ಉಡ್ಪಾದಾಕುನು ಕುಂದಾಪುರಾಕ ವತನಾ ವಾಟೆರಿ ಬ್ರಹ್ಮಾವರ ಮ್ಹಳಲೊ ಏಕ ಗಾಂವ ಮ್ಹೆಳತಾ. ಥಂಯಿ ವಾಸ್ತೇವ ನಾಂವಾಚೊ ಏಕಲೊ ಆಶಿಲೊ. ತಾಗೆಲಿ ಬಾಯಲ ಶ್ರೀದೇವಿ. ತಾಕಾ ಸಾತ ಜನ ಚೆಲ್ಯೋಚಿ. ವಾಸ್ತೇವ ಮಸ್ತ ದುಡ್ವಾಳ ನ್ಹಂಹಿ. ಅಡ್ಡಾದಿಡ್ಡಿ ಖರ್ಚ ಕರನಾತಿಲೆ ದಿವಸ ಮಾತ್ರ ಚಂದಾಯೆರಿ ವತ್ತಸ್ಸಿಲೆ. ಕಸಲೆ ವಿಶೇಷ ಪರಬಂ ಯಾ ಸೊಯರ್ಯಾನಿ ಆಯಿಲೆ ವೇಳಾರಿ ಮಾತ್ರ ಮಸ್ತ ಕಷ್ಟ ಜಾತಲೆ. ಜಾಲಯಾರಿ ತಾಗೆಲಿ ಬಾಯಲ ಶ್ರೀದೇವಿ ಚಂದಾಯೇರಿ ಘರ ಚಲಾಯಸುನ ವ್ಹರತಲಿ.
ತಾಂಗೆಲೆ ಸಾತ ಜನ ಚೆಲ್ಯಾಂತು ಸ ಜನ ಚೆಲ್ಯೊ ಅಲಂಕಾರ ಕರ್ನ ದೇಖಾವೆಕ ಚಂದ ದಿಸ್ತಲಿಂಚಿ. ಜಾಲಯಾರಿ ಸಾತಾಚಿ ಮ್ಹಳಯಾರಿ ಆಖೇರಿಚಿ ಚೆಲಿ ಮಾತ್ರ ಕಾಂಯ ಅಲಂಕಾರ ಕರನಾಶಿ ಸಾದಾ ಆಶಿಲಿ. ತಶಿ ಜಾವ್ನ ತಿಗೆಲೆ ಮ್ಹಾಲ್ಗಡೆ ಭಯಣ್ಯಾನಿ ತಿಕಾ ಕುರ್ಕುಳ ಮ್ಹೊಣ ಆಪೊವಚೆ ಆಶಿಲೆ. ತೇಚಿ ಕುರ್ಕುಳ ಮ್ಹಳಲೆ ನಾಂವ ತಿಗೆಲೆ ಆವ್ಸ ಬಾಪ್ಸುನಂಯ, ಆನಿ ಗಾಂವಾಂಚೆ ಬಾಕಿಚೆ ಜನಾನಿ ಆಪೊವ್ನ ತಿಗೆಲೆ ನಾಂವಂಚಿ ಸಕಡಾಂಕ ವಿಸೋರ್ನ ಗೆಲಾ. ನಿಜಾವ್ನ ಸಾತ ಚೆರ್ಡುಂವಾಕಂಯ ತಾನ್ನಿ ಚಂದಚಂದ ನಾಂವ್ವ ದವರಲಾಂಚಿ. ಸಕಡಾಂಗೆಲೆ ನಾಂವಾಂತುಯಿ ಮತಿ ಮ್ಹಣ ಆಶಿಲೆ. ಸುರುವೆಚಿ ಶ್ರೀಮತಿ, ದುಸ್ರಿ ಸುಮತಿ, ತಿಸ್ರಿ ಗೋಮತಿ, ಚಾರಿಚಿ ತಾರಾಮತಿ, ಪಾಂಚಾಚಿ ಚಂದ್ರಮತಿ, ಸಂಚಿ ಮಧುಮತಿ, ಸಾತಾಚಿ ಕುರ್ಕುಳಾಲೆ ನಾಂವ ಇಂದುಮತಿ ಮ್ಹಣು.
ವಾಸ್ತೇವಾನ ಸದಂಚಿ ಕಾಮಾಕ ವಚುನ ಮೆಳೆಲೆ ದುಡ್ವಾನ ಘರಾಕ ತೆದುಸುಕ ಜಾವಕಾ ಜಾಲೆಲೆ ಸಾಮಾನ ಹಾಡಚೆ ಆಶಿಲೆಂ. ತಾಗೆಲಿ ಪ್ರತಿ ದಿಸಾಚಿ ಕಮಾಯಿ ತೆ ದಿವಸಾಚೆ ಸಾಮಾನಾಂಕ ಮಾತ್ರ ಪುರೊ ಜಾತ್ತಾಲೆ. ಹಾತಾಂತ ಕಾಂಯ ವರನಾತಿಲೆ ನಿಮತಿ ಕಸಲೇ ಚಾಂಗ ಖಾಣ ಕರ್ನ ಖಾವಚಾಕ ಮಸ್ತ ಕಷ್ಟ ಜಾತಾಲೆ.
ಏಕ ದಿವಸ ವಾಸ್ತೇವಾನ ಕಾಮಾಕ ಗೆಲೆಲೆ ಘರಕಡೆ ಚಾಂಗ ಖಾಣಾಚೊ ಪರಮಳು ಆಯಿಲ್ಯಾಕ ತಾಣೆ ತೆ ಘರಕಡಚಾಲಿ ಬಾಯಲ ಲಾಗಿ ತೆ ಕಸಲೆ ಖಾಣ ಮ್ಹಣ ನಿಮಗಿಲೆ. ತಾಕಾ "ಆಜಿ ಆಮಗೆಲೆ ಘರಕಡೆ ಚಕ್ಕುಲಿ ಕೆಲಾ. ತಾಜೊ ಪರಮಳು ತೊ" ಮ್ಹಣಾಲಿತಿ. ಆನಿ ಏಕ ಚಕ್ಕುಲಿ ಕಾಣ ತಾಕಾಯಿ ದಿಲ್ಲಿ. ವಾಸ್ತೇವಾಕ ತಿ ಚಕ್ಕುಲಿ ಖಾವ್ನು ರುಚೀ ಲಾಗಲಿ. ತಸಲೆಂಚಿ ಚಾಂಗ ಖಾಣ ಘರಕಡೆ ಬಾಯಲ ಶ್ರೀದೇವಿಲಾಗಿ ಸಾಂಗುವ್ನ ಕರವ್ನ ಖಾವಕಾ ಮ್ಹಣ ಚಿಂತುನು ಘರಕಡೆ ವತಾ.
ಅಶೀ ಆಸತನಾ ಏಕ ದಿವಸ ವಾಸ್ತೇವಾಕ ಚಾಕುಲಿ ಖಾವ್ಕಾ ಮ್ಹಣ ಆಸೆನ ಶ್ರೀದೇವಿಲಾಗಿ ಚಾಕುಲಿ ಕರಿ ಮ್ಹಣಾಲೊ. ಘರಾಂತು ಚಾಕುಲಿ ಕರಚಾಕ ಜಾವಕಾ ಜಾಲೆಲೆ ಸಾಮಾನ ನಾ ಜಾಲಯಾರಿ ಶ್ರೀದೇವಿ ಚಾಕುಲಿ ಕಶಿ ಕರತಲಿ? ತಿ ಭಾಮ್ಹಣಾಂಕ "ತುಮ್ಹಿ ಚಾಕುಲಿಕ ಜಾವಕಾ ಜಾಲೆಲೆ ಸಾಮಾನ ಹಾಣ ದಿಲಯಾರಿ ಹಾಂವ ಕರತಾ." ಮ್ಹಣಾಲಿ. ವಾಸ್ತೇವ "ತಶಿ ಜಾಲಯಾರಿ ಕಸಲೆ ಸಾಮಾನ ಜಾಯಿ ಮ್ಹಣ ಸಾಂಗ. ಹಾಂವ ಚೀಟಿ ಕರತಾ." ಮ್ಹಣಾಲೊ. ಶ್ರೀದೇವಿನ ಚಾಕುಲಿ ಕರಚಾಕ ಜಾವಕಾ ಜಾಲೆಲೆ ಜೀನಸ ಸಾಂಗಲೆ.
ತಶಿ ವಾಸ್ತೇವು ಜೀನಸ ಹಾಡುಕ ಮ್ಹಣ ಮಾತ್ಯಾಕ ಹೋಡ ಮುಂಡಾಸ ಬಾಂದುನು ಭಿತವಯಲ್ಯಾನ ಮೆಣ ಲಾಯಿಲೆ ದೋನಿ ಸನ್ಚ ಚೀಲಂ, ಆನಿ ಏಕಿ ಬಾಲ್ದಿ ಘೆವ್ನ ಪೆಂಟಾಕ ವತಾ. ತೀನಿ ಮಾರ್ಗ ಮೆಳಚೆ ಕಡೆನ ಆಸುಚೆ ಏಕ ದುಕಾನಾಕ ವಚನು "ಚಾಂಗ ಸುರೈ ತಾಂದೂಲ ಆಸವೆ?" ಮ್ಹಣ ನಿಮ್ಗುನ ಏಕ ಸೇರು ಸುರೈ ತಾಂದೂಲ ಚಿಲ್ಲಾಂತು "ಗಾಲಿ" ಮ್ಹಣಾಲೊ. ತಾನಿ ಚಿಲಾಂತು ಘಾಲ್ತರಿ "ಮೋಲ ಕಶೀ" ಮ್ಹಣಾಲೊ. ಮೋಲ ಸಾಂಗ್ತರಿ "ಮ್ಹಾರಗ ಜಾಲೆ ನಾಕಾ" ಮ್ಹಣ ತಾಂಗೆಲೆ ಗೋಣಿಂತೂಚಿ ರಕಯತಾ.
ಥಂಯಿ ದಾಕುನ ಆನೀಕ ದುಕಾನ ವತ್ತಾ. "ಉಡಿದದಾಳಿ ದೀ" ಮ್ಹಣಾಲೊ. ತಾನ್ನಿಯಿ ತಶಿಂಚಿ ಚಿಲಾಂತು ಘಾಲತರಿ "ಮ್ಹಾರಗ" ಮ್ಹಣ ಸಾಂಗುನ ತಾಂಗೆಲೇಚಿ ಗೋಣಿ ಚಿಲಾಂತ ಘಾಲ್ತಾ.
ತಸ್ಸಿಂಚಿ ಥಂಯಿಚಿ ಲಾಗಿಚೆ ದುಕಾನಾ ವಚುನ "ಚಾಂಗ ತೇಲ ಆಸವೆ?" ಮ್ಹಣ ನಿಮಗಿತನಾ ಧನಿ ದುಕಾನಾ ಕಾಮಾಚಾಕ "ಹಾಕಾ ಚಾಂಗ ತೇಲ ದಾಕಯಿ" ಮ್ಹಣಾಲೊ. ತೆಲ್ಲಾ ಆಯದನಾಚೆ ತೊಗುಚಾನ ದವರಚೆ ಧಾಂಕಣೆ ನಾತಿಲೆ ಡಬ್ಯಾಂತ ಹಾತ ಘಾಲ್ನು ಬಾಗ್ಸುನು ಹುಂಗತಾ. ತೆದನಾ ಮಾತ್ಯಾಂ ಆಶಿಲೊ ಮುಂಡಾಸ ತಾಂತು ಪಾಡಯಿತಾ. "ಅಯಯ್ಯೊ, ಮೆಗೆಲೊ ಮುಂಡಾಸ ಗೆಲೊ?" ಮ್ಹಣ ಸಾಂಗುನ ತೊ ಕಾಣ ಬಾಲ್ದಿಂತ ಘಾಲ್ನ ಘರಕಡೆ ವತಾ.
ಘರಕಡೆ ವತರಿ ಬಾಯಲೇಕ ಗೆರಶಿ ಹಾಡುಕ ಸಾಂಗುನ ತಾಂತು ತಾಣೆ ಪೆಂಟಾಕ ವತನಾ ವ್ಹೆಲೆಲೆ ಚೀಲ ಉಲಪಾಟೆ ಕರ್ನ ಫಾಪುಡತಾ. ಗೆರ್ಸೆಂತ ಸುರೈ ತಾಂದುಲ ಆನಿ ಉಡ್ದಾದಾಳಿ ಪಡತಾ. ಬಾಲ್ದಿಂತ ತಾಗೆಲೊ ಮುಂಡಾಸ ಪಿಳತಾ. ತೆದನಾ ಮುಂಡಾಸಾಂತುಲ್ಯಾನ ತೇಲ ದೆಂವತಾ. ಹೆ ನಮೂನೆರಿ ಚಾಕುಲಿಕ ಜಾವಕಾ ಜಾಲೆಲೊ ಸಾಮಾನ ಹಾಡತಾ. ಆನಿ ಬಾಯಲೆ ಲಾಗಿ ಚೆರ್ಡುಂವಾನ ನಿದಲೆಲೆ ವೇಳಾರಿ ಚಾಕುಲಿ ಕರ್ನ ಸಕಡ ಮಾಕಾಚಿ ದವರಿ ಮ್ಹಣ ಸಾಂಗುವ್ನ ಪೆಂಟಾಕ ವತಾ.
ತಶಿಂಚಿ ಶ್ರೀದೇವಿ ಚೆರ್ಡುಂವಾನ ನಿದಲೆಲೆ ವೇಳಾರಿ ಚಾಕುಲಿ ಕರುಚಾಕ ಬಸತಾ. ಥೊಡೆ ವೇಳಾನಿಚಿ ಸುರುವೆಚಿ ಚೆಲ್ಲಿ ಶ್ರೀಮತಿ ನ್ಹಾಣೆಯೆಕ ವಚುಕಾ ಮ್ಹಣ ಉಟಾಯತಾ. ಆವಯ ಕಸಲ ಕರಚಾಕ ಬಸಲ್ಯಾ ಮ್ಹಣ ಪಳೊವಚಾಕ ವಾಸರಿಂತ ಯೆತಾ. ತೀಣೆ ಆಯಿಲೆ ಪಳವ್ನ ಆವ್ಸುಕ ನಿಪೊಚಾಕ ಜಾಯನಿ. ಕೆದನಾಂಯ ಆವ್ಸು ತಿಕಾ ನಾ ಜಾಲಯಾರಿ ಚೆರ್ಡುಂವಾಂಕ ಖಾವಚಾಕ ಉಣೆ ಕರ್ನಾಶಿಲಿ. ತಶಿಂಚಿ ಏಕ ಚಾಕುಲಿ ಕಾಂಣ ತಿಕಾ ದಿತಾ ಆನಿ `ಕೊಣಾಕಂಯ ಸಾಂಗುನಾಕಾ, ಹಾಂಗಾಚಿ ಖಾ.' ಮ್ಹಣತಾ.
ಶ್ರೀಮತಿ ನ್ಹಾಣ್ಯೆಕ ವಚುನು ಆಯಲಿ ಆನಿ ಚಾಕುಲಿ ಘೆವ್ನ ತಿಗೆಲೆ ಜಾಗಯಾರಿ ನಿದೊನು ವಲಿ ಮಾತ್ಯಾರಿತಾಂಯ ಪಾಂಗುರ್ನ ಖಾವಚಾಕ ಸುರುಕೆಲೆ. ಚಾಕುಲಿ ಹೂನಿಚಿ ಆಶಿಲೆ ನಿಮತಿ ತಿಕಾ ವಗಿ ವಗಿ ಖಾವಚಾಕ ಜಾಯನಿ. ತೆದನಾ ತಿಗೆಲೆ ಮನಾಂತ `ಹಾಂವೆ ಮಾತ್ರ ಚಾಕುಲಿ ಖಾವಚೆವೆ? ಸುಮತಿಕಯ ವಾಸರಿಕ ಧಾಡಯಾ.' ಮ್ಹಣ ಚಿಂತುನ ತಿ ಹೂನೀಚಿ ಚಾಕುಲಿ ಸುಮತಿಲೆ ಗಾಂಡಿಕ ಲಾಗಯಿತಾ. ತೆದನಾ ಸುಮತಿಕ ಜಾಗರ ಜಾಲೊ. ನೀದಾಚೆ ದೊಳ್ಯಾನಂಚಿ ಶ್ರೀಮತಿಕ ಜೋರ ಕರಚಾಕ ಮ್ಹಣ ತಿಗೆಲೆ ದಿಕಡೆ ಘುಂವತನಾ ಚಾಕುಲಿಚೊ ಪರಮಳು ಆಯಿಲೊ. `ಕಸಲೆ ಶ್ರೀಮತಿ, ತುವೆ ಮೆಗೆಲೆ ಗಾಂಡಿಕ ಹೂನಂಚಿ ಲಾಗಯಿಲೆಲೆ. ಕಸ್ಸಲ್ಯಾಚೊಕಿ ಪರಮಳು ಯೆತ ಆಸಾ ನ್ಹಂವೆ? ತು ಕಸಲೆ ಖಾತಾ?' ಮ್ಹಣ ನಿಮಗುಚಾಕ ಸುರುಕೆಲೆ.
ತೆದನಾ ಶ್ರೀಮತಿ ಮ್ಹಣಾಲಿ `ಲ್ಹಾನ ಸ್ವರಾರಿ ಉಲಯಿಗೊ ಸುಮತಿ, ಬಾಕಿಚಾಂಕ ಜಾಗರ ಜಾಯತ. ಭಿತರಿ ವಾಸರಿಂತ ಆವಯ ಚಾಕುಲಿ ಕರತ ಆಸಾ. ಹಾಂವ ನ್ಹಾಣ್ಯೆಕ ಮ್ಹಣ ವತನಾ ಮಾಕಾ ಕಳ್ಳೆಂ. ಕೊಣಾಕಂಯ ಸಾಂಗನಾಶಿ ಖಾ ಮ್ಹಣ ಮಾಕಾ ಏಕ ಚಾಕುಲಿ ದಿಲಾ. ಚಾಕುಲಿ ಖಾತನಾ ತುಗೆಲೊ ಉಗಡಾಸ ಆಯಿಲೆ ನಿಮತಿ ತುಕಾ ಜಾಗಯಿಲಿ. ವಸ. ತುಕಾಯಿ ದಿತಲಿ ಆಮ್ಮಾ.' ಮ್ಹಣಾಲಿ.
ಸುಮತಿ ವಾಸರಿಂತ ವಚುನು ಚಾಕುಲಿ ಘೆವ್ನು ಆಯಲಿ ಆನಿ ತಿಣೆಯಿ ಶ್ರೀಮತಿನ ಕೆಲಯಾವರೀಚಿ ಗೋಮತಿಲೆ ಗಾಂಡಿಕ ಹೂನೀಚಿ ಚಾಕುಲಿ ಲಾಗೊನು ತಿಕಾಯಿ ವಾಸರಿಂತ ಧಾಡಲಿ. ಅಶಿಂಚಿ ಥೋಡೆ ವೇಳಾನಿ ಸಾತ ಜನಂಯ ವಾಸರಿಕ ವಚುನು ಚಾಕುಲಿ ಘೆವ್ನು ಖಾಲೆ.
ವಾಸ್ತೇವಾನ ಪೆಂಟಾದಾಕುನ ಯೆತನಾ ಕೆಲಲಿ ಚಾಕುಲಿ ಸಕಡ ಚೆರ್ಡುಂವಾನ ಖಾಲಯಾ ಮ್ಹಣ ಕಳ್ನ ರಾಗಾನ (ಕೋಪಾನ) ಸಾತ ಜನ ಚೆರ್ಡುಂವಾಂಕಯ ಘೆವ್ನ ರಾನ್ನಾಂಕ ವತಾ. ಥಂಯಿ ತಾಂಕಾ ಸೊಣ ವಾಪಾಸ ಪೆಂಟಾಕ ವಚುನು ಚಾಕುಲಿಕ ಜಾವಕಾ ಜಾಲೆಲೆ ಸಾಮಾನ ಘೆವ್ನ ಘರಕಡೆ ಯೆತಾ ಆನಿ ಬಾಯಿಲ ಶ್ರೀದೇವಿಕ ಸಾಂಗುನು ಚಾಕುಲಿ ಕರಯತಾ. ತೀಣೆ ಚಾಕುಲಿ ಕರತನಾ ಎದ್ರಾಕಚಿ ಬಸತಾ. ಇತ್ಯಾಕ ಮ್ಹಳಯಾರಿ ಸುರುವೆಚೆ ಪಟಿ ಕರತನಾ ಚೆರ್ಡುಂವಾನ ಖಾವ್ನ ತಾಕಾ ಮೆಳನಿ. ಆತಾಂ ಬಾಯಿಲೆನ ಖಾಲಯಾರಿ ತಾಕಾ ಖಾವ್ಚಾಕ ಮ್ಹೆಳನಾ ನ್ಹಂವೆ? ಹೆ ಪಟಿ ತಾಣೆ ದಿನಸ ಸಕಡ ಉಶಿಣೆ ಹಾಳೆಲೆ. ವಾಪಾಸ ತಾಜೊ ದುಡು ದಿನಾಶಿ ಕಶಿ ಹಾಡಚೆ. ಮ್ಹಣ ಚಿಂತುನ ಥಂಯಿಚಿ ಬಯಸುನು ಚಾಕುಲಿ ಕರವ್ನ ಖಾತಾ.
ನಂತರ ಚೆರ್ಡುಂವಾಂಕ ಹಾಡಚೆ ಕಾತಿರ ರಾನ್ನಾಕ ವತ್ತಾ. ರಾನ್ನಾಂತ ಖಂಯ ಸೊದಿಲಯಾರೀ ಚೆರ್ಡುಂವ ದಿಸನಾಂಚಿ. "ಮೆಗೆಲೆ ಚಾಕುಲಿಚೆ ಆಸೆಕ ಚೆರ್ಡುಂವಾಂಕ ಕಳವುನು ಘೆತಲೆ ನ್ಹಂವೆ? ಆನಿ ಆಮಿ ವಾಂಚುನ ಕಸಲೆ ಸಾರ್ಥಕ." ಮ್ಹಣ ರಡತಚಿ ಘರಕಡೆ ಯೆತಾ ಆನಿ ಬಾಯಿಲ ಶ್ರೀದೇವಿಲಾಗಿ ವಿಷಯು ಸಾಂಗತಾ. ತಶಿಂಚಿ ಥೋಡೆ ದೀಸಾನಿ ಚೆರ್ಡುಂವಾಲೆ ಖಂಥೆರಿ ದೊಗಯ ಹುಶಾರ ನಾತಿಲೆ ಪಡತಾಂಚಿ ಆನಿ ಮರತಾಂಚಿ.
ಹಾಂಗಾ ವಾಸ್ತೇವಾನ ರಾನ್ನಾಂತ ಸೊಣ ವತರಿ ಚೆರ್ಡುಂವ ಕಸಲೆ ಕರಚೆ ಮ್ಹಣ ಚಿಂತುನ ರಾನ್ನಾಂತ ಭೊಂವತಾಚಿ. ರಾನಾಚೆ ಭಿತರಿ ವತನಾ ತಾಂಕಾ ಥಂಯಿ ಏಕ ಹೋಡ ಪಾಡಾರಿ ಪಳ್ಳಲೆ ರಾವ್ಳಾರ (ಅರಮನೆ) ದಿಸತಾ. ತೆ ಪಳವ್ನ ಭಿತರಿ ವತಾತಿ. ಥಂಯಿ ಕೊಣಯ ದಿಸನಾಂಚಿ. ಸಾತ ಜನ ಚಲ್ಯೊ ತೆ ಸಗಳೆ ರಾವ್ಳಾರಾಂತು ಭೊಂವತಾಚಿ. ತಾಂತ ಚಂದ ಚಂದ ಕುಡ ಆಶಿಲಿಂಚಿ. ಸುರುವೆಚೆ ಸ ಜನ ಚಲ್ಯೊ ಚಂದ ಚಂದ ಆಶಿಲೆ ಕುಡಾಂತು ರಿಗಲಿಂಚಿ. ಸಾತಾಚಿ ಚೆಲಿ ಕುರ್ಕುಳಾಕ ಚಂದ ಆಶಿಲೆ ಕುಡ ಮ್ಹೆಳನಿ. ಥಂಯಿ ಆಸುಚೆ ಸಾತಾಚೆ ಕುಡಾಂತು ಕುಂಡೊ ಭರಲಲೊ.
ಸುರುವೆಚೆ ಸ ಜನ ಚಲ್ಯೊ ತಾನಿ ರಿಗಿಲೆ ಕುಡಾಂತ ಆಸುಚೆ ಸಕಡ ಘಾಲ್ನ ತಕ್ತಕಿಚಿ ಶ್ರಂಗಾರ ಕರ್ನ ಘೆತ್ತಾಂಚಿ. ಶ್ರಂಗಾರ ಜಾತರಿ ಕಸಲೆ ಕರಚೆ ಮ್ಹಣ ಆಲೋಚನಾ ಕರತನಾ ತಾನಿ ಆಸುಚೆ ರಾವ್ಳಾರ ಕುಂದಾಪುರ ಮ್ಹಳಲೆ ಗಾಂವಾಂಚೆ ಲಾಗಿ ಆಸುನು ಥಂಯಿ ಆತಾಂ ತೇರು ಚಲತ ಆಸ ಮ್ಹಣ ಕಳ್ಳೆ. ಸ ಜನ ಚಲ್ಯೊ ಮ್ಹಳಯಾರಿ ಶ್ರೀಮತಿ, ಸುಮತಿ, ಗೋಮತಿ, ತಾರಾಮತಿ, ಚಂದ್ರಮತಿ ಆನಿ ಮಧುಮತಿ ಹಾನ್ನಿ ಸಾತಾಚಿ ಇಂದುಮತಿಕ ತೆ ಕುಂಡ್ಯಾಚೆ ಕುಡಾಂತ ಲೊಕೋನ ತಾನ್ನಿ ಕುಂದಾಪುರ ತೇರಾಕ ಘೆಲಿಂತಿ.
ಕುಂಡ್ಯಾಚೆ ಕುಡಾಂತ ಆಶಿಲಿ ಇಂದುಮತಿಕ ರೊಡುಂಕ ಆಯಿಲೆ. ಮೆಗೆಲೆ ನಸಿಬಾಂತ ಹೇಚಿ ಆಸಾ ದಿಸತಾ ಮ್ಹಣ ಕುರ್ಕುಳ ರಡ್ತಚಿ ತಿ ತೆ ಕುಡಾಂತು ಕಸಲೆ ಆಸಾ ಮ್ಹಣ ಪಳೊವಚಾಕ ವತನಾ ಥಂಯಿ ಏಕಿ ಹೋಡ ರುಕಾಚೊ ಪೆಟಾರೊ ಆಶಿಲೊ. ತಾಜೆ ದಾಂಕಣೆ ಕಾಣ ಪಳಯತಾ. ತಾಂತ ಮಸ್ತ ಭಾಂಗರಾಚೆ ನಗ, ವಸ್ತ್ರ ಆಶಿಲೆ ಪಳೊವ್ನು ಇಂದುಮತಿಕ ಖುಶಿ ಜಾವ್ನ ಸಂತೋಷಾನ ಹಾಸೊ ಆಯಲೊ. ಕುರ್ಕುಳ ಚಂದ ಕರ್ನ ತಾಂತು ಕಸ್ಕಸಲೆ ಭಾಂಗರಾಚೊ ನಗ ಆಸಾ ಮ್ಹಣ ಪಳಯಲೆ. ತಾಂತುಲೆ ತಿಕಾ ಜಾವಕಾ ಜಾಲೆಲೆ ಸಕಡ ನಗ ಘಾಲ್ನ ಘೆತಲೆ. ಭಾಂಗರಾಚೊ ತೀಳೊ, ಹಾತಾಕ ಭರಿ ಕಾಂಗಣ, ಮೊತ್ಯಾಂಚೊ ಹಾರ ಘಾಲ್ನು, ಚಾಂಗ ಪಾಟ್ಟ್ಯಾಚೆ ಕಾಪ್ಪಡ ಚಂದ ಕರ್ನು ನೆಸ್ಲಿ. ಆನಿ ಥಂಯಿಂಚಿ ಆಶಿಲೆ ಆರ್ಶಾಂತ ಪಳಯಿತನಾ ತಿಕಾಚಿ ತಿಗೆಲೊ ವಳಕ ಮ್ಹೆಳನಿ. ಮ್ಹಳಯಾರಿ ತಿ ತಿತಲಿ ಚಂದಿ ದಿಸತಲಿ.
ತಿಗೆಲೆ ಸ ಜನ ಆಕ್ಕಾ ಕುಂದಾಪುರ ತೇರಾಕ ಚಮಕಲಾಂಚಿ ಮ್ಹಣ ತಿಕಾ ಕಳ್ನ ಆಶಿಲೆ. ಜಾಲಯಾರಿ ಥಂಯ್ಕ ಕಶಿ ವಚ್ಚೆ ಮ್ಹಣ ಚಿಂತುನ ಬಸತನಾ ತಿಕಾ ತೆ ಪೆಟಾರಾಂತ ಏಕ ಭಾಂಗರಾಚೊ ಮೋರು ಆಶಿಲೊ ಉಗಡಾಸಾಕ ಆಯಿಲೊ ಆನಿ ತಿಣೆ ತೊ ಕಾಣ ಪಳಯಲೊ. ತಾಜೆ ಪೋಟಾಕ ಏಕು ಒಟ್ಟೊ ಆಶಿಲೊ. ತಾಂತು ಏಕ ಕಾಗದ ಆಶಿಲೆ. ತಾಜೆರಿ ಹೆ ಮೋರಾಚೆ ಮಾತ್ಯಾರಿ ಆಸ್ಸುಚಿ ಶೆಂಡಿ ಧೊರ್ನ ತಿರ್ಪುನ್
`ಯೆತೆ, ಯೆತೆ ಬಯಸರೆ ಮೋರಾ,
ಚಾರು ಖಾವ್ನು, ಬುರು ಖಾವ್ನು,
ಬುರ್ಕುಳ್ಯಾಂತುಲೆ ಪಾನಿ ಪಿವ್ನು...............ಬುರ್ ಕರ್ನ ವಚಾ.
ಹಾಂಗಾ ಖಾಲಿ ಸೊಳ್ಳೆಲೆ ಜಾಗಯಾರಿ ತುಮಕಾ ವಚುಕಾ ಜಾಲೆಲೆ ಜಾಗಯಾಚೆ ನ್ಹಾಂವ ಘಾಲ್ನ ಮ್ಹಳಯಾರಿ ತುಮ್ಕಾ ತತ್ಕಾಲ ತೆ ಜಾಗ್ಯಾಕ ವರತಾ' ಮ್ಹೊಣ ಬರೊವ್ನು ಆಶಿಲೆ.
ಇಂದುಮತಿನ ತೆ ಪೆಟಾರಾಂತುಲೆ ಮೊತ್ಯೊ ಏಕ ಚಿಲಾಂತ ಘಾಲ್ನ ದರಲೆ, ಆನಿ ತೆ ಭಾಂಗರಾಚೆ ಮೋರಾರಿ ಬಯಸುನು
"ಯೆತೆ, ಯೆತೆ ಬಯಸರೆ ಮೋರಾ,
ಚಾರು ಖಾವ್ನು, ಬುರು ಖಾವ್ನು,
ಬುರ್ಕುಳ್ಯಾಂತುಲೆ ಪಾನಿ ಪಿವ್ನ ಕುಂದಾಪುರ್ ತೇರಾಕ ಬುರ್ ಕರ್ನ ವಚಾ." ಮ್ಹಣಾಲಿ.
ತೆದನಾ ಮೋರ ತಿಕಾ ಕುಂದಾಪುರ್ ತೇರಾಕ ಘೆವ್ನ ಗೆಲೊ.
ಥಂಯ ಇಂದುಮತಿ ಮೋರಾರಿಚಿ ಬಯಸುನು ವಯರಿ ಉಬತಚಿ ತೀಣೆ ಹಾಳ್ಳೆಲೆ ಮೊತ್ಯೊ ತೊಗು ಸಿಂಪ್ಡಾಯಿತಾ. ತೆ ವೆಂಚುಚಾಕ ಜನ ಸಕಡ ಗಲಾಟೊ ಕರತಾತಿ. ತಾಂತ ತಿಗೆಲೆ ಸ ಜನ ಭಯಣ್ಯೊ ಆಶಿಲಿಂಚಿ. ಮೋರಾರಿ ಬಯಸುನು ಆಯಿಲೇಕ ಪಳವ್ನ ತಾಂಕಾ ಕುರ್ಕುಳಾಲೊ ಉಗಡಾಸು ಯೆತಾ.
`ಹಿ ಆಮಗೆಲಿ ಕುಂಡ್ಯಾ ಕುರ್ಕುಳಶಿ ಆಸ ನ್ಹಂವೆ? ಕುರ್ಕುಳ ಕುಂಡ್ಯಾಚೆ ಕುಡಾಂತ ಆಶಿಲಿ ಹಾಂಗಾ ಕಶಿ ಆಯಿಲಿ? ಹಿ ಕೊಣಕಿ ರಾಜಕುಮಾರಿ ಜಾವ್ನ ಆಸ್ಸುಕಾ.' ಮ್ಹಣ ಉಲೊವ್ನ ಘೆತಾಂಚಿ.
(ಕುರ್ಕುಳ ಆಸಿಲಿ ಆನಿ ಮುಖಾರಿ ಕುಂಡ್ಯಾಚೆ ಕುಡಾಂತು ಆಸಿಲಿ ನಿಮತಿ ತಿಕಾ ತಿಗೆಲೆ ಸ ಜನ ಭಯಣ್ಯೊ ಕುಂಡ್ಯಾ ಕುರ್ಕುಳ ಮ್ಹಣ ಆಪಯಿತಾಂಚಿ.)ತಶಿಂಚಿ ಕುರ್ಕುಳ ತೇರಾಕ ಘೆಲಿಲಿ ಭೊಂವ್ನ ತಿಗೆಲೆ ಭಯಣ್ಯಾನಿ ಯೆವಚೆ ಪಯಲೇಂಚಿ ತೆ ರಾವ್ಳಾರಾಕ ಯೆತಾ ಆನಿ ಘಾಲ್ಲೆಲೆ ಭಾಂಗರಾಚೆ ನಗ, ಕಾಪ್ಪಡ ಸಕಡ ಮೆಕೊಳ್ನ ಬಸತಾ.
ಸ ಜನ ಭಯಣ್ಯೊ ಯೆತಾಂಚಿ. ಕುಂದಾಪುರ್ ತೇರಾಚಿ ಗಮ್ಮತ್ ಸಕಡ ಉಲಯಿತಾಂಚಿ. ತೆದನಾ ತಾಂಕಾ ಕುರ್ಕುಳಾಲೊ ಉಗಡಾಸು ಯೆವ್ನ ಕುಂಡ್ಯಾಚೆ ಕುಡಾಲಾಗಿ ಯೆತಾಂಚಿ. ಥಂಯಿ ಕುರ್ಕುಳ ಬಯ್ಸುನು ಆಶಿಲಿ. ತಿಕಾ ಜಾಳ ಯೆವಚೆ ಖಾತಿರ ಕುಂದಾಪುರ್ ತೇರಾ ವೇಳಾರಿ ಮೋರಾರಿ ಬಯಸುನ ಆಯಿಲಿ ರಾಜಕುಮಾರಿಲೆ ಚಂದಾಯೆಚಿ ವರಣನಾ ಕರ್ನ ತಿಣೆ ಸಿಂಪಡಾಯಿಲೆ ಮೊತ್ಯೊ ತಿಕಾ ದಾಕಯಿತಾಚಿ.
ತೆದನಾ ತಾನಿ ತಿಗೆಲೆ ನಿಡಲಾರಿ ಭಾಂಗರಾಚೊ ತೀಳೊ ಪಳಯಿಲೊ. ತಾಂಕಾ ಆಶ್ಚರ್ಯ ಜಾಲೆ. "ತುಗೆಲೆ ನಿಡಲಾರಿ ಭಾಂಗರಾಚೊ ತೀಳೊ ಖಂಚೊ?" ಮ್ಹಣ ನಿಮಗಿತಾಂಚಿ.
ಇಂದುಮತಿಕ `ಹಾಂವೆ ತೀಳೊ ಕಾಡುಕ ವಿಸರಲಿ ನ್ಹಂವೆ? ಹಾಂಕಾ ಆತ ಕಸಲೆ ಜಾವೊ ಫಟ್ಟಿ ಸಾಂಗುನು ಬಚಾವ್ ಜಾವಕಾ.' ಮ್ಹಣ ಮನಾಂತೂಚಿ ಚಿಂತುನ "ತೀಳೊ ಭಾಂಗರಾಚೆ ನಮೂನೆಚೊ ಜಾವಕಾ ಜಾಲಯಾರಿ ಕಾರ್ಯಾ ರುಕಾಚೆ ಕಾಂಟ್ಯಾನಿ ನಿಡಲಾರಿ ಕೊಚ್ಚಾನ ಘೆವಕಾ. ಆನಿ ಸಾತ ದಿವಸ ಸೇಣ ಲಾವ್ನ ಸೊಳಯಾರಿ ನಂತರ ಭಾಂಗರಾಚೊ ಸೊ ದಿಸತಾ." ಮ್ಹಣಾಲಿ.
ತಿಗೆಲೆ ಸ ಜನ ಭಯಣ್ಯಾನಿ ಚಂದ ನಾತಿಲೆ ಕುರ್ಕುಳಾಕ ಭಾಂಗರಾಚೊ ಸೊ ತೀಳೊ ಆಸಾ. ಆಮ್ಕಾಯಿ ತಶಿಂಚಿ ಜಾವಕಾ ಮ್ಹಣ ತೀಣೆ ಸಾಂಗಿಲ್ಯಾವರೀಚಿ ಕಾರ್ಯಾ ರುಕಾಚೆ ಕಾಂಟ್ಯಾನಿ ನಿಡಲ ಕೊಚ್ಚಾನ ಸೇಣ ಲಾವ್ನ ಸಾತ ದಿವಸ ಸೊಳ್ಳೆಂ. ಸಾತ ದಿವಸ ಜಾತನಾ ತಾಂಗೆಲೆ ನಿಡಲಾರಿ ತೀಳೊ ಆಸುಚೊ ಜಾಗೊ ಕುಸುನು, ಕಿಡೆ ಜಾವ್ನ, ನಂತರ ತಾಂಗೆಲೆ ದೋಳೆ ವಚುನು ಕುರ್ಡೆ ಜಾತಾಂಚಿ. ನಂತರ ಥೋಡೆ ದಿಸಾನಿ ಸ ಜನಂಯಿ ಮರತಾಂಚಿ.
ಅಶಿಂಚಿ ಆಸತನಾ ಥೋಡೆ ದಿಸಾನಿ ಏಕು ಸುಂದರ ಚೆಲ್ಲೊ ತೆ ಘರಕಡೆ ಯೆತಾ. ಥಂಯಿ ಏಕಿ ಶೋಬಿತ ಚೆಲ್ಲಿ ಅಶಿಲಿ ಪಳವ್ನ "ತು ಕೊಂಣ? ಹಾಂಗಾ ಕಶಿ ಆಯಲಿ?" ಮ್ಹೊಣ ನಿಮಗಿತಾ. ತೆದನಾ ಇಂದುಮತಿ ಜಾಲೆಲೆ ವಿಷಯ ಸಕಡ ತಾಗೆಲಾಗಿ ಸಾಂಗತಾ. ತಾಕಾ ತೊ "ಹಾಂವ ಹೆ ರಾವ್ಳಾರಾಚೆ ರಾಯಾಲೊ ಪುತು. ಹೆ ರಾವ್ಳಾರಾ ಪಾಡಾರಿ ಪಳೆಲೆ ಖಾತಿರ ಆಮ್ಹಿ ಆತ ನಂವೆಂಚಿ ಬಾಂದಲಾ. ತೆ ಸುಮಾರ ದೂರ ಆಸಾ. ಹಾಂವೆ ತಾತಾವಳಿ ಹಾಂಗ ಯೆವ್ನ ಪಳೊವಚಾಕ ಆಸಾ. ತಸ್ಸಿಂಚಿ ಆಜಿ ಆಯಿಲೊ. ತುಕಾ ಪಳಯಿಲೆ. ತು ಮ್ಹಾಕಾ ವ್ಹಾರ್ಡಿಕ ಕರ್ನ ಘೆತವೆ? ತುಕಾ ಮೆಗೆಲೆ ಆನ್ನಾಲೆ ಘರಕಡೆ ವ್ಹರ್ನ ತಾಂಗೆಲಿ ಕಬೂಲಿ ಘೆವ್ನ ವ್ಹಾರ್ಡಿಕ ಕರ್ನ ಘೆತಾ. ಜಾಯ್ತವೆ?" ಮ್ಹಣಾಲೊ.
ಇಂದುಮತಿಕ ಮಸ್ತ ಖುಶಿ ಜಾತಾ. `ಯೆದೊಳತಾಂಯಿ ಹಾಂವ ಕೊಣಾಕಂಯಿ ನಾಕಾ ಆಶಿಲಿ. ಹೊ ಮ್ಹಾಕಾ ವ್ಹಾರ್ಡಿಕ ಕರ್ನ ಘೆತಾ ಮ್ಹಣತಾ. ಹಾಂವೆ ನಾಕಾ ಮ್ಹಳಯಾರಿ ಮೆಗೆಲ್ ತಸಲಿ ಪಿಶಿ ಕೊಣಯ ಆಸತವೆ?' ಮ್ಹಣ ಚಿಂತುನ ತಿಗೆಲಿ ಕಬೂಲಿ ದಿತಾ.
ತಸಿಂಚಿ ತೊ ರಾಜಕುಮಾರ ತಿಕಾ ತಾಗೆಲೆ ಗಾಂವಾಂಕ ವ್ಹರ್ನ ರಾಯಾಲಿ (ತಾಗೆಲೆ ಆನ್ನಾಲಿ)ಕಬೂಲಿ ಘೆವ್ನ ತಿಕಾ ವ್ಹಾರ್ಡಿಕ ಕರ್ನ ಘೆತಾ. ನಂತರ ತಾನಿ ಸುಖಾರಿ ಆಸತಾಂಚಿ.
ರಾಯಾನ ಮರತರಿ ತೋಚಿ ರಾಯ ಜಾತಾ ಆನಿ ಇಂದುಮತಿ (ಕುಂಡ್ಯಾ ಕುರ್ಕುಳ) ರಾಣಿ ಜಾತಾ.
ಹೆ ಕಾಂಣಿಂತು `ಅದೃಷ್ಟ ಆಸಲ್ಯಾರಿ ಚಾಂಗ ಜಾತಾ' ಮ್ಹಳಲೊ ವಿಷಯು ಆಮಗೆಲೆ ಕಳಿತಾಕ ಯೆತಾ.
---೦೦೦---
ಹೀ ಕಾಂಣಿ ಆಮ್ಕಾ ಆಮ್ಮಾನ ಸಾಂಗಿಲಿ. ಅಸ್ಸಲಿಂಚಿ ಏಕಿ ಕಾಂಣಿ ಸಂತೋಷಕುಮಾರ ಗುಲ್ವಾಡಿ ಹಾನ್ನಿ ಸಂಗ್ರಹ ಆನಿ ಪ್ರಗಟ ಕೆಲ್ಲೆಲೆ ಕುಂಡ್ಯಾ ಕುರ್ಕುಳ ಮ್ಹಳ್ಳಲೆ ಪುಸ್ತಕಾರಿ ಆಸ್ಸ. ತಿ ಮಾತ್ರ ವೆಗಳೆ ರೀತಿರಿ ಸಮಾಪ್ತ ಜಾತ್ತಾ. ತಿವಯಿ ಕಾಂಣಿ ಆಖೈರಿಕ ದಿಲ್ಲಾ.
0 ಕಾಮೆಂಟ್(ಗಳು):
Post a Comment