ಪದ್ಯಾ ರೂಪಾಚೆ ಸೀತಾಕಲ್ಯಾಣ

ಆಯಿಕರೆ ತು ಪುತ್ತಾ ಸಾಂಗ್ತಾ ತುಕಾ ಕಥಾ
ಲೋಕ ಸರ್ವ ವ್ಯಥಾ ದೂರ ಕರ್ಚಿ
ಸೂರ್ಯವಂಶಾರಾಯು ಜಾಲ್ಲೊ ದಶರಥು
ಅಜರಾಯಾ ಪೂತು ಯಶವಂತು.

ತಾಕ್ಕಾ ತೆಗ್ಗ ಬಾಯಿಲೊ ಕೌಸಲ್ಯಾ, ಕೈಕೆಯೀ
ಆನಿ ಸುಮಿತ್ರಾಬಾಯಿ ರೂಪವಂತಿ
ತೆಗ್ಗಯೀ ಬಾಯಿಲಾಂಕ ಜಾಲ್ನಾಂತಿ ಬಾಲಕ
ಅಶ್ಮೊಣ ರಾಯಾಕ ಜಾಲ್ಲಿ ಚಿಂತಾ.

ಚಿಂತುನು ರಾಯನ ಪುರೈತಾಕ ಆಪಯಿಲೆ
ಆನಿ ತಾಗೆಲ್ಯಾ ನಿಮಿಗಿಲೆ ಇತ್ತೆ ಕೊರ್ಕಾ.
ಪುರೈತ್ಯಾನ ಸಾಂಗ್ಲೆ ಯಜ್ಞು ಕೊರ್ಕಾ ಮ್ಹಣು
ದಿತ್ತಲೊ ನಾರಾಯಣು ತುಕಾ ಪೂತ.

ತಶ್ಶಿ ಯಜ್ಞು ಕೆಲ್ಲೊ ದೇವು ಪ್ರಸನ್ನ ಜಾಲ್ಲೊ
ಆನಿ ರಾಯಾಕ ದಿಲ್ಲೊ ಪಾಯಸು.
ರಾಯಾನ ತೊ ಪಾಯಸು ತೆಗ್ಗಯಿ ಬಾಯಲ್ಯಾಂಕ ದಿಲ್ಲೊ
ತಾಂಕಾ ಗರ್ಭು ಭರ್ಲೊ ನವಮಾಸು.

ಕೌಸಲ್ಯಾಲೆ ಗರ್ಭಾಂತು ಜಾಲ್ಲೊ ರಾಮಚಂದ್ರು
ಸರ್ವಗುಣಪೂರ್ಣು ರಾಮಚಂದ್ರು.
ಕೈಕಯಿ ಗರ್ಭಾಂತು ಜಲ್ಮಲೊ ಭರತು
ರಾಮಭಕ್ತಿರತು ಗುಣವಂತು.

ಸೌಮಿತ್ರೆ ಗರ್ಭಾಂತು ಜಾಲ್ಲೊ ಲಕ್ಷುಮಣು
ಆನಿ ತೊ ಶತ್ರುಘ್ನ ಜವಳಾಂತು.
ಚೌಗಯಿ ಬಾಲಾಂಕ ವಿದ್ಯಾ ಬುದ್ಧಿ ಭರ್ಲಿ
ರಾಯಾನ್ ತಾಂಕಾ ಕೆಲ್ಲಿ ಚೌಲು ಮುಂಜಿ.

ಕೌಶಿಕ ಮುನಿನ ರಾಮಲಕ್ಷ್ಮಣಾಂಕ
ಯಜ್ಞ ರಕ್ಷಣೇಕ ಅಶ್ಶಿ ಮ್ಹಣು
ಆಪ್ಪೊವುನು ಹೊರ್ನು ತಾಟಕಿ ಮಾರೊನು
ಕೆಲ್ಲೊ ಯಜ್ಞು ಪೂರ್ಣ ಕೌಶಿಕಾನ.

ತಶ್ಶಿ ಮುಕಾರ್ಸುನು ವತ್ತನಾ ವಾಟ್ಟೆರಿ
ಪಾಯ್ ಲಾಗ್ಲೊ ಶಿಲೆಕ ಶ್ರೀರಾಮಾಲೊ.
ಅಹಲ್ಯಾ ತೀ ದೇವಿ ಶಿಲೆಂತು ಉಠಾಯಿಲಿ
ಶಾಪ ಮುಕ್ತಿ ಜಾಲ್ಲಿ ಆಯಿಕ ಬಾಳಾ.

ಜನಕ ಮ್ಹಣು ರಾಯು ತಾಗೆಲಿ ಧುವ ಸೀತಾ
ಲೋಕಾಚಿ ತಿ ಮಾತಾ ಲಕ್ಷ್ಮೀದೇವಿ.
ತಿಜ್ಜೆ ವಿವಾಹಾಕ ಬಾಪ್ಸುನ್ ಕೆಲ್ಲೆ ಪಣ
ಕೋಣ ಕರ್ತಾ ಖಂಡನ ಧನುಷ್ಯಾಚೆ.

ತಾಕ್ಕಾ ದಿತ್ತಾ ಪುತ್ರಿ ಲೋಕಾಚಿ ಜನಿತ್ರಿ
ಹೇ ಉತ್ತರ ಖಾತ್ರಿ ಅಶ್ಶಿ ಮ್ಹಣು.
ತೆವೇಳಾ ರಾಮಾಂಕ ಆನಿ ಲಕ್ಷ್ಮಣಾಂಕ
ಘೆವ್ನು ಆಯಿಲೊ ತಂಯಿ ತೊ ಕೌಶಿಕು.

ತಂಯಿ ಮ್ಹಳ್ಯಾ ಸಭೇರಿ ರಾಯಾಂಚಾ ಮುಖಾರಿ
ಉಬಾರ್ನು ತೆ ಭಾರಿ ಧನುಷ್ಯ
ಕ್ಷಣಾಂಚಾ ಭಿತ್ತರಿ ರಾಮಾನ ಕೆಲ್ಲೆ ಕುಡ್ಕೆ
ಖಾಲಿ ಪಳ್ಳೆ ಬೊಡ್ಕೆ ಇತರಾಂಚೆ.

ಪಣಾಚೆ ಪ್ರಮಾಣ ತೆದ್ನಾ ರಾಮಾಗಳ್ಯಾ
ಸೀತೆನ ಘಾಲ್ಲಿ ಮಾಳಾ ಮೊಗಾರ್ಯಾಚಿ.
ರಾಮಾಚಾ ಭಾವಾಂಕ ಸೀತೆಚಾ ಭೈಣ್ಯಾಂಕ
ದೀವ್ನು ಜಾಲ್ಲಿ ವ್ಹಾರ್ಡಿಕ ಚೊಗ್ಗಾಂಕಯಿ.

ಅಸ್ಸಲಿ ಹೀ ಕಥಾ ಆಯಿಕಲ್ಯಾ ಮಾತ್ರಾನ
ದಿವ್ವೊ ತುಕ್ಕಾ ಕಲ್ಯಾಣ ರಾಮಚಂದ್ರು.
ಕಾನ ದಿವ್ನು ಆಯಿಕ ಸಾಂಗ್ತಾ ತುಕಾ ಗೂಢ
ನಾಂವ ಬಹು ಗೋಡ ಶ್ರೀರಾಮಾಲೆ.

ಶ್ರೀ ರಾಮು ತೊ ದೇವು ಆದಿ ನಾರಾಯಣು
ಲಕ್ಷ್ಮೀಲೊ ರಮಣು ಭಗವಂತು.
ಸೀತಾ ಆದಿಮಾಯಾ ಲೋಕಾಚಿ ತಿ ಆಯಿ
ಲಕ್ಷ್ಮಣು ತೊ ಶಯ್ಯಾ ಶ್ರೀ ವಿಷ್ಣುಲೊ.

ವಾಯುದೇವಾ ಪೂತು ತಾಜ್ಜೆ ನಾಂವ ಹನುಮಂತು
ರಾಮಲೊ ತೊ ದೂತು ಬಲವಂತು.
ಹಾನ್ನಿ ಘೆತ್ಲೊ ಜನ್ಮು ರಾವಣಾ ಮಾರ್ಚಾಕ
ಹರಣ ಕೊರ್ಚಾಕ ಭೂಭಾರು.

ರಾಮು ಲೋಕಾಪಿತು ತೊಚಿ ತುಕಾ ಆನು
ದಿವ್ವೊ ತುಕ್ಕಾ ಮಾನು ಹೇ ಲೋಕಾಂತು.
ತುಕ್ಕಾ ಪೂರ್ಣ ವಿದ್ಧಿ ಆನಿ ಬರೀ ಬುದ್ಧಿ
ದಿವ್ವೊ ಸರ್ವ ಸಿದ್ಧಿ ರಾಮಚಂದ್ರು.

ಸೀತಾ ಲೋಕಾಮಾತಾ ತೀಚಿ ತುಕಾ ಆವ್ಸು
ದಿವ್ವೊ ತುಕ್ಕಾ ಪಾವ್ಸು ಸುವರ್ಣಾಚೊ.
ರಾಮಾಚೊ ತೊ ಭಾವು ದಿವ್ವೊ ತುಕ್ಕಾರೋಗ್ಯ
ಹೇಂಚಿ ಹೋಡ ಭಾಗ್ಯ ಹೇ ಜನ್ಮಾಂತು.

ರಾಮಾಲೊ ತೊ ದೂತು ಸಾಕ್ಷಾತ್ ತೊ ವಾಯು
ದಿವ್ವೊ ತುಕ್ಕಾ ದೀರ್ಘಾಯು ದಯ ಕೊರ್ನು.
ರಾಮು ತುಕ್ಕಾ ರಕ್ಷಕು, ಲಕ್ಷ್ಮಣು ಪಾಲಕು
ಮಾರುತಿ ಶಿಕ್ಷಕು ಭಕ್ತಿಚೊ.

ರಾಮು ಸೀತಾ ಲಕ್ಷ್ಮಣು ಆನಿ ತೊ ಮಾರುತಿ
ಧವೊರೊ ತುಜ್ಜೇರಿ ಪ್ರೀತಿ ಸದಾಕಾಲ.
ಆಯ್ಕರೇ ತೂ ಬಾಳಾ ಕರಿ ರಾಮ ಭಕ್ತಿ
ತುಕ್ಕಾ ಸರ್ವ ಶಕ್ತಿ ದಿತ್ತಾ ರಾಮು.

ಪೂರ್ಣ ಕೆಲ್ಲಿ ಕಥಾ ಸೀತಾ ಕಲ್ಯಾಣಾಚಿ.
ಮುಕಾವಯಿಲಿ ಕಾಂಣಿ ಸಾಂಗ್ತಾ ಪಾಲ್ಯಾ.
ವಾಚಕಾಂಚಿ ಇಚ್ಛಾ ರಾಮು ದಿತ್ತಾ ತುಮ್ಕಾ
ಆತ್ತ ನಿದ್ದೆ ಬಾಳಾ ಪಾಳ್ಯಾಂತು.
---೦೦೦೦----