾಕ, ತುಮ್ಹಿ ತೆ ಮಾತಯಾರಿ ಆನಿ ಆಂಗಾರಿ ಕಸಲ್ಯಾಕ ಘಾಲ್ನ ಘೆವ್ಚೆ." ಮ್ಹಣ ನಿಮಗಿತಾ. "ಹೆ ಗಾಂವಾಂಚಿ ರಾಜಕುಮಾರಿ ನ್ಹಾತಽಚಿ ಆಸಾ. ತೆ ತೀಣೆ ನ್ಹಾಲೆಲೆಂ ಉದಾಕ ಆನಿ ಪೊಂರ್ಬೊಳ ಆಶಿಲೆ ನಿಮತಾನ ಆಮ್ಹಿ ಸಕಡ ತೆ ತೀರ್ಥ ಮ್ಹಣ ಚಿಂತುನ ತಶಿ ಘಾಲ್ನ ಘೆವ್ಚೆ." ಮ್ಹಣಾಲಿಂಚಿ. ಸುರೇಶಾನ ಥಂಯಿ ಆಶಿಲೆ ದುಕಾನದಾಕುನ ಏಕ ಲಿಂಬಿಯೊ ಘೆತಲೊ ಆನಿ ದೋನಿ ಕುಡಕೆ ಕೆಲೆ. ಏಕ ಕುಡಕೊ ತೆ ಹೊಳಚೆ ಉದ್ಕಾಂತ ತಾಕಾ ಖಂಯತಾಂಯ ಹಾತ ಪಾವತಾ ಥಂಯಿ ದವರಲೊ ಆನಿ ತಾಜೆರಿ ಏಕ ಪಾಯ ದವರ್ನ ಆನ್ನೆಕ ಕುಡಕೊ ತಾಣೆ ರಾಬಿಲೆ ಕಡೆನ ದಾಕುನ ಖಂಯ ತಾಂಯ ಹಾತ ಪಾವತಾ ಥಂಯಿ ದವರಲೊ ಆನಿ ತಾಗೆಲೊ ಆನೇಕ ಪಾಯ ತಾಜೆರಿ ದವರ್ನ ಉದಾಕ ಪಾಯಾಕ ಲಾಗನಾಶಿ ತೆಕಡಚೆ ಬದಿಕ ಉಡಲೊ. ರಾಜಕುಮಾರಿ, ನ್ಹಾಣೆಯೆಂಚೆ ಖಿಡಕಿತುಲಾನ ಹೆಂ ಪಳಯತಾ. ನಂತರ ತೊ ಉದಾಕ ದಾಂಟವುನ ಏಕ ದುಕಾನಾಕ ವಚ್ಚೆ ಪಳಯತಾ. ತಿಗೆಲೆ ದಾಸಿಕ ಆಪೊವ್ನ ತಿಗೆಲಾಗಿ ಏಕಿ ರುವಿ (ಪುಳ್ಳೆ ಕಾಳಾಚೆ ದುಡ್ಡ. ತೆದನಾ ಏಕಿ ರುಪ್ಪಯ್ಯ ಮ್ಹಳಯಾರಿ ಸೊಳಾ ಆಣೆ, ಏಕ ಆಣೊ ಮ್ಹಳಯಾರಿ ಚಾರಿ ಮುಕಾಲ, ಏಕ ಮುಕಾಲಾಕ ತೀನಿ ರುವಿ.) ದೀವ್ನ ಸುರೇಶಾನ ಗೆಲೆಲೆ ದುಕಾನಾಕ ವಚುನ ಥಂಯಿದಾಕುನ ತೇಲ, ಪೇಂಡಿ ಆನಿ ರಾಕುಡ ಘೇವ್ನ ಯೊ ಅಶಿಂ ಸಾಂಗುನ ಧಾಡತಾ. ತಿ ದಾಸಿ ಸುರೇಶಾನ ಗೆಲೆಲೆ ದುಕಾನಾಕ ವಚುನ ರಾಜಕುಮಾರಿನ ಸಾಂಗಿಲ್ಯಾವರಿ ಸಾಂಗತಾ. ತೆದನಾ ದುಕಾನದಾರ "ಕಸಲೆ! ತುಕಾ ಪಿಶೆ ಲಾಗಲಾವೆ? ಏಕಿ ರುವಿಕ ತೇಲ, ಪೇಂಡಿ ಆನಿ ರಾಕುಡ ಕಶಿ ಮೆಳತಾ." ಮ್ಹಣ ತಿಕಾ ಭಿಷ್ಟಾಯತಾ. ಸುರೇಶಾನ ಹೆ ಸಕಡ ಆಯಕುನ ಹಾಂತ ಕಸಲ್ಕಿ ವಿಷಯ ಆಸುಕಾ ಪೋಳವ್ಯಾ ಮ್ಹಣ ಚಿಂತುನ ತೆ ದಾಸಿಕ ಆಪ್ಪೊವ್ನ "ತುಕಾ ಹೆ ಸಕಡ ಹಾಡುಕ ಕೊಣೆ ಧಾಡಲೆಂ." ಅಶಿ ನಿಮಗಿತನಾ ದಾಸಿ "ರಾಜಕುಮಾರಿನ ಪೆಟೆಯಲೆಲೆ" ಮ್ಹಣಾಲಿ. ತಿಕಾ ಥಂಯಿಚಿ ಆಸುಚೆ ಏಕ ಝಾಡ ಹಾಡುಕ ಸಾಂಗತಾ. ತಿ ವಚುನ ತೆ ಜಾಡ ಕಾಣ ಹಾಡತಾ. ತೆ ತಿಳಾಚೆ ಝಾಡ. ಸುರೇಶ ಚಂದ ಕರ್ನ ತೆ ಝಾಡಾದಾಕುನ ತೀಳ ಕಾಡತಾ ಆನಿ ಹಾತಾರಿ ದವರ್ನ ಆನೇಕ ಹಾತಾನಿ ಚಿರಡಿತಾ. ತೆದನಾ ತೆ ತೀಳಾದಾಕುನ ತೇಲ ಯೆತಾ. ಏಕ ಪಾನ್ನಾರಿ ದೋನಿ ಥೆಂಬೆ ತೇಲ ಘಾಲತಾ. ತೇಲ ಕಾಣ ಜಾತರಿ ವರಲಲೊ ತೀಳಾಚೆ ಚೊಂತೊ ಆನೆಕ ಪಾನ್ನಾರಿ ದವರತಾ. ಜಾಡಾಚೆ ಬಡ್ಯೊ ಮೋಣು ತೆ ಒಟು ಕರ್ನ ತಾಕಾ ತೆ ತೀಳಾಚೆ ಝಾಡಾಚೇಚಿ ನಾರ ಸುತವಾನ ದವರತಾ. ಸುರೇಶ ತಿ ರುವಿ ತಿಗೆಲ್ಯಾದಾಕುನ ಘೇತಾ ಆನಿ ಏಕಕಚಿ ಕಾಣ "ಘೆ ತೇಲ, ಘೆ ಪೇಂಡಿ ಆನಿ ಘೆ ರಾಕುಡ." ಮ್ಹಣಾಲೊ. ತಿ ದಾಸಿ ತೆ ಸಕಡ ಘೆವ್ನ ವತಾ ಆನಿ ರಾಜಕುಮಾರಿಕ ದಿತಾ. ರಾಜಕುಮಾರಿಕ ಸುರೇಶಾನ ಧಾಡಿಲೆ ಸಾಮಾನ ಪೊಳವುನ ತಾಗೆಲೆ ಬುದ್ವಂತ್ಕಾಯೆಕ ಮೆಚವುನು ಅರಮನೆಕ ಆಪೊವ್ನ ತಾಕಾ ವ್ಹಾರ್ಡಿಕ ಕರ್ನ ಘೆತಾ. ಆನಿ ತಾಗೆಲೆ ಒಟುಚಿ ಬೋಟಿರಿ ವತಾ. ತಶಿಂಚಿ ಬೋಟಿ ಕೊಡಿಯಾಲಾ ದಾಕುನ ಮುಕಾರಿ ಮಲ್ಪೆ ಮ್ಹಳೆಲೆ ಗಾಂವಾಂಕ ವತಾ. ಥಂಯಿ ತಸೀಂಚಿ ವ್ಯಾರೆಲೊ ಸುಬ್ರಾಯ ವ್ಯಾರಾಕ ವತನಾ ಸುರೇಶ ಗಾಂವ ಬೊಂವಚಾಕ ಮ್ಹಣ ವತ್ತಾ ಆನಿ ಥಂಯಿ ಏಕಾ ಶ್ರೀಮಂತಾಲಿ ಧುವೆಕ ವ್ಹಾರ್ಡಿಕ ಕರ್ನ ಘೆವ್ನ ತಿಕಾಯ ಬೋಟಿರಿ ಆಪೊವನ ವ್ಹರತಾ. ತಸಿಂಚಿ ಮುಕಾರಿ, ಕುಂದಾಪುರ, ಗಂಗೊಳ್ಳಿ, ಮುರ್ಡೆಶ್ವರ, ಹೊನ್ನಾವರ ಆನಿ ಕಾರವಾರ ಮ್ಹಣ ಸಾತ ಗಾಂವಾಂಚೆ ಶ್ರೀಮಂತಾಲೆ ಚೆಲಯಾಂಕ ವ್ಹಾರ್ಡಿಕ ಕರ್ನ ಘೆವ್ನ ವಾಪಾಸ ಗಾಂವಾಂಕ ಸುಬ್ರಾಯಾಲೆ ಸಾಂಗಾತಿ ಬೋಟಿರಿ ವತಾ. ಸುಬ್ರಾಯಾಕ ಸುರೇಶಾನ ಸಾತ ಜನಾಂಕ ವ್ಹಾರ್ಡಿಕ ಕರ್ನ ಘೇವ್ನ ಆಯಲೆ ಪಳವ್ನ ಪೊಟ್ಟಾಕ ಉಜ್ಜೊ ಯೆತಾ. ಸಕಡ ಚೆಲಯೊ ಸುರೇಶಾಕಚಿ ಮೋಗಕರತಾತಿ. ಶ್ರೀಮಂತಾಲಿ ಚೆಲಯೊ ಜಾಲೆಲೆ ನಿಮತಿ ಹಾಕಾ ಮಸ್ತ ದುಡು ಮೆಳತಾ. ಸುರೇಶಾಕ ಕಸಲೆ ಜಾವೊ ಕರ್ನ ಯೆ ಸಾತ ಚೆಲಯಾಕಂಯ ಹಾಂವಂಚಿ ಘೇವ್ನ ವಚುಕಾ ಮ್ಹಣ ಚಿಂತುನ ಆಸತಾ. ತಾಕಾ ರಾತ್ರಿಚೆ ನೀದಯಿ ಪಣಾ, ದಿವಸಾಚೆ ಸುರೇಶಾನ ಸಾತ ಜನ ಚೆಲಯಾಲೆ ಸಾಂಗಾತ ಆಸುಚೆ ಪಳವಚಾಕಯ ಜಾಯನಾ. ತಸಿಂಚಿ ಏಕ ದಿವಸ ಸುಬ್ರಾಯು ಬೋಟಿರಿ ವತಽ ಆಸತನಾ ಸುರೇಶಾಕ ಆಪ್ಪೊವ್ನ "ಮ್ಹಾಕಾ ಮಾತ್ತೆ ಮಸ್ತ ಖೊರಜ ಖಾತಾ. ಊ ಜಾವೊ ಆಸಕಿ ಮ್ಹಣ ಪಳೆ." ಮ್ಹಣತಾ. ಸುರೇಶ ಊ ಆಸಾಕೀ ಮ್ಹಣ ಸೊದಿತನಾ ಸುಬ್ರಾಯಾಕ ಕುರ್ವಣಿ ಯೆತಾ. "ಸುರೇಶಾ, ಊ ಮೆಳನಿ ನಂವೆ? ಸೊಡಿ. ತುವೆಂ ಊ ಸೊದಿತನಾ ಮಾಕಾ ಚಾಂಗ ಕುರ್ವಣಿ ಆಯಲಿ. ಆನಿ ಹಾಂವ ತುಗೆಲ್ಯಾ ಮಾತ್ಯಾರಿ ಊ ಆಸಾಕೀ ಸೊದಿತಾ. ಹಾಂವೆ ತುಗೆಲೆ ಕರೆನ ಮಾತ್ರ ಕಾಮ ಕರೋಚವೆ?" ಮ್ಹಣಾಲೊ. ಸುರೇಶ ಸುಬ್ರಾಯಾಕ ಬೇಜಾರ ಜಾವಚೆ ನಾಕಾ ಮ್ಹಣ "ಜಾಯತ, ಸೋದಿ." ಮ್ಹಣಾಲೊ. ಸುಬ್ರಾಯ ಸುರೇಶಾಕ ಚಾಂಗ ಕುರ್ವಣಿ ಯೆವೊ ಮ್ಹಣ ಕಾಪಣಿಚೊ ಕಾಪ್ಪಣಿ ಕಾಣ ಜಾತರಿ ಮಾತೆಂ ಮಾಲಿಸ್ ಕರಚೆ ತಸೀಂಚಿ ಮಾಲಿಸ ಕರಚಾಕ ಸುರ ಕರತಾ. ಸುರೇಶಾಕ ಚಾಂಗ ಕುರ್ವಣಿ ಯೆತನಾ ತಾಕಾ ಕಾಣ್ ಸಮುದ್ರಾಂತ ಉಡಯಿತಾ. (ನೇತ್ರಾವತಿ ನಂಯಿ ಕೊಡಿಯಾಲ ವರೆಕ ಮಾತ್ರ. ನಂತರ ಸಮುದ್ರಾಂತ ತಾನ್ನಿ ಪಯಣ ಕೆಲೆಲೆಂ. ತಾಜೆ ಕಾತಿರಚಿ ಸುಬ್ರಾಯಾನ ಹೊಡಿ ವ್ಹಡ ಮ್ಹಳಯಾರಿ ಬೋಟಿ ಕರಯಲೆಲಿ.) ಸಮುದ್ರಾಂತ ಪಡತನಾ ಸುರೇಶಾಕ ಜಾಗೊರ ಜಾತಾ. ಉದಕಾಂತ ಬುಡತ ಆಸತನಾ ತಾಕಾ ಉಸ್ರು ಗುಪ್ಸತಾ. ಕಸಲೆ ಕರಚೆಂ ಮ್ಹಣ ಕಳ್ನಾಶಿ ಚಡಪಡತನಾ ತಾಕಾ ಬಂಟ್ವಾಳಾಂತ ಉದಕಾಂತ ಖೇಳೆತನಾ ನಿಸೊರ್ನ ಗೆಲೆಲೆ ಝಳಕ್ಯಾಚೆ ಉಗಡಾಸ ಯೆತಾ. ತೆದನಾ ಹೊಡ ಏಕ ಝಳ್ಕೆ ಯೆವ್ನ ತಾಕಾ ಸಮುದ್ರಾಚೆ ತೀರಾರಿ ವ್ಹರ್ನ ಘಾಲತಾ. ಸುರೇಶ ಗಾಂವ್ ಗಾಂವ್ ಬೊಂವ್ನ ಬೊಂವ್ನ ಏಕ ಗಾಂವಾಂತ ಯೆತನಾ ತೆ ಗಾಂವಾಂತ ಮೆರಮಣಿಕ ಜಾತಽಚಿ ಆಶಿಲಿ. ಜನಂಯ ಮಸ್ತ ಖೂಷೇರಿ ಆಶಿಲಿಂಚಿ. ಥಂಯಿ ಆಶಿಲೆ ಏಕಲ್ಯಾಲಾಗಿ "ಹೆ ಕಸಲೆಂ? ಹೆ ಗಾಂವಾಂತ ಕಾಂಯ ವಿಶೇಷ ಆಸಾವೆ?" ಮ್ಹಣ ನಿಮಗಿತಾ. ತೊ "ಉಪ್ಪಿನಂಗಡಿ ಗಾಂವಾಂಚೊ ಏಕ ವ್ಯಾರೆಲೊ ಬೋಟಾರಿ ವ್ಯಾರಾಕ ಗೆಲಲೊ, ಯೆತನಾ ಮಸ್ತ ದುಡ್ಡ ಆನಿ ಸಾತ ಜನ ಶೋಭಿತ ಚೆಲಯಾಂಕಯಿ ವ್ಹಾರ್ಡಿಕ ಕರ್ನ ಘೆವ್ನ ಆಯಲಾ. ತಾಣೆ ಆತಾಂ ಉಪ್ಪಿನಂಗಡಿಂತ ಆಶಿಲೆ ತಾಗೆಲೆ ಸಕಡ ಆಸ್ತಿಪಾಸ್ತಿ ವಿಕುನ ಹೆ ಗಾಂವಾಂತ ಹೊಡ ಏಕ ಘರ ಬಾಂದೊವ್ನ ತೆ ಘರಾವಕ್ಲಾಕ ಸಾಂಗುಕ ಆನಿ ಸಾತ ಜನ ಶೋಭಿತ ಬಾಯಲಾಂಕ ಗಾಂವಚೆ ಜನಾಂಕ ದಾಕೋಚಾಕ ಹಿ ಮೆರವಣಿಕಾ. ತೆ ಸಂತೋಷಾಕ ತಾಣೆ ಗಾಂವಾಂಚೆ ಸಕಡಾಂಕ ಫಾಲಯಾಕ ಜವಣ ದಿತ್ತಾ. ತಾಜೆ ಖಾತಿರ ಆಮಕಾ ಆಜಿ ಗಮ್ಮತ." ಮ್ಹಣಾಲೊ. ತೆದನಾ ಶುರೇಶಾನ ತಾಗೆಲಾಗಿ "ಹೊ ಗಾಂವ ಖಂಚೊ?" ಮ್ಹಣಾಲೊ. ತಾಣೆ `ಮೂಡಬಿದ್ರೆ' ಮ್ಹಣ ಸಾಂಗಲೆ. ಸುರೇಶ ಮೆರವಣಿಕಾ ಪಳವಚಾಕ ವತಾ. ತೆ ಮೆರವಣಿಕಾಂತ ಆಸುಚೊ ವ್ಯಾರೆಲೊ ಸುರೇಶಾಕ ಮೋಸ ಕರ್ನ ಸಮುದ್ರಾಕ ಉಡಯಿಲೊ ತಾಗೆಲೊ ಧನಿ ಸುಬ್ರಾಯೂಚಿ ಆನಿ ತಾಣೆ ಹಾಳೆಲೆ ಸಾತ ಜನ ಚೆಲಯೊಯಿ ಹಾಗೆಲೆ ಬಾಯಲೊ. ತೆ ಪಳವ್ನ ಸುರೇಶಾಕ ರಾಗ ಯೆತಾ. ತಾಗೆಲೆ ಘರ ಖಂಚೆ ಮ್ಹಣ ನಿಮಗುನ ಗೆತಾ.ಸಾಂಜವಳಾ ಸೀದಾ ಘರಾಚೆ ಮಾಗಶಿ ದಾರಾಂತುಲ್ಯಾನ ಕೊಡಕ್ಯಾಂತ ವಚುನ ರಾವತಾ. ಥೋಡೆ ವೇಳಾನಿ ತಾಗೆಲಿ ಸಾತಾಚಿ ಬಾಯಲ-ಕಾರವಾರ್ಚಿ-ಗೊರವಾಂಕ ತೊಳಕಳ ದವರುಕ ಆಯಿಲೆ ವೇಳಾರಿ ಸುರೇಶ ತಿಕಾ ಆಪಯಿತಾ. ಜಾಲಯಾರಿ ಹಾಗೆಲೆ ಖಾಡ-ಬೊಡ ಪಳವ್ನ ತಿಕಾ ವಳಖ (ಗುರುತ) ಮೆಳನಾ. ತೆದನಾ ಸುರೇಶ ತಿಕಾ ತಾಗೆಲೆ ವಿಷಯ ಸಕಡ ಸಾಂಗುನ ಸುಬ್ರಾಯಾನ ತಾಕಾ ಕೆಲಲೊ ಮೋಸ ಸಾಂಗತಾ ಆನಿ ತಿಕಾ ಸಮಾಧಾನ ಕರತಾ. ತಿವಯೀ `ಸುಬ್ರಾಯಾನ ಆಮಕಾ ಸಕಡಾಂಕ ಹಾಣ ಆಮಗೆಲೆ ಕರೆನಽಂಚಿ ಕಾಮ ಕರಯತಾ.' ಮ್ಹಣ ಸಾಂಗುವ್ನ ತಿ ರಡತಾ. ತೆದನಾ ಸುರೇಶ ತಿಗೆಲಾಗಿ ಗುಪೀತ ಜಾವ್ನ ಏಕ ಉಪಾಯ ಸಾಂಗತಾ. "ತು ಹಾಂವೆ ಸಾಂಗಲ್ಯಾ ವರೀಚಿ ಕರಕಾ. ವರಲಲೊ ವಿಷಯ ಹಾಂವ ಪಳವ್ನ ಘೆತಾಂ." ಮ್ಹಣಾಲೊ. ತಶಿಂಚಿ ಹೆರ್ದಿವಸ ಗಾಂವಜವಣಾಂಕ ಸುರೇಶುಯಿ ವತಾ. ಆನಿ ಜವಣಾಚೆ ವೇಳಾರಿ ತಾಗೆಲೆ ಸಾತ್ತಾಚೆ ಬಾಯಿಲೇನ ತೂಪ ವಾಡುಕ ಯೆತನಾ ಸುರೇಶ ತಾಗೆಲೆ ಪಾನ್ನಾರಿ ವಾಡಚೆ ತೂಪ ಹಾತಾಂತ ಘೆವ್ನ ತಿಗೆಲೆ ಕಾಪಡಾರಿ ಸಿಂಪಡಾಯತಾ. ತೆ ವೇಳಾರಿ ತಿ ಕೋಪಲ್ಯಾ ವರೀಚಿ ನಾಟಕ ಕರ್ನ ಧಾವ್ನ ವತಾ ಆನಿ ತಿಗೆಲೆ ದುಃಖಾಚೆ ಮಾಂಚಾರಿ ನಿದತಾ. ಸುಬ್ರಾಯ ಯೆವ್ನ "ಕಸಲೆ ಜಾಲೆಂ? ತುಂ ಕಸಲ್ಯಾಕ ಕೋಪಲ್ಯಾ" ಮ್ಹಣ ತಿಗೆಲಾಗಿ ನಿಮಗಿತನಾ ತಿ ಜಾಲಲೊ ವಿಷಯ ಸಾಂಗತಾ. ಸುಬ್ರಾಯ ಸುರೇಶಾಲಾಗಿ ವಚುನ ವಿಚಾರಸಿತನಾ ಸುರೇಶ ಗಲಾಟೊ ಹೋಡ ಕರತಾ. ಸುಬ್ರಾಯ ಹೆ ದೂರ ರಾಯಾಲಾಗಿ ವ್ಹರತಾ. ನ್ಯಾಯ ದಿವಚೆ ಖಾತಿರ ರಾಯಾನ ಸುರುವೇಕ ಸುರೇಶಾಕ ವಿಚಾರಸಿತಾ. ಸುರೇಶ ಸುರುವೆಕದಾಕುನ ಜಾಲಲೊ ವಿಷಯ ಪೂರಾ ಸಾಂಗತಾ. ಸುಬ್ರಾಯಾನ ಕೆಲೆಲೆ, ಫಟೊಯಲೆಲೆ ಸಾಂಗತಾ. "ರಾಯನೊ, ತುಮ್ಹಿ ಆತ ಮೆಗೆಲೆ ಅಂಣಾಕ ಸೊದುಚಾಕ ಸಹಾಯ ಕರ್ಕಾ. ಮೆಗೆಲೆ ನಿಮತಿ ಹೊ ಸುಬ್ರಾಯ ಹೋಡ ಜಾಲಾ ಮ್ಹಣ ತಾಕಾ ಕಳಿತಾಕ ನಾ. ಹಾಂವೆ ರಡತನಾ ಆನಿ ಹಾಸತನಾ ಪಳೆಲೆ ಮೋತ್ಯೊ ಆನಿ ಮಾಣಿಕ್ಯ ವಿಕುನ ಹೋಡ ಜಾಲೆಲೆ ವಿಷಯ ಮಾಕಾ ಕಳಲೆಂ ಆಸಾ. ಜಾಲಯಾರಿ ಸುಬ್ರಾಯಾಕ ತೆ ಮೆಗೆಲೆ ಮ್ಹಣ ಕಳಿತಾಕ ನಾ. ತಾಣೆ ತೆ ಮಾಕಾ ದಿವಕಾ ಮ್ಹಣ ನಾ. ಮೆಗೆಲೆ ಸಾತ ಜನ ಬಾಯಲೊ ಮಾಕಾ ಮೆಳಯಾರಿ ಪುರೊ. ತಿತಲೆ ನ್ಯಾಯ ಮಾಕಾ ದಿವಕಾ ರಾಯನೊ." ಮ್ಹಣಾಲೊ ಸುರೇಶ. ತೆದನಾ ರಾಯು ಸೀದಾ ಸಿಂಹಾಸನಾರಿ ದಾಕುನ ತೊಗ ದೆವ್ನ ಆಯಿಲೊ ಆನಿ ಸುರೇಶಾಕ ಪೊಟೊವ್ನ ಘೆವ್ನ "ಸುರೇಶಾ, ಹಾಂವಂಚಿ ತುಗೆಲೊ ಅಂಣಾ ಪ್ರಕಾಶ ರೇ. ತುಕಾ ಮೆಗೆಲೆ ವಳಖ ಮೆಳನಿಂವೆ? ಮಾಕಾ ತುಗೆಲೆ ಖಾಡ-ಬೊಡಾಚೆ ನಿಮತಿ ತೂಂಚಿ ಮ್ಹಣ ಕಳನಿ. ತುಕಾ ಕಸಲ್ಯಾಕ ಮೆಗೆಲೊ ವಳಖ ಜಾಯನಿ?" ಮ್ಹಣಾಲೊ ರಾಯ. ಸುಬ್ರಾಯಾಕ ಆನಿ ಥಂಯಿ ಆಸುಚೆ ಸಕಡಾಂಕ ಆಶ್ಚರ್ಯ ಜಾಲೆ. ಆಮಗೆಲೆ ರಾಯ ಏಕ ಮಾಗ್ತಲ್ಯಾಕ ಕಸಲ್ಯಾಕ ಪೊಟೊವ್ನ ಧರಲೆ ಮ್ಹಣ ಲೆಕತನಾ ತೊ ರಾಯಾಲೋಚಿ ಧಾಕಲೊ ಭಾವು ಮ್ಹಣ ತಾಂಕಾ ಕಳ್ನ ಆಯಲೆ. ಸುರೇಶಾನ ರಾಯಾನ ಮ್ಹಳಯಾರಿ ತಾಗೆಲೊ ಅಂಣಾ ಪ್ರಕಾಶಾನ ನಿಮಗಿಲೆಲೆ ಪ್ರಶ್ನಾಕ "ಅಂಣಾ, ಹಾಂವ ಹಾಂಗಾ ರಾಯಾಲೆ ಆಸ್ಥಾನಾಂಕ ಆಯಲೊ ನಂವೆ? ಹೆ ಸುಬ್ರಾಯಾನ ಮಾಕಾ ಅಪರಾಧಿ ಮ್ಹಣ ದೂರ ಸಾಂಗುನ ಹಾಂಗಾ ರಾಬಯಿತನಾ ಹಾಂವೆ ನೆಲಾಕ ಮಾತ್ರ ಪಳಯಲೆಲೆ. ರಾಯಾಲೆ ತೊಂಡ ಖಂಯಿ ಪಳಯಲಾ? ತಶಿ ಮಾಕಾ ತುಗೆಲೊ ವಳಖ ಮ್ಹೆಳನಿ." ಮ್ಹಣ ಸಾಂಗತಾ. ಪ್ರಕಾಶಾಕ ಆನಿ ಸುರೇಶಾಕ ಸುಮಾರ ದಿವಸಾಚೆ ನಂತರ ಒಟ್ಟ ಜಾಲೆಲೆ ನಿಮತಿ ದೊಳ್ಯಾಂತುಲ್ಯಾನ ಸಂತೋಷಾಚೆ ಉದಾಕ ದೆಂವತಾ. ತೆ ಪಳವ್ನ ಜನಾಂಕಯಿ ರಡುಕ ಯೆತಾ. ಹೆ ಸಂತೋಷಾಚೆ ವೇಳಾರಿ ಸುಬ್ರಾಯಾನ ಸುರೇಶಾಲೆ ಸಾತ ಜನ ಬಾಯಲಾಂಕಯ ಆಪೊವ್ನ ಹಾಣ ತಾಗೆಲಾಗಿ ಸೊಡತಾ ಆನಿ ತಾಕಾ ಸುರೇಶಾನ ಆನಿ ರಾಯಾನಂಯ ಮಾಫಿ ಕರಕಾ ಅಶಿಂ ಮಾಗುನ ಘೆತಾ. ಸುಬ್ರಾಯಾಕ ಮಾಫಿ ಕರತಾಚಿ ಆನಿ ಪ್ರಕಾಶ, ಸುರೇಶಾಕ ತಾಗೆಲೆ ಮೂಡಬಿದ್ರೆ ರಾಜ್ಯಾಚೆ ಅರ್ಧ ವಾಂಟೊ ದಿತಾ. ರಾಯ ಬಂಟ್ವಾಳಾಕ ತಾಂಗೆಲೆ ಬಾಪಯ ಆನಿ ಆವಯಕ ಆಪೊವ್ನ ಹಾಡಚೆ ಖಾತಿರ ಜನ ಪೆಟೆಯಿತಾ. ಜಾಲಯಾರಿ ತಾನ್ನಿ ಏಕ ವರಸಾಚೆ ಫುಡೇಚಿ ಮೆಲಯಾಂಚಿ ಮ್ಹಣ ಸುದ್ಢಿ ಮಾತ್ರ ತಾಂಕಾ ಮೆಳತಾ. ತೆ ವಿಷಯಾಕ ಮಾತ್ರ ತಾಂಕಾ ಖೂಬ ದುಃಖ ಜಾತಾ. ಮುಕಾರಿ ತಾನ್ನಿ ದೊಗಂಯ ತಾಂಗೆಲೊ ಸಂಸಾರ ಸಮೇತ ಸುಖಾರಿ ಆಸತಾಂಚಿ. ---೦೦---ಹೀ ಕಾಂಣಿ ಆಮಗೆಲಿ ಆಮ್ಮಾನ ಆಮಕಾ ಸಾಂಗ್ತನಾ ಮಸ್ತ ದಿವಸ ಕರ್ತಲಿ. ತೆದನಾ ತೀಣೆ ಕಾಂಣಿ ರಾಬ್ಬಯ್ತನಾ ಆಮ್ಕಾ ಕುರ್ವಣಿ ಯೇವ್ನು ನಿದ್ದೆನ ಆಂಬೊ ಜಾತ್ತಲಿಂಚಿ. ಜಾಲ್ಲ್ಯಾರಿ ಮುಖಾರಿ ಕಸ್ಸಲೆ ಜಾತ್ತಾ ಮ್ಹಣು ಆಯಕುಚೆ ಕೌತುಕ ಆಸ್ಸಿಲೆ. ತೆದನಾ ಆಮ್ಮಾನ ಥಂಯಿಚಿ ಕಾಂಣಿ ರಾಬ್ಬವ್ನು ಹೆರ್ದಿವಸ ಮುಖಾವಯಲಿ ಕಾಂಣಿ ಸಾಂಗುಕಾ ಜಾಲ್ಲ್ಯಾರಿ ಪುಳ್ದಿವಸು ಖಂಯಿ ರಾಬ್ಬಯಿಲಿ ಮ್ಹಣು ಸಾಂಗುಕಾ ಆಸ್ಸಿಲೆ. ತಸ್ಸಿ ಜಾವ್ನು ಆಮ್ಮಿ ಹೆರ್ದಿವಸು ಜವಣ ಜಾಲ್ಲೆ ಕೂಡ್ಲೆ ಕಾಲಿ ಕಾಂಣಿ ಖಂಯಿ ರಾಬ್ಬಯಿಲಿ ಮ್ಹಣು ಉಡಗಾಸು ಕರ್ಚಾಕ ಸುರು ಕರ್ತಲಿಂಚಿ. ಆತ್ತ ತೆದನಾಚೊ ವಿಷಯು ಸಕ್ಕಡ ಉಡಗಾಸಾಕ ಯೆತ್ತನಾ ತೆ ಚೆರ್ಡುಪಣ ಕಸ್ಸಲೆ ಘೋಡ ಮಾತ್ರ ನ್ಹಂಹಿ ತಾಂತು ಕಿತ್ಲೆ ಸುಖ ಆಸ್ಸಿಲೆ ಮ್ಹಣು ಮನಾಂಚೆ ಎದ್ರಾಕ ಯೆತ್ತಾ.
0 ಕಾಮೆಂಟ್(ಗಳು):
Post a Comment