ಶ್ರೀಕೃಷ್ಣ ಸತ್ಯಭಾಮಾ ಸಂವಾದು

ಆಮ್ಗೆಲೆ ಬಂಟ್ವಾಳ ಶ್ರೀ ತಿರುಮಲ ವೆಂಕಟರಮಣ ದೇವಸ್ಥನಾಂತು ಪ್ರತಿ ವರುಷ ಮಾಘ ಶುದ್ಧ ತದಿಗೆ ದಾಕುನು ಅಷ್ಟಮಿ ತಾಂಯಿ ತೇರು ಚಲ್ತಾ. ಸುರುವೆಚೆ ದಿವಸು ಧ್ವಜಾರೋಹಣ ಜಾತ್ತಾ. ದೇವು ಯಜ್ಞಾಂಕ ವಚ್ಚುನು, ಸುತ್ತಬಲಿ, ಪೆಂಟಾಂತು ಉತ್ಸವು ಜಾತ್ತರಿ, ಗಾಂವ್ಜವಣ ಆಸ್ಸ. ತಾಜ್ಜೆ ನಂತರ ರಾತ್ರಿ ಗೋಪುರೋತ್ಸವು, ಪೆಂಟಾಂತು ಉತ್ಸವು, ವಸಂತ ಪೂಜಾ ಚಲ್ತಾ. ಹೆ ನಮೂನೆ ತೀನಿ ದಿವಸ ಚಲ್ತಾ. ಚಾರಿ ದಿವಸು ಮಾತ್ರ ಗವುಜಿ. ದೇವಾನ ನಂಯಿಂತು ಜಲಕ್ರೀಡೆ ನಂತರ ಮೃಗಬೇಟೆ, ರುಪ್ಯಾಚೆ ತೇರಾರಿ ಉತ್ಸವು, ಗೋಪುರೋತ್ಸವು, ವಸಂತ ಪೂಜಾ ಆದಿಲೆ ಚಲ್ತಾ. ಪಾಂಚಾ ದಿವಸು ಹೋಡು. ರಥಾರೋಹಣ. ತೆದುಸು ಹೋಡ ರಥಾರಿ ದೇವಾನ ಸಾಂಜ್ವಳೆ ೫.೦೦ ಘಂಟೆಕ ವಿರಾಜಮಾನ ಜಾಲ್ಲ್ಯಾರಿ ದೇವಳಾಚೆ ಭಿತ್ತರಿ ವತ್ತನಾ ಪಾಲ್ಪಾಲ್ಲೆ ಜಾತ್ತಾ. ತೇ ದಿವಸು ದೇವಾಕ ರಥಾರಿ ಯೇವ್ಚೆ ಕೊಡಿಯಾಲ್ ಮೊಗಾರ್ಯಾಚಿ ರಾಶಿ ಪಳಯಿಲ್ಯಾರಿ ಆಮ್ಗೆಲೊ ವೆಂಕಟರಮಣ ದೇವು ಮೊಗಾರೆ ಚೊ ಪಿಸ್ಸೊ ಮ್ಹಳ್ಳಲೆ ಸತ್ಯ. ಕಿತುಲೆ ಮ್ಹೊಲ ಆಸ್ಸ ಜಾಲ್ಯಾರೀ ಮೊಗಾರೆ ಉಣೆ ಯೆನಾ. ದೇವಾಲಾಗ್ಗಿ ತುಕ್ಕಾ ಮೊಗಾರೆ ದಿತ್ತಾ ಮ್ಹಣು ಮಾಗ್ಗುನು ಘೆತ್ತಿಲೆ ಖಂಡಿತ ತಾಗೆಲೆ ಭಕ್ತಾಂಕ ದಿತ್ತಾ. ತಸ್ಸಿಂಚಿ ಹೇ ದಿವಸಾ ನಂತರ ಹೆರ್ದಿವಸು ವಕ್ಕುಳ. ದೇವಾನ ವಕ್ಕುಳ ನಾಂವ್ಚೆ. ಉತ್ಸವು ಪೆಂಟಾಂತು ವಚ್ಚುನು ನಂಯಿಂತು ನಾಂವುನು ದೇವಳಾಚೆ ಭಿತ್ತರಿ ವತ್ತನಾ ದೇವಾಕ ಭಿತ್ತರಿ ಯೆನಾಸ್ಸಿ ತಾಗೆಲಿ ಬಾಯಿಲ ಸತ್ಯಭಾಮಾನ ಬಾಗಿಲ ಘಾಲ್ನು ಭಿತ್ತರಿ ಬೈಸುನು ದೇವಾಕ ಪ್ರಶ್ನಾ ಕರುಕ ಆಸ್ಸ. ಹಾಂಗಾ ದೇವು ವೆಂಕಟರಮಣು ಜಾಲ್ಯಾರೀ ತೋ ವಿಷ್ಣುಲೊ ಅವತಾರು ಮ್ಹಣು ಸಮಜುನು ಕೃಷ್ಣಾನ ಮೃಗಬೇಟೆಕ ವಚ್ಚುನು ವಾಪಾಸ ಘರಕಡೆ ಯೆತ್ತನಾ ಸತ್ಯಭಾಮಾನ ನಿಮ್ಗಿಲೆಲೆ ಪ್ರಶ್ನಾಚೆ ಪದ್ಯ ರೂಪಾಂತರ ಹಾಂಗಾ ದಿಲ್ಲಾ. ವಕ್ಕುಳೆ ದಿವಸು ಹೇ ಪದ್ಯ ಸಾಂಗನಾಚಿ. ಸಂಸ್ಕೃತಾನಿ ಆಸ್ಸುಚೆ ಶ್ಲೋಕ ಮ್ಹಣು ತಾಜ್ಜೆ ಅರ್ಥು ಮಾತ್ರ ಕೊಂಕಣಿಂತು ಸಾಂಗ್ತಾಚಿ. ಹೇ ಸಂವಾದು ರಚನಾ ಕೆಲ್ಲೆಲೆ ದಿ.ಬೊಳಂತೂರು ಕೃಷ್ಣ ಪ್ರಭು ಹಾನ್ನಿ. ಹೇ ಸಾಧಾರಣ ೧೯೪೦-೫೦ ಜಾಲ್ಲೆಲೆ. ಹಾನ್ನಿ ಕೊಂಕಣಿಂತು ಮಸ್ತ ರಚನಾ ಕೆಲ್ಲೆಲೆ ಆಸ್ಸ. ತೆ ಲಭ್ಯ ಜಾಲ್ಯಾರಿ ಹಾಂತು ಪ್ರಕಟ ಕರ್ತಾ.

ಸುರುವೆಚೊ ಅಧ್ಯಾಯು.

ಉಲ್ಲಾಸಾನ್ ಮೃಗಬೇಟೆಕ ಘೋರಡವೆಂತು

ಗೆಲ್ಲೋಲೊ ಕೃಷ್ಣನೇಕ

ಗೋಲ್ಲಾಂತಯಿ ಬೈಸುನು ಉಲ್ಲವುನು ಅಪರಾತ್ರಿ

ಜಾಲ್ಲೆಲಿ ಕೋಳ್ನು ವಗ್ಗಿ ಯೆವ್ನು ಘರ್ಲ್ಯಾಗಿ ೧

ಹಾತ್ತಾ ಬೊಟ್ಟಾನೇದ್ರಾಚಾ ಬಾಗ್ಲಾರೇವ್ನು ಪತ್ಯಾನ ಮಾರ್ನಾಪ್ಪೋಚ್ಯಾ

ಕೃತ್ಯಾ ಕ ಹಾಸ್ಸುನು ಸತ್ಯಾಭಾಮೇನ ವಿ ಚಿತ್ರರೀ ತೀಣೆ ನಿಮ್ಗಿಲೆ ೨

ಸತ್ಯಭಾಮಾ:- ಅಪರಾತ್ರಿ ಭಾಗ್ಲಾರೇವ್ನು ಮಾರ್ತಲೊ ಘನು

ನಿಪುಣು ಪುರುಷು ತೂ ಕೋಣು ?

ಕಪಟಿ ತುಗೆಲೆ ನಾಂವ್ ಕೃಪೆನ ಸಾಂಗುನು ಹೋಡು

ಉಪಕಾರು ಕರಿ ಅತ್ತ ಸಾಂಗುನು ಸತ್ಯ ೩

ಕೃಷ್ಣು :-ಮಾಧವು ಮಾಕ್ಕಾ ಆಪೈತಾತಿ

ಹ್ಯಾಧರಿತ್ರಿರಿ ಸರ್ವಯಿ

ಹೇ ದೇವಿ ತೂ ಬರಿ ಯಾದು ನಾತ್ತಿಲೆ ವರಿ

ವಾದಾಕ ಶುರು ಕೋರ್ನಯಿ ಪ್ರೀತಿನ ಚೋಯಿ ೪

ಸತ್ಯಭಾಮಾ:- ಸಂತ ಜನಾಂಲೊ ದೇವು ತೂ ಹೋಡು ವ

ಸಂತ ಮಾಧವು ಜಾಲ್ಯಾರಿ

ಶಾಂತ ಮನಾನ ವ ನಾಂತು ವೊಚ್ಚುನು ರಾಬ

ಸಂತೋಷು ಪಾವ್ನು ಭಾರಿ ವಚ ವದ್ಗಾರಿ ೫

ಕೃಷ್ಣು:- ವಿಷಯು ಸಾಂಗ್ತಾವ ಸ್ಪಷ್ಟ ವನಾಂತುಲೋ

ವಸವಂತು ನಂಯಿ ಶ್ರೇಷ್ಟ

ಋಷಿಂಕ ಬಾಧಕ ದುಷ್ಟ ಅಸುರ ಕುಲಾಕ ಅಂ

ಕುಶ ಹಾವಂ ಚಕ್ರಧಾರಿ ತೂ ದಯಕರಿ ೬

ಸತ್ಯಭಾಮಾ:- ಧೋರ್ನು ಚಕ್ರ ಹಾತ್ತಾಂತು ಮೃತಿಕೆ ಪಾತ್ರ

ಕೋರ್ನು ನಿತ್ಯಯಿ ಪೆಂಟಾಂತು

ಹೋರ್ನು ಥಂಥಯಿ ದ ವೋರ್ನು ವಿಕ್ತಲೋ ಕಲಾ

ಪೂರ್ಣು ಕುಂಬಾರುವೆ ತೂ ಭಾರಿ ಬುಧ್ವಂತು ೭

ಕೃಷ್ಣು:- ಪರಿ ಹಾಸ್ಯಾ ನಾಕ್ಕಾ ಚೋಯಿ ಭಾಮಾದೇವಿ

ಪುರೋ ಕರಿ ತೆ ರಾಬ್ಬಯಿ

ಖರೆ ಮಾಕ್ಕಾ ಮ್ಹಣ್ತಾತಿ ಧರಣೀಧರು ಮ್ಹಣು

ಸುರನರ ಸಕ್ಕಡಯಿ ಸಗ್ಳ್ಯಾನಯಿ ೮

ಸತ್ಯಭಾಮಾ:-ತ್ರಾಣಾನ ಭೂಯಿ ವಾಂವ್ಚೊ ಸರ್ಪಾಂತು ಪ್ರ

ಧಾನು ಮ್ಹೋಣೋನು ಘೆವ್ಚೋ

ದೋನಿ ಜಿಬ್ಬೆಂಚೊ ಪ್ರ ವೀಣು ಮಹಾಶೇಷು

ತೋವೆ ತೂ ಯೇವ್ನುಲ್ಲೊ ಚೊ ದಾಯ್ಯೆಚೊ ಮ್ಹೊಣ್ಚೊ ೯

ಕೃಷ್ಣು :- ಹೇ ಸತ್ಯಭಾಮಾ ಚೋಯಿ ತುಜ್ಜೆಸಲೇನ

ಹಾಸ್ಯಾಕ ಮನ ದೀವ್ನಯಿ

ದೋಷಿ ಕಾಳಿಂಗಾಕ ನಾಶ ಕೆಲ್ಲೊಲೊ ಹಾವಂ

ಹೇ ಸತ್ಯ ಪಟ್ಟಿ ನಯಿಂ ಚೋವ್ನುಲ್ಲಯಿ ೧೦

ಸತ್ಯಭಾಮಾ:-ಸಕ್ಕಡ್ಸರ್ಪಾಂಕ ವೈರಿ ಪಕ್ಷಾಂಗೆಲೊ

ಮುಖ್ಯಸ್ತು ಸೂತ್ರಧಾರಿ

ಪಾಕ್ಕ ಆಶ್ಶಿಲೊ ಅಂತರಿಕ್ಷಾರಿ ಭೊಂವ್ತಲೊ

ಸಾಕ್ಷಾತ ಗರುಡುವೆ ತೂ ಸದ್ಗುಣವಂತು ೧೧

ಕೃಷ್ಣು:- ಗುಣಮಣಿ ಭಾಮಾ ಮುಖ್ಯ ಮೃಗಯೇನಶ್ಶಿ

ದಣು ಪಾವ್ನು ಆಯ್ಯಿಲ್ಯಾಕ

ಅಣುಕುನ್ವಾದಾಕ ಶ್ರೀ ಗಣ ಘಾಲ್ಚೆ ನ್ಯಾಯವೆ

ನೆಣವೆಂತು ಶ್ರೀ ಹರಿಕ ಸಂಶಯಿತ್ಯಾಕ ೧೨

ಸತ್ಯಭಾಮಾ:- ಮಾಂಕ್ಡಾಲೊ ರಾಯು ಮ್ಹೊಣು ರಾನ್ನಾಂತುಲೆ

ರುಕ್ಕಾರಿ ಆಸ್ಚೆ ಸೊಣು

ದೆಕ್ಕಿಲೆ ಕಡೆ ಯೇವ್ನು ಠಕ್ಕ ಮೆಕ್ಕೊಳ್ಚಾಕ

ತುಕ್ಕಾ ಶಿಕ್ಕಯಿಲೋ ಕೋಣು ತೋ ಪ್ರವೀಣು ೧೩

ಕೃಷ್ಣು:- ಸಮಜುನು ಹರಿ ಶಬ್ದಾಕ ಮಾಂಕಡ ಮ್ಹೊಣು

ಅಮರಾಂತುಲರ್ಥು ಘೇವ್ನು

ಭ್ರಮೆನ ತುಗ್ಗೆಲೊ ಪ್ರಿಯ ರಮಣು ಶ್ರೀ ಕೃಷ್ಣಾಕ

ಶ್ರಮು ದಿವ್ಚೋ ಕ್ರಮು ನ್ಯಾಯವೆ ಸಾಂಗುಕಾ ತೂವೆ ೧೪

ಸತ್ಯಭಾಮಾ:-ಪ್ರಿಯು ಮ್ಹಳ್ಳೆಲಾಯ್ಕುನೇವ್ನು ಬಾಗಿಲಕಾಣು

ದಯ ಕೊರ್ಕಾ ಮ್ಹೊಣು ಸರ್ಪ

ಶಯನಾಲಿ ದಿವ್ಯ ಚಿನ್ಮಯ ಮೂರ್ತಿ ಚೋವ್ನು ಸಂ

ಶಯು ಪಾವ್ನು ತೀ ಮ್ಹಣಾಲಿ ಹಾಸ್ಸುನುಲ್ಯೆಲಿ ೧೫

ದುಸ್ರೊ ಅಧ್ಯಾಯು.

ಸತ್ಯಭಾಮಾ:-ದಣ್ವಲಿ ದಿವ್ಯ ಚರಣ ಧಾವ್ನು ಯೇವ್ನು

ಪೂರಾ ಗೋಪ ಸ್ತ್ರೀಯಾಂಗೆಲಿ ಘರಂ ಮೆಜ್ಜುಕಾಜಿ ಭೋವ್ನು

ಭಾರಿ ದಣು ಪಾವ್ಲೆ ಉಅಪಕಾರಾಚೊ ವಿಚಾರುಧೋರ್ನು ೧

ಕೃಷ್ಣು:- ವಚ್ಚನಿ ಗೋಪಾಲಾಂಥಯಿ ನಿಶ್ಚಯ ಹೇ ಪಟ್ಟಿನಯಿ

ಸ್ವಚ್ಛಮನ ಧೋರ್ನುಲ್ಲಯಿ ಸಚ್ಚರಿತ್ರೆ-ಸತ್ಯಭಾಮಾ ೨

ಕ್ರೂರ ಮೃಗ ಬಾಧಾ ಪರಿಹಾರ ಕೊರುಂ-ಕಾಜಿ ಬರಿ

ಘೋರಡ್ವೆಂತು ಸಹಜ ದೂರ ಗೆಲ್ಲೋ-ಲ್ಹಾವ ನಿಜ ೩

ಸತ್ಯಭಾಮಾ:-ಗಾಂಧಾಚೋ ಪರ್ಮಳು ಮಾಕ್ಕಾ ಸಂದರ್ಭು ಕಳೈತಾಹಾಕ್ಕಾ

ಚಂದಾಯೆಚೆ ಉತ್ರಾನ ನಿ ಸಂದೇಹು ಹೊ-ಜಾತ್ತಾ ದೃಢ ೪

ಕೃಷ್ಣು:- ಗೆಲ್ಲೆಲೆ ತ್ಯಾ-ರಾನ್ನಾಂತುಲಿ ಪುಲ್ಲೆಲೆಲಿ-ಪುಲ್ಲಾಂಗಾರಿ

ಪಳ್ಳೆಲಿಂತಿ-ತಾಜ್ಜೊ ಪರಿ ಮಳು ಪಳೆ ಹೇ ಸುಂದರಿ ೫

ಸತ್ಯಭಾಮಾ:-ಸಾಂಗಾತಿ ಕಾ-ಯಿ ಸಂದಾಯ ಶೃಂಗಾರ ಚೇ-ಷ್ಟೆಚೆ-ಘಾಯ

ಚಾಂಗ ಜಾವ್ನು-ದೆಕ್ಯೆತ್ತಾತಿ ವಿಂಗಡ ಆಂ ಗಾರಿ ಭರಿ ೬

ಕೃಷ್ಣು:- ಸ್ವರ್ಣ-ಕೇದ-ಕೀಚೆ ಆನಿ ಚೂರ್ನಿಕಾಂಟೆ-ಲಾಗ್ಗುನಶ್ಶಿ

ಶೀರ್ನು ಜಾಲ್ಲೆ-ಲೆಹೇ ಘಾಯ ಪೂರ್ಣಮಿ-ಚಂದಿರ ಮುಖಿ ೭

ಸತ್ಯಭಾಮಾ:-ಚಾಂಟ ಕಾಡ್ತಾ-ನಾ ಪಾವ್ಲಾಂಕ ಕಾಂಟೆ ಲಾಗ್ಗು-ನಶ್ಶಿ ಘಾಯ

ವಂಟಾಕ ಜಾ-ತ್ತಾತಿ ಶ್ರೀ ವೈ ಕುಂಟ ಪತಿ-ಕಾಶ್ಚರ್ಯ ಹೇ ೮

ಕೃಷ್ಣು:- ಶಂಖನಾಕ್ಕಾ-ರಾನ್ನಾಂತು ಮೃ ಗಾಂಕಧಾಂವ್ಲಾ-ಚಾಕ ಘಟ್ಟಿ

ಶಂಕು ವಾಚ್ಯ ಲ್ಯಾನ ವಂಟ ಪಂಕಜಾಕ್ಷಿ ಭೆತ್ಲೆ ಅಶ್ಶಿ ೯

ಸತ್ಯಭಾಮಾ:-ಅಶ್ಶಿ-ಹೂಮ ಸರ್ವಾಂಗಾರಿ ದಿಸ್ಸೂಕ ಕಾ ರಣತರಿ

ಆಸ್ಸುಕಾ ಮ್ಹೊಣ್ಯೇತ ನೈವೆ ಕಸ್ಸಿ ತೆವ್ಯವಿಸ್ಸರ್ಲೆವೆ ೧೦

ಕೃಷ್ಣು:- ತುಕ್ಕಾವಗ್ಗಿ-ಚೊವ್ಕಾ ಮ್ಹೊಣು ಲೆಕ್ಕುನು ವೇ-ಗಾನ ಯೇವ್ನು

ಮಾಕ್ಕಾ ಪಳೆ-ಆಯ್ಲಿ ಹೂಮ ದೆಕ್ಕುಕೆತ್ತಾ-ಮೊಣ್ಚೆ ಸಮ ೧೧

ದೇವಿ ಆಯ್ಕ-ಹೆ ಪ್ರಮಾಣ ಪೂರ್ವಕ ಸಾಂ-ಗನ ಪೂರ್ಣ

ದೇವು ಸಾಕ್ಷಿ-ಗೆಲ್ಲೊಲ್ಹಾವ ಮೃಗಯೇಕ ಸತ್ಯ ಮ್ಹೊಣು ೧೨

ಸತ್ಯಭಾಮಾ:- ಜಾಣ ಸತ್ಯ್ ಮಿಥ್ಯ ಹಾವ ಆಣ ದಿವ್ಚಿ-ನಾಕ್ಕಾ ಸರ್ವ

ತ್ರಾಣಿ ತುಮ್ಮಿ ಕೊರ್ಚೆ ತೆಂ ಪ್ರ ಮಾಣ ಖಂಚೆ ಸಾಂಗುಯೇತ

ತಿಸ್ರೋ ಅಧ್ಯಾಯು

ಕೃಷ್ಣು:- ಮ್ಹಳ್ಳೆಲೆ ಸತ್ಯ ಮ್ಹೊಣು ನಿರ್ಭೀತಿನ

ಭರ್ಲೆಲ್ಯಾ ನ್ಹಂಯ್ತುಡ್ಡುನು

ಕೆಲ್ಲಾರಿ ಚಾಯ್ತ ವೆ ಹೊಳ್ಳೆ ಪ್ರಮಾಣ ಹೇ

ಉಲ್ಲಯೀ ಶಂಕಾ ಸೊಣ್ಣು ಸತ್ಯನಮ್ಗುನು ೧

ಸತ್ಯಭಾಮಾ:-ಕ್ಷೀರಸಾಗರ ಶಯನು ಮ್ಹಳ್ಳೆಲೆ ನಾಂವ

ಪೂರಾ ವಚ್ಚನಿ ವಿಸ್ಸೋರ್ನು

ದೂರ ಇತ್ಯಾಕ ಭಾ ಗೀರತಿ ಜನ್ಮಾಕ

ಕಾರಣ ನಾರಾಯಣು ಮಳ್ಯಾರಿ ಕೋಣು ೨

ಕೃಷ್ಣು:- ಶಿಷ್ಯ ಗೋಪಾಲಾಮ್ಕನಿ ಗೋಪಿಂಕ ಹ್ಯಾ

ದೃಷ್ಟಿನ ಆಜಿ ಚೋಯ್ನಿ

ಸ್ಪಷ್ಟ ಹೇ ಸಾಂಗನಾ ಕಷ್ಟ ನಾತ್ತಿಲೆಂ ಬರಿ

ದುಷ್ಟ ಸರ್ಪಾಕ ಧೋರ್ನು ಪ್ರಮಾಣ ಕೋರ್ನು ೩

ಸತ್ಯಭಾಮಾ:-ಶೇಷಾರಿ ಸುಖ ಶಯನ ಕರ್ತಲ್ಯಾಕ ವಿ

ಶೇಷವೆ ಹೆ ಪ್ರಮಾಣ

ದೋಷಿ ಕಾಳಿಂಗಾಕ ನಾಶ ಕೆಲ್ಲೋಲೊ ಕೋಣೆ

ಹೇ ಸರ್ವ ಕೋಣ ನೆಣ ತುಮ್ಗೆಲೆ ಗುಣ ೪

ಕೃಷ್ಣು:- ಹಾತ್ತಾಂತು ಉಜ್ಜೋ ಧೋರ್ನು ಸಾಂಗನ ಪೂರ್ಣ

ವೃತ್ತಾಂತ ಸತ್ಯ ಮ್ಹೋಣು

ವ್ಯರ್ಥ ಹೋ ಸಂಶಯು ಇತ್ಯಾಕ ಪ್ರತ್ಯೇಕ

ಗೋತ್ತಾಸ್ಸುನಶ್ಶಿ ತೂಂವೆ ಮ್ಹೋಣ್ಯೇತವೆ ೫

ಸತ್ಯಭಾಮಾ:- ಉಜ್ಜೊ ತುಮ್ಗೆಲೆ ಪ್ರಭೆಕ ಸಹಜ-ಭೀವ್ನು

ಭಾಜ್ಜತ- ಮ್ಹೊಣುನೇಕ

ಸಜ್ಜನ ಸಾಧು ಸ ರ್ವಜ್ಞಾನಿ ಸಕ್ಕಡ

ರಾಜ್ಯಾಂತು ಪ್ರಕಟ ಕೆಲ್ಲಾ ಮಾಕ್ಕಾಯಿ ಕಳ್ಳಾ ೬

ಕೃಷ್ಣು:- ರಾನ್ನಾಂತು ಮೃಗಬೇಟೆಕ ಗೆಲ್ಲೆಲೊ ಸತ್ಯ

ಮ್ಹೊಣು ದೇವಾಂಲೆದ್ರಾಕ

ಕೋರ್ನು ಪ್ರಮಾಣ ಸಂ ಪೂರ್ಣ ಸಂಶಯ ಸಮಾ

ದಾನ ಕರೀನ ವಾಕ್ಯ ಸಾಂಗಿಲೆ ಆಯ್ಕ ೭

ಸತ್ಯಭಾಮಾ:- ಪೂರಾದೇವ ದೇವಾಕ ಹೆಂ ಪ್ರಮಾಣೇಕ

ಭಾರಿ ಕಠಿಣವೇ ಮುಖ್ಯ

ಸಾರಾಂಶು ಕಳ್ಳೊ ಠ ಕಾರಿ ಪ್ರಮಾಣ ಶಂ

ಭ ರಿ ಕೆಲ್ಯಾರಿ ಸತ್ಯ ಕೋಣ ಮ್ಹಣತ ೮

ಕೃಷ್ಣು:- ತೂಕಾಚ್ಯಾ ತ್ರಾಸಚೇಕ ದಾಲ್ಯಾಂತು ಪ್ರ

ತ್ಯೇಕ ಬೈಸುನಾನ್ನೇಕ

ತೇಖಾಲಿ ಸೊಣ್ಣು ಲೆ ಕ್ಕಾಕ ದೋನ್ನಿಯಿ ಸಮ

ತೂಕ ತುಕ್ಕುನು ದಾಕೈನ ಸಂತೋಷಾನ ೯

ಸತ್ಯಭಾಮಾ:- ಶುರ್ವೇಕ ನಾರದಾಕ ದಿವ್ವೊನು ದಾನ

ಗರ್ವ ಮೊಡ್ಚಾಕ ಯೇಕ

ಜಾವ್ವಾಶಿ ತುಕ್ಕಿಲೆ ಸರ್ವಯಿ ವಿಸ್ಸರ್ನಿ

ಪೂರ್ವಾಂತು ಚೊಯ್ಲ್ಯಾ ತುಲಾ ರೋಪಣ ಲೀಲಾ ೧೦

ಪರಿಹಾಸ್ಯ ಪುರೋ ವಾದಾನ ತೇಂ ಅಜ್ಞಾನ

ಪರಿಹಾರ ಜಾಲ್ಲೆ ಪೂರ್ಣ

ಕರುಣಾಳು ತುಂಮ್ಗೆಲ್ಯಾ ಚರಣಾಂಕ ಭಕ್ತೀನಃ

ಶರಣಾಯ್ಲ್ಯಾ ಸತ್ಯಭಾಮಾ ಕರ್ಯಾತಿ ಕ್ಷಮಾ ೧೧

ಕೃಷ್ಣು:- ದೇವಿ ಹೋ ಬುದ್ಧಿವಾದು ಸಮ್ಜುನು ಘೆ ತೂ

ದೇವಾಲೊ ಆಶೀರ್ವಾದು

ಪಾವನ ಪದ ಭಕ್ತಿ ಭಾವನ ವಟಪುರ

ಶ್ರೀ ವೆಂಕಟೇಶಾರ್ಪಣ ಕ-ರಿ ಮನಾನ ೧೨