ಬಂಟ್ವಾಳಾಚೆ ಹೈಸ್ಕೂಲ ಆಸುಚೆ ಜಾಗೆಕ ಭಂಡಾರಿ ಬೆಟ್ಟು ಮ್ಹಣತಾತಿ. ಹೈಸ್ಕೂಲಾಚೆ ಮಾಗಶಿ ಥೋಡೆ ದೂರ ಮೈರಣ್ಪಾಜ ಮ್ಹಳಲೊ ದೊಂಗರ (ಗುಡ್ಡೊ)ಆಸಾ. ದೊಂಗರ ಮ್ಹಣ್ತರಿ ಮಸ್ತ ರೂಕಯಿ ಆಸ್ಸಿಲೆಚಿ.ತಾಂತು ಏಕ ರುಕಾರಿ ಏಕು ಕಾಕಮಾಮು ಘರ (ಪೊಂಟ್ಯಾರಿ(ಗೆಲ್ಲ್ಯಾರಿ)-ಗೂಡು) ಕರ್ನ ಆಶಿಲೊ. ತಾಗೆಲೆ ಘರಾದಾಕುನು ಥೋಡೆ ದೂರ ಆನೇಕ ರುಕಾರಿ ಏಕಿ ಗುಬಂಜಾಕಾಯಿ ಘರ ಕರ್ನ ಆಶಿಲಿ. ಕಾಕಮಾಮ್ಮಾಲೆ ಘರ ತಾಣೆ ಶೆಣಾನಿ ಬಾಂದಿಲೆಲೆ. ಜಾಲಯಾರಿ ಗುಬಂಜಾಕಾನ ಮೆಣಾನಿ ಬಾಂದಿಲೆಲೆ. ತಿಣೆ ಕಿತ್ಲ್ಕಿ ಪಟಿ ಕಾಕಮಾಮ್ಮಾನ ಮ್ಹೆಳೆಲೆ ತೆದನಾ ತಾಕಾಯಮೆಣಾನಿ ಘರ ಬಾಂದಿ ಮ್ಹಣ ಸಾಂಗಿಲೆ. ಜಾಲಯಾರಿ ತೆದನಾ ತೊ ತಿಗೆಲೆ ಸಲಹಾ (ಉಪದೇಶ ಸಲ್ಲೊ) ಆಯ್ಕನಿ. ಕಾಕಮಾಮಾಕ ತಾಂಗೆಲೆ ಮ್ಹಾಲಗಡೆದಾಕುನು ಆಯಿಲೆ ರಿವಾಜೆ ಪ್ರಕಾರ ಚೆರ್ಡುಂವಾಂಕ ಪೊಸುಚಿ ಜವಾಬ್ದಾರಿ ನಾಸಿಲಿ. ತಾನ್ನಿ ಕೊಗುಳಾಚೆ (ಕೋಗಿಲೆ) ಘರಾಂತು ವಚುನು ತಾಂಗೆಲೆ ತಾಂತೆ ಥಂಯಿ ದವರಚೆ. ತಾಂತ್ಯಾಕ ಕಾವ್ ದಿವಚೆ, ಪೀಲ ಕರಚೆ, ಸಕಡ ಕಾಮ ಕೊಗುಳಾಲೆಂಚಿ. ಪಿಲ್ಲಾಂಕ ಪಾಕ ಯೇವ್ನ ಉಬಚಾಕ ಸುರು ಕರತನಾ ತಾಂಚೆ ರಣ್ಯ ಆಯಕುನಚಿ ಕೊಗುಳಾಕ ಹೆ ಮೆಗೆಲೆ ಪಿಲ ನಂಯಿ ಮ್ಹಣ ಕಳಚೆ. ಕಾಕಮಾಮ ಆನಿ ಕೊಗುಳ ಪಳವಚಾಕ ಏಕಽಲೆಕ. ಕಾಳೇಂಚಿ ಪಿಲ್ಲಂಯಿ ತಸ್ಸಿಚಿ. ತಶಿ ಜಾವ್ನ ಕಾಕಮಾಮಾಕ ಗುಬಂಜಾಕಾನ ಸಾಂಗಿಲೆ ಆಯಕುನು "ಮ್ಹಾಕಾ ಕಸಲೆ ಚೆರ್ಡುಂವಾಂಕ ಪೊಸುಕ ಆಸಾವೆ? ಚೆರ್ಡುಂವ ಕಶಿ ಕೋಗುಳಾಚೆ ಘರಾಂತ ಹೊಡ ಜಾತಾಚಿ. ನಂತರ ಕಾಂಯಿ ಹಾಂಗಾ ಯೇನಾಚಿ. ಮ್ಹಾಕಾ ಯೆಕಲ್ಯಾಕ ಹೆಂ ಘರ ಪುರೊ." ಮ್ಹಣತಾ. ತಶೀಚಿ ಪಾವಸಾಡಿ ಯೆತಾ. ಏಕ ದಿವಸ ಆಯಿಲೆ ಪಾವಸಾಕ ಕಾಕಮಾಮಾಲೆ ಘರ ಹೊಳ್ನ ವತಾ. ಹಾಂಗಾ ಗುಬಂಜಾಕಾಲೆ ಘರ ಗಟ್ಟಿ ಜಾತಾ. ಕಾಕಮಾಮ ಘರ ಹೊಳ್ನ ಗೆಲೆಲೆ ಪಳವ್ನು `ಕಸಲೆ ಕರಚೆ? ತೆಂ ದಿವಸ ಹಾಂವೆ ಗುಬಂಜಾಕಾಲೆ ಸಲಹಾ ಆಯಕುನು ತಿಗೆಲೆ ತಶಿಚಿ ಮೆಣಾಚೆ ಘರ ಬಾಂದಿಲೆಲೆ ಜಾಲಯಾರಿ ಆಜಿ ಘರ ಹೊಳ್ನ ಉಚ್ಚಾಕ ನಾಸಿಲೆ. ಆತ ಪಾವ್ಸ ರಾಬ್ಬುನು ಫಾಲ್ಲೆ ಜಾವೊ ತರೀ ಕಂಯಿ ರಾಬ್ಚೆ? ಗುಬಂಜಾಕಾಲೆ ಘರ ಕಶಿಚಿ ಹಾಂಗಾಚಿ ಲಾಗೀಚಿ ಆಸಾ ನ್ಹಂವೆ? ಥಂಯಿ ವಚುನ ತಿಗೆಲಾಗಿ - ಏಕಿ ರಾತ್ರಿ ಫಾಲ್ಲೆ ಕರಚಾಕ ಥೊಡೊ ಜಾಗೊ ದೀ- ಮ್ಹಣ ನಿಮಗುನ ತಂಯಿ ಪಾಲೆ ಕರಚೆ. ಫಾಲ್ಲೆ ಜಾತರಿ ಮಾಗಿವೆಲೊ ವಿಷಯ ಪಳವ್ಯಾ.' ಮ್ಹಣ ಚಿಂತುನು ಕಾಕಮಾಮ ಗುಬಂಜಾಕಾಲೆ ಘರ ಆಶಿಲೆ ರೂಕಾರಿ ಯೆತ್ತಾ. ತಿಗೆಲೆ ಘರಾಕ ದಾರ (ಬಾಗಿಲ) ಘಾಲೆಲೆ ಪಳವನ ಕಾಕಮಾಮು `ಗುಬಂಜಾಕಾ ಘರಾಂತು ಗರಂ ಜಾವ್ನ ನಿದ್ದಲಾ ದಿಸ್ತಾ. ಕಾಂಯಿ ಶಬ್ದ ನಾ' ಮ್ಹಣ ಲೆಕುನು ಘರಾಚೆ ದಾರ ಮಾರತಾ ಆನಿ `ಗುಬಂಜಾಕಾ ಗುಬಂಜಾಕಾ ದಾರ ಕಾಡಿ' ಮ್ಹಣತಾ. ತೆದನಾ ಭಿತರಿದಾಕುನು ಗುಬಂಜಾಕಾ "ಅಪರಾತ್ರಿ ಯೇವ್ನ ದಾರಕ ಮಾರತಲೊ ನಿಪುಣ ಪುರುಷ ತು ಕೋಣ? ಹೇ ಧರಾಂಧರಿ ಪಾವಸಾಕ ಯೆವಚೆ ತಿತಲೆ ಕಸಲಿ ಜರುರತ ಆಸುನ ಆಯಿಲೊ ತು?' ಮ್ಹಣತಾ. `ಗುಬಂಜಾಕಾ! ಹಾಂವ ಕಾಕಮಾಮು. ತೆದುಸ ತುಗೆಲೆ ಸಲ್ಲಾ ಆಯಕುನ ಹಾಂವಂಯೀ ತುಗೆಲ್ಯಾ ತಶಿಚಿ ಘರ ಕೆಲೆಲೆ ಜಾಲಯಾರಿ ಆಜಿ ಹಾಂವ ಹಾಂಗಾ ಯೆವಚಾಕ ನಾಸಿಲೆ. ಕಸಲ್ಕಿ ಮ್ಹಣ್ಣು (ಗಾಽದಿ) ಆಸ್ಸ ನ್ಹಂವೆ? `ವಾಯಟ ಜಾತರಿ ಬುದ್ಧಿ ಯೆವಚಿ' ಮ್ಹಣ, ತಶೀಂಚಿ ಜಾಲೆ. ಆಯಚಿ ಏಕಿ ರಾತಿ ನೀದ ಕಾಡುಕ ಮ್ಹಾಕಾ ಥೊಡೋಚಿ ತುಗೆಲೆ ಘರಾಂತ ಜಾಗೊ ದಿಲಯಾರಿ ಫಾಲಯಾ ಸಕಾಣೀಚಿ ಉಠಾನ ಹಾಂವ ವತ್ತಾ. ಏಕ ಉಪಕಾರ ಕರ್ತ ನ್ಹಂವೆ? ನ್ಹಂಯಿ, ಹಾಂವೆ ದಾರಾಕ ಮಾರತನಾ ತುವೆ ರಾಗಾನ ನಿಮ್ಗಿಲೆಲೆ, ಚಂದ ಜಾಲ್ಲಾ. ತು ಕಸ್ಸಲೆ ಸಂಗೀತ ಶಿಕ್ತಽ ಆಸ್ಸವೆ? ತುಗೆಲಿ ತಸಲಿ ಆಕ್ಕಾ ಮ್ಹಾಕಾ ಆಶಿಲೆ ನಿಮತಿ ಜಾಲೆ. ನ್ಹಂಯಿ ಜಾಲಯಾರ ಆತಾ ಹಾಂವೆ ಖಂಯಿ ಮ್ಹಣ ವಚ್ಚೆ.' ಮ್ಹಣ ಕಾಕಮಾಮ ಗುಬಂಜಾಕಾಕ ಭುಲ್ಲಯತಾ. ತೆದನಾ ಗುಬಂಜಾಕಾ ಭಿತರಿದಾಕುನು `ಕಾಕಮಾಮ್ಮ ಕಶಿಂಚಿ ತು ಪಾವಸಾಕ ತಿಂಬಲಾ. ಆನಿ ಥೋಡೊ ವೇಳ ತಿಂಬಲಯಾರಿ ಕಾಂಯಿ ಜಾಯನಾ. ಹಾಂವ ಮೆಗೆಲೆ ಚೆರ್ಡುಂವಾಂಕ ಖಾವಯತ ಆಸಾ. ಚಿಕೇಚಿ ರಾಬ. ನಂತರ ದಾರ ಉಗಡತಾ. ಹಾಂವೆ ಚೆರ್ಡುಂವಾಂಕ ಖಾಣ ಖಾವಯತನಾ ಮ್ಹಳೆಲೆ ಪದ್ಯಾಚೊ ರಾಗು ತೊ. ಚಂದ ಅಸ ನ್ಹಂವೆ?' ಮ್ಹಣತಾ.ಥೋಡೆ ವೆಳಾ ನಂತರ ಕಾಕಮಾಮ ವಾಪಾಸ `ಗುಬಂಜಾಕಾ ಗುಬಂಜಾಕಾ ದಾರ ಕಾಡಿ' ಮ್ಹಣತಾ. ಭಿತರಿದಾಕುನು ಗುಬಂಜಾಕಾ `ಕಸಲೆ ಕರಚೆ ಕಾಕಮಾಮ್ಮಾ, ಚೆರ್ಡುಂವಾಂಕ ಖಾವೆಯತನಾ ತಾಂಗೆಲೆ ಆಂಗಾರಿ ಸಕಡ ಖಾಣ ಫೋಣ ತಾಂಗೆಲೆ ಆಂಗ ಸಕಡ ಮೆಣಕಟ ಜಾಲಾ. ತಾಂಕಾ ಹೂನ ಉದಕಾಚೆ ಆಂಗ್ಟೆನ ಪುಸುನ ನಂತರ ದಾರ ಉಗಡತಾ ಜಾಯನಾಂವೆ?' ಮ್ಹಣತಾ. ಕಾಕಮಾಮ `ಆತಂಚಿ ಕಾಡಿ ಮ್ಹಣ ಜೋರ ಕರ್ನ ಸಾಂಗುಕ ಜಾತವೆ? ಮಾಗಿರಿ ತಿಣೆ ದಾರಽಚಿ ಕಾಣಿ ಜಾಲಯಾರಿ ಹಾಂವೆ ಕಸಲೆ ಕರುಂಕ ಜಾತಾ? ದಾರ ಏಕ ಪಟಿ ಕಾಡೊ. ಮಾಗಿರಿ ತಿಕಾ ಬುದ್ಧಿ ಸಿಕೊವ್ಕಾ.' ಮ್ಹಣ ಚಿಂತುನ "ಜಾಯ್ತ ಗುಬಂಜಾಕಾ, ಚೆರ್ಡುಂವಾಂಕ ಸುರುವೇಕ ಚಂದ ಕರ್ನ ಪಳವ್ಕಾ ನ್ಹಂವೆ? ಹಾಂವ ಥೋಡೊ ವೇಳು ಭಾಯರ ಪಾವಸಾಕ ತಿಂಬುನು ರಾಬತಾಂ, ಜಾಯ್ನಾವೆ?" ಮ್ಹಣು ಕಾಕಮಾಮಾನ ಏಕ ಡೊಸ್ ಸೊಳೊ. ವಾಪಾಸ್ ಆನಿ ಥೋಡೆ ವೇಳಾನಿ ಕಾಕಮಾಮ "ಗುಬಂಜಾಕಾ ಗುಬಂಜಾಕಾ ದಾರ ಕಾಡಿ" ಮ್ಹಣಾಲೊ. ತೆದನಾ ಭಿತರಿದಾಕುನು ಗುಬಂಜಾಕಾ "ಕಸಲೆ ಕಾಕಮಾಮಾ, ಚೆರ್ಡುಂವಾಂಕ ಖಾವೊನು, ನ್ಹಾಣೊನ ಜಾತರಿ ನೀದ ಯೆತಾ ಮ್ಹಣ ತುಕಾ ಕಳಿತನಾಂವೆ? ಆತಾಂ ಹಾಂವ ಚೆರ್ಡುಂವಾಂಕ ನಿದಾಯ್ತ ಆಸಾ. ಚಿಕೇಚಿ ರಾಬ, ನಿದಾಽನ ಜಾತರಿ ಹಾಂವಂಚಿ ದಾರ ಉಗಡತಾಂ. ದಾರಾಕ ಮಾರ್ನ ಚೆರ್ಡುಂವಾಂಕ ಜಾಗೊನಾಕಾ." ಮ್ಹಣಾಲಿ. ಭಾಯರ ಧರಾಂಧರಿ ಪಾವ್ಸ, ಭಿತರಿದಾಕುನು ಗುಬಂಜಾಕಾಲೆ ದಾರ ಕಾಡುಂಕ ವೇಳ ಕರಚೆ ಸಬಬ, (ನೆವನ) ಹಾಜೆ ನಿಮತಿ ಕಾಕಮಾಮ್ಮಾಕ ರಾಗ ತಡ್ಸುಚಾಕ ಜಾಯನಾ. ಜಾಲಯಾರಿ ಇತ್ತೆ ಕರಚೆ. ಗುಬಂಜಾಕಾನ ದಾರ ಕಾಡತರಿ ಮಾತ್ರ ಕಸಲೆ ಜಾವೊ ಕರಯೇತ. ಕನ್ನಡಾಚಿ ಏಕಿ ಮ್ಹಣ್ಣು `ತಾಳಿದವನು ಬಾಳಿಯಾನು' ಉಗಡಾಸಾಕ ಅಯಲಿಂ, ತಶಿ ಜಾವ್ನ ಸಮಾಧಾನ ಕರ್ನ ಘೇತ್ಲೆ ಆನಿ ಗುಬಂಜಾಕಾನ ದಾರ ಉದಾರ ಕರಚೆ ತಾಂಯ ನುಳೀತ ಬಯ್ಸುಯಾ ಮ್ಹಣ ರಾಕತ ಬಶಿಲೊ.ಮಸ್ತ ವೇಳ ಜಾಲಯಾರಿ ಗುಬಂಜಾಕ ದಾರ ಕಾಡಚಾರಿ ನಾ, ದಾರಾಕ ಮಾರುಕ ನಜ್ಜ ಮ್ಹಳಾ, ಅತ್ತಂ ಕಸಲೆ ಕರಚೆ? ಹಳೂಚಿ ಸ್ವರಾರಿ `ಗುಬಂಜಾಕ, ಜಾಲ್ವೆಂ?' ಮ್ಹಣಾಲೊ. `ಕಾಕಮಾಮ್ಮಾ, ಪಿಲ್ಲಂ ಆತ್ತ ನಿದಲಿಂಚಿ ಮಾತ್ರ. ತುವೆ ಜಾಲವೆ ಮ್ಹಣ ನಿಮಗಿತನಾ ಹಾಂವ ದಾರಾಲಾಗಿ ಆಯಿಲಿಂ.' ಗುಬಂಜಾಕ ಹಳೂಚಿ ಸ್ವರಾರಿ ಮ್ಹಣ ದಾರ ಉಗಡತಾಂ. ಕಾಕಮಾಮ ಭಿತ್ತರಿ ಯೆತನಾ ಥೊಡೋ ಶಬ್ದ ಜಾತಾ. `ಕಾಕಮಾಮ್ಮಾ, ಶಬ್ದ ಕರ್ನಕಾ. ಆನಿ ಆಮ್ಹಿ ಹಳೂಚಿ ಉಲವಕಾ. ಚೆರ್ಡುಂವಾನ ಉಟಾಯಲಾರಿ ನಿದಾಚಾಕ ಕಿತಲೆ ಕಷ್ಟ ಮ್ಹಣ ತುಕಾ ಕಳನಾ. ತುಕಾ ಚೆರ್ಡುಂವಾಂಕ ಪೊಸುನು ಗೊತಸ್ಸವೆ? ತುಗೆಲೆ ಚೆರ್ಡುಂವ ವ್ಹಡ ಜಾವಚೆ ಕೋಗುಳಾಚೆ ಘರಾಂತ ನ್ಹಂವೆ?' ಮ್ಹಣಾಲಿ ಗುಬಂಜಾಕಾ. ಹೆ ಆಯಕುನ ಕಾಕಮಾಮ್ಮಕ ರಾಗ ಆಯಲೊ. ಜಾಲಯಾರಿ ಗುಬಂಜಾಕಾನ ಫಟ್ಟಿ ಮಾರ್ನಿ, ಆಸಿಲೇಚಿ ಸಾಂಗಲಾ. ತಾಕಾ ಹಾಂವೆ ಕೊಪ್ಪುಂಕ ಜಾತವೆ? ಮ್ಹಣ ಚಿಂತುನು ನುಳೀತ ಬಸಲೊ. ಆತಾಂ ನಿದೊಚಿ ವಿಲೆವರಿ ಜಾವಕಾನ್ಹಂವೆ? ತೆದ್ದೊಳತಾಂಯ ತೊಂಡ ಧಾಂಪುನು ಬಸಚೆ ಚಾಂಗ ಅಶಿಂ ಲೆಕಲೆಂ ಕಾಕಮಾಮಾನ. `ಗುಬಂಜಾಕ್ಕಾ, ಹಾಂವೆ ಖಂಯಿ ನಿದೊಕಾ' ಮ್ಹಣ ತೋಚಿ ನಿಮಗಿತಾ. ಗುಬಂಜಾಕಾ ಆಲೋಚನೆರಿ ಪಳ್ಳಿ. `ಹೆ ಕಾಕಮಾಮ್ಮಲಿ ಬುದ್ಧಿ ಚಾಂಗ ನಾ ಮ್ಹಣ ತಿ ಅಯಕಲಾ. ಜಾಲಯಾರಿ ತಾಣೆ ತಿಕಾ ಕಾಂಯ ವಾಯಟ ಕರ್ನಿ. ತಶಿ ಜಾವ್ನ ಆಜಿ ಏಕಿ ರಾತಿ ನ್ಹಂವೆ? ಪೊಳೋಯಾಂ' ಅಶಿಂ ಗುಬಂಜಾಕಾನ ಚಿಂತಲೆಂ. `ಕಾಕಮಾಮ್ಮಾ ತುಂ ಮಾಂಚಾಚೆ ಪೊಂದಾಕ ನಿದ್ದೆ, ಜಾಯನಾಂವೆ?' ಮ್ಹಣಾಲಿ.`ಮಾಂಚೊ ಪಳಯಾರಿ' ಮ್ಹಣಾಲೊ ಕಾಕಮಾಮ. `ತಶಿ ಜಾಲಯಾರಿ ರಾನ್ನಿ ವಯಚೆ ಮಾಂಚೇರಿ ನಿದ್ದೆ'`ವಯರಿ ದಾಕುನ ಉಜಾಂತು ಪಲಯಾರಿ' `ಪಾಳಣ್ಯಾ ಪೊಂದಾ ನಿದ್ದೆ' `ಪಾಳಣೆ ಪಳಯಾರಿ' `ತಶಿ ಜಾಲಯಾರಿ ಪಾಳಣ್ಯಾಂತು ನಿದ್ದತ್ವೆ' ಕೂಡ್ಲೆ ಕಾಕಮಾಮ `ಜಾಯ್ತ, ಪಾಳಣ್ಯಾಂತ ನಿದತಾ' ಮ್ಹಣಾಲೊ.ಗುಬಂಜಾಕಾ ಕಾಕಮಾಮಾಕ ಪಾಳಣ್ಯಾಂತ ನಿದೊಚಾಕ ಸಾಂಗತಾ. ಸಕಡ ನಿದತಾಂಚಿ. ಸುಮಾರ ವೇಲ್ಹಾನ ಪಾಳಣ್ಯಾ ದಾಕುನ `ಕುಟುಂ' ಮ್ಹಳಲೊ ಶಬ್ದ ಗುಬಂಜಾಕಾಕ ಆಯಕತಾ. ತಿ ಕಾಕಮಾಮಾಲಾಗಿ "ಕಾಕಮಾಮ್ಮಾ, ಕಾಕಮಾಮ್ಮಾ ಕಸ್ಸಲೊ ತೊ ಶಬ್ಧು?" "ತೆ ವೇಂ ಗುಬಂಜಾಕ್ಕಾ, ಆಜಿ ಸಾಂಜವೆಳಾ ಹಾಂವ ಬಂಟ್ವಾಳಾಕ ಗೆಲೆಲೆ ತೆದನಾ ಏಕ ಗಲ್ಲಿಂತ ಏಕಲಿ ಆಜ್ಜಿ ಮ್ಹೆಳೆಲಿ. ತಿಕಾ ಖಾವಚಾಕ ಜಾಯನಾಸ್ಸಿಲೊ ಮ್ಹಣ ಗಟ್ಟಿ ಚಣೊ ಮ್ಹಕಾ ಥೊಡೊ ದಿಲಲೊ. ತಾಂತುಲೊ ಏಕ ಖಾಲೊ. ತಾಜೊ ಶಬ್ಧ ತೊ." ಮ್ಹಣಾಲೊ. `ಮ್ಹಾಕಾ ಧರಾಂಧರಿ ಪಾವಸಾಕ ಭಾಯರ ರಾಬ ಮ್ಹಣ ಸಾಂಗುವ್ನ ದಾರ ಕಾಡುಕ ಕಿತಲೊ ವೇಳು ಕೆಲೊ. ತೊ ಕೋಪು ಮ್ಹಕಾ ಆನಿಕಯ ವಜ್ಜನಿ' ಮ್ಹಣ ಚಿಂತಲೊ. ಥೊಡೆ ವೇಳಾನ ಆನೇಕ ಪಾವ್ಟಿ `ಕುಟುಂ' ಕರ್ನ ಶಬ್ದ ಕರತಾ. ಗುಬಂಜಾಕಾ "ಕಾಕಮಾಮ್ಮಾ ಕಸಲೊ ತೊ ವಾಪಾಸ ಶಬ್ಧು ಆಯಿಲೊ?" ಮ್ಹಣತಾ. "ತೇಚಿ ಗುಬಂಜಾಕಾ ಆಜಿನ ದಿಲಲೊ ಚಣೊ." ಅಶೀಂಚಿ ಸುಮಾರ ಚಾರ ಪಾಂಚ ಪಟಿ `ಕುಟುಂ' ಮ್ಹಳಲೊ ಶಬ್ಧ ಜಾವಚೊ, `ಕಸಲೊ ಶಬ್ಧು?' ಮ್ಹೊಣ ಗುಬಂಜಾಕಾನ ನಿಮಗುಚೆ, ಕಾಕಮಾಮ್ಮಾನ `ಆಜ್ಜಿನ ದಿಲಲೊ ಚಣೊ.' ಮ್ಹಣಚೆ. ತಾಜೆ ನಂತರ ನಿಶಬ್ಧ ಜಾವ್ನ ಗುಬಂಜಾಕಾಕ ನೀದ ಪಡತಾ. ತಿಕಾ ಜಾಗೊರ ಜಾವ್ನ ಪಾಳಣ್ಯಾಂತ ಪಳಯಲಯಾರಿ ಕಾಕಮಾಮುಂಯೀ ನಾ ಗುಬಂಜಾಕಾಲೆ ಪಿಲಂಯಿ ನಾಂಚಿ. ಗುಬಂಜಾಕಾಕ ಕಾಲಿ ರಾತ್ರಿ ಕಾಕಮಾಮ್ಮಾನ `ಕುಟುಂ' ಶಬ್ಧ ಕೆಲಲೊ ಕಸಲೆ ಮ್ಹಣ ಆತಾಂ ಮನಾಕ ಗೆಲೆಂ. ತಿ ಕೂಡ್ಲೆ ಬಂಟ್ವಾಳ ಪೆಂಟಾಂಕ ವಚುನು ಸೀಸ ಘೇವನ ಯೆತಾ. ಪಣಂಗಿಲ ಪದವಾಚೆ ದೂದಾಚೊ ವ್ಯಾರ ಕರಚೆ ಮೇರಿ ಬಾಯೆಲಾಗಿ ವಚ್ಚುನು "ಬಾಯಮ್ಮಾ, ಬಾಯಮ್ಮಾ ಮ್ಹಾಕಾ ಏಕ್ ಲಾನ್ ಲೋಣಿಯಾಚೊ ಗುಳೊ ದಿವೆತವೇ?" ಮ್ಹಣತಾ. ತೆದನಾ ಮೇರಿ ಬಾಯಿ " ತುವೆ ಪೈಸೆ ದಿಲ್ಯಾರ್ ಹಾಂವ್ ದಿತಾ" ಮ್ಹಣತಾ. ಗುಬಂಜಾಕಾ ರಡ್ತಚಿ " ಕಿತೆಂ ಕರಚೆ ಬಾಯಮ್ಮಾ, ಮ್ಹುಜೆ ಕಡೆ ದಿವುಂಕ ಪೈಸೆ ನಾಂತ. ಮ್ಹುಜೆ ಘರಾಚಿ ಲಾಗೀತ ಏಕ ಕಾವ್ಳೊ ಆಸಾ. ಕಾಲ್ ರಾತಿ ಪಾವಸಾಕ ತಾಜೆ ಘರ ಪಡ್ಳೆ ಮ್ಹಣ ಮ್ಹುಜೆ ಘರಾ ಯೆವ್ನ ಮ್ಹಕಾ ಭಾದಾ ದೀವ್ನು, ಮ್ಹುಜೆ ಬುರ್ಗ್ಯಾಂಚೆ ಸಾಂಗಾತಾ ಪಾಳಣ್ಯಾಂತ್ ನಿದತಾ ಮ್ಹಣ ಸಾಂಗ್ವನು ನಿದ್ಲೊ. ಆಜಿ ಸಕಾಳಿ ಪಳಯಲ್ಯಾರ್ ಕಾವ್ಳೊಯಿ ನಾ ಮ್ಹುಜೆ ಬುರ್ಗೆಂಯಿ ನಾಂತ್. ತಾಕಾ ಆತಾ ಬುದ್ ಸಿಕೊಕಾ ಮ್ಹಣ ಹಾಂವೆ ಸೀಸ ಘೇವ್ನ ಆಯಿಲಾಂ. ಬಾಯಮ್ಮಾ ತುವೆಂ ತೊಡಿಚಿ ಲೋಣಿ ದಿವ್ನು ಮ್ಹುಜೆ ಬುರ್ಗ್ಯಾಂಕ್ ವಾಂಚಯಿನಾಂವೆ?" ಮ್ಹಣಾಲಿ. ಮೇರಿ ಬಾಯಿಕ ದೊಳಯಾಂತ ದಾಕುನ ಉದ್ದಾಕ ಆಯಿಲೆ ಆನಿ `ಗುಬಂಜಾಕಾ ತುಜೆ ಬುರ್ಗ್ಯಾಂಕ ವಾಂಚೊಂವ್ಕ ಹಾಂವ್ ತುಕಾ ಕಿತ್ಲಿ ಲೋಣಿ ಜಾಯಕಿ ತಿತಿಲಿ ದಿತಾ. ತುವೆ ಪೈಶೆ ದಿವಚೆ ನಾಕಾ" ಮ್ಹಣ ಗುಬಂಜಾಕಾಕ ಲೋಣಿ ದಿತಾ. ಗುಬಂಜಾಕಾ ಸೀಸ ಆನಿ ಲೋಣಿ ಘೇವ್ನ ಸೀದಾ ಘರಕಡೆ ವತಾ ಆನಿ ಏಕ ದವಲ್ಯಾಂತ ಸೀಸ ಘಾಲ್ನ ರಾನ್ನಿರಿ ದವರ್ನ ತೆ ಪಾತಳ ಕರತಾ ಆನಿ ತಾಜೆ ವಯರಿ ಮೇರಿಬಾಯಮ್ಮಾನ ದಿಲೆಲಿ ಲೊಣಿ ಘಾಲ್ತಾ ಆನಿ ಘರಾಚೆ ಭಾಯರ ಯೆವ್ನ "ಹೂನ ಹೂನ ಲೊಣ್ಯಾಚೊ ಗುಳೊ ಕೊಣಾಕ ಜಾಯಿ" ಮ್ಹಣತಾ. ತೆ ಆಯಕುನು ರುಕಾರಿ ಬಸ್ಸಿಲೊ ಕಾಕಮಾಮು ಕಾಲಿ ರಾತ್ರಿ ಜಾಲೆಲೆ ವಿಷಯ ಗೊತನಾಸೆ "ಗುಬಂಜಾಕಾ ಲೊಣ್ಯಾಚೊ ಗುಳೊ ಮ್ಹಾಕಾ ದಿತವೆ?" ಮ್ಹಣಾಲೊ.ತಾಕಾ ಗುಬಂಜಾಕಾ ಮನಾಂತೂಚಿ `ತುಗೆಲೆ ಖಾತಿರೀಚಿ ಹೊ ತಯಾರ ಕೆಲಾ' ಅಶಿಂ ಲೆಕುನು "ಯೊ ಕಾಕಮಾಮ್ಮಾ, ತೊಂಡ ಆಂ..... ಕರಿ. ತೊಂಡಾಂತು ಘಾಲ್ತಾ." ಮ್ಹಣಾಲಿ.ಕಾಕಮಾಮು ಗುಬಂಜಾಕಾಲೆ ಘರಲಾಗಿ ಯೆವ್ನ ಆಂ...... ಕರ್ನ "ತೊಂಡಾಂತ ಘಾಲಿ ಗುಬಂಜಾಕ್ಕಾ" ಮ್ಹಣತಾ. ಗುಬಂಜಾಕಾ ಹೂನ ಸೀಸ ಆನಿ ಲೋಣಿ ತೊಂಡಾಂತ ದಾಕುನು ಭಾಯರ ಘಾಲುಕ ಜಾಯನಾಶಿ ಕಾಕಮಾಮ್ಮಾಲೆ ತಾಳ್ಯಾಽಂತು ರಕಯ್ತಾ. ತೆದನಾ ಕಾಕಮಾಮ್ಮಾಕ ಕಸಲೆ ಕರುಂಕಯಿ ಜಾಯ್ನಾಶಿ ವೊಂಕವುನು ಘಾಲ್ತಾ ಆನಿ ಉಬುನು ವತಾ. ತೆ ವೊಂಕಿಂತು ಗುಬಂಜಾಕಾಲೆ ಪಿಲಂಯಿ ಆಶಿಲೆಂಚಿ. ಗುಬಂಜಾಕಾ ತ್ಯಾ ಪಿಲ್ಲಾಂಕ ಕಾಣ ಚಂದ ಕರ್ನ ನಾಣಯತಾ ಆನಿ ವೊಂಕೆಚಿ ವಾಸ್ ಯೆನಾಶಿ ಪಳಯತಾ ಆನಿ ಪಾಳಣ್ಯಾಂತ ಘಾಲ್ನ ತಾಂಕಾ ನಿದಾಯ್ತಾ. ತಾಜೆ ನಂತರ ಗುಬಂಜಾಕಾ ರಾತ್ರಿ ಕೊಣಯ ಯೇವ್ನ ದಾರ ಉಗಡಿ (ಉದಾರೆಕರಿ) ಮ್ಹಳಯಾರೀ ದಾರ ಕಾಣಾಶಿಲಿ. ಕಾಕಮಾಮು ಮರ್ಯಾದಿ ಘೆಲ್ಲಿ ನ್ಹಂವೆ? ಮ್ಹಣ ಲೆಕುನ ತೊ ಗಾಂವೂಂಽಚಿ ಸೊಣ್ ದೂರ ವಚುನ ಬರೋಚಿ ಮ್ಹಣೊನು ಘೆವಕಾ ಮ್ಹಳೆಲೆ ಉದ್ದೇಶಾನ ಲಾಗಿಚೆ ವಗ್ಗ ಮ್ಹಳ್ಳಲೆ ಗಾಂವಾಂತ ವಚುನ ರಾಬುಯಾ ಮ್ಹಣ ವತಾ. ----೦೦-----ಹೀ ಕಾಂಣಿ ಸಾಧಾರಣ ಜಾವ್ನು ಸಕ್ಕಡ ಚೆರ್ಡುಂವಾಂಕ ತಾಂಗೆಲಿ ಆಮ್ಮಾ ಸಾಂಗ್ತಾ. ತಸ್ಸಿಂಚಿ ಮೆಗೆಲೆ ಆಮ್ಮಾನ ಮಾಕ್ಕಾ ಸಾಂಗಿಲಿ ಕಾಂಣಿ ಹಾಂವೆ ವಿಸ್ತಾರ ಕರ್ನು ಬರಯಿಲಾ.
0 ಕಾಮೆಂಟ್(ಗಳು):
Post a Comment