ಬಂಟ್ವಾಳಾಂತು ಮಂಡಾಡಿ ಮ್ಹಳ್ಳಲಿ ಏಕ ಸಾನಿ ಹಳ್ಳಿ ಆಸ್ಸ. ತೀ ಹಳ್ಳಿ ಬಂಟ್ವಾಳಾ ದಾಕುನು ಮೂಡಬಿದ್ರೆಕ ವತ್ತನಾ ವಾಟೆರಿ ಮ್ಹೆಳ್ತಾ. ಥಂಯ ಆಮ್ಗೆಲೆ ಕಾಲೇಜ ಆನಿ ಇಂಗ್ಲೀಷ್ ಮಾಧ್ಯಮಾಚೆ ಸ್ಕೂಲ ಆಸ್ಸ. ತೆ ಜಾಗ್ಯಾಕ ವಿದ್ಯಾಗಿರಿ ಮ್ಹಣು ಆತ್ತ ನಾಂವ ದವರಲಾ. ತೆ ಮಂಡಾಡಿಂತು ಏಕ ಬ್ರಾಹ್ಮಣು ಆಸ್ಸಿಲೊ. ತಾಗೆಲೆ ನಾಂವ ಪರಮೇಶ್ವರ ಮ್ಹಣು. ತಾಗೆಲಿ ಬಾಯಲ ಸರಸ್ವತಿ. ಮಸ್ತ ವರ್ಷ ಜಾಲ್ಯಾರಿ ತಾಂಕಾ ಚೆರ್ಡುಂವ ಜಾಯ್ನಿ. ಸಕ್ಕಡ ನಮೂನೆಚೆ ವೃತ, ಉಪಾಸು ಕರ್ನು ಕಡೇರಿ ಸರಸ್ವತಿ ಗುರ್ಭಿಣಿ ಜಾತ್ತಾ. ಗುರ್ಭಿಣಿ ಜಾಲ್ಲಿ ಮ್ಹಣ್ತರಿ ಧುವಾಳೊ ಸುರು ಜಾವ್ಕಾನಂವೆ? ತಸ್ಸಿಂಚಿ ತಿಕ್ಕಾ ಧುವಾಳೊಯಿ ಸುರುಜಾಲ್ಲೊ. ಖೆಲ್ಲೆಲೆ ಕಸ್ಸಲಯಿ ದಕ್ವನಾ. ವೊಂಕೂನು ವಚ್ಚೆ. ಜಾಲ್ಯಾರೀ ಮನಾಂತು ಚೆರ್ಡು ಜಾತ್ತ ನಂವೆ ಮ್ಹಣು ಸಂತೋಷು. ತಸ್ಸಿಂಚಿ ಪೊಟ್ಟಾಕ ತೀನಿ ಮ್ಹಹಿನೆ ಜಾತ್ತರಿ ತಿಗೆಲಿ ವೊಂಕಿ ರಾಬ್ಲಿ. ನಂತರ ಸುರು ಜಾಲ್ಲೆ. ಏಕಕಚಿ ಖಾವ್ಚಿ ಆಶಾ. ಆತ್ತ ಖೆಲ್ಲೆಲೆ ಆತ್ತ ನಜ್ಜ. ಧನ್ಪಾರ ಏಕ ರಾಂದಯೇನ ಜೆವ್ಲ್ಯಾರಿ, ರಾತ್ರಿ ತಿ ರಾಂದಯಿ ನಜ್ಜ. ದುಸ್ರೀಚಿ ಜಾವ್ಕಾ. ಪರಮೇಶ್ವರಾಕ ಭಾರೀ ಊರಿ, ತೀಣೆ ಸಾಂಗಿಲೆ ಹಾಣು ದಿತ್ತಲೊ ಬಾವ್ಡೊ. ತಸ್ಸಿಂಚಿ ಏಕ ದಿವಸು ತಿಕ್ಕಾ ಕಾರಾತೆ ಖಾವ್ಕಾ ಮ್ಹಣು ದಿಸ್ತಾ. ಸರಸ್ವತಿ ಬಾಮ್ಣಾಲಾಗ್ಗಿ ಸಾಂಗ್ತಾ "ಪಳೆ ಮ್ಹಳ್ಯಾರಿ, ಮಾಕ್ಕಾ ಕಾರಾತೆ ಖಾವ್ಕಾ ಮ್ಹಣು ಮಸ್ತ ಆಶಾ ಜಾತ್ತಾ. ತುಮ್ಮಿ ಹಾಣು ದಿತ್ತಾಚಿ ನಂವೆ?" ತೆದನಾ ಪರಮೇಶ್ವರಾಕ ಮನಾಂತು ಆಯಿಲೆ. ಸರಸ್ವತಿಕ ಜಾವ್ಚೆ ಚೆರ್ಡು ಖಂಡಿತ ಚೆಲ್ಲಿಚಿ ಮ್ಹಣು. ಧುವಾಳ್ಯಾಂತು ಗುರ್ಭಿಣಿಕ ಕಾರಾತೆ ಖಾವಕಾ ಮ್ಹಣು ಆಶಾ ಜಾಲ್ಲ್ಯಾರಿ ತಾಂಕಾ ಜಾವ್ಚೆ ಚೆರ್ಡು ಚೆಲ್ಲಿಚೀ ಮ್ಹಣು ಮಾಲ್ಗಡ್ಯಾನಿ ಸಾಂಗಿಲೆ ತಾಕ್ಕಾ ಉಗಡಾಸು ಆಯಿಲೊ. ಕಸ್ಸಲೆ ಜಾಲ್ಲ್ಯಾರಿ ಇತ್ತೆ. ಏಕ ಚೆರ್ಡು ತೆವಯಿ ಚಂದ, ಆರೋಗ್ಯವಂತ ಜಾಲ್ಲ್ಯಾರಿ ಪುರೊ. ಆತ್ತ ಸರಸ್ವತಿಲೆ ಧುವಾಳ್ಯಾಚಿ ಆಶಾ ಕಾರಾತೆ ಸೊದ್ದುನು ವತ್ತಾ. ಪರಮೇಶ್ವರಾಕ ಕಾರಾತೆ ಖಂಯ ಮ್ಹೆಳ್ನಾ. ಕಾರಾತೆ ಮ್ಹೆಳ್ನಿ ಮ್ಹಣು ಸೊಡುಕ ಜಾತ್ತವೆ? ಕೊಣ್ಕಿ ಸಾಂಗಿಲೆ ತಾಕ್ಕಾ ಉಗಡಾಸಾಕ ಯೆತ್ತಾ. ತೆ ಕಸ್ಸಲೆ ಮ್ಹಳ್ಯಾರಿ ಗುರ್ಭಿಣಿಲಿ ಆಶಾ ಪೂರ್ಣ ಕರ್ನಿ ಜಾಲ್ಲ್ಯಾರಿ ತಿಕ್ಕಾ ಜಾವ್ಚೆ ಚೆರ್ಡು ಅಂಗಹೀನ ಜಾತ್ತಾ ಮ್ಹಣು. ಪರಮೇಶ್ವರಾಕ ಮನಾಂತೂಚಿ ಭಂಯ್ಯ ಸುರುಜಾಲ್ಲೆ. ಮಸ್ತ ಕಾಳಾಚೆ ನಂತರ ದೇವಾನ ದಿಲ್ಲಾ. ಆತ್ತ ಹಾಂವೆ ತಿಗೆಲಿ ಆಶಾ ಪೂರ್ಣ ಕರ್ನಿ ಜಾಲ್ಲ್ಯಾರಿ ಮಾಗಿರಿ ಪಶ್ಚಾತಾಪ ಪಡಕಾ ಜಾತ್ತಲೆ. ತಸ್ಸಿ ಜಾವ್ನು ಕಿತಲೆ ಕಷ್ಟ ಜಾಲ್ಲ್ಯಾರಿ ಕಾರಾತೆ ಸೊದ್ದುನು ತಿಕ್ಕಾ ಹೊರ್ನು ದಿವ್ಕಾ. ತಸ್ಸಿ ಪರಮೇಶ್ವರು ಕಾರಾತೆ ಸೊದ್ದಿತಾ, ಸೊದ್ದಿತಾ-ವಾಟೆರಿ ಮ್ಹೆಳ್ಳಲೆ ಜನಾಲಾಗ್ಗಿ ನಿಮ್ಗಿತ ವತ್ತಾ. ಕಡೆಕ ಏಕ ಕಡೆನ ಕಾರಾತ್ಯಾಚಿ ವಾಲಿ ಪಳಯಿತಾ. ತಾಜ್ಜೆರಿ ಕಾರಾತೆ ಆಸ್ಸಿಲೆ. ತಾಜ್ಜೆ ಧನಿ ಕೊಣ ಮ್ಹಣು ಸಮಜುಚಾಕ ವತ್ತನಾ ತಿ ವಾಲಿ ಕೊಣಯಿ ಒಯಿಲಿ ನ್ಹಂಯಿ. ತಾಜ್ಜಿತ್ಲ್ಯಾಕ ಕೊಣಕಿ ಉಡ್ಡಯಿಲೆ ಬಿಯೆಕ ಜಾಲ್ಲೆಲಿ ವಾಲಿ ತಿ. ಜಾಗೊಯಿ ಕೊಣಾಲೊ ನ್ಹಂಯಿ. ತಸ್ಸಿ ಜಾವ್ನು ಕೊಣಾಲಾಗ್ಗಿ ನಿಮ್ಗುನು ಕಾಡ್ಕಾ ಮ್ಹಣು ನಾ. ವಾಲ್ಲಿರಿ ಆಸ್ಸಿಲೆ ಕಾರಾತೆ ಚಾಂಗ ಆಸ್ಸಿಲೆ. ತೆ ಪಳವ್ನು ಪರಮೇಶ್ವರಾಕ ಖೂಸಿಚಿ ಜಾಲ್ಲಿ. ಹಗೂರ ತೆ ವಾಲ್ಲಿಕ ದುಕ್ಕನಾಸ್ಸಿ ಏಕ ಕಾರಾತೆ ಕಾಡ್ತಾ. ತೇಚೀ ವೇಳಾರಿ ವಾಲ್ಲಿಚೆ ಮೂಳಾ ದಾಕುನು ಏಕ ಸ್ವರು ಯೆತ್ತಾ. ಪರಮೆಶ್ವರು ಕಸ್ಸಲೆತೊ ಸ್ವರು ಮ್ಹಣು ಕಾನು ದೀವ್ನು ಆಯ್ಕತಾ ಆನಿ ವಾಲ್ಲಿಚೆ ಮೂಳಾಕ ಸೊದ್ದಿತಾ. ಥಂಯ ಏಕ ಹೋಡು ಬೆಬ್ಬೊ ಬಸ್ಲಾ ಆನಿ ತೊ "ಮೆಗೆಲಾಗ್ಗಿ ನಿಮ್ಗಿನಾಸ್ಸಿ ಕೊಣತೆ ಕಾರಾತೆ ಕಾಡ್ತಾ." ಮ್ಹಣ್ತಾ. ತೆ ಆಯ್ಕುನು ಪರಮೆಶ್ವರಾನ ತೆ ಬೆಬ್ಬ್ಯಾಲಾಗ್ಗಿ ಸಾಂಗ್ಲೆ "ಮೆಗೆಲಿ ಬಾಯಲ ಮಸ್ತ ವರ್ಸಾ ನಂತರ ಗುರ್ಭಿಣಿ ಜಾಲ್ಲಾ. ತಿಕ್ಕಾ ಕಾರಾತೆ ಖಾವ್ಕಾ ಮ್ಹಣು ಧುವಾಳೊ. ಆಮಗೆಲೆ ಬಾಯಲಾಲೆ ಧುವಾಳಾಂತುಲಿ ಆಶಾ ಪೂರ್ಣ ಕರ್ನಿ ಜಾಲ್ಲ್ಯಾರಿ ತಾಂಕಾ ಜಾವ್ಚೆ ಚೆರ್ಡುಂವ ಪಾಂಗ್ಳೆ ಜಾತ್ತಾ ಮ್ಹಣು ಆಮಗೆಲೆ ಮಾಲ್ಗಡ್ಯಾನಿ ಸಾಂಗಿಲೊ ಉಗಡಾಸು ಮಾಕ್ಕಾ. ಖಂಯ ಸೊದ್ದಿಲ್ಯಾರಿ ಮಾಕ್ಕಾ ಪೆಂಟಾಂತು ಕಾರಾತೆ ಮ್ಹೆಳ್ನಿ. ತಸ್ಸಿ ಸೊದ್ದಿತಾ ಹಾಂವ ಹಾಂಗಾ ಆಯಿಲೊ. ಕಾರಾತ್ಯಾಚಿ ವಾಲಿ ಆನಿ ತಾಜ್ಜೆರಿ ಆಸ್ಸುಚೆ ಕಾರಾತೆಯಿ ಪಳಯಿಲೆ. ನಿಮ್ಗುನು ಕಾಡ್ಯಾ ಮ್ಹಳ್ಯಾರಿ ಹೊ ಜಾಗೊ ಕೊಣಾಲೊಯಿ ನ್ಹಂಯಿ ಖಂಯ. ತಸ್ಸಿ ಜಾಗೊ ಕೊಣಾಲೊಯಿ ನ್ಹಂಯಿ ಜಾತ್ತರಿ ವಾಲಿ ಕೊಣಾಲಿ ಆನಿ ತಾಜ್ಜೆರಿ ಆಸ್ಸುಚೆ ಕಾರಾತೆ ಕೊಣಾಲೆ ಮ್ಹಣು ಕಸ್ಸಲ್ಯಾಕ ನಿಮ್ಗುಚೆ ಮ್ಹಣು ಚಿಂತುನು ಏಕ್ಕ ಏಕ ಕಾರಾತೆ ಕಾಳ್ಳಾ." ಮ್ಹಣಾಲೊ.ಪರಮೇಶ್ವರಾನ ತಿತ್ಲೆ ಸಾಂಗ್ತರಿ ಬೆಬ್ಬೊ ಮ್ಹಣಾಲೊ "ಹೋಡನ್ಹೈಯಬಾ. ಕಾಡಿ. ತುಗೆಲೆ ಬಾಯಲೆಕ ಚೆಲ್ಲಿ ಜಾಲ್ಲ್ಯರಿ ಮಾಕ್ಕಾ ದೀವ್ಕಾ. ತಸ್ಸಿ ಜಾಲ್ಲ್ಯಾರಿ ಮಾತ್ರ ವ್ಹರ. ನ್ಹಂಯಿ ಜಾಲ್ಲ್ಯಾರಿ ತುವೆ ಕಾಳ್ಳಲೆ ತೆ ಕಾರಾತೆ ಹಾಂಗಾ ದವರಿ." ತೆ ಆಯ್ಕುನು ಪರಮೇಶ್ವರಾಕ ಹೂನ ಉದ್ಕಾಚೊ ಘೋಟು ಸೊ ಜಾಲ್ಲೊ ಆನಿ ಮಾತ್ಯಾರಿ ಫಾತ್ತೊರು ಘಾಲ್ಲ್ಯಾವರಿ ಜಾವ್ನು ಸಗ್ಳೊಚಿ ಹುಮೆಲೊ. ತಾಗೆಲೆ ಬಾಯಲೆನ ಕಾರಾತ್ಯಾಚೊ ಧುವಾಳೊ ಮ್ಹಣು ಸಾಂಗ್ತನಾಚಿ ತಾಗೆಲೆ ಮನ ಜಾವ್ಚಿ ಚೆಲ್ಲಿ ಮ್ಹಣು ಧಸ್ಕಲಾ. ಆತ್ತ ಹೊ ಬೆಬ್ಬೊ ಚೆಲ್ಲಿ ಜಾಲ್ಲ್ಯಾರಿ ತಾಕ್ಕಾ ದಿವ್ಕಾ ಮ್ಹಣ್ತ ಆಸ್ಸ. ಮಸ್ತ ಕಾಳಾ ನಂತರ ಚೆರ್ಡು ಜಾವ್ಚೆ. ಚೆಲ್ಲಿ ಜಾಲ್ಲ್ಯಾರಿ ಚಿಂತನಾ, ಚೆರ್ಡು ಜಾತ್ತನಂವೆ ಮ್ಹಣು ಆಶೆನ ಆಸ್ಸಿಲ್ಯಾಕ ಹೆ ಬೆಬ್ಬ್ಯಾಲೆ ಉತ್ರ ಆಯ್ಕುನು ಭಯ್ಯಂ ಸುರುಜಾಲ್ಲೆ. ಕಾರಾತೆ ವ್ಹರ್ನಿ ಜಾಲ್ಲ್ಯಾರಿ ಬಾಯಲೆಲೆ ಧುವಾಳ್ಯಾಚಿ ಆಶಾ ಕಸ್ಸಿ ಪೂರಯಿಸುಚಿ? ಮ್ಹಣು ಚಿಂತುನು ಕಡೆಕ "ಜಾಯಿತ, ಚೆಲ್ಲಿ ಜಾಲ್ಲ್ಯಾರಿ ನಂವೆ? ದಿತ್ತಾ" ಮ್ಹಣಾಲೊ ಪರಮೇಶ್ವರು ಆನಿ ಕಾರಾತೆ ಘೆವ್ನು ಘರಕಡೆ ಗೆಲ್ಲೊ. ಕಾರಾತೆ ಬಾಯಿಲೆಕ ದಿತ್ತಾ. ತಿ ತಾಜ್ಜೆ ರಾಂದಯಿ ಕರ್ನು ಖೂಸೇರಿ ಖಾತ್ತಾ. ತಸ್ಸಿಚಿಽ ಸರಸ್ವತಿ ಗುರ್ಭಿಣಿ ಜಾವ್ನು ನವ್ವ ಮ್ಹಯಿನೆ ಜಾತ್ತಾ, ಬಾಳಾಂತಿಯಿ ಜಾತ್ತಾ. ಚೆರ್ಡು ಚೆಲ್ಲಿ, ಚಂದ ಜಾಲ್ಲಾ. ಪರಮೇಶ್ವರಾಕ ಆನಿ ಸರಸ್ವತಿಕ ಮಸ್ತ ಸಂತೋಷ ಜಾತ್ತಾ. ಪರಮೇಶ್ವರಾಕ ರಾತ್ರಿ ಏಕು ಹೂಂಕಾರು ಆಯಿಕಲೊ. ಕಸ್ಸಲೆ ಮ್ಹಣು ಪಳಯಿಲ್ಯಾರಿ ಏಕ ಬೆಬ್ಬೊ, ತೋಚಿ ತೊ, ತೆದುಸು ಕಾರಾತೆ ಕಾಡ್ತನಾ ತಾಜ್ಜೆ ವಾಲ್ಲಿ ಪೊಂದಾಕ ಬಯ್ಸುನು ಚೆಲ್ಲಿ ಜಾಲ್ಲ್ಯಾರಿ ತಾಕ್ಕಾ ದಿತ್ತ ಜಾಲ್ಲ್ಯಾರಿ ಮಾತ್ರ ಕಾರಾತೆ ಕಾಡಿ ಮ್ಹಳ್ಳಲೊ. ಪರಮೇಶ್ವರಾಕ ಹೊ ವಿಷಯು ವಿಸೊರ್ನು ಘೆಲ್ಲಲೊ. ಬೆಬ್ಬ್ಯಾಕ ಪಳಯಿತರಿ ಉಗಡಾಸಾಕ ಯೆತ್ತಾ ಆನಿ ಭಿತ್ತಾ. ಪರಿಸ್ಥಿತಿ ತಾಕಾ ಭಯಂಕರ ಜಾವ್ನು ದಿಸ್ತಾ. ಪರಮೇಶ್ವರಾನ ಉಲ್ಲಯಿನಾತ್ತಿಲೆ ಪಳವ್ನು ಬೆಬ್ಬೊ ಮ್ಹಣಾಲೊ "ಕಸ್ಸಲೆ ಪಳಯಿತಾ, ಮೆಗೆಲೊ ವಳಕು ಮೆಳ್ನಿ ದಿಸ್ತಾ ನಂವೆ? ತೆದುಸು ತುವೆ ಕಾರಾತೆ ಕಾಡ್ತನಾ ಸಾಂಗಿಲೆ ಕಸ್ಸಲೆ? ಆತ್ತ ವಿಸರ್ಲೊವೆ? ತುಕ್ಕಾ ಚೆಲ್ಲಿ ಜಾಲ್ಲಾ ಮ್ಹಣು ಮಾಕ್ಕಾ ಕಳಿತಾಕ ಆಯಿಲಾ. ತಸ್ಸಿ ಜಾವ್ನು ಹಾಂವ ಚೆರ್ಡಾಕ ಹೊರುಕ ಆಯಿಲಾ.""ನಾಽಬಾ, ತುಕ್ಕಾ ಕಸ್ಸಿ ವಿಸೊರ್ಚೆ? ತೆದುಸು ತುವೆ ಕಾರಾತೆ ದಿವ್ನು ಮಾಕ್ಕಾ ಮಸ್ತ ಉಪಕಾರು ಕೆಲ್ಲಾ. ಜಾಲ್ಲ್ಯಾರಿ ಆಜಿ ಚೆರ್ಡು ಜಾಲ್ಲ್ಯಾ ಮಾತ್ರ. ದಿವ್ಚಾಕ ಮನ ಎತ್ತವೇ? ಆನ್ನೆಕ ದಿವಸು ಯೊ." ಮ್ಹಣ್ತಾ. ಬೆಬ್ಬೊ "ಜಾಯ್ತ" ಮ್ಹಣು ವತ್ತಾ. ಪಾಳ್ಯಾಂತು ಘಾಲ್ಚೆ ದಿವಸು ಯೆತ್ತಾ. ಪರಮೇಶ್ವರು "ತುಂವೆ ಅಶ್ಶಿ ಅವಸರು ಕೆಲ್ಲ್ಯಾರಿ ಕಸ್ಸಿ? ಚೆರ್ಡು ದೂದ ಪಿವ್ಚಾಕ ಸುರುಕರ್ತಾ ಇತ್ಲೇಂಚಿ. ತೊಡೆ ದಿವಸ ಸೊಣು ಯೊ." ಮ್ಹಣಾಲೊ. ಅಸ್ಸಿಂಚಿ ಬೆಬ್ಬ್ಯಾನ ಆಯಿಲೆ ವೇಳಾರಿ ಏಕಕ ನೆವಾನ ಸಾಂಗುಕ ಸುರುಕೆಲ್ಲೆ ಪರಮೇಶ್ವರಾನ. ಹಾಂವೆ ತಾಜ್ಜೆ ಖೇಳ ಗೀಳ ಪಳವ್ಚೆ ನಾಕ್ಕವೆ? ತಿಕ್ಕಾ ಶಿಕ್ವಣ ದಿವ್ಚೆ ನಾಕ್ಕವೆ? ರಾಂದಪ ಸಿಕೊಚೆ ನಾಕ್ಕಾವೆ? ಮ್ಹಣು ಪ್ರತಿ ಯೆಕ ಪಂತಾ ತೆ ಬೆಬ್ಬ್ಯಾನ ಆಯಿಲೆ ವೇಳಾರಿ ಸಾಂಗುಕ ಸುರುಕೆಲ್ಲೆ. ತಸ್ಸಿ ಚೆಲ್ಲಿ ಹೋಡಿ ಜಾಲ್ಲಿ. ಪರಮೇಶ್ವರಾಲೆ ಮನಾಂತು ಏಕ ಆಲೋಚನಾ ಆಯಿಲಿ. ಆಸ್ಸಿಚಿ ಬೆಬ್ಬ್ಯಾನ ತಾತ್ತಾವಳಿ ಯೆವ್ನು ಮಾಕ್ಕಾ ಭಾದಾ ದಿಲ್ಲ್ಯಾರಿ ವಾಂಚಿ ನಾ. ತಿಕ್ಕಾ ಏಕ ವ್ಹಾರ್ಡಿಕ ಕರ್ನು ಸೊಳ್ಳಿ ತರಿ, ಮಾಗಿರಿ ತಿಗೆಲೆ ಬಾಮ್ಣಾಲಿ ಜವಾಬ್ದಾರಿ. ಮ್ಹಣು ಚಿಂತುನು ಸೊರಿಕ ಸೊದ್ದುಕ ಸುರುಕರ್ತಾ. ಹೊ ವಿಷಯು ತೆ ಬೆಬ್ಬ್ಯಾಕ ಕಳ್ನು, ತೊ ಬೆಬ್ಬೊ ಹೆ ಪರಮೇಶ್ವರಾಕ ಅಸ್ಸಿಂಚಿ ಸೊಳ್ಳ್ಯಾರಿ ಮಾಕ್ಕಾ ತೊ ಚೆಲ್ಲಿ ದಿ ನಾ. ಮ್ಹಣು ಮನಾಂತು ಚಿಂತುನು ರಾತ್ರಿ ಸಕ್ಕಡಾನಿ ನಿದ್ದಲೆಲೆ ವೇಳಾರಿ ವಣ್ತೀಕ ಒಟ್ಟೊ ಕರ್ನು ನಿದ್ದಲೆಲೆ ಚೆಲ್ಲಿ, (ಪರಮೇಶ್ವರ ಆನಿ ಸರಸ್ವತಿನ ತಿಕ್ಕಾ ಚಂದ ನಾಂವ ದವರ್ಲಾ ಪರಿಮಳಾ ಮ್ಹಣು) ಪರಿಮಳಾಕ ಹೊ ಬೆಬ್ಬೊ ಘೆವ್ನು ವತ್ತ ರಾಬ್ಲೊ. ಹೆರ್ದಿವಸು ಸಕಾಂಣಿಚಿ ಚೆಲ್ಲಿ ಉಟಾಯಿತನಾ ತಿ ಘರಕಡೆ ನಾ. ಖಂಯಕಿ ವಾಲ್ಲಿಚೆ ಮಾಂಟ್ವಾಚೆ ಪೊಂದಾಕ ಆಸ್ಸ. ಹೆಕಡೆ ತೆಕಡೆ ಪಳಯಿತಾ. ಹೊಳ್ಳೊ ಏಕ ಬೆಬ್ಬೊ ಬಸ್ಲಾ. ಪರಿಮಳಾನ ಅಸ್ಸಲ ಪ್ರಾಣಿಕ ಎದ್ದೋಳತಾಂಯಿ ಪಳಯಿನಿ ಆಸ್ಸಿಲೆ. ಏಕಿ ಕಿನಾಟಿ ಮಾರ್ಲಿ. ಆನಿ ಸೋಯ್ಚುಕ್ಕುನು ಪಡ್ತಾ. ಬೆಬ್ಬೊ ಲೆಕ್ತಾ, ಆತ್ತ ತಿಕ್ಕಾ ಸೋಯ್ ಎತ್ತನಾ ಹಾಂವ ಎದ್ರಾಕ ಆಸ್ಲಾರಿ ಹೀ ಮೋರ್ನು ವಚ್ಚತ. ತಶ್ಶಿ ಜಾವ್ನು ತೀಣೆ ಉಟ್ಟಾತನಾ ಎದ್ರಾಕ ಮಸ್ತ ಖಾಣ ಹಾಣು ದವರ್ತಾ ಮ್ಹಣು ಲೆಕ್ಕುನು ಖಾಣ ಹಾಡು ವತ್ತಾ. ಹಿಕ್ಕಾ ಸೋಯ ಏವ್ನು ಪಳೈತಾ. ಬೆಬ್ಬ್ಯಾಲೆ ಉಗಡಾಸು ಯೆತ್ತಾ. ವಾಪಾಸ ಭೀವ್ನು ಸುತ್ತು ಪಳೈತಾ. ಬೆಬ್ಬೊ ದಿಸ್ಸನಾ. ಆನಿ ಹಾಂವ ವಾಂಚನಾ. ಜೀವು ಕಾಣು ಘೆತ್ತಾ ಮ್ಹಣು ಬಾಂಯಿ ಸೊದ್ದಿತಽಚಿ ವತ್ತಾ. ಕಡೆರಿ ಎಕ್ಡೆ ಬಾಂಯೀ ಮೆಳ್ತಾ. ಭಾಂಯಿ ಪಳವ್ನು ಭಯ್ಯಂ ಜಾತ್ತಾ. ಒಟ್ಟೂಚಿ ಭೀವ್ನು ಹೋಡಾನ ರಡ್ತಾ. ವ್ಹಯರಿ ಈಶ್ವರು ಆನಿ ಪಾರ್ವತಿ ವತ್ತಽ ಆಶ್ಶಿಲಿಂಚಿ. ತಿಗೆಲೆ ರಣ್ಣ್ಯ ಆಯ್ಕುನು ಈಶ್ವರು ಪಾರ್ವತಿಲಾಗ್ಗಿ ಸಾಂಗ್ತಾ "ಹಿ ಕಸ್ಸಲ್ಯಾಕ ರಡ್ತ ಆಸ್ಸ. ತೊ ರಾಯಾಲೊ ಪೂತು ಶಾಪಾನ ಬೆಬ್ಬೊ ಜಾಲ್ಲಾ ಮ್ಹಣು ತಿಕ್ಕಾ ಗೊತ್ನಾ ದಿಸ್ತಾ. ಏಕ ಹೊಳ್ಳೆ ಬೊಡ್ಯಾನ ತೆ ಬೆಬ್ಬ್ಯಾಕ ಮಾರ್ನು ದಿವ್ಶಿ ಮಾರ್ಕಾ. ತೆದನಾ ಪಳೆ ತಿಗೆಲೆ ಭಾಗ್ಯ." ಮ್ಹಣ್ತಾ. ಈಶ್ವರಾನ ಪಾರ್ವತಿಲಾಗ್ಗಿ ಸಾಂಗಿಲೆ ಪರಿಮಳಾ ಆಯ್ಕುನು ಏಕ ಹೊಳ್ಳೊ ಬೊಡ್ಡೊ ಹಾಣು ದವರ್ತಾ. ಬೆಬ್ಬ್ಯಾನ ಆಯಿಲೆ ತಕ್ಷಣ ತಾಕ್ಕಾ ಮಾರುಕ ತಯಾರ ಜಾವ್ನು ಬೊಡ್ಡೊ ಧರ್ನು ನಿಪ್ಪೊವ್ನು ಬಸ್ತಾ. ಖಾಣ ಹಾಡುಕ ಘೆಲ್ಲಲೊ ಬೆಬ್ಬೊ ಯೆತ್ತನಾ ತಾಕ್ಕಾ ಪರಿಮಳಾ ದಿಸ್ಸನಾ. ಖಂಯ ಘೆಲ್ಲಿ ಮ್ಹಣು ಪಳವ್ಚಾಕ ಭಾಯರ ಯೆತ್ತಾನ ಪರಿಮಳಾಕ ಪಳೈತಾ. ಪೊಳೊಚೆ ಭಿತ್ತರಿ ಪರಿಮಳಾ ಬೊಡ್ಡೆನ ತಾಜ್ಜೆ ಮಾತ್ಯಾರಿ ಘಾಲ್ತಾ ಪೆಟ್ಟು. ತೆ ಪೆಟ್ಟಾಕ ಬೆಬ್ಬ್ಯಾಲೆ ಬೊಡ ಬೆತ್ತುನು ಬೆಬ್ಬೊ ಮರ್ತಾ. ಬೆಬ್ಬ್ಯಾನ ಆಸ್ಸಿಲೆ ಕಡೆನ ಏಕ ಚಂದೂ ಚೆಲ್ಲೊ ರಾಬ್ಬಿಲೆ ಪರಿಮಳಾ ಪಳಯಿತಾ. ತೊ ರಾಯಾಲೊ ಪೂತು ದೊಗ್ಗಾಂಕಯಿ ಖೂಸೀ ಜಾತ್ತಾ. ಪರಿಮಳಾ ತೆ ರಾಯಾಪುತ್ತಾಕ ಘೆವ್ನು ತಿಗೆಲೆ ಘರಕಡೆ ವತ್ತಾ ಆನಿ ಜಾಲ್ಲಲೊ ವಿಷಯು ಸಕ್ಕಡ ತಾಂಕಾ ಸಾಂಗ್ತ್ರಾ. ಪರಮೇಶ್ವರಾಕ ಆನಿ ಸರಸ್ವತಿಕ ಹೊ ವಿಷಯು ಕಳ್ನು ತಾಂಗೆಲೆ ಮನಾಂತುಲೆ ಭಂಯ್ಯ ವತ್ತಾ. ತಾಜ್ಜೆ ನಂತರ ತೊ ರಾಯಾಲೊ ಪೂತು ಪರಿಮಳಾಕ ಆನಿ ತಿಗೆಲೆ ಆನ್ನಾಕ ಆನಿ ಆಮ್ಮಾಕ ತಾಗೆಲೆ ಆನ್ನಾಲೆ ಮ್ಹಳ್ಯಾರಿ ರಾಯಾಲೆ ಘರಕಡೆ ಆಪ್ಪೊವ್ನು ವರ್ತಾ. ರಾಯಾಕ ತಾಗೆಲೆ ಪುತ್ತಾಕ ಪಳವ್ನು ಮಸ್ತ ಖೂಸಿ ಜಾತ್ತಾ. ತೊ ಎದ್ದೋಳು ತಾಂಯಿ ಕಂಯಿ ಆಸ್ಸ? ತಾಕ್ಕಾ ಕಸ್ಸಲೆ ಜಾಲ್ಲಾ? ಮ್ಹಳ್ಳಲೆ ವಿಷಯು ರಾಯಾಕ ಗೊತ್ನಾಸ್ಸಿಲೆ. ಪೂತು ಜಾಲ್ಲಲೊ ವಿಷಯು ಸಕ್ಕಡ ರಾಯಾಕ ಸಾಂಗ್ತಾ. ತಸ್ಸಿಂಚಿ ರಾಯು ತಾಗೆಲೆ ಪುತ್ತಾಕ ಆನಿ ಪರಿಮಳಾಕ ವ್ಹಾರ್ಡಿಕ ಕರ್ನು ಸೊಡ್ತಾ. ನಂತರ ಪರಿಮಳಾ ಆನಿ ತಿಗೆಲೊ ಬಾಮ್ಹುಣು ರಾಯಾಲೊ ಪೂತು ಮಸ್ತ ಕಾಳ ತಾಂಯಿ ಸುಖಾರಿ ಆನಿ ಸಂತೋಷಾರಿ ಸಂಸಾರು ಕರ್ನ ಆಸ್ತಾಂಚಿ. ----೦೦೦೦-----
0 ಕಾಮೆಂಟ್(ಗಳು):
Post a Comment