ತೆಂಡ್ಲ್ಯಾಚಿ ಕಾಂಣಿ

ಬಂಟ್ವಾಳಾದಾಕುನು ತೀನಿ ಮೈಲಿ ದೂರ ಮಣಿಹಳ್ಳ ಮ್ಹಳ್ಳೆಲಿ ಏಕಿ ಸಾನಿ ಹಳ್ಳಿ. ಧರ್ಮಸ್ಥಳಾಕ ವಚ್ಚೆ ವಾಟ್ಟೆರಿ ರಸ್ತ್ಯಾಚಾ ಬಗಲಾಂತುಚಿ ಆಸ್ಸ. ಥಂಯಿ ಮಸ್ತ ಕಾಳಾಚೆ ಫುಡೆ ಏಕು ಜಮಿನ್ದಾರ ಆಶಿಲೊ. ತಾಗೆಲೆ ನಾಂವ್ ರಾಮರಾಯ. ಜಮಿನ್ದಾರ ಮ್ಹಣತರಿ ತಾಕ್ಕಾ ಮಸ್ತಿ ಆಸ್ತಿ ಪಾಸ್ತಿ ಆಶ್ಶಿಲಿ. ಉತ್ಪತ್ತಿ ಚಾಂಗ ಜಾವ್ನು ದುಡ್ಡುಂಯಿ ಆಶಿಲೊ. ಸುಂದರಿ ಬಾಯಿಲಯಿ ಆಶ್ಶಿಲಿ. ತಿಗೆಲೆ ನಾಂವ್ ಕಮಲಾವತಿ ಮ್ಹಣು. ತಾಂಕಾ ಖಂಚಾಕಯ ಉಣೆ ಮ್ಹಳ್ಳಲೆ ನಾತ್ತಿಲೆ, ಸುಖಾರಿ ದೊಗ್ಗಂಯಿ ಜೀವನ ಕರ್ನು ಆಶ್ಶಿಲಿಂಚಿ.
ಜಾಲಯಾರಿ ಹೆ ಸಕ್ಕಡ ಥೊಡೆ ಕಾಳ ಮಾತ್ರ. ತಾಜೆ ನಂತರ ತಾಂಕಾ ಮನಾಂತು ಖಂಥಿ ಸುರು ಜಾಲ್ಲಿ. ಏಕ ಚೆರ್ಡು ಆಶ್ಶಿಲೆ ಜಾಲಯಾರಿ ಆಮ್ಗೆಲೆ ವಂಶ ಮುಖಾರಿ ವತ್ತಲೆ ನಂವೆ? ದೇವಾನ ತಾಂಕಾ ಸಕ್ಕಡ ದಿಲ್ಲಾ. ಚೆರ್ಡುಂವ ಮಾತ್ರ ದೀನಿ ಮ್ಹಳ್ಳೆಲೀಚಿ ತಾಂಗೆಲಿ ಖಂಥಿ. ಮರಚೆ ಕಾಲಾರಿ ಆಮ್ಕಾ ಪಳಯಿತಲೆ ಕೋಣ? ತಾಜ್ಜೆ ಖಾತಿರಿ ತಾನ್ನಿ ಸದಂಚಿ ದೇವಾಲಾಗ್ಗಿ ಏಕ ಚೆರ್ಡು ದೀ ಮ್ಹಣು ಮಾಗ್ಗುಕ ಸುರು ಕೆಲ್ಲೆ. ಜಾಲ್ಯಾರಿ ಚೆರ್ಡುಂವ ಜಾಯ್ನಿಂಚಿ. ಕಡೇಕ ದೊಗ್ಗಾನಂಯಿ ರಡ್ತಚಿ "ಏಕ ತೆಂಡ್ಲ್ಯಾ ಯಿತುಲೆ ಸಾನ ಚೆರ್ಡು ಪುಣಿ ದೀ. ತಾಂತುಚಿ ಆಮ್ಮಿ ತೃಪ್ತಿ ಪಾವ್ತಾಂಚಿ." ಮ್ಹಣು ದೇವಾಲಾಗ್ಗಿ ಮಾಗ್ಗುಕ ಸುರುಕೆಲ್ಲೆ. ದೇವಾಕಯಿ ಹಾಂಗೆಲೆ ವಯರಿ ಕರುಣ ಯೆವ್ನು ತಾನ್ನಿ ಮಾಗ್ಗಿಲೆ ತಸ್ಸಿಂಚಿ ಜಾವೊ ಮ್ಹಣು ವರ ದಿಲ್ಲೊ.
ಜಮಿನ್ದಾರಾಲಿ ಬಾಯಲ ಥೊಡೆ ಕಾಳಾನಂಚಿ ಗುರ್ಭಿಣಿ ಜಾಲ್ಲಿ. ತಾಂಕಾ ಮಸ್ತ ಸಂತೋಷ ಜಾಲ್ಲೊ. ದೇವಾನ ದೋಳೆ ಸೊಳ್ಳೆ ನಂವೆ? ಪುರೋ, ಆನಿ ಕಸ್ಸಲ್ಯಾಚಿ ಆಶಾ ನಾ. ಚಂದಾಯೇರಿ, ಸುಖಾರಿ ಬಾಳಾಂತಿ ಜಾವ್ನು ಚಂದ, ಆರೋಗ್ಯ ಜಾವ್ನು ಆಸ್ಸುಚೆ ಏಕ ಚೆರ್ಡು ಜಾಲ್ಯಾರಿ ಪುರೊ ಮ್ಹಣು ತಾನ್ನಿ ಚಿಂತ್ಲೆ. ಸಕ್ಕಡ ಜನಾನಿ ನಂವ ಮ್ಹಹಿನೆ ಜಾತ್ತರಿ ಬಾಳಾಂತಿ ಜಾವ್ಚೆ ಜಾಲ್ಯಾರಿ ಜಮಿನ್ದಾರಾಲಿ ಬಾಯಲ ಕಮಲಾವತಿ ಸಾತ ಮಾಸಾರೀಚಿ ಬಾಳಾಂತಿ ಜಾಲ್ಲಿ. ತಾನ್ನಿ ದೇವಾಲಾಗ್ಗಿ ಮಾಗ್ಗುನು ಘೆತ್ಲ್ಯಾವರೀಚಿ ತೆಂಡ್ಲ್ಯಾ ತಿತುಲೆ ಲ್ಹಾನ ಚೆಲ್ಲೀ ಚೆರ್ಡು ಜಾಲ್ಲೆ. ತೆ ಚೆರ್ಡಾಕ ಕುಸುಮಾವತಿ ಮ್ಹಣು ನಾಂವ್ ದವರಲೆ. ಚೆರ್ಡು ಪ್ರಾಯೇನ ಮಾತ್ರ ಹೋಡ ಜಾಲ್ಲೆ. ಆಕಾರು ಮಾತ್ರ ಸೋಳಾ ವರುಷ ಜಾಲ್ಯಾರಿ ತೆಂಡ್ಲ್ಯಾ ತಿತ್ಲೇಂಚಿ. ತೆ ಪಳವ್ನು ಜಮಿನ್ದಾರಾಕ ಆನಿ ತಾಗೆಲಿ ಬಾಯಲ ಕಮಲಾವತಿಕ ಬೇಜಾರ ಜಾವ್ನು ಘರಾಚೆ ಆನಿ ತಾಂಗೆಲೆ ಆಸ್ತಿಚೆ ಜವಾಬ್ದಾರಿ ಧುವ ತೆಂಡ್ಲ್ಯಾತಿತ್ಲಿ ಆಸ್ಸುಚಿ ಕುಸುಮಾವತಿಕ ದೀವ್ನು ತಾನ್ನಿ ತೀರ್ಥಯಾತ್ರೆಕ ವತ್ತಾಚಿ.
ಕುಸುಮಾವತಿ ಏಕ ದಿವಸ ಚಾಕ್ಕುಲಿ ಖಾವ್ಕಾ ಮ್ಹಣು ಆಶೇನ ಪೀಟ ವಾಟ್ಟುಕ ಬಸತಾ. ತೆ ವೇಳಾರಿ ಕೊಣಕೀ ಘರಾಚೆ ದಾರಾಲಾಗ್ಗಿ ಆಯಿಲೊ ಶಬ್ದ ಆಯ್ಕುನು ಕುಸುಮಾವತಿ ನಿಪ್ಪೊವ್ನು ಬಸ್ತಾ. ದಾರಾಲಾಗ್ಗಿ ಆಯಿಲೊ "ಘರಾಂತು ಕೊಣಂಯೀ ನಾಂಚಿವೇ? ಮಾಕ್ಕಾ ಜೋರು ತಾನಿ ಯೆತ್ತಾ. ಪಿವಚಾಕ ಉದಾಕ ಜಾವ್ಕಾ ಆಶ್ಶಿಲೆ. " ಮ್ಹಣಾಲೊ. ಘರಾಂತು ನಿಶಬ್ಧ ಜಾಲ್ಲೆಲೆ ನಿಮಿತಿ ಕೊಣಂಯಿ ನಾಂಚಿ ದಿಸ್ತಾ ಮ್ಹಣು ಭಿತ್ತರಿ ವತ್ತಾ.
ಥಂಯಿ ರಗಡ್ಯಾರಿ ಪೀಟ ವಾಟ್ಟಿಲೆಲೆ ಪಳವ್ನು ಹಾಂಗಾ ಕೊಣಕಿ ಆಸ್ಸುಕಾ. ಹಾಂವೆ ಆಯಿಲೆ ಕಳ್ನು ನಿಪ್ಪೊವ್ನು ಬಸ್ಲ್ಯಾ ದಿಸ್ತಾ. ತಾಂಕಾ ಬುದ್ಧಿ ಸಿಕೋಕಾ ಮ್ಹಣು ರಗಡ್ಯಾಂತು ಮುತ್ತುನು ವತ್ತಾ. ಸುಮಾರ ವೇಳು ಜಾಲ್ಲೊ. ಕಸ್ಸಲೊಯಿ ಶಬ್ಧ ನಾ ಮ್ಹಣು ಕುಸುಮಾವತಿ ನಿಪ್ಪೊವ್ನು ಬಶ್ಶಿಲೆ ಕಡೆಚಾನ ಬಾಯರ ಯೆತ್ತಾ. ಅರ್ಧಾರಿ ರಾಬ್ಬಯಿಲೆ ವಾಟ್ಟುಚೆ ಕಾಮ ವಾಪಾಸ ಸುರು ಕರ್ನು ವಾಟ್ಟುನು ಕಾಡ್ತಾ. ಆಯಿಲೆ ಮನ್ಶಾನ ತಾಂತು ಮುತ್ತುನು ಚಮ್ಕಲಾ ಮ್ಹಣು ತಿಕ್ಕಾ ಕಳನಿ. ಕುಸುಮಾವತಿ ಚಾಕ್ಕುಲಿ ಕರ್ನು ಖಾತ್ತಾ.
ತಸ್ಸಿಂಚಿ ಥೋಡೆ ದಿವಸಾನಿ ಕುಸುಮಾವತಿಕ ಆಪ್ಪೊ ಖಾವಕಾ ಮ್ಹಣು ಆಶಾ ಜಾತ್ತಾ. ತಾಜ್ಜೆ ಖಾತಿರ ಪೀಟ ವಾಟ್ಟುಚಾಕ ಬಸ್ತಾ. ತೇಚಿ ವೇಳಾರಿ ಪುಳ್ಳೆ ಪಟಿ ಆಯಿಲೊ ಮನಿಶೂಚಿ ತಾಗೆಲೆ ಕಾಮ ಜಾತ್ತರಿ ವಾಪಾಸ ತಾಗೆಲೆ ಗಾಂವಾಂಕ ವಚ್ಚಾಕ ತೇಚಿ ವಾಟ್ಟೆನ ವತ್ತನಾ ತಾಕ್ಕಾ ವಾಪಾಸ ತಾನಿ ಯೆತ್ತಾ. ಪಳಯಿಲ್ಯಾರಿ ಪುಳ್ಳೆ ಪಟ್ಟಿ ಕೊಣಂಯಿ ನಾತ್ತಿಲೆ ಘರಾಂತು ಚಾಕ್ಕುಲಿ ಪೀಟ ಅರ್ಧ ವಾಟ್ಟುನು ದವರ್ಲಲೆ ಘರಾಚೆ ಎದ್ರಾಕಚಿ ತೊ ಆಸ್ಸ. ಆಜಿ ಕೊಣಂಯಿ ಆಸತಾವೆ ಪಳೊವ್ಯಾ ಮ್ಹಣು ಚಿಂತುನ ಘರಾಚೆ ದಾರಾಲಾಗಿ ರಾಬ್ಬುನು "ಕೊಣಂಯಿ ಆಸ್ಸಚಿವೆ? ಹಾಂವ್ ಬೆಳ್ತಂಗಡಿಚೆ ಸಾವುಕಾರ ಸೀತಾರಾಮಾಲೊ ಪೂತು ಶ್ರೀನಿವಾಸ. ಮಾಕ್ಕಾತಾನಿ ಜೋರ ಯೆತ್ತ ಆಸ್ಸ. ಪಿವಚಾಕ ಉದಾಕ ಜಾವಕಾ ಆಸ್ಸಿಲೆ. ಮ್ಹೆಳತವೇ?" ಮ್ಹಣು ನಿಮಗಿತಾ. ಹೆ ಆಯ್ಕುನ ತೆಂಡ್ಲ್ಯಾತಿತಲಿ ಸಾನಿ ಕುಸುಮಾವತಿ ತತ್ಕಾಲ ಸಾರನಿ ಮುಲ್ಯಾಕ ವಚುನು ನಿಪತಾ.
ಶ್ರೀನಿವಾಸು ಭಿತ್ತರಿ ಯೆವ್ನ ಕೊಣಂಯೀ ನಾತಿಲೆ ಪಳವ್ನ ರಗಡ್ಯಾರಿ ಆಸುಚೆ ಪಿಟ್ಟಾಂತು ಮುತ್ತುನ ವತಾ. ತಾಣೆ ವತ್ತರಿ ಕುಸುಮಾವತಿ ಬಾಯರ ಯೆವ್ನ ಪೀಟ ವಾಟ್ಟುನು ಆಪ್ಪೊ ಕಾಣ್ ಖಾತ್ತಾ. ತಶ್ಶಿಂಚಿ ಥೊಡೆ ದಿವಸಾನಿ ತಿ ಗುರ್ಭಿಣಿ ಜಾತ್ತಾ. ನಂವ್ಹ ಮ್ಹಹಿನೆ ಜಾತರಿ ತಿಕ್ಕಾ ಚೆಲ್ಲ್ಯಾ ಚೆರ್ಡು ಜಾತಾ. ತಿ ತಾಕಾ ರಮೇಶ ಮ್ಹಣು ನಾಂವ ದವರತಾ. ತೆ ಚೆರ್ಡು ಪಳಯಿತಾ ಪಳಯಿತಾ ಹೋಡ ಬಸ್‍ಬಸಿ ತೋರ್‍ತೋರಚಿ ಜಾತಾ.
ಚೆರ್ಡಾಕ ಏಕ ವರುಷ ಜಾತನಾ ಬೆಳ್ತಂಗಡಿ ಸೀತಾರಾಮಾಲೊ ಪೂತು ಶ್ರೀನಿವಾಸು ದೋನಿ ಪಟಿ ತೆ ಘರಕಡೆ ಯೆವ್ನ ರಗಡ್ಯಾಂತು ಮುತ್ತುನು ಗೆಲ್ಲಲೊ ತೇಚಿ ವಾಟ್ಟೆರಿ ವತ್ತನಾ ತಾಕ್ಕಾ ಫುಳೊ ಉಡಗಾಸು ಯೆವ್ನು ಆತ್ತ ಕೊಣಂಯಿ ಆಸ್ಸಚಿವೆ? ಮ್ಹಣು ಪಳವಚಾಕ ಘರಾಚೆ ಭಿತ್ತರಿ ಯೆತ್ತಾ. ಕುಸುಮಾವತಿ ಚೆರ್ಡಾಕ ಪಾಳ್ಯಾಂತು ಘಾಲ್ನು ಜೊಂಯಿ ಕಾಡ್ತಚಿ ಆಶ್ಶಿಲೆಕ ಶಬ್ಧ ಆಯ್ಕುನು ಹಾಂತ್ಲಾಚೆ ಕವಳ್ಯಾ ಮಾಗ್ಶಿ ನಿಪ್ಪೊವ್ನು ಬಸ್ತಾ. ಶ್ರೀನಿವಾಸ ಹಾಂಕಾ ಬುದ್ಧಿ ಸಿಕೊಚಾಕ ಚೆರ್ಡಾಕ ಸಮೇತ ಪಾಳ್ಳೆ ವಯರಿ ಕರ್ನು ಬಾಂದೂನು ವತ್ತಾ. ತೆಂಡ್ಲ್ಯೆ(ಕುಸುಮಾವತಿ) ತೆ ಪಳವ್ನು ಕಸ್ಸಲೆ ಕರಚೆ ಮ್ಹಣು ರಡ್ತಾ. ದೇವಾಕ ಆಪ್ಪಯಿತಾ.
ತೇಚಿ ವೇಳಾರಿ ಈಶ್ವರು ಆನಿ ತಾಗೆಲಿ ಬಾಯಲ ಪಾರ್ವತಿ ನಂದಿರಿ ಬಯ್ಸುನು ಆಕಾಶಾಚೆ ಭೊಂವ್ಚಾಕ ವತ್ತಲಿಂಚಿ. ತೆಂಡ್ಲ್ಯಾಚೆ ರಣ್ಯ ಆಯ್ಕುನು ಪಾರ್ವತಿಕ ಪಾಪ ದಿಸ್ತಾ. ಈಶ್ವರಾಲಾಗಿ "ಕಸ್ಸಲೆ ಮ್ಹಣು ಪಳಯಾ ಮ್ಹಳ್ಯಾರಿ! ಚೆಲ್ಲಿ ಏಕಿ ರಡಚೆ ಆಯಕತಾ ಆಸ್ಸ ನಂವೆ? ಆಮ್ಮಿ ವಚ್ಚುನು ಕಸ್ಸಲೆ ಮ್ಹಣು ಪಳವ್ಯಾ. ಜಾಯನಾಂವೆ?" ಮ್ಹಣಾಲಿ. ಈಶ್ವರ ಕೋಪಾನ "ತುಮ್ಕಾ ಬಾಯಲಾಂಕ ಆಪ್ಪೊವ್ನು ಹಾಳ್ಳ್ಯಾರಿ ಅಸ್ಸಿಂಚಿ ಜಾವ್ಚೆ. ಗಮ್ಮತಾಯೆರಿ ಭೊಂವ್ಚಾಕ ಮ್ಹಣು ಆಯಿಲ್ಯಾರಿ ಕೋಣಕೀ ರಡತಾ ಮ್ಹಣು ಭೊಂವ್ಚೆ ಸೊಣು ವಚ್ಚುಕಾ" ಮ್ಹಣಾಲೊ. ತೆದನಾ ಪಾರ್ವತಿಕ ಈಶ್ವರಾಕ ಸಮಾಧಾನ ಕರ್ನು " ತುಮ್ಮಿ ಕಸ್ಸಲೆ, ಕಷ್ಟಾರಿ ಆಸ್ಸಿಲ್ಯಾಂಕ ಸಹಾಯು ಕರಚೆ ಸೊಣು ಗಮ್ಮತಾಯೆರಿ ಭೊಂವ್ಚೆ ಮುಖ್ಯ ಜಾಲ್ಲೆ ನಂವೆ ತುಮ್ಕಾ? ನುಳಿತ ಹಾಂವೆ ಸಾಂಗಿಲ್ಯಾವರಿ ತಿಗೆಲೆ ಕಷ್ಟ ಕಸ್ಸಲೆ ಮ್ಹಣು ಸುರುವೆಕ ಪಳವ್ಯಾ. ನಂತರ ಭೊಂವ್ಯಾ." ಮ್ಹಣಾಲಿ. ಈಶ್ವರು "ಜಾಯ್ತಗೋ ಸಾಯಿಬಿಣಿ, ತುವೆ ಸಾಂಗತರಿ ನಜ್ಜ ಮ್ಹಣಚಾಕ ಆಸ್ಸವೆ ಹಾಂವೆ? ವಚ್ಚಾ." ಮ್ಹಣಾಲೊ.
ಈಶ್ವರ ಆನಿ ಪಾರ್ವತಿ ತೆ ಘರಾಂತು ವತ್ತಾಂಚಿ. ಕುಸುಮಾವತಿಕ ಪಳವ್ನು ಕಸ್ಸಲೆ ಮ್ಹಣು ನಿಮ್ಗಿತಾ ಪಾರ್ವತಿ. ತೆಂಡ್ಲೆ ಕುಸುಮಾವತಿ, ವಯರಿ ಲಾಂಬಯಿಲೆ ಪಾಳ್ಳೆ ದಾಕ್ಕವ್ನು "ಮೆಗೆಲೆ ಚೆರ್ಡು ತೆ ಪಾಳ್ಯಾಂತು ಆಸ್ಸ. ಹಾಂವ್ ಆಸ್ಸ ಇತಲಿ ಸಾನಿ. ಪಾಳ್ಳೆ ತಿತಲೆ ವಯರಿ ಬಾಂದಲ್ಯಾರಿ ಹಾಂವೆ ಕಸ್ಸಲೆ ಕರಚೆ? ಚೆರ್ಡಾಕ ಕಸ್ಸಿ ಕಾಡಚೆ?" ಮ್ಹಣು ರಡತಾ. ಈಶ್ವರಾಕ ಪಾಪ ದಿಸುನು ಚೆರ್ಡು ಪಾಳ್ಳೆ ಸಕಲ ಕರ್ನು ದಿವ್ನು, ತೆಂಡ್ಲೆ ಕುಸುಮಾವತಿಕ ಚಂದಿ ಸೊಳಾ ವರುಷಾಚಿ ಕರನು ಸೊಡ್ತಾ ಆನಿ ತಾನ್ನಿ ವಾಪಾಸ ನಂದಿರಿ ಬಯಸುನು ಭೊಂವ್ಚಾಕ ವತ್ತಾಂಚಿ.
ಹೆರ್‍ದಿವಸು, ಪಾಳ್ಳೆ ವಯರಿ ಬಾಂದುನು ಗೆಲ್ಲಲೊ ಶ್ರೀನಿವಾಸು ಪರತ ಬೆಳ್ತಂಗಡಿಕ ವತ್ತನಾ, ಕಸ್ಸಲೆ ಜಾಲ್ಲಾ ಪಳವ್ಯಾ ಮ್ಹಣು ತೆ ಘರಾಚೆ ಭಿತ್ತರಿ ವತ್ತಾ. ಆತ್ತ ತೆಂಡ್ಲೆ ಕುಸುಮಾವತಿ ಹೋಡಿ ಸುಂದರಿ ಚೆಲ್ಲಿ ಜಾಲ್ಲಾನಂವೆ? ತಸ್ಸಿ ಜಾವ್ನು ಖಂಯಿ ನಿಪ್ಪೊವ್ನು ಬಸಚಾಕ ಜಾಯನಾತ್ತಿಲೆ ಲಜ್ಜೆನ ಮಾತ್ತೆ ಬಾಕ್ಸುನು ರಾಬ್ತಾ. ತಿಕ್ಕಾ ಪಳವ್ನು ಶ್ರೀನಿವಾಸು "ಹಾಂವ ಹೆ ಘರಕಡೆ ಪುಡೆ ತೀನಿ ಪಟಿ ಆಯಿಲೆ ವೇಳಾರಿ ತು ಖಂಯಿ ಗೆಲ್ಲೆಲಿ? ಮಾಕ್ಕಾ ದಿಸ್ಸನಿ." ಮ್ಹಣಾಲೊ. ತಾಕ್ಕಾ ಕುಸುಮಾವತಿ ತಿಗೆಲಿ ಫುಳ್ಳಿ ಕಾಂಣಿ ಸಕ್ಕಡ ಸಾಂಗ್ತಾ.
ತೆ ಆಯಕುನು ಶ್ರೀನಿವಾಸು "ಹಾಂವೆ ಪಾಳ್ಳೆ ವಯರಿ ಬಾಂದಿಲೆ ನಿಮಿತಾನ ತು ರಳ್ಳಿ. ತುಗೆಲೆ ರಣ್ಯ ಆಯಕುನು ಈಶ್ವರ ಆನಿ ಪಾರ್ವತಿ ಯೆವ್ನು ತುಕ್ಕಾ ಚಂದಿ ಸೋಳಾ ವರಸಾಚಿ ಚೆಲ್ಲಿ ಕೆಲ್ಲಿ. ತಸ್ಸಿ ಜಾವ್ನು ಹಾಂವೆ ಕೆಲ್ಲೆಲೆ ಸಕ್ಕಡ ಚಾಂಗಾಕಚಿ ಜಾಲ್ಲೆ ನಂವೆ? ಹೆ ಚೆರ್ಡು ಮೆಗೆಲೆ ನಂವೆ? ತಸ್ಸಿ ಜಾವ್ನು ಆನಿ ಆಮ್ಮಿ ಆಮಗೆಲೆ ಗಾಂವು ಬೆಳ್ತಂಗಡಿಕ ವಚ್ಚಾ. ಥಂಯಿ ಮೆಗೆಲೆ ಆವಯಿ ಆನಿ ಬಾಪಯ ಆಸ್ಸಂಚಿ. ಹೊ ವಿಷಯ ತಾಂಕಾಯಿ ಸಾಂಗುನು ಆಮ್ಮಿ ವ್ಹಾರ್ಡಿಕ ಕರನು ಘೆವ್ಯಾ ಜಾಯಿನಾವೆ?" ಮ್ಹಣಾಲೊ.
ತೇಚಿ ವೇಳಾರಿ ತೀರ್ಥಯಾತ್ರೆಕ ಗೆಲ್ಲೆಲೆ ಜಮಿನ್ದಾರ ರಾಮರಾಯು ಆನಿ ತಾಗೆಲಿ ಬಾಯಲ ಕಮಲಾವತಿ ಆಯಿಲಿಂಚಿ. ತಾಂಕಾ ತಾಂಗೆಲೆ ಘರಕಡೆ ಶ್ರೀನಿವಾಸು, ಕುಸುಮಾವತಿ ಆನಿ ಸಾನ ಚೆರ್ಡಾಕ ಪಳವ್ನು ಆಶ್ಚರ್ಯ ಜಾಲ್ಲೆ. ಆಮ್ಗೆಲೆ ಘರಕಡೆ ಹಾನ್ನಿ ಕೊಣ? ಆಮಗೆಲಿ ತೆಂಡ್ಲೆ ಚೆರ್ಡು ಕುಸುಮಾವತಿ ಖಂಯಿ ಗೆಲ್ಲಿ? ಮ್ಹಣು ಚಿಂತುನು ತಾಂಗೆಲಾಗಿ ತೊ ವಿಷಯ ಸಕ್ಕಡ ನಿಮಿಗಿತಾಂಚಿ. ಶ್ರೀನಿವಾಸು ತಾಗೆಲೊ ಪರಿಚಯ ಆನಿ ಜಾಲ್ಲಲೊ ವಿಷಯ ಸಾಂಗತಾ.
ತೆಂಡ್ಲೆ ಕುಸುಮಾವತಿ ಆನ್ನಾನ ಆನಿ ಆಮ್ಮಾನ ತೀರ್ಥಯಾತ್ರೆಕ ವತ್ತರಿ ಜಾಲ್ಲಲೊ ವಿಷಯು ಸಕ್ಕಡ ಸಾಂಗ್ತಾ. ಜಮಿನ್ದಾರ ರಾಮರಾಯಾಕ ಆನಿ ತಾಗೆಲಿ ಬಾಯಲ ಕಮಲಾವತಿಕ ವಿಷಯ ಸಕ್ಕಡ ಕಳತರಿ ದೇವಾನ ದಿಲ್ಲೆಲೆ ಚೆರ್ಡು ಸಾನ ಆಶ್ಶಿಲೆ ನಿಮಿತಿ ತಾಂಗೆಲೆ ಮನಾಂತುಲಿ ಖಂಥಿ ಆತ್ತ ಗೆಲ್ಲಿ. ತಾನ್ನಿ ಸಂತೋಷಾನ ಶ್ರೀನಿವಾಸ, ಕುಸುಮಾವತಿ ಆನಿ ತಾಂಗೆಲೆ ಚೆರ್ಡು ರಮೇಶಾಕ ಘೆವ್ನು ಬೆಳ್ತಂಗಡಿಕ ಶ್ರೀನಿವಾಸಾಲೆ ಆವಯಿ ಆನಿ ಬಾಪಯಿ ಆಸ್ಸುಚೆ ಕಡೆನ ವತ್ತಾಚಿ. ಹೊ ವಿಷಯ ಸಕ್ಕಡ ತಾಂಕಾಯಿ ಸಾಂಗ್ತಾಚಿ. ನಂತರ ಶ್ರೀನಿವಾಸು ಸಕ್ಕಡಾಲೆ ಎದ್ರಾಕ ಕುಸುಮಾವತಿಕ ವ್ಹಾರ್ಡಿಕ ಕರನು ಘೆತ್ತಾ ಆನಿ ತೆ ಚೆರ್ಡು ತಾಂಗೆಲೆಚಿ ಮ್ಹಳ್ಳಲೊ ವಿಷಯು ಸಾಂಗುನು ಚಂದಾಯೇರಿ ಜೀವನ ಕರನು ಮಸ್ತ ಕಾಳ ಸುಖಾರಿ ಆಸ್ತಾಂಚಿ.

----೦೦೦----