ಬಂಟ್ವಾಳ ತಾಕುನು ಬೆಳ್ತಂಗಡಿಕ ವತನಾ ಬಾಂಬಿಲ ಮ್ಹಳೆಲೆ ಏಕ ಲ್ಹಾನ ಹಳ್ಳಿ. ಥಂಯಿ ವಿಶ್ವನಾಥ ಆನಿ ರೋಹಿಣಿ ಹಾಂಗೆಲೊ ಪುತು ರಾಮು ಮ್ಹಣ ಆಶಿಲೊ. ತಾಕಾ ಥೊಡೆ ಖಂವಸ, ಅಶಿಂ ಗಾಂವಂಚೆ ಜನ ಸಾಂಗತಾಚಿ. ಹೆ ಖಂವಸ ಮ್ಹಳಯಾರಿ ಕಸಲೆ ಮ್ಹಣ ತಾಕಾ ಕಳನಾಶಿಲೆ. ತುಳು ಬಾಶೆನ `ಪೆಟ್ ಕಮ್ಮಿದಾಯೆ' ಮ್ಹಣೂಚಿ ತಾಕಾ ಆಪೋವಚೆ. ಜಾಲಯಾರಿ ತೆ ಸಕಡ ತಾಕಾ ಮನಾಕಯಿ ವಚನಾ. ಏಕ ದೀಸ ರಾಮುಕ ಘರಕಡೆ ರಾಕುಡ ಜಾವಕಾ ಮ್ಹಣ ತಾಗೆಲೆ ಆವಯ ಸಾಂಗತಾ. ತೊ ತಾಂಗೆಲೆ ಘರಾ ಲಾಗೀಚಿ ಆಸುಚೆ ದೊಂಗರಾರಿ (ಗುಡ್ಡ್ಯಾರಿ) ಗೆಲೊ. ಸುಮಾರ ವೇಳ ಜಾಲಯಾರಿ ರಾಮು ಯೇನಿ ಇತ್ಯಾಕ ಮ್ಹಣ ಪಳವಚಾಕ ತಾಗೆಲಿ ಆವಯ ದೊಂಗರಾರಿ ಚೊಣು ಆಯಿಲಿ. ರಾಮು ಏಕ ರುಕ್ಕಾ ಮುಳಾಕ ನಿದಲೆಲೆ ಪಳಯಿತಾ. ಲಾಗೀಚಿ ಏಕ ರೂಕಾಚೊ ಸುಕಲೊ ಫಾಂಟೊಯಿ ಪೊಣು ಆಸಾ. ತಾಗೆಲಿ ಆವಯ ಲಾಗಿ ಯೆವನ ತಾಕಾ ಜಾಗೆಯತಾ. ರಾಮು ದೊಳೆ ಸೊಣಾನಾತಿಲೇಚಿ `ಹಾಂವ ಮೆಲ್ಲಾ' ಮ್ಹಣತಾ. `ಹೆ ತುಕಾ ಕೊಣೆ ಸಾಂಗಿಲೆ ಪುತಾ' ತಾಗೆಲಿ ಆವಯ ಮ್ಹಣತಾ. ತೆದನಾ ರಾಮು ಸಾಂಗತಾ "ಹಾಂವೆ ರುಕಾಚೊ ಫಾಂಟೊ ಕಾತರತನಾ ಏಕ್ ಮ್ಹಾಂತಾರೊ ಯೆವ್ನ `ತು ಅಶಿ ಬಯ್ಸುನು ಫಾಂಟೊ ಕಾತರಲ್ಯಾರಿ ಸಕಲ ಪೊಣ ಮರತಾ' ಮ್ಹಳೆಲೆ ನಿಮತಿ ಹಾಂವ ಆತಾಂ ಮೆಲಾಂ" ತೆದನಾ ತಾಗೆಲಿ ಆವಯ "ಮಡೆ ಕಂಚೆ, ತಾಣೆ ಸಾಂಗಿಲ್ಯಾಚೊ ಅರ್ಥ ಕಳನಾ ಜಾಲಯಾರಿ ಮೆಗೆಲಾಗಿ ನಿಮಗುನು ಘೆವೆತಾಶಿಲೆ ನ್ಹಂವೆ? ತೆ ಸೊಣ್ ತಾಣೆ ತು ಸಕಲ ಪೊಣು ಮರತಾ ಮ್ಹಳಯಾರಿ ತು ಮೆಲೊವೆ?" ಮ್ಹಣಾಲಿ. "ಮಾಗಿರಿ ತುವಂಯಿ ಆತ ಮ್ಹಾಕಾ ಮಡೆ ಮ್ಹಳ್ಳೆ" ಮ್ಹಣಾಲೊ ರಾಮು. "ಚೆರ್ಡಾ, ತೆ ಅರ್ಥಾರಿ ಹಾಂವೆ ತುಕಾ ಮಡೆ ಮ್ಹಳೆಲೆ ನ್ಹಂಹಿ. ತುಕಾ ಮಾತ್ಯಾಕ (ಬೊಡಾಕ)ವಚನಿ ನ್ಹಂವೆ? ಮ್ಹಣ ಮ್ಹಳಲೆ" ಮ್ಹಣಾಲಿ ರಾಮುಲಿ ಆವಯ. "ತಶಿ ಜಾಲಯಾರಿ ಹಾಂವ ಆತಾಂ ಮರ್ನಿ ನ್ಹಂವೆ?""ನಾ ಪುತಾ, ತು ಆತಾಂ ಮರ್ನಿ. ಜೀವಂತ ಆಸಾ. ಮೆಲೆಲೆ ಕೊಣಂಯ ಉಲಯತಾಚಿವೆ? ತು ಉಲಯತ ಆಸಾ ನ್ಹಂವೆ?""ತಶಿ ಜಾಲಯಾರಿ ಹಾಂವ ಕೆದನಾ ಮರತಂಲೊ?""ತು ಹೊಡು ಜಾತರಿ, ಮ್ಹಾಂತಾರೊ ಜಾವ್ನ ಮಾಗಿರಿ. ಆತ ನೂತಚೀ ರಾಕುಡ ಘೆವ್ನ ಘರಕಡೆ ಯೋ" "ಹಾಂವೆ ಹೋಡು ಆನಿ ಮ್ಹಾಂತಾರೊ ಜಾವಚೆ ಕೆದನಾ ಮ್ಹಣ ಸಾಂಗಲಯಾರಿ ಮಾತ್ರ ಘರಕಡೆ ಯೆತಾಂ"ತಾಗೆಲೆ ಆವಯ್ಕ ಆತಾಂ ಕಸಲೆ ಕರಚೆ ಮ್ಹಣ ಕಳನಿ. ಹಾಕಾ ಕಸಲೆ ಜಾವೊ ಸಾಂಗುನ ಘರಕಡೆ ಆಪೊವ್ನ ಹೊರಕಾ ಮ್ಹಣ ಚಿಂತುನ ತಿ "ಪಳೆ ಪುತಾ, ಜಲ್ಮಾಕ ಆಯಿಲೆ ಪ್ರತಿ ಏಕ್ಲ್ಯಾನಯಿ ಮೊರುಂಕ ಆಸಾ. ಖಾಡ ಆನಿ ಬೊಡ ಧವೆ ಜಾತರಿ ಮರತಾಚಿ" ಮ್ಹಣಾಲಿ. "ಖಾಡ ಆನಿ ಬೊಡ ಮ್ಹಲೆ ನ್ಹಂವೆ ತುವೆ, ತಶಿ ಮ್ಹಳಯಾರಿ ಕಸಲೆ""ಬೋಡ ಮ್ಹಳಯಾರಿ ತುಗೆಲೆ ಮಾತ್ಯಾಕೇಸು, ಖಾಡ ಆನಿ ಮೀಶೆ -ಹೆ ಗೊತಸ ನ್ಹಂವೆ- ಪಿಕುಕಾ. ತೆದನಾ ತುಂ ಮ್ಹಾಂತಾರೊ ಜಾತಾ""ಮೆಗೆಲೆ ಬೋಡ, ಖಾಡ ಆನಿ ಮೀಸೆ ಆತಽಂಚಿ ಪಿಕುಕಾ ಜಾಲಯಾರಿ ಕಸಲೆ ಕರಕಾ" ರೋಹಿಣಿಕ (ರಾಮುಲಿ ಆವಯ್ಕ) ಕಸಲೆ ಸಾಂಗಚೆ ಕಳನಿ. ಥೋಡೆ ವೇಳ ನೂಳಿತ ರಾಬ್ಲಿ, ನಂತರ "ಪಳೆ ಪುತಾ, ಸಕಾಣಿಂಚಿ ಉಟಾನು ದಾಟಽಚಿ ಧಂಯ್ಯ ದೊನೀ ಹಾತಾನ ಖಾವಕಾ. ಧಂಯ ಖಾಡಾಕ ಆನಿ ಮೀಸೆಕ ಲಾಗುನು ಧವೇಂಚಿ ಜಾತಾ. ನಂತರ ತೆ ದೊನ್ನಿ ಹಾತಾನ ಮಾತೆ (ಬೋಡ) ಪರಸುಕಾ. ತುಗೆಲೆ ಬೋಡ, ಖಾಡ ಆನಿ ಮೀಶೆ ಧವೇಂಚಿ ಜಾತಾ. ಜಾವಕಾ ಜಾಲಯಾರಿ ಆರ್ಶಾಂತ ಪಳೆ. ತು ಮ್ಹಾಂತಾರ ಸೊ ದಿಸತಾ""ತಶಿ ಜಾತರಿ ಮೊರಚೆ ಕೆದನಾ" "ಖಾಡ, ಬೋಡ ಧಂವೆ ಜಾತರಿ ತುಕಾ ತೀನಿ ಖಿಳಯೊ ಯೆತಾಚಿ. ತೆದನಾ ತು ಮರತಾ" ಅಶಿಚಿ ಕುಶಾಲೆಕ ಹಾಸತಚಿ ಮ್ಹಣಾಲಿ ತಿ."ತಶಿ ಜಾಲಯಾರಿ ಹಾಂವ ಘರಕಡೆ ಯೆತಾ" ಮ್ಹಣ ರಾಮು ಆವಯಿಲೆ ಸಾಂಗಾತಿ ಘರಕಡೆ ಗೆಲೊ.ಅಶೀಂಚಿ ಥೋಡೆ ದೀಸಾನಿ ತಾಗೆಲಿ ಆವಯ ಧುವೆತಂಯ ಚಾರಿ ದಿವಸ ರಾಬ್ಬುನು ಯೆತಾ ಮ್ಹಣ ರಾಮುಲಾಗಿ ಘರಕಡೆ ಪೊಳೊವ್ನ ಘೆವಚಾಕ ಸಾಂಗುವ್ನ ವತಾ. ಮಸ್ತ ದಿಸ್ದಾಕೂನು ರಾಕುವ್ನ ಆಶಿಲೊ ರಾಮು ಹೆರ್ದೀಸು ದಾಟಽಚಿ ಧಂಯ ಜಾವ್ಕಾನಂವೆ ಮ್ಹಣ ತೆದುಸು ರಾತ್ರಿ ಚಡ್ತೇಚಿ ದೂದಾಕ ಮೆಣಾಯಾಕ ಘಾಲ್ನ ಸೊಡತಾ. ತೆದುಸು ರಾತ್ರಿ ರಾಮುಕ ನಿದಯಿ ಪಣಾ. ಫಾಯ ಸಕಾಣಿಂಚಿ ಉಟಾವ್ನ ಧಂಯ ಖಾವ್ನ ಮ್ಹಾಂತಾರೊ ಜಾವ್ನ ಮೊರಚೆ ವಿಷಯೂಚಿ ಮಾಂತ್ಯಾಂತ ಘುಂವತನಾ ನೀದ ಕಂಯ ಪಡತಾ. ಹೆರ್ದೀಸು ಸಕಾಣೀಚಿ ಉಟಾವ್ನ ಧಂಯ ಕಶಿ ಜಾಲಾಂ ಮ್ಹಣ ಪಳವ್ನ ರಾಮುಕ ಮನಾಕ ಸಮಾಧಾನ ಜಾಲೆಂ. ಆವಯಿನ ಧಂಯ ಖಾವ್ನ ತೀನಿ ಖಿಳಯೊ ಯೆತರಿ ಮರತಾ ಮ್ಹಣ ಸಾಂಗಿಲೆ ಉಗಡಾಸಾಕ ಆಯಿಲೆ. ಹಾಂವೆ ಮರತರಿ ಮೆಗೆಲೆ ಮಡೆ ಕ್ಣೋಎ ಪುರಚೆ. ಆವಯಿ ಘರಾಂತ ನಾ, ಆನು ಘರಸೊಣ ಭಾಯರ ಗೆಲಲೊ ಸುಮಾರ ದಿವಸ ಜಾಲಯಾ ಯೆನಾಶಿ. ಮೆಗೆಲೆ ಮಡೆ ತಾನ್ನಿ ಯೆತನಾ ಕುಸ್ಸುನು ಘಾಣಿ ಯೇತ. ತಶಿ ಜಾವ್ನ ಮ್ಹಾಕಾ ಹಾಂವಂಚಿ ಪೊಂಡ್ ಕಾಣ್ ಪುರ್ನು ಘೆವಕಾ ಮ್ಹಣ ಮನಾಂತ ಚಿಂತುನ ಖೋರೆ, ಪಿಕಾಸ ಘೆವ್ನ ಹಿತ್ಲಾಂತ ತಾಗೆಲೆ ತಿತಲೆ ದೀಗ, ತೀನಿ ಫೀಟ್ ರೂಂದ ಆನಿ ತೀನಿ ಫೀಟ್ ಗುಂಡಿ ಪೊಂಡ ಕಾಡತಾ. ನಂತರ ಘರಕಡೆ ಖೋರೆ ಆನಿ ಪಿಕಾಸ ಹಾಣ ದವರತಾ. ಧಂಯ ಖಾವಚಾಕ ಬಸತಾ. ಆವಯ್ನ ಸಾಂಗಿಲೆ ತಶೀಂಚಿ ಖಾವ್ನ, ಹಾತ ಮಾತ್ಯಾಕ ಪುಸುವ್ನ ಘೆತಾ. ಆರ್ಶಾಂತ ಪಳಯತಾ. ಮ್ಹಾಂತಾರೊ ಜಾಲಾ. ಆನಿ ತೀನಿ ಖಿಳಯೊ ಯೆವಚೆ ತಿತಲೇಂಚಿ ಬಾಕಿ. ತಿತಲೆ ಭಿತರಿ ಹಾಂವೆ ಫೊಂಡಾಂತು ನಿದೊನು ಮಾತಿ ಘಾಲ್ನ ಗೆವ್ಕಾ ನ್ಹಂವೆ? ಮ್ಹಣ ಚಿಂತುನ ಹಿತಲಾಕ ವತಾ ಆನಿ ಪೊಂಡಾಂತ ನಿದತಾ. ಪೊಂಡಾಚೆ ವಯರಿ ಆಶಿಲಿ ಮಾತಿ ಹಾತಾನ ತಾಂಡುವ್ನ ಆಂಗಾರಿ ಘಾಲುಕ ಸುರುವಾತ ಕರತಾ. ತೆದನಾ ಏಕಿ ಖಿಳಿ ಆಯಿಲಿ. ವೆಗಿ ವೆಗಿ ಮಾತಿ ಗಾಲತನಾಚಿ ದೊನ್ನಿಚಿ ಖಿಳಿ ಆಯಲಿ. ತೊಂಡಾರಿ ಗಾಲಚೆ ಪುಡೇಚಿ ತಿನ್ನಿಚಿ ಖಿಳಿ ಯೆತಾ. ಆವಯ್ನ ಸಾಂಗಿಲೆ ತಶಿ ತೀನಿ ಖಿಳಯೊ ಯೆವ್ನ ಜಾಲೆ. ಆತ ಹಾಂವ ಮೆಲಾಂ. ತಶಿ ಜಾವ್ನ ಆನಿ ಮಾತಿ ಘಾಲುಕ ಜಾಯನಾ. ಮ್ಹಣ ತಶಿಂಚಿ ದೊಳೆ ದಾಂಪನ ನಿದತಾ.ತಾಣೆ ದೊಳೆ ಸೊಣ ಪಳಯತನಾ ಆಸಪಾಸ ಜನ ರಾಬಲ್ಯಾಂಚಿ. ತಾಗೆಲಿ ಆವಯಯಿ ಆಸಾ. ಆಂಗಾಕ ಸಗಳೆ ಉಜೊ ಯೆತಚಿ ಆಸಾ. ಹಾಣೆ ದೊಳೆ ಸೊಲೆಲೆ ಪೊಳೊವ್ನ ಥಂಯ ಆಶಿಲೆ ಜನಾನಿಂ ಏಕಕ್ಲೆ ಏಕೇಕ ನಮೂನೆ ಉಲೊಚಾಕ ಸುರುವಾತ ಕೆಲೆ. ಸಕಡಾನ ಮೆಳ್ನ ತಾಕಾ ಫೊಂಡಾತುಲ್ಯಾನ ವಯರಿ ಕಾಣ್ ಘರಕಡೆ ವ್ಹೆಲೆಂ. ತಾಕಾ ಸಮಂಚಿ ಚಮಕುಚಾಕ ತ್ರಾಣ ನಾತಿಲೆ ನಿಮತಿ ಉಕೊಳ್ನ ವ್ಹೆಲೆಂ. ಘರಕಡೆ ವರ್ನ ಮಾಂದರಿ ಘಾಲ್ನ ನಿದಾಯಿಲೊ ಪೊಂಡಾಂತು ನಿದಲೆಲೆ ಕಡೆನ ತಾಕಾ ಕಾಡ್ಳ್ಮೂಂಯಿ, ವಾಳ್ತೆಮುಂಯಿ, ಯೆಂಬೊ ಸಕಡ ಚಾಬಿಲೆ ನಿಮಿತಾನ ತಾಗೆಲೆ ಆಂಗ ಸುಜಲಾ. ಹೆ ಪೊಳವ್ನ ತಾಗೆಲಿ ಆವಯನ ರಡಚಾಕ ಸುರುವಾತ ಕೆಲೆ."ಕಸಲೆ ಪುತಾ, ಹಾಂವೆ ತುಕಾ ಘರಕಡೆ ಆಪ್ಪೊವ್ನ ಹಾಡಚೆ ಖಾತಿರಿ ತುಕಾ ತಶಿ ಸಾಂಗಿಲೆ ನ್ಹಂವೆ? ಕೋಣಯಿ ತಾಂಗೆಲೆ ಆಯಷ್ ಜಾಯನಾಶಿ ಮರನಾಂಚಿ. ತಾಂತೂಯೀ ಪ್ರಾಯ ಜಾಯನಾಶಿ ಧಂಯ ಖಾಲೆ ಸತಾನ ಮ್ಹಾಂತಾರೊ ಜಾವಚೆ, ಆನಿ ಖಿಳಯೊ ಆಯ್ಲೆ ಸತಾನ ಮರತಾತಿವೆ? ತಿತಲೆಯ ತುಕಾ ಕಳನಾಂವೆ?" ಮ್ಹಣಾಲಿ ರಾಮುಲಿ ಆವಯ. ಹೆ ಸಕಡ ಥಂಯ ರಾಬಿಲೆ ಜನ ಆಯಕತಾಚಿ. ನಂತರ ಜನ ತಾಂಗತಾಂಗೆಲೆ ಘರಕಡೆ ವತಾಚಿ. ವಾಟೆರಿ ವತನಾ ಹೋಚಿ ವಿಷಯ ಉಲ್ಲಯತ ವತ್ತಾಚಿ. "ಕಸಲೆ ಮ್ಹಾರಾಯಾ, ಮಾತ್ತೆ ಖಂವಸ ಅಶಿಲ್ಯಾನ ಕೆಲೆಲೆ ಕಾಮ ದುಸರ್ಯಾಂಕ ಜೈಲಾಕ ವಚ್ಚೆ ತಸಲೆ ಜಾತಾಶಿಲೆಂ. ತಾಗೆಲಿ ಆವ್ಸುಯೀ ಚಿಕೇಚಿ ತಶೀಕಿ ಮ್ಹಣ" ಹೆ ರಮಾನಾಥಾಲೆ ಉವಾಚ."ಯೆಂಚಿನ ಮಾರಾಯರೇ, ಪೆಟ್ ಕಮ್ಮಿದಾಯೆ ಮಾಲ್ತಿನ ಬೇಲೆ ಬೆತಕ್ಳ ಜೈಲಗ ಪೊಪುನಂಚಿನ. ಆಯೆನಾ ಆಪ್ಪೆಲಾ ಒಂತೆ ಅಂಚನೆನಾ ಪಾಣದ ತೊಜುಂಡ." ಮಹಾಬಲಾ ಮ್ಹಣಾಲೊ."ಕಿತೆ ಮಾರಾಯಾ, ಯೆ ಪಿರ್ಕಿನ ಕೆಲೆ ಕಾಮ ಬಾಕಿಚಾಂಕ್ ಜೈಲಾಕ್ ಧಾಡ್ಚೆ ತಸ್ಲೆ. ತಾಜಿ ಮಾಯಿಸುತಾ ತಸ್ಸೆಂತ್ ಕೀ ಮ್ಹಣ ಮಾಕಾ ದಿಸ್ತಾ." ಜೊಕಿಮ್ ಮ್ಹಣಾಲೊ. ಸಕಡಾನಯಿ ಉಲಯಲೆಲೆ ಏಕಚಿ. ಜಾಲಯಾರಿ ವಿಂಗಡ ಭಾಸ ಉಲಯತಲ್ಯಾನಿಂ ಪಿಸ್ಸೊ ಮ್ಹಣುಕ ವಾಪರಲೆಲೆ ಶಬ್ದ ಮಾತ್ರ ವೆಗಳ್ವೆಗಳೆ.ಹಾಂಗಾ ಘರಕಡೆ, ರಾಮುಕ ತಾಗೆಲಿ ಆವಯ ಆನಿ ಆಕ್ಕಾ ಸಮಾಧಾನ ಕರ್ನ ಆಂಗಾಕ ತೇಲ ಪುಸುವ್ನು, ಹುನಽಚಿ ಉದಕಾನಿ ನ್ಹಾಣಯತಾಂಚಿ. ಹೂನಹೂನ ಪೆಜ್ಜೆಚೆ ಜವಣ ಕೊರೊವ್ನು ಹೂನಶೆಂ ಪಾಂಗರುನು ನಿದಾಯಿತಾಚಿ.ತೆದನಾ ರಾಮು ತಾಗೆಲೆ ಆವಯಲಾಗಿ "ತುಮ್ಮಿ ಕೆದನಾ ಆಯಿಲಿಂಚಿ" ಮ್ಹಣ ನಿಮಗಿತಾ. "ತು ಆತ್ತ ನುತಽಚಿ ನಿದಕಾಡಿ. ಸಕಡ ವಿಷಯ ಫಾಯ ಸಕಾಣಿ ಉಲವ್ಯಾಂ." ಮ್ಹಣಾಲಿ ತಾಗೆಲಿ ಆವಯ. ಹೆರ್ದಿವಸ ರಾಮುನ ಉಟಾಯತನಾ ಗಂಟೆ ೧೦ ಜಾಲ್ಲಾ. ಪೊಂಡಾಂತು ತಿತಲೊ ವೇಳೂ ನಿದೊವನಯ ಕಾಲಿ ರಾತ್ರಿ ತಾಕಾ ಗಟ್ಟಿ ನೀದ. "ಕಸಲ ಪುತಾ, ಹಾಂವ ಏಕ ದಿವಸಾನ ಪರತ ಆಯಿಲೆ ನಿಮತಿ ಜಾಲೆಂ. ತುಗೆಲಿ ಆಕ್ಕಾಯಿ ತುಕಾ ಪೊಳೊವಚಾಕ ಯೆತಾ ಮ್ಹಣಾಲಿ. ತಶಿ ಜಾವ್ನ ಆಮ್ಹಿ ಕಾಲೀ ಆಯಿಲಿಂಚಿ. ಹಾಂಗಾ ಯೆತನಾ ತುಂವಯಿ ನಾತಿಲೆ ಪಳವ್ನು ಮಾಕಾ ಕಸಲೆ ಕರಚೆ ಮ್ಹಣ ಕಳನಿ. ಭಿತರಿ ವಾಸರಿಂತು ಧಂಯಾಚೆ ಆಯದನ ಆನಿ ನೆಲಾರಿ ಪಳೆಲೆ ಧಂಯ ಪಳವ್ನು ಮಾಕಾ ಫಕನಿ ಹಾಂವೆ ತುಗೆಲಾಗಿ ಸಾಂಗಿಲೊ ವಿಷಯ ಉಗಡಾಸಾಕ ಆಯ್ಲೊ. ನಂತರ ಹಾಂವೆ ಲಾಗಿಚೆ ಸಕಡಾಂಕ ಆಪವ್ನ ವಿಷಯ ತಾಂಕಾಯಿ ಸಾಂಗಲೊ. ಏಕ್ಕ್ಲೊ ಏಕೇಕ ದಿಕಾಕ ವಚುನು ನಂಯಿ, ಬಾಂಯಿ, ಗುಡ್ಡೊ, ತೋಡು ಖಂಚೆಯಿ ಸೊಣಾಶಿ ಪಳವ್ನು ಆಯಿಲೇಚಿ. ಪೆಂಟಾಚೆ ಜನಯಿ ಸಕಡ ಭರಲೆ. ಅಶಿಂಚಿ ಏಕಲೊ ಮುತುಚಾಕ ಮ್ಹಣ ಹಿತ್ಲಾಂತ ಗೆಲೆಲ್ಯಾಕ ಥಂಯಿ ತುಂ ಪೊಂಡಾಂತ ನಿದಲಲೊ ದಿಸುನ ಸಕಡಾನಿ ತುಕಾ ಜಾಗೆಯಲೆ. ನಂತರಚೆ ವಿಷಯ ತುಕಾ ಕಳಿತ ಆಸಾ ನ್ಹಂವೆ? ಆನಿ ಮುಖಾರಿ ತುಗೆಲಾಗಿ ಕಸಲೆಯ ಕುಶಾಲ ಉಲವಚಾಕ ನಾ ಸಾಯಬಾ. ಏಕ್ಕಾಏಕ ಕರ್ನ ಘೆವ್ನ ಮಾಗಿರಿ ಆಮ್ಮಿ ಬೊಡ ದಿವಕಾ ಪಡತಲೆ. ತುಗೆಲೆ ಆನ್ನಾಕ ಹೆ ಖಂಚೆಯಿ ಜವಾಬ್ದಾರಿ ನಾ. ಘರ ಸೊಣ ಗೆಲಯಾರಿ ವಾಪಾಸ ಕೆದನಾ ಯೆತಾಚಿ ಮ್ಹಣುಂಯಿ ನಾ." ಮ್ಹಣ ರಾಮುಲಿ ಆವಯ ರಡತಚಿ ಸಾಂಗತಾ. ತಶಿಚಿ ತಾಗೆಲಿ ಆಕ್ಕಾ ಆನಿ ಆವಯ ತಾಕಾ ಸದಽಂಚಿ ಬುದ್ಧಿ ಸಾಂಗತಾಚಿ. ತೊ ಚಿಕೆಚಿ ಹುಷಾರ ಜಾತಚಿ ತಾಗೆಲಿ ಆಕ್ಕಾ "ರಾಮು, ಆನಿ ಮುಖಾರಿ ಅಶಿ ಕರ್ನಕಾ. ತುಕಾ ಹಾಂಗಾ ಬೇಜಾರ ಜಾಲಯಾರಿ ಏಕ್ ಚಾರಿ ದಿವಸ ಮೆಗೆತಯ ಯೆವ್ನ ರಾಬ." ಮ್ಹಣ ತಾಕಾ ಸಾಂಗುನು ತಿ ತಿಗೆಲೆ ಗಾಂವಾಂಕ ವತ್ತಾ. ಜಾಲಯಾರಿ ರಾಮು ಮುಖಾರಿಯಿ ಮಸ್ತ ನಮೂನೆಚೆ ಅಸಲೇಚಿ ಕಾಮ ಕರ್ನ ಜನಾಲಾಗಿ ಚಿ.....ತೂ....... ಕರವ್ನ ಘೆತಾ. ------೦೦೦೦೦-----ಹೀ ಕಾಂಣಿ ಗುರುಪುರ ವೆಂಕಟ್ರಾಯ ಪ್ರಭು ಹಾಂಗೆಲಿ ಮ್ಹಾಲ್ಗಡಿ ಧುವ ರಮಾ ಮ್ಹಳ್ಯಾರಿ ನರಸಿಂಹ ಲಕ್ಷ್ಮಣ ಬಾಳಿಗಾ ಹಾಂಗೆಲಿ ಸಹಧರ್ಮಿಣಿ ಹಾನ್ನಿ ಸಾಂಗಿಲಿ.
0 ಕಾಮೆಂಟ್(ಗಳು):
Post a Comment